ഉണർന്നിരിക്കുക!
തോക്കുകൾക്കു മുന്നിൽ ജീവൻ പൊലിയുന്നു—ബൈബിളിനു പറയാനുള്ളത്
2022 ജൂലൈ മാസം ലോകത്തിന്റെ പല ഭാഗങ്ങളിൽ വെടിവെപ്പിലൂടെ പലരുടെയും ജീവൻ പൊലിഞ്ഞു:
“ജപ്പാനിലെ പേരുകേട്ട ഒരു രാഷ്ട്രീയ നേതാവിന്റെ (മുൻ പ്രധാനമന്ത്രി ഷിൻസോ ആബെ) കൊലപാതകം രാജ്യത്തെ ഇളക്കിമറിച്ചു. അക്രമനിരക്ക് കുറവുള്ള രാജ്യമായ ജപ്പാനിൽ തോക്ക് ഉപയോഗിക്കുന്നതിന് കർശനമായ നിയമങ്ങളുണ്ട്. എന്നിട്ടും ഇങ്ങനെയൊരു സംഭവമുണ്ടായത് ലോകത്തെ ഞെട്ടിച്ചു.”—2022 ജൂലൈ 10, ദ ജപ്പാൻ ടൈംസ്.
“ഡെന്മാർക്ക് ഭീതിയിൽ: കോപ്പൻഹേഗനിലെ ഒരു ഷോപ്പിങ് മാളിൽ ആയുധധാരിയായി വന്ന ഒരാൾ മൂന്നു പേരെ വെടിവെച്ച് കൊന്നു.”—2022 ജൂലൈ 4, റോയ്റ്റേഴ്സ്.
“സൗത്ത് ആഫ്രിക്ക: സൊവേറ്റോയിലുള്ള ഒരു ബാറിൽ ആയുധധാരികളായി വന്ന ചിലർ 15 പേരെ വെടിവെച്ച് കൊന്നു.”—2022 ജൂലൈ 10, ദ ഗാർഡിയൻ.
“ജൂലൈ 4-നും അതിനടുത്ത അവധിദിവസങ്ങളിലുമായി ഐക്യനാടുകളിൽ വെടിവെപ്പുണ്ടായി. 220-ലധികം ആളുകൾ കൊല്ലപ്പെട്ടു.”—2022 ജൂലൈ 5, സിബിഎസ് ന്യൂസ്.
ഇതുപോലുള്ള അക്രമങ്ങളെല്ലാം എന്നെങ്കിലും അവസാനിക്കുമോ? ബൈബിൾ എന്താണ് പറയുന്നത്?
അക്രമങ്ങൾക്ക് ഒരു അവസാനം
നമ്മൾ ജീവിക്കുന്ന ഈ സമയം ‘അവസാനകാലമാണെന്ന്’ ബൈബിൾ പറയുന്നു. ആ സമയത്ത് ആളുകളുടെ പ്രവൃത്തികൾ വളരെ ക്രൂരവും നീചവും ആയിരിക്കും. (2 തിമൊഥെയൊസ് 3:1, 3) അക്രമാസക്തമായ അത്തരം പ്രവൃത്തികൾ ആളുകളുടെ ജീവിതം ഭീതിയിലാഴ്ത്തുന്നു. (ലൂക്കോസ് 21:11) എങ്കിലും ഈ പ്രശ്നങ്ങളെല്ലാം ഒരുനാൾ അവസാനിക്കുമെന്ന് ബൈബിൾ ഉറപ്പു തരുന്നു. അന്ന് ആളുകൾ “സമാധാനം കളിയാടുന്ന വാസസ്ഥലങ്ങളിൽ പാർക്കും, സുരക്ഷിതമായ ഭവനങ്ങളിലും പ്രശാന്തമായ ഗൃഹങ്ങളിലും വസിക്കും.” (യശയ്യ 32:18) എങ്ങനെയായിരിക്കും അക്രമം അവസാനിക്കുക?
ദൈവം ദുഷ്ടന്മാരെ ഇല്ലാതാക്കുകയും ആയുധങ്ങളെല്ലാം നശിപ്പിക്കുകയും ചെയ്യും.
“എന്നാൽ ദുഷ്ടന്മാരെ ഭൂമിയിൽനിന്ന് ഇല്ലാതാക്കും.”—സുഭാഷിതങ്ങൾ 2:22.
“ദൈവം ഭൂമിയിലെങ്ങും യുദ്ധങ്ങൾ നിറുത്തലാക്കുന്നു. വില്ല് ഒടിച്ച് കുന്തം തകർക്കുന്നു, യുദ്ധവാഹനങ്ങൾ കത്തിച്ചുകളയുന്നു.”—സങ്കീർത്തനം 46:9.
സമാധാനത്തോടെ ജീവിക്കാൻ ആളുകളെ പഠിപ്പിച്ചുകൊണ്ട് ദൈവം അക്രമത്തിന്റെ അടിസ്ഥാന കാരണങ്ങൾ നീക്കം ചെയ്യും.
“അവ എന്റെ വിശുദ്ധപർവതത്തിൽ ഒരിടത്തും ഒരു നാശവും വരുത്തില്ല, ഒരു ദ്രോഹവും ചെയ്യില്ല. കാരണം, സമുദ്രത്തിൽ വെള്ളം നിറഞ്ഞിരിക്കുന്നതുപോലെ ഭൂമി മുഴുവൻ യഹോവയുടെ പരിജ്ഞാനം നിറഞ്ഞിരിക്കും.”—യശയ്യ 11:9.
‘വാളുകൾ കലപ്പകളായും കുന്തങ്ങൾ അരിവാളുകളായും അടിച്ചുതീർക്കുന്നതിന്’ ഇപ്പോൾതന്നെ ദൈവം അക്രമങ്ങളും ആയുധങ്ങളും ഒഴിവാക്കാൻ ആളുകളെ പഠിപ്പിക്കുന്നു.—മീഖ 4:3.
ഭയമില്ലാതെ ജീവിക്കാനാകുന്ന ഒരു ലോകത്തെക്കുറിച്ച് ബൈബിൾ ഉറപ്പുതരുന്നു. അതെക്കുറിച്ച് അറിയാനായി, “ഭയത്തിൽനിന്നുള്ള മോചനം അതു സാധ്യമോ?” എന്ന ലേഖനം വായിക്കുക.
അക്രമം എന്നേക്കുമായി അവസാനിക്കുന്നതിനെക്കുറിച്ച് അറിയാനായി, “ഒടുവിൽ ഭൂമിയിൽ സമാധാനം!” എന്ന ലേഖനം വായിക്കുക.