Многу луѓе не сакаат да имаат ништо со Бог бидејќи сметаат дека тој е виновен за страдањата.

На директен или индиректен начин, многу верски водачи поучуваат дека Бог е виновен за нашето страдање. На пример, некои го велат следново:

• Природните катастрофи се казна од Бог.

• Децата умираат бидејќи на Бог му требаат повеќе ангели на небото.

• Бог зазема страна во војните, кои се причина за страдањето на многу луѓе.

Но, можно ли е верските водачи да го прикажуваат Бог во погрешно светло? Што ако Бог не ги одобрува нив?

Бог не ги предизвикува нашите страдања.

Ако тој е виновен за страдањата, тоа би било во спротивност со неговите особини кои ги дознаваме од Библијата. На пример:

„Сите [Божји] патишта се правда... Праведен е и вистинољубив“ (5. МОЈСЕЕВА 32:4).

„Не е можно вистинскиот Бог да прави зло, Семоќниот да постапува неправедно!“ (ЈОВ 34:10).

„Семоќниот не ја извртува правдата“ (ЈОВ 34:12).

Бог не ги одобрува религиите кои шират лаги за него.

Во нив спаѓаат религиите кои поучуваат дека Бог ги предизвикува страдањата и религиите кои ги одобруваат војните и насилството.

„Тие пророци пророкуваат лага во мое [Божје] име. Ниту ги испратив, ниту им дадов некаква заповед, ниту им реков нешто. Тие ви пророкуваат од своето срце лажни виденија... и измами“ (ЕРЕМИЈА 14:14).

Исус го осудил лицемерството на верските водачи.

„Не секој што ми вели: ’Господару, Господару‘, ќе влезе во небесното царство, туку оној што ја врши волјата на мојот Татко, кој е на небесата. Мнозина ќе ми речат во оној ден: ’Господару, Господару, не пророкувавме ли во твое име, и не истерувавме ли демони во твое име, и не правевме ли многубројни моќни дела во твое име?‘ Тогаш ќе им речам: ’Никогаш не сум ве познавал! Бегајте од мене, вие што правите беззаконија!‘“ (МАТЕЈ 7:21-23).