സൗന്ദര്യം എത്ര പ്രധാനമാണ്?
അധ്യായം 10
സൗന്ദര്യം എത്ര പ്രധാനമാണ്?
നിങ്ങളുടെ മുഖഛായ നിങ്ങൾക്കിഷ്ടമല്ലേ? കൊളളാം, നമ്മിൽ ആരും തന്നെ നമ്മുടെ മുഖഛായ സംബന്ധിച്ച് പൂർണ്ണമായും തൃപ്തരല്ല. ഒരു ജലാശയത്തിൽ കണ്ട തന്റെ പ്രതിബിംബത്തിൽ അനുരക്തനായ നർസ്സിസൂസ്സിൽ നിന്നും വ്യത്യസ്തമായി നമ്മിൽ പലരും നമ്മുടെ പ്രതിബിംബം കാണുമ്പോൾ വിഷാദമഗ്നരായിത്തീരുന്നു.
‘എനിക്ക് എന്റെ ശരീരം അത്ര ഇഷ്ടമല്ല,’ പതിനാറു വയസ്സുകാരി മരിയ ആവലാതിപ്പെടുന്നു. ‘എനിക്ക് വേണ്ടത്ര സൗന്ദര്യമില്ല എന്നു ഞാൻ കരുതുന്നു.’ പതിമൂന്നു വയസ്സുളള ബോബിനും അതുപോലൊരു പരാതിയുണ്ട്: ‘എനിക്ക് എന്റെ തലമുടി ഇഷ്ടമല്ല, അതു പുറകിൽ ഇങ്ങനെ എഴുന്നു നിൽക്കും.’ അതിലും മോശമായി, കൗമാരപ്രായക്കാരുടെ പ്രത്യക്ഷത വളരെ വേഗം മാറിക്കൊണ്ടിരിക്കുന്നതുകൊണ്ട്, ഒരു മനശ്ശാസ്ത്രജ്ഞൻ പറഞ്ഞപ്രകാരം യുവജനങ്ങൾക്ക് മിക്കപ്പോഴും “തങ്ങളുടെ സ്വന്തം ശരീരം അപരിചിതമായി തോന്നുന്നു.” അതുകൊണ്ട് പലരും തങ്ങളുടെ മുഖം, മുടി, ആകൃതി ശരീരഘടന എന്നിവ സംബന്ധിച്ച് ഉൽക്കണ്ഠപ്പെടുന്നു.
തീർച്ചയായും ദൈവം പോലും സൗന്ദര്യത്തെ വിലമതിക്കുന്നു. സഭാപ്രസംഗി 3:11 പറയുന്നു: “[ദൈവം] സകലതും അതിന്റെ സമയത്ത് സുന്ദരമായി നിർമ്മിച്ചിരിക്കുന്നു.” നിങ്ങളുടെ ആകാരത്തിന് വാസ്തവത്തിൽ മററുളളവർ നിങ്ങളെ വീക്ഷിക്കുകയും നിങ്ങളോട് ഇടപെടുകയും ചെയ്യുന്ന വിധത്തെ ആഴമായി ബാധിക്കാൻ കഴിയും. ഡോ. ജെയിംസ് പി. കോമർ ഇപ്രകാരം കൂട്ടിച്ചേർക്കുന്നു: “ശരീരത്തിന്റെ രൂപം വ്യക്തിയുടെ രൂപത്തിന്റെ ഒരു ഭാഗമാണ്. അതിന് ഒരു വ്യക്തിയുടെ ആത്മധൈര്യത്തെയും അയാൾ ജീവിതത്തിൽ എന്തു ചെയ്യുന്നു എന്തു ചെയ്യുന്നില്ല എന്നതിനെയും ബാധിക്കാൻ കഴിയും.” അതുകൊണ്ട് നിങ്ങളുടെ ആകാരം സംബന്ധിച്ച് ആരോഗ്യാവഹമായ ഒരു താല്പര്യം ഉണ്ടായിരിക്കുന്നത് അർത്ഥവത്താണ്. എന്നിരുന്നാലും മററുളളവരിൽ നിന്ന് അകന്നു മാറാനും നിങ്ങളെപ്പററി മോശമായി ചിന്തിക്കാനും തക്കവണ്ണം ശക്തമാണ് ആ താല്പര്യമെങ്കിൽ അതു അപ്പോൾ ആരോഗ്യകരമല്ല.
നിങ്ങൾക്ക് ആകർഷകത്വം ഇല്ലെന്ന് ആരു പറയുന്നു?
