അധ്യായം മൂന്ന്‌

“നമുക്കു രമ്യത​പ്പെ​ടാം”

യെശയ്യാവു 1:10-31

1, 2. യെരൂ​ശ​ലേ​മി​ലെ​യും യഹൂദ​യി​ലെ​യും ഭരണാ​ധി​പ​ന്മാ​രെ​യും നിവാ​സി​ക​ളെ​യും യഹോവ ആരോടു താരത​മ്യം ചെയ്യുന്നു, അത്‌ ഉചിത​മാ​യി​രി​ക്കു​ന്നത്‌ എന്തു​കൊണ്ട്‌?

 യെശയ്യാ​വു 1:1-9-ൽ രേഖ​പ്പെ​ടു​ത്തി​യി​രി​ക്കുന്ന അപലപനം കേൾക്കു​മ്പോൾ യെരൂ​ശ​ലേം നിവാ​സി​കൾക്കു സ്വയം ന്യായീ​ക​രി​ക്കാ​നുള്ള ഒരു ചായ്‌വ്‌ തോന്നു​ന്നു​ണ്ടാ​കാം. തങ്ങൾ യഹോ​വ​യ്‌ക്ക്‌ അർപ്പി​ക്കുന്ന യാഗങ്ങൾ അഭിമാ​ന​പൂർവം ചൂണ്ടി​ക്കാ​ട്ടാൻ അവർ ആഗ്രഹി​ക്കു​ന്നു എന്നതിനു സംശയ​മില്ല. എന്നാൽ അത്തരം മനോ​ഭാ​വ​ത്തോ​ടുള്ള യഹോ​വ​യു​ടെ ശക്തമായ പ്രതി​ക​ര​ണ​മാണ്‌ 10 മുതൽ 15 വരെയുള്ള വാക്യ​ങ്ങ​ളിൽ നാം കാണു​ന്നത്‌. അത്‌ ഇപ്രകാ​രം തുടങ്ങു​ന്നു: “സൊ​ദോം അധിപ​തി​കളേ, യഹോ​വ​യു​ടെ വചനം കേൾപ്പിൻ; ഗൊ​മോ​റ​ജ​നമേ, നമ്മുടെ ദൈവ​ത്തി​ന്റെ ന്യായ​പ്ര​മാ​ണം ശ്രദ്ധി​ച്ചു​കൊൾവിൻ.”—യെശയ്യാ​വു 1:10.

² ദൈവം സൊ​ദോ​മി​നെ​യും ഗൊ​മോ​റ​യെ​യും നശിപ്പി​ച്ചത്‌ ആ നഗരങ്ങ​ളി​ലെ ജനങ്ങൾ ലൈം​ഗിക വികട​ത്തരം പ്രവർത്തി​ച്ച​തു​കൊ​ണ്ടു മാത്രമല്ല, അവർ കഠിന​ഹൃ​ദ​യ​രും അഹങ്കാ​രി​ക​ളും ആയിരു​ന്ന​തു​കൊ​ണ്ടും കൂടി​യാണ്‌. (ഉല്‌പത്തി 18:20, 21; 19:4, 5, 23-25; യെഹെ​സ്‌കേൽ 16:49, 50) ശാപ​ഗ്ര​സ്‌ത​മായ ആ നഗരങ്ങ​ളി​ലെ ആളുക​ളോ​ടു യെശയ്യാവ്‌ തങ്ങളെ തുലനം ചെയ്യു​ന്നതു കേട്ട​പ്പോൾ യെരൂ​ശ​ലേ​മി​ലെ​യും യഹൂദ​യി​ലെ​യും നിവാ​സി​കൾ പകച്ചു​പോ​യി​ക്കാ​ണണം. a എന്നാൽ, യഹോവ തന്റെ ജനത്തെ അവർ ആയിരി​ക്കു​ന്നതു പോ​ലെ​തന്നെ കാണുന്നു. അതിനാൽ, ദൈവ​സ​ന്ദേ​ശ​ത്തിൽ ‘കർണരസം’ പകരുന്ന വിധം വെള്ളം ചേർക്കാൻ യെശയ്യാവ്‌ മുതി​രു​ന്നില്ല.—2 തിമൊ​ഥെ​യൊസ്‌ 4:3.

3. ഇസ്രാ​യേ​ല്യർ അർപ്പി​ക്കുന്ന യാഗങ്ങ​ളു​ടെ കാര്യ​ത്തിൽ തനിക്കു “മതി വന്നിരി​ക്കു​ന്നു” എന്നു പറയു​മ്പോൾ യഹോവ എന്താണ്‌ അർഥമാ​ക്കു​ന്നത്‌, അവൻ അങ്ങനെ പറയു​ന്നത്‌ എന്തു​കൊണ്ട്‌?

