സഹായം തേടുക
സഹായം തേടുക
“തനിച്ചായിരിക്കുന്ന ഒരാളെ ആരെങ്കിലും കീഴ്‌പെടുത്തിയേക്കാം. പക്ഷേ രണ്ടു പേർ ഒരുമിച്ചാണെങ്കിൽ അവർക്ക്‌ എതിർത്തുനിൽക്കാനാകും.”—സഭാപ്രസംഗകൻ 4:12.
സഹായിക്കാൻ ആരെങ്കിലും കൂടെയുണ്ടെങ്കിൽ നമുക്ക്‌ എതിരെ വരുന്ന ശത്രു എത്ര ശക്തനാണെങ്കിലും നമ്മൾ വിജയിക്കാനുള്ള സാധ്യത കൂടുതലാണ്‌. പുകവലി എന്ന ദുശ്ശീലത്തിന്റെ കാര്യത്തിലും ഇതു സത്യമാണ്‌. നിങ്ങളുടെ കുടുംബാംഗങ്ങളുടെയോ സുഹൃത്തുക്കളുടെയോ നിങ്ങളെ ആത്മാർഥമായി സഹായിക്കുന്ന ക്ഷമയുള്ള മറ്റ്‌ ആരുടെയെങ്കിലുമോ സഹായം തേടുന്നതു ശരിക്കും പ്രയോജനം ചെയ്‌തേക്കും.
ഇനി, പുകവലി ശീലമുണ്ടായിരുന്നിട്ട്‌ അതു നിറുത്തിയവരുടെ സഹായം ചോദിക്കുന്നതിനെക്കുറിച്ച്‌ ചിന്തിക്കുക. കാരണം അവർക്കു നിങ്ങളോടു സഹതാപം കാണിക്കാൻ മാത്രമല്ല നിങ്ങളെ സഹായിക്കാനും പറ്റും. ഡെന്മാർക്കിലുള്ള ഒരു ക്രിസ്‌ത്യാനിയായ റ്റോർബെൻ പറയുന്നു: “മറ്റുള്ളവരുടെ സഹായം എനിക്ക്‌ എത്ര ഗുണം ചെയ്‌തെന്നോ.” ഇന്ത്യയിൽനിന്നുള്ള എബ്രാഹാം പറയുന്നു: “കുടുംബാംഗങ്ങളും സഹക്രിസ്‌ത്യാനികളും കാണിച്ച ആത്മാർഥമായ സ്‌നേഹമാണ്‌ ഇതു നിറുത്താൻ എന്നെ സഹായിച്ചത്‌.” പക്ഷേ ചിലപ്പോൾ കുടുംബാംഗങ്ങളുടെയും സുഹൃത്തുക്കളുടെയും സഹായം മാത്രം മതിയാകില്ല.
ഭഗ്‌വാൻ ദാസ്‌ എന്ന ഒരാൾ പറയുന്നു: “27 വർഷത്തോളം ഞാൻ പുകവലിച്ചു. പക്ഷേ അശുദ്ധമായ ശീലങ്ങളെക്കുറിച്ച്‌ ബൈബിൾ പറയുന്ന കാര്യങ്ങൾ മനസ്സിലാക്കിയപ്പോൾ അതു നിറുത്താൻ ഞാൻ തീരുമാനിച്ചു. ആദ്യം ഞാൻ എണ്ണം കുറയ്‌ക്കാൻ നോക്കി. വലിക്കുന്നവരുമായുള്ള എന്റെ കൂട്ടുകെട്ടു നിറുത്തി, കൗൺസിലിങ്ങിനും പോയി. ഒന്നും ശരിയായില്ല. ഒടുവിൽ ഒരു ദിവസം രാത്രി ദൈവമായ യഹോവയോടു ഞാൻ എല്ലാം പറഞ്ഞ്‌ പ്രാർഥിച്ചു. ഇതു നിറുത്താൻ സഹായിക്കണേ എന്നു യാചിച്ചു. അങ്ങനെ ഒടുവിൽ ഞാൻ ആ ശീലം ഉപേക്ഷിച്ചു.”
