അധ്യായം 3

ലോക​ത്തി​ലെ മതങ്ങൾ ശരിയായ മാർഗ്ഗ​ദർശനം നൽകു​ന്നു​വോ?

1. ലോക​ത്തി​ലെ മതങ്ങളെ സംബന്ധിച്ച്‌ ഏതു സുപ്ര​ധാന ചോദ്യ​ങ്ങൾ ഇവിടെ ഉന്നയി​ക്ക​പ്പെ​ട്ടി​രി​ക്കു​ന്നു?

 “മതം ചരി​ത്ര​ത്തി​ലെ അത്യന്തം ശക്തമായ സ്വാധീ​ന​ങ്ങ​ളി​ലൊ​ന്നാ​യി​രു​ന്നി​ട്ടുണ്ട്‌,”²⁸ എന്നു ദി വേൾഡ്‌ ബുക്ക്‌ എൻ​സൈ​ക്ലോ​പീ​ഡി​യാ പ്രസ്‌താ​വി​ക്കു​ന്നു. എന്നാൽ ലോക​ത്തി​ലെ മതങ്ങൾ സമാധാ​ന​ത്തി​നും സുരക്ഷി​ത​ത്വ​ത്തി​നും വേണ്ടി​യു​ളള ഒരു യഥാർത്ഥ സ്വാധീ​ന​മാ​യി​രു​ന്നി​ട്ടു​ണ്ടോ? സഹോദര സ്‌നേഹം ദേശീയ അതിർത്തി​കൾക്കും ജാതി​വ്യ​ത്യാ​സ​ങ്ങൾക്കും അതീത​മാ​യി തീരണ​മെന്ന്‌ അവ അവയുടെ അനുയാ​യി​കളെ പഠിപ്പി​ച്ചി​ട്ടു​ണ്ടോ? കൂടാതെ, കത്തോ​ലിക്ക, പ്രൊ​ട്ട​സ്‌റ​റൻറ്‌, ഓർത്ത​ഡോ​ക്‌സ്‌ എന്നിവ​പോ​ലു​ളള ക്രൈ​സ്‌തവ മണ്ഡലത്തി​ലെ മതങ്ങൾ “സമാധാന പ്രഭു”വായ ക്രിസ്‌തു​വി​ന്റെ അനുയാ​യി​ക​ളാണ്‌ തങ്ങളെന്ന അവകാ​ശ​വാ​ദം സത്യമാ​ണെന്ന്‌ തെളി​യി​ച്ചി​ട്ടു​ണ്ടോ? അതോ അവ മമനു​ഷ്യ​ന്റെ ഭാവിയെ അപകട​ത്തി​ലാ​ക്കുന്ന വിദ്വേ​ഷം വളർത്താൻ യഥാർത്ഥ​ത്തിൽ സഹായി​ച്ചി​ട്ടു​ണ്ടോ? ചരി​ത്ര​രേ​ഖ​യു​ടെ ഒരു പരി​ശോ​ധന ആശ്ചര്യ​ജ​ന​ക​മായ ഉത്തരം നൽകും.

2. ചരി​ത്ര​പ​ര​മായ രേഖയെ സംബന്ധിച്ച്‌ വിവിധ ഉറവുകൾ നമ്മോ​ടെന്തു പറയുന്നു?

² ഇതു സംബന്ധിച്ച്‌ പരേഡ്‌ മാസിക ഇപ്രകാ​രം പറഞ്ഞു: “പഠിക്കാൻ മനസ്സൊ​രു​ക്ക​മു​ള​ള​വരെ ചരിത്രം പാഠങ്ങൾ പഠിപ്പി​ക്കു​ന്നു. മതങ്ങളു​ടെ​യോ മതത്തി​നു​ള​ളി​ലെ അവാന്തര വിഭാ​ഗ​ങ്ങ​ളു​ടെ​യോ അഭി​പ്രായ ഭിന്നത​കളെ അടിസ്ഥാ​ന​മാ​ക്കി​യു​ളള സംഘട്ട​ന​ങ്ങ​ളാണ്‌ മിക്ക​പ്പോ​ഴും ഏററം ഹീനവും, ദീർഘി​ക്കു​ന്ന​തും പരിഹ​രി​ക്കാൻ ഏററം പ്രയാ​സ​മു​ള​ള​തും എന്നതാണ്‌ ചരിത്രം പഠിപ്പി​ക്കുന്ന അടിസ്ഥാന പാഠങ്ങ​ളി​ലൊന്ന്‌.”²⁹ചിക്കാ​ഗോ ട്രിബ്യൂൺ പ്രസ്‌താ​വി​ച്ച​പ്ര​കാ​രം: “എല്ലാ പ്രമുഖ മതങ്ങളും തന്നെ സമാധാ​ന​വും സാഹോ​ദ​ര്യ​വും കരുണ​യും പ്രസം​ഗി​ക്കു​ന്നു. എന്നാൽ ചരി​ത്ര​ത്തി​ലെ ഏററം ക്രൂര​വും അസഹി​ഷ്‌ണു​ത​യോ​ടു​കൂ​ടി​യ​തു​മായ അടിച്ച​മർത്ത​ലു​ക​ളിൽ പലതും ദൈവ​ത്തി​ന്റെ പേരി​ലാ​യി​രു​ന്നു നടന്നത്‌.”³⁰ അത്തരം ചരി​ത്ര​വ​സ്‌തു​തകൾ മനസ്സിൽ പിടി​ച്ചു​കൊണ്ട്‌ ഒരു പത്രാ​ധി​പ​നായ സി. എൻ. സുൾസ്‌ബേർജർ ഉചിത​മാ​യി ചോദി​ക്കു​ന്നു: “ഈ വിഷയം അസുഖ​ക​ര​മാ​ണെ​ങ്കി​ലും സാമ്രാ​ജ്യ​വാ​ദം, വർഗ്ഗീയ  വാദം, സൈനീക മേധാ​വി​ത്വം എന്നീ കാരണ​ങ്ങ​ളോ​ടൊ​പ്പം മതം കൂടെ കൂടെ മാനവ ജീവന്‌ ഒരു കൂടിയ ഭീഷണി​യാ​യി വികാസം പ്രാപി​ച്ചി​രി​ക്കു​ന്നു എന്ന്‌ നാം തിരി​ച്ച​റി​യേ​ണ്ട​തല്ലേ?”³¹

3. നമ്മുടെ 20-ാം നൂററാ​ണ്ടി​ന്റെ ചരിത്രം മതത്തിന്റെ ഏതു ലജ്ജാക​ര​മായ നടപടി വെളി​പ്പെ​ടു​ത്തു​ന്നു?

³ അതെ, ചരിത്രം മതപര​മായ പിന്തു​ണ​യു​ളള പോരാ​ട്ട​ങ്ങ​ളു​ടെ രക്തത്താൽ കറപു​ര​ണ്ട​താണ്‌. നമ്മുടെ ഈ നൂററാ​ണ്ടിൽത്തന്നെ രണ്ടു ലോക​മ​ഹാ​യു​ദ്ധ​ങ്ങ​ളി​ലും അവയ്‌ക്കു​ശേ​ഷ​വും ഒരേ മത വിശ്വാ​സ​ത്തിൽപ്പെ​ട്ടവർ—കത്തോ​ലി​ക്കർ കത്തോ​ലി​ക്ക​രെ​യും പ്രൊ​ട്ട​സ്‌റ​റൻറു​കാർ പ്രൊ​ട്ട​സ്‌റ​റൻറു​കാ​രെ​യും മുസ്ലീങ്ങൾ മുസ്ലീ​ങ്ങ​ളെ​യും അതു​പോ​ലെ മററു​ള​ള​വ​രും—പരസ്‌പരം കൊല്ലുന്ന ലജ്ജാക​ര​മായ നടപടി നാം നേരിൽ കണ്ടിട്ടുണ്ട്‌. കൂടാതെ, എതിർ പക്ഷങ്ങളി​ലു​ളള പുരോ​ഹി​തൻമാർ ഒരേ മതത്തിൽപെ​ട്ട​വ​രാ​ണ​ങ്കി​ലും മതപര​മായ തങ്ങളുടെ സഹോ​ദ​രൻമാ​രെ കൊല്ലാൻ പുറ​പ്പെ​ടുന്ന സൈനീ​കരെ അനു​ഗ്ര​ഹി​ച്ചി​ട്ടുണ്ട്‌.

4. (എ) ക്രൈ​സ്‌തവ മണ്ഡലത്തി​ലെ സഭകൾ ഏററം നിന്ദാർഹ​മാ​യി​രി​ക്കു​ന്ന​തെ​ന്തു​കൊണ്ട്‌? (ബി) യുദ്ധത്തെ സംബന്ധിച്ച്‌ ഒരു മുഖ​പ്ര​സം​ഗം എന്തഭി​പ്രാ​യ​പ്പെ​ടു​ന്നു?

