Наскоро ќе дојде крај на стрпливоста што Јехова ја покажува кон овој свет. Ќе биде уништена лажната религија, една коалиција од сите народи ќе го нападне Божјиот народ и Јехова ќе ги уништи злобните во Армагедон. Христијаните едвај чекаат да се случат тие значајни настани.

Се разбира, ние не ги знаеме сите детали за големата неволја. На пример, не знаеме кога точно ќе започне таа. Не знаеме кои причини ќе ги наведат политичките сили за да го оправдаат својот напад врз религијата. Не знаеме колку долго ќе трае нападот на коалицијата врз Божјиот народ и што сѐ ќе биде вклучено во него. Исто така, не знаеме што точно ќе користи Јехова за да ги уништи злобните во Армагедон.

Но, Библијата ни ги дава сите информации што ни се потребни за да можеме храбро и со доверба во Јехова да ги очекуваме тие настани. На пример, знаеме дека живееме на крајот од „последните денови“ (2Ти 3:1). Знаеме дека нападот врз лажните религии ќе биде скратен за да не биде уништена и вистинската религија (Мт 24:22). Знаеме дека Јехова ќе го избави својот народ (2Пе 2:9). И знаеме дека оној што Јехова го избрал да ги уништи злобните и да го заштити големото мноштво во Армагедон е праведен и моќен (От 19:11, 15, 16).

Кога ќе се случуваат тие работи, „луѓето ќе губат свест од страв“. Но, ако читаме и размислуваме за тоа како Јехова во минатото го спасувал својот народ и за она што ни го открил за иднината, ќе можеме со потполна доверба да го очекуваме нашето избавување. Така ќе можеме да го послушаме поттикот од Исус: „Кога ќе почне да се случува сето тоа, исправете се и подигнете ги главите, бидејќи се приближува вашето избавување“ (Лк 21:26, 28).