എനിക്ക്‌ എന്റെ അദ്ധ്യാപകനോട്‌ എങ്ങനെ പൊരുത്തപ്പെട്ടുപോകാൻ കഴിയും?
അധ്യായം 20
എനിക്ക്‌ എന്റെ അദ്ധ്യാപകനോട്‌ എങ്ങനെ പൊരുത്തപ്പെട്ടുപോകാൻ കഴിയും?
“നീതി ബോധമില്ലാത്ത ഒരദ്ധ്യാപകനെ എനിക്ക്‌ സഹിക്കാൻ വയ്യ,” എന്ന്‌ യുവപ്രായക്കാരനായ വിക്കി പറയുന്നു. നിങ്ങൾക്കും അതേ വികാരങ്ങളാണ്‌ ഉളളത്‌ എന്നതിൽ സംശയമില്ല. എന്നിരുന്നാലും 1981-ൽ 1,60,000 അമേരിക്കൻ യുവജനങ്ങൾക്കിടയിൽ നടത്തപ്പെട്ട ഒരു അഭിപ്രായവോട്ടെടുപ്പിൽ 76 ശതമാനം പേർ ഏതെങ്കിലും തരത്തിലുളള പക്ഷപാതം കാണിക്കുന്നതിന്‌ തങ്ങളുടെ അദ്ധ്യാപകരെ കുററപ്പെടുത്തി!
ഒന്നാം തരം എന്നു അവർ കരുതുന്ന അവരുടെ വേലയ്‌ക്ക്‌ താഴ്‌ന്ന ഗ്രെയിഡുകൾ ലഭിക്കുമ്പോൾ യുവജനങ്ങൾ അസ്വസ്ഥരായിത്തീരുന്നു. ശിക്ഷണം അതിരുകടന്നതോ അസ്ഥാനത്തോ അല്ലെങ്കിൽ വർഗ്ഗീയ മുൻവിധികളാൽ പ്രേരിതമോ ആയിരിക്കുന്നതായി തോന്നുമ്പോൾ അവർക്ക്‌ നീരസം തോന്നുന്നു. അദ്ധ്യാപകർ പ്രത്യേക പ്രിയമുളളവർക്ക്‌ പ്രത്യേക ശ്രദ്ധയും മുൻഗണനയും നൽകുമ്പോൾ അവർക്ക്‌ കോപം വരുന്നു.
അദ്ധ്യാപകർക്ക്‌ ഏതായാലും തെററാവരമൊന്നുമില്ല എന്ന്‌ നാം സമ്മതിക്കേണ്ടിയിരിക്കുന്നു. പിരട്ടിലും പ്രശ്‌നങ്ങളിലും അതെ, മുൻവിധികളിലും ഒരു നല്ല പങ്ക്‌ അവർക്കുമുണ്ട്‌. എന്നിരുന്നാലും ബൈബിൾ ഇപ്രകാരം മുന്നറിയിപ്പ്‌ നൽകുന്നു: “നിന്റെ ആത്മാവിൽ നീരസം തോന്നാൻ ധൃതികൂട്ടരുത്‌.” (സഭാപ്രസംഗി 7:9) അദ്ധ്യാപകർപോലും “പലതിലും തെററിപ്പോകുന്നു. ആരെങ്കിലും വാക്കിൽ തെററാതിരുന്നാൽ അയാൾ ശരീരത്തെ മുഴുവൻ കടിഞ്ഞാണിട്ട്‌ നടത്താൻ പ്രാപ്‌തനായ ഒരു പൂർണ്ണമനുഷ്യനാണ്‌.” (യാക്കോബ്‌ 3:2) അതുകൊണ്ട്‌ നിങ്ങൾക്ക്‌ നിങ്ങളുടെ അദ്ധ്യാപകന്‌ സംശയത്തിന്റെ ആനുകൂല്യം നൽകരുതോ?
ഫ്രെഡി എന്നു പേരായ ചെറുപ്പക്കാരൻ തന്റെ അദ്ധ്യാപകൻ “എല്ലാവരോടും പരുഷമായി പെരുമാറുന്നത്‌” ശ്രദ്ധിച്ചു. ഫ്രെഡി നയപൂർവ്വം അദ്ധ്യാപകനെ സമീപിക്കുകയും അദ്ദേഹത്തിന്റെ മര്യാദയില്ലാത്ത പെരുമാററത്തിന്റെ കാരണം കണ്ടുപിടിക്കുകയും ചെയ്‌തു. “ഇന്നു രാവിലെ എന്റെ കാറിന്‌ ഒരു പ്രശ്‌നമുണ്ടായി,” അദ്ധ്യാപകൻ വിശദീകരിച്ചു. “സ്‌കൂളിലേക്കു പോരുമ്പോൾ അതു വല്ലാതെ ചൂടായി, ഞാൻ താമസിച്ച്‌ ജോലിക്ക്‌ എത്തുകയും ചെയ്‌തു.”