³ തന്റെ ജനത്തിന്റെ പൊള്ള​യായ ആരാധ​നയെ കുറിച്ച്‌ യഹോവ പറയു​ന്നതു ശ്രദ്ധി​ക്കുക: “നിങ്ങളു​ടെ ഹനനയാ​ഗ​ങ്ങ​ളു​ടെ ബാഹു​ല്യം എനിക്കു  എന്തിനു എന്നു യഹോവ അരുളി​ച്ചെ​യ്യു​ന്നു; മുട്ടാ​ടു​ക​ളെ​ക്കൊ​ണ്ടുള്ള ഹോമ​യാ​ഗ​വും തടിപ്പിച്ച മൃഗങ്ങ​ളു​ടെ മേദസ്സും​കൊ​ണ്ടു എനിക്കു മതി വന്നിരി​ക്കു​ന്നു; കാളക​ളു​ടെ​യോ കുഞ്ഞാ​ടു​ക​ളു​ടെ​യോ കോലാ​ട്ടു​കൊ​റ​റ​ന്മാ​രു​ടെ​യോ രക്തം എനിക്കു ഇഷ്ടമല്ല.” (യെശയ്യാ​വു 1:11) യഹോ​വ​യ്‌ക്ക്‌ തങ്ങളുടെ യാഗങ്ങളെ ആശ്രയി​ക്കേണ്ട ആവശ്യ​മില്ല എന്ന കാര്യം ആളുകൾ വിസ്‌മ​രി​ച്ചി​രി​ക്കു​ന്നു. (സങ്കീർത്തനം 50:8-13) വാസ്‌ത​വ​ത്തിൽ, മനുഷ്യർ നൽകുന്ന യാതൊ​ന്നും അവന്‌ ആവശ്യ​മില്ല. അതു​കൊണ്ട്‌, അർധഹൃ​ദ​യ​ത്തോ​ടു കൂടിയ വഴിപാ​ടു​കൾ അർപ്പി​ക്കു​ക​വഴി തങ്ങൾ യഹോ​വ​യ്‌ക്ക്‌ എന്തെങ്കി​ലും ഉപകാരം ചെയ്യു​ക​യാ​ണെന്ന്‌ അവർ വിചാ​രി​ക്കു​ന്നെ​ങ്കിൽ, അവർക്കു തെറ്റു​പ​റ്റി​യി​രി​ക്കു​ന്നു. അതു വ്യക്തമാ​ക്കാൻ വളരെ ശക്തമായ ഒരു ആലങ്കാ​രിക പ്രയോ​ഗം യഹോവ ഉപയോ​ഗി​ക്കു​ന്നു. “എനിക്കു മതി വന്നിരി​ക്കു​ന്നു” എന്ന ആ പ്രയോ​ഗം “എനിക്കു ചെകി​ടി​ച്ചി​രി​ക്കു​ന്നു” അല്ലെങ്കിൽ “എന്റെ വയറു നിറഞ്ഞി​രി​ക്കു​ന്നു” എന്നും പരിഭാ​ഷ​പ്പെ​ടു​ത്താ​വു​ന്ന​താണ്‌. വയറ്‌ വല്ലാതെ നിറഞ്ഞി​രി​ക്കു​മ്പോൾ, പാത്ര​ത്തിൽ പിന്നെ​യും ഭക്ഷണം കാണു​ന്ന​തു​തന്നെ വെറുപ്പ്‌ ഉളവാ​ക്കു​ക​യി​ല്ലേ? ഇസ്രാ​യേ​ല്യർ അർപ്പിച്ച യാഗങ്ങ​ളു​ടെ കാര്യ​ത്തിൽ യഹോ​വ​യ്‌ക്കു തോന്നി​യ​തും അതുതന്നെ—അങ്ങേയ​റ്റത്തെ വെറുപ്പ്‌!

4. ആളുകൾ യെരൂ​ശ​ലേ​മി​ലെ ആലയത്തിൽ വരുന്ന​തി​ന്റെ നിരർഥകത യെശയ്യാ​വു 1:12 തുറന്നു​കാ​ട്ടു​ന്നത്‌ എങ്ങനെ?

⁴ യഹോവ തുടരു​ക​യാണ്‌: “നിങ്ങൾ എന്റെ സന്നിധി​യിൽ വരു​മ്പോൾ എന്റെ പ്രാകാ​ര​ങ്ങളെ ചവിട്ടു​വാൻ ഇതു നിങ്ങ​ളോ​ടു ചോദി​ച്ചതു ആർ?” (യെശയ്യാ​വു 1:12) ആളുകൾ ‘യഹോ​വ​യു​ടെ മുമ്പാകെ വരണ​മെന്ന്‌,’ അതായത്‌ യെരൂ​ശ​ലേ​മി​ലെ അവന്റെ ആലയത്തിൽ ചെല്ലണ​മെന്ന്‌ അവന്റെ നിയമം​ത​ന്നെ​യല്ലേ ആവശ്യ​പ്പെ​ടു​ന്നത്‌? (പുറപ്പാ​ടു 34:23, 24) ശരിതന്നെ. എന്നാൽ, അവർ അവിടെ വരുന്നത്‌ ശുദ്ധമായ ആന്തര​ത്തോ​ടെ അല്ല, മറിച്ച്‌ വെറു​മൊ​രു ചടങ്ങ്‌ എന്ന നിലയി​ലാണ്‌. യഹോ​വ​യു​ടെ ദൃഷ്‌ടി​യിൽ, അവർ അവന്റെ പ്രാകാ​ര​ങ്ങ​ളിൽ ‘ചവിട്ടു’ന്നതു​കൊണ്ട്‌, അതായത്‌ ആലയത്തിൽ നിരവധി സന്ദർശ​നങ്ങൾ നടത്തു​ന്ന​തു​കൊണ്ട്‌ യാതൊ​രു പ്രയോ​ജ​ന​വു​മില്ല, തറയ്‌ക്കു തേയ്‌മാ​നം സംഭവി​ക്കു​ന്നതേ ഉള്ളൂ.

5. യഹൂദ​ന്മാർ അനുഷ്‌ഠി​ച്ചി​രുന്ന ചില ആരാധ​നാ​ക്രി​യകൾ ഏവ, അവ യഹോ​വ​യ്‌ക്ക്‌ ‘അസഹ്യ’മായി​ത്തീർന്നത്‌ എന്തു​കൊണ്ട്‌?

