കഴിഞ്ഞ വർഷത്തെ സവി​ശേ​ഷ​ത​കൾ

നമുക്കു സന്തോ​ഷി​ക്കാൻ ഏറെ കാരണങ്ങൾ നൽകി​യി​ട്ടാണ്‌ വിശു​ദ്ധ​സേ​വ​ന​ത്തി​ന്റെ അനു​ഗ്ര​ഹ​പൂർണ​മായ ഒരു വർഷം​കൂ​ടി കടന്നു​പോ​യത്‌. നമ്മുടെ ദൈവം തന്റെ ദാസന്മാ​രെ ഉപയോ​ഗിച്ച്‌ ചെയ്യുന്ന ബൃഹത്തായ വേലയു​ടെ ചില സവി​ശേ​ഷ​ത​ക​ളി​ലൂ​ടെ കണ്ണോ​ടി​ക്കവെ, “നീ സംവത്സ​രത്തെ നിന്റെ നന്മകൊ​ണ്ടു അലങ്കരി​ക്കു​ന്നു” എന്ന സങ്കീർത്ത​ന​ക്കാ​രന്റെ വാക്കുകൾ ഏറ്റുപാ​ടാൻ നാമും പ്രചോ​ദി​ത​രാ​യി​ത്തീ​രും.—സങ്കീ. 65:11.

ഇന്റർനെ​റ്റി​ലെ “സുവാർത്ത”

അന്ത്യം വരുന്ന​തി​നു​മുമ്പ്‌ ‘രാജ്യ​ത്തി​ന്റെ ഈ സുവി​ശേഷം സകലജാ​തി​കൾക്കും സാക്ഷ്യ​മാ​യി ഭൂലോ​ക​ത്തിൽ ഒക്കെയും പ്രസം​ഗി​ക്കുക’ എന്ന ഉത്തരവാ​ദി​ത്വം ഗൗരവ​മാ​യി എടുക്കു​ന്ന​വ​രാണ്‌ നമ്മൾ യഹോ​വ​യു​ടെ സാക്ഷികൾ. (മത്താ. 24:14) സാങ്കേ​തി​ക​വി​ദ്യ​യിൽ അടുത്ത കാലങ്ങ​ളിൽ ഉണ്ടായി​ക്കൊ​ണ്ടി​രി​ക്കുന്ന പുതിയ വികാ​സങ്ങൾ “രാജ്യ​ത്തി​ന്റെ വചനം” വ്യാപി​ക്കു​ന്ന​തി​ന്റെ ആക്കം മുമ്പെ​ന്ന​ത്തെ​ക്കാ​ള​ധി​കം  വർധി​പ്പി​ച്ചി​രി​ക്കു​ന്നു. (മത്താ. 13:18-23) കഴിഞ്ഞ 11 വർഷമാ​യി www.watchtower.org എന്ന ഔദ്യോ​ഗിക വെബ്‌​സൈറ്റ്‌ നാം ഉപയോ​ഗി​ച്ചു​വ​രു​ക​യാണ്‌. ആത്മീയ​വി​വ​രങ്ങൾ ഇന്റർനെ​റ്റി​ലൂ​ടെ പൊതു​ജ​ന​ത്തി​നു ലഭ്യമാ​ക്കു​ക​യെന്ന ഉദ്ദേശ്യ​ത്തി​ലാ​ണിത്‌. ഈ വെബ്‌​സൈറ്റ്‌ സന്ദർശി​ക്കു​ന്ന​വർക്ക്‌ അതിൽ കൊടു​ത്തി​രി​ക്കുന്ന 314 ഭാഷക​ളിൽ ഏതിൽ വേണ​മെ​ങ്കി​ലും ബൈബിൾസ​ത്യം പഠിക്കാ​നാ​കും. അതിലെ ചില തലക്കെ​ട്ടു​കൾ പിൻവ​രു​ന്ന​വ​യാണ്‌: “വിശ്വാ​സ​വും പ്രവർത്ത​ന​ങ്ങ​ളും,” “സമീപ​കാല വിഷയങ്ങൾ,” “ദൈവ​വും നിങ്ങളു​ടെ ഭാവി​യും,” “വൈദ്യ​പ​രി​ച​ര​ണ​വും രക്തവും,” “ലഭ്യമായ പ്രസി​ദ്ധീ​ക​ര​ണങ്ങൾ.”

പലരും www.watchtower.org സന്ദർശി​ക്കു​ന്നത്‌ ബൈബിൾ വായി​ക്കു​ന്ന​തി​നു​വേ​ണ്ടി​യാണ്‌. ദിവസ​വും 6,300-ൽപ്പരം ആളുകൾ സൈറ്റിൽ കൊടു​ത്തി​രി​ക്കുന്ന പത്തുഭാ​ഷ​ക​ളി​ലുള്ള വിശുദ്ധ തിരു​വെ​ഴു​ത്തു​കൾ—പുതിയ ലോക ഭാഷാ​ന്തരം ബൈബി​ളു​ക​ളിൽ ഏതെങ്കി​ലു​മൊന്ന്‌ പരി​ശോ​ധി​ക്കാ​റുണ്ട്‌. സങ്കീർത്ത​നങ്ങൾ, സദൃശ​വാ​ക്യ​ങ്ങൾ, യേശു​വി​ന്റെ ജീവി​ത​ത്തെ​ക്കു​റി​ച്ചുള്ള സുവി​ശേ​ഷ​വി​വ​ര​ണങ്ങൾ എന്നിവ​യാണ്‌ ആളുകൾ അധിക​വും പരി​ശോ​ധി​ക്കാ​റുള്ള ബൈബിൾപു​സ്‌ത​കങ്ങൾ.

ഓരോ ആഴ്‌ച​യും വീക്ഷാ​ഗോ​പു​രം, ഉണരുക! എന്നിവ​യിൽനിന്ന്‌ തിര​ഞ്ഞെ​ടുത്ത ലേഖനങ്ങൾ 12 ഭാഷക​ളിൽ വെബ്‌​സൈ​റ്റിൽ ചേർക്കാ​റുണ്ട്‌. പൊതു​ജ​ന​ങ്ങളെ മനസ്സിൽക്കണ്ട്‌ തയ്യാറാ​ക്കിയ, അച്ചടി​ച്ചു​വന്ന ലേഖന​ങ്ങ​ളാ​യി​രി​ക്കും പലപ്പോ​ഴും ഇവ. നമ്മുടെ വിശ്വാ​സങ്ങൾ, യോഗങ്ങൾ നടക്കുന്ന വിധം, പ്രസം​ഗ​വേ​ല​യ്‌ക്കുള്ള സാമ്പത്തിക പിന്തുണ ഇവയെ​ക്കു​റി​ച്ചൊ​ക്കെ അറിയാൻ പലരും ആകാം​ക്ഷ​യു​ള്ള​വ​രാണ്‌. വെബ്‌​സൈറ്റ്‌ സന്ദർശി​ക്കുന്ന ഒരാൾക്ക്‌ യഹോ​വ​യു​ടെ സാക്ഷികൾ അവർ ആരാണ്‌? അവർ എന്തു വിശ്വ​സി​ക്കു​ന്നു? എന്ന ലഘുപ​ത്രി​ക​യിൽനിന്ന്‌ ഇവയ്‌ക്കുള്ള ഉത്തരം ലഭിക്കും. മതത്തിന്റെ പേരിൽ ചെയ്യുന്ന ഹീനകൃ​ത്യ​ങ്ങൾ അവസാ​നി​ക്കു​മോ? എന്ന പ്രസി​ദ്ധീ​ക​രണം www.watchtower.org -യിൽ, 252 ഭാഷക​ളിൽ ലഭ്യമാണ്‌. ഇവയിൽ അഞ്ചെണ്ണം ആംഗ്യ​ഭാ​ഷ​ക​ളിൽ, ഭാഗി​ക​മാ​യുള്ള വീഡി​യോ ആണ്‌.

ഇന്റർനെ​റ്റിൽനിന്ന്‌ സത്യം കിട്ടുന്നു

ഈ പ്രസി​ദ്ധീ​ക​ര​ണങ്ങൾ ഓൺ​ലൈ​നിൽ ലഭ്യമാ​ക്കി​യ​തി​ന്റെ ഫലമെ​ന്താണ്‌? ദിവസ​വും ശരാശരി 60,000-ത്തിലേറെ ആളുക​ളാണ്‌ www.watchtower.org സന്ദർശി​ക്കു​ന്നത്‌! സാക്ഷികൾ തീരെ​ക്കു​റ​വുള്ള സ്ഥലങ്ങളി​ലോ നമ്മുടെ വേലയ്‌ക്ക്‌ നിരോ​ധ​ന​മോ നിയ​ന്ത്ര​ണ​മോ ഉള്ള രാജ്യ​ങ്ങ​ളി​ലോ ആണ്‌ പലരും താമസി​ക്കു​ന്നത്‌. എന്നിട്ടും, സത്യത്തി​നാ​യി ദാഹി​ക്കു​ന്ന​വർക്ക്‌ നമ്മുടെ വെബ്‌​സൈ​റ്റിൽനിന്ന്‌ സത്യത്തി​ന്റെ ജലം കുടിച്ച്‌ ദാഹം ശമിപ്പി​ക്കാ​നാ​കു​ന്നു.

 ബ്രയൻ പറയു​ന്നതു ശ്രദ്ധി​ക്കുക: “ബൈബി​ളി​നെ​ക്കു​റിച്ച്‌ പഠിക്കാൻ എനി​ക്കെ​ന്നും ഇഷ്ടമാ​യി​രു​ന്നു. എന്നാൽ സുഹൃ​ത്തു​ക്ക​ളു​ടെ കൂടെ പള്ളിയിൽ പോയ​പ്പോ​ഴൊ​ക്കെ അവർ പാട്ടു​പാ​ടു​ന്ന​തും ഗെയിം കളിക്കു​ന്ന​തും മാത്രമേ ഞാൻ കണ്ടിട്ടു​ള്ളൂ.” ബ്രയൻ പഠനവും കായി​ക​രം​ഗ​വു​മൊ​ക്കെ​യാ​യി മുന്നോ​ട്ടു​പോ​യി. അദ്ദേഹം അഞ്ചുഭാഷ പഠിച്ചു. കോ​ളെ​ജി​ലാ​യി​രി​ക്കെ ഒരു സ്‌കോ​ളർഷി​പ്പും നേടി; പക്ഷേ, ഒന്നും അദ്ദേഹ​ത്തിന്‌ ഒരു ആത്മീയ​സം​തൃ​പ്‌തി നൽകി​യില്ല. അതു​കൊണ്ട്‌ സത്യം കണ്ടെത്താ​നാ​യി അദ്ദേഹം പ്രാർഥി​ച്ചു.

ബ്രയൻ തുടരു​ന്നു: “എന്റെ ചോദ്യ​ങ്ങൾക്കുള്ള ഉത്തരം കണ്ടെത്താ​നുള്ള വെമ്പലാ​യി​രു​ന്നു എനിക്ക്‌. സ്‌കൂ​ളിൽ പഠിച്ചു​കൊ​ണ്ടി​രുന്ന കാലത്ത്‌ സാക്ഷി​ക​ളായ ചില സുഹൃ​ത്തു​ക്കൾ ദൈവ​ത്തി​ന്റെ പേര്‌ യഹോവ എന്നാ​ണെന്നു പറഞ്ഞത്‌ എനിക്ക​റി​യാ​മാ​യി​രു​ന്നു. അതു​കൊണ്ട്‌ യഹോ​വ​യു​ടെ സാക്ഷി​ക​ളെ​ക്കു​റിച്ച്‌ ഞാൻ ഇന്റർനെ​റ്റിൽ അന്വേ​ഷി​ച്ചു. സംഘട​ന​യു​ടെ വെബ്‌​സൈറ്റ്‌ തുറന്ന്‌ ദൈവം നമ്മിൽനിന്ന്‌ എന്ത്‌ ആവശ്യ​പ്പെ​ടു​ന്നു? എന്ന ലഘുപ​ത്രിക ഞാൻ വായി​ക്കാൻ തുടങ്ങി. അങ്ങനെ ഒടുവിൽ എന്റെ ചോദ്യ​ങ്ങൾക്ക്‌ ഉത്തരം കിട്ടി.” ബ്രയൻ ഒരു ബൈബി​ള​ധ്യ​യനം ആവശ്യ​പ്പെട്ടു. സത്വരം പുരോ​ഗതി വരുത്തി. 2004-ൽ അദ്ദേഹം തന്റെ ജീവിതം യഹോ​വ​യ്‌ക്കു സമർപ്പി​ച്ചു. അദ്ദേഹം ഇപ്പോൾ ഒരു സാധാരണ പയനി​യ​റാ​യി സേവി​ക്കു​ക​യാണ്‌. തന്റെ ബഹുഭാ​ഷാ​പ്രാ​വീ​ണ്യം മിഷനറി വേലയിൽ ഉപയോ​ഗി​ക്കാ​മെന്ന പ്രത്യാ​ശ​യി​ലാണ്‌ അദ്ദേഹം.

‘ദൈവം നിങ്ങ​ളോ​ടു​കൂ​ടെ ഉണ്ട്‌’

“ജാതി​ക​ളു​ടെ സകലഭാ​ഷ​ക​ളി​ലും​നിന്ന്‌” ആയിര​ങ്ങ​ളാണ്‌ നിത്യ​വും www.watchtower.org എന്ന വെബ്‌​സൈറ്റ്‌ സന്ദർശി​ക്കു​ന്നത്‌. എത്ര രോമാ​ഞ്ച​ജ​ന​ക​മായ അനുഭവം! ദിവസ​വും ശരാശരി 94 പേരെ​ങ്കി​ലും ഓൺ​ലൈ​നി​ലെ “ആരെങ്കി​ലും നിങ്ങളെ സന്ദർശി​ക്കാൻ നിങ്ങൾ താത്‌പ​ര്യ​പ്പെ​ടു​ന്നു​വോ?” എന്നുള്ള കൂപ്പൺ പൂരി​പ്പി​ക്കു​ന്നുണ്ട്‌.—സെഖ. 8:23

ഡെനിസ്‌ എന്ന സ്‌ത്രീക്ക്‌ യഹോ​വ​യു​ടെ സാക്ഷി​ക​ളു​ടെ വിശ്വാ​സ​ങ്ങ​ളെ​ക്കു​റിച്ച്‌ ചില ചോദ്യ​ങ്ങ​ളു​ണ്ടാ​യി​രു​ന്നു; പക്ഷേ, ആ പ്രദേ​ശ​ത്തു​ളള രാജ്യ​ഹാ​ളിൽ പോകാൻ അവർക്കൊ​രു വൈമ​ന​സ്യം. അതു​കൊണ്ട്‌ അവർ ഇന്റർനെ​റ്റിൽ പരതി www.watchtower.org കണ്ടുപി​ടി​ച്ചു. അവിടെ കണ്ട വിവര​ങ്ങ​ളിൽനിന്ന്‌ ഇതാണ്‌ സത്യം എന്ന്‌ ഡെനിസ്‌ മനസ്സി​ലാ​ക്കി; പക്ഷേ, ബൈബിൾ നിലവാ​ര​ങ്ങ​ള​നു​സ​രിച്ച്‌ ജീവി​ക്ക​ണ​മെ​ങ്കിൽ താൻ മാറ്റങ്ങൾ വരു​ത്തേ​ണ്ട​തു​ണ്ടെന്ന്‌ മനസ്സി​ലാ​ക്കിയ ഡെനിസ്‌ ഒരു ബൈബി​ള​ധ്യ​യനം ആവശ്യ​പ്പെ​ടാൻ വിമു​ഖ​ത​കാ​ട്ടി. “ആരെങ്കി​ലും നിങ്ങളെ സന്ദർശി​ക്കാൻ നിങ്ങൾ താത്‌പ​ര്യ​പ്പെ​ടു​ന്നു​വോ?” എന്ന ഇലക്‌​ട്രോ​ണിക്‌ കൂപ്പൺ അവർ നാലു​തവണ പൂരി​പ്പി​ച്ചെ​ങ്കി​ലും അത്‌  അയയ്‌ക്കാ​നുള്ള ബട്ടണിൽ വിരല​മർത്താൻ അവർക്കു ധൈര്യം​പോ​രാ​യി​രു​ന്നു.

ഒടുവിൽ 2007 മാർച്ചിൽ, അഞ്ചാമ​തും അവർ കൂപ്പൺ പൂരി​പ്പി​ച്ചു. ഇത്തവണ ധൈര്യം സംഭരിച്ച്‌ അവർ അത്‌ ക്ലിക്ക്‌ ചെയ്‌തു. ഡെനി​സി​ന്റെ ആ അഭ്യർഥന പ്രാ​ദേ​ശിക സഭയി​ലെത്തി; മൂപ്പന്മാർ വോണി എന്ന ഒരു സഹോ​ദ​രി​യെ ഡെനി​സി​ന്റെ അടുക്കൽ പറഞ്ഞയച്ചു. വോണി​സ​ഹോ​ദരി വന്ന ആഴ്‌ച​മു​തൽതന്നെ ഡെനിസ്‌ രാജ്യ​ഹാ​ളിൽ യോഗ​ങ്ങൾക്കു​പോ​യി​ത്തു​ടങ്ങി.

സെപ്‌റ്റം​ബർ അവസാ​ന​മാ​യ​പ്പോ​ഴേ​ക്കും ഡെനിസ്‌ തനിക്കു​ണ്ടാ​യി​രുന്ന മതപര​മായ സാമ​ഗ്രി​ക​ളെ​ല്ലാം നശിപ്പി​ച്ചു​ക​ള​യു​ക​യും മുമ്പത്തെ മതത്തിൽനി​ന്നു രാജി​വെ​ക്കു​ക​യും ചെയ്‌തു. താമസി​യാ​തെ അവർ സ്‌നാ​ന​മേ​റ്റി​ട്ടി​ല്ലാത്ത ഒരു പ്രസാ​ധി​ക​യാ​യി​ത്തീർന്നു. ഡെനി​സും രണ്ട്‌ ആൺമക്ക​ളും സത്വരം പുരോ​ഗ​മി​ച്ചു. എട്ടുവ​യ​സ്സു​കാ​ര​നായ മകൻ ദിവ്യാ​ധി​പത്യ ശുശ്രൂ​ഷാ​സ്‌കൂ​ളിൽ പേർ ചാർത്തി. 2008 ജനുവ​രി​യിൽ ഡെനിസ്‌ സ്‌നാ​ന​മേറ്റു. രണ്ടുമാ​സം​കൂ​ടി കഴിഞ്ഞ്‌ അതായത്‌, ആ കൂപ്പൺ പൂരി​പ്പിച്ച്‌ കൃത്യം ഒരു വർഷമാ​യ​പ്പോൾ അവർ ഒരു സഹായ​പ​യ​നി​യ​റാ​യി സേവി​ക്കാ​നുള്ള യോഗ്യ​ത​യി​ലെത്തി. “ഞാൻ ആ വെബ്‌​സൈറ്റ്‌ നോക്കി​യി​ല്ലാ​യി​രു​ന്നെ​ങ്കിൽ ഇപ്പോൾ ഈ അനുഭവം പറയാൻ എനിക്കു കഴിയു​മാ​യി​രു​ന്നില്ല,” ഡെനിസ്‌ പറയുന്നു.

