ഇന്നു നേരിടുന്ന ഭക്ഷ്യക്ഷാമത്തെക്കുറിച്ച് ബൈബിൾ എന്താണു പറയുന്നത്?
“വിശപ്പുരഹിത ലോകം.” ലോകനേതാക്കന്മാർ വെച്ചിരിക്കുന്ന ഒരു ലക്ഷ്യമാണ് ഇത്. ഇന്നു മനുഷ്യർ നേരിടുന്ന ഏറ്റവും വലിയ ഒരു പ്രതിസന്ധി എല്ലാവർക്കും വേണ്ടത്ര ഭക്ഷണം ലഭിക്കുന്നില്ല എന്നതാണ്. a ലോകത്ത് എന്നെങ്കിലും പട്ടിണി ഇല്ലാത്ത ഒരു കാലം വരുമോ? ബൈബിൾ എന്താണു പറയുന്നത്?
ഇന്നു നേരിടുന്ന ഭക്ഷ്യക്ഷാമത്തെക്കുറിച്ച് ബൈബിൾ മുൻകൂട്ടിപ്പറഞ്ഞിരിക്കുന്നു
ബൈബിൾ ‘അവസാനകാലം’ എന്നു വിളിക്കുന്ന ഇക്കാലത്ത് ഭക്ഷ്യക്ഷാമം ഉണ്ടാകുമെന്ന് മുന്നമേ പറഞ്ഞിട്ടുണ്ട്. (2 തിമൊഥെയൊസ് 3:1) എന്നാൽ ഈ ഭക്ഷ്യക്ഷാമത്തിനു കാരണക്കാരൻ ദൈവമല്ല, എങ്കിലും അതു വരുമെന്ന് ദൈവം മുന്നറിയിപ്പു തന്നിട്ടുണ്ട്. (യാക്കോബ് 1:13) ഇതെക്കുറിച്ചുള്ള രണ്ടു ബൈബിൾപ്രവചനങ്ങൾ നോക്കാം.
‘പല സ്ഥലങ്ങളിൽ ഭക്ഷ്യക്ഷാമങ്ങൾ ഉണ്ടാകും.’ (മത്തായി 24:7) ഭക്ഷ്യോത്പാദനത്തെയും വിതരണത്തെയും കുറിച്ച് പഠിക്കുന്ന ചിലരുടെ റിപ്പോർട്ട് ഇങ്ങനെ പറയുന്നു: “ഭക്ഷ്യസുരക്ഷ ഉറപ്പുവരുത്താനും പട്ടിണിയും വികലപോഷണവും അവസാനിപ്പിക്കാനും ഉള്ള മനുഷ്യന്റെ ശ്രമങ്ങൾ ഇന്നു പരാജയപ്പെട്ടുകൊണ്ടിരിക്കുകയാണ്.” b പല രാജ്യങ്ങളിലെയും ലക്ഷക്കണക്കിന് ആളുകൾക്ക് ആവശ്യമായ ഭക്ഷണം ലഭിക്കുന്നില്ല. ഇതു കാരണം പലരുടെയും ജീവൻ നഷ്ടപ്പെടുന്നു എന്നതാണ് സങ്കടകരമായ കാര്യം.
“അതാ, ഒരു കറുത്ത കുതിര! കുതിരപ്പുറത്ത് ഇരിക്കുന്നവന്റെ കൈയിൽ ഒരു ത്രാസ്സുണ്ടായിരുന്നു.” (വെളിപാട് 6:5) ഈ പ്രവചനത്തിൽ ആലങ്കാരിക അർഥത്തിൽ പറഞ്ഞിരിക്കുന്ന കുതിരയും കുതിരപ്പുറത്ത് ഇരിക്കുന്നവനും ചിത്രീകരിക്കുന്നത് അവസാനകാലത്തെ ക്ഷാമത്തെയാണ്. c കുതിരസവാരിക്കാരന്റെ കൈയിൽ ഇരിക്കുന്ന ത്രാസ്സ് കുറച്ച് ഭക്ഷണം മാത്രം റേഷനായി തൂക്കിക്കൊടുക്കുന്നതിനെയാണ് അർഥമാക്കുന്നത്. ഈ സവാരിക്ക് ഇടയിൽ ഭക്ഷണസാധനങ്ങളുടെ വില കുതിച്ചുയരുന്നു എന്നും അതുകൊണ്ട് ആളുകൾ അടിസ്ഥാന ഭക്ഷണസാധനങ്ങൾ ശേഖരിച്ചുവെക്കണം എന്നും ഉള്ള മുന്നറിയിപ്പു നൽകുന്ന ഒരു ശബ്ദം കേൾക്കുന്നു. (വെളിപാട് 6:6) ഇന്ന് ആളുകൾ നേരിടുന്ന ആഗോളഭക്ഷണ പ്രതിസന്ധിയെ ഇതു വരച്ചുകാട്ടുന്നു. കോടിക്കണക്കിന് ആളുകൾക്ക് ഇന്നു വേണ്ടത്ര ഭക്ഷണം ലഭിക്കുന്നില്ല, അല്ലെങ്കിൽ അതു വാങ്ങാനുള്ള വക അവർക്കില്ല.