രസാവഹമായി, വ്യക്തിപരമായ ആകാരം സംബന്ധിച്ച ദുഃഖം ഏതെങ്കിലും ശാരീരിക വൈകല്യം നിമിത്തം ഉണ്ടാകുന്നതല്ല. ഒരു മെലിഞ്ഞ പെൺകുട്ടി ക്ലാസ്സിലിരുന്നു തനിക്ക് അല്പംകൂടി വണ്ണം ഉണ്ടായിരുന്നെങ്കിൽ എന്ന് ആഗ്രഹിക്കുന്നു. അതേസമയം മറുവശത്ത്
ഒരു മെഴുത്ത പെൺകുട്ടി തന്റെ “തടി”യെപ്പററി ആവലാതിപ്പെടുന്നു. അത്തരം അസംതൃപ്തി എവിടെ നിന്നാണ് വരുന്നത്? നല്ല ആരോഗ്യമുളള യുവജനങ്ങൾ തങ്ങൾ അനാകർഷകരാണെന്ന് വിചാരിക്കാൻ ഇടയാക്കുന്നത് എന്താണ്?ഒരു മനോരോഗ പ്രൊഫസ്സറായ റിച്ചാർഡ് എം. സാൾസ് പറയുന്നു: “കൗമാരപ്രായം ശരീരത്തിൽ സുപ്രധാനമായ പുനഃഘടന നടക്കുന്ന മാററങ്ങളുടെതായ ഒരു കാലഘട്ടമാണ് . . . നവവും മാററങ്ങൾക്ക് വിധേയമായിക്കൊണ്ടിരിക്കുന്നതുമായ ഒരു ശരീരത്തിന്റെ വൈകൃതത്തെ നേരിടാൻ മിക്ക കൗമാരപ്രായക്കാരും തങ്ങളുടെ സമപ്രായക്കാരിൽ നിന്ന് ലഭിക്കുന്ന സുരക്ഷിതത്വത്തെ ആശ്രയിക്കുന്നു.” എന്നാൽ നിങ്ങളുടെ സമപ്രായക്കാരുടെ സൂക്ഷ്മപരിശോധനയിൻ കീഴിൽ നിങ്ങൾക്ക് എന്ത് ഉയരമുണ്ട്, നിങ്ങൾ എത്ര കുറിയവനാണ്, എത്ര തടിച്ചവനാണ് അല്ലെങ്കിൽ മെലിഞ്ഞവനാണ്—നിങ്ങളുടെ മൂക്കിന്റെയും ചെവിയുടെയും ആകൃതിയെപ്പററി പറയാതിരിക്കുകയാണ് ഭേദം—എന്നിവയൊക്കെ വലിയ ഉൽക്കണ്ഠയുടെ ഉറവായിത്തീരാൻ കഴിയും. മററുളളവർക്ക് നിങ്ങളെക്കാൾ കൂടുതൽ ശ്രദ്ധ കിട്ടുകയോ അല്ലെങ്കിൽ നിങ്ങളുടെ അഴകില്ലായ്മയെപ്പററി ആരെങ്കിലും ആക്ഷേപിക്കുകയോ ചെയ്യുമ്പോൾ നിങ്ങൾ വളരെ മോശക്കാരാണെന്ന് നിങ്ങൾക്ക് തോന്നിയേക്കാം.
കൂടാതെ ടെലിവിഷന്റെയും പുസ്തകങ്ങളുടെയും സിനിമയുടെയും വ്യാപകമായ സ്വാധീനവുമുണ്ട്. സുഗന്ധദ്രവ്യങ്ങൾ മുതൽ ഈർച്ചവാളുകൾ വരെ വിൽക്കുന്ന സൗന്ദര്യമുളള സ്ത്രീപുരുഷൻമാർ ടെലിവിഷൻ സ്ക്രീനിൽനിന്നും മാസികകളുടെ പേജുകളിൽ നിന്നും നമ്മെ തുറിച്ചുനോക്കുന്നു. നിങ്ങൾ ഒരു സർവ്വാംഗ സുന്ദരിയോ ദൃഢപേശിയുളള “മല്ലനോ” അല്ലെങ്കിൽ നിങ്ങൾ എവിടെയെങ്കിലും പൊത്തിൽ കയറി ഒളിച്ചുകൊണ്ടാൽ മതി, ഏതായാലും ജനപ്രീതി നേടുന്നതോ സന്തുഷ്ടരായിരിക്കുന്നതോ മറന്നു കളഞ്ഞേക്കുക എന്നാണ് ഇന്നത്തെ വാർത്താമാദ്ധ്യമങ്ങൾ നിങ്ങളെ വിശ്വസിപ്പിക്കാൻ ശ്രമിക്കുന്നത്.
‘അവരുടെ മൂശയിലേക്ക് ഞെക്കി കയററാൻ’ അനുവദിക്കരുത്!
നിങ്ങൾ വിലക്ഷണനോ വിലക്ഷണയോ ആണെന്ന് തീരുമാനിക്കുന്നതിനുമുമ്പായി നിങ്ങളുടെ ശാരീരികമായ കുറവുകൾ എത്രത്തോളം യഥാർത്ഥമാണ് അല്ലെങ്കിൽ ഭാവനാസൃഷ്ടിയാണ് എന്ന് നിങ്ങളോടുതന്നെ ചോദിക്കുക. നിങ്ങളെ ഉൽക്കണ്ഠപ്പെടുത്തുന്ന (അല്ലെങ്കിൽ മററുളളവരാൽ പരിഹസിക്കപ്പെടുന്ന) നിങ്ങളുടെ മുഖത്തിന്റെ പ്രത്യേകത വാസ്തവത്തിൽ അത്ര അനാകർഷകമാണോ? അതോ അങ്ങനെ ചിന്തിക്കാൻ മററുളളവരുടെ സമ്മർദ്ദമാണോ ഇടയാക്കിയിരിക്കുന്നത്? ബൈബിൾ ഇപ്രകാരം ബുദ്ധിയുപദേശിക്കുന്നു: “നിങ്ങൾക്ക് ചുററുമുളള ലോകം അതിന്റെ സ്വന്തം മൂശയിലേക്ക് നിങ്ങളെ ഞെക്കിക്കയററാൻ അനുവദിക്കരുത്.”—റോമർ 12:2, ഫിലിപ്പ്സ്.