⁴ ഇക്കാര്യ​ത്തിൽ ഏററം നിന്ദാർഹ​മാ​യത്‌ ക്രൈ​സ്‌തവ മണ്ഡലത്തി​ലെ മതങ്ങളാണ്‌. എന്തു​കൊണ്ട്‌? എന്തു​കൊ​ണ്ടെ​ന്നാൽ അവർ ബൈബി​ളി​ലെ ദൈവ​ത്തെ​യും, “നിങ്ങൾക്കു തമ്മിൽ തമ്മിൽ സ്‌നേ​ഹ​മു​ണ്ടെ​ങ്കിൽ നിങ്ങൾ എന്റെ ശിഷ്യൻമാ​രാ​ണെന്ന്‌ എല്ലാവ​രും അറിയും” എന്നു പറഞ്ഞ അവന്റെ പുത്ര​നെ​യും പ്രതി​നി​ധാ​നം ചെയ്യു​ന്ന​താ​യി അവകാ​ശ​പ്പെ​ടു​ന്നു. (യോഹ​ന്നാൻ 13:35) എന്നാൽ ഏററം മോശ​മായ കൂട്ട​ക്കൊ​ലകൾ നടന്നി​ട്ടു​ള​ളത്‌ ക്രൈ​സ്‌തവ ലോക​ത്തി​ന്റെ ഹൃദയ​ഭാ​ഗ​ത്തു​ത​ന്നെ​യാണ്‌. ഇയ്യോ​വ​യി​ലെ വാട്ടർലൂ കൂറി​യ​റി​ന്റെ ഒരു മുഖ​പ്ര​സം​ഗം പ്രഖ്യാ​പി​ച്ച​പ്ര​കാ​രം: “ക്രിസ്‌ത്യാ​നി​കൾക്കൊ​രി​ക്ക​ലും മററു ക്രിസ്‌ത്യാ​നി​കൾക്കെ​തി​രെ യുദ്ധം ചെയ്യു​ന്ന​തിൽ മടുപ്പു തോന്നി​യി​ട്ടില്ല. തോന്നി​യി​രു​ന്നെ​ങ്കിൽ യൂറോ​പ്പി​ലെ ഉശിരൻ യുദ്ധങ്ങ​ളിൽ ഒന്നും തന്നെ നടക്കു​മാ​യി​രു​ന്നില്ല. . . . ക്രിസ്‌ത്യാ​നി​കൾ ക്രിസ്‌ത്യാ​നി​കളെ കൊല്ലു​ന്ന​തിൽ സർവ്വകാല റിക്കാർഡ്‌ സ്ഥാപിച്ച ഒന്നും രണ്ടും ലോക​മ​ഹാ​യു​ദ്ധങ്ങൾ നടക്കു​മാ​യി​രു​ന്നില്ല.”³²

5. (എ) യഥാർത്ഥ​ത്തിൽ ദൈവത്തെ സേവി​ക്കു​ന്ന​വ​രോട്‌ ബൈബിൾ വ്യക്തമാ​യി എന്തു പറയുന്നു? (ബി) തങ്ങളുടെ സ്വന്തം സഭകളെ സംബന്ധിച്ച്‌ സഭാം​ഗങ്ങൾ എന്തു ചോദ്യം അഭിമു​ഖീ​ക​രി​ക്കണം?

⁵ ഈ സംഗതി സംബന്ധിച്ച്‌ ബൈബിൾ പറയു​ന്നത്‌ വളരെ വ്യക്തമാണ്‌: യഥാർത്ഥ​ത്തിൽ ദൈവത്തെ സേവി​ക്കു​ന്നവർ  “സമാധാ​നം അനേഷി​ക്കാ​നും അതിനെ പിന്തു​ട​രാ​നും,” “അവരുടെ വാളു​കളെ കൊഴു​ക്ക​ളാ​യി അടിച്ചു തീർക്കാ​നും,” “മേലാൽ യുദ്ധം അഭ്യസി​ക്കാ​തി​രി​ക്കാ​നും” തന്നെ. (1 പത്രോസ്‌ 3:11; യെശയ്യാവ്‌ 2:2-4) “ദുഷ്ടനാ​യ​വ​ങ്കൽനിന്ന്‌ [പിശാ​ചായ സാത്താ​നിൽനിന്ന്‌] ഉത്ഭവി​ക്കു​ക​യും സ്വന്തം സഹോ​ദ​രനെ കൊല്ലു​ക​യും ചെയ്‌ത കയീ​നെ​പ്പോ​ലെ ആയിരി​ക്കാ​തെ നാം അന്യോ​ന്യം സ്‌നേ​ഹി​ക്കേണം.” (1 യോഹ​ന്നാൻ 3:10-12) എന്നാൽ ഈ ലോക​മ​ത​ങ്ങ​ളു​ടെ അനുയാ​യി​കൾ കയീ​നെ​പ്പോ​ലെ തങ്ങളുടെ സഹോ​ദ​രൻമാ​രെ കൊല്ലു​ന്ന​തിൽ തുടരു​ന്നു. അവയിലെ പുരോ​ഹി​തൻമാ​രാ​കട്ടെ ആ ഗതി പിന്തു​ട​രു​ന്ന​വർക്കു പിന്തുണ കൊടു​ക്കു​ക​യും ചെയ്‌തി​രി​ക്കു​ന്നു. നിങ്ങൾ ഒരു മതത്തിൽ ഉൾപ്പെ​ട്ട​യാ​ളാ​ണെ​ങ്കിൽ നിങ്ങ​ളോ​ടു​തന്നെ ചോദി​ക്കുക: ‘ലോക​ത്തി​ലു​ളള എല്ലാവ​രും എന്റെ മതത്തിൽപ്പെ​ട്ട​വ​രാ​യി​രു​ന്നെ​ങ്കിൽ യുദ്ധങ്ങൾ ഇല്ലാതാ​വു​ക​യും ഈ ഭൂമി യഥാർത്ഥ​സ​മാ​ധാ​ന​മു​ളള ഒരു സ്ഥലമാ​യി​ത്തീ​രു​ക​യും ചെയ്യു​മാ​യി​രു​ന്നോ?’

6. ലോക​ത്തി​ലെ മതങ്ങളു​ടെ ഭിന്നി​ച്ച​തും പരസ്‌പരം പോരാ​ടു​ന്ന​തു​മായ അവസ്ഥ എന്തു തെളി​യി​ക്കു​ന്നു?

⁶ ലോക​മ​ത​ങ്ങ​ളു​ടെ ഭിന്നി​ച്ച​തും അന്യോ​ന്യം ഏററു​മു​ട്ടു​ന്ന​തു​മായ അവസ്ഥ അവരെ പിന്താ​ങ്ങു​ന്നത്‌ ദൈവമല്ല എന്നു തെളി​യി​ക്കു​ന്നു. ദൈവത്തെ പ്രതി​നി​ധാ​നം ചെയ്യു​ന്ന​താ​യി അവകാ​ശ​പ്പെ​ടു​ന്ന​തു​കൊണ്ട്‌ എല്ലാമ​ത​വും നല്ലതാ​ണെന്നു വിചാ​രി​ക്കു​ന്ന​വർക്ക്‌ ഇത്‌ ആശ്ചര്യ​ക​ര​മാ​യി തോന്നി​യേ​ക്കാം. എന്നാൽ “ദൈവം കലക്കത്തി​ന്റെ ദൈവമല്ല സമാധാ​ന​ത്തി​ന്റെ ദൈവ​മാണ്‌” എന്ന്‌ ബൈബിൾ വ്യക്തമാ​യി കാണി​ക്കു​ന്നു. (1 കൊരി​ന്ത്യർ 14:33) സത്യമ​ത​വും വ്യാജ​മ​ത​വും ഉണ്ടെന്നും അതു കാണി​ക്കു​ന്നു. സത്യത്തിൽ അധിഷ്‌ഠി​ത​മായ, കപട​വേ​ഷ​ത്തിൽനിന്ന്‌ സ്വത​ന്ത്ര​മായ ആരാധ​ന​യ്‌ക്കു മാത്രമേ ദൈവ​ത്തി​ന്റെ പിന്തുണ ഉളളു എന്നും അതു പ്രസ്‌താ​വി​ക്കു​ന്നു.—മത്തായി 15:7-9; യോഹ​ന്നാൻ 4:23, 24; തീത്തോസ്‌ 1:16.

7. (എ) ലോക​മ​ത​ങ്ങളെ വർണ്ണി​ക്കാൻ ബൈബിൾ ഏതു പദപ്ര​യോ​ഗങ്ങൾ ഉപയോ​ഗി​ക്കു​ന്നു? (ബി) അവർക്കെ​തി​രെ എന്തു കുററം ആരോ​പി​ക്ക​പ്പെ​ട്ടി​രി​ക്കു​ന്നു?