⁵ വളരെ ശക്തമായ ഭാഷയിൽത്തന്നെ യഹോവ ഇങ്ങനെ പറയു​ന്ന​തിൽ അതിശ​യി​ക്കാ​നില്ല: “ഇനി നിങ്ങൾ വ്യർത്ഥ​മാ​യുള്ള കാഴ്‌ച​കൊ​ണ്ടു​വ​ര​രു​തു; ധൂപം എനിക്കു വെറു​പ്പാ​കു​ന്നു; അമാവാ​സ്യ​യും ശബ്ബത്തും സഭാ​യോ​ഗം കൂടു​ന്ന​തും—നീതി​കേ​ടും [“പ്രകൃ​ത്യ​തീത ശക്തി ഉപയോ​ഗി​ക്കു​ന്ന​തും,” NW] ഉത്സവ​യോ​ഗ​വും എനിക്കു സഹിച്ചു​കൂ​ടാ. നിങ്ങളു​ടെ അമാവാ​സ്യ​ക​ളെ​യും ഉത്സവങ്ങ​ളെ​യും ഞാൻ വെറു​ക്കു​ന്നു; അവ എനിക്കു അസഹ്യം; ഞാൻ അവ സഹിച്ചു മുഷി​ഞ്ഞി​രി​ക്കു​ന്നു  [“ഞാൻ അവ ചുമന്നു മടുത്തി​രി​ക്കു​ന്നു,” NW].” (യെശയ്യാ​വു 1:13, 14) ഭോജ​ന​യാ​ഗം (ധാന്യ വഴിപാട്‌) അർപ്പി​ക്കാ​നും ധൂപം കാട്ടാ​നും ശബത്ത്‌ ആചരി​ക്കാ​നും സഭാ​യോ​ഗം കൂടാ​നു​മൊ​ക്കെ ഇസ്രാ​യേ​ല്യർക്കു കൊടുത്ത ന്യായ​പ്ര​മാ​ണ​ത്തിൽ ദൈവം ആവശ്യ​പ്പെ​ട്ടി​രു​ന്നു. “അമാവാ​സ്യ”യുടെ (പുതു​ച​ന്ദ്ര​ദി​നം) കാര്യ​മെ​ടു​ത്താൽ, അത്‌ ആചരി​ക്ക​ണ​മെന്നു മാത്രമേ ന്യായ​പ്ര​മാ​ണം നിഷ്‌കർഷി​ച്ചി​രു​ന്നു​ള്ളൂ. എങ്കിലും, കാലാ​ന്ത​ര​ത്തിൽ അതോ​ട​നു​ബ​ന്ധിച്ച്‌ ആരോ​ഗ്യാ​വ​ഹ​മായ മറ്റു പല സമ്പ്രദാ​യ​ങ്ങ​ളും നിലവിൽ വന്നു. (സംഖ്യാ​പു​സ്‌തകം 10:10; 28:11) അമാവാ​സ്യ ഒരു പ്രതി​മാസ ശബത്തായി കരുത​പ്പെ​ട്ടി​രു​ന്നു. ആ ദിവസം ആളുകൾ ജോലി​യിൽനി​ന്നു വിരമി​ക്കു​ക​യും പ്രവാ​ച​ക​ന്മാ​രു​ടെ​യും പുരോ​ഹി​ത​ന്മാ​രു​ടെ​യും പ്രബോ​ധനം കേൾക്കാൻ കൂടി​വ​രു​ക​യും ചെയ്‌തി​രു​ന്നു. (2 രാജാ​ക്ക​ന്മാർ 4:23; യെഹെ​സ്‌കേൽ 46:3; ആമോസ്‌ 8:5) അത്തരം ആചാരങ്ങൾ തെറ്റല്ല. എന്നാൽ, അവ കേവല​മൊ​രു ചടങ്ങായി അനുഷ്‌ഠി​ക്കു​മ്പോ​ഴാ​ണു പ്രശ്‌നം. യഹൂദ​ന്മാർ ദൈവ​ത്തി​ന്റെ ന്യായ​പ്ര​മാ​ണം ഔപചാ​രി​ക​മാ​യി അനുഷ്‌ഠി​ക്കു​ന്ന​തോ​ടൊ​പ്പം, “പ്രകൃ​ത്യ​തീത ശക്തി”യെയും ആശ്രയി​ക്കു​ന്നു, അഥവാ ആത്മവി​ദ്യാ ചടങ്ങു​ക​ളിൽ ഏർപ്പെ​ടു​ന്നു. b അതു​കൊണ്ട്‌, തന്നെ ആരാധി​ക്കാ​നാ​യി അവർ ചെയ്യുന്ന കാര്യങ്ങൾ യഹോ​വ​യ്‌ക്ക്‌ ‘അസഹ്യ​മാണ്‌.’

6. യഹോവ ‘മടുത്തി​രി​ക്കു​ന്നത്‌’ ഏത്‌ അർഥത്തി​ലാണ്‌?

⁶ പക്ഷേ, യഹോ​വ​യ്‌ക്ക്‌ എങ്ങനെ ‘മടുപ്പ്‌’ അനുഭ​വ​പ്പെ​ടും? അവൻ “ശക്തിയു​ടെ ആധിക്യം” ഉള്ളവനും ‘തളരു​ക​യോ ക്ഷീണി​ക്ക​യോ ചെയ്യു​ന്നി​ല്ലാ’ത്തവനും അല്ലേ? (യെശയ്യാ​വു 40:26, 28, ഓശാന ബൈ.) തന്റെ ജനത്തിന്റെ കപടഭക്തി കാണു​മ്പോ​ഴുള്ള യഹോ​വ​യു​ടെ വികാരം മനസ്സി​ലാ​ക്കാൻ നമ്മെ സഹായി​ക്കു​ന്ന​തിന്‌ അവൻ ഇവിടെ വളരെ വ്യക്തമായ ഒരു ആലങ്കാ​രിക പ്രയോ​ഗം ഉപയോ​ഗി​ക്കു​ക​യാണ്‌. വളരെ ഭാരമുള്ള ഒരു ചുമട്‌ ദീർഘ​നേരം ചുമന്നു​വ​ലഞ്ഞ്‌, അത്‌ എവി​ടെ​യെ​ങ്കി​ലു​മൊന്ന്‌ ഇറക്കി​വെ​ച്ചാൽ മതി​യെന്ന്‌ ആശിച്ചു​പോ​യി​ട്ടുള്ള ഒരു സന്ദർഭം എപ്പോ​ഴെ​ങ്കി​ലും നിങ്ങൾക്ക്‌ ഉണ്ടായി​ട്ടു​ണ്ടോ? തന്റെ ജനത്തിന്റെ കപടഭ​ക്തി​യോ​ടു കൂടിയ ആരാധന കാണു​മ്പോൾ യഹോ​വ​യ്‌ക്കു തോന്നു​ന്നത്‌ അത്തരത്തി​ലുള്ള മടുപ്പാണ്‌.