ചിന്തിക്കുക: ജനപ്രീതിനേടുന്നതിനും വിജയിക്കുന്നതിനും അല്ലെങ്കിൽ സന്തുഷ്ടരായിരിക്കുന്നതിനും ഒരു പ്രത്യേകതരം ആകാരം ആവശ്യമാണ് എന്ന ആശയം പ്രചരിപ്പിക്കുന്നത് ആരാണ്? നിങ്ങൾ ഒരു പ്രത്യേകതരം ഭക്ഷണം കഴിക്കുകയോ വിലയേറിയ സൗന്ദര്യസംവർദ്ധക വസ്തുക്കൾ വാങ്ങുകയോ വഴി ആദായം ഉണ്ടാക്കുന്ന നിർമ്മാതാക്കളും പരസ്യക്കാരുമല്ലേ അങ്ങനെ ചെയ്യുന്നത്? അവർ നിങ്ങളുടെ ചിന്തയെ രൂപപ്പെടുത്താൻ എന്തിന് അനുവദിക്കണം? നിങ്ങളുടെ സമപ്രായക്കാർ നിങ്ങളുടെ ആകാരം സംബന്ധിച്ച് വിമർശിക്കുന്നുവെങ്കിൽ നിങ്ങളെ സഹായിക്കാനോ അതോ നിങ്ങളെ താഴ്ത്തിക്കെട്ടാനോ അവർ അങ്ങനെ ചെയ്യുന്നത്? ഒടുവിൽ പറഞ്ഞതാണ് ശരിയെങ്കിൽ ആർക്കാണ് അങ്ങനെയുളള “സുഹൃത്തുക്കളെ”ക്കൊണ്ട് ആവശ്യം?
കൂടാതെ “വിവേകത്തിനായി ഹൃദയം ചായ്ക്കാൻ” ബൈബിൾ നിങ്ങളെ ബുദ്ധിയുപദേശിക്കുന്നു. (സദൃശവാക്യങ്ങൾ 2:2) നിങ്ങളുടെ ശാരീരിക പ്രാപ്തികളെ നിഷ്പക്ഷമായി വിലയിരുത്താനും മാദ്ധ്യമങ്ങളിലൂടെയുളള പ്രചരണത്തെ അപ്പാടെ വിശ്വസിക്കാതിരിക്കാനും വിവേകം നിങ്ങളെ സഹായിക്കും. പരസ്യങ്ങളിൽ പ്രത്യക്ഷപ്പെടുന്ന മോഡലുകളെപ്പോലെയുളളവർ വളരെ ചുരുക്കമാണ്. കൂടാതെ “സൗന്ദര്യം ഒരു നീർകുമിളയാണ്.” (സദൃശവാക്യങ്ങൾ 31:30, ബൈയിങ്ടൻ) സൗന്ദര്യം വിററ് പണം സമ്പാദിക്കുന്നവർ അല്പസമയത്തേക്ക് മാത്രമേ അവരുടെ ഔന്നത്യത്തിൽ നിൽക്കുന്നുളളു. താമസിയാതെ കൂടുതൽ സൗന്ദര്യമുളള ഒരു പുതിയ മുഖത്തിനുവേണ്ടി അവർ ഉപേക്ഷിക്കപ്പെടുന്നു. കൂടാതെ അവരുടെ ആകാര സൗഷ്ഠവത്തിന്റെ കാര്യത്തിൽ സൗന്ദര്യസംവർദ്ധക വസ്തുക്കളും ലൈററിംഗും ക്യാമറാക്കാരന്റെ സാമർത്ഥ്യവും അത്ഭുതങ്ങൾ സൃഷ്ടിക്കുന്നു. (ജനപ്രീതി നേടിയിട്ടുളള താരങ്ങളെ അവരുടെ മേക്കപ്പ് ഇല്ലാതെ കാണുമ്പോൾ ചിലർ ഞെട്ടിപ്പോകുന്നു!)
അതുകൊണ്ട് ടെലിവിഷനിലെയോ മാസികയിലെയോ ഒരു മോഡലിനെപ്പോലുളള സൗന്ദര്യം നിങ്ങൾക്കില്ലാത്തതിൽ നിങ്ങൾക്ക് വിഷാദം തോന്നാൻ യാതൊരു കാരണവുമില്ല. സൗന്ദര്യമുളളവരായിരിക്കുന്നതിന് നിങ്ങൾക്ക് എത്ര പൊക്കം കൂടിയിരിക്കണം അല്ലെങ്കിൽ കുറഞ്ഞിരിക്കണം അല്ലെങ്കിൽ എന്തു വണ്ണം വേണം എന്ന് അന്തിമ വിധി പറയുന്നത് നിങ്ങളുടെ കൂട്ടുകാരല്ലതാനും. നിങ്ങളുടെ ആകാരം സംബന്ധിച്ച് നിങ്ങൾക്ക് അസ്വസ്ഥതയൊന്നും തോന്നുന്നില്ലെങ്കിൽ നിങ്ങൾ നിങ്ങളുടെ സമപ്രായക്കാർ പറയുന്നത് ശ്രദ്ധിക്കേണ്ടതില്ല. വിചിത്രമെന്നു പറയട്ടെ നിങ്ങളുടെ ആകാരത്തിൽ നിങ്ങൾ ഏററം വെറുക്കുന്ന കാര്യമായിരിക്കും മറെറാരാൾക്ക് നിങ്ങളോട് അസൂയ തോന്നാൻ ഇടയാക്കുന്നത്.
ഏററം ആകർഷകമായി പ്രത്യക്ഷപ്പെടുക!