⁷ ലോക​ത്തി​ലെ മതങ്ങൾ രാഷ്‌ട്രീ​യ​വും വ്യാപാ​ര​പ​ര​വും സാമൂ​ഹി​ക​വു​മായ നേട്ടങ്ങൾക്കു​വേണ്ടി ഫലത്തിൽ വ്യഭി​ചാ​ര​വൃ​ത്തി​യിൽ ഏർപ്പെ​ട്ടി​ട്ടു​ള​ള​തി​നാൽ ബൈബിൾ അവ ഒരു വേശ്യ​യാ​യി​രി​ക്കു​ന്ന​താ​യി ചിത്രീ​ക​രി​ക്കു​ന്നു. ഈ “വേശ്യ”യെപ്പററി അതു പറയുന്നു: “ഭൂമി​യിൽ കൊല​ചെ​യ്യ​പ്പെ​ട്ടി​ട്ടു​ളള സകലരു​ടെ​യും രക്തം അവളിൽ കാണ​പ്പെ​ട്ടി​രി​ക്കു​ന്നു.” (വെളി​പ്പാട്‌ 17:1-6; 18:24) അതെ, ഈ ലോക​ത്തി​ലെ മതങ്ങൾ ലോക​ച​രി​ത്ര​ത്തി​ലെ  എല്ലാ കൂട്ട​ക്കൊ​ല​ക​ളും സംബന്ധിച്ച്‌ ഭാരിച്ച ഒരു രക്തപാ​ത​ക​ക്കു​ററം വഹിക്കു​ന്നു! ഇതിന്‌ അവ കണക്കു ബോധി​പ്പി​ക്കേ​ണ്ടി​വ​രും.

8. “കുരു​ടൻമാ​രായ വഴികാ​ട്ടി​കളെ” സംബന്ധിച്ച യേശു​വി​ന്റെ വാക്കുകൾ ഇന്ന്‌ ബാധക​മാ​കു​ന്ന​തെ​ങ്ങനെ?

⁸ വ്യക്തമാ​യും, തങ്ങളുടെ നടപടി ബൈബി​ളിന്‌ വിരു​ദ്ധ​മാ​യി​രി​ക്കുന്ന യാതൊ​രു മതത്തി​നും മനുഷ്യ​വർഗ്ഗത്തെ  യഥാർത്ഥ സമാധാ​ന​ത്തി​ലേ​യ്‌ക്കും സുരക്ഷി​ത​ത്വ​ത്തി​ലേ​യ്‌ക്കും നയിക്കു​ന്ന​തിൽ വിജയി​ക്കാൻ കഴിയു​ക​യില്ല. അതു​കൊ​ണ്ടാണ്‌ തന്റെ നാളിലെ വ്യാജ​മ​ത​നേ​താ​ക്കൻമാ​രെ സംബന്ധിച്ച്‌ യേശു ഇപ്രകാ​രം പറഞ്ഞത്‌: “അവർ കുരു​ടൻമാ​രായ വഴികാ​ട്ടി​ക​ളാണ്‌. കുരുടൻ കുരു​ടനെ വഴിന​ട​ത്തി​യാൽ ഇരുവ​രും കുഴി​യിൽ വീഴും.” (മത്തായി 15:14) അതു​പോ​ലെ, യുദ്ധത്തി​ന്റെ സംഗതി​യി​ലും ജീവി​ത​ത്തി​ന്റെ അതി​പ്ര​ധാ​ന​മായ മററു​വ​ശ​ങ്ങ​ളി​ലും ഇന്നു ലോക​ത്തി​ലെ മതങ്ങൾ “കുരു​ടൻമാ​രായ വഴികാ​ട്ടി​കളാ”ണ്‌.

ലോക​മ​തങ്ങൾ സൻമാർഗ്ഗത്തെ അഭിവൃ​ദ്ധി​പ്പെ​ടു​ത്തു​ന്നു​വോ?

9, 10. (എ) യഥാർത്ഥ ധാർമ്മിക നിലവാ​രങ്ങൾ മുറുകെ പിടി​ക്കു​ന്നത്‌ സമാധാ​ന​ത്തി​നും സുരക്ഷി​ത​ത്വ​ത്തി​നും പ്രധാ​ന​മാ​യി​രി​ക്കു​ന്ന​തെ​ന്തു​കൊണ്ട്‌? (ബി) ബൈബിൾ പഠിപ്പി​ക്കുന്ന പ്രകാരം അത്തരം ധാർമ്മി​ക​തയെ പ്രചോ​ദി​പ്പി​ക്കു​ന്ന​തെന്ത്‌?

⁹ ധാർമ്മി​ക​ത​യു​ടെ യഥാർത്ഥ നിലവാ​രങ്ങൾ ഉയർത്തി​പ്പി​ടി​ക്കു​ന്നി​ല്ലെ​ങ്കിൽ ആർക്കെ​ങ്കി​ലും തന്റെ അയൽക്കാ​രു​മാ​യി യഥാർത്ഥ​സ​മാ​ധാ​ന​മോ യഥാർത്ഥ സുരക്ഷി​ത​ത്വ​മോ ആസ്വദി​ക്കാൻ കഴിയു​മോ? അത്തരം നിലവാ​രങ്ങൾ ഇല്ലാത്തി​ടത്ത്‌ ഭോഷ്‌ക്കു​പ​റ​ച്ചി​ലും മോഷ​ണ​വും വ്യഭി​ചാ​ര​വും മററ്‌ അതു​പോ​ലു​ളള പ്രവർത്ത​ന​ങ്ങ​ളും സർവ്വസാ​ധാ​ര​ണ​മാണ്‌. നേരെ മറിച്ച്‌ യഥാർത്ഥ അയൽസ്‌നേഹം ധാർമ്മി​കത അഭിവൃ​ദ്ധി​പ്പെ​ടു​ത്തണം.

¹⁰ ധാർമ്മി​ക​തയെ സംബന്ധിച്ച ദൈവ​ത്തി​ന്റെ വീക്ഷണം ബൈബിൾ ഇപ്രകാ​രം പ്രകട​മാ​ക്കു​ന്നു: “സഹമനു​ഷ്യ​നെ സ്‌നേ​ഹി​ക്കു​ന്നവൻ ന്യായ​പ്ര​മാ​ണം നിവർത്തി​ച്ചി​രി​ക്കു​ന്നു. ‘വ്യഭി​ചാ​രം ചെയ്യരുത്‌, കൊല ചെയ്യരുത്‌, മോഷ്ടി​ക്ക​രുത്‌, മോഹി​ക്ക​രുത്‌,’ എന്നുള​ള​തും മററ്‌ ഏതു കല്‌പ​ന​യും ‘കൂട്ടു​കാ​രനെ നിന്നെ​പ്പോ​ലെ സ്‌നേ​ഹിക്ക’ എന്നീ വചനത്തിൽ സംക്ഷേ​പി​ച്ചി​രി​ക്കു​ന്നു; സ്‌നേഹം ഒരുവന്റെ അയൽക്കാ​ര​നോട്‌ ദോഷം ചെയ്യു​ന്നില്ല.”—റോമർ 13:8-10.

11, 12. (എ) ധാർമ്മിക നിലവാ​ര​ങ്ങ​ളോട്‌ പററി​നിൽക്കാത്ത ഒരു വ്യക്തിക്ക്‌ ദൈവ​വു​മാ​യി സമാധാ​നം ആസ്വദി​ക്കാ​മെന്ന്‌ പ്രതീ​ക്ഷി​ക്കാൻ കഴിയു​മോ? (ബി) ഉചിത​മാ​യി, ആരാണ്‌ ആ നിലവാ​രങ്ങൾ നിശ്ചയി​ക്കു​ന്നത്‌?

¹¹ എന്നാൽ അതിലും പ്രധാ​ന​മാ​യി, ധാർമ്മി​കത സംബന്ധിച്ച ദൈവ​ത്തി​ന്റെ നിലവാ​രം അനുസ​രി​ക്കാത്ത ഒരുവന്‌ ദൈവ​ത്തി​ന്റെ പ്രീതി​യും സംരക്ഷ​ണ​വും ലഭിക്കു​മെന്ന ഉറപ്പോ​ടെ ദൈവ​വു​മാ​യി സമാധാ​ന​ത്തി​ലാ​യി​രി​ക്കാൻ കഴിയു​മെന്ന്‌ നിങ്ങൾ വിശ്വ​സി​ക്കു​ന്നു​ണ്ടോ? തന്നെ സേവി​ക്കു​ന്ന​വ​രെന്ന്‌  അവകാ​ശ​പ്പെ​ടു​ന്ന​വ​രിൽ നിന്ന്‌ അത്തരം ധാർമ്മി​കത അവകാ​ശ​പ്പെ​ടാത്ത ഒരു ദൈവത്തെ നിങ്ങൾക്ക്‌ ആദരി​ക്കാൻ പോലും കഴിയു​മോ?