ഭക്ഷ്യക്ഷാമത്തിന് ഒരു അവസാനം
എല്ലാ മനുഷ്യർക്കും വേണ്ടതിലധികം ഭക്ഷണം ഈ ഭൂമി ഉത്പാദിപ്പിക്കുന്നുണ്ട് എന്നാണ് വിദഗ്ധർ പറയുന്നത്. അപ്പോൾപ്പിന്നെ എന്തുകൊണ്ടാണ് ഭക്ഷ്യക്ഷാമം ഉണ്ടാകുന്നത്? നമ്മുടെ സ്രഷ്ടാവായ യഹോവ d ഈ പ്രശ്നത്തിന് ഒരു പരിഹാരം കൊണ്ടുവരുന്നതിനെക്കുറിച്ച് ബൈബിളിൽ എന്താണു പറയുന്നത്?
പ്രശ്നം: ജനങ്ങളെ പട്ടിണിയിലാക്കുന്ന ദാരിദ്ര്യവും സാമ്പത്തിക അസമത്വവും ഇല്ലാതാക്കാൻ ഗവൺമെന്റുകൾക്കു കഴിയില്ല.
പരിഹാരം: കുറവുകൾ ഉള്ള മനുഷ്യഗവൺമെന്റുകളെ മാറ്റി എല്ലാം തികഞ്ഞ ഒരു ഗവൺമെന്റ് വരും—ദൈവരാജ്യം എന്ന ഗവൺമെന്റ്. (ദാനിയേൽ 2:44; മത്തായി 6:10) ഇന്ന് അനേകം ആളുകൾ ആഹാരത്തിനു വകയില്ലാതെ കഷ്ടപ്പെടുന്നു. എന്നാൽ ദൈവരാജ്യത്തിൽ ഇതിനെല്ലാം ഒരു മാറ്റം വരും. ദൈവരാജ്യത്തിന്റെ രാജാവായ യേശുക്രിസ്തുവിനെക്കുറിച്ച് ബൈബിൾ ഇങ്ങനെ പറയുന്നു: “സഹായത്തിനായി കേഴുന്ന ദരിദ്രനെ അവൻ രക്ഷിക്കും; എളിയവനെയും ആരോരുമില്ലാത്തവനെയും അവൻ വിടുവിക്കും. . . . ഭൂമിയിൽ ധാന്യം സുലഭമായിരിക്കും; മലമുകളിൽ അതു നിറഞ്ഞുകവിയും.”—സങ്കീർത്തനം 72:12, 16.
പ്രശ്നം: യുദ്ധം മൂലമുള്ള നാശനഷ്ടങ്ങളും സാമ്പത്തിക അസ്ഥിരതയും കാരണം ആളുകൾക്ക് വേണ്ടത്ര ഭക്ഷണം കിട്ടുന്നില്ല.
പരിഹാരം: “(യഹോവ) ഭൂമിയിലെങ്ങും യുദ്ധങ്ങൾ നിറുത്തലാക്കുന്നു. വില്ല് ഒടിച്ച് കുന്തം തകർക്കുന്നു, യുദ്ധവാഹനങ്ങൾ കത്തിച്ചുകളയുന്നു.” (സങ്കീർത്തനം 46:9) ദൈവം യുദ്ധത്തിന് ഉപയോഗിക്കുന്ന ആയുധങ്ങളും അതിന്റെ കാരണക്കാരെയും നശിപ്പിക്കും. അങ്ങനെ എല്ലാ ആളുകൾക്കും നല്ല ഭക്ഷണം എളുപ്പത്തിൽ കിട്ടും. ബൈബിൾ ഇങ്ങനെ ഉറപ്പു നൽകുന്നു: ‘നീതിമാൻ തഴച്ചുവളരും; സമാധാനസമൃദ്ധിയുണ്ടാകും.’—സങ്കീർത്തനം 72:7.
പ്രശ്നം: മോശമായ കാലാവസ്ഥയും പ്രകൃതിദുരന്തങ്ങളും കാരണം വിളകൾ നശിക്കുകയും മൃഗങ്ങൾ ചത്തൊടുങ്ങുകയും ചെയ്യുന്നു.
പരിഹാരം: ദൈവം പ്രകൃതിശക്തികളെ നിയന്ത്രിക്കും. ഭക്ഷ്യോത്പാദനത്തിന് അനുയോജ്യമായ കാലാവസ്ഥ ഒരുക്കും. ബൈബിൾ പറയുന്നു: “(യഹോവ) കൊടുങ്കാറ്റു ശാന്തമാക്കുന്നു; കടലിലെ തിരമാലകൾ അടങ്ങുന്നു. . . . ദൈവം മരുഭൂമിയെ ഈറ്റകൾ വളരുന്ന ജലാശയമാക്കുന്നു, വരണ്ട നിലത്തെയോ നീരുറവകളും. വിശക്കുന്നവരെ ദൈവം അവിടെ താമസിപ്പിക്കുന്നു; . . . അവർ വയലിൽ വിതയ്ക്കുന്നു, മുന്തിരിത്തോട്ടങ്ങൾ നട്ടുണ്ടാക്കുന്നു. അവ സമൃദ്ധമായ വിളവ് തരുന്നു.”—സങ്കീർത്തനം 107:29, 35-37.
