ВИДИ ГИ цветовите и зрелите бадеми што растат од овој стап. Тоа е стапот на Арон. Само за една ноќ, на него расцветале овие цветови и се родиле зрели плодови! Да видиме зошто се случило тоа.

Израелците извесно време талкале низ пустината. Тогаш некои од народот почнале да мислат дека Мојсеј не треба да биде водач и дека Арон не треба да биде првосвештеник. Кореј бил еден што мислел така, а такви биле и Датан, Авирон и 250 водачи на народот. Сите тие дошле и му рекле на Мојсеј: 'Зошто се поставуваш себеси над сите нас?‘

Мојсеј им рекол на Кореј и на неговите следбеници: 'Утре наутро земете кадилници и ставете темјан во нив. Тогаш дојдете во Јеховиниот свет шатор, па ќе видиме кого Јехова ќе го избере‘.

Следниот ден, Кореј и неговите 250 следбеници дошле пред светиот шатор. Со нив дошле и многу други за да ги поддржат. Јехова бил многу лут. 'Оддалечете се од шаторите на овие лоши луѓе!‘ — рекол Мојсеј. 'Не допирајте се до ништо што им припаѓа ним!‘ Народот го послушал Мојсеј и се оддалечил од шаторите на Кореј, Датан и Авирон.

Тогаш Мојсеј рекол: 'По ова ќе знаете кого избрал Јехова: земјата ќе се отвори и ќе ги голтне овие лоши луѓе!‘

Штом Мојсеј престанал да зборува, земјата се отворила, и во неа паднале шаторите и сиот имот на Кореј, како и Датан, и Авирон, и сите што биле со нив. Потоа земјата се затворила над нив. Кога ги чул извиците на тие што ги голтнала земјата, народот повикал: 'Бегајте! Земјата може да нѐ голтне и нас!‘

Кореј и неговите 250 следбеници сѐ уште биле близу до светиот шатор. Затоа Јехова пуштил оган, и сите тие изгореле. Тогаш Јехова му рекол на Ароновиот син Елеазар да ги земе кадилниците од мртвите луѓе, од нив да направи тенки метални листови и со нив да го обложи жртвеникот. Таа облога требало да им служи на Израелците како знак дека никој друг освен Арон и неговите синови не можел да служи како свештеник на Јехова.

Но Јехова сакал да покаже многу јасно дека за свештеници ги избрал Арон и неговите синови. Затоа му рекол на Мојсеј: 'По еден водач од секое племе на Израел нека го донесе својот стап. За племето на Леви, Арон нека го донесе својот стап. Потоа стави ги сите овие стапови во светиот шатор пред ковчегот на сојузот. Стапот на оној што ќе го изберам да биде свештеник ќе расцвета‘.

Следното утро, Мојсеј отишол да види што се случило, а таму на Ароновиот стап расцветале овие цветови и пораснале зрели бадеми! Дали сега сфаќаш зошто Јехова предизвикал да расцвета Ароновиот стап?

4. Мојсеева 16:1-49; 17:1-11; 26:10.