അദ്ധ്യാപകരും അവരുടെ ഓമനകളും
അദ്ധ്യാപകരുടെ ഓമനകൾക്ക്‌ ലഭിക്കുന്ന ആനുകൂല്യങ്ങൾ സംബന്ധിച്ചെന്ത്‌? ഒരു അദ്ധ്യാപകന്‌ അയാളുടെതായ ബുദ്ധിമുട്ടുകളും സമ്മർദ്ദങ്ങളും അഭിമുഖീകരിക്കേണ്ടതുണ്ട്‌ എന്ന്‌ മനസ്സിൽ പിടിക്കുക. “മനസ്സ്‌ സാധാരണയായി മറെറവിടെയെങ്കിലുമായിരിക്കുന്ന” ഒരു പററം യുവജനങ്ങളുടെ ശ്രദ്ധ പിടിച്ചു നിറുത്തുക എന്ന “ഗുരുതരമായ പ്രയാസ സാഹചര്യത്തെ” അദ്ധ്യാപകർ അഭിമുഖീകരിക്കുന്നതായി ബീയിംഗ്‌ അഡൊലെസ്സൻറ്‌ എന്ന [ഇംഗ്ലീഷ്‌] പുസ്‌തകം വിവരിക്കുന്നു. “പെട്ടെന്നു ഭാവം മാറുന്നവരും ശ്രദ്ധ പതറുന്നവരും സാധാരണയായി 15 മിനിററിൽ കൂടുതൽ എന്തിലെങ്കിലും ശ്രദ്ധ കേന്ദ്രീകരിച്ചു പരിചയമില്ലാത്തവരുമായ ഒരു പററം കൗമാരപ്രായക്കാരാണ്‌ അവരുടെ മുമ്പിലുളളത്‌.”
അപ്പോൾ നന്നായി പഠിക്കുകയും ശ്രദ്ധിക്കുകയും അദ്ധ്യാപകരോട്‌ ആദരവോടെ പെരുമാറുകയും ചെയ്യുന്നവർക്ക്‌ അദ്ധ്യാപകർ വിശേഷാൽ ശ്രദ്ധ കൊടുക്കുന്നത്‌ ആശ്ചര്യമാണോ? അത്തരം ‘കൈമണികൾക്ക്‌’ നിങ്ങൾക്ക്‌ ലഭിക്കുന്നതിനേക്കാൾ കൂടുതൽ ശ്രദ്ധ ലഭിക്കുന്നത്‌ നിങ്ങളെ ശുണ്‌ഠിപിടിപ്പിച്ചേക്കാം. എന്നാൽ നിങ്ങളുടെ വിദ്യാഭ്യാസപരമായ ആവശ്യം അവഗണിക്കപ്പെടാത്തിടത്തോളം കാലം കഠിനാദ്ധ്വാനം ചെയ്യുന്ന ഒരു വിദ്യാർത്ഥിയോട്‌ അദ്ധ്യാപകൻ പ്രിയം കാട്ടുന്നുവെങ്കിൽ നിങ്ങൾ എന്തിന്‌ അസ്വസ്ഥരാകണം? മാത്രവുമല്ല നിങ്ങൾ തന്നെ അല്‌പം കൂടി കഠിനാദ്ധ്വാനം ചെയ്യുക എന്നത്‌ ഒരു നല്ല ആശയമായിരുന്നേക്കാം.
ക്ലാസ്സുമുറിയിലെ യുദ്ധം
ഒരു വിദ്യാർത്ഥി തന്റെ അദ്ധ്യാപകനെപ്പററി പറഞ്ഞു: “ഞങ്ങളെല്ലാം അദ്ദേഹത്തിനെതിരെ യുദ്ധം പ്രഖ്യാപിച്ചതായി അദ്ദേഹം വിചാരിച്ചു, ഞങ്ങളെ ആദ്യം കീഴടക്കണമെന്നും അദ്ദേഹം തീരുമാനിച്ചു. അദ്ദേഹം ചിത്തഭ്രമമുളള ഒരാളായിരുന്നു.” എന്നിരുന്നാലും തങ്ങൾക്ക്‌ ഒരു അല്‌പം “ചിത്തഭ്രമം” ഉണ്ടായിരിക്കാൻ അവകാശമുണ്ട്‌ എന്ന്‌ അനേകം അദ്ധ്യാപകർ കരുതുന്നു. ബൈബിൾ മുൻകൂട്ടിപ്പറഞ്ഞപ്രകാരം ഇത്‌ “ഇടപെടാൻ പ്രയാസമേറിയ കാലങ്ങ”ളാണ്‌. വിദ്യാർത്ഥികളാകട്ടെ മിക്കപ്പോഴും “ആത്മനിയന്ത്രണമില്ലാത്തവരും ഉഗ്രൻമാരും നൻമപ്രിയമില്ലാത്തവരുമായിരിക്കും.” (2 തിമൊഥെയോസ്‌ 3:1-3) യു. എസ്സ്‌. ന്യൂസ്‌ ആൻഡ്‌ വേൾഡ്‌ റിപ്പോർട്ട്‌ ഇപ്രകാരം പറഞ്ഞു: “നഗര പ്രദേശത്തുളള സ്‌കൂളുകളിലെ അദ്ധ്യാപകർ ആക്രമണത്തെ ഭയന്നാണ്‌ ജീവിക്കുന്നത്‌.”
അദ്ധ്യാപകരെ സംബന്ധിച്ച്‌ ഒരു മുൻ അദ്ധ്യാപകനായ റോളൻഡ്‌ ബെററ്‌സ്‌ പറയുന്നു: “അദ്ധ്യാപകരെ [ആലങ്കാരികമായി] ഉന്തുകയും തളളുകയും ചെയ്യാനും പ്രകോപിപ്പിക്കാനും അവർ ഒടിയുന്നതിന്‌ മുമ്പ്‌ എത്രത്തോളം വളയുമെന്ന്‌ കാണാനും സ്വാഭാവികമായും തങ്ങൾക്കൊരു അവകാശമുണ്ടെന്ന്‌ കുട്ടികൾ കരുതുന്നു . . . ഒരു പുതിയ അദ്ധ്യാപകനെ അയാൾ തകരുന്നതിന്റെ ഒരു തലമുടി നാരിട അടുത്തുവരെ എത്തിച്ചിരിക്കുന്നു എന്നു മനസ്സിലാകുമ്പോൾ അവർ അല്‌പം കൂടെ തളളുന്നു.” നിങ്ങളോ നിങ്ങളുടെ സഹപാഠികളോ അദ്ധ്യാപകരെ അപ്രകാരം ശല്യം ചെയ്യുന്നതിൽ പങ്കാളികളായിരുന്നിട്ടുണ്ടോ? എങ്കിൽ നിങ്ങളുടെ അദ്ധ്യാപകന്റെ പ്രതികരണത്തിൽ അതിശയിക്കേണ്ടതില്ല.