പ്രശ്നം: അത്യാഗ്രഹികളും അഴിമതിക്കാരും ആയ ആളുകൾ സുരക്ഷിതമല്ലാത്ത ഭക്ഷണം ഉത്പാദിപ്പിക്കുന്നു. അല്ലെങ്കിൽ ആവശ്യമുള്ളവർക്ക് ഭക്ഷണം ലഭിക്കുന്നതു തടയുന്നു.
പരിഹാരം: ദൈവരാജ്യം സത്യസന്ധരല്ലാത്തവരെയും അഴിമതിക്കാരെയും ഇല്ലാതാക്കും. (സങ്കീർത്തനം 37:10, 11; യശയ്യ 61:8) “വഞ്ചനയ്ക്കിരയായവർക്കു നീതി നടത്തിക്കൊടുക്കുന്നവൻ; വിശന്നിരിക്കുന്നവന് ആഹാരം നൽകുന്നവൻ” എന്നാണ് ബൈബിൾ യഹോവയെക്കുറിച്ച് പറയുന്നത്.—സങ്കീർത്തനം 146:7.
പ്രശ്നം: ലോകത്തിലെ ഭക്ഷ്യവിതരണത്തിന്റെ മൂന്നിലൊന്ന് ഓരോ വർഷവും പാഴാകുകയോ നഷ്ടപ്പെടുകയോ ചെയ്യുന്നു.
പരിഹാരം: ദൈവരാജ്യത്തിൽ ഉത്പാദിപ്പിക്കപ്പെടുന്ന ഭക്ഷണം കൈകാര്യം ചെയ്യുന്നത് ഏറ്റവും നല്ല രീതിയിലായിരിക്കും. ഭൂമിയിലായിരുന്നപ്പോൾ യേശു ഭക്ഷണമൊന്നും പാഴാക്കിയില്ല. ഉദാഹരണത്തിന്, ഒരവസരത്തിൽ യേശു 5,000-ത്തിലധികം വരുന്ന ആളുകളെ അത്ഭുതകരമായി പോഷിപ്പിച്ചു. പിന്നീട് യേശു ശിഷ്യന്മാരോടു പറഞ്ഞു: “മിച്ചമുള്ള കഷണങ്ങളെല്ലാം എടുക്കുക. ഒന്നും കളയരുത്.”—യോഹന്നാൻ 6:5-13.
ഇന്ന് പട്ടിണിക്ക് ഇടയാക്കുന്ന എല്ലാ കാര്യങ്ങളും ദൈവരാജ്യത്തിൽ ഇല്ലാതാകും. അങ്ങനെ എല്ലാ മനുഷ്യർക്കും പോഷകപ്രദമായ ആഹാരം സമൃദ്ധമായി ലഭിക്കും. (യശയ്യ 25:6) ദൈവരാജ്യം എപ്പോഴായിരിക്കും ഈ കാര്യങ്ങൾ നടപ്പിലാക്കുക എന്നറിയാൻ “ദൈവരാജ്യം എന്നായിരിക്കും ഭൂമിയിൽ ഭരണം തുടങ്ങുന്നത്?” എന്ന ലേഖനം കാണുക.
a 2015-ൽ ഐക്യരാഷ്ട്ര സംഘടനയിലെ അംഗങ്ങൾ മുന്നോട്ടുവെച്ച സുസ്ഥിര വികസന അജണ്ട, 2030.
b ഐക്യരാഷ്ട്രസംഘടനയുടെ ഭക്ഷ്യ കാർഷികസംഘടനയും അന്താരാഷ്ട്ര കാർഷിക വികസനനിധിയും ഐക്യരാഷ്ട്ര ശിശുക്ഷേമനിധിയും ഐക്യരാഷ്ട്രസംഘടനയുടെ ലോക ഭക്ഷ്യപരിപാടിയും ലോകാരോഗ്യ സംഘടനയും ചേർന്ന് ഇറക്കിയ റിപ്പോർട്ട്.
c വെളിപാട് പുസ്തകത്തിലെ നാലു കുതിരസവാരിക്കാരെക്കുറിച്ചുള്ള കൂടുതൽ വിവരങ്ങൾ അറിയാൻ “നാലു കുതിരസവാരിക്കാർ ആരാണ്?” എന്ന ലേഖനം കാണുക.
d ദൈവത്തിന്റെ പേരാണ് യഹോവ. (സങ്കീർത്തനം 83:18) “യഹോവ ആരാണ്?” എന്ന ലേഖനം കാണുക.