¹² തന്റെ നിലവാ​ര​ങ്ങ​ളോട്‌ പററി നിൽക്കാൻ ദൈവം ആവശ്യ​പ്പെ​ട​ണ​മെ​ങ്കിൽ ആ നിലവാ​രങ്ങൾ എന്തൊ​ക്കെ​യാ​ണെന്ന്‌ അവൻ വ്യക്തമാ​ക്കേ​ണ്ട​തുണ്ട്‌. തന്റെ വചനമായ ബൈബി​ളി​ലൂ​ടെ അവൻ അതു ചെയ്‌തി​ട്ടുണ്ട്‌. (2 തിമൊ​ഥെ​യോസ്‌ 3:16, 17) ഓരോ മനുഷ്യ​നും തന്റേതായ സ്വന്തം ധാർമ്മിക നിലവാ​രങ്ങൾ വയ്‌ക്കു​ക​യും അതനു​സ​രി​ക്കു​ക​യും ചെയ്യണ​മെന്നു പറയു​ന്നത്‌ ഓരോ വ്യക്തി​യും തന്റേതായ ട്രാഫിക്‌ നിയമങ്ങൾ നിർമ്മിച്ച്‌ അവ അനുസ​രി​ക്കണം എന്നു പറയു​ന്ന​തി​നേ​ക്കാൾ ഒട്ടും കൂടുതൽ ന്യായ​യു​ക്തമല്ല. അതിന്റെ ഫലമെ​ന്താ​യി​രി​ക്കു​മെന്ന്‌ നിങ്ങൾക്ക​റി​യാം. ദൈവ​ത്തി​ന്റെ അംഗീ​കാ​രം നേടി​ത്ത​രുന്ന ഒരേ ഒരു വഴിയെ ഉളളു എന്നു ബൈബിൾ യുക്തി​യാ​നു​സ​രണം ചൂണ്ടി​ക്കാ​ണി​ക്കു​ന്നു. യേശു പറഞ്ഞതു​പോ​ലെ മറെറല്ലാ വഴിക​ളും നാശത്തി​ലേക്കു നയിക്കു​ന്നു.—മത്തായി 7:13, 14; ലൂക്കോസ്‌ 13:24.

13-15. (എ) ഒരുവന്റെ സ്വന്തം സഭയിലെ അംഗങ്ങ​ളു​ടെ ധാർമ്മി​ക​ത​യെ​പ്പ​ററി എന്തു ചോദ്യ​ങ്ങൾ ചോദി​ക്ക​പ്പെ​ടേ​ണ്ട​തുണ്ട്‌? (ബി) ദൈവ നിയമങ്ങൾ ലംഘി​ക്കു​ന്ന​തിൽ തുടരുന്ന ഒരു സഭാം​ഗത്തെ എന്തു ചെയ്യണ​മെ​ന്നാണ്‌ ബൈബിൾ പറയു​ന്നത്‌? (സി) സഭകളിൽ ഇതു ചെയ്യ​പ്പെ​ടു​ന്നു​ണ്ടോ?

¹³ ക്രൈ​സ്‌ത​വ​ലോ​ക​ത്തി​ലെ സഭകൾ വിശേ​ഷിച്ച്‌ ധാർമ്മി​കത സംബന്ധിച്ച ദൈവ​ത്തി​ന്റെ നിലവാ​രങ്ങൾ ഉയർത്തി​പ്പി​ടി​ക്കു​ക​യും അങ്ങനെ ശേഷം ലോക​ത്തിന്‌ ഒരു മാതൃക വയ്‌ക്കു​ക​യും ചെയ്‌തി​ട്ടു​ണ്ടോ? അത്തരം സഭകളിൽ അംഗങ്ങ​ളാ​യി​ട്ടു​ളള അനേക​രു​ടെ ജീവിതം എന്തു വെളി​പ്പെ​ടു​ത്തു​ന്നു? നിങ്ങൾ ഒരു സഭയിൽ ഉൾപ്പെട്ട ഒരാളാ​ണോ? എങ്കിൽ നിങ്ങ​ളോ​ടു​തന്നെ ചോദി​ക്കുക: ‘ഭൂമി​യി​ലു​ളള എല്ലാവ​രും എന്റെ മതത്തിലെ ആളുക​ളെ​പ്പോ​ലെ ജീവി​ക്കു​ക​യാ​ണെ​ങ്കിൽ അതുവഴി കുററ​കൃ​ത്യ​വും സത്യസ​ന്ധ​മ​ല്ലാത്ത വ്യാപാര ഇടപാ​ടു​ക​ളും ശണ്‌ഠ​യും ലൈം​ഗീക ദുർമ്മാർഗ്ഗ​വും അവസാ​നി​ക്കു​മോ?’

¹⁴ “അല്‌പം പുളി​മാവ്‌ മുഴു​പി​ണ്ഡ​ത്തെ​യും പുളി​പ്പി​ക്കു​ന്നു” എന്നും “ചീത്ത സഹവാസം പ്രയോ​ജ​ന​പ്ര​ദ​മായ ശീലങ്ങളെ പാഴാ​ക്കു​ന്നു” എന്നും ബൈബിൾ മുന്നറി​യി​പ്പു നൽകുന്നു. (ഗലാത്യർ 5:9; 1 കൊരി​ന്ത്യർ 15:33) ഇക്കാര​ണ​ത്താൽ ബൈബിൾ ക്രിസ്‌ത്യാ​നി​ക​ളോട്‌ ഇങ്ങനെ കൽപ്പി​ക്കു​ന്നു: “എന്നാൽ സഹോ​ദരൻ എന്നു വിളി​ക്ക​പ്പെ​ടുന്ന ഒരുവൻ ദുർന്ന​ട​പ്പു​കാ​ര​നോ, അത്യാ​ഗ്ര​ഹി​യോ, വിഗ്ര​ഹാ​രാ​ധി​യോ, അസഭ്യം സംസാ​രി​ക്കു​ന്ന​വ​നോ, മദ്യപാ​നി​യോ, പിടി​ച്ചു​പ​റി​ക്കാ​ര​നോ ആകുന്നു എങ്കിൽ അവനോ​ടു സംസർഗ്ഗം അരുത്‌.  അങ്ങനെ​യു​ള​ള​വ​നോ​ടു കൂടി ഭക്ഷണം കഴിക്ക​പോ​ലും അരുത്‌. . . . ‘ആ ദുഷ്ടനെ നിങ്ങളു​ടെ ഇടയിൽനി​ന്നു നീക്കി​ക്ക​ള​യു​വിൻ.’”—1 കൊരി​ന്ത്യർ 5:11-13.

¹⁵ ഒരു വ്യക്തി തെററാ​യി ഒരു ചുവടു വയ്‌ക്കു​ക​യും എന്നാൽ പിന്നീടു നേരെ​യാ​വു​ക​യും ചെയ്‌തേ​ക്കാം എന്നതു സത്യം​തന്നെ. എന്നാൽ അത്തരം കാര്യങ്ങൾ തുടരെ ചെയ്യു​ന്ന​വരെ സംബന്ധി​ച്ചെന്ത്‌? ഇവർ ദൈവത്തെ സേവി​ക്കു​ന്ന​താ​യി അവകാ​ശ​പ്പെ​ടു​ന്നെ​ങ്കിൽ അവർ കപട​വേ​ഷ​ക്കാ​രാണ്‌. തീർച്ച​യാ​യും നിങ്ങൾ കാപട്യ​ത്തെ വെറു​ക്കു​ന്നു. കാപട്യ​ത്തെ​യും കാപട്യം കാണി​ക്കു​ന്ന​വ​രെ​യും ദൈവ​വും വെറു​ക്കു​ന്നു എന്ന്‌ ബൈബിൾ വ്യക്തമാ​ക്കു​ന്നു. (മത്തായി 23:27, 28; റോമർ 12:9) അപ്പോൾ നിങ്ങളു​ടെ മതത്തെ സംബന്ധി​ച്ചെന്ത്‌? ദൈവ നിയമങ്ങൾ തുടരെ ലംഘി​ക്കു​ന്ന​വ​രെ​യും അതു സംബന്ധിച്ച്‌ യഥാർത്ഥ അനുതാ​പ​മി​ല്ലാ​ത്ത​വ​രെ​യും “നീക്കി​ക്ക​ള​യാ​നു​ളള” ബൈബി​ളി​ന്റെ കല്‌പന അതനു​സ​രി​ക്കു​ന്നു​ണ്ടോ? അതോ മററു​ള​ള​വ​രു​ടെ ആത്മീയ​ത​യും കൂടി അപകട​ത്തി​ലാ​ക്കാൻ ഇടയാ​ക്കി​ക്കൊണ്ട്‌ അത്തരം ആളുകൾ സമുന്നത സ്ഥാനങ്ങ​ളിൽ തുടരാൻ അത്‌ അനുവ​ദി​ച്ചി​രി​ക്കു​ക​യാ​ണോ? കുററ​കൃ​ത്യ​ങ്ങ​ളു​ടെ നേരെ കണ്ണടച്ചു​കൊ​ണ്ടോ അല്ലെങ്കിൽ മാപ്പു​കൊ​ടു​ത്തു​കൊ​ണ്ടു പോലു​മോ അത്‌ ധാർമ്മി​ക​ത​യ്‌ക്കു വെറുതെ അധരസേവ ചെയ്യു​ക​മാ​ത്ര​മാ​ണോ ചെയ്യു​ന്നത്‌?—മത്തായി 15:7, 8.