2008 ജനുവ​രി​യിൽ പുതി​യൊ​രു സൗകര്യം​കൂ​ടി ലഭ്യമാക്കുകയുണ്ടായി. www.pr418.com എന്ന വെബ്‌​സൈറ്റ്‌. ചില പ്രസി​ദ്ധീ​ക​ര​ണ​ങ്ങ​ളു​ടെ 17 ഭാഷക​ളി​ലുള്ള ഓഡി​യോ പതിപ്പ്‌ ഇതിൽ നൽകി​യി​ട്ടുണ്ട്‌. ആവേശ​ജ​ന​ക​മാ​യി​രു​ന്നു ഇതി​നോ​ടുള്ള പ്രതി​ക​രണം! പത്തുല​ക്ഷ​ത്തി​ല​ധി​കം പ്രസി​ദ്ധീ​ക​ര​ണ​ങ്ങ​ളും ലേഖന​ങ്ങ​ളു​മാണ്‌ ഓരോ മാസവും ഇതിൽനി​ന്നു ഡൗൺലോ​ഡു ചെയ്യു​ന്നത്‌. പല പ്രസാ​ധ​ക​രും ജോലി​സ്ഥ​ല​ത്തേ​ക്കോ സ്‌കൂ​ളി​ലേ​ക്കോ ഉള്ള യാത്രാ​മ​ധ്യേ മാസി​കാ​ലേ​ഖ​ന​ങ്ങ​ളു​ടെ ഓഡി​യോ കേൾക്കാ​റുണ്ട്‌.

പരിഭാ​ഷകൾ—വലിയ സഹായം

ദൈവ​ത്തി​നു മഹത്ത്വം കൊടു​ക്കാൻ ‘സകലജാ​തി​യി​ലും ഗോ​ത്ര​ത്തി​ലും ഭാഷയി​ലും വംശത്തി​ലും പെട്ടവരെ’ നാം ആഹ്വാനം ചെയ്യു​മ്പോൾ നമുക്ക്‌ ദൂതന്മാ​രു​ടെ പിന്തു​ണ​യു​ണ്ടെ​ന്ന​റി​യു​ന്നത്‌ എത്ര രോമാ​ഞ്ച​ജ​ന​ക​മാണ്‌! (വെളി. 14:6, 7) ബൈബിൾ സന്ദേശം ആളുകൾക്ക്‌ നന്നായി മനസ്സി​ലാ​കുന്ന ഭാഷക​ളിൽ ലഭ്യമാ​ണെ​ങ്കിൽ അതി​നോട്‌ അവർ സത്വരം പ്രതി​ക​രി​ക്കും. ആ ലക്ഷ്യത്തി​ലാണ്‌ യഹോ​വ​യു​ടെ സാക്ഷികൾ 450-ഓളം ഭാഷക​ളിൽ സാഹി​ത്യ​ങ്ങൾ പുറത്തി​റ​ക്കു​ന്നത്‌.

ബൈബിൾ യഥാർഥ​ത്തിൽ എന്തു പഠിപ്പി​ക്കു​ന്നു? എന്ന പുസ്‌തകം അടുത്ത​കാ​ലത്ത്‌ ഈസ്റ്റ്‌ റ്റിമോ​റി​ലെ റ്റെറ്റം ഭാഷയിൽ  പ്രസി​ദ്ധീ​ക​രി​ക്കു​ക​യു​ണ്ടാ​യി; പക്ഷേ, ആവശ്യ​ത്തി​നു കോപ്പി​കൾ കിട്ടാ​നി​ല്ലാ​യി​രു​ന്നു. ഇൻഡൊ​നീ​ഷ്യൻ ഭാഷയി​ലുള്ള, ബൈബിൾ പഠിപ്പി​ക്കു​ന്നു പുസ്‌തകം ഉപയോ​ഗിച്ച്‌ ബൈബിൾ പഠിച്ചു​കൊ​ണ്ടി​രുന്ന മരിയ​യ്‌ക്ക്‌ റ്റെറ്റം ഭാഷയി​ലുള്ള പുസ്‌തകം കിട്ടി​യില്ല. അതു​കൊണ്ട്‌, തന്നെ ബൈബിൾ പഠിപ്പി​ക്കു​ന്ന​യാ​ളി​ന്റെ പുസ്‌തകം അവൾ രണ്ടുദി​വ​സ​ത്തേക്ക്‌ കടംവാ​ങ്ങി. പഠിച്ച​തെ​ല്ലാം അവൾ ഈ പുസ്‌ത​ക​ത്തിൽനിന്ന്‌ ഒന്നുകൂ​ടി വായി​ച്ചു​മ​ന​സ്സി​ലാ​ക്കി. ഇൻഡൊ​നീ​ഷ്യൻ പുസ്‌തകം ഉപയോ​ഗി​ച്ചു പഠിച്ച​തി​നെ​ക്കാൾ ഏറെ വ്യക്തമാ​യി തന്റെ മാതൃ​ഭാ​ഷ​യിൽ അവൾക്ക്‌ പല ബൈബിൾസ​ത്യ​ങ്ങ​ളും മനസ്സി​ലാ​ക്കാൻ കഴിഞ്ഞു എന്നതാ​യി​രു​ന്നു കാരണം. റ്റെറ്റം ഭാഷയി​ലുള്ള ഈ പുസ്‌തകം തന്റെ വിദ്യാർഥി​നി​യോ​ടു മടക്കി​ച്ചോ​ദി​ക്കാൻ അധ്യാ​പി​ക​യ്‌ക്കു മനസ്സു​വ​ന്നില്ല. മരിയ പഠനം തുടരു​ക​യും യോഗ​ങ്ങൾക്കു ഹാജരാ​കു​ക​യും ചെയ്യുന്നു.

കെനി​യ​യിൽ, ഗവണ്മെന്റു കാര്യാ​ദി​കൾക്കും ബിസി​നസ്‌ ഇടപാ​ടു​കൾക്കും സാധാരണ ഉപയോ​ഗി​ക്കു​ന്നത്‌ ഇംഗ്ലീ​ഷും സ്വാഹി​ലി​യും ആണ്‌. എന്നാൽ, ലക്ഷക്കണ​ക്കിന്‌ കെനി​യ​ക്കാർക്ക്‌ കിക്കുയു, കികാം​ബാ, ലൂവോ എന്നിവ​യും മറ്റുചില തദ്ദേശീയ ഭാഷക​ളു​മാണ്‌ ഏറെ വഴങ്ങു​ന്നത്‌. ഈ ഭാഷക​ളിൽ പ്രസി​ദ്ധീ​ക​ര​ണങ്ങൾ അച്ചടി​ച്ചത്‌ സത്യാ​രാ​ധ​ന​യിൽ ആളുക​ളു​ടെ താത്‌പ​ര്യം വർധി​ക്കാൻ ഇടയാക്കി. സിയായാ എന്ന സഭ, ലൂവോ ഭാഷയി​ലുള്ള സാഹി​ത്യ​ങ്ങൾ ഉപയോ​ഗി​ക്കാ​നും ആ ഭാഷയിൽ യോഗങ്ങൾ നടത്താ​നും തുടങ്ങി​യ​പ്പോൾ വന്ന മാറ്റ​ത്തെ​ക്കു​റിച്ച്‌ ഒരു മൂപ്പൻ പറയുന്നു: “പഠിപ്പി​ക്കുന്ന കാര്യങ്ങൾ സഹോ​ദ​ര​ങ്ങൾക്കി​പ്പോൾ ഏറെ നന്നായി മനസ്സി​ലാ​കു​ന്നുണ്ട്‌. കുട്ടി​ക​ളും നന്നായി ശ്രദ്ധി​ച്ചി​രി​ക്കും. ലൂവോ ഭാഷയി​ലുള്ള ബാഹ്യ​രേഖ ഉപയോ​ഗിച്ച്‌ പ്രസം​ഗങ്ങൾ നടത്താൻ തുടങ്ങി​യ​തിൽപ്പി​ന്നെ ഞങ്ങളുടെ യോഗ​ഹാ​ജർ 60 ശതമാനം വർധിച്ചു.”

നിക്കരാ​ഗ്വ​യിൽ സ്‌പാ​നി​ഷി​നു പുറമേ മിസ്‌കി​റ്റോ ഭാഷ സംസാ​രി​ക്കുന്ന അനേക​രുണ്ട്‌. മിസ്‌കി​റ്റോ ഡിസ്‌ട്രി​ക്‌റ്റ്‌ കൺ​വെൻ​ഷന്‌ 200-ലേറെ​പ്പേർ ഹാജരാ​യി. ചിലർ അതിനു​വേണ്ടി വലിയ ത്യാഗ​ങ്ങ​ളാണ്‌ ചെയ്‌തത്‌. കോക്കോ നദീതീ​ര​ത്തുള്ള ആസാങ്‌ എന്ന കൊച്ചു​ഗ്രാ​മ​ത്തി​ലെ 13 സഹോ​ദ​ര​ന്മാർ എന്താണു ചെയ്‌ത​തെ​ന്നോ? അവർ ഒരു ചങ്ങാട​മു​ണ്ടാ​ക്കി രണ്ടുദി​വസം നദിയി​ലൂ​ടെ യാത്ര​ചെ​യ്‌ത്‌ വാസ്‌പാം എന്ന പട്ടണത്തി​ലെത്തി. അവി​ടെ​നിന്ന്‌ ഒരു ട്രക്കിന്റെ പുറകിൽ കയറി അഞ്ചുമ​ണി​ക്കൂർ യാത്ര​ചെ​യ്‌ത്‌ കൺ​വെൻ​ഷൻ നഗരി​യി​ലെത്തി. ഇവരിൽ ഭൂരി​പ​ക്ഷ​വും ആദ്യമാ​യി​ട്ടാ​യി​രു​ന്നു ഒരു കൺ​വെൻ​ഷ​നിൽ സംബന്ധി​ക്കു​ന്നത്‌. സ്വന്തം ഭാഷയിൽ പരിപാ​ടി​കൾ കേട്ടത്‌ അവരെ അത്യന്തം സന്തോ​ഷി​പ്പി​ച്ചു. കൈവ​ശ​മു​ണ്ടാ​യി​രുന്ന പണം മുഴുവൻ കൺ​വെൻ​ഷൻസ്ഥ​ല​ത്തേ​ക്കുള്ള യാത്ര​യ്‌ക്കാ​യി ചെലവി​ട്ട​തി​നാൽ അവിടെ കൂടിവന്ന മറ്റു സഹോ​ദ​രങ്ങൾ അവരുടെ മടക്കയാ​ത്ര​യ്‌ക്കുള്ള പണം സമാഹ​രി​ച്ചു​കൊ​ടു​ത്തു.

 ആ കൺ​വെൻ​ഷ​നിൽവെച്ച്‌ ബൈബിൾ യഥാർഥ​ത്തിൽ എന്തു പഠിപ്പി​ക്കു​ന്നു? എന്ന പുസ്‌തകം മിസ്‌കി​റ്റോ ഭാഷയിൽ പ്രകാ​ശനം ചെയ്‌ത​പ്പോൾ സഹോ​ദ​രങ്ങൾ ആഹ്ലാദ​ഭ​രി​ത​രാ​യി. വിശേ​ഷി​ച്ചും പയനി​യർമാർ അതിന്‌ ഏറെ നന്ദിയു​ള്ള​വ​രാ​യി​രു​ന്നു. അതുവരെ അവർക്ക്‌ സ്‌പാ​നി​ഷി​ലുള്ള, ബൈബിൾ പഠിപ്പി​ക്കു​ന്നു പുസ്‌തകം ഉപയോ​ഗി​ച്ചു വേണമാ​യി​രു​ന്നു അധ്യയ​ന​മെ​ടു​ക്കാൻ. പഠിപ്പി​ക്കു​മ്പോൾ ഖണ്ഡിക​ക​ളും ചോദ്യ​വും അവർ മിസ്‌കി​റ്റോ​യി​ലേക്കു പരിഭാഷ ചെയ്യു​ക​യാ​യി​രു​ന്നു പതിവ്‌. ഇനിയി​പ്പോൾ അവർക്ക്‌ ബൈബിൾ സത്യങ്ങൾ ഫലകര​മാ​യി പഠിപ്പി​ക്കു​ന്ന​തിൽമാ​ത്രം ശ്രദ്ധി​ച്ചാൽമതി, പരിഭാ​ഷ​പ്പെ​ടു​ത്തു​ന്ന​തി​നെ​ക്കു​റി​ച്ചോർത്ത്‌ വിഷമി​ക്കേ​ണ്ട​തില്ല.

തെക്കേ അമേരി​ക്ക​യി​ലെ ഒരു അമേരി​ന്ത്യൻ ഭാഷയാണ്‌ ക്വെച്ചുവ. പെറു​വി​ലെ, ക്വെച്ചുവ സംസാ​രി​ക്കുന്ന ചില പ്രസാ​ധകർ എഴുതി: “വീടു​ക​ളിൽ, ഞങ്ങൾ സന്ദേശം ഉപസം​ഹ​രി​ക്കു​മ്പോൾ ക്വെച്ചുവ ഭാഷയി​ലുള്ള പ്രസി​ദ്ധീ​ക​ര​ണങ്ങൾ ഞങ്ങളുടെ കൈവ​ശ​മു​ണ്ടെന്ന്‌ വീട്ടു​കാ​ര​നോ​ടു പറയും. ചിലരു​ടെ സന്തോഷം പറഞ്ഞറി​യി​ക്കാൻ വയ്യാ. സന്തോ​ഷം​കൊണ്ട്‌ അവർ വിതു​മ്പു​ക​യും പ്രസി​ദ്ധീ​ക​ര​ണ​ത്തിൽ ചുംബി​ക്കു​ക​യു​മൊ​ക്കെ ചെയ്‌തി​ട്ടുണ്ട്‌.” പെറു​വി​ലെ ബ്രാഞ്ച്‌ ഓഫീസ്‌ എഴുതി: “ക്വെച്ചുവ സംസാ​രി​ക്കുന്ന സ്ഥലങ്ങളി​ലുള്ള ചില സഹോ​ദ​രങ്ങൾ തങ്ങളുടെ അകമഴിഞ്ഞ നന്ദി പ്രകടി​പ്പി​ക്കാൻ തങ്ങളാ​ലാ​വതു ചെയ്‌തി​ട്ടുണ്ട്‌.  ബൈബിൾ യഥാർഥ​ത്തിൽ എന്തു പഠിപ്പി​ക്കു​ന്നു? എന്ന പുസ്‌തകം വായി​ച്ച​ശേഷം ഒരു സഹോ​ദരൻ പറഞ്ഞത്‌, ക്രിസ്‌തു​വി​ന്റെ മറുവി​ല​യു​ടെ അർഥവും മൂല്യ​വും സഹോ​ദ​രന്‌ ഇപ്പോ​ഴാണ്‌ നല്ലവണ്ണം മനസ്സി​ലാ​യ​തെ​ന്നാണ്‌. പ്രസി​ദ്ധീ​ക​ര​ണങ്ങൾ വായി​ക്കു​ന്നവർ നന്ദി​പ്ര​ക​ട​ന​മെ​ന്നോ​ണം ബ്രാഞ്ച്‌ ഓഫീ​സി​ലേക്ക്‌ ഉരുള​ക്കി​ഴ​ങ്ങും പലഹാ​ര​വും പെട്ടി​ക്ക​ണ​ക്കിന്‌ പഴങ്ങളും മറ്റു സാധന​ങ്ങ​ളു​മൊ​ക്കെ കൊടു​ത്ത​യ​യ്‌ക്കാ​റുണ്ട്‌.”

വിദൂര പസിഫിക്‌ ദ്വീപു​ക​ളി​ലെ ഭാഷക​ളിൽ പ്രസി​ദ്ധീ​ക​ര​ണങ്ങൾ പരിഭാ​ഷ​ചെ​യ്യു​ന്ന​തിന്‌ സംഘടന ഇപ്പോൾ നല്ല ശ്രമം നടത്തി​വ​രു​ക​യാണ്‌. “ഞങ്ങളെ ഓർത്ത​തിന്‌ ഞാൻ യഹോ​വ​യ്‌ക്കു നന്ദി നൽകുന്നു” എന്ന്‌ പോൺപെ എന്ന മൈ​ക്രോ​നേ​ഷ്യൻ ദ്വീപി​ലെ ഒരു മിഷന​റി​യോട്‌ ഒരു സഹോ​ദരി പറയു​ക​യു​ണ്ടാ​യി. “ഇതിനു​മുമ്പ്‌ വീക്ഷാ​ഗോ​പു​രം ഇംഗ്ലീ​ഷിൽ ഇറങ്ങി​ക്ക​ഴിഞ്ഞ്‌ കുറച്ചു മാസങ്ങൾക്കു​ശേ​ഷ​മാണ്‌ പോണ​പേയൻ ഭാഷയിൽ ഞങ്ങൾക്കു കിട്ടി​ക്കൊ​ണ്ടി​രു​ന്നത്‌.” “മിക്കവാ​റും അർമ​ഗെ​ദോ​നും ഈ ഭാഗ​ത്തേക്ക്‌ താമസി​ച്ചേ വരുക​യു​ള്ളൂ എന്നാണ്‌ ഞങ്ങൾ വിചാ​രി​ച്ചത്‌” എന്ന്‌ തമാശ​യാ​യി പറഞ്ഞിട്ട്‌ സഹോ​ദരി തുടർന്നു: “ഇപ്പോൾ ലോക​ത്തി​ന്റെ ഇതരഭാ​ഗ​ങ്ങ​ളിൽ ഈ മാസിക പഠിക്കുന്ന അതേസ​മ​യത്ത്‌ ഞങ്ങൾക്കും പഠിക്കാ​നാ​കു​ന്നു. ഇംഗ്ലീഷ്‌ മാസി​ക​പോ​ലെ​തന്നെ മനോ​ഹ​ര​മാണ്‌ ഇതും. ഞങ്ങൾക്കു​വേണ്ടി കരുതൽ കാണി​ക്കുന്ന ഭരണസം​ഘ​ത്തോട്‌ ഞങ്ങൾക്ക്‌ അകമഴിഞ്ഞ നന്ദിയുണ്ട്‌.”

