കഴിഞ്ഞ വർഷത്തെ സവി​ശേ​ഷ​ത​കൾ

കഴിഞ്ഞ വർഷത്തെ ആവേശ​ഭ​രി​ത​മായ സംഭവ​ങ്ങ​ളിൽ ശ്രദ്ധേ​യ​മായ ഒന്നാണ്‌ “ദൈവ മാർഗ​ത്തി​ലുള്ള ജീവിതം” അന്താരാ​ഷ്‌ട്ര കൺ​വെൻ​ഷ​നു​കൾ. തന്റെ പുതിയ ലോക​ത്തി​ലെ ജീവി​ത​ത്തി​നാ​യി യഹോവ ഒരുക്കി​ക്കൊ​ണ്ടി​രി​ക്കുന്ന തന്റെ ആരാധകർ, “സകല ജാതി​ക​ളി​ലും ഗോ​ത്ര​ങ്ങ​ളി​ലും വംശങ്ങ​ളി​ലും ഭാഷക​ളി​ലും​നി​ന്നു ഉള്ള . . . ഒരു മഹാപു​രു​ഷാ​രം” ആയിത്തീർന്നി​രി​ക്കു​ന്നു എന്നതിന്‌ ആ കൺ​വെൻ​ഷ​നു​കൾ സുസ്‌പ​ഷ്ട​മായ തെളിവു നൽകി. (വെളി. 7:9, 10) ആ കൺ​വെൻ​ഷ​നു​ക​ളിൽ ഒന്നിൽ പങ്കെടുത്ത ശേഷം ഗ്വാഡ​ലൂ​പ്പിൽ നിന്നുള്ള ഒരു സാക്ഷി, തനിക്ക്‌ ആ വാക്കു​ക​ളു​ടെ സത്യാവസ്ഥ ആദ്യമാ​യി ‘ഹൃദയ​പൂർവം വിലമ​തി​ക്കാൻ’ സാധിച്ചു എന്നു പറഞ്ഞു.

അന്താരാ​ഷ്‌ട്ര കൺ​വെൻ​ഷ​നു​കൾക്കാ​യി ഇതിനു മുമ്പ്‌ ഒരിക്ക​ലും ഇത്രയ​ധി​കം ആളുകൾ യാത്ര ചെയ്‌തി​ട്ടില്ല. കൺ​വെൻ​ഷ​നു​ക​ളിൽ  പങ്കെടു​ക്കാ​നാ​യി പതിനാ​യി​ര​ക്ക​ണ​ക്കി​നു സഹോ​ദ​രങ്ങൾ മറ്റു രാജ്യ​ങ്ങ​ളി​ലേക്ക്‌, മറ്റു ഭൂഖണ്ഡ​ങ്ങ​ളി​ലേക്കു പോലും, യാത്ര ചെയ്‌തു. അത്‌ അവർ ഒരു യഥാർഥ സാർവ​ദേ​ശീയ കുടും​ബ​ത്തി​ന്റെ ഭാഗമാണ്‌ എന്ന വസ്‌തു​ത​യ്‌ക്ക്‌ ഈടുറ്റ തെളിവു നൽകി.

മേയ്‌ അവസാനം തുടങ്ങി ആഗസ്റ്റ്‌ വരെ ഐക്യ​നാ​ടു​കൾ, കാനഡ, ബ്രിട്ടൻ എന്നീ രാജ്യ​ങ്ങ​ളി​ലെ പല നഗരങ്ങ​ളി​ലും തുടർന്ന്‌ ജർമനി​യി​ലും ഗ്രീസി​ലും “ദൈവ മാർഗ​ത്തി​ലുള്ള ജീവിതം” അന്താരാ​ഷ്‌ട്ര കൺ​വെൻ​ഷ​നു​കൾ നടത്ത​പ്പെട്ടു. ഈ കൺ​വെൻ​ഷ​നു​ക​ളിൽ ഓരോ​ന്നി​ലും ഭരണസം​ഘാം​ഗങ്ങൾ പ്രസം​ഗി​ച്ചു, മിക്ക​പ്പോ​ഴും അവരുടെ പ്രസംഗം തർജമ ചെയ്യ​പ്പെട്ടു. അതേസ​മ​യം​തന്നെ വടക്കേ അമേരി​ക്ക​യി​ലും യൂറോ​പ്പി​ലും നൂറു​ക​ണ​ക്കി​നു ഡിസ്‌ട്രി​ക്‌റ്റ്‌ കൺ​വെൻ​ഷ​നു​ക​ളും നടത്ത​പ്പെട്ടു.

മേയ്‌ 22-നു തുടക്കം കുറിച്ച, ആദ്യത്തെ അന്താരാ​ഷ്‌ട്ര കൺ​വെൻ​ഷൻ കാലി​ഫോർണി​യ​യി​ലെ സാന്റി​യാ​ഗോ​യി​ലാ​ണു നടന്നത്‌. 14 രാജ്യ​ങ്ങ​ളിൽ നിന്നുള്ള 45 മിഷന​റി​മാർ തങ്ങളോ​ടൊ​പ്പം ഉണ്ടായി​രു​ന്നതു കൺ​വെൻ​ഷനു കൂടിവന്ന സഹോ​ദ​ര​ങ്ങളെ ആനന്ദഭ​രി​ത​രാ​ക്കി. രണ്ടു വാരങ്ങൾക്കു ശേഷം സ്‌പാ​നിഷ്‌ ഭാഷ സംസാ​രി​ക്കുന്ന സാക്ഷികൾ അതേ സ്റ്റേഡി​യ​ത്തിൽ കൂടി​വന്നു. സ്റ്റേഡി​യ​ത്തിൽ കൂടിവന്ന 25,181 പേരിൽ 3,100-ലധികം പേർ വിദേ​ശത്തു നിന്നു​ള്ളവർ ആയിരു​ന്നു. അർജന്റീന, ഉറുഗ്വേ, എൽ സാൽവ​ഡോർ, കോസ്റ്റ​റിക്ക, ചിലി, പെറു, മെക്‌സി​ക്കോ, സ്‌പെ​യിൻ എന്നിവി​ട​ങ്ങ​ളിൽ നിന്നുള്ള പ്രസം​ഗകർ പരിപാ​ടി​യിൽ പങ്കെടു​ത്തു. അവരു​ടെ​യെ​ല്ലാം വ്യതി​രി​ക്ത​മായ ഉച്ചാര​ണ​വു​മാ​യി ശ്രോ​താ​ക്കൾക്കു പൊരു​ത്ത​പ്പെ​ടേ​ണ്ട​തു​ണ്ടാ​യി​രു​ന്നു. എത്ര സന്തുഷ്ട​രും ഉത്സാഹ​ഭ​രി​ത​രും ആയിരു​ന്നു ആ സദസ്സ്‌!

പിറ്റേ വാരം മിഷി​ഗ​ണി​ലെ പോൻഡി​യാ​ക്കിൽ നടന്ന കൺ​വെൻ​ഷ​നിൽ പങ്കെടു​ത്ത​വ​രു​ടെ സംഖ്യ 42,763 ആയി വർധിച്ചു. അതിൽ, ചുരു​ങ്ങി​യത്‌ 44 രാജ്യ​ങ്ങ​ളിൽ നിന്നുള്ള പ്രതി​നി​ധി​കൾ എത്തി​ച്ചേർന്നു. ചെക്ക്‌ റിപ്പബ്ലിക്ക്‌, ദക്ഷിണാ​ഫ്രിക്ക, ബ്രിട്ടൻ എന്നീ രാജ്യ​ങ്ങ​ളിൽ ഓരോ​ന്നിൽ നിന്നും 300-ലധികം പ്രതി​നി​ധി​കൾ വീതം സന്നിഹി​തർ ആയിരു​ന്നു. യൂറോ​പ്പി​ലെ 14-ഉം ആഫ്രി​ക്ക​യി​ലെ 8-ഉം അമേരി​ക്ക​ക​ളി​ലെ 20-ഉം ഏഷ്യയി​ലെ 2-ഉം രാജ്യ​ങ്ങ​ളിൽ നിന്നുള്ള പ്രതി​നി​ധി​കൾ കൺ​വെൻ​ഷന്‌ എത്തി​ച്ചേർന്നു. ചിലയി​ട​ങ്ങ​ളിൽ, തങ്ങളുടെ ഇടയിൽ നിന്ന്‌ ഒരാളെ എങ്കിലും കൺ​വെൻ​ഷന്‌ അയയ്‌ക്കു​ന്ന​തി​നു മുഴു കുടും​ബ​വും സഭയും പോലും സാമ്പത്തിക സഹായം നൽകി. മറ്റു ദേശങ്ങ​ളിൽ നിന്നുള്ള നിരവധി പ്രതി​നി​ധി​ക​ളു​ടെ സാന്നി​ധ്യം സദസ്യരെ ഉത്സാഹ​ഭ​രി​തർ ആക്കിയ​താ​യി കാണ​പ്പെട്ടു. ഭരണസം​ഘാം​ഗ​ങ്ങ​ളായ ഷ്രോഡർ, ബാർ, സിഡ്‌ലിക്‌ എന്നീ സഹോ​ദ​ര​ന്മാ​രു​ടെ പ്രസം​ഗങ്ങൾ അവരുടെ ഹൃദയത്തെ സ്‌പർശി​ച്ചു. ഒരു സാക്ഷി​യു​ടെ വാക്കു​ക​ളിൽ  പറഞ്ഞാൽ, ‘തങ്ങൾ വരുവാ​നുള്ള തലമു​റ​ക​ളോട്‌—ഒരുപക്ഷേ ഉയിർപ്പി​ക്ക​പ്പെ​ടാ​നി​രി​ക്കുന്ന മുൻ തലമു​റ​ക​ളോ​ടും—വർണി​ക്കാൻ വാഞ്‌ഛി​ക്കുന്ന കാര്യ​ങ്ങ​ളാണ്‌’ സംഭവി​ച്ചി​രി​ക്കു​ന്നത്‌.—സങ്കീർത്തനം 48:1, 12-14 താരത​മ്യം ചെയ്യുക.

പോൻഡി​യാ​ക്കിൽ കൺ​വെൻ​ഷൻ നടന്ന സമയത്ത്‌ കാനഡ​യി​ലെ മോൺട്രി​യൽ, ക്വി​ബെക്‌ എന്നിവി​ട​ങ്ങ​ളി​ലാ​യി ഫ്രഞ്ച്‌, പോർച്ചു​ഗീസ്‌, ഗ്രീക്ക്‌, അറബിക്‌ എന്നീ ഭാഷക​ളിൽ നാലു കൺ​വെൻ​ഷ​നു​കൾ നടക്കുക ആയിരു​ന്നു. പ്രായാ​ധി​ക്യ​ത്തി​ലും തങ്ങളെ സേവി​ക്കുന്ന ഭരണസം​ഘാം​ഗ​ങ്ങ​ളു​ടെ പ്രവർത്ത​നങ്ങൾ സഹോ​ദ​ര​ങ്ങ​ളെ​യെ​ല്ലാം ആഴത്തിൽ സ്‌പർശി​ച്ചു. മറ്റു ദേശങ്ങ​ളിൽ നിന്നുള്ള 4,071 പ്രതി​നി​ധി​കൾ ഉൾപ്പെടെ മൊത്തം ഹാജർ 33,242 ആയിരു​ന്നു. ഫ്രാൻസ്‌, ബ്രസീൽ എന്നിവി​ട​ങ്ങ​ളിൽ നിന്നു വലിയ ഒരു കൂട്ടം തന്നെ വന്നെത്തി; ഗ്വാഡ​ലൂപ്പ്‌, ബെൽജി​യം, മാർട്ടി​നിക്ക്‌ എന്നിവി​ട​ങ്ങ​ളിൽ നിന്നും നിരവധി പേർ ഹാജരാ​യി​രു​ന്നു. ആഫ്രി​ക്ക​യി​ലെ 13 രാജ്യ​ങ്ങ​ളിൽ നിന്നു പ്രതി​നി​ധി​കൾ ഹാജരാ​യി. പശ്ചിമ ആഫ്രി​ക്ക​യി​ലെ മാലി​യിൽ ദീർഘ​കാ​ല​മാ​യി പയനി​യ​റിങ്‌ ചെയ്യുന്ന ഒരു സഹോ​ദരി അവരിൽ ഒരാളാ​യി​രു​ന്നു. ആ സഹോ​ദ​രിക്ക്‌ എത്തി​ച്ചേ​രാൻ സാധി​ച്ചത്‌ അവർ ക്രമമാ​യി മാസി​കകൾ എത്തിച്ചു കൊടു​ക്കുന്ന ഒരു ബിസി​ന​സു​കാ​രി ദയാപു​ര​സ്സരം യാത്ര​ച്ചെ​ലവു വഹിച്ച​തു​കൊ​ണ്ടാണ്‌. കൺ​വെൻ​ഷനു പോയി​വ​രാ​നുള്ള ചെലവു നിർവ​ഹി​ക്കാൻ തങ്ങളുടെ കാർ വിറ്റ ഒരു ബ്രസീ​ലി​യൻ ദമ്പതികൾ ഇങ്ങനെ പറഞ്ഞു: “കൺ​വെൻ​ഷനു പങ്കെടു​ക്കാൻ സാധി​ച്ച​താ​ണു ഞങ്ങളെ സംബന്ധി​ച്ചി​ട​ത്തോ​ളം ഏറ്റവും മികച്ച നിക്ഷേപം.”

ജൂണിലെ പിറ്റേ രണ്ടു വാരാ​ന്ത​ങ്ങ​ളി​ലും കാനഡ​യു​ടെ പശ്ചിമ തീരത്തുള്ള വാൻകൂ​വ​റിൽ രണ്ടു കൺ​വെൻ​ഷ​നു​കൾ കൂടെ നടത്ത​പ്പെട്ടു. ദക്ഷിണ​പൂർവേഷ്യ, ഉത്തര യൂറോപ്പ്‌ എന്നീ വിദൂര ദേശങ്ങ​ളിൽ നിന്നുള്ള നിരവധി പ്രതി​നി​ധി​കൾ ഉൾപ്പെടെ രണ്ടിട​ത്തെ​യും മൊത്തം ഹാജർ 22,273 ആയിരു​ന്നു. വാൻകൂ​വ​റിൽ അവസാ​നത്തെ കൺ​വെൻ​ഷൻ നടക്കു​മ്പോൾ ഒൺടേ​റി​യോ​യി​ലെ ടൊറ​ന്റോ​യി​ലും കൺ​വെൻ​ഷൻ നടക്കുക ആയിരു​ന്നു. കാനഡ​യിൽ നിന്നു​ള്ള​വർക്കു പുറമേ ജർമനി, പോളണ്ട്‌, ഫിൻലൻഡ്‌, ഓസ്‌ട്രിയ എന്നിവി​ട​ങ്ങ​ളിൽ നിന്നും യൂറോ​പ്പി​ലെ​യും ആഫ്രി​ക്ക​യി​ലെ​യും അനേകം ദേശങ്ങ​ളിൽ നിന്നും പ്രതി​നി​ധി​കൾ വന്നെത്തി. 41,381 പേർ ഹാജരാ​യി. കാനഡ​യിൽ നടന്ന കൺ​വെൻ​ഷ​നു​ക​ളിൽ 52 ദേശങ്ങ​ളിൽ നിന്നുള്ള പ്രതി​നി​ധി​കൾ സന്നിഹി​തർ ആയിരു​ന്നു—തീർച്ച​യാ​യും ഒരു അന്താരാ​ഷ്‌ട്ര കൂട്ടം​തന്നെ!