16. (എ) ലൈം​ഗിക നടത്തയെ സംബന്ധിച്ച്‌ അനേകം പുരോ​ഹി​തൻമാർ ഇന്ന്‌ എന്തു പറയുന്നു? (ബി) അത്തരം നടത്തയെ സംബന്ധിച്ച്‌ ബൈബിൾ എന്തു പറയുന്നു?

¹⁶ പരസം​ഗ​വും, വ്യഭി​ചാ​ര​വും, സ്വവർഗ്ഗ​സം​ഭോ​ഗ​വും അവശ്യം തെററല്ല എന്ന്‌ കൂടുതൽ കൂടുതൽ പുരോ​ഹി​തൻമാർ പറയുന്നു. എന്നാൽ അവർ ദൈവ​ത്തി​ന്റെ ചിന്തക​ളോട്‌ പൊരു​ത്ത​ത്തി​ലല്ല. അവന്റെ വചനം വ്യക്തമാ​യി പറയുന്നു: “വഴി​തെ​റ​റി​ക്ക​പ്പെ​ട​രുത്‌; ദുർന്ന​ട​പ്പു​കാർ, വിഗ്ര​ഹാ​രാ​ധി​കൾ, വ്യഭി​ചാ​രി​കൾ, അസ്വാ​ഭാ​വിക ഉദ്ദേശ്യ​ങ്ങൾക്കാ​യി സൂക്ഷി​ക്ക​പ്പെ​ട്ടി​രി​ക്കുന്ന പുരു​ഷൻമാർ, പുരു​ഷൻമാ​രോ​ടു​കൂ​ടി ശയിക്കുന്ന പുരു​ഷൻമാർ, മോഷ്ടാ​ക്കൾ, അത്യാ​ഗ്ര​ഹി​കൾ, മദ്യപാ​നി​കൾ, അസഭ്യം സംസാ​രി​ക്കു​ന്നവർ പിടിച്ചു പറിക്കാർ എന്നിവർ ദൈവ​രാ​ജ്യം അവകാ​ശ​മാ​ക്കു​ക​യില്ല.”—1 കൊരി​ന്ത്യർ 6:9, 10.

ദൈവ​വ​ച​നത്തെ തളളി​ക്ക​ള​ഞ്ഞ​തി​ന്റെ ഫലങ്ങൾ

17-19. (എ) അപ്പോ​സ്‌ത​ല​നായ പൗലോസ്‌ ബൈബി​ളി​നെ എങ്ങനെ വീക്ഷിച്ചു? (ബി) അനേകം പുരോ​ഹി​തൻമാർ ഇന്നു ബൈബി​ളി​നെ എങ്ങനെ വീക്ഷി​ക്കു​ന്നു?

¹⁷ ലോക​മ​തങ്ങൾ ഇത്ര ഭിന്നി​പ്പി​ലും കുഴഞ്ഞു​മ​റിഞ്ഞ അവസ്ഥയി​ലും  ആയിരി​ക്കു​ന്ന​തി​ന്റെ അടിസ്ഥാ​ന​കാ​രണം ദൈവ​വ​ച​ന​മായ ബൈബി​ളിൽ കാണ​പ്പെ​ടുന്ന അവന്റെ നിയമങ്ങൾ അവർ അവഗണി​ക്കു​ന്നു എന്നതാണ്‌. വാസ്‌ത​വ​ത്തിൽ, അനേകം പുരോ​ഹി​തൻമാർ ബൈബി​ളി​നെ ദൈവ​ത്തി​ന്റെ നിശ്വസ്‌ത വചനമാ​യി അംഗീ​ക​രി​ക്കു​ന്നില്ല. എന്നാൽ നിശ്വസ്‌ത അപ്പോ​സ്‌ത​ല​നായ പൗലോസ്‌ പ്രഖ്യാ​പി​ച്ചു: “എല്ലാ തിരു​വെ​ഴു​ത്തും ദൈവ​നി​ശ്വ​സ്‌ത​മാണ്‌.” (2 തിമൊ​ഥെ​യോസ്‌ 3:16) കൂടാതെ, ബൈബി​ളി​നെ “മനുഷ്യ​രു​ടെ വചനമാ​യി​ട്ടല്ല, അതു സത്യസ​ന്ധ​മാ​യി ആയിരി​ക്കു​ന്ന​തു​പോ​ലെ ദൈവ​ത്തി​ന്റെ വചനമാ​യി​ട്ടു​തന്നെ” സ്വീക​രി​ക്കാൻ പൗലോസ്‌ നമ്മെ പ്രോ​ത്‌സാ​ഹി​പ്പി​ച്ചു. (1 തെസ്സ​ലോ​നീ​ക്യർ 2:13) തീർച്ച​യാ​യും ഈ ഭയാന​ക​മായ പ്രപഞ്ച​ത്തി​ന്റെ​യെ​ല്ലാം സർവ്വശ​ക്ത​നായ സ്രഷ്‌ടാ​വായ യഹോ​വ​യാം ദൈവ​ത്തിന്‌ ഒരു പുസ്‌തകം എഴുതി​ക്കു​ന്ന​തി​നും ഈ നൂററാ​ണ്ടു​ക​ളി​ലൂ​ടെ​യെ​ല്ലാം അതു തെററു​കൂ​ടാ​തെ കാത്തു​സൂ​ക്ഷി​ക്കു​ന്ന​തി​നും കഴിയു​മാ​യി​രു​ന്നു!

¹⁸ എന്നാൽ ന്യൂ കാത്തലിക്‌ എൻ​സൈ​ക്ലോ​പ്പീ​ഡിയ പറയുന്നു: “ശാസ്‌ത്ര​ത്തി​ന്റെ​യും ചരി​ത്ര​ത്തി​ന്റെ​യും ആധുനിക അറിവു വച്ച്‌ വിധി​ക്കു​മ്പോൾ ബൈബി​ളി​ന്റെ പല പ്രസ്‌താ​വ​ന​ക​ളും ഒട്ടും ശരിയല്ല.”³⁹യു. എസ്‌. കാത്തലിക്‌ എന്ന മാസി​ക​യിൽ എഴുതിയ ഒരു പുരോ​ഹി​തൻ പറഞ്ഞത്‌: “ഭൂമി​യു​ടെ സൃഷ്ടി ഉല്‌പ​ത്തി​പ്പു​സ്‌ത​ക​ത്തിൽ വിവരി​ച്ചി​രി​ക്കു​ന്ന​പ്ര​കാ​രം സംഭവി​ച്ചി​രി​ക്കുക അസാദ്ധ്യ​മാണ്‌.” മനുഷ്യ സൃഷ്ടി​യെ​പ്പ​റ​റി​യു​ളള ഉല്‌പ​ത്തി​വി​വ​രണം സംബന്ധിച്ച്‌ അദ്ദേഹം പറഞ്ഞത്‌ “മനുഷ്യ​വർഗ്ഗ​ത്തി​നു തുടക്കം കുറി​ച്ചത്‌ അങ്ങനെ​യാ​യി​രു​ന്നില്ല”⁴⁰ എന്നാണ്‌. ഒരു എപ്പിസ്‌ക്കോ​പ്പൽ മെത്രാൻ പറഞ്ഞു: “ബൈബി​ളിൽ തെററു​ക​ളും കൃത്യ​ത​യി​ല്ലാത്ത പ്രസ്‌താ​വ​ന​ക​ളും വൈരു​ദ്ധ്യ​ങ്ങ​ളും ഉണ്ട്‌. പ്രമുഖ ക്രിസ്‌തീയ സഭകൾ ബൈബി​ളി​നെ തെററി​ല്ലാ​ത്ത​താ​യി കണക്കാ​ക്കാ​ത്തത്‌ എന്തു​കൊ​ണ്ടെന്ന്‌ മനസ്സി​ലാ​ക്കാ​വു​ന്ന​തേ​യു​ളളു.”⁴¹ ഇംഗ്ലണ്ടി​ലെ ഒരു ആംഗ്ലിക്കൻ മെത്രാൻ ക്രിസ്‌തു​വി​ന്റെ പുനരു​ത്ഥാ​ന​ത്തെ​പ്പ​ററി “എല്ലുകൾ കൊ​ണ്ടൊ​രു മാന്ത്രിക വിദ്യ”⁴² എന്നാണ്‌ പരാമർശി​ച്ചത്‌.