7. യഹോവ തന്റെ ജനത്തിന്റെ പ്രാർഥ​നകൾ കേൾക്കു​ന്നതു നിറു​ത്തി​യി​രി​ക്കു​ന്നത്‌ എന്തു​കൊണ്ട്‌?

⁷ തുടർന്ന്‌, തന്റെ ജനത്തിന്റെ വ്യക്തി​പ​ര​മായ പ്രാർഥ​ന​കളെ കുറിച്ച്‌ യഹോവ പറയുന്നു. “നിങ്ങൾ കൈമ​ലർത്തു​മ്പോൾ ഞാൻ എന്റെ കണ്ണു മറെച്ചു​ക​ള​യും; നിങ്ങൾ എത്ര തന്നേ പ്രാർത്ഥ​ന​ക​ഴി​ച്ചാ​ലും ഞാൻ  കേൾക്ക​യില്ല; നിങ്ങളു​ടെ കൈ രക്തം​കൊ​ണ്ടു നിറഞ്ഞി​രി​ക്കു​ന്നു.” (യെശയ്യാ​വു 1:15) കൈ മലർത്തു​ന്നത്‌, അതായത്‌ ഉള്ളംകൈ മുകളി​ലേക്കു വരത്തക്ക വിധത്തിൽ കൈ വിരി​ച്ചു​പി​ടി​ക്കു​ന്നത്‌, അപേക്ഷ നടത്തു​ന്ന​തി​നെ സൂചി​പ്പി​ക്കു​ന്നു. എന്നാൽ, തന്റെ ജനം അങ്ങനെ ചെയ്യു​മ്പോൾ യഹോവ അതിനു വില കൽപ്പി​ക്കു​ന്നില്ല. കാരണം, അവരുടെ കൈകൾ രക്തം​കൊ​ണ്ടു നിറഞ്ഞി​രി​ക്കു​ന്നു. ദേശത്ത്‌ അക്രമം നടമാ​ടു​ക​യാണ്‌, ദുർബ​ല​രോ​ടുള്ള അതി​ക്രമം സാധാ​ര​ണ​മാ​യി​ത്തീർന്നി​രി​ക്കു​ന്നു. ദുഷ്‌ട​രും സ്വാർഥ​രു​മായ അത്തരം ആളുകൾ തന്നോടു പ്രാർഥി​ക്കു​ന്ന​തും അനു​ഗ്ര​ഹ​ത്തി​നാ​യി അപേക്ഷി​ക്കു​ന്ന​തും യഹോ​വ​യ്‌ക്കു വെറു​പ്പു​ള​വാ​ക്കുന്ന സംഗതി​യാണ്‌. അതു​കൊണ്ട്‌, “ഞാൻ കേൾക്ക​യില്ല” എന്ന്‌ യഹോവ പറയു​ന്ന​തിൽ അതിശ​യി​ക്കാ​നില്ല.

8. ഇന്നു ക്രൈ​സ്‌ത​വ​ലോ​കം എന്തു തെറ്റു ചെയ്യുന്നു, ചില ക്രിസ്‌ത്യാ​നി​കൾ സമാന​മായ ഒരു കെണി​യിൽ വീഴു​ന്നത്‌ എങ്ങനെ?

⁸ സമാനമായി നമ്മുടെ നാളിൽ, ക്രൈ​സ്‌ത​വ​ലോ​കം വ്യർഥ​മായ പ്രാർഥ​ന​ക​ളു​ടെ അന്തമി​ല്ലാത്ത ആവർത്ത​ന​ത്തി​ലൂ​ടെ​യും മതപര​മായ മറ്റു “പ്രവൃ​ത്തിക”ളിലൂ​ടെ​യും ദൈവ​പ്രീ​തി നേടാൻ ശ്രമി​ച്ചി​ട്ടു​ണ്ടെ​ങ്കി​ലും അതിൽ പരാജ​യ​പ്പെ​ട്ടി​രി​ക്കു​ന്നു. (മത്തായി 7:21-23) അതേ കെണി​യിൽ നാം വീണു​പോ​കാ​തി​രി​ക്കാൻ സൂക്ഷി​ക്കു​ന്നതു വളരെ പ്രധാ​ന​മാണ്‌. ചില ക്രിസ്‌ത്യാ​നി​കൾ ഗുരു​ത​ര​മായ പാപം ചെയ്യു​ക​യും അതു മറച്ചു​വെ​ക്കു​ക​യും  ചെയ്യുന്നു. ക്രിസ്‌തീയ സഭയിൽ സജീവ​മാ​യി പ്രവർത്തി​ക്കു​ന്ന​തി​നാൽ തങ്ങൾ ചെയ്യുന്ന പാപം കണക്കി​ടാ​തെ പോകു​മെന്ന്‌ അവർ വിചാ​രി​ക്കു​ന്നു. എന്നാൽ അത്തരം കപടഭ​ക്തി​യിൽ യഹോവ ഒരിക്ക​ലും പ്രസാ​ദി​ക്കു​ക​യില്ല. ആത്മീയ രോഗ​ത്തിന്‌ ഒരു പരിഹാ​രമേ ഉള്ളൂ. അതാണു യെശയ്യാ പുസ്‌ത​ക​ത്തി​ലെ തുടർന്നുള്ള വാക്യങ്ങൾ വ്യക്തമാ​ക്കു​ന്നത്‌.

ആത്മീയ രോഗ​ത്തി​നുള്ള ചികിത്സ

9, 10. യഹോ​വ​യ്‌ക്കുള്ള നമ്മുടെ ആരാധ​ന​യിൽ ശുദ്ധി എത്ര പ്രധാ​ന​മാണ്‌?