ബൈബിൾ പറയുന്നു: “സമ്മർദ്ദം തന്നെ ഒരു ജ്ഞാനി ഭ്രാന്തമായ രീതിയിൽ പെരുമാറാൻ ഇടയാക്കിയേക്കാം.” (സഭാപ്രസംഗി 7:7) ചില സ്‌കൂളുകളിൽ നിലവിലുളള ഭയത്തിന്റെയും അനാദരവിന്റെയും അന്തരീക്ഷത്തിൽ, നമുക്ക്‌ മനസ്സിലാക്കാവുന്നതുപോലെ, ചില അദ്ധ്യാപകർ അതിർകടന്ന്‌ പ്രതികരിക്കുകയും വളരെ കർക്കശരായ ശിക്ഷണ നിഷ്‌ണാതരായിത്തീരുകയും ചെയ്യുന്നു. ദി ഫാമിലി ഹാൻഡ്‌ ബുക്ക്‌ ഓഫ്‌ അഡൊലെസ്സൻസ്‌ എന്ന [ഇംഗ്ലീഷ്‌] പുസ്‌തകം ഇപ്രകാരം നിരീക്ഷിക്കുന്നു: “തങ്ങളുടെ അദ്ധ്യാപകരുടെ ബോദ്ധ്യങ്ങളെ പുച്ഛിക്കുന്നതായി കാണപ്പെടുന്ന വിദ്യാർത്ഥികൾ തിരിച്ചും പുച്ഛിക്കപ്പെടുന്നു.” അതെ, ശത്രുതാ മനോഭാവമുളള അദ്ധ്യാപകർ മിക്കപ്പോഴും അത്തരത്തിൽ രൂപപ്പെടുത്തപ്പെടുന്നത്‌ വിദ്യാർത്ഥികളാലാണ്‌.
ക്ലാസ്സുമുറിയിൽ നടക്കുന്ന ക്രൂരമായ കുസൃതികളുടെ ഫലങ്ങളുംകൂടെ പരിഗണിക്കുക. പകരം വരുന്ന അദ്ധ്യാപകരെ കുട്ടികൾ “പീഡിപ്പിക്കുകയും ദണ്ഡിപ്പിക്കുകയും” ചെയ്യുന്നതിനെപ്പററി യുവപ്രായക്കാരിയായ വാലെറി പറഞ്ഞപ്പോൾ അവൾ ഒട്ടും തന്നെ അതിശയോക്തി പറയുകയായിരുന്നില്ല. റോളൻഡ്‌ ബെററ്‌സ്‌ ഇപ്രകാരം കൂട്ടിച്ചേർക്കുന്നു: “പകരക്കാരായ അദ്ധ്യാപകർ അവരുടെ ക്ലാസ്സിലെ കുട്ടികളാൽ ക്രൂരമായി വേട്ടയാടപ്പെടുന്നു, മിക്കപ്പോഴും അവർ തകർന്നു പോകുന്ന ഘട്ടത്തോളം തന്നെ.” ശിക്ഷ കൂടാതെ രക്ഷപ്പെടാമെന്നുളള ധൈര്യത്തിൽ വിലക്ഷണമായ പെരുമാററത്താൽ, കൂട്ടത്തോടെ പുസ്‌തകങ്ങളും പെൻസിലുകളും മററും തറയിലിട്ടുകൊണ്ട്‌, അദ്ധ്യാപകനെ ശല്യം ചെയുന്നതിൽ അവർ സന്തോഷം കണ്ടെത്തുന്നു. അല്ലെങ്കിൽ അദ്ധ്യാപകൻ പറയുന്നത്‌ യാതൊന്നും തങ്ങൾക്ക്‌ മനസ്സിലാകുന്നില്ല എന്ന മട്ടിൽ ‘പൊട്ട്‌ അഭിനയിച്ചുകൊണ്ട്‌’ അദ്ധ്യാപകന്റെ ശ്രമങ്ങളെ വിഫലമാക്കാൻ ശ്രമിക്കുന്നു. “തമാശക്കുവേണ്ടി ഞങ്ങൾ അട്ടിമറി നടത്തുന്നു” എന്ന്‌ ബോബി എന്ന യൗവനക്കാരൻ വിശദീകരിക്കുന്നു.
എന്നിരുന്നാലും നിങ്ങൾ ക്ലാസ്സുമുറിയിൽ ക്രൂരത വിതക്കുന്നുവെങ്കിൽ ഹീനനും ശത്രുതാമനോഭാവമുളളവനുമായ ഒരു അദ്ധ്യാപകനെ കൊയ്യുന്നതിൽ അതിശയിക്കേണ്ടതില്ല. (ഗലാത്യർ 6:7 താരതമ്യം ചെയ്യുക.) സുവർണ്ണ നിയമം ഓർമ്മിക്കുക: “ആളുകൾ നിങ്ങളോട്‌ ചെയ്യണമെന്ന്‌ നിങ്ങൾ ആഗ്രഹിക്കുന്ന എല്ലാം അതുപോലെ അവരോടും ചെയ്യുക.” (മത്തായി 7:12) ക്ലാസ്സിലെ കുസൃതികളിൽ പങ്കുചേരാൻ വിസമ്മതിക്കുക. നിങ്ങളുടെ അദ്ധ്യാപകൻ പറയുന്നതിന്‌ ശ്രദ്ധ കൊടുക്കുക. സഹകരണം കാണിക്കുക. ക്രമേണ, നിങ്ങളോടെങ്കിലും, അദ്ദേഹത്തിന്റെ ശത്രുത കുറയും.