ഉത്തരപ​സി​ഫി​ക്കി​ലുള്ള മാർഷൽ ദ്വീപു​ക​ളി​ലെ സഹോ​ദ​രീ​സ​ഹോ​ദ​ര​ന്മാർ വീക്ഷാ​ഗോ​പു​രം മാസി​ക​യു​ടെ പൊതു​ജന പതിപ്പ്‌ മാർഷ​ലീ​സിൽ ലഭിച്ച​പ്പോൾ സന്തോ​ഷ​ഭ​രി​ത​രാ​യി. ഈ സഹോ​ദ​ര​ങ്ങൾക്ക്‌ ജീവിത കഥകൾ വായി​ക്കാൻ വലിയ ഇഷ്ടമാണ്‌; പക്ഷേ, അവർക്കു കിട്ടി​ക്കൊ​ണ്ടി​രുന്ന വീക്ഷാ​ഗോ​പു​ര​ത്തിൽ ജീവിത കഥകൾ ഉൾപ്പെ​ടു​ത്താ​നുള്ള സ്ഥലമി​ല്ലാ​യി​രു​ന്നു. അതു​കൊണ്ട്‌ ഇംഗ്ലീഷ്‌ മാസി​ക​യിൽ വരുന്ന ജീവിത കഥകൾ ആരെങ്കി​ലു​മൊ​ക്കെ ഇവർക്കു പരിഭാ​ഷ​പ്പെ​ടു​ത്തി​ക്കൊ​ടു​ക്ക​ണ​മാ​യി​രു​ന്നു. എന്നാലി​പ്പോൾ തങ്ങളു​ടെ​തന്നെ ഭാഷയി​ലുള്ള പൊതു​ജന പതിപ്പിൽ ആദ്യമാ​യി ജീവിത കഥ പ്രസി​ദ്ധീ​ക​രി​ച്ചതു കണ്ട്‌ അവർക്ക്‌ സന്തോഷം അടക്കാ​നാ​യില്ല! ഒരു പതിനാ​റു​വ​യ​സ്സു​കാ​രൻ പറഞ്ഞു: “വർഷങ്ങ​ളോ​ളം, ഇംഗ്ലീഷ്‌ മാസി​ക​യി​ലെ ജീവിത കഥകൾ മറിച്ചു​നോ​ക്കി ചിത്രങ്ങൾ കണ്ട്‌ തൃപ്‌തി​പ്പെ​ടേ​ണ്ടി​വന്നു എനിക്ക്‌. ലേഖന​മൊ​ന്നു വായി​ക്കാൻ കഴിഞ്ഞി​രു​ന്നെ​ങ്കി​ലെന്ന്‌ ഞാൻ എത്രമാ​ത്രം ആഗ്രഹി​ച്ചി​രു​ന്നു​വെ​ന്നോ. ഇനി എനിക്ക്‌ അതിനു കഴിയു​മ​ല്ലോ.”

ഇനി, ഒരു ഭാഷയിൽ ഒരേ​യൊ​രു പ്രസി​ദ്ധീ​ക​രണം മാത്രമേ ലഭ്യമാ​യി​ട്ടു​ള്ളൂ​വെ​ങ്കിൽപ്പോ​ലും അതിന്‌ ആളുക​ളു​ടെ ജീവി​ത​ത്തിൽ സമൂല​പ​രി​വർത്തനം വരുത്താ​നാ​കു​മെ​ന്നാണ്‌ അനുഭ​വങ്ങൾ കാണി​ക്കു​ന്നത്‌. നമ്മുടെ വേലയ്‌ക്ക്‌ നിയ​ന്ത്രണം ഉള്ള ഒരു മധ്യേ​ഷ്യൻ ദേശത്ത്‌ ദൈവം നമ്മിൽനിന്ന്‌ എന്ത്‌ ആവശ്യ​പ്പെ​ടു​ന്നു? എന്ന ലഘുപ​ത്രിക വ്യാപ​ക​മാ​യി  വിതരണം ചെയ്യു​ക​യു​ണ്ടാ​യി. അതു കിട്ടിയ ഒരു ചെറു​പ്പ​ക്കാ​രൻ അതു മുഴു​വ​നും വായിച്ചു. അറിഞ്ഞ കാര്യ​ങ്ങ​ളിൽ വളരെ മതിപ്പു​തോ​ന്നിയ അദ്ദേഹം അടുത്തുള്ള ഒരു നദിയിൽപ്പോ​യി തനിയെ “സ്‌നാ​ന​മേറ്റു.” എന്നാൽ ഒരു ബൈബി​ള​ധ്യ​യനം ആവശ്യ​മാ​ണെന്ന്‌ മനസ്സി​ലാ​ക്കി​യ​പ്പോൾ അദ്ദേഹം അത്‌ മനസ്സോ​ടെ സ്വീക​രി​ച്ചു; പെട്ടെ​ന്നു​തന്നെ ശരിയായ വിധത്തിൽ സ്‌നാ​ന​മേൽക്കു​ക​യും ചെയ്‌തു. ഇപ്പോൾ തനിക്കുള്ള സമയത്തി​ന്റെ ഏറിയ​പ​ങ്കും സുവാർത്ത മറ്റുള്ള​വ​രോട്‌ അറിയി​ക്കു​ന്ന​തി​നു​വേണ്ടി അദ്ദേഹം ചെലവി​ടു​ന്നു.

ബൈബിൾ പരിഭാ​ഷ​യി​ലെ പുരോ​ഗ​തി

ദൈവ​വ​ച​ന​മായ ബൈബി​ളി​നെ അമൂല്യ​മാ​യി കണക്കാ​ക്കു​ന്ന​വ​രാണ്‌ യഹോ​വ​യു​ടെ സാക്ഷികൾ. കൃത്യ​ത​യും വ്യക്തത​യു​മുള്ള ഒരു പരിഭാഷ അവർ അങ്ങേയറ്റം വിലമ​തി​ക്കു​ന്നു. അങ്ങനെ​യൊ​രു ബൈബി​ളാണ്‌ പുതിയ ലോക ഭാഷാ​ന്തരം. പൂർണ​മാ​യോ ഭാഗി​ക​മാ​യോ 70-ലധികം ഭാഷക​ളിൽ അതു ലഭ്യമാണ്‌. ഓരോ ഭാഷയി​ലും അതിന്റെ ആദ്യ​പ്ര​കാ​ശനം ആവേശ​ജ​ന​ക​മായ ഒരു അനുഭ​വ​മാണ്‌. എന്നാൽ അനുദി​ന​മുള്ള വ്യക്തി​പ​ര​മായ പഠനത്തി​ലും സഭാ​യോ​ഗ​ങ്ങ​ളി​ലും വയൽസേ​വ​ന​ത്തി​ലും ഉപയോ​ഗി​ക്കു​മ്പോ​ഴാണ്‌ അതു വാസ്‌ത​വ​ത്തിൽ ആളുക​ളു​ടെ ഹൃദയ​ങ്ങളെ പ്രചോ​ദി​പ്പി​ക്കു​ക​യും ചിന്തയെ രൂപ​പ്പെ​ടു​ത്തു​ക​യും ചെയ്യു​ന്നത്‌.

റഷ്യൻഭാ​ഷ​യിൽ പുതിയ ലോക ഭാഷാ​ന്ത​ര​ത്തി​ന്റെ സമ്പൂർണ​പ​തിപ്പ്‌ ലഭിക്കു​ക​യു​ണ്ടാ​യി. അതോടെ റഷ്യയി​ലെ ബ്രാഞ്ച്‌ ഓഫീ​സി​ലേക്ക്‌ നന്ദിയ​റി​യി​ച്ചു​കൊ​ണ്ടുള്ള കത്തുക​ളു​ടെ പ്രവാ​ഹ​മാണ്‌. “ഞാൻ പലതവണ ബൈബിൾ വായി​ച്ചി​ട്ടു​ണ്ടെ​ങ്കി​ലും ഈ പരിഭാഷ വായി​ച്ച​പ്പോൾ ബൈബിൾ ആദ്യമാ​യി വായി​ക്കു​ന്ന​തു​പോ​ലെ തോന്നി എനിക്ക്‌! ബൈബിൾ സന്ദേശം എന്റെ ഹൃദയത്തെ സ്‌പർശി​ച്ച​പ്പോൾ എന്റെ കണ്ണു നിറഞ്ഞു; ഞാൻ കോരി​ത്ത​രി​ച്ചു​പോ​യി” എന്ന്‌ ഒരു സ്‌ത്രീ എഴുതി.

 പരിഭാ​ഷ​യു​ടെ വ്യക്തത​യിൽ മതിപ്പു​തോ​ന്നിയ മറ്റൊരു വായന​ക്കാ​രി പറയുന്നു: “ഇന്നു ഞാൻ ഉല്‌പത്തി 18-ാം അധ്യായം വായിച്ചു. അതാണ്‌ ഈ കത്തെഴു​താൻ എന്നെ പ്രേരി​പ്പി​ച്ചത്‌. 23-32 വാക്യ​ങ്ങ​ളി​ലെ, അബ്രാ​ഹാ​മും യഹോ​വ​യു​മാ​യുള്ള ആ സംഭാ​ഷണം എന്നെ കോരി​ത്ത​രി​പ്പി​ച്ചു. ഞാൻ ബൈബിൾ വായി​ക്കു​ന്നത്‌ ഇത്‌ അഞ്ചാം​ത​വ​ണ​യാണ്‌. സത്യത്തിൽ, ഇപ്പോ​ഴാണ്‌ ഞാൻ ഈ സംഭാ​ഷ​ണ​ത്തെ​ക്കു​റിച്ച്‌ ശരിക്കും ചിന്തി​ച്ചത്‌. അബ്രാ​ഹാ​മി​നോട്‌ എനിക്ക്‌ അലിവു​തോ​ന്നി. രണ്ടു​പേ​രു​ടെ​യും സംസാരം ഞാൻ നന്നായി “ശ്രദ്ധിച്ചു”. യഹോവ ശ്രദ്ധി​ച്ചു​കേ​ട്ട​വി​ധം എന്റെ കണ്ണു നനയിച്ചു. സംഭവ​ങ്ങൾക്ക്‌ ജീവൻപ​ക​രുന്ന ഒരു പരിഭാ​ഷ​യാ​ണിത്‌. ഇവിടെ ഞാൻ യഹോ​വ​യു​ടെ ഗുണങ്ങൾ ദർശി​ക്കുക മാത്രമല്ല, അനുഭ​വി​ച്ച​റി​യു​ക​യും ചെയ്‌തു.”

മോസ്‌കോ​യിൽനിന്ന്‌ അലീഷ്യ എഴുതി: “പുതിയ ലോക ഭാഷാ​ന്തരം സമ്പൂർണ ബൈബി​ളിന്‌ നന്ദി! യുഗപ്പ​ഴ​ക്ക​മുള്ള ശൈലി​യിൽ എഴുത​പ്പെട്ട ‘പഴയ നിയമം’ വായി​ക്കു​മ്പോൾ മനസ്സി​ലാ​കാ​റേ​യി​ല്ലാ​യി​രു​ന്നു. പോരാ​ത്ത​തിന്‌ ആശയക്കു​ഴ​പ്പ​വും. അതെല്ലാം മാറി​ക്കി​ട്ടി! ഇത്‌ എത്ര ലളിത​മായ പരിഭാ​ഷ​യാണ്‌!”

മറ്റൊരു വായന​ക്കാ​രി പറയുന്നു: “ഇറീന എന്ന ജോലി​ക്കാ​രി​യോട്‌ ഒരിക്കൽ ഞാൻ ജോലി​സ്ഥ​ല​ത്തു​വെച്ച്‌ സത്യ​ത്തെ​ക്കു​റി​ച്ചു സംസാ​രി​ക്കു​ക​യാ​യി​രു​ന്നു. ആദ്യ​മൊ​ക്കെ ഞാൻ തിരു​വെ​ഴു​ത്തു​കൾ വെറുതെ ഉദ്ധരി​ച്ച​തേ​യു​ള്ളൂ. എന്നാൽ യേശു​വി​ന്റെ മാതൃ​കാ​പ്രാർഥന ബൈബി​ളിൽനി​ന്നു കാണി​ച്ചു​കൊ​ടു​ത്ത​പ്പോൾ ‘സ്വർഗ​സ്ഥ​നായ പിതാവേ എന്നുള്ള പ്രാർഥ​ന​യാ​ണോ ഇത്‌?’ എന്ന്‌ ആ സ്‌ത്രീ ചോദി​ച്ചു. യേശു​വി​ന്റെ വാക്കുകൾ വായിച്ച അവർ ആവേശ​ഭ​രി​ത​യാ​യി: ‘എത്ര മനോ​ഹ​ര​മാ​ണിത്‌! എത്ര വ്യക്തമാ​ണിത്‌! ഞാൻ മിക്ക​പ്പോ​ഴും ഈ പ്രാർഥന കേട്ടി​ട്ടു​ണ്ടെ​ങ്കി​ലും അർഥം മനസ്സി​ലാ​യി​ട്ടി​ല്ലാ​യി​രു​ന്നു. ഈ ബൈബി​ളിൽ ഇതെത്ര വ്യക്തവും ലളിത​വു​മാണ്‌. ഇങ്ങനെ​യൊ​രു ബൈബി​ളാണ്‌ എനിക്കു​വേ​ണ്ടത്‌. എനി​ക്കൊ​രെണ്ണം കൊണ്ടു​വന്നു തരുമോ? മറക്കരു​തേ!’ അപ്പോൾ ഞാൻ പറഞ്ഞു: ‘വായി​ക്കാൻ നല്ല താത്‌പ​ര്യ​മു​ള്ള​വർക്കേ ഞങ്ങൾ ബൈബിൾ കൊടു​ക്കാ​റു​ള്ളൂ.’ അതു​കേ​ട്ട​പ്പോൾ ആ സ്‌ത്രീ പറഞ്ഞു: ‘മുമ്പെ​ങ്ങും ബൈബിൾ വായി​ക്ക​ണ​മെന്ന്‌ ഒരാ​ഗ്രഹം തോന്നി​യി​ട്ടേ​യില്ല. എന്റെ കൈവശം പല ബൈബി​ളു​കൾ ഉണ്ടായി​രു​ന്ന​താണ്‌. അതെല്ലാം ഞാൻ ഓരോ​രു​ത്തർക്കു കൊടു​ത്തു; പക്ഷേ, ഇപ്പോൾ എനിക്ക്‌ ബൈബിൾ വായി​ക്ക​ണ​മെന്ന്‌ ശരിക്കും തോന്നു​ന്നുണ്ട്‌.’”

പുതിയ ലോക ഭാഷാ​ന്തരം—ക്രിസ്‌തീയ ഗ്രീക്ക്‌ തിരു​വെ​ഴു​ത്തു​കൾ യൂ​ക്രേ​നി​യൻ ഭാഷയിൽ ലഭ്യമാ​യി. അതേക്കു​റിച്ച്‌ ഒരു സഹോ​ദരൻ എഴുതി: “യഹോ​വ​യിൽനി​ന്നും സംഘട​ന​യിൽനി​ന്നും ലഭിച്ച ഈ സ്‌നേ​ഹോ​പ​ഹാ​ര​ത്തിന്‌ ഒരുപാട്‌ നന്ദി! ഓരോ പേജും ഞാൻ ആസ്വദി​ക്കു​ക​യാണ്‌. ഞാൻ പോകു​ന്നി​ട​ത്തൊ​ക്കെ ഇതും കൊണ്ടു​പോ​കും. ഇതിന്റെ ഭാഷ ലളിത​വും നന്നായി മനസ്സി​ലാ​കു​ന്ന​തു​മാണ്‌. വാക്കുകൾ ഹൃദയ​ത്തി​ലേക്ക്‌  ആഴ്‌ന്നി​റ​ങ്ങു​ന്നു. ബൈബി​ളു​പ​ദേ​ശങ്ങൾ നന്നായി ഗ്രഹി​ക്കാൻ ഈ പരിഭാഷ സഹായി​ക്കു​ന്നു.”

സെർബി​യൻ, ക്രൊ​യേ​ഷ്യൻ എന്നീ ഭാഷക​ളി​ലും ഈ പരിഭാ​ഷ​യ്‌ക്ക്‌ നല്ല സ്വീക​രണം ലഭിച്ചു. “വായി​ക്കാൻ എളുപ്പ​മാ​ണിത്‌. വർഷങ്ങ​ളാ​യി ഞങ്ങൾ ഉപയോ​ഗി​ച്ചു​വന്ന ബൈബി​ളി​നെ അപേക്ഷി​ച്ചു​നോ​ക്കു​മ്പോൾ ഇത്‌ എത്ര നന്നായി മനസ്സി​ലാ​കു​ന്നു! തിരു​വെ​ഴുത്ത്‌ ബുദ്ധി​യു​പ​ദേ​ശങ്ങൾ എത്ര​യെ​ളു​പ്പ​ത്തി​ലാണ്‌ ഹൃദയ​ത്തി​ലേക്ക്‌ ആഴ്‌ന്നി​റ​ങ്ങു​ന്നത്‌. മുമ്പെ​ന്ന​ത്തെ​ക്കാ​ളു​മ​ധി​കം ഞാൻ യഹോ​വയെ അടുത്ത​റി​യു​ക​യാ​ണെന്നു തോന്നു​ന്നു,” ക്രൊ​യേ​ഷ്യ​ക്കാ​രി​യായ ഒരു സഹോ​ദരി എഴുതി.

2007 നവംബർ 2-ന്‌ ഭരണസം​ഘാം​ഗ​മായ ജഫ്രി ജാക്‌സൺ സമോവൻ ഭാഷയിൽ പുതിയ ലോക ഭാഷാ​ന്തരം—ക്രിസ്‌തീയ ഗ്രീക്ക്‌ തിരു​വെ​ഴു​ത്തു​കൾ പ്രകാ​ശനം ചെയ്‌തു. പരമ്പരാ​ഗ​ത​മാ​യി ഉപയോ​ഗി​ച്ചു​വ​ന്നി​രുന്ന സമോവൻ ബൈബി​ളി​ന്റെ കോപ്പി​കൾ കിട്ടാ​നി​ല്ലാ​യി​രു​ന്നു. ഉണ്ടെങ്കിൽത്തന്നെ നല്ല വിലയും. അതു​കൊണ്ട്‌ ഈ ബൈബിൾ ലഭിച്ച​തിൽ സഹോ​ദ​രങ്ങൾ അത്യധി​കം സന്തോ​ഷി​ച്ചു. ഇത്‌ ഏതാനും മാസം ഉപയോ​ഗി​ച്ച​ശേഷം ഒരു പ്രസാ​ധകൻ ഇങ്ങനെ പറഞ്ഞു: “ഞങ്ങൾ ഉപയോ​ഗി​ച്ചു​വന്ന ബൈബിൾ, ആശയങ്ങൾ മുക്കി​ക്ക​ള​യു​ന്ന​താ​യി​രു​ന്നു. എന്നാൽ ഈ ബൈബിൾ മറഞ്ഞു​കി​ട​ക്കുന്ന വിവരങ്ങൾ പുറത്തു​കൊ​ണ്ടു​വ​രു​ക​യും കൂടുതൽ വ്യക്തമാ​ക്കു​ക​യും ചെയ്യുന്നു.”