⁹ ആർദ്രാനുകമ്പയുള്ള ദൈവ​മായ യഹോവ ഇപ്പോൾ അപേക്ഷാ​സ്വ​ര​ത്തിൽ പറയുന്നു: “നിങ്ങളെ കഴുകി വെടി​പ്പാ​ക്കു​വിൻ; [“നിങ്ങ​ളെ​ത്തന്നെ കഴുകു​വിൻ; നിങ്ങ​ളെ​ത്തന്നെ ശുദ്ധരാ​ക്കു​വിൻ,” NW] നിങ്ങളു​ടെ പ്രവൃ​ത്തി​ക​ളു​ടെ ദോഷത്തെ എന്റെ കണ്ണിന്മു​മ്പിൽനി​ന്നു നീക്കി​ക്ക​ള​വിൻ; തിന്മ ചെയ്യു​ന്നതു മതിയാ​ക്കു​വിൻ. നന്മ ചെയ്‌വാൻ പഠിപ്പിൻ; ന്യായം അന്വേ​ഷി​പ്പിൻ; പീഡി​പ്പി​ക്കു​ന്ന​വനെ നേർവ്വ​ഴി​ക്കാ​ക്കു​വിൻ; അനാഥന്നു ന്യായം നടത്തി​ക്കൊ​ടു​പ്പിൻ; വിധ​വെക്കു വേണ്ടി വ്യവഹ​രി​പ്പിൻ.” (യെശയ്യാ​വു 1:16, 17) ഒമ്പത്‌ സുപ്ര​ധാന കാര്യങ്ങൾ അഥവാ കൽപ്പനകൾ നാം ഇവിടെ കാണുന്നു. ആദ്യത്തെ നാലെണ്ണം പാപ​ത്തോ​ടു ബന്ധപ്പെ​ട്ടി​രി​ക്കു​ന്നു; എന്നാൽ അവസാ​നത്തെ അഞ്ചെണ്ണം യഹോ​വ​യു​ടെ അനു​ഗ്രഹം ലഭിക്കാൻ സഹായി​ക്കുന്ന നടപടി​കളെ കുറിച്ചു പറയുന്നു.

¹⁰ കഴുകലും ശുദ്ധീ​ക​ര​ണ​വും എപ്പോ​ഴും നിർമ​ലാ​രാ​ധ​ന​യു​ടെ ഒരു സുപ്ര​ധാന ഭാഗം ആയിരു​ന്നി​ട്ടുണ്ട്‌. (പുറപ്പാ​ടു 19:10, 11; 30:20; 2 കൊരി​ന്ത്യർ 7:1) എന്നാൽ തന്റെ ആരാധകർ ബാഹ്യ​മായ ശുദ്ധീ​ക​രണം നടത്തു​ന്ന​തി​ലു​മ​ധി​കം ചെയ്യാൻ, അതായത്‌ അവർ തങ്ങളുടെ ഹൃദയം നിർമ​ല​മാ​ക്കാൻ, യഹോവ പ്രതീ​ക്ഷി​ക്കു​ന്നു. ധാർമി​ക​വും ആത്മീയ​വു​മായ ശുദ്ധി​യാണ്‌ ഏറ്റവും പ്രധാനം. അതി​നെ​യാണ്‌ യഹോവ പരാമർശി​ക്കു​ന്ന​തും. 16-ാം വാക്യ​ത്തിൽ കാണുന്ന ആദ്യത്തെ രണ്ടു കൽപ്പനകൾ കേവലം ആവർത്ത​നമല്ല. ‘കഴുകുക’ എന്ന ആദ്യ പ്രയോ​ഗം ശുദ്ധീ​ക​രി​ക്കാ​നുള്ള പ്രഥമ നടപടി​യെ​യും ‘ശുദ്ധരാ​ക്കുക’ എന്ന പ്രയോ​ഗം ശുദ്ധമായ ആ അവസ്ഥ നിലനിർത്താ​നുള്ള തുടർച്ച​യായ ശ്രമങ്ങ​ളെ​യും സൂചി​പ്പി​ക്കു​ന്നു എന്ന്‌ ഒരു എബ്രായ വൈയാ​ക​രണൻ പറയുന്നു.

11. പാപ​ത്തോ​ടു പോരാ​ടാൻ നാം എന്തു ചെയ്യണം, നാം ഒരിക്ക​ലും എന്തു ചെയ്യാൻ പാടില്ല?

¹¹ നമുക്ക്‌ യഹോ​വ​യിൽനി​ന്നു യാതൊ​ന്നും ഒളിച്ചു​വെ​ക്കാ​നാ​വില്ല. (ഇയ്യോബ്‌ 34:22; സദൃശ​വാ​ക്യ​ങ്ങൾ 15:3; എബ്രായർ 4:13) അതു​കൊണ്ട്‌, “നിങ്ങളു​ടെ പ്രവൃ​ത്തി​ക​ളു​ടെ ദോഷത്തെ എന്റെ കണ്ണിന്മു​മ്പിൽനി​ന്നു നീക്കി​ക്ക​ള​വിൻ” എന്ന കൽപ്പന​യ്‌ക്ക്‌ തിന്മ ചെയ്യു​ന്നതു നിറു​ത്തുക എന്ന ഒരു അർഥമേ ഉള്ളൂ. അപ്പോൾ, തീർച്ച​യാ​യും ഗുരു​ത​ര​മായ പാപങ്ങൾ മറച്ചു​വെ​ക്ക​രു​തെ​ന്നാണ്‌ അതിന്റെ അർഥം. പാപങ്ങൾ മറച്ചു​വെ​ക്കു​ന്ന​തു​തന്നെ  ഒരു പാപമാണ്‌. സദൃശ​വാ​ക്യ​ങ്ങൾ 28:13 ഇങ്ങനെ മുന്നറി​യി​പ്പു നൽകുന്നു: “തന്റെ ലംഘന​ങ്ങളെ മറെക്കു​ന്ന​വന്നു ശുഭം വരിക​യില്ല; അവയെ ഏററു​പ​റഞ്ഞു ഉപേക്ഷി​ക്കു​ന്ന​വ​ന്നോ കരുണ​ല​ഭി​ക്കും.”

12. (എ) ‘നന്മ ചെയ്യാൻ പഠിക്കു​ന്നത്‌’ പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌? (ബി) ‘ന്യായം അന്വേ​ഷി​ക്കാ’നും ‘പീഡി​പ്പി​ക്കു​ന്ന​വനെ നേർവ​ഴി​ക്കാ​ക്കാ’നുമുള്ള നിർദേ​ശങ്ങൾ പ്രത്യേ​കി​ച്ചു മൂപ്പന്മാർക്ക്‌ എങ്ങനെ ബാധക​മാ​ക്കാ​നാ​കും?