‘എന്റെ അദ്ധ്യാപകന്‌ എന്നോട്‌ ഇഷ്ടമല്ല’
ചിലപ്പോൾ വ്യക്തിത്വങ്ങളിലെ പൊരുത്തക്കേടോ എന്തെങ്കിലും തെററിദ്ധാരണയോ നിങ്ങളുടെ അദ്ധ്യാപകനെ നിങ്ങൾക്കെതിരെ തിരിക്കുന്നു; ജിജ്ഞാസ മത്സരമായി തെററിദ്ധരിക്കപ്പെടുന്നു അല്ലെങ്കിൽ അല്‌പം വിചിത്രമായ പെരുമാററം വിഡ്‌ഢിത്തമായി കരുതപ്പെടുന്നു. ഒരു അദ്ധ്യാപകൻ നിങ്ങളെ ഇഷ്ടപ്പെടുന്നില്ലെങ്കിൽ അദ്ദേഹം നിങ്ങളെ ഭ്രമിപ്പിക്കാനും ലജ്ജിപ്പിക്കാനും ചായ്‌വ്‌ കാണിച്ചേക്കാം. പരസ്‌പര ശത്രുത വളർന്നു വന്നേക്കാം.
ബൈബിൾ പറയുന്നു: “ആർക്കും തിൻമയ്‌ക്ക്‌ പകരം തിൻമ ചെയ്യരുത്‌. . . . സാദ്ധ്യമെങ്കിൽ, നിങ്ങളാലാവോളം സകല മനുഷ്യരോടും സമാധാനമായിരിപ്പിൻ.” (റോമർ 12:17, 18) നിങ്ങളുടെ അദ്ധ്യാപകനെ നിങ്ങളുടെ ശത്രുവാക്കാതിരിക്കാൻ ശ്രമിക്കുക. അനാവശ്യമായ ഏററുമുട്ടലുകൾ ഒഴിവാക്കുക. നിങ്ങളുടെ അദ്ധ്യാപകന്‌ പരാതിക്കുളള ന്യായമായ ഒരു കാരണവും നൽകരുത്‌, വാസ്‌തവത്തിൽ അദ്ദേഹത്തോട്‌ സൗഹൃദം കാട്ടാൻ ശ്രമിക്കുക. ‘സൗഹൃദമോ? അദ്ദേഹത്തോടോ?’ എന്ന്‌ നിങ്ങൾ ചോദിക്കുന്നു. അതെ, ക്ലാസ്സിലേക്ക്‌ നിങ്ങൾ കടന്നു ചെല്ലുമ്പോൾ നിങ്ങളുടെ അദ്ധ്യാപകനെ ആദരപൂർവ്വം അഭിവാദ്യം ചെയ്‌തുകൊണ്ട്‌ മര്യാദ കാണിക്കുക. തുടർച്ചയായുളള നിങ്ങളുടെ നല്ല പെരുമാററം—വല്ലപ്പോഴുമൊക്കെ ഒന്നു പുഞ്ചിരിതൂവുന്നതു പോലും—നിങ്ങളെപ്പററിയുളള അദ്ദേഹത്തിന്റെ അഭിപ്രായത്തിന്‌ മാററം വരുത്തിയേക്കാം.—റോമർ 12:20, 21 താരതമ്യം ചെയ്യുക.
പുഞ്ചിരികൊണ്ടുമാത്രം നിങ്ങൾക്ക്‌ എല്ലായ്‌പ്പോഴും ഒരു സാഹചര്യത്തിൽനിന്ന്‌ പുറത്തു കടക്കാനാവില്ല. എന്നാൽ സഭാപ്രസംഗി 10:4 ഇപ്രകാരം ബുദ്ധിയുപദേശിക്കുന്നു: “ഒരു ഭരണാധിപന്റെ [അല്ലെങ്കിൽ അധികാര സ്ഥാനത്തുളളവന്റെ] കോപം നിന്റെ നേരെ ഉയരുന്നുവെങ്കിൽ [നിങ്ങളെ ശിക്ഷിച്ചുകൊണ്ട്‌] നീ നിന്റെ സ്വന്തം സ്ഥാനം വിട്ടുമാറരുത്‌, എന്തുകൊണ്ടെന്നാൽ പ്രശാന്തത തന്നെ വലിയ തെററുകളെ ലഘൂകരിക്കുന്നു.” “ഒരു ഉത്തരം ശാന്തമായിരിക്കുമ്പോൾ അതു കോപത്തെ അകററുന്നു” എന്നും കൂടെ ഓർമ്മിക്കുക.—സദൃശവാക്യങ്ങൾ 15:1.
‘ഇതിലും മെച്ചമായ ഒരു ഗ്രെയിഡ്‌ ഞാൻ അർഹിച്ചു’
ഇത്‌ ഒരു സാധാരണ പരാതിയാണ്‌. ഇതേപ്പററി നിങ്ങളുടെ അദ്ധ്യാപകനോട്‌ സംസാരിച്ചു നോക്കുക. ദാവീദ്‌ രാജാവിന്റെ ഭാഗത്തെ ഗൗരവതരമായ ഒരു പിശക്‌ തുറന്നു കാട്ടുന്ന ക്ലേശകരമായ ചുമതലയെ നാഥാൻ എങ്ങനെ സമീപിച്ചു എന്ന്‌ ബൈബിൾ നമ്മോട്‌ പറയുന്നു. നാഥാൻ ആരോപണങ്ങൾ വിളിച്ചുകൂവിക്കൊണ്ട്‌ കൊട്ടാരത്തിലേക്ക്‌ പാഞ്ഞു ചെല്ലുകയല്ല ചെയ്‌തത്‌; അദ്ദേഹം നയപൂർവ്വം ദാവീദിനെ സമീപിച്ചു.—2 ശമൂവേൽ 12:1-7.