ചിലപ്പോൾ യുവജനങ്ങൾക്ക് അവരുടെ ആകാരം സംബന്ധിച്ച് ന്യായമായ ചില പ്രശ്നങ്ങൾ ഉണ്ടായിരിക്കാം: ഇരുണ്ടനിറം, വല്ലാത്തതടി, വികൃതമായ മൂക്ക്, നീണ്ട ചെവി, തീരെ ഉയരക്കുറവ്. തീർച്ചയായും വളർന്നുകൊണ്ടിരിക്കുന്ന ഒരാളെന്നനിലയിൽ നിങ്ങളുടെ ആകാരത്തിന് മാററം വന്നുകൊണ്ടിരിക്കുകയാണ്. മുഖക്കുരു, തൂക്കത്തിൽ വരുന്ന മാററം, വളരെ വേഗത്തിലുളള (അല്ലെങ്കിൽ വേദനാജനകമാം വണ്ണം സാവധാനത്തിലുളള) വളർച്ച എന്നിവയാണ് കൗമാരപ്രായത്തിലെ ശാപങ്ങൾ. അത്തരം പല പ്രശ്നങ്ങളെയും കാലം പരിഹരിക്കും.
മററ് ചിലത് അങ്ങനെയല്ല. അനേകം യുവജനങ്ങൾ ഒട്ടുംതന്നെ സുന്ദരമല്ലാത്ത മുഖത്തോടുകൂടെ ജീവിക്കേണ്ടിയിരിക്കുന്നു. എഴുത്തുകാരനായ ജോൺ കില്ലിംഗർ ഇപ്രകാരം പറഞ്ഞു: “മിക്കവരെ സംബന്ധിച്ചും സൗന്ദര്യമില്ലായ്മ ജീവിതത്തിലെ ഏററം വേദനാജനകമായ വസ്തുതകളിലൊന്നാണ്, അവർ നന്നേ ചെറുപ്പത്തിലെ തിരിച്ചറിയുന്നതും അവരുടെ ആയുഷ്ക്കാലത്ത് ഒരിക്കലുംതന്നെ മറക്കാൻ കഴിയാത്തതുമായ ഒരു വസ്തുത.” എന്നാൽ നിങ്ങൾക്ക് നിങ്ങളുടെ ചമയം പരമാവധി മെച്ചപ്പെടുത്താൻ കഴിയും!
ശാരീരിക വൈകല്യങ്ങൾ പരിഹരിക്കുന്നതിന് ചെലവേറിയതും ഒരുപക്ഷേ അപകടം പിടിച്ചതുമായ ഒരു മാർഗ്ഗമാണ് ശസ്ത്രക്രിയ. a എന്നാൽ ലളിതമായ ശാരീരിക ശുചിത്വം ചെലവു കുറഞ്ഞതാണ്, നിങ്ങളുടെ ആകർഷകത്വത്തിന് മാററുകൂട്ടാൻ അതിന് വളരെയധികം ചെയ്യാൻ കഴിയും. നിങ്ങളുടെ മുടിക്ക് ഒരു സിനിമാതാരത്തിന്റെതിനോടൊപ്പം തിളക്കമില്ലായിരിക്കാം, എന്നാൽ അതു ശുചിയായി സൂക്ഷിക്കാൻ കഴിയും; അതുപോലെതന്നെ നിങ്ങളുടെ മുഖവും കൈകളും നഖങ്ങളും. വെളുത്തതും വൃത്തിയുളളതുമായ പല്ലുകളും ഇളം ചുവപ്പു നിറമുളള മോണകളും ഏതൊരു പുഞ്ചിരിയെയും കൂടുതൽ ആകർഷകമാക്കിത്തീർക്കുന്നു. നിങ്ങൾക്ക് ഭാരക്കൂടുതലിന്റെ ഒരു പ്രശ്നമുണ്ടോ? നിയന്ത്രിതമായ പഥ്യാഹാരത്തിനും വ്യായാമത്തിനും (ഒരുപക്ഷേ ഒരു ഡോക്ടറുടെ മേൽനോട്ടത്തിൽ) നിങ്ങളുടെ ഭാരം നിയന്ത്രണത്തിൽ കൊണ്ടുവരുന്നതിൽ വളരെയധികം ചെയ്യാൻ കഴിയും.