¹² യെശയ്യാവു 1-ാം അധ്യാ​യ​ത്തി​ന്റെ 17-ാം വാക്യ​ത്തിൽ യഹോവ കൽപ്പി​ച്ചി​രി​ക്കുന്ന ക്രിയാ​ത്മക നടപടി​ക​ളിൽനി​ന്നു നമുക്കു ധാരാളം കാര്യങ്ങൾ പഠിക്കാൻ സാധി​ക്കും. ‘നന്മ ചെയ്യുക’ എന്നല്ല, മറിച്ച്‌ ‘നന്മ ചെയ്യാൻ പഠിപ്പിൻ’ എന്നാണ്‌ അവൻ പറയു​ന്നത്‌ എന്നതു ശ്രദ്ധി​ക്കുക. ദൈവ​ദൃ​ഷ്ടി​യിൽ നല്ലത്‌ എന്താ​ണെന്ന്‌ അറിയാ​നും അതു ചെയ്യാ​നും ദൈവ​വ​ച​ന​ത്തി​ന്റെ വ്യക്തി​പ​ര​മായ പഠനം അനിവാ​ര്യ​മാണ്‌. മാത്രമല്ല, ‘ന്യായം പ്രവർത്തി​പ്പിൻ’ എന്നല്ല യഹോവ പറയു​ന്നത്‌, ‘ന്യായം അന്വേ​ഷി​പ്പിൻ’ എന്നാണ്‌. സങ്കീർണ​മായ കാര്യങ്ങൾ കൈകാ​ര്യം ചെയ്യു​മ്പോൾ നീതി​നി​ഷ്‌ഠ​മായ ഗതി എന്താ​ണെന്ന്‌ അറിയാൻ അനുഭ​വ​സ​മ്പ​ന്ന​രായ മൂപ്പന്മാർ പോലും ദൈവ​വ​ചനം സമഗ്ര​മാ​യി പരി​ശോ​ധി​ക്കേ​ണ്ട​തുണ്ട്‌. തുടർന്ന്‌ യഹോവ കൽപ്പി​ക്കു​ന്ന​തു​പോ​ലെ, ‘പീഡി​പ്പി​ക്കു​ന്ന​വനെ നേർവ​ഴി​ക്കാ​ക്കുക’ എന്ന ചുമത​ല​യും അവർക്കുണ്ട്‌. ഈ നിർദേ​ശങ്ങൾ ഇന്നത്തെ ക്രിസ്‌തീയ ഇടയന്മാർ പിൻപ​റ്റു​ന്നതു പ്രധാ​ന​മാണ്‌. കാരണം, “കൊടിയ ചെന്നായ്‌ക്ക”ളിൽനിന്ന്‌ ആട്ടിൻകൂ​ട്ടത്തെ രക്ഷിക്കാൻ അവർ ആഗ്രഹി​ക്കു​ന്നു.—പ്രവൃ​ത്തി​കൾ 20:28-30.

13. അനാഥ​നെ​യും വിധവ​യെ​യും കുറി​ച്ചുള്ള കൽപ്പനകൾ നമുക്ക്‌ ഇന്ന്‌ എങ്ങനെ ബാധക​മാ​ക്കാൻ കഴിയും?

¹³ അവസാനത്തെ രണ്ടു കൽപ്പനകൾ ദൈവ​ജ​ന​ത്തി​ന്റെ ഇടയിലെ ഏറെ ദുർബ​ല​രായ രണ്ടു കൂട്ടം ആളുകൾ ഉൾപ്പെ​ടു​ന്ന​താണ്‌—അനാഥ​രും വിധവ​മാ​രും. ഇവരെ മുത​ലെ​ടു​ക്കാൻ ലോകം സദാ കച്ചകെട്ടി നിൽക്കു​ക​യാണ്‌; എന്നാൽ ദൈവ​ജ​ന​ത്തി​ന്റെ ഇടയിലെ അവസ്ഥ അതായി​രി​ക്ക​രുത്‌. സ്‌നേ​ഹ​സ​മ്പ​ന്ന​രായ മൂപ്പന്മാർ സഭയിലെ പിതാ​വി​ല്ലാത്ത കുട്ടി​കൾക്കാ​യി ‘ന്യായം നടത്തുന്നു.’ അവർ ഇതു ചെയ്യു​ന്നത്‌, ഈ കുട്ടി​കളെ മുത​ലെ​ടു​ക്കാ​നും ദുഷി​പ്പി​ക്കാ​നും തക്കം പാർത്തി​രി​ക്കുന്ന ഈ ലോക​ത്തിൽ നീതി​യും സംരക്ഷ​ണ​വും ലഭിക്കാൻ അവരെ സഹായി​ച്ചു​കൊ​ണ്ടാണ്‌. മൂപ്പന്മാർ വിധവ​യ്‌ക്കു വേണ്ടി ‘വ്യവഹ​രി​ക്കു​ന്നു,’ അഥവാ ഇവിടെ ഉപയോ​ഗി​ച്ചി​രി​ക്കുന്ന എബ്രായ പദം വ്യക്തമാ​ക്കു​ന്ന​തു​പോ​ലെ, അവൾക്കു വേണ്ടി “പോരാ​ടു​ന്നു.” വാസ്‌ത​വ​ത്തിൽ, സഹായം ആവശ്യ​മു​ള്ള​വർക്ക്‌ അഭയവും ആശ്വാ​സ​വും നീതി​യും ലഭിച്ചു​കാ​ണാൻ എല്ലാ ക്രിസ്‌ത്യാ​നി​ക​ളും ആഗ്രഹി​ക്കു​ന്നു. കാരണം, അവർ യഹോ​വ​യ്‌ക്കു വളരെ വില​പ്പെ​ട്ട​വ​രാണ്‌.—മീഖാ 6:8; യാക്കോബ്‌ 1:27.