¹⁹ അപ്രകാ​രം, പുരോ​ഹി​തൻമാ​രിൽ അനേക​രും ഒന്നുകിൽ ബൈബി​ളി​നെ നിസ്സാ​രീ​ക​രി​ക്കു​ന്നു അല്ലെങ്കിൽ അതിനെ ആദരി​ക്കു​ന്ന​തി​നും അതിലു​ളള ദൈവ​ക​ല്‌പ​ന​കളെ അനുസ​രി​ക്കു​ന്ന​തി​നും തങ്ങളുടെ അനുയാ​യി​കളെ പഠിപ്പി​ക്കു​ന്നില്ല. ക്രൈ​സ്‌ത​വ​ലോ​ക​ത്തി​ലെ​ല്ലാ​മു​ളള ദൈവ​വ​ചനം സംബന്ധിച്ച ഞെട്ടി​ക്കുന്ന അജ്ഞതയു​ടെ മുഖ്യ​കാ​രണം അതാണ്‌. ഒരു മത നിരൂ​പ​ക​നായ എം. ജെ. മാക്‌മാ​നൂസ്‌ പളളി​യിൽ പോക്കു​കാ​രെ സംബന്ധിച്ച്‌ ഇപ്രകാ​രം എഴുതി: “1980-കളിൽ വ്യവസ്ഥാ​പിത മതത്തിന്റെ അടിത്തറ മാന്തു​മെന്ന്‌ ഭീഷണി​പ്പെ​ടു​ത്തുന്ന പ്രവണ​ത​ക​ളിൽ  ബൈബിൾ പരിജ്ഞാ​ന​ത്തി​ന്റെ പരിതാ​പ​ക​ര​മായ അവസ്ഥ​പോ​ലെ മറെറാ​ന്നും തന്നെയില്ല.” മിക്ക പളളി​യിൽ പോക്കു​കാർക്കും “ബൈബിൾ വായി​ക്ക​പ്പെ​ടാത്ത ഒരു അപരി​ചിത രേഖമാ​ത്ര​മാ​യി​രി​ക്കു​ന്ന​താ​യി” അദ്ദേഹം കുറി​ക്കൊ​ണ്ടു.⁴³

20, 21. ബൈബിൾപ്ര​ബോ​ധ​നങ്ങൾ തളളി​ക്ക​ള​ഞ്ഞ​തി​ന്റെ ഫലങ്ങൾ എന്തൊ​ക്കെ​യാ​യി​രു​ന്നി​ട്ടുണ്ട്‌?

²⁰ ഇതി​ന്റെ​യെ​ല്ലാം ഫലം എന്തായി​രു​ന്നി​ട്ടുണ്ട്‌? ബൈബിൾ പ്രബോ​ധ​ന​ങ്ങളെ തരംതാ​ഴ്‌ത്തു​ക​യും എന്നാൽ അപ്പോ​ഴും സമാധാ​ന​വും നല്ല ധാർമ്മി​ക​ത​യും തങ്ങളുടെ അനുയാ​യി​കൾക്കി​ട​യിൽ ഉല്‌പാ​ദി​പ്പി​ക്കാ​മെ​ന്നും ലോക​മ​തങ്ങൾ തെളി​യി​ച്ചി​ട്ടു​ണ്ടോ? നേരെ​മ​റിച്ച്‌ ഭൂവി​സ്‌തൃ​ത​മാ​യി അവസ്ഥകൾ കൂടുതൽ വഷളാ​വു​ക​യാണ്‌. ക്രൈ​സ്‌ത​വേതര മതങ്ങൾ നിലവി​ലു​ളള രാഷ്‌ട്രങ്ങൾ, കൂടുതൽ കൂടുതൽ പ്രക്ഷു​ബ്ധ​ത​യു​ടെ​യും ഭിന്നത​യു​ടെ​യും രാഷ്‌ട്രീ​യാ​ഴി​മ​തി​യു​ടെ​യും ധാർമ്മി​കാ​ധഃ​പ​ത​ന​ത്തി​ന്റെ​യും രംഗമാ​യി തീർന്നി​രി​ക്കു​ന്നു. എന്നാൽ കുററ​കൃ​ത്യം, ദുർമ്മാർഗ്ഗം, മയക്കു​മ​രു​ന്നു​ക​ളു​ടെ ദുരു​പ​യോ​ഗം, ജാതീയ പോരാ​ട്ടം, യുദ്ധം എന്നിവ ഏററം കൂടു​ത​ലാ​യി കാണ​പ്പെ​ടു​ന്നത്‌ വിശേ​ഷി​ച്ചും ക്രൈ​സ്‌ത​വ​ലോ​ക​ത്തി​ലാണ്‌. ദൈവ​ത്തി​ന്റെ ആശ്രയ​യോ​ഗ്യ​മായ വചനം മുൻകൂ​ട്ടി​പ്പ​റ​ഞ്ഞ​തു​പോ​ലെ​തന്നെ സംഭവി​ച്ചി​രി​ക്കു​ന്നു. “അവർ യഹോ​വ​യു​ടെ വചന​ത്തെ​ത്തന്നെ തളളി​ക്ക​ള​ഞ്ഞി​രി​ക്കു​ന്നു. അവർക്ക്‌ എന്തു ജ്ഞാനമാ​ണു​ള​ളത്‌?”—യിരെ​മ്യാവ്‌ 8:9.

²¹ തെളിവ്‌ അനി​ഷേ​ധ്യ​മാണ്‌. ഈ ലോക​ത്തി​ലെ മതങ്ങൾ സമാധാ​ന​ത്തി​നും സുരക്ഷി​ത​ത്വ​ത്തി​നും വേണ്ടി​യു​ളള ഒരു സ്വാധീ​നമല്ല എന്ന്‌ അതു കാണി​ക്കു​ന്നു. അവ അവരുടെ അനുയാ​യി​കളെ യഥാർത്ഥ പ്രത്യാശ—ദൈവ​രാ​ജ്യം—സംബന്ധിച്ച്‌ അജ്ഞരായി വിട്ടി​രി​ക്കു​ന്നു. അപ്പോൾ ഇതി​ന്റെ​യെ​ല്ലാം അർത്ഥ​മെ​ന്താണ്‌?

ലോക​മ​ത​ങ്ങ​ളു​ടെ അന്ത്യം ആസന്നം

22, 23. ഈ ലോക​ത്തി​ലെ വ്യാജ​മ​ത​ങ്ങ​ളു​ടെ​മേൽ എന്തു വരു​മെ​ന്നാണ്‌ ബൈബിൾ പറയു​ന്നത്‌?

²² “എന്റെ പിതാവ്‌ നടാത്ത ഏതു സസ്യവും വേരോ​ടെ പിഴു​തു​ക​ള​യും” എന്ന്‌ യേശു​ക്രി​സ്‌തു പ്രസ്‌താ​വി​ച്ചു. (മത്തായി 15:13) ഈ ലോക​മ​തങ്ങൾ ഉല്‌പാ​ദി​പ്പി​ച്ചി​രി​ക്കുന്ന മോശ​മായ ഫലങ്ങൾ അവ ദൈവം നട്ടതല്ല എന്നു തെളി​യി​ക്കു​ന്നു. അപ്രകാ​രം എല്ലാ വ്യാജാ​രാ​ധ​നാ​ക്ര​മ​ത്തി​ന്റെ​യും വരാൻ പോകുന്ന നാശം ബൈബിൾ മുൻകൂ​ട്ടി​പ്പ​റ​യു​ന്നു.

 ²³ ഈ മത വ്യവസ്ഥി​തി​ക​ളെ​പ്പ​ററി, “മഹാബാ​ബി​ലോൻ” എന്ന വേശ്യാ​സ്‌ത്രീ​യു​ടെ പ്രതീകം ഉപയോ​ഗി​ച്ചു​കൊണ്ട്‌ വ്യാജമത ലോക സാമ്രാ​ജ്യ​ത്തെ​പ്പ​ററി ദൈവം പറയുന്നു: “അവളുടെ പാപങ്ങൾ ആകാശ​ത്തോ​ളം കുന്നി​ച്ചി​രി​ക്കു​ന്നു. ദൈവം അവളുടെ അകൃത്യം ഓർത്തി​ട്ടു​മുണ്ട്‌. . . . മരണം, വിലാപം, ക്ഷാമം എന്നിങ്ങനെ അവളുടെ ബാധകൾ ഒററദി​വസം കൊണ്ട്‌ വരും. അവളെ തീയിൽ ഇട്ട്‌ പൂർണ്ണ​മാ​യി ദഹിപ്പി​ച്ചു​ക​ള​യും. എന്തു​കൊ​ണ്ടെ​ന്നാൽ അവളെ ന്യായം​വി​ധിച്ച യഹോ​വ​യാം ദൈവം ശക്തനാണ്‌.”—വെളി​പ്പാട്‌ 18:2, 5-8.

24. അത്തരം നാശം എങ്ങനെ വരും, ഏത്‌ ഉറവിൽനിന്ന്‌?

