2022 manka ra, tasba aiska ra gabamint nani ba war aiklabanka daknika nani dukiara, 2,24 bilian dalas kau pura yus munan. Mani ailal luan nani ba wal, naha manka ra kau ailal tikan sa. Rusia kuntrika ba Ucrania kuntrika mapara war aiklabi ba mita, baku takan sa. Abril kati 2023 manka ra SIPRI (Instituto Internacional de Estudios para la Paz de Estocolmo) ulbi sakanka kum ra, 2022 manka dukiara naku aisan:

•    War aiklabanka daknika nani dukiara Europ kuntrika nani ba, mani luan ba wal 13% lalah kau tikan sa. 1991 manka wina baha numbika ba kau pâwan sa.

•    “Rusia kuntrika war aiklabaia dukiara lalah yus muni ba 9,2% ulan sa”. Tasba aiska ra war aiklabanka daknika nani ra lalah ailal tiki kuntrika nani tila wina, witin nani ba pliska 5 ra kan, kuna baha tâka witin nani ba pliska 3 ra aimakan.

•    “Tasba aiska ra war aiklabanka daknika nani dukiara lalah yus muni ba tila wina, 39% ba Stech kuntrika mita kau tikisa”. Baha mita witin nani ba ban pas pliska ra aimakisa.

 SIPRI asla takanka wina daktar Nan Tian ba naku win, “Lâs mani nani ra tasba aiska ra, war aiklabanka daknika nani ba kau lalah tikisa, bara baha tâka naha tasba ba piu bani kau saura taki auya sa”.

 Baibil ba pat aisan kan, naiwa piua ra karnika bri gabamintka nani ba ai kupia sauhki, pana pana unsaban lâka kau paki kabia. Baku sin wan smalkisa, nahki kupia kumi lâka rait aihwa pliki sakaia sip ba.

•    Baibil ba wisa yawan lâs tnata piua ra iwisa (Daniel 8:19).

•    Daniel bukka ra aisan kan, naiwa piua ra karnika bri gabamintka nani ba ai kupia sauhki, pana pana unsaban lâka kau paki kabia. Naha gabamintka nani ba pana pana ai “mapara aiklabia”, wibia sa kaka, ya karnika kau bri ba dukiara aiklabisa. Bara baha aiklabanka nani ra “ai yuyaka nani ba sut” tikan kabia (Daniel 11:40, 42, 43).

 Naha dukiara kau nu takaia want sma kaka, Prapit aisanka aimakanka ba Daniel sapta 11 lilkika ba kaikaia sip sma.

•    Baibil ba wisa, Gâd gabamintka ba upla gabamintka nani ra sauhki tikbia. “Kasbrika purara Gâdka ba king lâka kum bukbia bara ban kaia ra sauhki tikan kabia apia, nisan wala kumi mita sin pura lubia apia, ban sakuna, king lâka wala nani sut ra pura lubia, bâra ban kabia ban kaia ra” (Daniel 2:44).

•    Jehova a tisku pali, ban kaia ra naha tasba ra kupia kumi lâka rait aihwa bri balbia. Bara baha ba upla nani sip daukras, witin baman daukaia sip sa. ¿Nahki daukbia? Ai Kingka lâka heven ra ba, naiwa piua ra yawan kaiki trabilka nani, rau munan lâka, bara war aiklabanka lâka nani sut ba âpu daukbia (Lawana Nani 46:8, 9).

 Gâd Kingka lâka dîa daukbia ba dukiara kau nu takaia want sma kaka “El Reino de Dios traerá ‘paz en abundancia’” ulbanka ba aisi kaiks.