14. യെശയ്യാ​വു 1:16, 17-ൽ ഏതു ക്രിയാ​ത്മക സന്ദേശം അടങ്ങി​യി​രി​ക്കു​ന്നു?

¹⁴ ഈ ഒമ്പതു കൽപ്പന​ക​ളി​ലൂ​ടെ എത്ര ദൃഢവും ക്രിയാ​ത്മ​ക​വു​മായ സന്ദേശ​മാണ്‌ യഹോവ നൽകു​ന്നത്‌! ശരിയാ​യതു ചെയ്യാൻ തങ്ങൾക്ക്‌  ആവി​ല്ലെന്നു ദുഷ്‌പ്ര​വൃ​ത്തി​യിൽ ഏർപ്പെ​ട്ടി​രി​ക്കു​ന്നവർ കരുതി​യേ​ക്കാം. അത്തരം ചിന്ത നിരു​ത്സാ​ഹ​ജ​ന​ക​മാണ്‌, മാത്രമല്ല തെറ്റു​മാണ്‌. തന്റെ സഹായ​മു​ണ്ടെ​ങ്കിൽ, തെറ്റായ ഗതി ഉപേക്ഷി​ക്കാ​നും തിരി​ഞ്ഞു​വ​രാ​നും ശരിയാ​യതു ചെയ്യാ​നും ഏതൊ​രാൾക്കും സാധി​ക്കു​മെന്ന്‌ യഹോ​വ​യ്‌ക്ക്‌ അറിയാം, നാം അതു മനസ്സി​ലാ​ക്കാൻ അവൻ ആഗ്രഹി​ക്കു​ക​യും ചെയ്യുന്നു.

അനുക​മ്പാർദ്ര​വും നീതി​നി​ഷ്‌ഠ​വു​മായ ഒരു അപേക്ഷ

15. “നമുക്കു രമ്യത​പ്പെ​ടാം” എന്ന പ്രയോ​ഗം ആളുകൾ ചില​പ്പോ​ഴൊ​ക്കെ തെറ്റി​ദ്ധ​രി​ക്കു​ന്നത്‌ എങ്ങനെ, എന്നാൽ അതിന്റെ യഥാർഥ അർഥ​മെന്ത്‌?

¹⁵ ഊഷ്‌മളതയും അനുക​മ്പ​യും സ്‌ഫു​രി​ക്കുന്ന സ്വരത്തിൽ യഹോവ പിൻവ​രു​ന്ന​പ്ര​കാ​രം പറയുന്നു: “വരുവിൻ, നമുക്കു തമ്മിൽ വാദി​ക്കാം [“രമ്യത​പ്പെ​ടാം,” “പി.ഒ.സി. ബൈ.”] എന്നു യഹോവ അരുളി​ച്ചെ​യ്യു​ന്നു; നിങ്ങളു​ടെ പാപങ്ങൾ കടുഞ്ചു​വ​പ്പാ​യി​രു​ന്നാ​ലും ഹിമം​പോ​ലെ വെളു​ക്കും; രക്താം​ബ​രം​പോ​ലെ ചുവപ്പാ​യി​രു​ന്നാ​ലും പഞ്ഞി​പോ​ലെ ആയിത്തീ​രും.” (യെശയ്യാ​വു 1:18) ഈ മനോ​ഹ​ര​മായ വാക്യ​ത്തി​ന്റെ ആരംഭ​ത്തിൽ നൽകി​യി​രി​ക്കുന്ന ക്ഷണം മിക്ക​പ്പോ​ഴും തെറ്റി​ദ്ധ​രി​ക്ക​പ്പെ​ടു​ന്നു. ഉദാഹ​ര​ണ​ത്തിന്‌, “നമുക്കു വാദി​ച്ചു​തീർക്കാം” എന്നു ദ ന്യൂ ഇംഗ്ലീഷ്‌ ബൈബിൾ പറയുന്നു. യോജി​പ്പി​ലെ​ത്താൻ ഇരുക​ക്ഷി​ക​ളും വിട്ടു​വീഴ്‌ച ചെയ്യണം എന്ന ധ്വനി​യാണ്‌ അതിനു​ള്ളത്‌. എന്നാൽ, യഥാർഥ​ത്തിൽ അതിന്റെ അർഥം അതല്ല! യഹോവ യാതൊ​രു തെറ്റും ചെയ്‌തി​ട്ടില്ല, മത്സരി​ക​ളും കപടഭ​ക്ത​രു​മായ തന്റെ ജനത്തോട്‌ ഇടപെ​ട്ട​പ്പോൾ പോലും. (ആവർത്ത​ന​പു​സ്‌തകം 32:4, 5) തുല്യ​രായ രണ്ടു പേർ തമ്മിൽ ചർച്ചകൾ നടത്തി വിട്ടു​വീഴ്‌ച ചെയ്യുന്ന കാര്യത്തെ കുറിച്ചല്ല ഈ വാക്യം പറയു​ന്നത്‌. മറിച്ച്‌, നീതി സ്ഥാപി​ക്കാ​നുള്ള ഒരു വേദിയെ കുറി​ച്ചാണ്‌. ഒരു കോട​തി​വി​ചാ​ര​ണ​യ്‌ക്കാ​യി യഹോവ ഇസ്രാ​യേ​ലി​നെ വെല്ലു​വി​ളി​ക്കു​ന്നതു പോ​ലെ​യാണ്‌ ഇത്‌.

16, 17. ഗുരു​ത​ര​മായ പാപങ്ങൾ പോലും ക്ഷമിക്കാൻ യഹോവ മനസ്സൊ​രു​ക്ക​മു​ള്ള​വ​നാ​ണെന്ന്‌ നമു​ക്കെ​ങ്ങനെ അറിയാം?