ഐക്യ​നാ​ടു​ക​ളിൽ ജൂലൈ 3-5 തീയതി​ക​ളിൽ പസഫിക്‌ തീരത്തുള്ള, കാലി​ഫോർണി​യ​യി​ലെ ലോങ്‌ ബീച്ചിനു സമീപം ഒരേ സമയം ഏഴു കൺ​വെൻ​ഷ​നു​കൾ നടക്കു​ന്നു​ണ്ടാ​യി​രു​ന്നു. ഇംഗ്ലീഷ്‌, ഇറ്റാലി​യൻ,  കൊറി​യൻ, ജാപ്പനീസ്‌, ചൈനീസ്‌ (കന്റോ​ണി​സി​ലും മൻഡാ​റി​യ​നി​ലും), വിയറ്റ്‌നാ​മിസ്‌, റ്റാഗ​ലോഗ്‌ എന്നീ ഭാഷക​ളിൽ ലോങ്‌ ബീച്ചിലെ സൗകര്യ​പ്ര​ദ​മായ കൺ​വെൻ​ഷൻ കേന്ദ്ര​ത്തിൽ വ്യത്യസ്‌ത ഇടങ്ങളി​ലാ​യി​ട്ടാണ്‌ അവ നടത്ത​പ്പെ​ട്ടത്‌. കൺ​വെൻ​ഷനു ഹാജരാ​യ​വ​രു​ടെ എണ്ണവും വ്യത്യാ​സ​പ്പെ​ട്ടി​രു​ന്നു. വിയറ്റ്‌നാ​മി​സിന്‌ 552 പേർ ഹാജരാ​യ​പ്പോൾ ഇംഗ്ലീഷ്‌ കൺ​വെൻ​ഷന്‌ 12,659 പേർ ഹാജരാ​യി. പൗരസ്‌ത്യ ദേശത്തു നിന്നും ഇറ്റലി​യിൽ നിന്നു​മുള്ള നിരവധി പ്രതി​നി​ധി​കൾ അമേരി​ക്കകൾ, പൂർവ യൂറോപ്പ്‌, ആഫ്രിക്ക എന്നിവി​ട​ങ്ങ​ളിൽ നിന്നു​ള്ള​വ​രു​ടെ സഹവാസം ആസ്വദി​ച്ചു. വളരെ ശ്രമം നടത്തി വന്നെത്തി​യ​വ​രും അവരിൽ ഉണ്ടായി​രു​ന്നു. പരിപാ​ടി​യു​ടെ ഇടവേ​ള​യിൽ പരമ്പരാ​ഗത വസ്‌ത്രം ധരിച്ച പ്രതി​നി​ധി​കൾ ഓരോ ഭാഷക്കാ​രെ​യും സമീപിച്ച്‌ അഭിവാ​ദ്യം ചെയ്യു​ക​യും ഹസ്‌ത​ദാ​നം നടത്തു​ക​യും പരസ്‌പരം ആശ്ലേഷി​ക്കു​ക​യും വിലാ​സങ്ങൾ കൈമാ​റു​ക​യും ഫോ​ട്ടോ​കൾ എടുക്കു​ക​യും ചെയ്‌തു. അവിടെ കൺ​വെൻ​ഷൻ ക്രമീ​ക​ര​ണങ്ങൾ ചെയ്യു​ന്ന​തിൽ ഏർപ്പെ​ട്ടി​രുന്ന ഒരു സഹോ​ദരൻ എഴുതി: “എല്ലാ കൺ​വെൻ​ഷ​നു​ക​ളും നല്ലതാണ്‌; മാസങ്ങൾക്കു ശേഷവും അവ മനസ്സിൽ തങ്ങിനിൽക്കു​ന്നു. എന്നാൽ ഈ കൺ​വെൻ​ഷൻ ഒരു വൻതിര പോലെ ആയിരു​ന്നു. അതിശ​ക്ത​മായ ആ വൻതിര ഹാജരാ​യ​വ​രു​ടെ ഹൃദയ​ത്തിൽ ശക്തമായ പ്രഭാവം ചെലുത്തി.”

ലോങ്‌ ബീച്ചിൽ നിരവധി കൺ​വെൻ​ഷ​നു​കൾ നടന്ന വാരാ​ന്തത്തെ തുടർന്ന്‌ ടെക്‌സാ​സി​ലെ ഹ്യൂസ്റ്റ​ണിൽ സ്‌പാ​നിഷ്‌ ഭാഷയിൽ ഒരു കൺ​വെൻ​ഷൻ നടന്നു. ഹാജരായ 34,257 പേരിൽ 2,820 പേർ 14 വിദേശ രാജ്യ​ങ്ങ​ളിൽ നിന്നുള്ള പ്രതി​നി​ധി​കൾ ആയിരു​ന്നു. അവർക്കു താമസ​സൗ​ക​ര്യം ഒരുക്കി​യതു പ്രാ​ദേ​ശിക സാക്ഷി​ക​ളു​ടെ വീടു​ക​ളിൽ ആയിരു​ന്നു—1,217 വീടു​ക​ളിൽ. മുഴു ഹൃദയ​ത്തോ​ടെ അവർ സന്ദർശ​കർക്ക്‌ ആതിഥ്യ​മ​രു​ളി.

തങ്ങൾക്കു ലഭിച്ച ഊഷ്‌മ​ള​മായ സ്വാഗ​ത​മാ​ണു പ്രതി​നി​ധി​ക​ളിൽ ആഴത്തിൽ മതിപ്പു​ള​വാ​ക്കിയ ഒരു സംഗതി. മുമ്പ്‌ ഒരിക്ക​ലും കണ്ടിട്ടി​ല്ലാത്ത സഹ ക്രിസ്‌ത്യാ​നി​കൾ അവരു​ടെ​മേൽ സഹോദര സ്‌നേഹം കോരി​ച്ചൊ​രി​ഞ്ഞു. സാർവ​ദേ​ശീയ സാഹോ​ദ​ര്യ​ത്തെ കുറിച്ച്‌ അവർ മുമ്പു വായി​ച്ചി​ട്ടുണ്ട്‌. അത്തരം സ്‌നേഹം പ്രകടി​പ്പി​ക്കാൻ യഹോവ തന്റെ ജനത്തെ പഠിപ്പി​ക്കു​ന്നു എന്ന്‌ അവർക്ക്‌ അറിയാ​വു​ന്ന​തു​മാണ്‌. (എബ്രാ. 13:1, 2; 3 യോഹ. 5-8) എന്നാൽ, മുമ്പൊ​രി​ക്ക​ലും അനുഭ​വി​ച്ചി​ട്ടി​ല്ലാത്ത വിധത്തിൽ അവർ ഇപ്പോൾ അത്‌ അനുഭ​വി​ച്ച​റി​യാൻ ഇടയായി. ചെറു​പ്പ​ക്കാ​രും പ്രായം​ചെ​ന്ന​വ​രു​മായ സഹോ​ദ​രീ​സ​ഹോ​ദ​ര​ന്മാർ വിമാ​ന​ത്താ​വ​ള​ത്തിൽ അവർക്ക്‌ ആവേശ​ഭ​രി​ത​മായ സ്വാഗ​ത​മ​രു​ളി. വിദേശ പ്രതി​നി​ധി​കൾക്കു പ്രാ​ദേ​ശിക സാക്ഷി​ക​ളോ​ടൊ​പ്പം താമസി​ക്കാ​നുള്ള ഏർപ്പാ​ടു​ക​ളും അതി​നോ​ടകം ചെയ്യ​പ്പെ​ട്ടി​രു​ന്നു. അത്‌ എത്രയോ അനു​ഗ്ര​ഹ​ക​ര​മെന്നു തെളിഞ്ഞു!

 തങ്ങളുടെ ആതി​ഥേ​യരെ സന്ധിക്കു​ന്ന​തി​നു വിദേശ പ്രതി​നി​ധി​കളെ ടെക്‌സാ​സിൽ നിന്നു റൊ​സെൻബെർഗ്‌ രാജ്യ​ഹാ​ളി​ലേക്കു നൂറു​ക​ണ​ക്കി​നു ബസ്സുക​ളി​ലാ​ണു കൊണ്ടു​പോ​യത്‌. അവിടെ 500 സാക്ഷി​ക​ളു​ടെ ഒരു സമൂഹം ആനന്ദഭ​രി​ത​രാ​യി, കരഘോ​ഷ​ത്തോ​ടെ പ്രതി​നി​ധി​കൾക്കു സ്വാഗ​ത​മ​രു​ളി. യാത്ര ചെയ്‌തു ക്ഷീണിച്ച്‌ എത്തുന്ന പ്രതി​നി​ധി​കളെ സ്വാഗതം ചെയ്യാൻ മിഷി​ഗ​ണി​ലെ ബെൽവി​ലിൽ നൂറു​ക​ണ​ക്കി​നു സാക്ഷികൾ രാവും പകലും മുഴുവൻ കാത്തി​രു​ന്നു. പ്രതി​നി​ധി​കൾ സമ്മേളന ഹാളിൽ പ്രവേ​ശി​ച്ച​പ്പോൾ അനേകർ “ആയിര​ങ്ങ​ളാം സഹോ​ദ​രൻമാർ,” “നാം യഹോ​വ​യു​ടെ സാക്ഷി​ക​ളാ​കു​ന്നു!” എന്നീ ഗീതങ്ങൾ ആലപി​ച്ചു​കൊണ്ട്‌ അവരെ സ്വാഗതം ചെയ്‌തു. കാലി​ഫോർണി​യ​യിൽ ഉള്ള മിരാ ലോമാ സമ്മേളന ഹാളിൽ കൂടിവന്ന പലരും ഇംഗ്ലീ​ഷും സ്‌പാ​നി​ഷും സംസാ​രി​ക്കു​ന്നവർ ആയിരു​ന്നു. അതു​കൊണ്ട്‌ അവർ “യഹോവെ, നിനക്കു ഞങ്ങൾ നന്ദിപ​റ​യു​ന്നു” എന്ന ഗീതത്തി​ന്റെ ഒന്നിട​വി​ട്ടുള്ള വരികൾ ഇംഗ്ലീ​ഷി​ലും സ്‌പാ​നി​ഷി​ലും ആലപിച്ചു. ഹൃദ്യ​മായ ഒരു രംഗമാ​യി​രു​ന്നു അത്‌! മിക്കവ​രും ആനന്ദാ​ശ്രു​ക്കൾ പൊഴി​ച്ചു!

മിഷി​ഗ​ണിൽ, വേണ്ടതി​ന്റെ ഇരട്ടി താമസ​സൗ​ക​ര്യ​ങ്ങൾക്കു സാക്ഷികൾ ക്രമീ​ക​രണം ചെയ്‌തു. സന്ദർശ​ക​രായ സഹോ​ദ​ര​ങ്ങൾക്കു പരിപാ​ലനം പ്രദാനം ചെയ്യു​ന്ന​തി​നുള്ള പദവി​ക്കാ​യി അപേക്ഷി​ച്ചു​കൊണ്ട്‌ അനേക​രും ഫോൺ ചെയ്‌തു. താമസ​സൗ​ക​ര്യം പ്രദാനം ചെയ്യാൻ സാധി​ക്കാ​ഞ്ഞവർ ഭക്ഷണവും യാത്രാ സൗകര്യ​വും ഒരുക്കി​ക്കൊ​ണ്ടു പ്രതി​നി​ധി​കൾക്കു സഹായ​മേകി. തങ്ങളെ വീടു​ക​ളിൽ കൈ​ക്കൊ​ണ്ട​തി​നു പുറമേ തങ്ങൾക്കു കിടക്കകൾ തന്നിട്ട്‌ ആതി​ഥേയർ തറയിൽ കിടന്നു​റ​ങ്ങു​ന്നതു ചിലർ ശ്രദ്ധിച്ചു. വൈകു​ന്നേ​ര​ങ്ങ​ളി​ലും കൺ​വെൻ​ഷ​നു​കൾക്കു ശേഷവും സാക്ഷി കുടും​ബങ്ങൾ, ചില​പ്പോൾ സഭകൾ മൊത്ത​മാ​യും, പ്രതി​നി​ധി​ക​ളോ​ടൊ​പ്പം ഭക്ഷണം കഴിക്കു​ക​യോ പിക്‌നി​ക്കി​നു പോകു​ക​യോ ചെയ്‌തു. അവർ പാട്ടുകൾ പാടി​യും നാടോ​ടി നൃത്തം ചെയ്‌തും അനുഭ​വങ്ങൾ പങ്കിട്ടും സമയം ചെലവ​ഴി​ച്ചു. അതു തികച്ചും ഉല്ലാസ​പ്ര​ദ​മായ അവസരം ആയിരു​ന്നു! പല പ്രതി​നി​ധി​കൾക്കും ആതി​ഥേ​യ​രു​ടെ ഭാഷ വശമി​ല്ലാ​യി​രു​ന്നെ​ങ്കി​ലും—ചിലർക്ക്‌ അങ്ങേയറ്റം പോയാൽ ഏതാനും വാക്കുകൾ അറിയാ​മാ​യി​രു​ന്നു—അവർ ആശയ വിനി​മ​യ​ത്തി​നുള്ള വഴികൾ കണ്ടുപി​ടി​ച്ചു. പിരി​യാൻ നേരമാ​യ​പ്പോൾ ഭാഷയാ​യി​രു​ന്നില്ല ആശയ വിനി​മ​യ​ത്തി​നു കൂടുതൽ തടസ്സം സൃഷ്ടി​ച്ചത്‌. മറിച്ച്‌, അവർ വികാ​ര​ഭ​രി​തർ ആയിരു​ന്നു. ആയുഷ്‌കാല സുഹൃ​ദ്‌ബ​ന്ധ​ങ്ങൾക്ക്‌ അടിത്തറ ഇടപ്പെട്ടു.

വീടു​ക​ളി​ലെ താമസ ക്രമീ​ക​ര​ണ​ത്തിൽ നിന്നു പ്രയോ​ജനം അനുഭ​വി​ച്ചതു സന്ദർശകർ മാത്ര​മാ​യി​രു​ന്നില്ല. സന്ദർശ​കർക്കു താമസ​സൗ​ക​ര്യം ഒരുക്കിയ കാനഡ​യി​ലുള്ള ഒരു ദമ്പതികൾ എഴുതി: “യാതൊ​രു പരിച​യ​വും ഇല്ലാത്ത ആളുക​ളോ​ടൊ​പ്പം ഒരാഴ്‌ച എങ്ങനെ കഴിയും എന്നു ഞങ്ങളെ​ല്ലാം ചിന്തി​ച്ചി​രു​ന്നു. പക്ഷേ, ആ ഒരാഴ്‌ച എത്ര പെട്ടെ​ന്നാ​ണു  കടന്നു​പോ​യത്‌!” ഒറ്റയ്‌ക്കു​ളള ഒരു മാതാവ്‌ എഴുതി: “ഫ്രാൻസിൽ നിന്നുള്ള ഒരു ദമ്പതി​കളെ പാർപ്പി​ക്കു​ന്ന​തി​നുള്ള മഹത്തായ പദവി എനിക്കു ലഭിച്ചു. എന്നെയും കുട്ടി​ക​ളെ​യും സംബന്ധി​ച്ചി​ട​ത്തോ​ളം അത്‌ അത്യന്തം പരിപു​ഷ്ടി​പ്പെ​ടു​ത്തു​ന്നത്‌ ആയിരു​ന്നു. അത്‌ അതിശ​യ​ക​ര​വും ആനന്ദദാ​യ​ക​വും അവിസ്‌മ​ര​ണീ​യ​വും ആയ അനുഭവം ആയിരു​ന്നു എന്നേ എനിക്കു പറയാ​നു​ള്ളൂ.” ടോ​ഗോ​യിൽ നിന്നുള്ള ഒരു അതിഥി​യെ പാർപ്പിച്ച കുടും​ബം എഴുതി: “ഞങ്ങൾ പങ്കിട്ട സന്തോ​ഷ​ത്തെ​യും സ്‌നേ​ഹ​ത്തെ​യും കുറിച്ചു വർണി​ക്കാൻ വാക്കുകൾ ഇല്ല. . . . എത്ര വലിയ ഒരു നിധി! ആഗ്രഹി​ക്കാ​വു​ന്ന​തെ​ല്ലാം യഹോവ ഞങ്ങൾക്കു നൽകി.”

87 രാജ്യ​ങ്ങ​ളിൽ നിന്നുള്ള പ്രതി​നി​ധി​കൾക്കു തങ്ങളുടെ ടൂറിന്റെ  ഭാഗമാ​യി യഹോ​വ​യു​ടെ ദൃശ്യ സംഘട​ന​യു​ടെ ആസ്ഥാന​വും സന്ദർശി​ക്കാൻ സാധിച്ചു. ന്യൂ​യോർക്ക്‌ സംസ്ഥാ​ന​ത്തിൽ ബ്രുക്ലി​നി​ലും വാൾക്കി​ല്ലി​ലും (ബ്രുക്ലി​നിൽ നിന്ന്‌ 115 കിലോ​മീ​റ്റർ ദൂരം) പാറ്റേ​ഴ്‌സ​നി​ലും (ബ്രുക്ലി​നിൽ നിന്നു 112 കിലോ​മീ​റ്റർ ദൂരം) ആണ്‌ അതിന്റെ പ്രവർത്ത​ന​ങ്ങ​ളിൽ അധിക​വും നടക്കു​ന്നത്‌. മേയ്‌ 28-നും ജൂലൈ 20-നും ഇടയ്‌ക്ക്‌ മൊത്തം 14,500-ലധികം സന്ദർശകർ അവി​ടെ​യെത്തി! അനേക​രു​ടെ​യും കാര്യ​ത്തിൽ അത്‌ “ഒരു സ്വപ്‌ന​സാ​ക്ഷാ​ത്‌കാ​രം ആയിരു​ന്നു.” പാറ്റേ​ഴ്‌സ​നി​ലുള്ള വാച്ച്‌ടവർ വിദ്യാ​ഭ്യാ​സ കേന്ദ്ര​ത്തിൽ ടൂർ നടത്തിയ ഒരു കൂട്ടം സന്ദർശകർ തങ്ങളുടെ സന്തോഷം പ്രകടി​പ്പി​ക്കാൻ ഉച്ചഭക്ഷ​ണ​ത്തി​നു ശേഷം ഭക്ഷണ ഹാളിൽ കൂടി​വന്ന്‌ ഹൃദ്യ​മായ, ചതുർഭാഗ താളവ്യ​വ​സ്ഥ​യി​ലുള്ള ‘“ഇതാകു​ന്നു മാർഗ്ഗം”’ എന്ന 42-ാം ഗീതം ആലപിച്ചു. തങ്ങൾ കണ്ട കാര്യ​ങ്ങ​ളാ​ലും ആസ്വദിച്ച ആതി​ഥ്യോ​പ​ചാ​ര​ത്താ​ലും പ്രചോ​ദി​തർ ആയി അനേക​രും നിറക​ണ്ണു​ക​ളോ​ടെ​യാ​ണു  ടൂർ ഗൈഡു​ക​ളാ​യി സേവിച്ച സഹോ​ദ​രീ​സ​ഹോ​ദ​ര​ന്മാർക്കു നന്ദി നൽകി​യത്‌. സന്ദർശകർ മാത്രമല്ല വികാ​ര​ത​ര​ളി​തർ ആയത്‌. ആ ദിനങ്ങൾ ഒരിക്ക​ലും മറക്കാ​നാ​വി​ല്ലെന്നു ബെഥേൽ കുടും​ബാം​ഗ​ങ്ങ​ളും പറഞ്ഞു.

