കഥ 29
മോശെ ഓടിപ്പോയതിന്റെ കാരണം
നോക്കൂ, മോശെ ഇപ്പോൾ ഈജിപ്‌തിൽനിന്ന്‌ ഓടിപ്പോകുകയാണ്‌. അവനെ പിടിക്കാനായി പുറകെ ഓടുന്ന ആ ആളുകളെ കണ്ടോ? അവർ എന്തിനാണ്‌ മോശെയെ കൊല്ലാൻ ആഗ്രഹിക്കുന്നതെന്ന്‌ അറിയാമോ? നമുക്കു നോക്കാം.
ഈജിപ്‌തിലെ രാജാവായ ഫറവോന്റെ കൊട്ടാരത്തിലാണു മോശെ വളർന്നത്‌. അവൻ വളരെ ബുദ്ധിമാനും മഹാനും ആയിത്തീർന്നു. താൻ ഒരു ഈജിപ്‌തുകാരൻ അല്ലെന്നും തന്റെ മാതാപിതാക്കൾ ഇസ്രായേല്യ അടിമകളാണെന്നും മോശെക്ക്‌ അറിയാമായിരുന്നു.
ഒരു ദിവസം, തന്റെ ജനം എങ്ങനെയിരിക്കുന്നു എന്നു പോയി നോക്കുവാൻ മോശെ തീരുമാനിച്ചു. അവന്‌ അപ്പോൾ 40 വയസ്സായിരുന്നു. മോശെയുടെ ജനത്തോട്‌ അതിക്രൂരമായിട്ടായിരുന്നു ഈജിപ്‌തുകാർ ഇടപെട്ടിരുന്നത്‌. ഒരു ഇസ്രായേല്യ അടിമയെ ഒരു ഈജിപ്‌തുകാരൻ അടിക്കുന്നത്‌ മോശെ കണ്ടു. അവൻ ചുറ്റും നോക്കി, ആരും കാണുന്നില്ലെന്ന്‌ ഉറപ്പായപ്പോൾ അവൻ ആ ഈജിപ്‌തുകാരനെ അടിച്ചുകൊന്നു. എന്നിട്ട്‌ ശവം മണലിൽ മറവുചെയ്‌തു.
അടുത്ത ദിവസവും മോശെ തന്റെ ജനത്തെ കാണാൻ പോയി. അടിമത്തത്തിൽനിന്ന്‌ അവരെ രക്ഷിക്കാൻ തനിക്കു കഴിയുമെന്ന്‌ അവൻ വിചാരിച്ചു. അപ്പോൾ രണ്ട്‌ ഇസ്രായേല്യർ തമ്മിൽ വഴക്കടിക്കുന്നത്‌ അവൻ കണ്ടു. മോശെ അടുത്തു ചെന്ന്‌ തെറ്റു ചെയ്‌ത ആളോടു ചോദിച്ചു: ‘നീ എന്തിനാണ്‌ നിന്റെ കൂട്ടുകാരനെ തല്ലുന്നത്‌?’
അപ്പോൾ അയാൾ മോശെയോടു ചോദിച്ചു: ‘നിന്നെ ഞങ്ങൾക്കു രാജാവും ന്യായാധിപതിയും ആക്കിയത്‌ ആരാണ്‌? ആ ഈജിപ്‌തുകാരനെ കൊന്നതുപോലെ എന്നെയും കൊല്ലാൻ നോക്കുകയാണോ?’
ഇതു കേട്ടപ്പോൾ മോശെക്കു പേടിയായി. ഈജിപ്‌തുകാരനെ കൊന്നത്‌ ആളുകൾ അറിഞ്ഞിരിക്കുന്നു എന്ന്‌ അവനു മനസ്സിലായി. ഫറവോൻ ഇതുകേട്ടപ്പോൾ മോശെയെ കൊല്ലാൻ ആളുകളെ അയച്ചു. അതുകൊണ്ടാണ്‌ അവന്‌ ഈജിപ്‌തിൽനിന്ന്‌ ഓടിപ്പോകേണ്ടിവന്നത്‌.
മോശെ ഈജിപ്‌തിൽനിന്ന്‌ ദൂരെയുള്ള മിദ്യാനിലേക്കാണു പോയത്‌. അവിടെ അവൻ യിത്രോ എന്ന ഒരാളുടെ കുടുംബത്തെ കണ്ടുമുട്ടി, യിത്രോയുടെ പെൺമക്കളിൽ ഒരാളായ സിപ്പോറയെ വിവാഹം കഴിച്ചു. മോശെ ഒരു ഇടയനായി യിത്രോയുടെ ആടുകളെ മേയ്‌ച്ചുപോന്നു. 40 വർഷം അവൻ മിദ്യാന്യ ദേശത്തു താമസിച്ചു. അവന്‌ ഇപ്പോൾ 80 വയസ്സായി. ഒരു ദിവസം മോശെ യിത്രോയുടെ ആടുകളെ മേയ്‌ച്ചുകൊണ്ടിരിക്കെ അവന്റെ ജീവിതം അപ്പാടെ മാറ്റിമറിച്ച അത്ഭുതകരമായ ഒരു സംഗതി സംഭവിച്ചു. അടുത്ത പേജിലേക്കു മറിക്കുക, അത്ഭുതകരമായ ആ സംഗതി എന്തായിരുന്നെന്നു നമുക്കു നോക്കാം.