²⁴ ഈ നാശം ആശ്ചര്യ​ക​ര​മാം​വണ്ണം പെട്ടെന്ന്‌ “ഒററ ദിവസം”കൊ​ണ്ടെ​ന്ന​പോ​ലെ വരും എന്നത്‌ കുറി​ക്കൊ​ള​ളുക. അനേകം ആളുകൾക്ക്‌ ആശ്ചര്യ​വും അങ്കലാ​പ്പും ഉളവാ​ക്കി​ക്കൊണ്ട്‌ വ്യാജ​മതം അവൾ ആരോ​ടു​കൂ​ടി ദീർഘ​നാ​ളാ​യി വേശ്യാ​വൃ​ത്തി​യിൽ ഏർപ്പെ​ട്ടി​രു​ന്നു​വോ അതേ രാഷ്‌ട്രീയ ജനപദ​ങ്ങ​ളാൽ നശിപ്പി​ക്ക​പ്പെ​ടും.—വെളി​പ്പാട്‌ 18:10-17, 21; 17:12, 16.

25. (എ) വെളി​പ്പാട്‌ 18:4-ൽ ദൈവ​ത്തി​ന്റെ അംഗീ​കാ​രം ആഗ്രഹി​ക്കുന്ന വ്യക്തികൾ എന്തു ചെയ്യാ​നാണ്‌ ഉത്തേജി​പ്പി​ക്ക​പ്പെ​ട്ടി​രി​ക്കു​ന്നത്‌? (ബി) അത്തര​മൊ​രു നടപടി സ്വീക​രി​ക്കാൻ ഒരുവനെ പ്രേരി​പ്പി​ക്കേ​ണ്ട​തെ​ന്താണ്‌?

²⁵ അതു​കൊണ്ട്‌ ദിവ്യ അരുള​പ്പാട്‌ ഇതാണ്‌: “എന്റെ ജനമാ​യു​ളേ​ളാ​രെ, അവളുടെ പാപങ്ങ​ളിൽ കൂട്ടാ​ളി​ക​ളാ​കാ​തെ​യും അവളുടെ ബാധക​ളിൽ ഓഹരി​ക്കാ​രാ​കാ​തെ​യു​മി​രി​പ്പാൻ അവളെ വിട്ടു പുറത്തു​പോ​രു​വിൻ.” (വെളി​പ്പാട്‌ 18:4) അത്തരം നടപടി സ്വീക​രി​ക്കുക എന്നാൽ ഒരുവൻ വ്യാജ​മ​തത്തെ ദൈവം വീക്ഷി​ക്കു​ന്ന​തു​പോ​ലെ വീക്ഷി​ക്കു​ന്നു എന്നാണ്‌ അതിന്റെ അർത്ഥം. അതിന്റെ ചീത്തഫ​ലങ്ങൾ, കപട​വേഷം, അന്ധവി​ശ്വാ​സം എന്നിവ​യു​ടെ പേരിൽ അതിനെ വെറു​ക്കു​ന്നു എന്നാണ​തി​ന്റെ അർത്ഥം. വ്യാജ​മതം മനുഷ്യ​വർഗ്ഗ​ത്തി​ന്റെ മുമ്പാകെ ദൈവത്തെ തെററാ​യി പ്രതി​നി​ധാ​നം ചെയ്‌ത​തി​നാ​ലും ആളുക​ളു​ടെ കഷ്ടപ്പാ​ടി​നും മർദ്ദന​ത്തി​നും അതിട​യാ​ക്കി​യി​രി​ക്കു​ന്ന​തി​നാ​ലും അതിനെ വെറു​ക്കേ​ണ്ട​താണ്‌. (റോമർ 2:24; യിരെ​മ്യാവ്‌ 23:21, 22) നിങ്ങൾ ഇതു തിരി​ച്ച​റി​യു​ന്നു​വെ​ങ്കിൽ അവയുടെ മേലുളള ദൈവ​ത്തി​ന്റെ ന്യായ​വി​ധി​യോ​ടു​ളള നിങ്ങളു​ടെ പൂർണ്ണ​പി​ന്തുണ പ്രകട​മാ​ക്കി​ക്കൊണ്ട്‌ അത്തരം മതങ്ങൾക്കു​ളള നിങ്ങളു​ടെ പിന്തുണ നിങ്ങൾ പിൻവ​ലി​ക്കും.

26. (എ) ദൈവ​ത്തിൽ നിന്നുളള സമാധാ​ന​വും സംരക്ഷ​ണ​വും ആസ്വദി​ക്ക​ണ​മെ​ങ്കിൽ ഒരു വ്യക്തി കൂടു​ത​ലാ​യി എന്തു കണ്ടെത്തണം? (ബി) സത്യാ​രാ​ധന ആചരി​ക്കു​ന്ന​വരെ കണ്ടെത്താൻ അന്വേ​ഷി​ക്കു​മ്പോൾ ഒരുവൻ ഏതുതരം വ്യക്തി​കളെ കണ്ടെത്താൻ പ്രതീ​ക്ഷി​ക്കണം?

²⁶ എന്നാൽ വെറുതെ പിൻവാ​ങ്ങു​ന്ന​തു​മാ​ത്രം മതിയാ​കു​ന്നില്ല.  മുൻകൂ​ട്ടി​പ​റ​യ​പ്പെട്ട നാശം വരു​മ്പോൾ ദൈവ​ത്തി​ന്റെ സമാധാ​ന​വും സംരക്ഷ​ണ​വും നിങ്ങൾക്കു കൈവ​രു​ത്തുന്ന സത്യവും കാപട്യ​മി​ല്ലാ​ത്ത​തു​മായ ആരാധ​നാ​രീ​തി നിങ്ങൾ അന്വേ​ഷി​ച്ചു കണ്ടുപി​ടി​ക്കുക കൂടി ചെയ്യണം. അത്തരം സത്യാ​രാ​ധ​ന​യിൽ ഏർപ്പെ​ടു​ന്നവർ ഇപ്പോൾ തന്നെ ‘മേലാൽ യുദ്ധപ​രി​ശീ​ലനം നേടാതെ തങ്ങളുടെ വാളു​കളെ കൊഴു​ക്ക​ളാ​യി അടിച്ചു തീർത്തി​ട്ടു​ള​ള​വ​രാ​യി​രി​ക്കണം.’ (യെശയ്യാവ്‌ 2:4) അവർ ദൈവ​വ​ചനം വിശ്വ​സി​ക്കു​ന്ന​വ​രും അതിനെ തങ്ങളുടെ ജീവി​ത​ത്തി​ലെ മാർഗ്ഗ​ദർശക ശക്തിയാ​യി​രി​ക്കാൻ അനുവ​ദി​ച്ചു​കൊണ്ട്‌ അതനു​സ​രിച്ച്‌ ജീവി​ക്കു​ന്ന​വ​രും ആയിരി​ക്കണം. (സങ്കീർത്തനം 119: 105) അവർ തങ്ങളുടെ സഹമനു​ഷ്യ​രോട്‌ യഥാർത്ഥ​മായ, കപടഭാ​വ​മി​ല്ലാത്ത സ്‌നേഹം പ്രകട​മാ​ക്കു​ന്ന​വ​രാ​യി​രി​ക്കണം. (യോഹ​ന്നാൻ 13:35; റോമർ 13:8) അത്തരം ഒരു ആരാധ​നാ​രീ​തി ഇന്നു നിലവി​ലു​ണ്ടോ? ദശലക്ഷ​ക്ക​ണ​ക്കി​നാ​ളു​കൾ അത്‌ യഹോ​വ​യു​ടെ സാക്ഷി​കൾക്കി​ട​യിൽ കണ്ടെത്തി​യി​രി​ക്കു​ന്നു. ബൈബി​ളിൽ കാണ​പ്പെ​ടുന്ന ദൈവ​ക​ല്‌പ​ന​യോ​ടു​ളള പററി​നിൽപ്പി​നാൽ അവർ ഇന്ന്‌ ലോക​ത്തിൽ എല്ലാം അറിയ​പ്പെ​ടു​ന്നു. അവർ ആസ്വദി​ക്കുന്ന സമാധാ​ന​വും സുരക്ഷി​ത​ത്വ​വും ദൈവ​വ​ച​ന​ത്തി​ന്റെ സത്യത​യെ​യും ശക്തി​യെ​യും സംസ്ഥാ​പി​ക്കു​ന്നു.

27. യഹോ​വ​യു​ടെ സാക്ഷി​ക​ളു​ടെ രാജ്യ​ഹാ​ളിൽ അവരുടെ മീററിം​ഗിൽ സംബന്ധി​ക്കു​ന്ന​തി​നാൽ നിങ്ങൾക്ക്‌ നേരിട്ട്‌ എന്തു നിരീ​ക്ഷി​ക്കാൻ കഴിയും?