വേറൊ​രു സഹോ​ദരി, അധ്യയനം എടുത്തു​കൊ​ണ്ടി​രു​ന്ന​പ്പോ​ഴത്തെ ഒരു സാഹച​ര്യം വിവരി​ക്കു​ന്നു; പ്രസി​ദ്ധീ​ക​ര​ണ​ത്തിൽ യാക്കോബ്‌ 4:8 പരാമർശി​ച്ചി​ട്ടു​ണ്ടാ​യി​രു​ന്നു. “നമുക്ക്‌ ഈ വാക്യം സുപരി​ചി​ത​മാ​ണെ​ങ്കി​ലും പുതിയ ലോക ഭാഷാ​ന്ത​ര​ത്തിൽനിന്ന്‌ ഒന്നു വായി​ക്കാ​മെന്ന്‌ ഞാൻ വീട്ടു​കാ​ര​നോ​ടു പറഞ്ഞു. ആദ്യം വായി​ച്ച​പ്പോൾ വാക്യം തെറ്റി​പ്പോ​യോ എന്നു ഞങ്ങൾ സംശയി​ച്ചു; ഒന്നുകൂ​ടി പരി​ശോ​ധി​ച്ച​പ്പോൾ വാക്യം അതുത​ന്നെ​യാ​ണെന്നു മനസ്സി​ലാ​യി. അപ്പോൾ എന്റെ കൂടെവന്ന സഹോ​ദരി ഒരു ഞെട്ട​ലോ​ടെ പറഞ്ഞു: ‘വാക്യം മാറ്റി​യി​ട്ടുണ്ട്‌.’ ‘ദൈവ​ത്തോട്‌ അടുത്തു​ചെ​ല്ലുക’ എന്നതിന്റെ അർഥം യഹോ​വ​യു​മാ​യി ഒരു ഉറ്റബന്ധ​ത്തി​ലേക്കു വരുക എന്നാ​ണെന്ന്‌ ഞങ്ങൾക്ക്‌ വ്യക്തമാ​യി മനസ്സി​ലാ​ക്കാ​നാ​യി. ഈ ആശയം ഞങ്ങൾ ഉപയോ​ഗി​ച്ചു​വന്ന ബൈബി​ളിൽ ഇല്ലായി​രു​ന്നു. ഈ ആശയം ഞങ്ങളുടെ ഹൃദയത്തെ സ്‌പർശി​ച്ചു. യഹോ​വ​യു​മാ​യുള്ള ഒരു ഉറ്റബന്ധം വളർത്തി​യെ​ടു​ക്കാൻ അതു ഞങ്ങൾക്ക്‌ പ്രചോ​ദ​ന​മാ​യി,” അധ്യയനം നടത്തിയ സഹോ​ദരി പറയുന്നു.

ചൈനീ​സി​ലു​ള്ള പുതിയ ലോക ഭാഷാ​ന്തരം പുറത്തി​റങ്ങി കുറച്ചു​നാൾ കഴിഞ്ഞ്‌ തായ്‌വാ​നിൽ സേവി​ക്കുന്ന മിഷന​റി​മാർ ഇപ്രകാ​രം എഴുതി: “നമ്മുടെ മാസി​കകൾ പതിവാ​യി വായി​ക്കുന്ന ഒരു വക്കീലിന്‌ ഞങ്ങൾ പുതിയ ലോക ഭാഷാ​ന്തരം കൊടു​ത്തു. ഒരു പുതിയ പരിഭാ​ഷ​യു​ടെ ആവശ്യ​മെ​ന്താ​ണെന്ന്‌ അറിയാൻ അദ്ദേഹ​ത്തിന്‌  ആഗ്രഹ​മു​ണ്ടാ​യി​രു​ന്നു. ഞങ്ങൾ ഏതാനും വാക്യങ്ങൾ ഈ പരിഭാ​ഷ​യിൽനി​ന്നു കാണി​ച്ചു​കൊ​ടു​ത്ത​പ്പോൾത്തന്നെ അദ്ദേഹ​ത്തിന്‌ ഏറെ മതിപ്പാ​യി. താൻ വായി​ക്കുന്ന യൂണിയൻ വേർഷൻ ബൈബി​ളി​നെ അപേക്ഷിച്ച്‌ ഇത്‌ മനസ്സി​ലാ​ക്കാൻ വളരെ എളുപ്പ​മാ​ണെ​ന്നും അദ്ദേഹം പറഞ്ഞു.” അവർ ഈ ബൈബിൾ ഒരു പാർല​മെന്റ്‌ അംഗത്തി​നും കൊടു​ക്കു​ക​യു​ണ്ടാ​യി. ആ സ്‌ത്രീ അത്‌ ഓഫീ​സിൽ വെച്ചി​രു​ന്നു. എന്നാൽ യഹോ​വ​യു​ടെ സാക്ഷി​കളെ വിമർശി​ച്ചി​രുന്ന ഒരു റേഡി​യോ അവതാ​രകൻ അവരുടെ ഓഫീ​സിൽ ആ ബൈബിൾ കണ്ടപ്പോൾ അതെടുത്ത്‌ ഒരു ഭാഗം വായി​ച്ചു​നോ​ക്കി. അദ്ദേഹ​ത്തിന്‌ അതു വളരെ ഇഷ്ടമായി. ഉടൻതന്നെ അദ്ദേഹം മിഷന​റി​മാ​രെ വിളിച്ച്‌ തനിക്കും ഒരു കോപ്പി തരണ​മെന്ന്‌ ആവശ്യ​പ്പെട്ടു.

മതിയായ കാഴ്‌ച​ശ​ക്തി​യി​ല്ലാ​ത്ത​തി​നാൽ കിർഗി​സ്ഥാ​നി​ലുള്ള ഒരു സഹോ​ദരി, ബൈബിൾവാ​യ​നയെ വളരെ ശ്രമക​ര​മായ ഒരു ജോലി​പോ​ലെ​യാണ്‌ കണ്ടിരു​ന്നത്‌. എന്നാൽ പുതിയ ലോക ഭാഷാ​ന്തരം—ക്രിസ്‌തീയ ഗ്രീക്ക്‌ തിരു​വെ​ഴു​ത്തു​കൾ കിർഗിസ്‌ ഭാഷയിൽ ലഭ്യമാ​യ​തോ​ടെ സഹോ​ദ​രി​യു​ടെ ആ വീക്ഷണം അപ്പാടെ മാറി. സുഗ്രാ​ഹ്യ​വും വ്യക്തവു​മായ ഈ ബൈബിൾ വായി​ക്കു​ന്നത്‌ സഹോ​ദ​രി​ക്കി​പ്പോൾ വളരെ​യേറെ സംതൃ​പ്‌തി നൽകുന്നു.

“അത്യു​ദാ​ത്ത​മായ ഒരു പരിഭാഷ!” മറ്റൊരു സഹോരി ഇതിനെ വിശേ​ഷി​പ്പി​ച്ചത്‌ അങ്ങനെ​യാണ്‌. “തെറ്റു​കൂ​ടാ​തെ ഉച്ചത്തിൽ വായി​ക്കാ​നാ​കു​ന്നു. വീണ്ടും​വീ​ണ്ടും വായി​ക്കാൻ തോന്നും. ഒരിക്കൽക്കൂ​ടെ സത്യം പഠിക്കു​ന്ന​തു​പോ​ലെ തോന്നു​ന്നു,” സഹോ​ദരി തുടർന്നു.

കേൾവി​ത്ത​ക​രാ​റുള്ള ഒരു സഹോ​ദരി ഭരണസം​ഘ​ത്തിന്‌ എഴുതി: “അമേരി​ക്കൻ ആംഗ്യ​ഭാ​ഷ​യി​ലുള്ള (ASL) മത്തായി​യു​ടെ സുവി​ശേ​ഷ​ത്തെ​ക്കു​റി​ച്ചു പറയാൻ എനിക്കു വാക്കു​ക​ളില്ല. ബൈബിൾ ഇപ്പോൾ ജീവസ്സു​റ്റ​താ​യി​രി​ക്കു​ന്നു. അത്‌ എന്റെ ഹൃദയത്തെ സ്‌പർശി​ക്കു​ന്നത്‌ എനിക്ക​റി​യാം. യേശു​വി​ന്റെ വ്യക്തി​ത്വം, മുഖഭാ​വം, കനിവ്‌, ആളുക​ളോ​ടുള്ള അഗാധ സ്‌നേഹം ഇതൊക്കെ എനിക്കി​പ്പോൾ എത്ര വ്യക്തമാ​യി കാണാ​നാ​കു​ന്നു​വെ​ന്നോ! മത്തായി​യു​ടെ സുവി​ശേഷം എനിക്കു ജീവനാണ്‌. എന്നാൽ . . . ആംഗ്യ​ഭാ​ഷ​യി​ലുള്ള മറ്റു ബൈബിൾപു​സ്‌ത​ക​ങ്ങൾകൂ​ടെ വേഗം ലഭ്യമാ​ക്കാ​മോ?”

അതെ, നന്നായി വിവർത്തനം ചെയ്‌തി​രി​ക്കുന്ന ഒരു ബൈബി​ളിന്‌ ദൈവ​വ​ച​ന​ത്തി​ന്റെ അർഥം മറനീക്കി പുറത്തു​കൊ​ണ്ടു​വ​രാ​നാ​കും. സത്യവ​ച​ന​ത്തി​ന്റെ പ്രകാശം വായന​ക്കാ​രന്റെ ഹൃദയ​ത്തി​ലേക്ക്‌ ചുഴി​ഞ്ഞി​റ​ങ്ങു​ന്ന​തിന്‌ അതിട​യാ​ക്കും. അതു​കൊ​ണ്ടാണ്‌, പുതിയ ലോക ഭാഷാ​ന്തരം തങ്ങളുടെ മാതൃ​ഭാ​ഷ​യിൽ, ഹൃദയത്തെ തൊട്ടു​ണർത്തുന്ന ഭാഷയിൽ, ലഭ്യമാ​കു​മ്പോൾ സ്വർഗീയ പിതാ​വി​നോട്‌ അടുത്തു​ചെ​ല്ലാൻ ആഗ്രഹി​ക്കു​ന്നവർ അതിയാ​യി സന്തോ​ഷി​ക്കു​ന്നത്‌.

 കൊയ്‌ത്തി​നാ​യി ഏറെ വേലക്കാ​രെ അയയ്‌ക്കു​ന്നു

ബ്രാഞ്ച്‌ പ്രവർത്ത​നങ്ങൾ ലളിത​മാ​ക്കു​ന്ന​തി​ന്റെ ഭാഗമാ​യി ഐക്യ​നാ​ടു​ക​ളി​ലെ ചില ബെഥേൽ കുടും​ബാം​ഗ​ങ്ങൾക്ക്‌ മറ്റു ചില നിയമ​നങ്ങൾ നൽകു​ക​യു​ണ്ടാ​യി. ചിലരെ മറ്റു ബ്രാഞ്ചു​ക​ളി​ലേക്ക്‌ അയച്ചു. നൂറു​ക​ണ​ക്കി​നു പേരെ രാജ്യ​മെ​മ്പാ​ടും പ്രത്യേക-സാധാരണ പയനി​യർമാ​രാ​യി നിയമി​ച്ചു. അവരെ തിരിച്ച്‌ വയലി​ലേക്കു വിട്ട​പ്പോൾ അവർക്കെന്തു തോന്നി? പുതിയ നിയമ​ന​ത്തി​ന്റെ വെല്ലു​വി​ളി​ക​ളു​മാ​യി അവർ പൊരു​ത്ത​പ്പെ​ട്ടത്‌ എങ്ങനെ​യാണ്‌? സഭകൾ ഈ ക്രമീ​ക​ര​ണ​ത്തിൽനി​ന്നു പ്രയോ​ജനം നേടി​യത്‌ എങ്ങനെ​യാണ്‌?

റ്റോഡും ലെസ്‌ലി​യും പറയു​ന്നത്‌ ഇതാണ്‌: “‘വയലി​ലേക്ക്‌ വേലക്കാ​രെ അയയ്‌ക്ക​ണ​മേ​യെന്ന്‌ കൊയ്‌ത്തി​ന്റെ യജമാ​ന​നോട്‌’ വർഷങ്ങ​ളാ​യി ഞങ്ങൾ പ്രാർഥി​ക്കു​ക​യാ​യി​രു​ന്നു; പക്ഷേ, ആ പ്രാർഥ​ന​യ്‌ക്കുള്ള ഉത്തരമാ​യി യഹോവ ഞങ്ങളെ​ത്തന്നെ ഉപയോ​ഗി​ക്കു​മെന്ന്‌ സ്വപ്‌നേപി കരുതി​യില്ല. യഹോ​വ​യാണ്‌ കാര്യങ്ങൾ നയിക്കു​ന്ന​തെന്ന്‌ ഞങ്ങൾക്കി​പ്പോൾ കാണാ​നാ​കു​ന്നു. ക്രിസ്‌തു ഞങ്ങളെ ‘വിശ്വ​സ്‌തർ എന്ന്‌ എണ്ണി ശുശ്രൂ​ഷെക്കു ആക്കിയ​തു​കൊ​ണ്ടു’ ഞങ്ങളുടെ നിയമ​നത്തെ ഒരു പദവി​യാ​യി​ട്ടാണ്‌ ഞങ്ങൾ കരുതു​ന്നത്‌.—മത്താ. 9:37, 38; 1 തിമൊ. 1:12.

പുതിയ നിയമ​ന​ത്തി​ലെ ആദ്യമാ​സ​ങ്ങ​ളെ​ക്കു​റിച്ച്‌ ഫ്രാങ്കോ പറയുന്നു: “ഐക്യ​നാ​ടു​ക​ളിൽ ഇത്ര​യേറെ ആവശ്യ​മു​ണ്ടെന്ന്‌ ഞാനും ഭാര്യ​യും വിചാ​രി​ച്ച​തേ​യില്ല. നിയമ​ന​സ്ഥ​ലത്ത്‌ പ്രവർത്തനം തുടങ്ങി​യ​പ്പോ​ഴാണ്‌ അറിയു​ന്നത്‌ ബൈബി​ള​ധ്യ​യനം ആഗ്രഹി​ക്കുന്ന ഇത്രമാ​ത്രം ആളുക​ളു​ണ്ടെന്ന്‌!” കർറ്റി​സി​ന്റെ​യും കരോ​ളി​ന്റെ​യും വാക്കു​ക​ളിൽ നിഴലി​ക്കു​ന്നത്‌ മറ്റനേകം പയനി​യർമാ​രു​ടെ​യും വികാ​ര​ങ്ങ​ളാണ്‌: “നിയമന സ്ഥലത്തേക്കു പോകാൻ ഞങ്ങൾക്കെന്ത്‌ ആവേശ​മാ​യി​രു​ന്നെ​ന്നോ! യഹോ​വ​യ്‌ക്കുള്ള സമർപ്പ​ണ​വേ​ള​യിൽ ഞങ്ങൾ സ്വയം ത്യജിച്ച്‌ ജീവിതം അവനു സമർപ്പി​ച്ചത്‌ ആത്മാർഥ​മാ​യി​ട്ടാ​യി​രു​ന്നു​വെന്ന്‌ യഹോ​വയെ കാണി​ക്കാ​നുള്ള ഒരു അവസര​മാ​യി​ട്ടാണ്‌ ഞങ്ങൾ ഇതിനെ കണ്ടത്‌.”

‘കൊയ്‌ത്തി​ന്റെ യജമാ​ന​നിൽ’ ആശ്രയം വെക്കുന്നു

വർഷങ്ങ​ളോ​ളം ബെഥേ​ലിൽ സേവി​ച്ച​തി​നു​ശേഷം വയലി​ലേക്കു മടങ്ങി​യ​പ്പോൾ ചില ആശങ്കക​ളൊ​ക്കെ​യു​ണ്ടാ​യി​രു​ന്നു. “കൊക്കി​ലൊ​തു​ങ്ങുന്ന ഒരു താമസ​സൗ​ക​ര്യം കിട്ടു​മോ? ഇതുവരെ പ്രസാ​ധ​ക​രാ​യി​രു​ന്നിട്ട്‌ പെട്ടെന്ന്‌ 120-ഓ 130-ഓ മണിക്കൂർ മാസ​ന്തോ​റും വയലിൽ പ്രവർത്തി​ക്കാ​നും സഭയ്‌ക്ക്‌ ഒരു പ്രോ​ത്സാ​ഹ​ന​മാ​യി​രി​ക്കാ​നു​മൊ​ക്കെ എങ്ങനെ കഴിയും?” ഇതൊ​ക്കെ​യാ​യി​രു​ന്നു ഒരു ദമ്പതി​ക​ളു​ടെ ചിന്ത. ആകട്ടെ, ഇവരൊ​ക്കെ പുതിയ സാഹച​ര്യ​ങ്ങ​ളു​മാ​യി പൊരു​ത്ത​പ്പെ​ട്ടത്‌ എങ്ങനെ​യാണ്‌?

 നിയമ​ന​സ്ഥ​ലത്ത്‌ ദിവസ​ങ്ങ​ളോ​ളം തിരഞ്ഞി​ട്ടും കിട്ടാതെ, തിരച്ചിൽ അവസാ​നി​പ്പി​ക്കാ​നൊ​രു​ങ്ങി​യ​പ്പോ​ഴാണ്‌ ചിലർക്ക്‌ പറ്റിയ ഒരു താമസ​സൗ​ക​ര്യം തരപ്പെ​ട്ടത്‌. ജെസിക്ക എന്ന ഏകാകി​നി​യായ ഒരു സഹോ​ദരി തന്റെ നിയമ​ന​സ്ഥ​ലത്ത്‌ രണ്ടാഴ്‌ച തിരഞ്ഞി​ട്ടും പറ്റി​യൊ​രു താമസ​സൗ​ക​ര്യം കിട്ടി​യില്ല. തന്റെ സാധന​ങ്ങ​ളെ​ല്ലാം എടുത്തു​കൊ​ണ്ടു​വ​രാ​നാ​യി ബെഥേ​ലി​ലേക്കു തിരി​ച്ചു​പോ​കാൻ പ്ലാനി​ട്ട​തി​ന്റെ തലേന്ന്‌ ആ പ്രദേ​ശ​ത്തുള്ള ഒരു മൂപ്പൻ, നിസ്സാര വാടക​യ്‌ക്ക്‌ ഒരു കൊച്ചു​വീട്‌ കൊടു​ക്കാ​മെ​ന്നേറ്റു. ജെസി​ക്ക​യ്‌ക്ക്‌ എത്ര സന്തോ​ഷ​മാ​യെ​ന്നോ!