യൂറോ​പ്പിൽ അന്താരാ​ഷ്‌ട്ര കൺ​വെൻ​ഷ​നു​ക​ളിൽ പങ്കെടു​ത്ത​വ​രും സമാന​മായ വികാരം പങ്കിട്ടു. ജൂലൈ മാസത്തിൽ പ്രതി​നി​ധി​കൾ ബ്രിട്ട​നിൽ എത്തി​ച്ചേ​രാൻ തുടങ്ങി. ജൂലൈ 24 മുതൽ 26 വരെ ഒരേ സമയത്ത്‌ ഒമ്പതു നഗരങ്ങ​ളിൽ ആയിട്ടാണ്‌ അവിടെ കൺ​വെൻ​ഷ​നു​കൾ നടന്നത്‌. ഇംഗ്ലീഷ്‌, ഫ്രഞ്ച്‌, സ്‌പാ​നിഷ്‌, പഞ്ചാബി എന്നിങ്ങനെ ഏതു ഭാഷ ആയിരു​ന്നാ​ലും പരിപാ​ടി​യിൽ മാറ്റമി​ല്ലാ​യി​രു​ന്നു. ഭരണസം​ഘാം​ഗങ്ങൾ  നടത്തിയ പ്രസം​ഗങ്ങൾ, ഇലക്‌​ട്രോ​ണിക്‌ മാധ്യമം മുഖാ​ന്തരം ബന്ധിപ്പി​ക്ക​പ്പെ​ട്ടി​രുന്ന എല്ലാ കൺ​വെൻ​ഷൻ സ്ഥലങ്ങളി​ലേ​ക്കും സം​പ്രേ​ക്ഷണം ചെയ്യ​പ്പെട്ടു. 60 ദേശങ്ങ​ളിൽ നിന്നുള്ള പ്രതി​നി​ധി​കൾ സന്നിഹി​തർ ആയിരു​ന്നു.

മിഷന​റി​മാ​രും സാർവ​ദേ​ശീയ ദാസന്മാ​രും ആയി അഭിമു​ഖം നടത്തി​യത്‌ ആയിരു​ന്നു പരിപാ​ടി​യി​ലെ ഒരു സവി​ശേഷത. അവർ 45 ദേശങ്ങ​ളിൽ നിന്നു​ള്ളവർ ആയിരു​ന്നു. വിദേശ സേവന​ത്തി​ലെ സന്തോ​ഷ​വും വെല്ലു​വി​ളി​ക​ളും അവർ സദസ്സു​മാ​യി പങ്കു​വെച്ചു. പശ്ചിമാ​ഫ്രി​ക്ക​യിൽ നിന്നുള്ള സൂസൻ സ്‌നാന്ത്‌ ഇങ്ങനെ സമ്മതിച്ചു പറഞ്ഞു: “ഒരു പുതിയ നിയമ​ന​ത്തിൽ പ്രവേ​ശിച്ച്‌ ആദ്യത്തെ ഏതാനും മാസങ്ങൾ പ്രത്യേ​കി​ച്ചും നിങ്ങൾക്കു ശക്തമായി ഗൃഹാ​തു​ര​ത്വം അനുഭ​വ​പ്പെ​ട്ടേ​ക്കാം. അതു​കൊണ്ട്‌, മാതാ​പി​താ​ക്കൾ പിന്തു​ണ​യും പ്രോ​ത്സാ​ഹ​ന​വും നൽകുന്നു എന്ന ബോധ്യം നിയമ​ന​ത്തിൽ തുടരാൻ ശരിക്കും സഹായ​മേ​കി​യേ​ക്കാം.” ദക്ഷിണാ​ഫ്രി​ക്ക​യിൽ ദീർഘ​കാ​ല​മാ​യി മിഷന​റി​യാ​യി സേവി​ക്കുന്ന ഡൊറീൻ കിൽഗോർ ഇങ്ങനെ പറഞ്ഞു: “ആളുകളെ സ്‌നേ​ഹി​ക്കുക എന്നതാണു പ്രധാന സംഗതി. ആളുകളെ യഥാർഥ​മാ​യി സ്‌നേ​ഹി​ക്കു​ക​യും യഹോ​വയെ സ്‌നേ​ഹി​ക്കാ​നും അവന്റെ വഴിക​ളിൽ നടക്കാ​നും അവരെ സഹായി​ക്കു​ക​യും ചെയ്യു​ന്നെ​ങ്കിൽ സേവന​ത്തിൽ തുടരാൻ അതു നിങ്ങളെ സഹായി​ക്കും.” ഇക്വ​ഡോ​റിൽ നിന്നുള്ള മിർനാ സിംസ്‌ ഇങ്ങനെ കൂട്ടി​ച്ചേർത്തു: “പിന്നിൽ ഉപേക്ഷി​ച്ചു  പോന്ന കാര്യ​ങ്ങ​ളിൽ ശ്രദ്ധ കേന്ദ്രീ​ക​രി​ക്കു​ന്ന​തി​നു പകരം ചെയ്യാ​നുള്ള വേലയിൽ ശ്രദ്ധ കേന്ദ്രീ​ക​രി​ക്കുക. നിരു​ത്സാ​ഹ​പ്പെ​ടു​ത്തുന്ന കാര്യ​ങ്ങ​ളിൽ ശ്രദ്ധി​ക്കാ​തെ അവയ്‌ക്ക​പ്പു​റം വീക്ഷി​ക്കുക. നമുക്ക്‌ ഒരു വേല ചെയ്‌തു തീർക്കാ​നുണ്ട്‌ എന്ന കാര്യം അനുസ്‌മ​രി​ക്കുക!” യുദ്ധത്താൽ പിച്ചി​ച്ചീ​ന്ത​പ്പെട്ട ലൈബീ​രി​യ​യിൽ നിന്നുള്ള ആൻ ക്രൂഡസ്‌ പറയുന്നു: “ഞങ്ങൾ പ്രദേ​ശിക സഹോ​ദ​രീ​സ​ഹോ​ദ​ര​ന്മാ​രെ പ്രോ​ത്സാ​ഹി​പ്പി​ക്കാൻ ആണു പ്രതീ​ക്ഷി​ക്ക​പ്പെ​ടു​ന്നത്‌. എന്നാൽ, യഥാർഥ​ത്തിൽ ഞങ്ങൾ അവരാൽ വളരെ​യ​ധി​കം പ്രോ​ത്സാ​ഹി​പ്പി​ക്ക​പ്പെട്ടു എന്നതാണു വസ്‌തുത. അവരുടെ തീക്ഷ്‌ണ​ത​യും വിശ്വാ​സ​വും യുദ്ധകാ​ലത്തെ ധൈര്യ​വും അന്യോ​ന്യ​മുള്ള പരിപാ​ല​ന​വും മറ്റൊ​രാൾക്കു വേണ്ടി സ്വന്തം ജീവൻ പണയ​പ്പെ​ടു​ത്താ​നുള്ള മനസ്സൊ​രു​ക്ക​വും ഒക്കെ ഞങ്ങൾ കണ്ടറിഞ്ഞു. . . . സഹോ​ദ​ര​ങ്ങ​ളു​ടെ സ്‌നേ​ഹ​വും പരിപാ​ല​ന​വും വ്യക്തി​പ​ര​മാ​യി അനുഭ​വി​ച്ച​റി​ഞ്ഞ​വ​രാ​ണു ഞങ്ങൾ. നിയമന പ്രദേ​ശത്തു നിന്നു നാലു തവണ ഞങ്ങൾ നാടു​ക​ട​ത്ത​പ്പെട്ടു. . . . ഞങ്ങൾ അഭയാർഥി​കൾ ആയിരു​ന്ന​പ്പോൾ സഹോ​ദ​രങ്ങൾ ഞങ്ങളുടെ വികാ​ര​ങ്ങളെ കുറി​ച്ചും ആത്മീയ​തയെ കുറി​ച്ചും അങ്ങേയറ്റം ചിന്തയു​ള്ളവർ ആയിരു​ന്നു. അതു​കൊണ്ട്‌ അവർ ഞങ്ങൾക്കു ഹൃദ്യ​മായ, പരിപു​ഷ്ടി​പ്പെ​ടു​ത്തുന്ന കത്തുകൾ അയച്ചു. . . . ഞങ്ങളെ സംബന്ധി​ച്ചി​ട​ത്തോ​ളം ഈ അനു​ഗ്ര​ഹ​ങ്ങ​ളെ​ല്ലാം, സാഹച​ര്യ​ങ്ങൾ ഭദ്രമ​ല്ലാ​തി​രു​ന്ന​പ്പോ​ഴും ലൈബീ​രി​യ​യി​ലേക്കു മടങ്ങു​ന്നത്‌ എളുപ്പ​മാ​ക്കി​ത്തീർത്തു.”

ബ്രിട്ട​നിൽ കൺ​വെൻ​ഷൻ അവസാ​നിച്ച്‌ ഏതാനും ദിവസ​ങ്ങൾക്കകം ജർമനി​യിൽ കൺ​വെൻ​ഷ​നു​കൾ തുടങ്ങി. ആതിഥേയ നഗരങ്ങ​ളി​ലെ സാക്ഷികൾ പൊതു​ജ​ന​ങ്ങൾക്കു ക്ഷണം നൽകി. അന്താരാ​ഷ്‌ട്ര കൺ​വെൻ​ഷ​നു​കൾ—ജർമനി​യിൽ അഞ്ചെണ്ണം പട്ടിക​പ്പെ​ടു​ത്തി​യി​രു​ന്നു—ആഗോള ബൈബിൾ വിദ്യാ​ഭ്യാ​സ പരിപാ​ടി​യു​ടെ സവി​ശേ​ഷ​ത​യാണ്‌ എന്ന്‌ ആളുക​ളോ​ടു വിശദീ​ക​രി​ക്കാൻ അത്‌ അവസരം പ്രദാനം ചെയ്‌തു. മുഴു പരിപാ​ടി​യും 13 ഭാഷക​ളിൽ നടത്ത​പ്പെട്ടു. പരിപാ​ടി​യി​ലെ മുഖ്യ ഇനങ്ങൾ പ്രക്ഷേ​പണം ചെയ്യു​ന്ന​തി​നാ​യി അഞ്ചു സ്ഥലങ്ങളും (ബെർലിൻ, ന്യൂറം​ബർഗ്‌, മ്യൂനിക്‌, ഡോർട്ട്‌മണ്ട്‌, സ്റ്റുട്ട്‌ഗാർട്ട്‌) പരസ്‌പരം ബന്ധിപ്പി​ക്ക​പ്പെട്ടു. വിദേ​ശ​ങ്ങ​ളിൽ നിന്നുള്ള 45,000 പേർ ഉൾപ്പെടെ അത്യുച്ച ഹാജർ 2,17,472 ആയിരു​ന്നു. പൂർവ യൂറോ​പ്പിൽ നിന്നുള്ള നിരവധി പേർ അക്കൂട്ട​ത്തിൽ ഉണ്ടായി​രു​ന്നു. കുറഞ്ഞ​പക്ഷം 150 മിഷന​റി​മാ​രും സാർവ​ദേ​ശീയ ദാസന്മാ​രും വിദേശ നിയമ​ന​ങ്ങ​ളി​ലുള്ള ബെഥേൽ അംഗങ്ങ​ളും അവരിൽ ഉൾപ്പെ​ട്ടി​രു​ന്നു.

സേവന വർഷം അവസാ​നി​ക്കു​ന്ന​തി​നു മുമ്പ്‌, ആഗസ്റ്റ്‌ 21-23 തീയതി​ക​ളിൽ ഗ്രീസി​ലെ ഏഥൻസിൽ സുപ്ര​ധാ​ന​മായ മറ്റൊരു അന്താരാ​ഷ്‌ട്ര കൺ​വെൻ​ഷൻ നടന്നു. ഗ്രീക്ക്‌ ഓർത്ത​ഡോ​ക്‌സ്‌ സഭയിലെ വൈദി​ക​രു​ടെ കടുത്ത എതിർപ്പു​കൾക്കു മധ്യേ​യും 21 ദേശങ്ങ​ളിൽ നിന്നായി 39,324 പേർ കൺ​വെൻ​ഷനു കൂടി​വന്നു. തങ്ങൾ  സന്ദർശി​ച്ചി​ട​ങ്ങ​ളി​ലെ​ല്ലാം, ഏഥൻസി​ലും ഗ്രീസി​ലെ​മ്പാ​ടും, നല്ല പെരു​മാ​റ്റ​ത്തി​ലൂ​ടെ​യും വസ്‌ത്ര​ധാ​രണ-ചമയ രീതി​ക​ളി​ലൂ​ടെ​യും അതു​പോ​ലെ സാക്ഷീ​ക​ര​ണ​ത്തി​ലൂ​ടെ​യും സാഹി​ത്യ​ങ്ങൾ നൽകു​ന്ന​തി​ലൂ​ടെ​യും പ്രതി​നി​ധി​കൾ ശ്രദ്ധേ​യ​മായ സാക്ഷ്യം നൽകി. ക്രിസ്‌തീയ സ്‌നേഹം അനുഭ​വി​ച്ച​റി​യു​ന്നത്‌ യഹോ​വ​യു​ടെ ജനത്തെ സംബന്ധി​ച്ചി​ട​ത്തോ​ളം ഒരു പുതിയ അനുഭവം അല്ലെങ്കി​ലും ഗ്രീസു​കാ​രായ സാക്ഷികൾ തുറന്ന ഹൃദയ​ത്തോ​ടെ പ്രകട​മാ​ക്കിയ ആതി​ഥ്യോ​പ​ചാ​രം പ്രതി​നി​ധി​കളെ ആഴത്തിൽ സ്‌പർശി​ച്ചു. പലരും ആനന്ദാ​ശ്രു​ക്കൾ പൊഴി​ച്ചു. ഈറന​ണിഞ്ഞ കണ്ണുക​ളോ​ടെ ഗ്രീക്കു​കാ​രും തുർക്കി​ക​ളും അന്യോ​ന്യം ആശ്ലേഷി​ക്കു​ക​യും ചുംബി​ക്കു​ക​യും ചെയ്യു​ന്നത്‌, ആതിഥ്യ​മ​രു​ളു​ക​യും സ്വീക​രി​ക്കു​ക​യും ചെയ്യു​ന്നത്‌, യഹോ​വ​യ്‌ക്കു മാത്രം ചെയ്യാൻ സാധി​ക്കുന്ന ഒരു അത്ഭുത​മാണ്‌!

നാം ഇപ്പോൾ ഒരു പുതിയ സേവന വർഷത്തി​ലാണ്‌. ആഫ്രിക്ക, ലാറ്റിൻ അമേരിക്ക, കൊറിയ, ഓസ്‌​ട്രേ​ലിയ എന്നിവി​ട​ങ്ങ​ളിൽ കൂടുതൽ അന്താരാ​ഷ്‌ട്ര കൺ​വെൻ​ഷ​നു​കൾ നടന്നു​കൊ​ണ്ടി​രി​ക്കു​ന്നു.