ചെയ്യേണ്ട പ്രധാനപ്പെട്ട മറ്റൊരു കാര്യമുണ്ട്‌. നിങ്ങളുടെ മുമ്പിൽ വന്നേക്കാവുന്ന ചില പ്രതിബന്ധങ്ങളെ നേരിടാൻ മുൻകൂട്ടി തയ്യാറായിരിക്കുക. ഏതൊക്കെയാണ്‌ അവ? അടുത്ത ലേഖനം അതിന്‌ ഉത്തരം തരും.
[ചതുരം]
മരുന്നുകൊണ്ട്‌ നിറുത്താനാകുമോ?
പുകവലി ശീലം നിറുത്താൻ ആളുകളെ സഹായിക്കുന്ന ചില മരുന്നുകളുണ്ട്‌. നിക്കോട്ടിൻ അടങ്ങിയ നിക്കോട്ടിൻ പാച്ച്‌ എന്ന സ്റ്റിക്കർ അതിന്‌ ഒരു ഉദാഹരണമാണ്‌. ഇത്തരം മരുന്നുകളുടെ ഉത്‌പാദനം ശതകോടിക്കണക്കിന്‌ ഡോളറിന്റെ ഒരു വ്യവസായമാണ്‌. എന്നാൽ ആ രീതി സ്വീകരിക്കുന്നതിനു മുമ്പ്‌ ഇക്കാര്യങ്ങളെക്കുറിച്ച്‌ ഒന്നു ചിന്തിക്കുക:
പ്രയോജനങ്ങൾ എന്തെല്ലാം? ചില ചികിത്സാരീതികൾക്കു പുകവലി നിറുത്തുമ്പോൾ ഉണ്ടാകുന്ന അസ്വസ്ഥതകൾ കുറയ്‌ക്കാനാകുമെന്നു കരുതപ്പെടുന്നു. അപ്പോൾ ആ ദുശ്ശീലത്തിൽനിന്ന്‌ പുറത്തുകടക്കാൻ ആളുകൾക്ക്‌ എളുപ്പമാകുമെന്നാണു പറയപ്പെടുന്നത്‌. എങ്കിലും ഇതിന്റെ ഫലപ്രാപ്‌തി എത്രനാൾ നീണ്ടുനിൽക്കുമെന്ന കാര്യത്തിൽ രണ്ട്‌ അഭിപ്രായമുണ്ട്‌.
അപകടസാധ്യതകൾ എന്തെല്ലാം? ചില മരുന്നുകൾക്കു മനംപിരട്ടൽ, വിഷാദം, ആത്മഹത്യാപ്രവണത തുടങ്ങിയ പാർശ്വഫലങ്ങൾ ഉണ്ടായേക്കാം. പുകവലിക്കുമ്പോൾ ശരീരത്തിൽ എത്താറുള്ള നിക്കോട്ടിൻ മറ്റ്‌ രീതികളിൽ ശരീരത്തിൽ പ്രവേശിപ്പിക്കുന്ന ചികിത്സാരീതികളുണ്ട്‌. അപ്പോഴും നിക്കോട്ടിൻ മറ്റൊരു രൂപത്തിൽ ശരീരത്തിൽ എത്തുകതന്നെയാണു ചെയ്യുന്നത്‌. അതിന്‌ അതിന്റേതായ അപകടസാധ്യതകൾ അപ്പോഴുമുണ്ട്‌. മാത്രമല്ല, അത്തരം ചികിത്സാരീതികൾ സ്വീകരിക്കുന്നവർ ആ സമയത്തും ലഹരിയിൽനിന്ന്‌ മുക്തി നേടുന്നില്ല എന്നതാണു വാസ്‌തവം.
മറ്റു പ്രതിവിധികളുണ്ടോ? ഒരു സർവേയനുസരിച്ച്‌ പുകവലി നിറുത്തിയ 88 ശതമാനം പേരും മരുന്നുകളുടെയൊന്നും സഹായം കൂടാതെ ഒറ്റയടിക്ക്‌ ആ ദുശ്ശീലം നിറുത്തുകയായിരുന്നു.