ജെഫും സിന്ധ്യ​യും അപ്പാർട്ടു​മെ​ന്റു​കൾ വാടക​യ്‌ക്കു കൊടു​ക്കുന്ന ഒരു സ്‌ത്രീ​യോട്‌ തങ്ങൾ യഹോ​വ​യു​ടെ സാക്ഷി​ക​ളാ​ണെന്ന്‌ അറിയി​ച്ചു. “യഹോ​വ​യു​ടെ സാക്ഷി​കളെ എനിക്ക​റി​യാം. നിങ്ങളു​ടെ കാര്യ​ത്തിൽ എനിക്കു ശങ്കയൊ​ന്നു​മില്ല. നിങ്ങളു​ടെ വാടക​ക്കാ​ര്യം യഹോവ നോക്കി​ക്കൊ​ള്ളും!” ആ സ്‌ത്രീ പറഞ്ഞു.

എറിക്കും മെലനി​യും പറയു​ന്ന​തി​ങ്ങനെ: “എല്ലായ്‌പോ​ഴും യഹോ​വ​യിൽ ആശ്രയി​ക്കേ​ണ്ട​തി​ന്റെ ആവശ്യം ബോധ്യ​പ്പെ​ടു​ത്തു​ന്ന​വ​യാണ്‌ ഞങ്ങളുടെ അനുഭ​വങ്ങൾ. യഹോ​വ​യു​ടെ കരുതൽ ഞങ്ങൾ നിത്യേന അനുഭ​വി​ച്ച​റി​യു​ന്നു. ഞങ്ങളുടെ വിശ്വാ​സത്തെ ഇത്‌ ഏറെ ബലിഷ്‌ഠ​മാ​ക്കി.”

പിന്തു​ണ​യു​മാ​യി സഭകൾ

സഭകളിൽനി​ന്നുള്ള സ്‌നേ​ഹാർദ്ര​മായ പിന്തുണ ഈ പയനി​യർമാ​രെ പുതിയ നിയമ​ന​വു​മാ​യി ഒത്തു​പോ​കാൻ ഏറെ സഹായി​ച്ചി​ട്ടുണ്ട്‌. പല സഭകളും അവരെ​ക്കു​റിച്ച്‌ “ഞങ്ങളുടെ പ്രത്യേക പയനി​യർമാർ” എന്ന്‌ സ്‌നേ​ഹ​പൂർവം പറയാ​റു​ണ്ടെന്ന്‌ ഒരു സർക്കിട്ട്‌ മേൽവി​ചാ​രകൻ റിപ്പോർട്ടു ചെയ്യുന്നു. “സർക്കിട്ട്‌ ഒന്നാകെ അവരെ ഇരു​കൈ​യും നീട്ടി സ്വീക​രി​ച്ചു” അദ്ദേഹം പറഞ്ഞു. ഒരു സഹോ​ദരൻ ബ്രാഞ്ചിന്‌ എഴുതി: “ബ്രാഞ്ചിന്‌ ഞാൻ നന്ദി പറയാ​നാ​ഗ്ര​ഹി​ക്കു​ന്നു. ഞങ്ങൾക്കെ​ല്ലാം ഈ പയനി​യർമാർ എത്ര വലിയ അനു​ഗ്ര​ഹ​മാ​ണെ​ന്നോ!”

കൻസാ​സി​ലു​ള്ള ഒരു സഭയ്‌ക്ക്‌ മാസങ്ങ​ളാ​യി പ്രവർത്തി​ക്കാ​തെ കിടക്കുന്ന 100 പ്രദേ​ശ​മു​ണ്ടാ​യി​രു​ന്നു. എന്നാൽ ഒരു പ്രത്യേക പയനിയർ ദമ്പതികൾ എത്തിയ​തോ​ടെ ആ പ്രദേ​ശ​ങ്ങ​ളിൽ അധിക​വും ക്രമമായ അടിസ്ഥാ​ന​ത്തിൽ പ്രവർത്തി​ക്കാൻ കഴിയു​ന്നു. “ഈ ക്രമീ​ക​രണം ഇത്രമാ​ത്രം ഗുണക​ര​മാ​യി​ത്തീ​രു​മെന്ന്‌ ഞങ്ങൾ ഒട്ടും കരുതി​യില്ല” എന്ന്‌ ആവിടത്തെ മൂപ്പന്മാർ എഴുതു​ക​യു​ണ്ടാ​യി.

സഭ പയനി​യർമാ​രെ ബലപ്പെ​ടു​ത്തി​യ​പ്പോൾ പ്രാ​ദേ​ശിക സഹോ​ദ​ര​ങ്ങ​ളും പ്രയോ​ജനം നേടി. (കൊലൊ. 4:11) “പയനി​യർമാ​രു​ടെ ഉത്സാഹ​വും തീക്ഷ്‌ണ​ത​യും സഭയിലെ സഹോ​ദ​ര​ങ്ങൾക്ക്‌ വലി​യൊ​രു പ്രോ​ത്സാ​ഹ​ന​മാ​യി” എന്ന്‌ ഒരു സർക്കിട്ട്‌ മേൽവി​ചാ​രകൻ എഴുതു​ന്നു.  “പ്രത്യേക പയനി​യർമാ​രു​ടെ മുഖമു​ദ്ര​യാണ്‌ അവരുടെ സ്‌നേ​ഹ​വും സന്തോ​ഷ​വും. അത്‌ സഭയിലെ മറ്റു സഹോ​ദ​ര​ങ്ങ​ളി​ലേ​ക്കും വേഗത്തിൽ പടർന്നു,” മറ്റൊരു സഞ്ചാര​മേൽവി​ചാ​ര​കന്റെ വാക്കുകൾ.

മറ്റൊരു ദമ്പതികൾ നിഷ്‌ക്രി​യ​രാ​യി​രുന്ന പത്തു​പേ​രെ​യാണ്‌ ക്രമമുള്ള പ്രസാ​ധ​ക​രാ​യി​ത്തീ​രാൻ സഹായി​ച്ചത്‌. സഭയിലെ മറ്റു മൂപ്പന്മാർക്കും ഇവരുടെ സാന്നി​ധ്യം ഏറെ ഗുണം ചെയ്യുന്നു. ഒരു മൂപ്പൻ എഴുതി: “കാര്യ​ങ്ങളെ സമനി​ല​യോ​ടെ വീക്ഷി​ക്കുന്ന നല്ല പരിശീ​ലനം ലഭിച്ച ഒരു സഹോ​ദരൻ ഉള്ളത്‌ എത്ര ആശ്വാ​സ​മാ​ണെ​ന്നോ! സഭയ്‌ക്കും മൂപ്പന്മാ​രു​ടെ സംഘത്തി​നും ഇങ്ങനെ​യു​ള്ള​വ​രെ​യാണ്‌ ആവശ്യം.”

“ദൈവ​ത്തി​ന്റെ കൂട്ടു​വേ​ല​ക്കാർ”

രാജ്യ​പ്ര​സം​ഗ​കരെ നല്ലനല്ല അനുഭ​വങ്ങൾ നൽകി യഹോവ അനു​ഗ്ര​ഹി​ച്ചി​രി​ക്കു​ന്നു. ശൈത്യ​കാ​ലത്തെ നല്ല തണുപ്പുള്ള ഒരു ദിവസം സ്റ്റീവും ഗേയും വയൽസേ​വ​ന​ത്തി​നു പുറ​പ്പെട്ടു. ആദ്യത്തെ വീട്ടിൽത്തന്നെ വയസ്സു​ചെന്ന ഒരാൾക്ക്‌ അവർ ബൈബി​ള​ധ്യ​യനം തുടങ്ങി. വിഷാ​ദ​മ​ഗ്ന​നാ​യി​രു​ന്നു ആ മനുഷ്യൻ. രണ്ടാഴ്‌ച​യാ​യ​പ്പോൾ അദ്ദേഹം രാജ്യ​ഹാ​ളിൽ യോഗ​ത്തി​നു വന്നു. അവി​ടെ​വെച്ച്‌ യദൃച്ഛയാ ഈ ദമ്പതികൾ, അദ്ദേഹം എത്ര നല്ലയാ​ളാ​ണെ​ന്നും ആദ്യം കണ്ടപ്പോൾത്തന്നെ തങ്ങളെ വീട്ടിൽ കയറ്റി​യ​തിന്‌ നന്ദിയു​ണ്ടെ​ന്നും അറിയി​ച്ചു. ഇതു​കേ​ട്ട​പ്പോൾ അദ്ദേഹം പറഞ്ഞു: “ഞാൻ നല്ലയാ​ളാ​യ​തു​കൊ​ണ്ടല്ല നിങ്ങളെ വീട്ടിൽ കയറ്റി​യത്‌. നിങ്ങൾ വരു​മെന്ന്‌ എനിക്ക​റി​യാ​മാ​യി​രു​ന്നു; കാരണം, മൂന്നു​ദി​വ​സ​മാ​യി ഞാൻ സഹായ​ത്തി​നാ​യി പ്രാർഥി​ച്ചു​കൊ​ണ്ടി​രി​ക്കു​ക​യാ​യി​രു​ന്നു.” ഇപ്പോൾ പതിവാ​യി യോഗ​ങ്ങൾക്കു വരുന്ന അദ്ദേഹം നന്നായി പുരോ​ഗ​മി​ച്ചു​കൊ​ണ്ടി​രി​ക്കു​ന്നു; താമസി​യാ​തെ സ്‌നാ​ന​മേൽക്കാ​നുള്ള ഒരുക്ക​ത്തി​ലു​മാണ്‌.

റേയും ജില്ലും ഒരു ദിവസം രാവിലെ വാഹന​മോ​ടി​ച്ചു പോകു​മ്പോൾ റോഡി​ന്റെ മറുവ​ശ​ത്തു​കൂ​ടെ ഒരാൾ പോകു​ന്ന​തു​കണ്ടു. അദ്ദേഹ​ത്തോ​ടു സംസാ​രി​ക്കാൻ അവർ തീരു​മാ​നി​ച്ചു. അവർ ചില സാഹി​ത്യ​ങ്ങൾ അദ്ദേഹത്തെ കാണി​ച്ചിട്ട്‌ ബൈബി​ള​ധ്യ​യ​ന​ത്തെ​ക്കു​റി​ച്ചും പറഞ്ഞു. മാസി​കകൾ അദ്ദേഹം സ്വീക​രി​ച്ചു; എന്നിട്ട്‌, താൻ മുമ്പ്‌ യഹോ​വ​യു​ടെ സാക്ഷി​ക​ളു​ടെ​കൂ​ടെ ബൈബിൾ പഠിച്ചു​കൊ​ണ്ടി​രു​ന്ന​താ​ണെന്ന്‌ അദ്ദേഹം പറഞ്ഞു. അടുത്ത​യി​ടെ അദ്ദേഹം താമസം മാറി അവി​ടേക്കു വന്നതേ​യു​ണ്ടാ​യി​രു​ന്നു​ള്ളൂ. ബൈബി​ള​ധ്യ​യനം തുടരാൻ അദ്ദേഹ​ത്തി​നു സന്തോ​ഷ​മാ​യി​രു​ന്നു.

യഹോ​വ​യെ സേവി​ക്കാ​നാ​യി ത്യാഗങ്ങൾ ചെയ്യു​ന്ന​വർക്ക്‌ ദൈവം “തങ്ങളുടെ പ്രവൃ​ത്തി​യും തന്റെ നാമ​ത്തോ​ടു കാണിച്ച സ്‌നേ​ഹ​വും മറന്നു​ക​ള​വാൻ തക്കവണ്ണം അനീതി​യു​ള്ള​വനല്ല” എന്ന കാര്യം നന്നായി അറിയാം. (എബ്രാ. 6:10) മനുഷ്യ​ശ​രീ​ര​ത്തിൽ പല അവയവ​ങ്ങ​ളുണ്ട്‌;  ഓരോ​ന്നി​നും ഓരോ ധർമമുണ്ട്‌. അതു​പോ​ലെ സഭയിൽ പല അംഗങ്ങ​ളുണ്ട്‌; സഭയുടെ ആത്മീയ വളർച്ച​യ്‌ക്കും അഴകി​നും വേണ്ടി ഓരോ​രു​ത്തർക്കും എന്തെങ്കി​ലു​മൊ​ക്കെ നൽകാ​നാ​കും. “ദൈവ​മോ തന്റെ ഇഷ്ടപ്ര​കാ​രം [അംഗങ്ങളെ സഭയിൽ] വെവ്വേ​റാ​യി വെച്ചി​രി​ക്കു​ന്നു.” ഓരോ അംഗവും സഹകരി​ച്ചു പ്രവർത്തി​ക്കു​മ്പോൾ “[അംഗങ്ങൾ] ഒക്കെയും​കൂ​ടെ സന്തോ​ഷി​ക്കു​ന്നു.” (1 കൊരി. 12:18, 26) “ദൈവ​ത്തി​ന്റെ കൂട്ടു​വേ​ല​ക്കാർ”ക്കിടയി​ലെ ഈ സഹകര​ണ​വും ഒരുമ​യും, എല്ലാം ‘വളരു​മാ​റാ​ക്കുന്ന’ യഹോ​വ​യ്‌ക്ക്‌ മഹത്ത്വം കരേറ്റു​ന്നു.—1 കൊരി. 3:6, 9.

സുവാർത്ത​യ്‌ക്ക്‌ നിയമാം​ഗീ​കാ​രം നേടുന്നു

യേശു തന്റെ അപ്പൊ​സ്‌ത​ല​ന്മാ​രോ​ടു പറഞ്ഞു: “എന്റെ നാമം നിമിത്തം എല്ലാവ​രും നിങ്ങളെ പകെക്കും.” (മത്താ. 10:22) അതു​കൊണ്ട്‌ യേശു​നി​മി​ത്തം എതിരാ​ളി​കൾ “എല്ലാ തിന്മയും കളവായി പറ”യുമെന്ന കാര്യം യേശു​വി​ന്റെ ശിഷ്യ​ന്മാർ പ്രതീ​ക്ഷി​ക്കു​ന്നു. (മത്താ. 5:11) ആകട്ടെ, ‘സുവി​ശേ​ഷ​ത്തി​ന്റെ സ്ഥിരീ​ക​ര​ണ​ത്തി​നാ​യി’ അതായത്‌, സുവി​ശേ​ഷ​ത്തിന്‌ നിയമാം​ഗീ​കാ​രം നേടി​യെ​ടു​ക്കാ​നാ​യി ക്രിസ്‌തു​വി​ന്റെ ആധുനി​ക​കാല ശിഷ്യ​ന്മാർ എന്താണ്‌ ചെയ്‌തി​ട്ടു​ള്ളത്‌?—ഫിലി. 1:7.

അർമേനിയ

2007 ഏപ്രി​ലി​നും 2008 ഏപ്രി​ലി​നും ഇടയ്‌ക്കാണ്‌ സംഭവം. ഏഴുട​ണ്ണിൽ കൂടുതൽ ബൈബി​ളും ബൈബിൾ സാഹി​ത്യ​ങ്ങ​ളും അർമേ​നി​യ​യി​ലെ കസ്റ്റംസ്‌ അധികൃ​തർ പിടി​ച്ചു​വെച്ചു. അവ വിട്ടു​ത​ര​ണ​മെ​ങ്കിൽ കനത്ത നികുതി അടയ്‌ക്ക​ണ​മെന്ന്‌ അവർ ശഠിച്ചു. 2008 ഏപ്രി​ലിൽ, ഈ നടപടി നിയമ​വി​രു​ദ്ധ​മാ​ണെ​ന്നും തങ്ങൾ അംഗീ​ക​രി​ക്കു​ന്നി​ല്ലെ​ന്നും വ്യക്തമാ​ക്കി​ക്കൊണ്ട്‌ സഹോ​ദ​രങ്ങൾ നികുതി അടച്ചു. അങ്ങനെ, സാഹി​ത്യ​ങ്ങ​ളു​ടെ ആദ്യ​ലോഡ്‌ ഇറക്കാൻക​ഴി​ഞ്ഞു. ഈ പ്രശ്‌നം പരിഹ​രി​ക്കാൻ സഹോ​ദ​ര​ന്മാർ നിയമ​സ​ഹാ​യം തേടി​യി​രി​ക്കു​ക​യാണ്‌.

കസാഖ്‌സ്ഥാൻ

യഹോ​വ​യു​ടെ സാക്ഷി​ക​ളു​ടെ ലോക ആസ്ഥാന​ത്തു​നി​ന്നുള്ള രണ്ടുസ​ഹോ​ദ​ര​ന്മാർ കസാഖ്‌സ്ഥാ​നി​ലുള്ള തങ്ങളുടെ സഹാരാ​ധ​കർക്ക്‌ ആത്മീയ നവോ​ന്മേഷം പ്രദാനം ചെയ്യു​ന്ന​തി​നാ​യി എത്തിയ​താ​യി​രു​ന്നു. അതി​നോ​ട​നു​ബ​ന്ധിച്ച്‌ ആൽമാ​റ്റി​യിൽവെച്ച്‌ ഒരു പ്രത്യേക യോഗ​വും ക്രമീ​ക​രി​ച്ചി​രു​ന്നു. യോഗ​ത്തെ​ത്തു​ടർന്ന്‌ ഇരുവ​രും അറസ്റ്റു​ചെ​യ്യ​പ്പെട്ടു. അവരെ പോലീസ്‌ സ്റ്റേഷനിൽ പിടി​ച്ചു​വെച്ചു, ചോദ്യം​ചെ​യ്‌തിട്ട്‌ അഡ്‌മി​നി​സ്‌​ട്രേ​റ്റീവ്‌ കോട​തി​യിൽ കൊണ്ടു​വന്നു; കോടതി അവരെ കുറ്റക്കാ​രെന്നു വിധിച്ചു. “മിഷന​റി​പ്ര​വർത്തനം” നടത്തി എന്നതാ​യി​രു​ന്നു അവർക്കെ​തി​രെ​യുള്ള കുറ്റം. അവർ പിന്നീട്‌ മോചി​ത​രാ​യെ​ങ്കി​ലും അവരു​ടെ​മേൽ ചുമത്ത​പ്പെട്ട കുറ്റം അന്യാ​യ​മാ​ണെന്നു തെളി​യി​ക്കാ​നുള്ള നടപടി​കൾ നടന്നു​വ​രു​ക​യാണ്‌. അടുത്ത​കാ​ലത്ത്‌, അധികാ​രി​കൾ സഹോ​ദ​ര​ങ്ങ​ളു​ടെ വീടു​ക​ളിൽ റെയ്‌ഡു നടത്തി​ക്കൊണ്ട്‌  പ്രാർഥ​ന​യ്‌ക്കും ബൈബിൾ പഠനത്തി​നു​മാ​യുള്ള കൂടി​വ​ര​വു​കൾക്കു തടയി​ടാൻ ശ്രമി​ച്ചി​രി​ക്കു​ന്നു. നിയമ​പ​ര​മാ​യി രജിസ്റ്റർ ചെയ്‌ത മൂന്നു സഭകളു​ടെ മതപര​മായ പ്രവർത്ത​ന​ങ്ങൾക്ക്‌ കോട​തി​കൾ വില​ക്കേർപ്പെ​ടു​ത്തി​യി​ട്ടുണ്ട്‌. കാസ്‌പി​യൻ കടലിന്റെ വടക്കു​ഭാ​ഗ​ത്തുള്ള ഒരു പ്രദേ​ശത്തെ ദിവ്യാ​ധി​പത്യ പ്രവർത്ത​ന​ങ്ങളെ പലപ്രാ​വ​ശ്യം അധികാ​രി​കൾ തടസ്സ​പ്പെ​ടു​ത്തി.