നിങ്ങൾക്ക്‌ അതുപോലെ താഴ്‌മയോടും ശാന്തമായും നിങ്ങളുടെ അദ്ധ്യാപകനെ സമീപിക്കാൻ കഴിഞ്ഞേക്കും. ഒരു മുൻ അദ്ധ്യാപകൻ ബ്രൂസ്‌ വെബർ ഇപ്രകാരം നമ്മെ അനുസ്‌മരിപ്പിക്കുന്നു “വിദ്യാർത്ഥിയുടെ ഭാഗത്തെ മത്സരം അദ്ധ്യാപകനെ ദുശ്ശാഠ്യക്കാരനാക്കുന്നു. നിങ്ങൾ ബഹളം ഉണ്ടാക്കുകയും ഭ്രാന്ത്‌ പറയുകയും അല്ലെങ്കിൽ ഇതു കടുത്ത അനീതിയാണെന്ന്‌ അവകാശപ്പെടുകയും പകരം വീട്ടുമെന്ന്‌ ആണയിടുകയും ചെയ്‌താൽ നിങ്ങൾ ഒന്നും നേടുകയില്ല.” കുറച്ചുകൂടി പക്വമായ ഒരു സമീപനം പരീക്ഷിച്ചു നോക്കുക. അദ്ദേഹത്തിന്റെ ഗ്രെയിഡിംഗ്‌ സമ്പ്രദായം മനസ്സിലാക്കാൻ സഹായം അഭ്യർത്ഥിച്ചുകൊണ്ട്‌ നിങ്ങൾക്ക്‌ ആരംഭിക്കാൻ കഴിഞ്ഞേക്കും. തുടർന്ന്‌ “തെററായ വിധിയെഴുത്തിന്റെയല്ല അബദ്ധവശാൽ പിണഞ്ഞ പിശകിന്റെയോ തെററായ കണക്കു കൂട്ടലിന്റെയോ ഫലമാണ്‌ നിങ്ങളുടെ താഴ്‌ന്ന ഗ്രെയിഡ്‌ എന്ന്‌ തെളിയിക്കാൻ നിങ്ങൾക്ക്‌ ശ്രമിക്കാവുന്നതാണ്‌. നിങ്ങളുടെ ടീച്ചറുടെ തന്നെ ഗ്രെയിഡിംഗ്‌ സമ്പ്രദായം ഉപയോഗിച്ചുകൊണ്ട്‌ നിങ്ങളുടെ ഗ്രെയിഡിലെ പിശക്‌ എവിടെയാണ്‌ എന്ന്‌ കാണിച്ചു കൊടുക്കുക,” എന്നാണ്‌ വെബർ പറയുന്നത്‌. നിങ്ങളുടെ ഗ്രെയിഡിന്‌ മാററം വരുന്നില്ലെങ്കിൽ കൂടി നിങ്ങളുടെ പക്വത നിങ്ങളുടെ അദ്ധ്യാപകന്‌ നിങ്ങളെപ്പററി ഒരു നല്ല ധാരണ ഉണ്ടാകാൻ ഇടയാക്കും.
മാതാപിതാക്കളോട്‌ പറയുക
ചിലപ്പോൾ വെറും സംസാരം ഫലപ്രദമായിരിക്കുകയില്ല. സൂസന്റെ അനുഭവം പരിചിന്തിക്കുക. പഠനത്തിൽ സമർത്ഥയായ ഒരു പെൺകുട്ടി എന്ന നിലയിൽ അവളുടെ അദ്ധ്യാപിക അവൾക്ക്‌ തോൽക്കാനുളള ഗ്രെയിഡുകൾ നൽകിത്തുടങ്ങിയപ്പോൾ അവൾ ഞെട്ടിപ്പോയി. പ്രശ്‌നമെന്തായിരുന്നു? സൂസൻ യഹോവയുടെ സാക്ഷികളിലൊരാളായിരുന്നു, ഈ കാരണത്താൽ തന്നെ സൂസനെ തനിക്ക്‌ ഇഷ്ടമല്ലായിരുന്നു എന്ന്‌ അവളുടെ അദ്ധ്യാപിക സമ്മതിച്ചു. “അതു നിരാശാജനകമായിരുന്നു,” സൂസൻ പറയുന്നു, “എന്തു ചെയ്യണമെന്ന്‌ എനിക്കറിഞ്ഞു കൂടായിരുന്നു.”
സൂസൻ അനുസ്‌മരിക്കുന്നു: “ഞാൻ ധൈര്യം സംഭരിച്ച്‌ ഈ അദ്ധ്യാപികയെപ്പററി അമ്മയോട്‌ [അമ്മ മാത്രമെ ഉണ്ടായിരുന്നുളളു] പറഞ്ഞു. അമ്മ പറഞ്ഞു, ‘കൊളളാം എനിക്ക്‌ നിന്റെ അദ്ധ്യാപികയോട്‌ സംസാരിക്കാൻ കഴിഞ്ഞേക്കും’ അങ്ങനെയൊരു സന്ദർഭം ലഭിച്ചപ്പോൾ അമ്മ അദ്ധ്യാപികയെ സമീപിച്ച്‌ പ്രശ്‌നം എന്താണ്‌ എന്ന്‌ അന്വേഷിച്ചു. ഞാൻ വിചാരിച്ചു അമ്മ വളരെ അസ്വസ്ഥയാകുമെന്ന്‌, എന്നാൽ അങ്ങനെയൊന്നും സംഭവിച്ചില്ല. അമ്മ ശാന്തമായി അവരോട്‌ സംസാരിച്ചു.” സൂസൻ മറെറാരു അദ്ധ്യാപികയുടെ കീഴിൽ പഠിക്കാൻ അവർ ഏർപ്പാടു ചെയ്‌തു.