രാജ്യ​വാർത്ത​യു​ടെ വിതരണം

നമ്മുടെ മുഖ്യ പ്രവർത്ത​ന​ങ്ങ​ളിൽ ഒന്നാണു വയൽ ശുശ്രൂഷ. തന്റെ പുത്ര​നി​ലൂ​ടെ യഹോവ നമ്മെ ഏൽപ്പി​ച്ചി​രി​ക്കുന്ന ഒരു വേലയാണ്‌ അത്‌. നമ്മൾ ഘോഷി​ക്കുന്ന സന്ദേശം ആളുകൾക്ക്‌ അത്യാ​വ​ശ്യ​മുള്ള ഒന്നാണ്‌. (യെശ. 43:10-12; മത്താ. 24:14) പോയ വർഷം 58,88,650 പേർ ആ വേലയിൽ പങ്കുപറ്റി. 118,66,66,708 മണിക്കൂ​റു​കൾ വയൽ ശുശ്രൂ​ഷ​യിൽ ചെലവ​ഴി​ച്ചു. എത്ര നല്ല സാക്ഷ്യ​ത്തി​ന്റെ കൂമ്പാരം! രാജ്യ​വാർത്ത നമ്പർ 35-ന്റെ വിതരണം ആയിരു​ന്നു കഴിഞ്ഞ സേവന വർഷത്തിൽ ശുശ്രൂ​ഷ​യിൽ ആവേശം പകർന്ന ഒരു ഘടകം. “എല്ലാവ​രും അന്യോ​ന്യം സ്‌നേ​ഹി​ക്കുന്ന ഒരു കാലം വരുമോ?” എന്നതാ​യി​രു​ന്നു അതിന്റെ പ്രതി​പാ​ദ്യ വിഷയം. സ്‌നേ​ഹി​ക്ക​പ്പെ​ടാ​നുള്ള മനുഷ്യ​രു​ടെ ആഗ്രഹ​ത്തിന്‌—ദൈവം മനുഷ്യ​രു​ടെ ഉള്ളിൽ നട്ടിരി​ക്കുന്ന ആഗ്രഹ​ത്തിന്‌—ചേർച്ച​യിൽ അവരുടെ ശ്രദ്ധ ആകർഷി​ക്കു​ന്ന​തിന്‌ എത്രയോ അനു​യോ​ജ്യ​മായ ഒന്നായി​രു​ന്നു അത്‌! അതിലെ സന്ദേശം ശക്തമാ​യി​രു​ന്നു. ആത്മാർഥ​രായ അനേകർ ആ സന്ദേശ​ത്തോട്‌ അനുകൂ​ല​മാ​യി പ്രതി​ക​രി​ച്ചു.

166 ഭാഷക​ളി​ലാ​യി ആ ലഘു​ലേ​ഖ​യു​ടെ 40,00,00,000 പ്രതികൾ അച്ചടി​ക്ക​പ്പെട്ടു. റഷ്യയിൽത്തന്നെ 27 ഭാഷക​ളിൽ ആ ലഘുലേഖ വിതരണം ചെയ്യ​പ്പെട്ടു. അതിൽ 10 ഭാഷക​ളിൽ മുമ്പൊ​രി​ക്ക​ലും നമ്മുടെ സാഹി​ത്യ​ങ്ങൾ പ്രസി​ദ്ധീ​ക​രി​ച്ചി​ട്ടില്ല. തങ്ങളുടെ പ്രദേ​ശത്തെ വംശീയ വൈവി​ധ്യം തിരി​ച്ച​റി​ഞ്ഞു നിരവധി ബ്രാഞ്ചു​ക​ളും 10-ഓ 20-ഓ 30-ഓ ഭാഷക​ളിൽ ആ ലഘുലേഖ വിതരണം ചെയ്യു​ന്ന​തി​നുള്ള ക്രമീ​ക​ര​ണങ്ങൾ ചെയ്‌തു.

 ഘാനയിൽ ഒരു സഹോ​ദരി കൃഷി​യി​ടങ്ങൾ തോറും രാജ്യ​വാർത്ത വിതരണം ചെയ്യവേ കടുത്ത ശണ്‌ഠ​യിൽ ഏർപ്പെ​ട്ടി​രുന്ന ഒരു മനുഷ്യ​നെ​യും ഭാര്യ​യെ​യും കണ്ടുമു​ട്ടി. സഹോ​ദരി ഉടനടി, “എല്ലാവ​രും അന്യോ​ന്യം സ്‌നേ​ഹി​ക്കുന്ന ഒരു കാലം വരുമോ?” എന്ന ആകർഷ​ക​മായ ശീർഷ​ക​ത്തി​ലുള്ള രാജ്യ​വാർത്ത നമ്പർ 35 അവരെ കാണിച്ചു. പെട്ടെ​ന്നു​തന്നെ ആ ദമ്പതികൾ ശാന്തരാ​യി. നമ്മുടെ സഹോ​ദരി ലഘു​ലേ​ഖ​യി​ലെ വിവരങ്ങൾ ചർച്ച​ചെ​യ്‌തു​കൊണ്ട്‌ അവരോ​ടൊ​പ്പം കുറച്ചു സമയം ചെലവ​ഴി​ച്ചു. ശണ്‌ഠ​യ്‌ക്കു വഴി​തെ​ളി​ക്കുന്ന കാരണങ്ങൾ എന്തെല്ലാം ആണെന്നും ദൈവ​രാ​ജ്യം മനുഷ്യ​വർഗ​ത്തി​നു വേണ്ടി എന്തു ചെയ്യു​മെ​ന്നും ബൈബി​ളിൽ നിന്ന്‌ കാണി​ച്ചു​കൊ​ടു​ത്തു. ചർച്ചയു​ടെ ഒടുവിൽ ആ മനുഷ്യൻ പറഞ്ഞു: “തീർച്ച​യാ​യും, ദൈവ​മാ​ണു നിങ്ങളെ ഈ ലഘു​ലേ​ഖ​യു​മാ​യി ഇങ്ങോട്ട്‌ അയച്ചത്‌.” അവർ ഇരുവ​രും അത്യു​ത്സാ​ഹ​ത്തോ​ടെ ബൈബിൾ അധ്യയ​ന​ത്തി​നു താത്‌പ​ര്യം പ്രകടി​പ്പി​ച്ചു. സൗജന്യ ബൈബിൾ അധ്യയ​ന​ത്തി​നു സമാന​മാ​യി ആഗ്രഹം പ്രകടി​പ്പി​ച്ചു​കൊണ്ട്‌ 1,850 പേർ ഘാനാ ബ്രാഞ്ചി​ലേക്ക്‌ എഴുതി. മലാവി​യിൽ 1,900-ഉം സിംബാ​ബ്‌വേ​യിൽ 2,717-ഉം പോള​ണ്ടിൽ 1,346-ഉം ഐക്യ​നാ​ടു​ക​ളിൽ 2,525-ഉം വായന​ക്കാ​രു​ടെ അഭ്യർഥ​നകൾ ലഭിക്കു​ക​യു​ണ്ടാ​യി; റഷ്യയിൽ ബൈബിൾ അധ്യയ​ന​ത്തി​നാ​യി തങ്ങളെ സന്ദർശി​ക്കാൻ ആവശ്യ​പ്പെ​ട്ടു​കൊ​ണ്ടുള്ള 7,100 അഭ്യർഥ​നകൾ കൈപ്പറ്റി.

ലഘു​ലേ​ഖ​യു​ടെ ആകർഷ​ക​മായ പുറം​താ​ളും ചിന്തോ​ദ്ദീ​പ​ക​മായ ശീർഷ​ക​വും അതിൽ അടങ്ങി​യി​രി​ക്കുന്ന ഹൃദ്യ​മായ വിവര​ങ്ങ​ളും തന്നെയാണ്‌ ആഭ്യന്തര യുദ്ധത്താൽ പിച്ചി​ച്ചീ​ന്ത​പ്പെട്ട ശ്രീല​ങ്ക​യിൽ ആവശ്യ​മാ​യി​രു​ന്നത്‌. ലഘുപ​ത്രിക ആവശ്യ​പ്പെ​ട്ടു​കൊ​ണ്ടു നൂറു​ക​ണ​ക്കി​നു കൂപ്പണു​കൾ ബ്രാഞ്ചി​നു ലഭിച്ചു. അതില​ധി​ക​വും ഭവന ബൈബിൾ അധ്യയ​ന​ത്തിന്‌ ആഗ്രഹം പ്രകടി​പ്പി​ച്ചു​കൊ​ണ്ടു​ള്ളവ ആയിരു​ന്നു. അധ്യയ​ന​ത്തിന്‌ ആഗ്രഹിച്ച പലരും ഇപ്പോൾ സുവാർത്ത​യു​ടെ പ്രസാ​ധകർ ആണ്‌; ചിലർ സ്‌നാ​പനം ഏൽക്കു​ക​പോ​ലും ചെയ്‌തി​രി​ക്കു​ന്നു.

കാമറൂ​ണിൽ ഉള്ള 30 പ്രസാ​ധകർ ഗറൂവ​യി​ലെ രാജ്യ​ഹാ​ളിൽ നിന്ന്‌ 70 കിലോ​മീ​റ്റർ അകലെ​യുള്ള ഒരു പ്രദേ​ശത്തു ലഘു​ലേ​ഖകൾ വിതരണം ചെയ്യാൻ ഒരു ബസ്‌ വാടക​യ്‌ക്ക്‌ എടുത്തു. രാവിലെ അവർ പ്രദേ​ശത്തു മൊത്തം ലഘു​ലേ​ഖകൾ വിതരണം ചെയ്‌തു. ഉച്ചകഴിഞ്ഞ്‌ യഹോ​വ​യു​ടെ സാക്ഷികൾ—ആ പേരിനു പിന്നിലെ സ്ഥാപനം (ഇംഗ്ലീഷ്‌) എന്ന വീഡി​യോ പ്രദർശി​പ്പി​ച്ചു. 182 പേർ ഹാജരാ​യി. വീഡി​യോ പ്രദർശ​ന​ത്തി​നു ശേഷം പലരും കൂടുതൽ സാഹി​ത്യ​ങ്ങൾ ആവശ്യ​പ്പെട്ടു. നിരവധി കുടുംബ ബൈബിൾ അധ്യയ​നങ്ങൾ തുടങ്ങി. താത്‌പ​ര്യ​മുള്ള ആളുകളെ വീണ്ടും സന്ദർശി​ക്കാൻ സഭ ഒരു പയനി​യറെ ഏർപ്പെ​ടു​ത്തി.

കോം​ഗോ ജനാധി​പത്യ റിപ്പബ്ലി​ക്കിൽ അനേക​രും രാജ്യ​വാർത്ത  നമ്പർ 35 ഇരുക​യ്യും നീട്ടി സ്വീക​രി​ച്ചു. മറ്റു ചിലർ ജീവി​ത​ത്തി​ന്റെ പരുക്കൻ യാഥാർഥ്യ​ങ്ങ​ളിൽ മരവിച്ച്‌, മനസ്സി​ല്ലാ​മ​ന​സ്സോ​ടെ​യാണ്‌ അതു കൈപ്പ​റ്റി​യത്‌. അത്തരക്കാ​രിൽ ഒരാളെ വീണ്ടും സന്ദർശി​ക്കാൻ എത്തിയ​പ്പോൾ ആ സ്‌ത്രീ​ക്കു തീരെ സുഖമി​ല്ലെ​ന്നും മരുന്നു വാങ്ങാൻ അവരുടെ പക്കൽ പണമി​ല്ലെ​ന്നും പ്രസാ​ധകർ മനസ്സി​ലാ​ക്കി. പ്രസാ​ധകർ ആ സ്‌ത്രീ​ക്കു മരുന്നു വാങ്ങി​ക്കൊ​ടു​ത്തു. അത്‌ അവരുടെ ഹൃദയത്തെ സ്‌പർശി​ച്ചു. ആ സ്‌ത്രീ​ക്കും നാലു മക്കൾക്കും അധ്യയനം നടത്തു​ന്ന​തി​ലേക്ക്‌ അതു നയിച്ചു. മറ്റൊരു സന്ദർഭ​ത്തിൽ, സാക്ഷികൾ തങ്ങളെ​ക്കു​റി​ച്ചു​തന്നെ പൊങ്ങച്ചം പറയു​ക​യാണ്‌ എന്നാണു ലഘുലേഖ കൈപ്പ​റ്റിയ ഒരു ചെറു​പ്പ​ക്കാ​രൻ വിചാ​രി​ച്ചി​രു​ന്നത്‌. ഒരിക്കൽ, അയാൾ യാത്ര ചെയ്‌ത ബസ്‌ ഹൈവേ മോഷ്ടാ​ക്ക​ളു​ടെ ആക്രമ​ണ​ത്തിന്‌ ഇരയായി. കയ്യിൽ ചില്ലി​ക്കാ​ശു​പോ​ലും ഇല്ലാതെ, ആരെയും പരിച​യ​മി​ല്ലാത്ത ഇടത്ത്‌ എത്തിപ്പെട്ട അദ്ദേഹം ബസിൽ ഉണ്ടായി​രുന്ന, മോഷ​ണ​ത്തിന്‌ ഇരയായ ഒരു സാക്ഷി​യോ​ടൊ​പ്പം പോയി. അവർ ഒരു സാക്ഷി​യു​ടെ വീടു കണ്ടെത്തി. അവർക്ക്‌ ആ വീട്ടിൽ സ്വാഗതം ലഭി​ച്ചെന്നു മാത്രമല്ല രാത്രി അവിടെ തങ്ങാനും സാധിച്ചു. പിറ്റേന്നു രാവിലെ ഉദ്ദിഷ്ട സ്ഥാനത്ത്‌ എത്തി​ച്ചേ​രാ​നും അവർക്കു സഹായം ലഭിച്ചു. വീട്ടിൽ തിരി​ച്ചെ​ത്തിയ ആ ചെറു​പ്പ​ക്കാ​രൻ നടന്ന​തെ​ല്ലാം തന്റെ സുഹൃ​ത്തു​ക്ക​ളോ​ടു വിവരി​ച്ചു​കൊ​ണ്ടു പറഞ്ഞു: “യഹോ​വ​യു​ടെ സാക്ഷികൾ തെല്ലും അഹന്തയു​ള്ള​വരല്ല. അവർക്കി​ട​യിൽ യഥാർഥ സ്‌നേഹം പ്രകട​മാണ്‌. അവർ തങ്ങളുടെ അയൽക്കാ​രെ സ്‌നേ​ഹി​ക്കു​ന്നു.” അന്നുതന്നെ ആ ചെറു​പ്പ​ക്കാ​ര​നു​മാ​യി ബൈബിൾ അധ്യയനം തുടങ്ങി.

ഉത്തര ചിലി​യിൽ ഉള്ള ഒരു സഭ സകലർക്കും ലഘുലേഖ വിതരണം ചെയ്യാൻ പ്രസാ​ധ​കർക്കു പ്രോ​ത്സാ​ഹനം നൽകി. ഒരു പ്രസാ​ധകൻ പ്രാ​ദേ​ശിക റേഡി​യോ നിലയം സന്ദർശി​ച്ചു. അവിടു​ത്തെ ഉദ്യോ​ഗ​സ്ഥ​നിൽ ആ സന്ദേശം ആഴത്തിൽ മതിപ്പു​ള​വാ​ക്കി. പ്രഭാത പരിപാ​ടി റദ്ദാക്കി​യിട്ട്‌ അദ്ദേഹം രാജ്യ​വാർത്ത നമ്പർ 35-ലെ മുഴു സന്ദേശ​വും റേഡി​യോ​യി​ലൂ​ടെ വായിച്ചു കേൾപ്പി​ച്ചു.

ഇറ്റലി​യിൽ ബസ്‌ കാത്തു നിന്ന ഒരു കന്യാ​സ്‌ത്രീക്ക്‌ രാജ്യ​വാർത്ത നൽകു​ക​യു​ണ്ടാ​യി. ദിവസേന ബസ്‌ സ്റ്റോപ്പിൽവെച്ച്‌ 10-15 മിനിറ്റു നേരത്തെ ബൈബിൾ അധ്യയ​ന​ത്തിന്‌ അതു വഴി​തെ​ളി​ച്ചു. ഒരു മാസത്തി​നു ശേഷം, ബൈബിൾ സത്യത്തി​ലുള്ള വിലമ​തിപ്പ്‌, കന്യാ​സ്‌ത്രീ​മഠം വിട്ടു​പോ​രാൻ അവർക്കു പ്രേര​ണ​യേകി. ദൈവ​രാ​ജ്യം മുഖാ​ന്തരം, വംശീ​യ​മോ ഭാഷാ​പ​ര​മോ ആയ അതിർവ​ര​മ്പു​കൾ ഇല്ലാതെ ആളുകൾ യഥാർഥ​ത്തിൽ അന്യോ​ന്യം സ്‌നേ​ഹി​ക്കുന്ന ഇടമാ​യി​ത്തീ​രും ഭൂമി എന്ന്‌ അറിയാൻ സാധി​ച്ച​തിൽ അവർ അങ്ങേയറ്റം സന്തുഷ്ട ആയിരു​ന്നു. ജന്മനാ​ടായ ഗ്വാട്ടി​മാ​ല​യിൽ മടങ്ങി​യെ​ത്തിയ അവർ, അതി​നോ​ടകം യഹോ​വ​യു​ടെ സാക്ഷി ആയ തന്റെ ജഡിക സഹോ​ദ​രി​യോ​ടൊ​പ്പം ബൈബിൾ അധ്യയനം തുടർന്നു.

 വാച്ച്‌ടവർ വിദ്യാ​ഭ്യാ​സ കേന്ദ്രം

ദൈവ​രാ​ജ്യ​ത്തെ കുറി​ച്ചുള്ള ആഗോള സാക്ഷ്യ വേലയിൽ ന്യൂ​യോർക്കി​ലെ പാറ്റേ​ഴ്‌സ​നി​ലുള്ള വാച്ച്‌ടവർ വിദ്യാ​ഭ്യാ​സ കേന്ദ്രം ഒരു ശ്രദ്ധേ​യ​മായ പങ്കു വഹിക്കു​ന്നുണ്ട്‌.