തജികിസ്ഥാൻ

1994-ൽ, യഹോ​വ​യു​ടെ സാക്ഷികൾ ഔദ്യോ​ഗി​ക​മാ​യി രജിസ്റ്റർ ചെയ്യ​പ്പെട്ടു. അങ്ങനെ ആരാധ​ന​യ്‌ക്കാ​യി കൂടി​വ​രാ​നുള്ള സ്വാത​ന്ത്ര്യം അവർക്ക്‌ അനുവ​ദി​ച്ചു​കി​ട്ടി; പക്ഷേ, 2007 ഒക്‌ടോ​ബർ 11-ന്‌ അവിടത്തെ സാംസ്‌കാ​രിക മന്ത്രാ​ലയം സാക്ഷി​ക​ളു​ടെ ആരാധ​ന​യ്‌ക്ക്‌ നിരോ​ധനം ഏർപ്പെ​ടു​ത്തി​ക്കൊണ്ട്‌ ഒരു ഉത്തരവു പുറ​പ്പെ​ടു​വി​ച്ചു. യഹോ​വ​യു​ടെ സാക്ഷികൾ സമാധാ​ന​പ്രി​യ​രാ​ണെ​ന്നും അവർ ക്രമസ​മാ​ധാ​ന​ത്തിന്‌ യാതൊ​രു ഭീഷണി​യും ഉയർത്തു​ക​യി​ല്ലെ​ന്നു​മുള്ള വസ്‌തുത അധികാ​രി​കളെ ബോധ്യ​പ്പെ​ടു​ത്തു​ന്ന​തി​നുള്ള ശ്രമങ്ങൾ നടക്കു​ക​യാണ്‌ ഇപ്പോൾ അവിടെ.

ഉസ്‌ബക്കിസ്ഥാൻ

ഉസ്‌ബ​ക്കി​സ്ഥാ​നി​ലെ യഹോ​വ​യു​ടെ സാക്ഷി​ക​ളു​ടെ സ്ഥിതി ഒന്നി​നൊന്ന്‌ പരിതാ​പ​ക​ര​മാ​കു​ക​യാണ്‌. 2008-ന്റെ തുടക്ക​ത്തിൽ, മതവി​ശ്വാ​സ​ത്തി​ന്റെ​പേ​രിൽ ഒരു സാക്ഷിയെ നാലു​വർഷം തൊഴിൽപ്പാ​ള​യ​ത്തിൽ നിർബ​ന്ധിത തൊഴി​ലി​നു വിധിച്ചു. മതസം​ഘ​ട​ന​ക​ളോ​ടും മതവി​ശ്വാ​സങ്ങൾ പഠിപ്പി​ക്കു​ന്ന​തി​നോ​ടും ബന്ധപ്പെട്ട നിയമങ്ങൾ ലംഘിച്ചു എന്നതി​ന്റെ​പേ​രിൽ മറ്റു പലരെ​യും അറസ്റ്റു​ചെ​യ്യു​ക​യും കസ്റ്റഡി​യിൽ വെക്കു​ക​യും കുറ്റം​ചു​മ​ത്തു​ക​യും പിഴയി​ടു​ക​യു​മൊ​ക്കെ ചെയ്‌തു. യോഗ​സ്ഥ​ലങ്ങൾ റെയ്‌ഡ്‌ ചെയ്യു​ക​യും, സ്വകാ​ര്യ​ഭ​വ​നങ്ങൾ പരി​ശോ​ധി​ക്കു​ക​യും, സാഹി​ത്യ​ങ്ങൾ കണ്ടു​കെ​ട്ടു​ക​യും  പ്രസാ​ധ​കരെ കസ്റ്റഡി​യിൽ വെക്കു​ക​യും ഒക്കെ ചെയ്‌തി​ട്ടുണ്ട്‌. നമ്മുടെ പല സഹോ​ദ​രീ​സ​ഹോ​ദ​ര​ന്മാർക്കും പോലീസ്‌ ഉദ്യോ​ഗ​സ്ഥ​ന്മാ​രിൽനിന്ന്‌ വാക്കാ​ലുള്ള അധി​ക്ഷേ​പ​വും ശാരീ​രിക ഉപദ്ര​വ​വും നേരി​ടേ​ണ്ടി​വ​ന്നി​ട്ടുണ്ട്‌.

ഈ ഹീനവൃ​ത്തി​കൾക്ക്‌ ചുക്കാൻ പിടി​ക്കു​ന്നത്‌ പ്രാ​ദേ​ശിക പുരോ​ഹി​ത​വൃ​ന്ദ​മാ​ണെന്ന്‌ ഇവിടത്തെ ഒട്ടനവധി ഉദ്യോ​ഗസ്ഥർ വെളി​പ്പെ​ടു​ത്തി​യി​ട്ടുണ്ട്‌. അധികാ​രി​കൾ താമസി​യാ​തെ​തന്നെ തങ്ങളുടെ പെരു​മാ​റ്റ​ത്തി​ന്റെ അനൗചി​ത്യം മനസ്സി​ലാ​ക്കി “സർവ്വഭ​ക്തി​യോ​ടും ഘനത്തോ​ടും​കൂ​ടെ സാവധാ​ന​ത​യും സ്വസ്ഥത​യു​മുള്ള” ഒരു ജീവിതം നയിക്കാൻ നമ്മുടെ സഹോ​ദ​ര​ങ്ങൾക്ക്‌ അവസര​മൊ​രു​ക്ക​ട്ടെ​യെന്ന്‌ നമുക്കു പ്രാർഥി​ക്കാം.—1 തിമൊ. 2:1, 2.

ഗ്രീസ്‌

ഗ്രീസിൽ ഹൈ​ക്കോ​ട​തി​യു​ടെ രണ്ട്‌ അനുകൂല വിധി​യു​ണ്ടാ​യി. മതവി​ശ്വാ​സ​ങ്ങ​ളു​ടെ പേരിൽ സൈനി​ക​സേ​വനം തിരസ്‌ക​രി​ക്കു​ന്ന​തിന്‌ മനസ്സാ​ക്ഷി​പ​ര​മാ​യി തീരു​മാ​ന​മെ​ടു​ക്കു​ന്ന​തി​നോ​ടു ബന്ധപ്പെ​ട്ടാ​യി​രു​ന്നു അവ. കോൺസ്റ്റാ​ന്റി​നോസ്‌ കോറ്റി​ഡിസ്‌ എന്നയാൾ ചില വർഷങ്ങൾക്കു​മുമ്പ്‌ സോവി​യറ്റ്‌ യൂണി​യന്റെ സായു​ധ​സേ​ന​യി​ലാ​യി​രു​ന്നു. പിന്നീട്‌ അദ്ദേഹം ഗ്രീസി​ലേക്കു വരുക​യും ഒരു സാക്ഷി​യാ​യി​ത്തീ​രു​ക​യും ചെയ്‌തു. അധികാ​രി​കൾ ഈ സഹോ​ദ​ര​നോട്‌ സൈനി​ക​സേ​വനം ചെയ്യാൻ ആവശ്യ​പ്പെട്ടു; പകരമാ​യി പൊതു​ജ​ന​സേ​വനം ചെയ്യാൻ അദ്ദേഹത്തെ അനുവ​ദി​ച്ചു​മില്ല. മുമ്പ്‌ സൈന്യ​ത്തിൽ സേവി​ച്ചി​ട്ടുള്ള സ്ഥിതിക്ക്‌ ഇപ്പോൾ മനസ്സാ​ക്ഷി​നി​മി​ത്തം ഇതു തിരസ്‌ക​രി​ക്കാൻ സഹോ​ദ​രന്‌ അവകാ​ശ​മി​ല്ലെ​ന്നാ​യി​രു​ന്നു അവരുടെ പക്ഷം. എന്നാൽ സ്റ്റേറ്റ്‌ കൗൺസി​ലി​ന്റെ തീരു​മാ​നം മറ്റൊ​ന്നാ​യി​രു​ന്നു: മുമ്പ്‌ സൈന്യ​ത്തിൽ സേവി​ച്ചി​ട്ടു​ണ്ടെ​ങ്കി​ലും പിന്നീട്‌ മതവി​ശ്വാ​സ​ങ്ങ​ളു​ടെ​പേ​രിൽ ഒരുവന്റെ മനസ്സാക്ഷി അതിന്‌ അനുവ​ദി​ക്കു​ന്നി​ല്ലെ​ങ്കിൽ  അത്‌ അംഗീ​ക​രി​ക്കു​ക​യും പകരം പൊതു​ജ​ന​സേ​വനം ചെയ്യാൻ അയാളെ അനുവ​ദി​ക്കു​ക​യും ചെയ്യണ​മെ​ന്നാ​യി​രു​ന്നു വിധി.

സ്റ്റിലി​യാ​നോസ്‌ യോ​വേ​നീ​ത്തീസ്‌ എന്നയാൾ ഉൾപ്പെ​ട്ട​താ​യി​രു​ന്നു മറ്റൊരു കേസ്‌. അദ്ദേഹ​ത്തിന്‌ ഒരു പൊതു​സ്ഥാ​പ​ന​ത്തിൽ ജോലി നിഷേ​ധി​ക്ക​പ്പെട്ടു. മനസ്സാ​ക്ഷി​പ​ര​മായ കാരണ​ത്താൽ സൈനി​ക​സേ​വനം ചെയ്യാ​ത്ത​തി​ന്റെ പേരിൽ ജയിലി​ല​ട​യ്‌ക്ക​പ്പെട്ട അദ്ദേഹം തന്റെ സൈനിക ഉത്തരവാ​ദി​ത്വ​ങ്ങൾ നിറ​വേ​റ്റി​യി​ട്ടില്ല എന്നതാ​യി​രു​ന്നു കാരണം. എന്നാൽ സ്റ്റേറ്റ്‌ കൗൺസി​ലി​ന്റെ തീരു​മാ​നം മറ്റൊ​ന്നാ​യി​രു​ന്നു. മനസ്സാ​ക്ഷി​നി​മി​ത്തം സൈനി​ക​സേ​വ​ന​ത്തി​നു വിസമ്മ​തിച്ച്‌ ജയിൽശിക്ഷ അനുഭ​വിച്ച ഒരാൾ സൈനി​ക​സേ​വ​ന​ത്തിൽനിന്ന്‌ ഒഴിവു​ള്ള​വ​നാണ്‌ എന്നായി​രു​ന്നു അത്‌. അങ്ങനെ​യു​ള്ള​വ​രു​ടെ, സൈനി​ക​സേ​വ​ന​വു​മാ​യി ബന്ധപ്പെട്ട കാര്യ​ങ്ങ​ളൊ​ക്കെ അതോടെ സ്ഥിരമാ​യി പരിഹ​രി​ക്ക​പ്പെ​ടു​മെ​ന്നും പൊതു​സ്ഥാ​പ​ന​ങ്ങ​ളിൽ ജോലി​യെ​ടു​ക്കു​ന്ന​തിന്‌ മേലാൽ ഒരു തടസ്സവു​മു​ണ്ടാ​യി​രി​ക്കി​ല്ലെ​ന്നും കൂടെ കോടതി വിധി​ന്യാ​യ​ത്തിൽ പ്രസ്‌താ​വി​ച്ചു. സ്റ്റേറ്റ്‌ കൗൺസിൽ ആദ്യമാ​യി​ട്ടാണ്‌ മതസ്വാ​ത​ന്ത്ര്യ​ത്തി​ന്റെ​പേ​രിൽ ഇങ്ങനെ​യൊ​രു വിധി​പ്ര​ഖ്യാ​പി​ക്കു​ന്നത്‌. മനസ്സാ​ക്ഷി​നി​മി​ത്തം സൈനി​ക​സേ​വ​ന​ത്തി​നു വിസമ്മ​തിച്ച ഒരു സാക്ഷിക്ക്‌ ജോലി നിഷേ​ധി​ച്ച​തി​നോ​ടുള്ള ബന്ധത്തിൽ മുമ്പ്‌ യൂറോ​പ്യൻ മനുഷ്യാ​വ​കാശ കോട​തി​യും സമാന​മായ വിധി പ്രഖ്യാ​പി​ച്ചി​ട്ടുണ്ട്‌.

എറിട്രിയ

ഇവി​ടെ​യും നമ്മുടെ സഹോ​ദ​രങ്ങൾ അനീതി​യും ഉപദ്ര​വ​വും സഹിക്കു​ക​യാണ്‌. സാക്ഷി​ക​ളിൽ കുറെ​പ്പേർ തടങ്കൽപ്പാ​ള​യ​ങ്ങ​ളി​ലാണ്‌; അവരിൽ ചിലരു​ടെ സ്ഥിതി​യാ​കട്ടെ അങ്ങേയറ്റം ദുഷ്‌ക​ര​മാണ്‌. 2008 ജൂ​ലൈ​യിൽ വേറെ എട്ടു​പേ​രെ​ക്കൂ​ടെ അറസ്റ്റു​ചെ​യ്‌തു. അവരിൽ ചിലർ രാജ്യത്തെ വേലയ്‌ക്കു നേതൃ​ത്വം വഹിക്കുന്ന മൂപ്പന്മാ​രാണ്‌. സഹോ​ദ​ര​ങ്ങ​ളു​ടെ മോച​ന​ത്തി​നാ​യി നിരവധി ശ്രമങ്ങൾ നടത്തു​ക​യും ഗോള​മെ​മ്പാ​ടു​നി​ന്നും നിവേ​ദ​നങ്ങൾ അയയ്‌ക്കു​ക​യു​മൊ​ക്കെ ചെയ്‌തി​ട്ടും സത്യ​ദൈ​വ​മായ യഹോ​വയെ ആരാധി​ക്കു​ന്നത്‌ എതിർക്കാൻത​ന്നെ​യാണ്‌ ഭരണകൂ​ട​ത്തി​ന്റെ ഭാവം.

ദക്ഷിണകൊറിയ

മനസ്സാ​ക്ഷി​പ​ര​മായ കാരണ​ത്താൽ സൈനി​ക​സേ​വനം തിരസ്‌ക​രി​ക്കാ​നുള്ള അടിസ്ഥാന അവകാശം ഇവിടെ അംഗീ​ക​രി​ക്ക​പ്പെ​ട്ടി​രു​ന്നില്ല. എന്നാൽ സാഹച​ര്യം മെല്ലെ മെച്ച​പ്പെ​ടു​ന്നുണ്ട്‌. കഴിഞ്ഞ 50-ലേറെ വർഷക്കാ​ലം ആയിര​ക്ക​ണ​ക്കിന്‌ സഹോ​ദ​ര​ങ്ങ​ളാണ്‌ ഇതിന്റെ പേരിൽ ജയിൽവാ​സ​മ​നു​ഭ​വി​ച്ചത്‌. ഇപ്പോൾ ഏകദേശം 500 പേർ തടവി​ലുണ്ട്‌. അവരുടെ നിശ്ചയ​ദാർഢ്യ​വും നല്ല ക്രിസ്‌തീയ പെരു​മാ​റ്റ​വും ജയില​ധി​കാ​രി​ക​ളി​ലും ഗവണ്മെന്റ്‌ അധികാ​രി​ക​ളി​ലും അങ്ങേയറ്റം മതിപ്പു​ള​വാ​ക്കി​യി​ട്ടുണ്ട്‌; ഒപ്പം യഹോ​വ​യു​ടെ ഹൃദയത്തെ പ്രസാ​ദി​പ്പി​ക്കു​ക​യും ചെയ്‌തി​രി​ക്കു​ന്നു. (1 പത്രൊ. 2:20) ഇതുവരെ  ഐക്യ​രാ​ഷ്‌ട്ര​ങ്ങ​ളു​ടെ മനുഷ്യാ​വ​കാശ കമ്മിറ്റിക്ക്‌ 488 നിവേ​ദ​നങ്ങൾ സമർപ്പി​ച്ചി​ട്ടുണ്ട്‌. അവയിൽ രണ്ടെണ്ണ​ത്തിന്‌ 2006-ൽ അനുകൂല വിധി ലഭിക്കു​ക​യു​ണ്ടാ​യി. സൈനി​ക​സേ​വ​ന​ത്തി​നു പകരം സ്വീകാ​ര്യ​മായ ഒരു പൊതു​ജ​ന​സേ​വനം അനുവ​ദി​ച്ചു​കൊ​ണ്ടുള്ള ഒരു നിയമം കൊണ്ടു​വ​രാൻ ഗവണ്മെ​ന്റിന്‌ ഉദ്ദേശ്യ​മുണ്ട്‌. കാലാ​ന്ത​ര​ത്തിൽ, അധികാ​രി​കൾ ആ നിയമം നടപ്പിൽവ​രു​ത്തു​മെന്ന്‌ സഹോ​ദ​രങ്ങൾ പ്രത്യാ​ശി​ക്കു​ന്നു.