എല്ലാ കുഴഞ്ഞ പ്രശ്‌നങ്ങളും ഇത്ര ഭംഗിയായി പര്യവസാനിക്കുന്നില്ല എന്നത്‌ വാസ്‌തവമാണ്‌, ചിലപ്പോൾ നിങ്ങൾ അതു സഹിച്ചേ പററു. എന്നാൽ ഈ ടേമിലേക്ക്‌ നിങ്ങൾക്ക്‌ നിങ്ങളുടെ അദ്ധ്യാപകനോട്‌ സമാധാനത്തിൽ കഴിയാമെങ്കിൽ അടുത്ത വർഷം വരുമ്പോൾ നിങ്ങൾക്ക്‌ വ്യത്യസ്ഥരായ സഹപാഠികളോടൊപ്പം ഒരു പുതിയ തുടക്കമിടാനും ഒരു പുതിയ ടീച്ചറുമായി ഒത്തുപോകാൻ പഠിക്കാൻ പോലും കഴിഞ്ഞേക്കാം.
ചർച്ചക്കുളള ചോദ്യങ്ങൾ
◻ നിങ്ങളോട്‌ ന്യായരഹിതമായി പെരുമാറുന്ന ഒരു അദ്ധ്യാപകനെ നിങ്ങൾക്ക്‌ എങ്ങനെ വീക്ഷിക്കാൻ കഴിയും?
◻ ചിലപ്പോൾ ഓമനകളെന്ന്‌ വിളിക്കപ്പെടുന്നവരോട്‌ അദ്ധ്യാപകർ വളരെയധികം താല്‌പര്യം കാണിക്കുന്നതെന്തുകൊണ്ട്‌?
◻ വളരെ വിരസനായി കാണപ്പെടുന്ന ഒരു അദ്ധ്യാപകനിൽ നിന്ന്‌ നിങ്ങൾക്ക്‌ എങ്ങനെ പഠിക്കാൻ കഴിയും?
◻ ചില അദ്ധ്യാപകർ തങ്ങളുടെ വിദ്യാർത്ഥികളോട്‌ ശത്രുത പ്രകടമാക്കുന്നതായി തോന്നുന്നത്‌ എന്തുകൊണ്ടാണ്‌?
◻ ക്ലാസ്സുമുറിയിൽ നിങ്ങൾക്കെങ്ങനെ സുവർണ്ണ നിയമം ബാധകമാക്കാൻ കഴിയും?
◻ അന്യായമായ ഗ്രെയിഡിംഗിന്റെയോ പെരുമാററത്തിന്റെയോ ഇരകളാണ്‌ നിങ്ങളെന്ന്‌ തോന്നുന്നുവെങ്കിൽ നിങ്ങൾക്ക്‌ എന്തു ചെയ്യാൻ കഴിയും?
[158-ാം പേജിലെ ആകർഷകവാക്യം]
അദ്ധ്യാപകരുടെ ഓമനകൾക്ക്‌ നൽകപ്പെടുന്ന ശ്രദ്ധ നീരസത്തിനിട യാക്കുന്നു
[163-ാം പേജിലെ ആകർഷകവാക്യം]
“നഗര പ്രദേശത്തെ സ്‌കൂളിലെ അദ്ധ്യാപകർ ആക്രമണ ഭീതിയിൽ കഴിയുന്നു.”—യു. എസ്‌. ന്യൂസ്‌ ആൻഡ്‌ വേൾഡ്‌ റിപ്പോർട്ട്‌
[160, 161 പേജുകളിലെ ചതുരം/ചിത്രം]
‘എന്റെ അദ്ധ്യാപകൻ ഒരു മുഷിപ്പനാണ്‌!’
ദി ഫാമിലി ഹാൻഡ്‌ ബുക്ക്‌ ഓഫ്‌ അഡൊലെസ്സൻസ്‌ പറയുന്നു: “കൗമാരപ്രായക്കാരായ വിദ്യാർത്ഥികളിൽ മിക്കവരും അദ്ധ്യാപകർ മുഷിപ്പൻമാരാണെന്നും അവർക്ക്‌ നർമ്മബോധമില്ലെന്നും പരാതിപ്പെട്ടുകൊണ്ട്‌ അവരെ വിമർശിക്കുന്നവരാണ്‌, എന്ന്‌ ചില ഗവേഷണങ്ങൾ കാണിക്കുന്നു.” ഇന്നല്ലെങ്കിൽ നാളെ നിങ്ങൾ ‘കരഞ്ഞുപോകാൻ’ തക്കവണ്ണം നിങ്ങളെ മുഷിപ്പിക്കുന്ന ഒരദ്ധ്യാപകനെ നിങ്ങൾക്കും കിട്ടിയേക്കാം. നിങ്ങൾക്ക്‌ എന്തുചെയ്യാൻ കഴിയും?