മാതാപിതാക്കളുടെ അംഗീകാരത്തോടെ നിങ്ങൾക്ക് നിങ്ങളുടെ നല്ലവശങ്ങളെ എടുത്തുകാട്ടുന്നതും കുറവുകളെ മറയ്ക്കുന്നതുമായ വസ്ത്രധാരണവും കേശാലങ്കാര രീതികളും പരീക്ഷിച്ചു നോക്കാൻ കഴിഞ്ഞേക്കും. ഉദാഹരണത്തിന് ഷാറോൺ ഫെൽററൺന്റെ അഭിപ്രായപ്രകാരം, “മുടി നീട്ടുന്നതിനാൽ അല്ലെങ്കിൽ മുകളിൽ പൊക്കി കെട്ടുന്നതിനാൽ,” ഒരു പെൺകുട്ടിക്ക് തന്റെ വലിയ മൂക്കിന്റെ വലിപ്പം കുറച്ചു കാണിക്കാൻ കഴിയും. അതുപോലെ, “ഒടിവുളളതോ ചുരുണ്ടതോ ആയ മുടി കൂർത്ത് മൂർത്ത വശങ്ങളെ മയപ്പെടുത്തുന്നു,” സൗന്ദര്യവർദ്ധക വസ്തുക്കൾ വിവേചനാപൂർവ്വം ഉപയോഗിക്കുന്നതും ഒരു പെൺകുട്ടിയുടെ മുഖത്തിന്റെ ചില കുറവുകൾ പരിഹരിക്കാൻ സഹായിക്കും. പുരുഷനായാലും സ്ത്രീയായാലും നിങ്ങൾ തെരഞ്ഞെടുക്കുന്ന വസ്ത്രത്താൽ നിങ്ങൾക്ക് നിങ്ങളുടെ പ്രകൃതി വളരെയധികം മെച്ചപ്പെടുത്താൻ കഴിയും. നിങ്ങളുടെ ത്വക്കിന്റെ നിറത്തിന് മാററ് വർദ്ധിപ്പിക്കുന്ന നിറങ്ങളും നിങ്ങളുടെ സൗഷ്ഠവത്തെ മെച്ചപ്പെടുത്തുന്ന സ്റെറലുകളും തെരഞ്ഞെടുക്കുക. വസ്ത്രത്തിലെ വരകൾക്ക് ശ്രദ്ധ കൊടുക്കുക: നെടുകെയുളള വരകൾക്ക് നിങ്ങളുടെ വണ്ണം കുറച്ചു കാണിക്കുന്നതും കുറുകെയുളള വരകൾക്ക് അതിന് വിപരീതമായതുമായ ഫലങ്ങളാണ് ഉളളത്!
അതെ, പ്രകൃത്യാ നിങ്ങൾക്ക് അധികം സൗന്ദര്യമൊന്നുമില്ലെങ്കിലും അല്പം ശ്രമവും ഭാവനയും ഉണ്ടെങ്കിൽ നിങ്ങൾക്ക് ഹൃദ്യമായ ഒരു പ്രത്യക്ഷത കാഴ്ചവയ്ക്കാൻ കഴിയും.
സമനിലയുടെ ആവശ്യം
നിങ്ങളുടെ ആകാരത്തിന് ശ്രദ്ധ കൊടുക്കുന്നത് പ്രധാനമാണെങ്കിലും അതു നിങ്ങളുടെ ജീവിതത്തിലെ മുഖ്യ സംഗതി ആകാതിരിക്കാൻ
സൂക്തിക്കേണ്ടതുണ്ട്. ആളുകളുടെ ശരീരസൗന്ദര്യം സംബന്ധിച്ച് ബൈബിൾ എത്ര കുറച്ചേ സംസാരിക്കുന്നുളളു എന്ന് നിങ്ങൾ നിരീക്ഷിച്ചിട്ടുണ്ടോ? അബ്രഹാമിന്റെയും മറിയയുടെയും യേശുവിന്റെപോലും ബാഹ്യാകാരത്തെ സംബന്ധിച്ച് നമ്മോട് ഒന്നും പറയാത്തതെന്തുകൊണ്ടാണ്? പ്രകടമായും ദൈവം അതിനെ പ്രധാനമായി കണക്കാക്കിയില്ല.രസാവഹമായി, ദൈവം ഒരിക്കൽ നല്ല ഉയരമുണ്ടായിരുന്ന എലീയാബിനെ രാജസ്ഥാനത്തിന് കൊളളാത്തവനായി തളളിക്കളഞ്ഞു! യഹോവയാം ദൈവം പ്രവാചകനായ ശമൂവേലിനോട് ഇപ്രകാരം വിശദീകരിച്ചു: “അവന്റെ മുഖമോ പൊക്കമോ നോക്കരുത് . . . കാരണം മനുഷ്യൻ നോക്കുന്നതുപോലെയല്ല ദൈവം നോക്കുന്നത്, മനുഷ്യൻ കണ്ണിനു കാണുന്നത് നോക്കുന്നു; യഹോവയോ ഹൃദയത്തെ നോക്കുന്നു.” (1 ശമൂവേൽ 16:6, 7) നാം യഥാർത്ഥത്തിൽ ഏററം അധികം കണക്കിലെടുക്കേണ്ട ദൈവത്തിന് നമ്മുടെ സൗന്ദര്യമല്ല പ്രധാനം എന്നറിയുന്നത് എത്രയോ ആശ്വാസകരമാണ്! “ഹൃദയം എങ്ങനെയുളളതാണെന്ന് അവൻ കാണുന്നു.”
നാം ചിന്തിക്കേണ്ട മറെറാരു ആശയം: നിങ്ങളുടെ സുഹൃത്തുക്കളിൽ മിക്കവർക്കും ശരാശരി സൗന്ദര്യമല്ലേ ഉളളു? നിങ്ങളുടെ മാതാപിതാക്കളിൽ ആരെങ്കിലും ഒരു ഫാഷൻ മാസികയുടെ കവർ ചിത്രത്തിന് പററിയവരാണോ? സാദ്ധ്യതയനുസരിച്ച് അല്ല. വാസ്തവത്തിൽ അവരുടെ നല്ല ഗുണങ്ങളെപ്പററി അറിയാവുന്നതുകൊണ്ട് നിങ്ങൾ ഒരിക്കലും തന്നെ അവരുടെ സൗന്ദര്യത്തെപ്പററി ചിന്തിക്കാറേയില്ല! ഒരു വ്യക്തിയെന്നനിലയിൽ നിങ്ങൾക്കും യഥാർത്ഥമോ സാങ്കല്പികമോ ആയ ഏതു ശാരീരിക വൈകല്യങ്ങളേക്കാളും ഈടുററ നല്ല ഗുണങ്ങൾ ഉണ്ട്.