1994 ആയപ്പോ​ഴേ​ക്കും നിർമാണ പ്രവർത്തനം, സൊ​സൈ​റ്റി​യു​ടെ ചില പ്രധാന വിഭാ​ഗങ്ങൾ പാറ്റേ​ഴ്‌സ​നി​ലേക്കു മാറ്റാൻ സാധി​ക്കുന്ന ഘട്ടത്തോ​ള​മെത്തി. മാസങ്ങൾ കൊണ്ട്‌ എഞ്ചിനി​യ​റിങ്‌ വിഭാഗം, സേവന വിഭാഗം, എഴുത്തു വിഭാ​ഗ​ത്തി​ലെ കത്തിട​പാ​ടു വിഭാഗം, പരിഭാ​ഷാ സേവന വിഭാഗം (ഇപ്പോൾ 116 ദേശങ്ങ​ളി​ലുള്ള പരിഭാ​ഷാ സംഘങ്ങളെ പിന്തു​ണ​യ്‌ക്കു​ന്നു), നിയമ വിഭാഗം (ലോക​വ്യാ​പ​ക​മാ​യി യഹോ​വ​യു​ടെ സാക്ഷി​ക​ളു​ടെ പ്രവർത്ത​നത്തെ പിന്തു​ണ​യ്‌ക്കു​ന്ന​തി​നുള്ള നിയമ​പ​ര​മായ ആവശ്യങ്ങൾ കൈകാ​ര്യം ചെയ്യുന്നു), ചിത്ര​കലാ വിഭാഗം (പുസ്‌ത​കങ്ങൾ, മാസി​കകൾ, ലഘുപ​ത്രി​കകൾ തുടങ്ങി​യ​വ​യു​ടെ ദൃശ്യ വിശദാം​ശങ്ങൾ കൈകാ​ര്യം ചെയ്യുന്നു) എന്നിവ​യും അവയ്‌ക്കു​വേണ്ട പിന്തുണാ സേവന വിഭാ​ഗ​ങ്ങ​ളും അങ്ങോട്ടു മാറ്റ​പ്പെട്ടു.

1995 മാർച്ചിൽ ഗിലെ​യാദ്‌ സ്‌കൂൾ, വാൾക്കി​ല്ലിൽ നിന്നു പാറ്റേ​ഴ്‌സ​നി​ലെ പുതിയ സൗകര്യ​ങ്ങ​ളി​ലേക്കു മാറ്റി. അതിനു ശേഷം മധ്യ-ദക്ഷിണ അമേരിക്ക, ആഫ്രിക്ക, പൂർവ യൂറോപ്പ്‌, പൗരസ്‌ത്യ നാടുകൾ, സമുദ്ര ദ്വീപു​കൾ എന്നിവി​ട​ങ്ങ​ളി​ലെ 51 ദേശങ്ങ​ളി​ലേക്കു ഗിലെ​യാദ്‌ സ്‌കൂൾ ബിരു​ദ​ധാ​രി​കൾ അയയ്‌ക്ക​പ്പെ​ട്ടി​രി​ക്കു​ന്നു. അതിനു പുറമേ, ബ്രാഞ്ച്‌ കമ്മിറ്റി അംഗങ്ങൾക്കാ​യുള്ള സ്‌കൂൾ, സൊ​സൈ​റ്റി​യു​ടെ 106 ദേശങ്ങ​ളി​ലുള്ള ബ്രാഞ്ചു​ക​ളിൽ നിന്നെ​ത്തിയ 336 സഹോ​ദ​ര​ന്മാർക്കു പ്രത്യേക പരിശീ​ലനം പ്രദാനം ചെയ്‌തു.

ഇപ്പോൾ ഓഡി​യോ/വീഡി​യോ റെക്കോർഡിങ്‌ സൗകര്യ​ങ്ങൾ ഉള്ള ഒരു പുതിയ കെട്ടിടം പാറ്റേ​ഴ്‌സ​നി​ലെ വാച്ച്‌ടവർ വിദ്യാ​ഭ്യാ​സ കേന്ദ്ര​ത്തിൽ പൂർത്തി​യാ​യി​രി​ക്കു​ന്നു. ബന്ധപ്പെട്ട ഓഫീ​സു​ക​ളും ഉപകര​ണ​ങ്ങ​ളും പുതിയ, മികച്ച ഈ റെക്കോർഡിങ്‌ സൗകര്യ​ങ്ങ​ളി​ലേക്കു മാറ്റാൻ തുടങ്ങി​യത്‌ 1998 ഏപ്രിൽ 20-ാം തീയതി​യാണ്‌. തയ്യാറാ​ക്ക​പ്പെട്ട സൗകര്യ​ങ്ങൾ, ഓഡി​യോ/വീഡി​യോ രംഗത്ത്‌ ഉണ്ടാ​യേ​ക്കാ​വുന്ന പുരോ​ഗ​തി​കൾ കൂടുതൽ ഫലപ്ര​ദ​മായ വിധത്തിൽ പ്രയോ​ജ​ന​പ്പെ​ടു​ത്താൻ നമ്മെ പ്രാപ്‌ത​രാ​ക്കും.

എന്നുവ​രി​കി​ലും, ഈ കെട്ടി​ട​ത്തി​ന്റെ ഉദ്‌ഘാ​ടനം, സൊ​സൈ​റ്റി​യു​ടെ ഈ രംഗത്തെ കന്നിസം​രം​ഭം ആയിരു​ന്നു​വെന്ന്‌ അർഥമാ​ക്കു​ന്നില്ല. ലോക ആസ്ഥാനത്തു ചെയ്‌തു​വ​രുന്ന വേലയ്‌ക്കു പുറമേ, 30-ഓളം ബ്രാഞ്ചു​കൾ കുറ​ച്ചൊ​ക്കെ ഓഡി​യോ കാസെറ്റ്‌ റെക്കോർഡിങ്‌ നടത്തു​ന്നുണ്ട്‌. ബൈബി​ളും നാട്ടു​ഭാ​ഷ​യി​ലുള്ള മാസി​ക​ക​ളും ലഘുപ​ത്രി​ക​ക​ളും കൺ​വെൻ​ഷൻ നാടക​ങ്ങ​ളു​മൊ​ക്കെ അതിൽ ഉൾപ്പെ​ടു​ന്നു. 61 ഭാഷക​ളി​ലാ​യി വ്യത്യസ്‌ത ഓഡി​യോ കാസെ​റ്റു​കൾ ഇപ്പോൾ ലഭ്യമാണ്‌.  ഏതാനും ഭാഷക​ളിൽ കാസറ്റു​കൾ ലോക​വ്യാ​പ​ക​മാ​യി വിതരണം ചെയ്യ​പ്പെ​ട്ടു​വ​രു​ന്നു. നമ്മുടെ രാജ്യ ഗീതങ്ങൾ അടങ്ങിയ കോം​പാക്ട്‌ ഡിസ്‌കു​ക​ളും (സിഡി-കൾ) ഉത്‌പാ​ദി​പ്പി​ക്ക​പ്പെ​ടു​ന്നുണ്ട്‌. ഗവേഷണ വിഷയങ്ങൾ (വാച്ച്‌ടവർ ലൈ​ബ്രറി) അടങ്ങിയ സിഡി-കൾ ഇപ്പോൾ ഒമ്പതു ഭാഷക​ളിൽ ലഭ്യമാണ്‌.

41 ഭാഷക​ളിൽ വീഡി​യോ പരിപാ​ടി​കൾ നിർമി​ക്കു​ന്നുണ്ട്‌. ലോകാ​സ്ഥാ​ന​ത്താ​ണു സ്‌ക്രി​പ്‌റ്റു​കൾ തയ്യാറാ​ക്കു​ന്നത്‌. അവിടെ 2,100 മൂല വീഡി​യോ കാസറ്റു​കൾ ഉള്ള ഒരു ലൈ​ബ്ര​റി​യു​മുണ്ട്‌. അവയിൽ നിന്നു കൂടു​ത​ലായ വിശദാം​ശങ്ങൾ പകർത്താ​നാ​കും. എങ്കിലും, വീഡി​യോ റെക്കോർഡിങ്‌ പാറ്റേ​ഴ്‌സ​നിൽ മാത്രമല്ല ലോക​ത്തി​ന്റെ മറ്റനേകം ഭാഗങ്ങ​ളി​ലും നടത്തി​വ​രു​ന്നു. ഇപ്പോൾ, ഒറിജി​നൽ മാസ്റ്റർ വീഡി​യോ ടേപ്പു​ക​ളും ഇംഗ്ലീഷ്‌ പതിപ്പും എഡിറ്റ്‌ ചെയ്യു​ന്നതു സൊ​സൈ​റ്റി​യു​ടെ പാറ്റേ​ഴ്‌സ​നി​ലുള്ള പുതിയ ഓഡി​യോ/വീഡി​യോ റെക്കോർഡിങ്‌ സ്റ്റുഡി​യോ​യിൽ ആണ്‌. നെതർലൻഡ്‌സിൽ ഉള്ള സൊ​സൈ​റ്റി​യു​ടെ സ്റ്റുഡി​യോ​യി​ലാണ്‌ ഇംഗ്ലീഷ്‌ ഒഴി​കെ​യുള്ള ഭാഷക​ളിൽ പരിപാ​ടി​കൾ ഡ്യൂപ്ലി​ക്കേ​ഷനു വേണ്ടി തയ്യാറാ​ക്കു​ന്നത്‌. ഓഡി​യോ റെക്കോർഡിങ്‌ സൗകര്യ​മുള്ള ബ്രാഞ്ചു​ക​ളിൽ ശബ്ദലേ​ഖനം നടത്തി​യിട്ട്‌ അതു പിന്നീടു നെതർലൻഡ്‌സി​ലേക്ക്‌ അയയ്‌ക്കു​ന്നു. അവിടെ പ്രസ്‌തുത പരിപാ​ടി​യോ​ടു സംഗീ​ത​വും സൗണ്ട്‌ ഇഫക്ടും സംയോ​ജി​പ്പി​ക്കു​ന്ന​തി​നു പുറമേ വേണ്ടത്ര ദൃശ്യ ആവിഷ്‌ക​ര​ണ​ങ്ങ​ളും ചേർക്ക​പ്പെ​ടു​ന്നു. അങ്ങനെ ഓരോ ഭാഷയി​ലും വീഡി​യോ കാസറ്റി​ന്റെ മാസ്റ്റർ കോപ്പി​യു​ടെ പകർപ്പു തയ്യാറാ​ക്കു​ന്നു. പൗരസ്‌ത്യ ദേശങ്ങൾക്കു വേണ്ടി ജപ്പാൻ ഈ വേലയിൽ ഒരു പങ്കു വഹിക്കു​ന്നുണ്ട്‌.

ആംഗ്യ ഭാഷക​ളിൽ വീഡി​യോ കാസറ്റു​ക​ളു​ടെ ഉപയോ​ഗം വർധിച്ചു വരുക​യാണ്‌. ഓരോ ആംഗ്യ ഭാഷയും വ്യത്യ​സ്‌ത​മാണ്‌ എന്നും അവ കേവലം സംസാര ഭാഷയു​ടെ ദൃശ്യ ആവിഷ്‌ക​ര​ണമല്ല എന്നും മനസ്സി​ലാ​ക്കി​യ​തി​ന്റെ ഫലമാ​യി​ട്ടാണ്‌ അവയുടെ ഉപയോ​ഗം വർധി​ച്ചി​രി​ക്കു​ന്നത്‌. ആംഗ്യ​ഭാ​ഷാ വീഡി​യോ ടേപ്പുകൾ ലഭിക്കാൻ തുടങ്ങി​യ​തോ​ടെ, യഹോവ തങ്ങളെ മറന്നി​ട്ടില്ല, മറിച്ച്‌ ബധിരരെ കുറി​ച്ചും അവൻ കരുതൽ ഉള്ളവനാണ്‌ എന്നതിന്റെ തെളി​വാ​യി ചില ബധിരർ അതിനെ കണക്കാക്കി. നേര​ത്തേ​തന്നെ നിർമി​ച്ചെ​ടുത്ത ഓഡി​യോ/വീഡി​യോ അവതര​ണ​ങ്ങ​ളിൽ ആംഗ്യ​ഭാ​ഷാ വ്യാഖ്യാ​നം ചേർത്തു​കൊ​ണ്ടാ​ണു സൊ​സൈറ്റി ആംഗ്യ​ഭാ​ഷാ വീഡി​യോ​കൾ ഉത്‌പാ​ദി​പ്പി​ക്കു​ന്നത്‌. നിലവി​ലുള്ള വാച്ച്‌ ടവർ പ്രസി​ദ്ധീ​ക​ര​ണ​ങ്ങ​ളു​ടെ സമ്പൂർണ ദൃശ്യ പരിഭാഷ അവതരി​പ്പി​ക്കുന്ന വീഡി​യോ ടേപ്പു​ക​ളും ഉണ്ട്‌. ബധിര​രു​മാ​യി ഭവന ബൈബിൾ അധ്യയ​നങ്ങൾ നടത്താ​നാ​ണു മിക്ക​പ്പോ​ഴും ഇവ ഉപയോ​ഗി​ക്കു​ന്നത്‌. അതു​കൊണ്ട്‌, വീഡി​യോ​ക​ളിൽ അധ്യയന ചോദ്യ​ങ്ങ​ളും ഉൾപ്പെ​ടു​ത്തി​യി​രി​ക്കു​ന്നു. അത്‌ ചോ​ദ്യോ​ത്തര  ചർച്ചയിൽ എന്നവണ്ണം അധ്യയനം സാധ്യ​മാ​ക്കു​ന്നു. കൂടാതെ, ആംഗ്യ​ഭാ​ഷ​യി​ലുള്ള ഗീതാ​ലാ​പ​ന​വും വീഡി​യോ ടേപ്പു​ക​ളിൽ ലഭ്യമാണ്‌. ഗീതങ്ങൾക്കു ഭാവം നൽകാൻ സദസ്സിനെ നയിക്കു​ന്ന​തി​നാണ്‌ ഇത്‌ ഉപയോ​ഗി​ച്ചി​രി​ക്കു​ന്നത്‌. ഐക്യ​നാ​ടു​കൾ, മെക്‌സി​ക്കോ, ബ്രസീൽ, ജപ്പാൻ, ഡെൻമാർക്ക്‌, നെതർലൻഡ്‌സ്‌ എന്നിവി​ട​ങ്ങ​ളിൽ ഉള്ള സ്റ്റുഡി​യോ​ക​ളിൽ ആംഗ്യ​ഭാ​ഷാ പരിപാ​ടി​ക​ളു​ടെ വീഡി​യോ റെക്കോർഡി​ങ്ങി​നു സൊ​സൈറ്റി പിന്തുണ നൽകു​ന്ന​താ​യി​രി​ക്കും. ഈ ബ്രാഞ്ചു​ക​ളിൽ മിക്കതി​ലും ആംഗ്യ​ഭാ​ഷാ പരിപാ​ടി​ക​ളും എഡിറ്റു ചെയ്യ​പ്പെ​ടു​ന്ന​താ​യി​രി​ക്കും.

സമീപ വർഷങ്ങ​ളിൽ ആംഗ്യ​ഭാ​ഷ​യി​ലുള്ള സാക്ഷീ​ക​രണം ഗണ്യമാ​യി വർധി​ച്ചി​രി​ക്കു​ന്നു. കൊറി​യ​യിൽ 17 ആംഗ്യ​ഭാ​ഷാ സഭകൾ ഉണ്ട്‌. നിരവധി വർഷങ്ങ​ളാ​യി അവിടെ ഈ ആവശ്യ​ത്തി​നു പ്രത്യേ​കം ശ്രദ്ധ നൽകി​യി​രി​ക്കു​ന്നു. ഐക്യ​നാ​ടു​ക​ളിൽ അത്തരം 19 സഭകളുണ്ട്‌. റഷ്യയിൽ അത്തരം ഒരു സഭയും 43 ചെറിയ കൂട്ടങ്ങ​ളും ഉണ്ട്‌. ബധിര​രു​ടെ പ്രത്യേക ആവശ്യങ്ങൾ കണക്കി​ലെ​ടു​ത്തു നൽക​പ്പെ​ടുന്ന പരിഗ​ണ​ന​യ്‌ക്കു മറ്റു സ്ഥലങ്ങളിൽ നിന്നും നല്ല പ്രതി​ക​ര​ണ​മുണ്ട്‌. ലോക​വ്യാ​പ​ക​മാ​യി അത്തരം 80-ഓളം സഭകളും ധാരാളം ചെറിയ കൂട്ടങ്ങ​ളും ഉണ്ട്‌. ശ്രവണ-സംസാര ശേഷി​യുള്ള യഹോ​വ​യു​ടെ ദാസരു​ടെ കാര്യ​ത്തിൽ വാസ്‌തവം ആയിരി​ക്കു​ന്ന​തു​പോ​ലെ അവരുടെ ബധിര സഹോ​ദ​ര​ങ്ങ​ളും, ഭാഷാ വ്യത്യാ​സങ്ങൾ—അത്‌ ശ്രവ്യ​ഭാ​ഷ​യോ ദൃശ്യ​ഭാ​ഷ​യോ ആയി​ക്കൊ​ള്ളട്ടെ—തുറന്ന ആശയ വിനി​മ​യ​ത്തി​നു പ്രതി​ബ​ന്ധങ്ങൾ സൃഷ്ടി​ക്കാത്ത സമയത്തി​നാ​യി നോക്കി​പ്പാർത്തി​രി​ക്കു​ന്നു. എങ്കിലും, ഇപ്പോൾ പോലും പല ഭാഷകൾ ഉപയോ​ഗി​ച്ചു നാമെ​ല്ലാം “നിർമല ഭാഷ” സംസാ​രി​ക്കു​ക​യും അങ്ങനെ, ഐക്യ​ത്തിൽ യഹോ​വ​യു​ടെ നന്മ അറിയി​ക്കു​ന്ന​തി​ലുള്ള പദവി ആസ്വദി​ക്കു​ക​യും ചെയ്യുന്നു.—സെഫ. 3:9, NW.