²⁷ വ്യാജ​മ​തങ്ങൾ ആളുകളെ കൊ​ണ്ടെ​ത്തി​ച്ചി​രി​ക്കുന്ന അപകട​ക​ര​മായ സാഹച​ര്യം സംബന്ധിച്ച്‌ യഹോ​വ​യു​ടെ സാക്ഷികൾ ആഴമായ വിചാ​ര​മു​ള​ള​വ​രാണ്‌. അവർ തങ്ങളുടെ ജീവി​ത​ത്തിൽ ദൈവ​വ​ച​ന​ത്തിന്‌ ഒന്നാം​സ്ഥാ​നം കൊടു​ക്കാൻ ആത്‌മാർത്ഥ​മാ​യി ശ്രമി​ച്ചു​കൊ​ണ്ടി​രി​ക്കു​ന്ന​വ​രാണ്‌. നിങ്ങളു​ടെ പ്രദേ​ശത്തെ രാജ്യ​ഹാ​ളി​ലെ അവരുടെ മീററിം​ഗു​കൾ നിരീ​ക്ഷി​ക്കാ​നും അവർ എത്ര​ത്തോ​ളം ദൈവ​ത്തി​ന്റെ ആത്മാവ്‌ പ്രകട​മാ​ക്കു​ന്നു​വെ​ന്നും അതു​കൈ​വ​രു​ത്തുന്ന സമാധാ​ന​വും സുരക്ഷി​ത​ത്വ​വും അവർ എത്ര​ത്തോ​ളം ആസ്വദി​ക്കു​ന്നു​വെ​ന്നും കാണാ​നും നിങ്ങളെ ക്ഷണിക്കു​ന്നു. വരാൻപോ​കുന്ന നാശത്തെ അതിജീ​വി​ക്കു​ക​യും തന്റെ സ്വർഗ്ഗീയ രാജ്യ​ഭ​ര​ണ​ത്തിൻ കീഴിലെ നീതി​യു​ളള പുതിയ വ്യവസ്ഥി​തി​യിൽ ജീവി​ക്കു​ക​യും ചെയ്യാ​നു​ള​ള​വ​രിൽ നിന്ന്‌ ദൈവം ആവശ്യ​പ്പെ​ടുന്ന കാര്യങ്ങൾ അവർ പഠിക്കു​ക​യും ബാധക​മാ​ക്കു​ക​യും ചെയ്യു​ന്ന​തെ​ങ്ങ​നെ​യെ​ന്നും നിങ്ങൾ കാണും.

[അധ്യയന ചോദ്യ​ങ്ങൾ]

 [29-ാം പേജിലെ ചതുരം]

ശീർഷകങ്ങളുടെയും വാർത്ത​ക​ളു​ടെ​യും ഈ മാതൃ​കകൾ കാണി​ക്കു​ന്ന​തു​പോ​ലെ ലൈം​ഗിക അധാർമ്മി​ക​ത​യാ​യി ബൈബിൾ കുററം വിധി​ക്കു​ന്ന​തി​നെ കൂടുതൽ കൂടുതൽ പുരോ​ഹി​തൻമാർ അംഗീ​ക​രി​ച്ചി​രി​ക്കു​ന്നു:

“ചീത്തയാ​യി​രി​ക്കു​ന്നത്‌ നല്ലതാ​യി​ത്തീ​രു​മ്പോൾ പുരോ​ഹി​തൻമാർ അതു നമ്മോട്‌ പറയും” “[ആംഗ്ലിക്കൻ സഭ] ഇപ്പോൾ അതിന്റെ പഴഞ്ചൻ അധികാ​ര​ഭാ​വം ഉപേക്ഷി​ച്ചു​കൊ​ണ്ടി​രി​ക്കു​ക​യാണ്‌. വിവാ​ഹ​ത്തിന്‌ മുമ്പത്തെ, ഒന്നോ അതില​ധി​ക​മോ പങ്കാളി​ക​ളു​മാ​യു​ളള ലൈം​ഗിക ബന്ധം . . . ഇനിമു​തൽ ധാർമ്മി​ക​മാ​യി സ്വീകാ​ര്യ​മാ​യി കണക്കാ​ക്ക​പ്പെ​ടും.”—ആൽബെർട്ട റിപ്പോർട്ട്‌.³³

“വിവാ​ഹ​ത്തിന്‌ മുമ്പത്തെ ലൈം​ഗി​കത സംബന്ധിച്ച്‌ പാസ്‌റ​റർമാർ നിശബ്ദർ.” “അമേരി​ക്ക​യി​ലെ പാസ്‌റ​റർമാർ വിവാ​ഹ​ത്തി​നു​മു​മ്പെ​യു​ളള ലൈം​ഗി​കത സംബന്ധിച്ച്‌ പ്രസം​ഗി​ക്കു​ന്ന​തിൽ പാപക​ര​മാ​യി നിശബ്ദ​രാ​യി​രു​ന്നി​ട്ടുണ്ട്‌ . . . അവർക്ക്‌ അവരുടെ ഇടവക​ക്കാ​രിൽ ചിലരെ നഷ്ടമാ​കു​മെന്ന്‌ അവർക്ക്‌ ഭയമാണ്‌. അത്തരം പുരോ​ഹി​തൻമാ​രെ​പ്പ​ററി യെശയ്യാ​വിന്‌ അറിയാ​മാ​യി​രു​ന്നു. അവന്റെ പുസ്‌തകം ഒന്നാം അദ്ധ്യാ​യ​ത്തിൽ അവരെ​പ്പ​ററി ഇപ്രകാ​രം പറയു​ന്ന​താ​യി അവൻ കർത്താ​വി​നെ ഉദ്ധരി​ക്കു​ന്നു: ‘ഞാൻ നിങ്ങളിൽനിന്ന്‌ എന്റെ കണ്ണുകളെ മറയ്‌ക്കും; നിങ്ങൾ അനേകം പ്രാർത്ഥന കഴിച്ചാ​ലും ഞാൻ ശ്രദ്ധി​ക്കു​ക​യില്ല; നിങ്ങളു​ടെ കരങ്ങൾ രക്തം കൊണ്ട്‌ നിറഞ്ഞി​രി​ക്കു​ന്നു.’”—റെറല​ഗ്രാഫ്‌, നോർത്ത്‌ പ്ലാററ്‌, നെബ്രാസ്‌ക്ക.³⁴

“വ്യഭി​ചാ​രം കൂടുതൽ മയപ്പെട്ട വെളി​ച്ച​ത്തിൽ.” “ഏഴാം കല്‌പന സംബന്ധിച്ച സഭയുടെ മയപ്പെട്ട വീക്ഷണ​ത്തെ​പ്പ​ററി സംസാ​രി​ച്ച​പ്പോൾ ആ ആംഗ്ലിക്കൻ പുരോ​ഹി​തൻ നെററി ചുളിച്ചു . . . ‘ഞങ്ങളുടെ നിലപാട്‌ വിധി​ക്കുക എന്നതി​നേ​ക്കാൾ പരിച​രണം കൊടു​ക്കുക എന്നതാണ്‌,’ എന്ന്‌ അദ്ദേഹം പറഞ്ഞു.”—ദി സൺഡേ റൈറംസ്‌, പേർത്ത്‌, ആസ്‌​ത്രേ​ലിയ.³⁵

“യൂണി​റേ​റ​റി​യൻസ്‌ സ്വവർഗ്ഗ​വി​വാ​ഹ​ങ്ങളെ അംഗീ​ക​രി​ക്കു​ന്നു.”—ദി ന്യൂ​യോർക്ക്‌ ടൈംസ്‌.³⁶

“കാനഡാ​യി​ലെ ഐക്യ​സ​ഭ​ക​ളി​ലെ ഒരു സംഘം സ്വവർഗ്ഗ​സം​ഭോ​ഗി​കളെ പുരോ​ഹി​തൻമാ​രാ​യി അഭി​ഷേകം ചെയ്യു​ന്ന​തി​നെ പിന്താ​ങ്ങി​യി​രി​ക്കു​ന്നു.”—ദി റെറാ​റെ​ന്റോ സ്‌ററാർ.³⁷

“വ്യഭി​ചാ​രം നിയമാ​നു​സൃ​ത​മാ​ക്കുക—പരിശു​ദ്ധ​മായ പരിഹാ​രം അതാണ്‌.”—ഫില​ഡേൽഫിയ ഡെയിലി ന്യൂസിൽ ഒരു കത്തോ​ലിക്ക മോൺസി​ഞ്ഞോർ എഴുതിയ മുഖ പ്രസംഗം.³⁸

[25-ാം പേജിലെ ചിത്രങ്ങൾ]

ഏകാധിപതികൾക്ക്‌ പിന്തുണ കൊടു​ത്തു​കൊണ്ട്‌ പുരോ​ഹി​തൻമാർ തങ്ങളുടെ കാര്യങ്ങൾ രക്തപങ്കി​ല​മാ​ക്കി​യി​രി​ക്കു​ന്നു