എന്നിരുന്നാലും നിങ്ങളുടെ സമപ്രായക്കാരെ സംബന്ധിച്ചിടത്തോളം സൗന്ദര്യം പ്രധാനമാണ്. അവരുടെ വസ്ത്രധാരണത്തോടും ചമയത്തോടും ഒത്തുപോകാനുളള സമ്മർദ്ദം നിങ്ങളുടെമേൽ പ്രയോഗിക്കപ്പെടുകയും ചെയ്യും. എന്നാൽ ഈ സമ്മർദ്ദത്തോട് നിങ്ങൾ എങ്ങനെ പ്രതികരിക്കണം?
[അടിക്കുറിപ്പുകൾ]
a ചെരിഞ്ഞ പല്ലുകളെ നേരെയാക്കാനുളള കമ്പി കെട്ടുന്നതു പോലുളള ചില വൈദ്യശാസ്ത്രപരമായ ചികിത്സാ രീതികൾക്ക് ആരോഗ്യം മെച്ചപ്പെടുത്താനും സൗന്ദര്യം വർദ്ധിപ്പിക്കാനും കഴിയും.
ചർച്ചക്കുളള ചോദ്യങ്ങൾ
◻ തങ്ങളുടെ സൗന്ദര്യം സംബന്ധിച്ച് യുവജനങ്ങൾക്ക് ഇത്രത്തോളം താല്പര്യമുളളതെന്തുകൊണ്ട്? നിങ്ങളുടെ സൗന്ദര്യം സംബന്ധിച്ച് നിങ്ങൾ എന്തു വിചാരിക്കുന്നു?
◻ സൗന്ദര്യത്തിന്റെ പ്രാധാന്യം സംബന്ധിച്ച് എന്തു വീക്ഷണമാണ് മാധ്യമങ്ങളും നിങ്ങളുടെ സമപ്രായക്കാരും പ്രചരിപ്പിച്ചിരിക്കുന്നത്? അത്തരം സ്വാധീനത്തോട് നിങ്ങൾ എങ്ങനെ പ്രതികരിക്കണം?
◻ മുഖക്കുരുവിന്റെ പ്രശ്നത്തെ നേരിടുന്നതിനുളള ചിലമാർഗ്ഗങ്ങളെന്തൊക്കെയാണ്?
◻ നിങ്ങളുടെ രൂപഭംഗി മെച്ചപ്പെടുത്താൻ നിങ്ങൾക്ക് എന്തെല്ലാം ചെയ്യാൻ കഴിയും? എന്നാൽ ഈ സംഗതിയിൽ സമനില ആവശ്യമായിരിക്കുന്നതെന്തുകൊണ്ട്?
[82-ാം പേജിലെ ആകർഷകവാക്യം]
‘എനിക്ക് എന്റെ ശരീരം അത്ര ഇഷ്ടമല്ല . . . എനിക്ക് വേണ്ടത്ര സൗന്ദര്യമില്ലെന്ന് ഞാൻ കരുതുന്നു’
[88-ാം പേജിലെ ആകർഷകവാക്യം]
നിങ്ങളുടെ ശാരീരിക വൈകല്യങ്ങളെക്കാൾ ഈടുളള നല്ല ഗുണങ്ങൾ നിങ്ങൾക്കുണ്ട്
[84, 85 പേജുകളിലെ ചതുരം/ചിത്രം]
‘എന്റെ മുഖക്കുരു സംബന്ധിച്ച് എനിക്ക് എന്തെങ്കിലും ചെയ്യാൻ കഴിയില്ലേ?’
ത്വക്കിനുണ്ടാകുന്ന ക്രമക്കേട് മുഖക്കുരു, കറുത്ത വടുക്കൾ, ചുവന്ന വീക്കം, പരുക്കൾ എന്നിവയാൽ ത്വക്ക് വിരൂപമാകാൻ ഇടയാക്കുന്നു. അനേകം യുവജനങ്ങളെ സംബന്ധിച്ചിടത്തോളം ഏതാനും മാസംകൊണ്ട് മാറിക്കിട്ടുന്ന ഒരു പ്രശ്നമായിരിക്കാതെ അതു ഗൗരവതരമായ ഒരു ത്വഗ്രോഗമായിരിക്കാൻ കഴിയും. എല്ലാ പ്രായത്തിലുമുളളവർക്ക് ഇത് ഉണ്ടാകാമെങ്കിലും ഏററം കൂടുതൽ ഇതിൽനിന്ന് കഷ്ടം അനുഭവിക്കുന്നത് കൗമാരപ്രായക്കാരാണ്. ചില വിദഗ്ദ്ധരുടെ അഭിപ്രായമനുസരിച്ച് 80 ശതമാനം ആളുകൾക്കെങ്കിലും കൂടിയതോ കുറഞ്ഞതോ ആയ അളവിൽ ഈ പ്രശ്നമുണ്ട്.