സത്‌പ്ര​വൃ​ത്തി​ക​ളു​ടെ ദൃക്‌സാ​ക്ഷി​കൾ

രാജ്യ​സു​വാർത്ത മറ്റുള്ള​വ​രു​മാ​യി പങ്കിടു​മ്പോൾ തന്റെ ദാസർ പ്രകടി​പ്പി​ക്കുന്ന തീക്ഷ്‌ണത യഹോ​വ​യു​ടെ ഹൃദയത്തെ സന്തോ​ഷി​പ്പി​ക്കു​ന്നു. എങ്കിലും, അവരുടെ മാതൃ​കാ​പ​ര​മായ നടത്തയും സത്‌പ്ര​വൃ​ത്തി​ക​ളും മിക്ക​പ്പോ​ഴും മറ്റുള്ള​വ​രു​ടെ ശ്രദ്ധയിൽപ്പെ​ടാ​തെ പോകു​ന്നു. ദുഃഖ​ക​ര​മെന്നു പറയട്ടെ, ചില​പ്പോ​ഴൊ​ക്കെ ആളുകൾ അവയെ തെറ്റായി വ്യാഖ്യാ​നി​ക്കാ​റു​മുണ്ട്‌. തെറ്റി​ദ്ധാ​ര​ണകൾ ഉള്ളവ​രെ​ങ്കി​ലും യുക്തി​ബോ​ധ​മുള്ള ആളുകളെ ഇതേക്കു​റിച്ച്‌ അറിയി​ക്കാ​നും പഠിപ്പി​ക്കാ​നും ഫലപ്ര​ദ​മായ മാർഗങ്ങൾ ഉണ്ടോ?—1 പത്രൊ. 2:12.

റൈറ്റിങ്‌ കമ്മിറ്റി​യു​ടെ മാർഗ​നിർദേ​ശ​ത്തിൻ കീഴിൽ പ്രവർത്തി​ക്കുന്ന പൊതു​കാ​ര്യ ഓഫീസ്‌ (Public Affairs Office) രാജ്യ സന്ദേശ​ത്തോട്‌ ആളുകൾ അനുകൂ​ല​മാ​യി പ്രതി​ക​രി​ക്ക​ത്ത​ക്ക​വണ്ണം, ദൈവ​ജ​ന​ത്തെ​പ്പറ്റി  ആളുകൾക്കുള്ള തെറ്റി​ദ്ധാ​ര​ണകൾ ദൂരീ​ക​രി​ക്കാ​നുള്ള ശ്രമങ്ങൾ ചെയ്‌തു​വ​രു​ന്നു. പ്രസ്‌തുത ഓഫീസ്‌, യഹോ​വ​യു​ടെ സാക്ഷി​കളെ മനസ്സി​ലാ​ക്കാൻ പൊതു ജനങ്ങളെ സഹായി​ക്കുന്ന ശരിയായ വിവരങ്ങൾ മാധ്യ​മ​ങ്ങൾക്കും ഉപദേ​ഷ്ടാ​ക്കൾക്കും മറ്റു വിദഗ്‌ധർക്കും അയച്ചു​കൊ​ടു​ക്കു​ന്ന​തി​നു ലഭ്യമാ​ക്കു​ന്നു.

വംശീ​യ​വും വിഭാ​ഗീ​യ​വു​മായ കൊടിയ അക്രമം ലോക സമുദാ​യ​ത്തിൽ ആകുലീ​ക​രി​ക്കുന്ന പ്രശ്‌നങ്ങൾ സൃഷ്ടി​ക്കു​ന്നു. മുൻവി​ധി​യും അക്രമാ​സ​ക്ത​മായ പെരു​മാ​റ്റ​വും ഒഴിവാ​ക്കാൻ യുവ വിദ്യാർഥി​കളെ സഹായി​ക്കു​ന്ന​തി​നു സദാചാര മൂല്യങ്ങൾ പഠിപ്പി​ക്കാൻ വിദ്യാ​ഭ്യാ​സ വിദഗ്‌ധർ മാർഗങ്ങൾ ആരായു​ക​യാണ്‌. അവരു​മാ​യി യഹോ​വ​യു​ടെ സാക്ഷി​കൾക്ക്‌ എന്തു പങ്കിടാ​നാ​കും? സ്വീഡ​നി​ലെ ഒരു സാക്ഷി ഒരു ഉയർന്ന ഉദ്യോ​ഗ​സ്ഥന്‌ യഹോ​വ​യു​ടെ സാക്ഷികൾ നാസി ആക്രമ​ണ​ത്തി​നെ​തി​രെ ഉറച്ചു​നിൽക്കു​ന്നു (ഇംഗ്ലീഷ്‌) എന്ന വീഡി​യോ അയച്ചു​കൊ​ടു​ത്തു. കൂട്ട​ക്കൊ​ല​യു​മാ​യി ബന്ധപ്പെട്ട്‌, ജീവത്‌ച​രി​ത്രം എന്ന പേരിൽ ദേശവ്യാ​പ​ക​മാ​യി നടത്തുന്ന ഒരു ബോധ​വ​ത്‌കരണ പദ്ധതി​യിൽ പങ്കെടു​ക്കാൻ ഗവൺമെന്റ്‌ പ്രതി​നി​ധി​കൾ സാക്ഷി​കളെ ക്ഷണിച്ചു. നാസി യുഗത്തി​ലെ യഹോ​വ​യു​ടെ സാക്ഷി​കളെ കുറിച്ചു നമ്മുടെ സഹോ​ദ​രങ്ങൾ സ്‌കൂൾ കുട്ടി​ക​ളെ​യും പൊതു ജനങ്ങ​ളെ​യും അറിയി​ക്കാൻ അവർ ആഗ്രഹി​ച്ചു. തന്മൂലം, കൂട്ട​ക്കൊ​ലയെ ആസ്‌പ​ദ​മാ​ക്കി സദാചാ​ര​ത്തെ​യും ധാർമി​ക​ത​യെ​യും കുറിച്ചു ക്ലാസ്സു​ക​ളിൽ പ്രസം​ഗങ്ങൾ നടത്താൻ സാക്ഷി​കളെ ക്ഷണിക്കു​ന്ന​തിന്‌ അധ്യാ​പകർ പ്രോ​ത്സാ​ഹി​ത​രാ​യി.

ചിലയി​ട​ങ്ങ​ളിൽ, യഹോ​വ​യു​ടെ സാക്ഷികൾ—ആ പേരിനു പിന്നിലെ സംഘടന എന്ന വീഡി​യോ​യാ​ണു ഫലപ്ര​ദ​മാ​യി​രു​ന്നത്‌. ഐവറി കോസ്റ്റിൽ ആ വീഡി​യോ ദേശീയ ടെലി​വി​ഷ​നിൽ കാണിച്ച ശേഷം അനേകർ യഹോ​വ​യു​ടെ സാക്ഷി​ക​ളോ​ടും അവരുടെ സംഘട​ന​യോ​ടും വളരെ​യ​ധി​കം വിലമ​തി​പ്പു പ്രകട​മാ​ക്കി.

ചികി​ത്സാർഥം രക്തം ഉപയോ​ഗി​ക്കു​ന്നതു സംബന്ധി​ച്ചുള്ള തെറ്റി​ദ്ധാ​ര​ണ​കളെ ഒരു പഴുതാ​യി ഉപയോ​ഗി​ച്ചു​കൊണ്ട്‌ റഷ്യയിൽ നമ്മുടെ പ്രവർത്ത​ന​ത്തി​നു തടയി​ടാൻ ചില എതിരാ​ളി​കൾ ശ്രമി​ച്ചി​രി​ക്കു​ന്നു. (പ്രവൃ. 15:28, 29) രക്തം വിതരണം ചെയ്യു​ന്ന​തി​നോ​ടുള്ള ബന്ധത്തിൽ റഷ്യയി​ലെ ആരോഗ്യ സംഘട​ന​തന്നെ പ്രശ്‌നങ്ങൾ നേരി​ടുന്ന സ്ഥിതിക്ക്‌ പകര ചികി​ത്സയെ കുറി​ച്ചുള്ള വിവര​ങ്ങ​ളിൽ നിന്ന്‌ അതു പ്രയോ​ജനം അനുഭ​വി​ക്കും. രക്തത്തിന്റെ ഉപയോ​ഗം കൂടാതെ രോഗി​കളെ ചികി​ത്സി​ക്കാൻ മനസ്സൊ​രു​ക്ക​മുള്ള ഡോക്ടർമാർക്ക്‌ ആ രംഗത്തു കൂടുതൽ അറിവും പരിശീ​ല​ന​വും ആവശ്യ​മാണ്‌. ജീവ​നെ​യും രക്തത്തെ​യും കുറി​ച്ചുള്ള ബൈബി​ളി​ന്റെ പ്രമാ​ണ​ത്തോ​ടു പറ്റിനിൽക്കു​ന്ന​തു​കൊണ്ട്‌ യഹോ​വ​യു​ടെ സാക്ഷി​കൾക്ക്‌, ശാസ്‌ത്ര-ചികിത്സാ  മേഖല​കൾക്കും രോഗി​ക​ളു​ടെ അവകാ​ശ​ങ്ങൾക്കു വില കൽപ്പി​ക്കുന്ന വൈദ്യ സമൂഹ​ത്തി​നും പൊതു​ജ​ന​ങ്ങൾക്കു മൊത്ത​മാ​യും വിവരങ്ങൾ പ്രദാനം ചെയ്യാൻ കഴിഞ്ഞി​രി​ക്കു​ന്നു.

ഇതി​നോ​ടു​ള്ള ബന്ധത്തിൽ, പൊതു​കാ​ര്യ ഓഫീ​സും ഹോസ്‌പി​റ്റൽ ഇൻഫർമേഷൻ സർവീ​സ​സും ചേർന്ന്‌ സെന്റ്‌ പീറ്റേ​ഴ്‌സ്‌ബർഗി​ലും മോസ്‌കോ​യി​ലും ഉള്ള ആശുപ​ത്രി​ക​ളിൽ ഹ്രസ്വാ​വ​ത​ര​ണ​ങ്ങ​ളു​ടെ ഒരു പരമ്പര ആവിഷ്‌ക​രി​ച്ചു. 1998-ലെ വസന്തത്തിൽ നടത്തിയ ആ സംരം​ഭ​ത്തിൽ രക്തം ഉപയോ​ഗി​ക്കാ​തി​രി​ക്കാ​നുള്ള യഹോ​വ​യു​ടെ സാക്ഷി​ക​ളു​ടെ തീരു​മാ​ന​ത്തോ​ടു സഹകരി​ക്കുന്ന, ഐക്യ​നാ​ടു​ക​ളിൽ നിന്നും യൂറോ​പ്പിൽ നിന്നു​മുള്ള പ്രമു​ഖ​രായ ഡോക്‌ടർമാർ ക്ഷണിക്ക​പ്പെട്ടു. രക്തരഹിത ചികിത്സാ കേന്ദ്ര​മുള്ള ഒരു യു.എസ്‌. ആശുപ​ത്രി​യി​ലെ അനസ്‌തേ​ഷ്യാ-അടിയ​ന്തിര ചികിത്സാ വിഭാ​ഗ​ത്തി​ന്റെ തലവൻ ഇങ്ങനെ പറഞ്ഞു: “രക്തരഹിത ശസ്‌ത്ര​ക്രിയ ആരോഗ്യ പരിപാ​ല​ന​വു​മാ​യി ബന്ധപ്പെട്ട ചെലവു​കൾ ചുരു​ക്കു​ന്ന​തോ​ടൊ​പ്പം രോഗി​ക്കു മെച്ചപ്പെട്ട ആരോ​ഗ്യം സംഭാവന ചെയ്യു​ന്ന​താ​യി​ട്ടാ​ണു ഞങ്ങളുടെ അനുഭവം.” 400 പേർ അടങ്ങുന്ന റഷ്യൻ ഡോക്‌ടർമാ​രു​ടെ ഒരു സംഘ​ത്തോട്‌ അദ്ദേഹം ഇങ്ങനെ പറഞ്ഞു: “രക്തപ്പകർച്ചയെ ജീവര​ക്ഷാ​കരം ആയിട്ടാ​ണു വീക്ഷിച്ചു പോന്നി​ട്ടു​ള്ളത്‌. എന്നാൽ, രോഗി​ക​ളിൽ അത്‌ ഏറ്റവും വിനാ​ശ​ക​ര​മായ ഫലങ്ങൾ ഉളവാ​ക്കു​ന്ന​തി​ന്റെ വർധി​ച്ചു​വ​രുന്ന ഉദാഹ​ര​ണ​ങ്ങ​ളാ​ണു നാം കാണു​ന്നത്‌.” പ്രസ്‌തുത സിമ്പോ​സി​യ​ത്തി​ന്റെ പ്രാധാ​ന്യ​ത്തി​നു മാധ്യ​മ​ങ്ങ​ളിൽ നല്ല പ്രചാ​രണം ലഭിച്ചു. റഷ്യയി​ലെ പ്രമുഖ ചികിത്സാ വിദഗ്‌ധ​രും ആരോഗ്യ മന്ത്രാ​ല​യ​ത്തിൽ നിന്നും ആരോഗ്യ കമ്മിറ്റി​ക​ളിൽ നിന്നു​മുള്ള പ്രതി​നി​ധി​ക​ളും സന്നിഹി​തർ ആയിരു​ന്നു. അതേത്തു​ടർന്ന്‌ താമസി​യാ​തെ, വൈദ്യ സമൂഹ​ത്തിൽ നിന്നുള്ള അങ്ങേയറ്റം ആദരണീ​യ​രായ ആളുകൾ രക്തത്തിന്റെ ഉപയോ​ഗ​വു​മാ​യി ബന്ധപ്പെട്ട അപകട​ങ്ങളെ കുറിച്ചു നടത്തിയ പ്രസ്‌താ​വ​നകൾ മാധ്യ​മങ്ങൾ റിപ്പോർട്ടു ചെയ്‌തു. രക്തപ്പകർച്ച നിരസി​ക്കുന്ന തീരു​മാ​നത്തെ യുക്തി​ഹീ​ന​മാ​യി വീക്ഷി​ക്ക​രുത്‌ എന്നും അവർ അംഗീ​ക​രി​ച്ചു പറഞ്ഞു.

കൂടാതെ, പോയ വർഷം, തിര​ഞ്ഞെ​ടു​ക്ക​പ്പെട്ട ഏതാനും രാജ്യ​ങ്ങ​ളിൽ കുടും​ബ​ത്ത​കർച്ചയെ കുറിച്ച്‌ ഉത്‌ക​ണ്‌ഠാ​കു​ല​രായ വ്യക്തി​ക​ളും സംഘട​ന​ക​ളു​മാ​യി ബന്ധപ്പെ​ടു​ന്ന​തി​നു സംഘടിത ശ്രമങ്ങൾതന്നെ നടത്ത​പ്പെട്ടു. കുടും​ബ​സ​ന്തു​ഷ്ടി​യു​ടെ രഹസ്യം എന്ന പുസ്‌തകം അവർക്കു നൽകു​ക​യു​ണ്ടാ​യി. പ്രതി​ക​ര​ണ​മോ?