തൊഴിൽ പഠന രംഗത്തോ കായിക പരിശീലനത്തിലോ സംഗീതത്തിലോ ഒരു കൗമാരപ്രായക്കാരന്റെ ഏകാഗ്രത വളരെ ഉയർന്നതായിരുന്നേക്കാമെങ്കിലും ഭാഷയോ ചരിത്രമോ പഠിപ്പിക്കുന്ന ക്ലാസ്സുകളിൽ ആ ഏകാഗ്രത കുത്തനെ താഴുന്നു എന്ന്‌ അടുത്ത കാലത്തെ ഒരു പരീക്ഷണം വെളിപ്പെടുത്തി.
കായിക പരിശീലകരോ സംഗീതാദ്ധ്യാപകരോ മററു പാഠ്യവിഷയങ്ങൾ പഠിപ്പിക്കുന്നവരെക്കാൾ കൂടുതൽ പ്രാപ്‌തിയുളളവരാണോ? ആയിരിക്കാനിടയില്ല. പ്രത്യക്ഷത്തിൽ അനേകം വിദ്യാർത്ഥികൾക്കും പാഠ്യവിഷയങ്ങളോട്‌ ഒരു നിഷേധാത്മക മനോഭാവമാണുളളത്‌. മാത്രവുമല്ല ഒരു വിഷയം മുഷിപ്പനാണെന്ന്‌ വിദ്യാർത്ഥികൾ മുന്നമേ തീരുമാനിക്കുകയാണെങ്കിൽ സോക്രട്ടീസിന്റെ പ്രാപ്‌തികൾ ഉളള ഒരാൾക്കുപോലും അവരുടെ ശ്രദ്ധ പിടിച്ചു വയ്‌ക്കുക പ്രയാസമായിരിക്കും! അതുകൊണ്ട്‌ ഒരുപക്ഷേ ചില വിഷയങ്ങളോടുളള നിങ്ങളുടെ മനോഭാവത്തിന്‌ മാററം വരുത്തേണ്ടയാവശ്യം ഉണ്ടായിരിക്കുമോ? നിങ്ങൾ പഠിക്കുന്ന കാര്യങ്ങളിൽ അല്‌പംകൂടി താല്‌പര്യം എടുക്കുന്നത്‌ സ്‌കൂൾ ജീവിതത്തിലെ വിരസത അകററിയേക്കാം.
ചിലപ്പോൾ പഠനത്തിൽ താല്‌പര്യമുളള വിദ്യാർത്ഥികളും തങ്ങൾക്ക്‌ “മോശം” അദ്ധ്യാപകരാണ്‌ ഉളളതെന്ന്‌ പരാതിപ്പെടുന്നു. എന്നാൽ ഒരു “നല്ല” അദ്ധ്യാപകൻ എന്നു പറഞ്ഞാൽ എന്താണ്‌? ഒരു കൊച്ചു പെൺകുട്ടി പറഞ്ഞു “നല്ല ഒരു തമാശുകാരിയായതുകൊണ്ട്‌ എനിക്ക്‌ എന്റെ കണക്ക്‌ അദ്ധ്യാപികയെ ഇഷ്ടമാണ്‌.” ഒരു ആൺകുട്ടി ‘വളരെയധികം തമാശ്‌ പറയുന്നതിന്‌’ തന്റെ ഇംഗ്ലീഷ്‌ അദ്ധ്യാപകനെ പ്രശംസിച്ചു.
എല്ലാവരാലും ഇഷ്ടപ്പെടുന്നതോ രസകരമായി സംസാരിക്കാൻ കഴിയുന്നതോ ഒരു അദ്ധ്യാപകനെ സംബന്ധിച്ചിടത്തോളം ഒരു നേട്ടമായിരുന്നേക്കാമെങ്കിലും അതു “മററുളളവരെ പഠിപ്പിക്കാൻ പ്രാപ്‌തരായിരിക്കുന്നതിന്‌” പകരമായിരിക്കുന്നില്ല. (2 തിമൊഥെയോസ്‌ 2:2) ബൈബിൾ ഇവിടെ ആത്മീയ യോഗ്യതകളെപ്പററിയാണ്‌ സംസാരിക്കുന്നതെങ്കിലും ഒരു നല്ല അദ്ധ്യാപകന്‌ തന്റെ വിഷയം അറിയാമായിരിക്കണം എന്ന വസ്‌തുത അതു വിശേഷവൽക്കരിക്കുന്നു.
ഖേദകരമെന്നു പറയട്ടെ, അറിവും വർണ്ണശബളമായ ഒരു വ്യക്തിത്വവും എല്ലായ്‌പ്പോഴും ഒരേ പായ്‌ക്കററിനകത്ത്‌ ലഭിക്കുന്നില്ല. ഉദാഹരണത്തിന്‌ ദൈവവചനത്തിന്റെ ഒരു പ്രബോധകനെന്ന നിലയിൽ അപ്പോസ്‌തലനായ പൗലോസ്‌ അങ്ങേയററം യോഗ്യതയുളള ഒരാളായിരുന്നു. എന്നിരുന്നാലും പൗലോസിന്റെ നാളിലെ ചില ക്രിസ്‌ത്യാനികൾ “ശരീരത്തിലുളള അവന്റെ സാന്നിദ്ധ്യം ബലഹീനവും അവന്റെ വാക്ക്‌ നിന്ദ്യവുമത്രേ” എന്ന്‌ പറഞ്ഞിരുന്നു. പൗലോസ്‌ അതിന്‌ ഇപ്രകാരം മറുപടി കൊടുത്തു: “ഞാൻ വാക്‌സാമർത്ഥ്യമില്ലാത്തവൻ എങ്കിലും പരിജ്ഞാനമില്ലാത്തവനല്ല.” (2 കൊരിന്ത്യർ 10:10; 11:6) ചിലർ പൗലോസിന്‌ പറയാനുണ്ടായിരുന്നത്‌ അവഗണിക്കുകയും ഒരു പ്രസംഗകനെന്നനിലയിൽ അവർ അവനിൽ ആരോപിച്ച കുറവുകൾ മാത്രം കാണുകയും ചെയ്‌തെങ്കിൽ വിലപ്പെട്ട അറിവ്‌ സമ്പാദിക്കുന്നതിനുളള അവസരം അവർക്ക്‌ നഷ്ടമായി. സ്‌കൂളിന്റെ കാര്യത്തിൽ അതേ തെററ്‌ വരുത്തരുത്‌! ഒരു അദ്ധ്യാപകനെ “മോശം” എന്ന്‌ എഴുതി തളളുന്നതിനു മുമ്പ്‌ നിങ്ങളോടുതന്നെ ചോദിക്കുക, ’അദ്ദേഹം എന്തിനെപ്പററിയാണ്‌ സംസാരിക്കുന്നത്‌ എന്ന്‌ അദ്ദേഹത്തിനറിയാമോ? എനിക്ക്‌ അദ്ദേഹത്തിൽ നിന്ന്‌ പഠിക്കാൻ കഴിയുമോ?’
