Библијата ни кажува дека од сите живи суштества на Земјата, само одреден број луѓе се избрани да одат на небото (Откровение 14:1, 3). Тие на небото ќе владеат со Исус како цареви и свештеници (Лука 22:28-30; Откровение 5:9, 10). Додека, пак, поголемиот број од луѓето ќе воскреснат за да живеат во рајот на Земјата (Псалм 37:11, 29).

 Никаде во Библијата не е спомнато дека после смртта домашните миленичиња одат на небото. Тоа е така од една многу важна причина. За да може некој да добие „небесен позив“ мора да исполни одредени услови (Евреите 3:1). На пример, потребно е да стекне знаење за Бог, да покажува вера во него и да биде послушен на неговите заповеди (Матеј 19:17; Јован 3:16; 17:3). Животните не можат да ги исполнат овие услови. Само луѓето се создадени со можност да живеат засекогаш (1. Мојсеева 2:16, 17; 3:22, 23).

 За некој да оди на небото, најпрво треба да умре, а потоа да биде воскреснат (1. Коринќаните 15:42). Во Библијата се спомнати неколку воскресенија (1. Царевите 17:17-24; 2. Царевите 4:32-37; 13:20, 21; Лука 7:11-15; 8:41, 42, 49-56; Јован 11:38-44; Дела 9:36-42; 20:7-12). Но, во сите нив станува збор за луѓе, а не за животни.

•  Дали животните имаат душа?

•  Дали душата умира?

•  Дали животните грешат?

•  Дали е во ред да се малтретираат животните?

 Не. Библијата ни кажува дека и животните и луѓето се души (4. Мојсеева 31:28). Кога бил создаден првиот човек, Адам, нему не му била дадена душа, туку тој станал жива душа (1. Мојсеева 2:7). Душата се состои од две работи: земен прав и здив на животот.

 Да. Библијата кажува дека душата умира (3. Мојсеева 21:11, фуснота; Езекиел 18:20). Кога ќе умрат, и животните и луѓето се враќаат во земниот прав (Проповедник 3:19, 20). Со други зборови, тие веќе не постојат. a

 Не. Кога некој греши, всушност, размислува на погрешен начин, развива желба кон нешто што е неисправно или, пак, прави нешто што е погрешно. Грев може да направи само оној што има способност да одлучува што е исправно, а што не. Животните ја немаат таа способност. Во текот на својот ограничен живот, тие главно се водат според инстинкт (2. Петрово 2:12). Иако не грешат, на крајот од својот животен век умираат.

 Не. Бог им дал на луѓето право да владеат над животните, но не им дал право да ги малтретираат (1. Мојсеева 1:28; Псалм 8:6-8). Бог се грижи за секое животно, па дури и за малите птици (Јона 4:11; Матеј 10:29). На своите слуги им заповедал со животните да постапуваат внимателно и обѕирно (2. Мојсеева 23:12; 5. Мојсеева 25:4; Изреки 12:10).