റുവാണ്ട

2008 ഏപ്രി​ലിൽ നടക്കുന്ന ഒരു സെമി​നാ​റിൽ റുവാ​ണ്ട​യി​ലെ എല്ലാ അധ്യാ​പ​ക​രും പങ്കെടു​ക്ക​ണ​മെന്ന്‌ ഉത്തരവു വന്നു. യഹോ​വ​യു​ടെ സാക്ഷി​ക​ളായ നിരവധി അധ്യാ​പ​കർക്കും ബാധക​മാ​യി​രു​ന്നു ആ ഉത്തരവ്‌. സെമി​നാ​റി​ലെ പ്രവർത്ത​നങ്ങൾ തങ്ങളുടെ ബൈബി​ള​ധി​ഷ്‌ഠിത മനസ്സാ​ക്ഷി​ക്കു വിരു​ദ്ധ​മാ​ണെന്ന്‌ ആർക്കെ​ങ്കി​ലും തോന്നി​യാൽപ്പോ​ലും അതിൽനി​ന്നു വിട്ടു​നിൽക്കാ​നുള്ള അനുവാ​ദ​മു​ണ്ടാ​യി​രു​ന്നില്ല. ഫലമോ? അതിൽ പങ്കെടു​ക്കാൻ വിസമ്മ​തി​ച്ച​തി​നാൽ 215 സാക്ഷി​കളെ ജോലി​യിൽനി​ന്നു പിരി​ച്ചു​വി​ട്ടു. രണ്ടുസ​ഹോ​ദ​രി​മാ​രെ ആഴ്‌ച​ക​ളോ​ളം തടവി​ലു​മാ​ക്കി. രാഷ്‌ട്രീയ-സൈനിക കാര്യ​ങ്ങ​ളും ഉൾപ്പെ​ട്ട​താ​യി​രു​ന്നു സെമി​നാർ. പങ്കെടു​ത്ത​വർക്ക്‌ രാഷ്‌ട്രീയ പ്രവർത്ത​ന​ങ്ങ​ളി​ലും ദേശീയ ചടങ്ങു​ക​ളി​ലും ഉൾപ്പെ​ടേ​ണ്ടി​വന്നു. സെമി​നാ​റിൽനി​ന്നു പുറത്തു​പോ​കാൻ തുനി​ഞ്ഞ​വരെ പട്ടാളം തടുക്കു​ക​യും ചെയ്‌തു. തുടർന്ന്‌ ദേശീ​യ​ഗാ​നം പാടാ​നും പതാകയെ വന്ദിക്കാ​നും വിസമ്മ​തി​ച്ച​തി​ന്റെ പേരിൽ യഹോ​വ​യു​ടെ സാക്ഷി​ക​ളു​ടെ 90 കുട്ടി​കളെ സ്‌കൂ​ളിൽനി​ന്നു പുറത്താ​ക്കി. പീഡന​ത്തി​ന്റെ ഈ പുതിയ അലകൾ ആഞ്ഞടി​ക്കു​മ്പോൾ നിർമ​ല​ത​പാ​ലി​ക്കാൻ ഈ സഹോ​ദ​ര​ങ്ങ​ളെ​യും അവരുടെ മക്കളെ​യും യഹോവ സഹായി​ക്കു​മെന്ന്‌ നമുക്കു​റ​പ്പുണ്ട്‌.

സ്‌പെയിൻ

യഹോ​വ​യു​ടെ സാക്ഷി​കൾക്കി​ട​യിൽലെ പ്രത്യേക മുഴു​സമയ സേവന​ത്തിൽ ആയിരി​ക്കുന്ന ബെഥേൽ അംഗങ്ങൾ, സഞ്ചാര​മേൽവി​ചാ​ര​ക​ന്മാർ തുടങ്ങി​യ​വ​രോ​ടു ബന്ധപ്പെട്ട ഒരു രാജകീയ ഉത്തരവിന്‌ സ്‌പെ​യി​നി​ലെ ഭരണകൂ​ടം അംഗീ​കാ​രം നൽകി. ഇത്തരത്തിൽ പ്രത്യേക മുഴു​സമയ സേവന​ത്തി​ലാ​യി​രി​ക്കു​ന്ന​വരെ, “മിഷന​റി​വേല, ക്രിസ്‌തീയ ശുശ്രൂഷ, മതബോ​ധനം, അതു​പോ​ലെ മതപര​മായ കാര്യ​ങ്ങ​ളോ​ടു ബന്ധപ്പെട്ട മറ്റു പ്രവർത്ത​നങ്ങൾ എന്നിവ​യ്‌ക്കു​വേണ്ടി പൂർണ​മാ​യി അർപ്പി​ത​രായ . . . നിയമിത ശുശ്രൂ​ഷ​ക​രാ​യി” അംഗീ​ക​രി​ച്ചു​കൊ​ണ്ടു​ള്ള​താ​യി​രു​ന്നു ആ ഉത്തരവ്‌. എന്നാൽ യഹോ​വ​യു​ടെ സാക്ഷി​കൾക്കി​ട​യി​ലെ ഈ പ്രത്യേക മുഴു​സമയ സേവകർ, വാസ്‌ത​വ​ത്തിൽ മറ്റു മതവി​ഭാ​ഗ​ങ്ങ​ളിൽപ്പെട്ട ശുശ്രൂ​ഷ​കർക്ക്‌ അനുവ​ദി​ച്ചി​ട്ടുള്ള ആനുകൂ​ല്യ​ങ്ങൾ പറ്റാൻ യോഗ്യ​രായ ശുശ്രൂ​ഷ​ക​രാ​ണോ എന്ന്‌ ചില ദേശങ്ങ​ളി​ലെ അധികാ​രി​കൾ സംശയം ഉന്നയി​ച്ചി​രി​ക്കുന്ന സാഹച​ര്യ​ത്തി​ലാണ്‌ ഈ പ്രഖ്യാ​പ​ന​മു​ണ്ടാ​യത്‌.

 യൂറോ​പ്യൻ മനുഷ്യാ​വ​കാശ കോടതി

അർമേ​നിയ, അസർ​ബൈ​ജാൻ, ഓസ്‌ട്രിയ, ജോർജിയ, ടർക്കി, ഫ്രാൻസ്‌, യൂ​ക്രെ​യിൻ, റഷ്യ എന്നിവി​ട​ങ്ങ​ളി​ലെ യഹോ​വ​യു​ടെ സാക്ഷി​ക​ളു​ടെ 24 നിവേ​ദ​നങ്ങൾ ഫ്രാൻസി​ലെ സ്‌ട്രാ​സ്‌ബുർഗി​ലുള്ള യൂറോ​പ്യൻ മനുഷ്യാ​വ​കാശ കോട​തി​യു​ടെ പരിഗ​ണ​ന​യിൽ ഇപ്പോ​ഴുണ്ട്‌. യൂറോ​പ്യൻ മനുഷ്യാ​വ​കാശ കരാറി​ന്റെ പരിധി​യിൽ വരുന്ന പൗരന്മാർക്ക്‌ അനുവ​ദി​ച്ചു​കൊ​ടു​ത്തി​ട്ടുള്ള അടിസ്ഥാന അവകാ​ശ​ങ്ങ​ളോ​ടു ബന്ധപ്പെ​ട്ട​താണ്‌ ഈ നിവേ​ദ​ന​ങ്ങ​ളിൽ ചിലത്‌. മനസ്സാ​ക്ഷി​പ​ര​മായ കാരണ​ങ്ങ​ളാൽ പൗരന്മാർക്ക്‌ സൈനിക സേവനം നിരസി​ക്കാ​നുള്ള  അവകാ​ശ​വും​മ​റ്റും ഈ കരാർ ഉറപ്പു​വ​രു​ത്തു​ന്നു. മറ്റ്‌ നിവേ​ദ​ന​ങ്ങ​ളിൽ, മതത്തിന്റെ പേരി​ലുള്ള വിവേ​ചനം, പീഡനം, വേലയു​ടെ സംഘാ​ട​ന​ത്തി​നാ​യി യഹോ​വ​യു​ടെ സാക്ഷികൾ ഉപയോ​ഗി​ക്കുന്ന നിയമാ​നു​സൃത കോർപ്പ​റേ​ഷന്റെ രജിസ്‌​ട്രേഷൻ റദ്ദാക്കു​ക​യോ നിരോ​ധി​ക്കു​ക​യോ ചെയ്യൽ, സമാധാ​ന​പ​ര​മാ​യി ആരാധ​ന​യ്‌ക്ക്‌ കൂടി​വ​രാ​നുള്ള അവകാ​ശ​ത്തി​ന്മേ​ലുള്ള ഗവണ്മെ​ന്റി​ന്റെ കൈക​ടത്തൽ, സാക്ഷി​യായ ഒരു മാതാ​വിന്‌ തന്റെ കുട്ടിയെ ഒരു യഹോ​വ​യു​ടെ സാക്ഷി​യാ​യി വളർത്തി​ക്കൊ​ണ്ടു​വ​രു​ന്ന​തി​നുള്ള അവകാശം എന്നിവ ഉൾപ്പെ​ടു​ന്നു.

ഓസ്‌ട്രിയ

യഹോ​വ​യു​ടെ സാക്ഷി​ക​ളും ഓസ്‌ട്രി​യ​യും കക്ഷിക​ളാ​യുള്ള കേസിൽ 2008 ജൂലൈ 31-ന്‌ യൂറോ​പ്യൻ മനുഷ്യാ​വ​കാശ കോടതി സാക്ഷി​കൾക്ക്‌ അനുകൂ​ല​മായ ഒരു വിധി പ്രഖ്യാ​പി​ക്കു​ക​യു​ണ്ടാ​യി. ആരാധ​നാ​സ്വാ​ത​ന്ത്ര്യ​ത്തി​നുള്ള സാക്ഷി​ക​ളു​ടെ അവകാ​ശത്തെ ലംഘി​ക്കു​ന്ന​താണ്‌ ഓസ്‌ട്രി​യ​യു​ടെ മതനി​യമം എന്ന്‌ കോടതി ആരോ​പി​ച്ചു. മതാചാ​ര​ങ്ങ​ളോ​ടു ബന്ധപ്പെട്ട ഓസ്‌ട്രി​യ​യു​ടെ ചിറ്റമ്മ​നയം സമൂഹ​ത്തിൽ രണ്ടുത​ട്ടി​ലുള്ള മതവി​ഭാ​ഗ​ങ്ങളെ വാർത്തെ​ടു​ക്കു​ക​യാ​ണെ​ന്നും അങ്ങനെ, ഒരുകൂ​ട്ടം മതങ്ങളെ താഴേ​ക്കി​ട​യി​ലുള്ള മതങ്ങ​ളെന്നു മുദ്ര​കു​ത്തി അതുവഴി അധഃകൃത പൗരന്മാ​രെ സൃഷ്ടി​ക്കു​ക​യാ​ണെ​ന്നും കോടതി കുറ്റ​പ്പെ​ടു​ത്തി. ഓസ്‌ട്രി​യ​യിൽ സാക്ഷി​കൾക്ക്‌ ഒരു അംഗീ​കൃത മതമെന്ന അംഗീ​കാ​രം ലഭിക്കാൻ നമ്മുടെ സഹോ​ദ​രങ്ങൾ 30 വർഷമാ​യി അക്ഷീണം പ്രയത്‌നി​ക്കു​ക​യാ​യി​രു​ന്നു. കോട​തി​യു​ടെ പ്രസ്‌താ​വന ഇതാണ്‌: “[സുദീർഘ​മായ ഈ കാത്തി​രി​പ്പി​നെ] ന്യായീ​ക​രി​ക്കാൻ യാതൊ​രു കാരണ​വു​മില്ല; അതും യഹോ​വ​യു​ടെ സാക്ഷി​ക​ളെ​പ്പോ​ലെ അന്താരാ​ഷ്‌ട്ര​ത​ല​ത്തിൽ അറിയ​പ്പെ​ടു​ന്ന​തും ഈ രാജ്യ​ത്തു​തന്നെ ദീർഘ​നാ​ളാ​യി പ്രവർത്ത​ന​ത്തി​ലി​രി​ക്കു​ന്ന​തും അധികാ​രി​കൾക്ക്‌ സുപരി​ചി​ത​വു​മായ മതവി​ഭാ​ഗ​ങ്ങ​ളു​ടെ കാര്യ​ത്തിൽ.” ഓസ്‌ട്രി​യ​യി​ലെ മുഖ്യ​ധാ​രാ മതവി​ഭാ​ഗ​ങ്ങ​ളു​ടെ അതേ അവകാ​ശങ്ങൾ നമ്മുടെ സഹോ​ദ​ര​ങ്ങൾക്കും ലഭ്യമാ​കും​വി​ധം അവിടത്തെ ഭരണകൂ​ട​ത്തിന്‌ ചില നിയമ​ഭേ​ദ​ഗ​തി​കൾ വരു​ത്തേ​ണ്ട​താ​യി​ട്ടുണ്ട്‌.

അസർബൈജാൻ

2007 നവംബ​റിൽ യൂറോ​പ്യൻ മനുഷ്യാ​വ​കാശ കോട​തി​യിൽ ഒരു നിവേ​ദനം സമർപ്പി​ക്കു​ക​യു​ണ്ടാ​യി. ആരാധ​ന​യ്‌ക്കുള്ള നമ്മുടെ അവകാ​ശ​ത്തി​ന്മേൽ പോലീ​സു​കാർ കൈക​ട​ത്തി​യ​തി​നാ​യി​രു​ന്നു അത്‌. അസർ​ബൈ​ജാ​നിൽ യഹോ​വ​യു​ടെ സാക്ഷി​കൾക്ക്‌ നിയമാം​ഗീ​കാ​ര​മു​ണ്ടെ​ങ്കി​ലും നിരവധി അറസ്റ്റു​ക​ളും ഉപദ്ര​വ​ങ്ങ​ളും സഹോ​ദ​ര​ങ്ങൾക്കു നേരി​ടേ​ണ്ടി​വ​ന്നി​ട്ടുണ്ട്‌. സാക്ഷികൾ സമാധാ​ന​ത്തോ​ടെ യോഗങ്ങൾ നടത്തി​ക്കൊ​ണ്ടി​രി​ക്കു​മ്പോൾ സായു​ധ​രായ പോലീ​സു​കാർ കൂട്ട​ത്തോ​ടെ വന്ന്‌ റെയ്‌ഡു​ചെ​യ്യു​ക​യും സാഹി​ത്യ​ങ്ങ​ളും സ്വകാ​ര്യ​വ​സ്‌തു​ക്ക​ളും കണ്ടു​കെ​ട്ടു​ക​യും ചെയ്‌തു. അതു​പോ​ലെ അവിടെ കൂടി​വ​ന്നി​രി​ക്കു​ന്ന​വരെ അറസ്റ്റു​ചെ​യ്യു​ക​യും കസ്റ്റഡി​യിൽവെ​ക്കു​ക​യും  സഹോ​ദ​രീ​സ​ഹോ​ദ​ര​ന്മാ​രെ ശാരീ​രി​ക​മാ​യി ഉപദ്ര​വി​ക്കു​ക​യും അധി​ക്ഷേ​പി​ക്കു​ക​യും ചെയ്യു​ക​യു​ണ്ടാ​യി. പോലീസ്‌ റെയ്‌ഡു​കൾ തുടർക്ക​ഥ​യാ​യ​തോ​ടെ കാര്യ​ത്തി​ന്റെ ഗൗരവം കോട​തിക്ക്‌ മനസ്സി​ലാ​യി. ഇക്കാര്യം പരിഗ​ണി​ക്കാ​നുള്ള നടപടി​ക്ര​മങ്ങൾ അടിയ​ന്തി​ര​ത​യോ​ടെ പുരോ​ഗ​മി​ച്ചു​വ​രു​ന്നു. പോലീ​സു​കാ​രു​ടെ ഭീഷണി​യി​ല്ലാ​തെ നമ്മുടെ സഹോ​ദ​ര​ങ്ങൾക്ക്‌ സമാധാ​ന​ത്തോ​ടെ യോഗങ്ങൾ നടത്താൻ പെട്ടെ​ന്നു​തന്നെ കഴിയു​മെന്ന്‌ നമുക്കു പ്രത്യാ​ശി​ക്കാം.

ഫ്രാൻസ്‌

യഹോ​വ​യു​ടെ സാക്ഷി​ക​ളു​ടെ​മേൽ ഫ്രഞ്ചു​ഗ​വ​ണ്മെന്റ്‌ ന്യായ​ര​ഹി​ത​വും നിയമ​വി​രു​ദ്ധ​വു​മായ രീതി​യിൽ നികുതി ചുമത്തു​ക​യു​ണ്ടാ​യി. ഇതി​നെ​തി​രെ സാക്ഷികൾ 2005 ഫെബ്രു​വ​രി​യിൽ യൂറോ​പ്യൻ മനുഷ്യാ​വ​കാശ കോട​തി​യിൽ ഒരു നിവേ​ദനം സമർപ്പി​ച്ചു. കോടതി ഈ കേസ്‌ പരിഗ​ണ​ന​യ്‌ക്കെ​ടു​ക്കു​മോ​യെന്ന്‌ ഇതുവരെ അറിവാ​യി​ട്ടില്ല. ഇതിനി​ട​യ്‌ക്ക്‌, എതിരാ​ളി​കൾ നമ്മുടെ വിശ്വാ​സ​ങ്ങളെ കരി​തേ​ച്ചു​കാ​ണി​ച്ച​തി​ന്റെ ഫലമായി കഴിഞ്ഞ​വർഷം നമ്മുടെ രാജ്യ​ഹാ​ളു​കൾ അടിച്ചു​ത​കർത്ത ഏതാണ്ട്‌ 70 സംഭവ​ങ്ങ​ളു​ണ്ടാ​യി. എന്നാൽ ഗവണ്മെന്റ്‌ വിവേ​ച​നാ​പ​ര​മാ​യി ഇടപെ​ട്ടു​വെന്ന്‌ കോടതി ചൂണ്ടി​ക്കാ​ട്ടു​മെ​ന്നും അങ്ങനെ ഫ്രാൻസിൽ സാഹച​ര്യം മെച്ച​പ്പെ​ടു​മെ​ന്നു​മുള്ള പ്രതീ​ക്ഷ​യി​ലാണ്‌ അവിടത്തെ സഹോ​ദ​രങ്ങൾ.