തങ്ങളെപ്പററിത്തന്നെ അവർ ഏററം ഇഷ്ടപ്പെടാഞ്ഞ കാര്യമെന്താണ് എന്ന് 2,000 കൗമാരപ്രായക്കാരോട് അന്വേഷിച്ചപ്പോൾ ത്വക്ക് സംബന്ധിച്ച പ്രശ്നങ്ങൾ മറെറല്ലാററിനേക്കാളും അധികമായിരുന്നത് അതിശയമല്ല. ഹൈസ്കൂളിലായിരുന്നപ്പോൾതന്നെ മുഖത്ത് വളരെയധികം കുരുക്കളുണ്ടായിരുന്ന സാൻഡ്ര ഇപ്രകാരം അനുസ്മരിക്കുന്നു: “എന്റെ മുഖത്ത് വളരെയധികം മുഖക്കുരു ഉണ്ടായിരുന്നതിനാൽ ഞാൻ മററുളളവരിൽ നിന്ന് എല്ലായ്പ്പോഴും എന്റെ മുഖം മറച്ചു പിടിച്ചിരുന്നു. എന്റെ മുഖം പുറത്തുകാട്ടാൻ പ്രയാസമായിരുന്നതിനാൽ എനിക്ക് വലിയ ലജ്ജയായിരുന്നു . . . എന്റെ മുഖം അത്ര വികൃതമായിരുന്നു.”—കോ-എഡ് മാസിക.
ഈ ശാപം നിങ്ങളുടെ കൗമാരപ്രായത്തിൽ, നിങ്ങൾ ഏററം സൗന്ദര്യമുളളവരായി കാണപ്പെടാൻ ആഗ്രഹിക്കുന്ന സമയത്ത്, പ്രത്യക്ഷപ്പെടുന്നത് എന്തുകൊണ്ടാണ്? നിങ്ങൾ വളരുന്നു എന്നതാണ് കാരണം. താരുണ്യാരംഭത്തോടെ നിങ്ങളുടെ ചർമ്മഗ്രന്ഥികൾ കൂടുതൽ പ്രവർത്തനനിരതമാകുന്നു.
എന്താണ് സംഭവിക്കുന്നത്? ദി വേൾഡ് ബുക്ക് എൻസൈക്ലോപ്പീഡിയ അതു ലളിതമായി ഇങ്ങനെ വിശദീകരിക്കുന്നു: ഓരോ ഗ്രന്ഥിയും രോമകൂപങ്ങളിലേക്ക്—രോമത്തിന്റെ ചുററുമുളള ചെറിയ സഞ്ചിയിലേക്ക്—തുറന്നിരിക്കുന്നു. സാധാരണയായി ഊറി വരുന്ന കൊഴുപ്പ് ത്വക്കിലെ ചെറു സുഷിരങ്ങളിലൂടെ വാർന്നു പോകുന്നു. എന്നാൽ ചിലപ്പോൾ ഈ സുഷിരങ്ങൾ അടഞ്ഞുപോകുന്നതിനാൽ ഈ കൊഴുപ്പ് പുറത്തുപോകുന്നില്ല. അങ്ങനെ കെട്ടിക്കിടക്കുന്ന കൊഴുപ്പ് ഓക്സിജനുമായി ചേർന്ന് ഒരു രാസസംയുക്തമാകുന്നു, ഉണങ്ങുമ്പോൾ കറപ്പുനിറം കാണപ്പെടുന്നു. പഴുപ്പ് ഉണ്ടാകുമ്പോഴാണ് മുഖക്കുരു പൊങ്ങുന്നത്. കെട്ടിനിൽക്കുന്ന കൊഴുപ്പിൽ സൂക്ഷ്മാണു പ്രവർത്തിക്കുമ്പോഴാണ് നീർക്കെട്ട് ഉണ്ടാകുന്നത്. ഇത്തരം നീർക്കെട്ടുകളാണ് സ്ഥിരമായ വടുക്കൾ അവശേഷിപ്പിക്കുന്നത്. അണുബാധയുണ്ടാകുന്നില്ലെങ്കിൽ മുഖക്കുരു സാധാരണയായി വടുക്കൾ അവശേഷിപ്പിക്കുകയില്ല. അണുബാധയുണ്ടാകാൻ കാരണം മുഖക്കുരു ഞെക്കിയോ കുത്തിയോ പൊട്ടിക്കുന്നതാണ്.—അതുകൊണ്ട് അവ ഞെക്കുകയോ കുത്തിപ്പൊട്ടിക്കുകയോ ചെയ്യരുത്!
രസാവഹമായി, പിരിമുറുക്കത്തിനും വൈകാരികക്ഷോഭത്തിനും ത്വക്കിലെ ഗ്രന്ഥികളുടെ പ്രവർത്തനത്തെ ഉദ്ദീപിപ്പിക്കൻ കഴിയും. ഒരു സുപ്രധാന സംഭവത്തിനോ അല്ലെങ്കിൽ ഒരു പരീക്ഷയ്ക്കോ മുമ്പായി മുഖത്ത് വലിയ കുരുക്കൾ മത്തായി 6:34.