സംസാരപ്രാപ്‌തി കുറഞ്ഞ ഒരു അദ്ധ്യാപകന്‌ നിങ്ങൾ സാധാരണയിൽ കവിഞ്ഞ ശ്രദ്ധ കൊടുക്കേണ്ടതുണ്ടായിരിക്കാം. അദ്ദേഹത്തിന്‌ പറയാനുളളതിൽ ശ്രദ്ധ ഉറപ്പിച്ച്‌ നിറുത്തുന്നതിന്‌ കുറിപ്പുകൾ എഴുതാൻ ശ്രമിക്കുക. വിരസമായ ക്ലാസ്സ്‌ ചർച്ചകൾക്ക്‌ വീട്ടിലിരുന്നുളള കൂടുതലായ പഠനം ഒരു പൂരകമായിരിക്കട്ടെ.
ഒരു അദ്ധ്യാപികയായ ബാർബര മേയർ ഇപ്രകാരം കൂട്ടിച്ചേർക്കുന്നു: “ഈ പാഠങ്ങൾ അവർക്ക്‌ ഓർമ്മിക്കാൻ കഴിയുന്നതിലേറെ പ്രാവശ്യം ആവർത്തിച്ചിട്ടുളള അദ്ധ്യാപകർ ചില പതിവ്‌ രീതികൾ അനുവർത്തിക്കാൻ ചായ്‌വ്‌ കാണിക്കുന്നു.” കാര്യങ്ങൾ കൂടുതൽ സജീവമാക്കാൻ നിങ്ങൾക്ക്‌ എന്തു ചെയ്യാൻ കഴിയും? “ഒരു മാററത്തിനുവേണ്ടി നിങ്ങളുടെ കൈ ഉയർത്തി കൂടുതൽ വിവരങ്ങൾ അന്വേഷിക്കുക . . . അദ്ദേഹത്തിന്‌ അറിയാവുന്നതു മുഴുവൻ നിങ്ങളോട്‌ പറയാൻ ഇടയാക്കുക.” ഇതിൽ അദ്ധ്യാപകന്‌ നീരസമുണ്ടാകുമോ? നിങ്ങൾ ആദരപൂർവ്വം അതു ചെയ്യുന്നുവെങ്കിൽ ഉണ്ടാകില്ല. (കൊലോസ്യർ 4:6) മേയർ പറയുന്നു: “നിങ്ങളുടെ അദ്ധ്യാപകർ അല്‌പംകൂടെ തയ്യാറായി അല്‌പം കൂടി ആഴത്തിൽ പഠിച്ച്‌ ക്ലാസ്സിൽ വരുന്നതായി നിങ്ങൾ കണ്ടെത്തും.”
ഉത്സാഹം പടർന്നു പിടിക്കുന്നു, പഠിക്കാനുളള നിങ്ങളുടെ ആഗ്രഹം നിങ്ങളുടെ അദ്ധ്യാപകന്‌ അല്‌പം ജീവൻ പകർന്നേക്കാം. തീർച്ചയായും വളരെ പെട്ടെന്നുളള ഒരു മാററമൊന്നും പ്രതീക്ഷിക്കേണ്ടതില്ല. മാത്രവുമല്ല നിങ്ങൾ സഹിക്കാതെ നിവൃത്തിയില്ലാത്ത ചില ക്ലാസ്സുകളും ഉണ്ടായിരുന്നേക്കാം. എന്നാൽ നിങ്ങൾ ഒരു നല്ല ശ്രോതാവായിരിക്കുകയും ചർച്ച ചെയ്യപ്പെടുന്ന കാര്യങ്ങളിൽ നിങ്ങൾക്ക്‌ ആത്മാർത്ഥമായ താല്‌പര്യമുണ്ടായിരിക്കുകയും ചെയ്യുന്നുവെങ്കിൽ ഒരു മുഷിപ്പൻ അദ്ധ്യാപകനിൽ നിന്നുപോലും നിങ്ങൾക്ക്‌ പഠിക്കാൻ കഴിയും.
[162-ാം പേജിലെ ചിത്രം]
സ്‌കൂളിലെ അക്രമപ്രവർത്തനങ്ങളുടെ വേലിയേററം അദ്ധ്യാപകന്റെ ജോലി പ്രയാസകരമാക്കുന്നു
[164-ാം പേജിലെ ചിത്രം]
അനീതി നടന്നിട്ടുണ്ട്‌ എന്ന്‌ നിങ്ങൾക്ക്‌ തോന്നുന്നുവെങ്കിൽ ആദരപൂർവ്വം നിങ്ങളുടെ അദ്ധ്യാപകനെ സമീപിക്കുക