സ്‌പെ​യി​നി​ലെ മഡ്രി​ഡി​ലുള്ള ഒരു പ്രമുഖ കത്തോ​ലി​ക്കാ സ്‌കൂ​ളി​ന്റെ ഡയറക്‌ടർ 90 കുടും​ബ​സ​ന്തു​ഷ്ടി പുസ്‌തകം—സ്‌കൂൾ ജീവന​ക്കാർക്ക്‌ ഓരോ​രു​ത്തർക്കും ഒരു പ്രതി​വീ​തം—ആവശ്യ​പ്പെട്ടു. നെതർലൻഡ്‌സിൽ കുഴപ്പ​ക്കാ​രായ കുട്ടി​കളെ പാർപ്പി​ക്കുന്ന ഒരു സദനത്തി​ന്റെ  ഡയറക്‌ടർ, ആ സദനത്തി​ലെ ഓരോ യൂണി​റ്റി​ന്റെ​യും മേൽനോ​ട്ടം വഹിക്കു​ന്ന​വർക്ക്‌ ഒരു പ്രതി വീതം നൽകത്ത​ക്ക​വണ്ണം കുടും​ബ​സ​ന്തു​ഷ്ടി പുസ്‌ത​ക​ത്തി​ന്റെ പ്രതികൾ ആവശ്യ​പ്പെട്ടു. കുടും​ബ​ങ്ങളെ ബലിഷ്‌ഠ​മാ​ക്കാൻ യഹോ​വ​യു​ടെ സാക്ഷികൾ ചെയ്യുന്ന പ്രചാരണ പരിപാ​ടി​യെ കുറിച്ച്‌ യൂ​ക്രെ​യി​നിൽ വർത്തമാ​ന​പ്പ​ത്ര​ങ്ങ​ളും റേഡി​യോ​യും ടിവി​യും റിപ്പോർട്ടു ചെയ്‌തു. 256 സംഘട​ന​ക​ളു​ടെ​യും വിദ്യാ​ഭ്യാ​സ സ്ഥാപന​ങ്ങ​ളു​ടെ​യും ഡയറക്‌ടർമാർ കുടും​ബ​ങ്ങളെ ബലിഷ്‌ഠ​മാ​ക്കു​ന്നതു സംബന്ധി​ച്ചു തങ്ങളുടെ ജീവന​ക്കാർക്കു ക്ലാസ്സെ​ടു​ക്കാൻ സാക്ഷി​കളെ ക്ഷണിച്ചു. (എഫെ. 5:22–6:4) ആ പ്രചാരണ പരിപാ​ടി​യു​ടെ ഫലമായി ചില അധ്യാ​പകർ സഭാ​യോ​ഗ​ങ്ങൾക്കു ഹാജരാ​കാൻ തുടങ്ങി​യി​രി​ക്കു​ന്നു.

കഴിഞ്ഞ വർഷം പ്രത്യേ​കം ശ്രദ്ധ ചെലു​ത്തിയ മറ്റൊരു വിഷയം സ്‌ത്രീ​ക​ളു​ടെ ധർമം സംബന്ധി​ച്ചു​ള്ളത്‌ ആയിരു​ന്നു. 1998 ഏപ്രിൽ 8 ലക്കം, “സ്‌ത്രീ​കൾ—ഭാവി അവർക്ക്‌ എന്തു കൈവ​രു​ത്തും?” എന്ന മുഖ​ലേഖന പരമ്പര വിശേ​ഷ​വ​ത്‌ക​രി​ച്ചു. സ്‌ത്രീ​കൾ നേരി​ടുന്ന വിവേ​ച​ന​ത്തെ​യും സമൂഹ​ത്തിൽ അവരുടെ തൊഴി​ലി​നുള്ള മൂല്യ​ത്തെ​യും ബൈബിൾ കാഴ്‌ച​വെ​ക്കുന്ന ക്രിയാ​ത്മക വീക്ഷണ​ത്തെ​യും കുറിച്ച്‌ അതു ചർച്ച ചെയ്‌തു. (സദൃ. 31:10-31; 1 തിമൊ. 5:1, 2) സ്‌ത്രീ​ക​ളു​ടെ പ്രശ്‌നങ്ങൾ കൈകാ​ര്യം ചെയ്യുന്ന വിഭാ​ഗ​ങ്ങൾക്കും സംഘട​ന​കൾക്കും ഈ വിവരങ്ങൾ ലഭ്യമാ​ക്കാൻ പ്രത്യേക ശ്രമങ്ങൾ നടത്ത​പ്പെട്ടു. അത്തരം വിവരങ്ങൾ പ്രദാനം ചെയ്യാൻ യഹോ​വ​യു​ടെ സാക്ഷി​കൾക്ക്‌ അല്ലാതെ വേറെ ആർക്കു സാധി​ക്കും, അതും 230-ലധികം ദേശങ്ങ​ളിൽ?

ജപ്പാൻ ബ്രാഞ്ചി​ലെ സഹോ​ദ​രങ്ങൾ 3,000-ത്തിലധി​കം വനിതാ സംഘട​ന​കൾക്ക്‌ ഒരു കത്തി​നോ​ടൊ​പ്പം പ്രസ്‌ റിലീ​സും ഉണരുക!യുടെ ഒരു പ്രതി​യും അയച്ചു​കൊ​ടു​ത്തു. പോർട്ടോ​റി​ക്കോ​യിൽ താത്‌പ​ര്യ​ക്കാ​രായ ആളുകൾ—ചില സാമൂ​ഹിക പ്രവർത്ത​ക​രും ഒരു സർവക​ലാ​ശാ​ലാ പ്രൊ​ഫ​സ​റും അതിൽ ഉൾപ്പെ​ട്ടി​രു​ന്നു—ഉണരുക!യുടെ ആ പ്രത്യേക ലക്കം ആവശ്യ​പ്പെ​ട്ടു​കൊ​ണ്ടു ബ്രാഞ്ചി​ലേക്കു ഫോൺ ചെയ്‌തു. ഒരു നിയമ​സ​ഭാം​ഗം ആ മാസിക വായി​ച്ചിട്ട്‌ യഹോ​വ​യു​ടെ സാക്ഷികൾ നടത്തുന്ന ലോക​വ്യാ​പക വിദ്യാ​ഭ്യാ​സ പരിപാ​ടി​യി​ലും സമൂഹ​ത്തി​ലുള്ള അവരുടെ ആത്മാർഥ​മായ താത്‌പ​ര്യ​ത്തി​ലും മതിപ്പു തോന്നി സാക്ഷി​കളെ തന്റെ ഓഫീ​സി​ലേക്കു ക്ഷണിച്ചു. ഒരു നഗരത്തിൽ മേയറു​ടെ എക്‌സി​ക്യൂ​ട്ടിവ്‌ അസിസ്റ്റന്റ്‌, പ്രസ്‌തുത വിഷയ​ത്തിൽ അതിയായ താത്‌പ​ര്യം തോന്നി​യി​ട്ടു മുനി​സി​പ്പൽ ഓഫീ​സി​ലെ അഞ്ചു ഡിപ്പാർട്ടു​മെ​ന്റു​കൾക്കാ​യി അതിന്റെ 100 പ്രതികൾ ആവശ്യ​പ്പെട്ടു.

നമ്മെക്കു​റി​ച്ചു ലോക​ത്തിൽ അനേകർക്കു​മുള്ള മോശ​മായ വീക്ഷണത്തെ മാറ്റി​യെ​ടു​ക്കാൻ നമുക്കാ​വില്ല. എന്നാൽ, തന്റെ  നാമമ​ഹ​ത്ത്വീ​ക​ര​ണ​ത്തിൽ കലാശി​ക്കുന്ന പ്രവർത്ത​ന​ങ്ങളെ യഹോവ അനു​ഗ്ര​ഹി​ക്കു​ന്ന​തിൽ തുടരും എന്നു നമുക്കു വിശ്വാ​സ​മുണ്ട്‌. നമ്മുടെ സത്‌പ്ര​വൃ​ത്തി​കൾ കാണു​ന്ന​തി​ന്റെ ഫലമായി “നിത്യ​ജീ​വ​നാ​യി ശരിയായ മനോ​നി​ല​യു​ള്ളവർ” ദൈവത്തെ മഹത്ത്വ​പ്പെ​ടു​ത്തു​ന്ന​വ​രു​ടെ കൂടെ ആയിരി​ക്കു​ന്ന​തി​ന്റെ ആവശ്യം തിരി​ച്ച​റി​യു​ന്നു.—പ്രവൃ. 13:48, NW.

‘കൂടാ​ര​ത്തി​ന്റെ കയറു​കളെ നീട്ടൽ’

ദീർഘ​കാ​ലം മുമ്പ്‌ തന്റെ സംഘട​നയെ കുറിച്ച്‌ യഹോവ പ്രാവ​ച​നി​ക​മാ​യി ഇങ്ങനെ പറഞ്ഞു: “നിന്റെ കൂടാ​ര​ത്തി​ന്റെ സ്ഥലത്തെ വിശാ​ല​മാ​ക്കുക; . . . തടുത്തു​ക​ള​യ​രു​തു; നിന്റെ കയറു​കളെ നീട്ടുക; നിന്റെ കുറ്റി​കളെ ഉറപ്പിക്ക.” (യെശ. 54:2) ഇപ്പോൾ വെളി​പ്പാ​ടു 7:9-ന്റെ നിവൃ​ത്തി​യെന്ന നിലയിൽ, മിശി​ഹൈക രാജ്യ​ത്തിൻ കീഴിൽ ഭൂമി​യി​ലെ ജീവി​ത​ത്തി​നാ​യി നോക്കി​പ്പാർത്തി​രി​ക്കുന്ന ദശലക്ഷ​ക്ക​ണ​ക്കിന്‌ ആളുകൾ ദിവ്യാ​ധി​പത്യ സംഘട​ന​യോ​ടൊ​ത്തു സഹവസി​ക്കാൻ വന്നെത്തു​ന്നു. അവർക്കും സ്ഥാപന​ത്തിൽ ഇടം വേണം.

ബൈബിൾ പ്രബോ​ധനം പ്രദാനം ചെയ്യു​ന്ന​തിന്‌ ഉചിത​മായ ഇടങ്ങൾക്കാ​യി മിക്ക ദേശങ്ങ​ളി​ലും രാജ്യ​ഹാ​ളു​കൾ പണി​യേ​ണ്ടത്‌ അത്യാ​വ​ശ്യ​മാ​യി​രി​ക്കു​ന്നു. ഘാനയിൽ 237 രാജ്യ​ഹാ​ളു​കൾ ഉള്ളതാ​യും 275 ഹാളുകൾ നിർമാ​ണ​ത്തി​ലു​ള്ള​താ​യും ഒരു സർവേ വെളി​പ്പെ​ടു​ത്തി. യൂ​ക്രെ​യി​നിൽ 84 രാജ്യ​ഹാ​ളു​ക​ളു​ടെ നിർമാ​ണം പൂർത്തി​യാ​യി, 61 ഹാളുകൾ നിർമാ​ണ​ത്തി​ലി​രി​ക്കു​ന്നു എന്നു റിപ്പോർട്ടു ചെയ്യ​പ്പെ​ടു​ന്നു. ദക്ഷിണാ​ഫ്രി​ക്ക​യിൽ ഒരു മേഖലാ നിർമാ​ണ​ക്ക​മ്മി​റ്റി​യോ​ടൊ​പ്പം പ്രവർത്തി​ക്കുന്ന സഹോ​ദ​രങ്ങൾ രാജ്യ​ഹാ​ളിന്‌ അടിത്ത​റ​യി​ടാൻ പ്രാ​ദേ​ശിക സഹോ​ദ​ര​ങ്ങളെ സഹായി​ക്കു​ക​യും ഇഷ്ടിക നിർമാണ യന്ത്രം അവർക്കു നൽകു​ക​യും ചെയ്‌തി​രി​ക്കു​ന്നു. പ്രാ​ദേ​ശിക സാക്ഷികൾ—കൂടു​ത​ലും സഹോ​ദ​രി​മാർ—ഇഷ്ടികകൾ ഉണ്ടാക്കി അട്ടിയിട്ട്‌ ഉണങ്ങാൻ വെക്കുന്നു. ഇഷ്ടികകൾ ഉപയോ​ഗി​ക്കാ​റാ​കു​മ്പോൾ മേഖലാ നിർമാ​ണ​ക്ക​മ്മി​റ്റി​യി​ലെ സന്നദ്ധ​സേ​വകർ മടങ്ങി​യെത്തി പെട്ടെ​ന്നു​തന്നെ ഹാൾ പണിതു​യർത്തു​ന്നു. കുറഞ്ഞ ചെലവിൽ ഗുണ​മേ​ന്മ​യുള്ള ഹാളുകൾ നിർമി​ക്കാൻ ഈ രീതി​യിൽ അവർക്കു കഴിയു​ന്നു.

നല്ല രാജ്യ​ഹാ​ളു​കൾ, കൂട്ടി​ച്ചേർക്കൽ വേല ത്വരി​ത​പ്പെ​ടു​ത്താൻ സഹായി​ക്കു​ന്നു. മഡഗാ​സ്‌ക​റിൽ രണ്ടു സഭകളു​ടെ ആവശ്യ​ങ്ങൾക്കാ​യി ഒരു രാജ്യ​ഹാൾ നിർമിച്ച്‌ ഏതാനും മാസങ്ങൾക്കകം അതേ പ്രദേ​ശത്തു വേറെ രണ്ടു സഭകൾ രൂപീ​കൃ​ത​മാ​യി. അവി​ടെ​ത്തന്നെ വേറൊ​രു സഭ കൂടി രൂപീ​കൃ​ത​മാ​കു​ന്ന​തി​നുള്ള സാധ്യ​ത​യും ഉണ്ട്‌. എങ്കിലും ആഫ്രി​ക്ക​യിൽ 28,000 പ്രസാ​ധ​ക​രുള്ള ഒരു രാജ്യത്ത്‌ 10 സഭകൾക്ക്‌ ഒരു രാജ്യ​ഹാൾ വീതമേ ഉള്ളൂ. 38,000 പ്രസാ​ധ​ക​രുള്ള മറ്റൊരു രാജ്യത്ത്‌  26 സഭകൾക്ക്‌ ഒരു രാജ്യ​ഹാൾ വീതമേ ഉള്ളൂ. 1,00,000 പ്രസാ​ധ​ക​രുള്ള പൂർവ യൂറോ​പ്പി​ലെ ഒരു ബ്രാഞ്ച്‌ ഓഫീസ്‌ പറയു​ന്നത്‌ അവിടെ 13 സഭകൾക്ക്‌ ഒരു രാജ്യ​ഹാൾ വീതമേ ഉള്ളൂ എന്നാണ്‌. ചില രാജ്യ​ങ്ങ​ളിൽ അടിയ​ന്തി​ര​മാ​യി 1,000-ത്തിലധി​കം രാജ്യ​ഹാ​ളു​കൾ—2,500 പോലും—ആവശ്യ​മാ​യി​രി​ക്കു​ന്നു. അതു​കൊണ്ട്‌, സേവന വർഷത്തി​ന്റെ അവസാനം, നിർദിഷ്ട ദേശങ്ങ​ളിൽ അടിയ​ന്തി​ര​മാ​യി ആവശ്യ​മാ​യി​രി​ക്കുന്ന 8,000-മോ അതില​ധി​ക​മോ രാജ്യ​ഹാ​ളു​കൾ പണിയു​ന്ന​തി​നു സാർവ​ദേ​ശീയ സ്വമേ​ധയാ സേവക​രു​ടെ സഹായം ലഭ്യമാ​ക്കാൻ ക്രമീ​ക​ര​ണങ്ങൾ ചെയ്‌തി​രി​ക്കു​ന്നു. അത്തരം ദേശങ്ങ​ളിൽ, യഹോ​വ​യു​ടെ സംഘട​ന​യി​ലേക്കു കൂട്ടമാ​യി വന്നു​കൊ​ണ്ടി​രി​ക്കുന്ന അനേകർക്ക്‌ കൂടി​വ​രു​ന്ന​തിന്‌ ഇടം ലഭ്യമാ​ക്കാൻ പ്രാ​ദേ​ശിക സഹോ​ദ​ര​ങ്ങൾക്കു വേണ്ടത്ര നിർമാണ വൈദ​ഗ്‌ധ്യ​വും ഭൗതിക വിഭവ​ങ്ങ​ളും ഇല്ലാത്ത​തി​നാ​ലാണ്‌ ഈ ക്രമീ​ക​ര​ണങ്ങൾ ചെയ്‌തി​രി​ക്കു​ന്നത്‌.

പ്രസാ​ധ​ക​രു​ടെ എണ്ണം വർധി​ച്ചു​കൊ​ണ്ടി​രി​ക്കുന്ന സ്ഥിതിക്ക്‌—പോയ വർഷം 3,16,092 പേർകൂ​ടി സ്‌നാ​പ​ന​മേറ്റു—ബ്രാഞ്ച്‌ സൗകര്യ​ങ്ങ​ളും വികസി​പ്പി​ക്കേ​ണ്ടത്‌ ആവശ്യ​മാ​യി​രി​ക്കു​ന്നു. ലോക​മെ​മ്പാ​ടു​മുള്ള ബെഥേൽ കുടും​ബ​ങ്ങ​ളിൽ ഇപ്പോൾ 17,781 പേർ പ്രത്യേക മുഴു സമയ സേവകർ എന്ന നിലയിൽ സേവനം അനുഷ്‌ഠി​ക്കു​ന്നു.

കെനിയ: 1997 ഒക്‌ടോ​ബർ 25-ന്‌ കെനി​യ​യിൽ പുതിയ ബ്രാഞ്ച്‌ സൗകര്യ​ങ്ങൾ സമർപ്പി​ക്ക​പ്പെട്ടു. ഭരണസം​ഘ​ത്തി​ലെ മിൽട്ടൺ ഹെൻഷ​ലും മുൻ കാലങ്ങ​ളിൽ കെനി​യ​യിൽ സേവന​ത്തിൽ പങ്കുപ​റ്റി​യി​രു​ന്ന​വ​രും സന്നിഹി​തർ ആയിരു​ന്നു. വാരാ​ന്ത​ത്തിൽ ക്രമീ​ക​രിച്ച പ്രത്യേക പരിപാ​ടി​യിൽ പങ്കെടു​ക്കാൻ പൂർവ ആഫ്രി​ക്ക​യി​ലെ​മ്പാ​ടും നിന്ന്‌ ഊർജ​സ്വ​ല​രായ സാക്ഷികൾ—ചിലർ നടന്നു​പോ​ലും—എത്തി​ച്ചേർന്നു.

