ഉണർന്നിരിക്കുക!
ആഗോള സൈനിക ചെലവ് 2 ട്രില്യൺ ഡോളർ കടന്നു—ബൈബിളിനു പറയാനുള്ളത്
2022-ൽ സൈന്യത്തിനായി ലോകമെങ്ങും ചെലവഴിച്ച തുക സർവകാല റെക്കോർഡാണ്. 2.24 ട്രില്യൺ യു.എസ്. ഡോളർ! (2,24,000 കോടി ഡോളർ) റഷ്യ-യുക്രെയിൻ ആക്രമണത്തെത്തുടർന്നാണ് ഇത്രയും വലിയ വർധനവ്. 2023 ഏപ്രിലിൽ, സ്റ്റോക്ഹോം ഇന്റർനാഷനൽ പീസ് റിസർച്ച് ഇൻസ്റ്റിറ്റ്യൂട്ട് (എസ്ഐപിആർഐ) പുറത്തുവിട്ട റിപ്പോർട്ട് അനുസരിച്ച്, 2022-ൽ:
യൂറോപ്പിന്റെ സൈനിക ചെലവ് “ഈ വർഷം 13 ശതമാനം വർധിച്ചു. ശീതയുദ്ധത്തിനു ശേഷം യൂറോപ്പിലുണ്ടായ ഏറ്റവും വലിയ വാർഷിക വർധനവാണ് ഇത്.”
“റഷ്യ . . . സൈന്യത്തിനായി ചെലവാക്കിയ തുക മുൻവർഷത്തെക്കാൾ ഏകദേശം 9.2 ശതമാനം കൂടുതലായിരുന്നു. ഇക്കാര്യത്തിൽ ലോകത്തിൽ അഞ്ചാം സ്ഥാനത്തായിരുന്ന റഷ്യ ഇതോടെ മൂന്നാം സ്ഥാനത്തേക്ക് ഉയർന്നു.”
സൈന്യത്തിനായി പണം ചെലവഴിക്കുന്ന കാര്യത്തിൽ അമേരിക്കൻ ഐക്യനാടുകളാണ് ഇപ്പോഴും ഒന്നാം സ്ഥാനത്ത്. “ലോകത്താകെ സൈന്യങ്ങൾക്കായി മുടക്കിയ തുകയുടെ 39 ശതമാനവും ചെലവാക്കിയത് അമേരിക്കയാണ്.”
എസ്ഐപിആർഐ റിപ്പോർട്ട് തയ്യാറാക്കുന്നതിൽ ഉൾപ്പെട്ട ഡോ. നാൻ ടിയാൻ പറയുന്നു: “കഴിഞ്ഞ കുറച്ച് വർഷങ്ങളായി ലോകത്തെ സൈനിക ചെലവ് കൂടിവരുകയാണ് എന്ന വസ്തുത സൂചിപ്പിക്കുന്നത്, സുരക്ഷിതത്വം കുറഞ്ഞുകൊണ്ടിരിക്കുന്ന ഒരു ലോകത്തിലാണ് നമ്മൾ ജീവിക്കുന്നത് എന്നാണ്.”
ലോകശക്തികൾ തമ്മിലുള്ള പ്രശ്നങ്ങൾ കൂടിക്കൂടിവരുന്നതിനെക്കുറിച്ചും സമാധാനത്തിനുള്ള ഒരേ ഒരു വഴിയെക്കുറിച്ചും ബൈബിൾ മുൻകൂട്ടിപ്പറഞ്ഞിട്ടുണ്ട്.
മുൻകൂട്ടിപ്പറഞ്ഞ സൈനികപോരാട്ടങ്ങളുടെ വർധനവ്
നമ്മൾ ജീവിക്കുന്നത് ‘അവസാനകാലത്ത്’ ആണെന്ന് ബൈബിൾ പറയുന്നു.—ദാനിയേൽ 8:19.
ആ സമയത്ത് തമ്മിൽ അടിക്കുന്ന ലോകശക്തികൾ ഉണ്ടായിരിക്കുമെന്ന് ദാനിയേലിന്റെ പുസ്തകം മുൻകൂട്ടിപ്പറയുന്നു. ആ ലോകശക്തികൾ തമ്മിൽ “ഏറ്റുമുട്ടും” അല്ലെങ്കിൽ പ്രാമുഖ്യതയ്ക്കുവേണ്ടി പരസ്പരം പോരടിക്കും. അതിനായി അവരുടെ വലിയ ‘നിധികൾ,’ അവരുടെ സമ്പത്ത് അവർ ചെലവഴിക്കും.—ദാനിയേൽ 11:40, 42, 43.
ആവേശമുണർത്തുന്ന ഈ ബൈബിൾപ്രവചനത്തെക്കുറിച്ച് കൂടുതൽ മനസ്സിലാക്കാൻ നിവൃത്തിയേറിയ പ്രവചനം—ദാനിയേൽ 11-ാം അധ്യായം എന്ന വീഡിയോ കാണുക.
യഥാർഥസമാധാനത്തിനുള്ള വഴി
ഇപ്പോഴുള്ള മനുഷ്യഗവൺമെന്റുകളെ ദൈവം നീക്കിക്കളയുമെന്നു ബൈബിൾ പറയുന്നു. “ദൈവം ഒരിക്കലും നശിച്ചുപോകാത്ത ഒരു രാജ്യം സ്ഥാപിക്കും. ആ രാജ്യം മറ്റൊരു ജനതയ്ക്കും കൈമാറില്ല. ഈ രാജ്യങ്ങളെയെല്ലാം തകർത്ത് ഇല്ലാതാക്കിയിട്ട് അതു മാത്രം എന്നും നിലനിൽക്കും.”—ദാനിയേൽ 2:44.
നിലനിൽക്കുന്ന യഥാർഥസമാധാനം കൊണ്ടുവരാൻ മനുഷ്യർക്കു കഴിയില്ല. പക്ഷേ ദൈവമായ യഹോവ a ഉടനെ അതു കൊണ്ടുവരും. എന്നാൽ എങ്ങനെ? ദൈവത്തിന്റ സ്വർഗീയഗവൺമെന്റ് ആയുധങ്ങൾ എല്ലാം ഇല്ലാതാക്കും; അക്രമങ്ങൾ നിറുത്തലാക്കും.—സങ്കീർത്തനം 46:8, 9.
ദൈവരാജ്യത്തിന്റെ അനുഗ്രഹങ്ങളെക്കുറിച്ച് കൂടുതൽ അറിയാൻ “ദൈവരാജ്യത്തിൽ ‘സമാധാനസമൃദ്ധിയുണ്ടാകും’” എന്ന ലേഖനം വായിക്കുക.
a ദൈവത്തിന്റെ പേരാണ് യഹോവ.—സങ്കീർത്തനം 83:18.