പ്രത്യക്ഷപ്പെട്ടതായി ചിലർക്ക് അനുഭവമുണ്ട്. അതുകൊണ്ട് യേശുവിന്റെ വാക്കുകൾ വളരെ പ്രായോഗികമൂല്യമുളളവയാണ്: “നാളെയെപ്പററി ഒരിക്കലും വിചാരപ്പെടരുത്, കാരണം നാളത്തെ ദിവസത്തിന് അതിന്റേതായ ഉൽക്കണ്ഠകളുണ്ടല്ലോ.”—സങ്കടകരമെന്ന് പറയട്ടെ, ഇതിന് അത്ഭുതസിദ്ധിയുളള ചികിത്സാ വിധികൾ ഒന്നുമില്ല. എന്നാൽ മുഖക്കുരുവിനെ നിയന്ത്രിക്കുന്നതിന് ഒരു മരുന്നുകടയിൽ നിന്ന് ലഭിക്കുന്ന കുഴമ്പുരൂപത്തിലുളള ശ്ലേഷ്മ ലായിനികളും, ക്രീമുകളും, ലോഷനുകളും, ലേപനങ്ങളും സോപ്പുകളും (ഒരു അണു നിരോധ മരുന്നായ) ബെൻസോയിൽ പെർഓക്സൈഡ് ചേർന്ന കുഴമ്പുകളും മററും ഉണ്ട്. കൂടുതലായ ചികിത്സ ആവശ്യമുണ്ടെങ്കിൽ നിങ്ങളുടെ കുടുംബ ഡോക്ടറോട് ആലോചന ചോദിക്കാവുന്നതാണ്. സോപ്പോ ബെൻസോയിൻ പെർഓക്സൈഡ് കലർന്ന ലായനിയോ ഉപയോഗിച്ച് ത്വക്ക് നന്നായി കഴുകുന്നത് സഹായകമാണെന്ന് അനേകർ കണ്ടെത്തുന്നു. എന്നാൽ കൊഴുപ്പു കലർന്ന സോപ്പുകളും എണ്ണചേർത്ത സൗന്ദര്യവർദ്ധക സാധനങ്ങളും ഒഴിവാക്കുക.
തങ്ങളുടെ ആകമാനമായ ആരോഗ്യത്തിന് ശ്രദ്ധ കൊടുക്കുന്നത്—നല്ല വ്യായാമവും സാദ്ധ്യമാകുന്നിടത്തോളം ശുദ്ധവായു ധാരാളം ലഭിക്കുന്ന തുറന്ന സ്ഥലത്തായിരിക്കുന്നതും ആവശ്യത്തിന് ഉറങ്ങുന്നതും—മുഖക്കുരു ശമിപ്പിക്കാൻ സഹായകമാണെന്ന് ചില യുവജനങ്ങൾ കണ്ടിരിക്കുന്നു. കൊഴുപ്പ് ചേരാത്ത ആഹാരം കഴിക്കുന്നതിന്റെ പ്രയോജനങ്ങളെപ്പററി തർക്കമുണ്ടെങ്കിലും കണ്ണിൽ കാണുന്നതെല്ലാം തിന്നുന്ന ശീലം ഒഴിവാക്കുന്നതും ഒരു സന്തുലിത ആഹാരക്രമം ഉണ്ടായിരിക്കുന്നതും തീർച്ചയായും പ്രയോജനകരമാണ്.
ഏതായാലും, ക്ഷമ ഉണ്ടായിരിക്കുന്നത് അത്യാവശ്യമാണ്. ഈ പ്രശ്നം കുറേ നാളുകൾകൊണ്ട് വളർന്നുവന്നതാണ്, അതുകൊണ്ട് അതു ഒററ രാത്രികൊണ്ട് അപ്രത്യക്ഷമാവുകയില്ല എന്ന് ഓർമ്മിക്കുക. നേരത്തെ പരാമർശിച്ച സാൻഡ്ര പറയുന്നു: “എന്റെ ത്വക്ക് പൂർണ്ണമായി ശരിയാകുന്നതിന് ഏതാണ്ട് ഒരു വർഷമെടുത്തെന്ന് ഞാൻ ഊഹിക്കുന്നു. എന്നാൽ ഒരു ആറാഴ്ചയ്ക്കുളളിൽ എനിക്ക് മാററങ്ങൾ കാണാൻ കഴിഞ്ഞു.” കുറേക്കാലത്തേക്ക് ചികിത്സ തുടരുന്നതിനാൽ കുറേ ആശ്വാസം ലഭിച്ചേക്കും.
അതേസമയം, ഏതാനും ചില വടുക്കൾ നിങ്ങളുടെ ആത്മവിശ്വാസം തകർക്കുന്നതിനോ നിങ്ങൾ മററുളളവരുമായി സംസാരിക്കുന്നതിൽ നിന്ന് നിങ്ങളെ തടയുന്നതിനോ അനുവദിക്കരുത്. നിങ്ങൾക്ക് നിങ്ങളുടെ ത്വക്കിനെപ്പററി ഒരുപക്ഷേ ലജ്ജ തോന്നുമെങ്കിലും മററുളളവർ നിങ്ങൾ വിചാരിക്കുന്നതിലും വളരെ കുറച്ചേ അതു ശ്രദ്ധിക്കുന്നുണ്ടായിരിക്കുകയുളളു. അതുകൊണ്ട് ക്രിയാത്മകവും സന്തുഷ്ടവുമായ ഒരു മനോഭാവം ഉണ്ടായിരിക്കാൻ ശ്രമിക്കുക. നിങ്ങളുടെ മുഖക്കുരു സംബന്ധിച്ച് ചെയ്യാൻ കഴിയുന്നത് ഇപ്പോൾതന്നെ ചെയ്യുക!
[83-ാം പേജിലെ ചിത്രം]
നിങ്ങളിൽ നിങ്ങൾ ഇഷ്ട പ്പെടാത്ത കാര്യം മററുളളവരിൽ അസൂയ ജനിപ്പി ച്ചേക്കാം
[86-ാം പേജിലെ ചിത്രങ്ങൾ]
മാസികകളിൽ പ്രത്യക്ഷപ്പെടുന്ന മോഡലുകൾക്ക് മേയ്ക്കപ്പുകാരുടെ സേവനം ലഭിക്കുന്നുണ്ട് എന്നത് തിരിച്ചറിയുന്നതിൽ യുവജനങ്ങൾ മിക്കപ്പോഴും പരാജയപ്പെടുന്നു