പൂർവ ആഫ്രി​ക്ക​യിൽ, മൊത്തം 29,000 സജീവ സാക്ഷികൾ ഉള്ള ഒരു പ്രദേ​ശത്തെ പ്രസംഗ വേലയി​ലും ശിഷ്യ​രാ​ക്കൽ വേലയി​ലും മേൽനോ​ട്ടം വഹിക്കു​ന്നത്‌ ഈ ബ്രാഞ്ചാണ്‌. 1930-കളുടെ ആരംഭ​ത്തിൽ ദക്ഷിണാ​ഫ്രി​ക്ക​യിൽ നിന്നുള്ള ധീരരായ പയനി​യർമാർ കെനി​യ​യിൽ സാക്ഷ്യ​വേ​ല​യ്‌ക്കു തുടക്ക​മി​ട്ടു. എങ്കിലും, മേരി ഹ്വിറ്റി​ങ്‌ടൺ സ്‌നാ​പ​ന​മേറ്റ്‌ ഏറെനാൾ കഴിയും മുമ്പേ 1949-ൽ ഇംഗ്ലണ്ടിൽ നിന്ന്‌ എത്തിയ​തോ​ടെ​യാണ്‌ അവിട​ങ്ങ​ളിൽ തുടർച്ച​യാ​യി സാക്ഷ്യം നൽക​പ്പെ​ടാൻ തുടങ്ങി​യത്‌. ആദ്യത്തെ മിഷന​റി​മാ​രെന്ന നിലയിൽ, ഗിലെ​യാദ്‌ പരിശീ​ലനം നേടിയ വില്യം നിസ്‌ബെ​റ്റും ഭാര്യ മ്യൂറി​യ​ലും 1956-ൽ എത്തി​ച്ചേർന്നു. നിസ്‌ബെറ്റ്‌ സഹോ​ദ​രന്റെ ജ്യേഷ്‌ഠ​ന്മാ​രായ റോബർട്ടും ജോർജും 1930-കളിൽ കെനി​യ​യിൽ ആദ്യമാ​യി സാക്ഷ്യം നൽകിയ ആദ്യകാല പയനി​യർമാ​രിൽ പെട്ടവ​രാണ്‌. വേറെ പല മിഷന​റി​മാ​രും സാംബിയ, ടാൻസാ​നിയ എന്നിവി​ട​ങ്ങ​ളിൽ നിന്നുള്ള പ്രത്യേക  പയനി​യർമാ​രും ആവശ്യം കൂടുതൽ ഉള്ളിടത്തു സേവി​ക്കുന്ന മറ്റു സഹോ​ദ​ര​ങ്ങ​ളും കെനി​യ​യി​ലെ വേലയു​ടെ പുരോ​ഗ​തി​യിൽ കാര്യ​മായ സംഭാവന ചെയ്‌തി​ട്ടുണ്ട്‌. കെനി​യ​യിൽ പ്രസാ​ധ​ക​രു​ടെ സംഖ്യ 1,000-ത്തിൽ എത്താൻ 41 വർഷ​മെ​ടു​ത്തു. എന്നാൽ, ഇപ്പോൾ വർഷം തോറും 1,000-ത്തിലധി​കം ആളുക​ളാ​ണു സ്‌നാ​പനം ഏൽക്കു​ന്നത്‌!

ഫ്രാൻസ്‌: 1997 നവംബർ 15, 16 വാരാന്ത്യ തീയതി​ക​ളിൽ ഫ്രാൻസി​ലെ യഹോ​വ​യു​ടെ സാക്ഷികൾ പാരീ​സിൽ നിന്നു 100 കിലോ​മീ​റ്റർ പടിഞ്ഞാ​റുള്ള ലൂവി​യേ​യിൽ പുതിയ ബ്രാഞ്ച്‌ സൗകര്യ​ങ്ങൾ സമർപ്പി​ച്ചു. സമർപ്പണ പരിപാ​ടി​യിൽ 42 ബ്രാഞ്ചു​ക​ളിൽ നിന്നുള്ള സഹോ​ദ​രീ​സ​ഹോ​ദ​ര​ന്മാർ സന്നിഹി​തർ ആയിരു​ന്നു. ഭരണസം​ഘാം​ഗ​ങ്ങ​ളായ ലോയിഡ്‌ ബാരി​യു​ടെ​യും ഡാനി​യേൽ സിഡ്‌ലി​ക്കി​ന്റെ​യും പ്രസം​ഗങ്ങൾ പരിപാ​ടി​യു​ടെ സവി​ശേഷത ആയിരു​ന്നു. പിറ്റേന്ന്‌, പാരീ​സി​നു വടക്കുള്ള വിൽപാന്റ്‌ എക്‌സി​ബി​ഷൻ കേന്ദ്ര​ത്തിൽ നടത്തിയ പ്രത്യേക പരിപാ​ടി​യിൽ പങ്കെടു​ക്കാൻ എത്തി​ച്ചേർന്ന 95,888 പേരട​ങ്ങുന്ന ഒരു ജനസമൂ​ഹത്തെ കാണു​ന്നത്‌ എത്രമാ​ത്രം രോമാ​ഞ്ച​ജ​നകം ആയിരു​ന്നു! ഇത്രയ​ധി​കം യഹോ​വ​യു​ടെ സാക്ഷികൾ ഫ്രാൻസിൽ കൂടി​വ​രു​ന്നത്‌ ആദ്യമാ​യി​ട്ടാണ്‌.

1980-കളിൽ പ്രസാ​ധ​ക​രു​ടെ എണ്ണത്തി​ലു​ണ്ടായ 50 ശതമാനം വർധനവ്‌ ബെഥേ​ലിൽ കൂടുതൽ സ്ഥലസൗ​ക​ര്യ​ങ്ങൾ ആവശ്യ​മാ​ക്കി​ത്തീർത്തു. എന്നിരു​ന്നാ​ലും, പദ്ധതി പൂർത്തി​യാ​ക്കാൻ 10 വർഷം വേണ്ടി​വന്നു. ഇപ്പോ​ഴത്തെ കെട്ടി​ട​ങ്ങ​ളോ​ടു ചേർന്നു വീണ്ടും പണിയാ​നുള്ള ആദ്യ ശ്രമങ്ങൾക്കു ശക്തമായ എതിർപ്പു​കൾ നേരി​ടേ​ണ്ടി​വന്നു. ഫ്രാൻസിൽ യഹോ​വ​യു​ടെ സാക്ഷി​ക​ളു​ടെ പ്രവർത്ത​ന​ത്തി​നു തടസ്സം സൃഷ്ടി​ക്കാൻ എതിരാ​ളി​കൾ അശ്രാന്ത പരി​ശ്രമം ചെയ്യുന്നു. എന്നുവ​രി​കി​ലും, ഫ്രാൻസി​ലെ 1,21,000 വരുന്ന സാക്ഷികൾ ദൈവ​രാ​ജ്യ സുവാർത്ത​യു​ടെ ഘോഷ​ണ​ത്തിൽ മന്ദീഭ​വി​ക്കു​ന്നില്ല. ഫ്രഞ്ചു ഭാഷ സംസാ​രി​ക്കു​ന്ന​വ​രാ​യി ലോക​മെ​മ്പാ​ടു​മുള്ള 10 കോടി​യിൽപ്പരം ആളുകൾ ‘ജീവജലം സൗജന്യ​മാ​യി വാങ്ങാ’നുള്ള ക്ഷണം കൃതജ്ഞ​താ​പൂർവം സ്വീക​രി​ക്കു​മെന്ന ആത്മവി​ശ്വാ​സ​ത്തോ​ടെ​യാണ്‌ അവർ ആ വേലയിൽ ഏർപ്പെ​ടു​ന്നത്‌.—വെളി. 22:17.

സ്‌പെ​യിൻ: ഇവി​ടെ​യും പരമാർഥ ഹൃദയ​രായ അനേകർ ദൈവ​രാ​ജ്യ സുവാർത്ത​യോട്‌ അനുകൂ​ല​മാ​യി പ്രതി​ക​രി​ക്കു​ന്നു. 1983-ൽ, മാഡ്രി​ഡി​ന്റെ പ്രാന്ത​ത്തി​ലുള്ള ബ്രാഞ്ച്‌ സമുച്ചയം സമർപ്പി​ക്ക​പ്പെ​ട്ട​തി​നു ശേഷം സ്‌പെ​യി​നി​ലെ സാക്ഷി​ക​ളു​ടെ സംഖ്യ 53,000-ത്തിൽ നിന്ന്‌ 1,03,000 ആയി വർധിച്ചു. സ്‌പെ​യിൻ, പോർച്ചു​ഗൽ എന്നിവി​ട​ങ്ങ​ളി​ലേ​ക്കുള്ള വീക്ഷാ​ഗോ​പു​രം, ഉണരുക! മാസി​ക​ക​ളു​ടെ അച്ചടി പ്രതി​വർഷം  65,00,000 ആയിരു​ന്ന​തിൽ നിന്ന്‌ ഏതാണ്ട്‌ 2,30,00,000 ആയി വർധി​ച്ചി​രി​ക്കു​ന്നു. “താമസ​സൗ​ക​ര്യം അങ്ങേയറ്റം പരിമി​ത​മാ​യി​രു​ന്ന​തി​നാൽ 150-ഓളം ബെഥേൽ ജോലി​ക്കാർ ബെഥേ​ലിൽ നിന്നു നിരവധി കിലോ​മീ​റ്റർ അകലെ​യാ​ണു താമസി​ച്ചി​രു​ന്നത്‌,” ഭവന മേൽവി​ചാ​ര​ക​നായ ജോൺ ഹൈ​ഡെൽബർഗ്‌ വിശദീ​ക​രി​ക്കു​ന്നു. “സാഹി​ത്യ​ങ്ങൾ സൂക്ഷി​ക്കാ​നും കയറ്റി അയയ്‌ക്കാ​നും കൂടുതൽ സൗകര്യ​ങ്ങൾ അത്യന്താ​പേ​ക്ഷി​തം ആയിരു​ന്നു.”

വികസി​പ്പി​ച്ച ബ്രാഞ്ച്‌ സൗകര്യ​ങ്ങ​ളു​ടെ സമർപ്പണം 1998 മാർച്ച്‌ 28-ന്‌ ആയിരു​ന്നു. 25,000-ത്തിലധി​കം സ്വമേ​ധയാ സേവക​രു​ടെ—അവരിൽ അധികം പേരും സ്‌പെ​യി​നിൽ നിന്നാ​യി​രു​ന്നെ​ങ്കി​ലും വിദേ​ശത്തു നിന്നു​ള്ള​വ​രും ഉണ്ടായി​രു​ന്നു—അഞ്ചു വർഷം നീണ്ടു​നിന്ന കഠിനാ​ധ്വാ​ന​ത്തി​ന്റെ ഫലമാ​യി​രു​ന്നു അത്‌. ബ്രുക്ലിൻ ഹെഡ്‌ക്വാർട്ടേ​ഴ്‌സിൽ നിന്നുള്ള വില്യം മലെൻഫോ​ണ്ടും ഗെരിറ്റ്‌ ലോഷും സമർപ്പണ പരിപാ​ടി​യിൽ പങ്കുപറ്റി. സ്ഥലപരി​മി​തി മൂലം പ്രസ്‌തുത പരിപാ​ടി​യിൽ പങ്കെടു​ത്ത​വ​രു​ടെ എണ്ണം പരിമി​തം ആയിരു​ന്നെ​ങ്കി​ലും പിറ്റേന്നു മഡ്രി​ഡി​ലും ബാർസ​ലോ​ണ​യി​ലു​മാ​യി 65,775 പേർ ഉത്‌കൃ​ഷ്ട​മായ മറ്റൊരു പരിപാ​ടി ആസ്വദി​ക്കാൻ സമ്മേളി​ച്ചു.

റൊ​മേ​നി​യ: 80 വർഷത്തി​ലേ​റെ​യാ​യി യഹോ​വ​യു​ടെ സാക്ഷികൾ റൊ​മേ​നി​യ​യിൽ തങ്ങളുടെ പരസ്യ ശുശ്രൂഷ നടത്തി​വ​രു​ക​യാണ്‌. അവരുടെ പ്രവർത്ത​ന​ത്തി​ന്മേൽ 43 വർഷക്കാ​ല​മാ​യി നിലനിന്ന നിരോ​ധനം 1990-ൽ, നീക്കി​യ​പ്പോൾ അവിടെ 19,000-ത്തോളം സാക്ഷി​ക​ളാണ്‌ ഉണ്ടായി​രു​ന്നത്‌. ഇപ്പോൾ അവിടെ 37,000-ത്തിലധി​കം സാക്ഷി​ക​ളുണ്ട്‌. 82,000-ത്തിലധി​കം പേർ 1998-ലെ സ്‌മാ​ര​ക​ത്തി​നു കൂടി​വന്നു. റൊ​മേ​നി​യ​യിൽ ബ്രാഞ്ച്‌ സൗകര്യ​ങ്ങൾ ആവശ്യ​മാ​യി​വന്നു. അങ്ങനെ, പോയ വർഷത്തെ ഒരു സവിശേഷ സംഭവം എന്നവണ്ണം, 1998 മേയ്‌ 2-ന്‌ പുതിയ ബ്രാഞ്ച്‌ സമർപ്പി​ക്ക​പ്പെട്ടു. ഭരണസം​ഘാം​ഗ​മായ ഗെരിറ്റ്‌ ലോഷ്‌ ഉൾപ്പെടെ 19 രാജ്യ​ങ്ങ​ളിൽ നിന്നുള്ള സഹോ​ദ​രങ്ങൾ ആ സന്ദർഭ​ത്തി​ന്റെ സന്തോഷം പങ്കു​വെ​ക്കാൻ സന്നിഹി​തർ ആയിരു​ന്നു.

1998 സേവന വർഷം അവസാ​നി​ച്ച​പ്പോ​ഴേ​ക്കും പ്രാ​ദേ​ശിക സാക്ഷി​ക​ളോ​ടൊ​പ്പം വിവിധ നിർമാണ പ്രവർത്ത​ന​ങ്ങ​ളിൽ ഏർപ്പെ​ട്ടി​രുന്ന അനുഭവ സമ്പന്നരായ 397 സാർവ​ദേ​ശീയ ദാസന്മാ​രും 150 സാർവ​ദേ​ശീയ സ്വമേ​ധയാ സേവക​രും ഉണ്ടായി​രു​ന്നു. 38 രാജ്യ​ങ്ങ​ളി​ലെ വലിയ നിർമാണ പ്രവർത്ത​ന​വും 23 രാജ്യ​ങ്ങ​ളി​ലെ ചെറിയ പദ്ധതി​ക​ളും അതിൽ ഉൾപ്പെ​ട്ടി​രു​ന്നു. ആയിര​ക്ക​ണ​ക്കി​നു രാജ്യ​ഹാ​ളു​കൾ ഇപ്പോൾ അവരുടെ നിർമാണ പ്രവർത്തന ലിസ്റ്റിൽ ചേർക്ക​പ്പെ​ടു​ന്ന​താണ്‌. വാസ്‌ത​വ​മാ​യും, ആലങ്കാ​രിക കൂടാരം കൂടുതൽ “വിശാ​ലമാ”ക്കാനും അതിന്റെ ‘കയറുകൾ നീട്ടാ​നും’ പല വിധങ്ങ​ളി​ലാ​യി അനേകം കാര്യങ്ങൾ ചെയ്‌തു​വ​രു​ന്നു.

[6-ാം പേജിലെ ചിത്രം]

ഭരണസംഘാംഗങ്ങൾ ഓരോ അന്താരാ​ഷ്‌ട്ര കൺ​വെൻ​ഷ​നി​ലും പ്രസം​ഗി​ച്ചു

[11-ാം പേജിലെ ചിത്രം]

മിഷനറിമാരുടെ റിപ്പോർട്ടു​കൾ സവിശേഷ ഇനമാ​യി​രു​ന്നു

[12-14 പേജു​ക​ളി​ലെ ചിത്രങ്ങൾ]

കൺ​വെൻ​ഷനിൽ പങ്കെടു​ത്ത​വ​രിൽ ശ്രദ്ധേ​യ​മായ സ്‌നേ​ഹ​വും സന്തോ​ഷ​വും പ്രകട​മാ​യി​രു​ന്നു

 [21-ാം പേജിലെ ചിത്രങ്ങൾ]

പാറ്റേഴ്‌സനിലെ ഓഡി​യോ/വീഡി​യോ റെക്കോർഡിങ്‌ സ്റ്റുഡി​യോ

 [29-ാം പേജിലെ ചിത്രങ്ങൾ]

സമർപ്പി​ക്ക​പ്പെട്ട ബ്രാഞ്ചു​കൾ: (1) സ്‌പെ​യിൻ, (2) കെനിയ, (3) ഫ്രാൻസ്‌