Драги браќа и сестри,

Во седмиот век пр.н.е., пророкот Езекиел добил едно посебно видение. Тој видел огромна небесна кочија, со која управувал Севишниот на целиот универзум. Кочијата се движела со молскавична брзина и можела да го смени правецот на движење без да успори, па дури и без да сврти! (Езек. 1:4, 9, 12, 14, 16-27).

Ова видение покажува дека небесниот дел на Јеховината организација постојано е во движење. А како е со земниот дел? Од минатата службена година јасно се гледа дека и Јеховините слуги на Земјата одат напред со брзо темпо!

Овде во САД, членовите на бетелското семејство се зафатени со преселбата од Бруклин во нашето ново главно седиште во Ворвик (Њујорк), како и во други бетелски комплекси или на подрачјето. И во други подружници низ светот, членовите на бетелските семејства се зафатени со градење и реновирање. Освен тоа, некои подружници се споија или се преместија. А како е со вас? Иако можеби не моравте да се преселите, без сомнение бевте зафатени во службата за Јехова.

Многу сме охрабрени кога гледаме дека Божјиот народ низ целиот свет е позафатен од кога и да било порано и држи чекор со Јеховината организација. Многу објавители одлучиле да се преселат на места со поголема потреба од објавители. Други започнале со нов вид служба како, на пример, проповедање на друг јазик. Многумина за првпат пробале некој нов вид на служба или, пак, ја зголемиле својата служба на други начини. Навистина, сите верни христијани, вклучувајќи ги и постарите и болните, истрајно ја трчаат трката која води во живот. Тие се зафатени во службата за Јехова и со тоа покажуваат дека Сатана не е ништо друго освен лажливец! (1. Кор. 9:24).

Бидете уверени дека Јехова ја забележува вашата ревност (Евр. 6:10). Таквата самопожртвуваност нѐ потсетува на Авраам и Сара. Кога имал повеќе од 70 години, Авраам го напуштил родниот град Ур и со своето семејство тргнал кон далечниот Ханаан, иако тоа значело дека ќе живее во шатори сѐ до крајот на својот живот, односно уште сто години. Тој и Сара покажале извонреден, спремен дух! (1. Мој. 11:31; Дела 7:2, 3).

Дали и вие покажувате таков спремен дух? Секој што верно и истрајно му служи на Јехова во овие тешки времиња го прави токму она што го заповедал Исус: „Одете и правете ученици од луѓето од сите народи, крштавајќи ги во името на Таткото и на Синот и на светиот дух“ (Мат. 28:19).

Тоа што Исус рекол „одете“, покажува дека треба да бидеме активни. Радосни сме кога гледаме колку многу се постигна минатата службена година благодарение на трудот што го вложија следбениците на Христос. Јасно е дека Јехова обилно го благословува делото на проповедање со кое им се објавува добрата вест на луѓето од сите народи (Мар. 13:10).

 Многу луѓе ја прифаќаат добрата вест. Изминатата службена година, најголемиот број на објавители беше 8.340.847, и секој месец се водеа просечно по 10.115.264 библиски курсеви. Нема сомнеж дека небесната кочија незапирливо се движи напред! Затоа, продолжете да ја извршувате службата во краткото време што преостанува, сѐ додека Јехова им дава можност на луѓето да се спасат.

Годишниот стих за 2017 год. навистина е соодветен. Тој гласи: „Имај доверба во Јехова и прави добро“ (Пс. 37:3). Кога сте послушни на овие зборови, односно го правите она што е добро така што вршите света служба за Јехова, покажувате дека имате доверба во него. Никогаш не заборавајте дека не сте сами. Исус нема да отстапи од она што го рекол: „Јас сум со вас во сите денови до свршетокот на овој поредок“ (Мат. 28:20).

Јехова ќе продолжи да ја благословува вашата верна служба. Сеедно колку можете да правите за него, тој цени кога го давате своето најдобро и кога го правите тоа од исправни мотиви. Таквите дарови го радуваат, и тој ги прифаќа со драго срце (2. Кор. 9:6, 7). Затоа, и понатаму зајакнувајте го пријателството со вашиот небесен Татко така што редовно ќе се молите, ќе ја проучувате Библијата, ќе присуствувате на состаноците и ќе бидете зафатени во проповедничкото дело.

Бидејќи на Ѓаволот му останува уште „кратко време“, тој е решен да направи сѐ што е во негова моќ за да ја скрши вашата верност кон Бог (Отк. 12:12). Сепак, сѐ додека сте близу до Јехова, колку и да се обидува, Ѓаволот нема да успее во својата цел (Пс. 16:8). Многу ве сакаме и го цениме сето она што го правите во службата за Господарот во овие последни денови.

Вашите браќа,

Governing Body of Jehovah’s Witnesses