റഷ്യ

2001 ഡിസം​ബ​റിൽ റഷ്യയി​ലെ യഹോ​വ​യു​ടെ സാക്ഷികൾ യൂറോ​പ്യൻ മനുഷ്യാ​വ​കാശ കോട​തി​യിൽ ഒരു നിവേ​ദനം സമർപ്പി​ച്ചു. യഹോ​വ​യു​ടെ സാക്ഷി​കൾക്ക്‌ എതിരെ ക്രിമി​നൽ-സിവിൽ കേസുകൾ ചാർജു​ചെ​യ്യു​ന്നത്‌ ഒരു പതിവാ​യ​തോ​ടെ​യാണ്‌ അവർ ഇത്തരത്തിൽ നിയമ​സ​ഹാ​യം തേടി​യത്‌. മോസ്‌കോ​യിൽ യഹോ​വ​യു​ടെ സാക്ഷി​ക​ളു​ടെ പ്രവർത്തനം നിരോ​ധി​ക്കാ​നും അവർ നിയമ​പ​ര​മാ​യി ഉപയോ​ഗി​ക്കുന്ന കോർപ്പ​റേ​ഷനെ പിരി​ച്ചു​വി​ടാ​നും ഒരു കീഴ്‌ക്കോ​ടതി തീരു​മാ​നി​ച്ചി​രു​ന്നു. 2004 ജൂണിൽ, മോസ്‌കോ സിറ്റി കോട​തി​യാ​കട്ടെ, കീഴ്‌ക്കോ​ട​തി​യു​ടെ ആ തീരു​മാ​നം ശരി​വെ​ക്കു​ക​യാ​ണു​ണ്ടാ​യത്‌. മോസ്‌കോ​യിൽ മിക്കയി​ട​ങ്ങ​ളി​ലും സഹോ​ദ​ര​ങ്ങൾക്ക്‌ ആരാധ​ന​യ്‌ക്കു കൂടി​വ​രാ​നും സുവാർത്ത പ്രസം​ഗി​ക്കാ​നു​മുള്ള ഒരു സാഹച​ര്യം ഇപ്പോ​ഴുണ്ട്‌. എന്നിരു​ന്നാ​ലും, മോസ്‌കോ​യിൽത്ത​ന്നെ​യും റഷ്യയു​ടെ മറ്റുചില ഭാഗങ്ങ​ളി​ലും, യോഗ​ങ്ങ​ളും സമ്മേള​ന​ങ്ങ​ളും നടക്കു​മ്പോൾ അധികാ​രി​കൾ ഇടപെ​ടു​ക​യും നമ്മുടെ സഹോ​ദ​രീ​സ​ഹോ​ദ​ര​ന്മാ​രെ മറ്റു വിധങ്ങ​ളിൽ ഉപദ്ര​വി​ക്കു​ക​യും ചെയ്യു​ന്ന​താ​യുള്ള നിരവധി സംഭവങ്ങൾ റിപ്പോർട്ടു ചെയ്യ​പ്പെ​ടു​ക​യു​ണ്ടാ​യി. അങ്ങനെ​യൊ​ന്നാണ്‌ ജൂലൈ മാസത്തിൽ ചെക്കോവ്‌ പട്ടണത്തിൽ നടന്നത്‌. മോസ്‌കോ​യിൽനിന്ന്‌ ഏകദേശം 60 കിലോ​മീ​റ്റർ തെക്കു മാറി​യാണ്‌ ചെക്കോവ്‌. അവിടത്തെ രാജ്യ​ഹാൾ ഒരുകൂ​ട്ടം ആളുകൾ തീവെ​ച്ചു​ന​ശി​പ്പി​ച്ചു. അഗ്നിശ​മ​ന​സേ​നയെ ഉടൻ വിവര​മ​റി​യി​ച്ചെ​ങ്കി​ലും തീയണ​യ്‌ക്കാൻ അവർ കാര്യ​മാ​യി ഒന്നും  ചെയ്‌തി​ല്ലെന്ന്‌ ദൃക്‌സാ​ക്ഷി​കൾ പറയുന്നു. ഇതേക്കു​റി​ച്ചുള്ള ഒരന്വേ​ഷണം ആരംഭി​ക്കാൻപോ​ലും പോലീ​സു​കാർ ഇതുവരെ കൂട്ടാ​ക്കി​യി​ട്ടില്ല. ബുദ്ധി​മു​ട്ടും എതിർപ്പു​ക​ളു​മൊ​ക്കെ ഉണ്ടെങ്കി​ലും റഷ്യയി​ലെ നമ്മുടെ സഹോ​ദ​രീ​സ​ഹോ​ദ​ര​ന്മാർ വിശ്വ​സ്‌ത​രാ​യി നില​കൊ​ള്ളു​ക​യും പിന്തു​ണ​യ്‌ക്കാ​യി യഹോ​വ​യിൽ ആശ്രയി​ക്കു​ക​യും ചെയ്യുന്നു.

തന്റെ ജനത്തി​നെ​തി​രെ ഉണ്ടാക്കുന്ന യാതൊ​രു ആയുധ​വും ഫലിക്കു​ക​യി​ല്ലെന്ന്‌ യഹോവ വാഗ്‌ദാ​നം ചെയ്‌തി​ട്ടുണ്ട്‌. (യെശ. 54:17) ചില​പ്പോൾ അങ്ങേയറ്റം പ്രതി​കൂ​ല​മായ സാഹച​ര്യ​ങ്ങൾപോ​ലും “സുവി​ശേ​ഷ​ത്തി​ന്റെ അഭിവൃ​ദ്ധി​ക്കു കാരണ​മാ​യി”ത്തീർന്നേ​ക്കാം. “ഏകാത്മാ​വിൽ നിലനി​ന്നു എതിരാ​ളി​ക​ളാൽ ഒന്നിലും കുലു​ങ്ങി​പ്പോ​കാ​തെ ഏകമന​സ്സോ​ടെ സുവി​ശേ​ഷ​ത്തി​ന്റെ വിശ്വാ​സ​ത്തി​ന്നാ​യി പോരാ​ട്ടം”കഴിക്കാൻ ദൃഢചി​ത്ത​രാണ്‌ ദൈവ​ദാ​സ​ന്മാർ. (ഫിലി. 1:12, 16, 18, 27, 28) ലോക​മെ​മ്പാ​ടു​മുള്ള നമ്മുടെ ഈ സഹോ​ദ​രീ​സ​ഹോ​ദ​ര​ന്മാർ തങ്ങളുടെ ‘കോട്ട​യും രക്ഷകനു​മായ’ യഹോ​വ​യിൽ ആശ്രയി​ക്കു​മ്പോൾ സഹോ​ദ​ര​ങ്ങളേ, നിങ്ങൾ അവർക്കു​വേണ്ടി പ്രാർഥി​ക്കു​മ​ല്ലോ.—2 തെസ്സ. 3:2; സങ്കീ. 18:2.

ബ്രാഞ്ച്‌ സമർപ്പ​ണ​ങ്ങൾ

2007 നവംബർ 10 ശനിയാഴ്‌ച, ദക്ഷിണാ​ഫ്രിക്ക ബ്രാഞ്ചി​നെ സംബന്ധി​ച്ചി​ട​ത്തോ​ളം ഒരു അവിസ്‌മ​ര​ണീയ ദിനം. അവിടത്തെ വിപു​ലീ​ക​രിച്ച അച്ചടി​ശാല, ഡൈനിങ്‌ ഹാൾ, താമസ​സൗ​ക​ര്യ​ങ്ങൾ എന്നിവ​യു​ടെ സമർപ്പ​ണ​ത്തി​നാ​യി ഏകദേശം 4,000 സഹോ​ദ​രങ്ങൾ എത്തി​ച്ചേർന്നു.

വിപു​ലീ​ക​രി​ച്ച അച്ചടി​ശാല സന്ദർശി​ച്ചവർ, അവിടത്തെ എംഎഎൻ റോളണ്ട്‌ ലിഥോ​മൻ പ്രസ്സിൽനി​ന്നും പതിനാ​യി​ര​ക്ക​ണ​ക്കി​നു ബൈബി​ളു​ക​ളും ബൈബിൾ സാഹി​ത്യ​ങ്ങ​ളും ഇടതട​വി​ല്ലാ​തെ ‘ഒഴുകു​ന്നത്‌’ അതിശ​യ​ത്തോ​ടെ​യാണ്‌ കണ്ടുനി​ന്നത്‌. പുസ്‌ത​ക​ങ്ങ​ളും മറ്റും ബയന്റു ചെയ്യുന്ന പുതിയ ബയന്ററി 16 ആഫ്രിക്കൻ ഭാഷക​ളി​ലാ​യി പുതിയ ലോക ഭാഷാ​ന്ത​ര​ത്തി​ന്റെ പത്തുല​ക്ഷ​ത്തി​ലേറെ കോപ്പി​കൾ ഇതി​നോ​ടകം തയ്യാറാ​ക്കി​ക്ക​ഴി​ഞ്ഞു. ദക്ഷിണാ​ഫ്രി​ക്ക​യി​ലെ പത്തുരാ​ജ്യ​ങ്ങ​ളി​ലുള്ള 8,000-ത്തോളം സഭകൾക്ക്‌ ആവശ്യ​മായ ബൈബിൾ സാഹി​ത്യ​ങ്ങൾ സൂക്ഷി​ക്കുന്ന ബ്രാഞ്ച്‌ ഓഫീ​സി​ലെ പുതു​താ​യി വിപു​ലീ​ക​രിച്ച ഷിപ്പിങ്‌ വിഭാ​ഗ​വും സന്ദർശ​കർക്ക്‌ കാണാൻ കഴിഞ്ഞു.

നൈജീ​രി​യ​യി​ലെ വിപു​ലീ​ക​രിച്ച ബ്രാഞ്ച്‌ സൗകര്യ​ങ്ങ​ളു​ടെ സമർപ്പണം 2008 ജൂൺ 7-ന്‌ നടന്നു. നൈജീ​രി​യ​യി​ലെ ഇഗേദൂ​മാ​യി​ലുള്ള ബെഥേ​ലിൽ നിന്ന്‌ 360 കിലോ​മീ​റ്റർ തെക്കു​പ​ടി​ഞ്ഞാ​റാ​യി​ട്ടാണ്‌ ലാഗോ​സി​ലെ ഈ പുതിയ ബ്രാഞ്ച്‌ കെട്ടിടം. താമസ​ത്തി​നാ​യുള്ള 24 മുറികൾ, ഒരു സംഭര​ണ​ശാല, ഒരു ഓഫീസ്‌ കെട്ടിടം ഇത്രയു​മ​ട​ങ്ങു​ന്ന​താണ്‌ ലാഗോ​സി​ലെ ഓഫീസ്‌. രാജ്യ​ത്തി​ന്റെ സാമ്പത്തിക തലസ്ഥാ​ന​മായ ഇവി​ടെ​യാണ്‌  ബ്രാഞ്ചി​ന്റെ പല ജോലി​ക​ളും നിർവ​ഹി​ക്കു​ന്നത്‌. തുറമു​ഖ​ത്തു​നിന്ന്‌ ചരക്കുകൾ എടുക്കു​ക​യും ബ്രാഞ്ചി​ലേ​ക്കു​ളള സാധനങ്ങൾ വാങ്ങു​ക​യും ചെയ്യുന്ന ബെഥേൽ അംഗങ്ങൾക്കും അതു​പോ​ലെ വിമാ​ന​മാർഗം വന്നു​പോ​കുന്ന മറ്റുള്ള​വർക്കും ഉള്ള താമസ​സൗ​ക​ര്യ​വും ഇവി​ടെ​യുണ്ട്‌. ഇഗേദൂ​മാ​യി​ലെ ബ്രാഞ്ച്‌ വിപു​ലീ​ക​രണം പൂർത്തി​യാ​കു​ന്ന​തു​വരെ ഇപ്പോൾ ശുശ്രൂ​ഷാ പരിശീ​ലന സ്‌കൂൾ നടത്തു​ന്ന​തും ലാഗോ​സി​ലാണ്‌. അതെ, യഹോവ പ്രസം​ഗ​വേ​ല​യു​ടെ​മേൽ അനു​ഗ്രഹം വർഷി​ക്കു​ക​യാണ്‌, ഭൂമി​യു​ടെ മറ്റു ഭാഗങ്ങ​ളി​ലേ​തു​പോ​ലെ ഇവിടെ ആഫ്രി​ക്ക​യി​ലും.

ദൈ​വേഷ്ടം ചെയ്യാൻ സജ്ജർ

തന്റെ “ഇഷ്ടം ചെയ്‌വാൻത​ക്ക​വണ്ണം എല്ലാന​ന്മ​യി​ലും യഥാസ്ഥാ​ന​പ്പെ​ടു​ത്തി തനിക്കു പ്രസാ​ദ​മു​ള്ളതു യേശു​ക്രി​സ്‌തു​മു​ഖാ​ന്തരം നമ്മിൽ നിവർത്തി”ക്കാൻ യഹോവ നമ്മെ സജ്ജരാ​ക്കു​ന്ന​തിൽ അവനോട്‌ എത്ര നന്ദിയു​ള്ള​വ​രാ​ണു നാം! (എബ്രാ. 13:21) “നാം ചോദി​ക്കു​ന്ന​തി​ലും നിനെ​ക്കു​ന്ന​തി​ലും അത്യന്തം പരമായി ചെയ്‌വാൻ . . . കഴിയുന്ന”വനാണ്‌ താനെന്ന്‌ യഹോവ തെളി​യി​ച്ചു​ക​ഴി​ഞ്ഞു. അതു​കൊണ്ട്‌ അവന്‌ “സഭയി​ലും ക്രിസ്‌തു​യേ​ശു​വി​ലും എന്നേക്കും തലമു​റ​ത​ല​മു​റ​യാ​യും മഹത്വം ഉണ്ടാകട്ടെ” എന്ന്‌ നാം ഹൃദയം​ഗ​മ​മാ​യി ഘോഷി​ക്കു​ന്നു.—എഫെ. 3:20, 21.

[25-ാം പേജിലെ ചതുരം]

മതം രജിസ്റ്റർ ചെയ്യു​ന്നത്‌ എന്തിന്‌, എങ്ങനെ?

പല രാജ്യ​ത്തും പല രീതി​യി​ലാണ്‌ മതം രജിസ്റ്റർ ചെയ്യു​ന്നത്‌. അർമേ​നിയ, അസർ​ബൈ​ജാൻ പോലുള്ള ചില രാജ്യ​ങ്ങ​ളിൽ മതസം​ഘ​ട​ന​ക​ളു​ടെ നിയമ​പ​ര​മായ രജിസ്‌​ട്രേ​ഷ​നും അംഗീ​കാ​ര​ത്തി​നും വേണ്ടി അപേക്ഷി​ക്കാൻ അനുവ​ദി​ക്കുന്ന വ്യക്തമായ നിയമ​ങ്ങ​ളുണ്ട്‌. അപേക്ഷ അംഗീ​ക​രി​ക്ക​പ്പെ​ടു​ന്ന​പക്ഷം ആ മതം രാജ്യത്തെ ഒരു ഔദ്യോ​ഗിക മതമാ​യി​ത്തീ​രും. മറ്റു ചില രാജ്യ​ങ്ങ​ളിൽ രണ്ടുത​ര​ത്തി​ലുള്ള രജിസ്‌​ട്രേ​ഷ​നുണ്ട്‌. ആദ്യ​ത്തേത്‌ പ്രമുഖ, പരമ്പരാ​ഗത മതങ്ങൾക്കു​ള്ള​താണ്‌. ഈ രജിസ്‌​ട്രേഷൻ ലഭിക്കുന്ന മതങ്ങൾക്ക്‌ നികുതി ഒഴിവും മറ്റ്‌ ആനുകൂ​ല്യ​ങ്ങ​ളും ലഭിക്കും. രണ്ടാമത്തെ രജിസ്‌​ട്രേഷൻ താരത​മ്യേന ചെറി​യ​തും പുതി​യ​തു​മായ മതങ്ങൾക്കു​ള്ള​താണ്‌.

ജോർജി​യ​യും അമേരി​ക്കൻ ഐക്യ​നാ​ടു​ക​ളും പോലുള്ള രാജ്യ​ങ്ങ​ളി​ലാ​കട്ടെ, മതങ്ങളു​ടെ രജിസ്‌​ട്രേഷൻ സംബന്ധിച്ച്‌ നിയമ​വ്യ​വ​സ്ഥ​ക​ളൊ​ന്നും നിലവി​ലില്ല, ഭരണഘടന എല്ലാവർക്കും മതസ്വാ​ത​ന്ത്ര്യം അനുവ​ദി​ക്കു​ന്നുണ്ട്‌. എന്നാൽ അവിടെ മതവി​ഭാ​ഗ​ങ്ങൾക്ക്‌ ഔദ്യോ​ഗി​ക​മതം ആയിട്ടുള്ള അംഗീ​കാ​ര​മൊ​ന്നും ലഭിക്കി​ല്ലെ​ങ്കി​ലും ഒരു നിയമാ​നു​സൃത കോർപ്പ​റേ​ഷ​നെന്ന നിലയി​ലുള്ള രജിസ്‌​ട്രേ​ഷ​നു​വേണ്ടി അപേക്ഷി​ക്കാ​വു​ന്ന​താണ്‌. അങ്ങനെ രജിസ്റ്റർ ചെയ്യ​പ്പെ​ടു​ന്ന​പക്ഷം ആ കോർപ്പ​റേ​ഷന്റെ പേരിൽ അവർക്ക്‌ സാഹി​ത്യ​ങ്ങൾ അച്ചടിച്ചു പ്രസി​ദ്ധീ​ക​രി​ക്കാ​നും സ്വത്തുക്കൾ വാങ്ങാ​നും മറ്റു പ്രവർത്ത​നങ്ങൾ നടത്താ​നും സാധി​ക്കും.

[11-ാം പേജിലെ മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

ഓസ്‌ട്രിയ

ഫ്രാൻസ്‌

സ്‌പെയിൻ

ഗ്രീസ്‌

എറിട്രിയ

റുവാണ്ട

അർമേനിയ

അസർബൈജാൻ

റഷ്യ

കസാഖ്‌സ്ഥാൻ

ഉസ്‌ബക്കിസ്ഥാൻ

തജികിസ്ഥാൻ

ദക്ഷിണ കൊറിയ

[11-ാം പേജിലെ ചിത്രം]

ലൂവോഭാഷ സംസാ​രി​ക്കുന്ന സിയായാ സഭ

[13-ാം പേജിലെ ചിത്രം]

പൂർണമായോ ഭാഗി​ക​മാ​യോ “പുതിയ ലോക ഭാഷാ​ന്തരം” 70-ലധികം ഭാഷക​ളിൽ ലഭ്യമാണ്‌

[22-ാം പേജിലെ ചിത്രം]

സ്റ്റിലിയാനോസ്‌ യോ​വേ​നീ​ത്തീസ്‌

[22-ാം പേജിലെ ചിത്രം]

കോൺസ്റ്റാന്റിനോസ്‌ കോറ്റി​ഡിസ്‌

[29-ാം പേജിലെ ചിത്രം]

നൈജീരിയയിലെ ലാഗോ​സി​ലുള്ള പുതിയ താമസ​സ്ഥ​ലം

[29-ാം പേജിലെ ചിത്രം]

അച്ചടിശാല, ദക്ഷിണാ​ഫ്രിക്ക ബ്രാഞ്ച്‌