¹⁶ യഹോവയുടെ മുമ്പാകെ കോട​തി​വി​ചാ​ര​ണ​യ്‌ക്കാ​യി ചെല്ലുക എന്നത്‌ ഭയപ്പെ​ടു​ത്തുന്ന ഒരു സംഗതി​യാ​യി തോന്നി​യേ​ക്കാം. എന്നാൽ ഏറ്റവും കരുണ​യും അനുക​മ്പ​യും ഉള്ള ന്യായാ​ധി​പ​നാണ്‌ യഹോവ. അവനെ​പ്പോ​ലെ ക്ഷമ പ്രകടി​പ്പി​ക്കു​ന്ന​വ​രാ​യി മറ്റാരു​മില്ല. (സങ്കീർത്തനം 86:5) ഇസ്രാ​യേ​ലി​ന്റെ ‘കടുഞ്ചു​വപ്പ്‌’ ആയ പാപങ്ങൾ കഴുകി​ക്ക​ളഞ്ഞ്‌ അവരെ “ഹിമം​പോ​ലെ” വെളു​പ്പി​ക്കാൻ അവനു മാത്രമേ സാധിക്കൂ. മനുഷ്യ​രു​ടെ ശ്രമങ്ങൾക്കോ മതപര​മായ ചടങ്ങു​കൾക്കോ യാഗങ്ങൾക്കോ പ്രാർഥ​ന​കൾക്കോ ഒന്നും പാപക്കറ നീക്കം ചെയ്യാ​നാ​വില്ല. യഹോ​വ​യിൽ നിന്നുള്ള ക്ഷമയ്‌ക്കു മാത്രമേ പാപം കഴുകി​ക്ക​ള​യാ​നാ​കൂ. ആ ക്ഷമ ലഭിക്കു​ന്ന​തി​നുള്ള വ്യവസ്ഥ​ക​ളും അവൻ വെക്കുന്നു. അവയിൽ ഹൃദയം​ഗ​മ​വും ആത്മാർഥ​വു​മായ അനുതാ​പം ഉൾപ്പെ​ട്ടി​രി​ക്കു​ന്നു.

 ¹⁷ ഈ സത്യം വളരെ പ്രധാ​ന​പ്പെട്ട ഒന്നാണ്‌. അതു​കൊണ്ട്‌ അവൻ അതു കാവ്യാ​ത്മക ശൈലി​യിൽ വീണ്ടും ആവർത്തി​ക്കു​ന്നു. അതായത്‌, “രക്താം​ബരം” പോലുള്ള പാപങ്ങൾ പോലും പുതിയ, നിറം​കൊ​ടു​ക്കാത്ത, തൂവെ​ള്ള​യായ പഞ്ഞി​പോ​ലെ ആയിത്തീ​രു​മെന്ന്‌ അവൻ പറയുന്നു. നാം യഥാർഥ അനുതാ​പം പ്രകട​മാ​ക്കു​ന്നെ​ങ്കിൽ, ഗുരു​ത​ര​മായ പാപങ്ങൾ പോലും ക്ഷമിക്കു​ന്ന​വ​നാണ്‌ യഹോ​വ​യെന്ന്‌ നാം അറിയാൻ അവൻ ആഗ്രഹി​ക്കു​ന്നു. തങ്ങളുടെ കാര്യ​ത്തിൽ അതു സത്യമാ​യി​രി​ക്കു​മോ എന്നു സംശയ​മു​ള്ളവർ മനശ്ശെ​യു​ടെ ദൃഷ്ടാന്തം പരിചി​ന്തി​ക്കു​ന്നതു നല്ലതാണ്‌. അവൻ വർഷങ്ങ​ളോ​ളം കൊടിയ പാപങ്ങൾ ചെയ്‌തു. എന്നിട്ടും, അനുത​പി​ച്ച​പ്പോൾ അവനു ക്ഷമ ലഭിച്ചു. (2 ദിനവൃ​ത്താ​ന്തം 33:9-16) താനു​മാ​യി ‘രമ്യത​പ്പെ​ടാൻ’ സമയം വൈകി​പ്പോ​യി​ട്ടില്ല എന്നു നാമെ​ല്ലാം, ഗുരു​ത​ര​മായ പാപങ്ങൾ ചെയ്‌തി​ട്ടു​ള്ളവർ പോലും, തിരി​ച്ച​റി​യാൻ യഹോവ ആഗ്രഹി​ക്കു​ന്നു.

18. മത്സരി​ക​ളായ തന്റെ ജനത്തിനു മുമ്പാകെ യഹോവ എന്തു തിര​ഞ്ഞെ​ടു​പ്പാണ്‌ വെച്ചത്‌?

¹⁸ തങ്ങൾ ദൈവത്തെ അനുസ​രി​ക്ക​ണ​മോ വേണ്ടയോ എന്ന ഒരു തിര​ഞ്ഞെ​ടുപ്പ്‌ നടത്തേ​ണ്ട​തു​ണ്ടെന്ന്‌ യഹോവ തന്റെ ജനത്തെ ഓർമി​പ്പി​ക്കു​ന്നു. “നിങ്ങൾ മനസ്സു​വെച്ചു കേട്ടനു​സ​രി​ക്കു​ന്നു​വെ​ങ്കിൽ ദേശത്തി​ലെ നന്മ അനുഭ​വി​ക്കും. മറുത്തു മത്സരി​ക്കു​ന്നു എങ്കിലോ നിങ്ങൾ വാളി​ന്നി​ര​യാ​യ്‌തീ​രും; യഹോ​വ​യു​ടെ വായ്‌ അരുളി​ച്ചെ​യ്‌തി​രി​ക്കു​ന്നു.” (യെശയ്യാ​വു 1:19, 20) യഹോവ ഇവിടെ ഊന്നൽ നൽകു​ന്നത്‌ ആളുക​ളു​ടെ മനോ​ഭാ​വ​ത്തി​നാണ്‌. അനന്തര​ഫ​ലങ്ങൾ ആ മനോ​ഭാ​വത്തെ ആശ്രയി​ച്ചി​രി​ക്കു​ന്നു എന്നു വ്യക്തമാ​ക്കാൻ അവൻ യഹൂദ​യു​ടെ മുമ്പാകെ ഒരു തിര​ഞ്ഞെ​ടുപ്പ്‌ വെക്കുന്നു: ഒന്നുകിൽ സമൃദ്ധി അനുഭ​വി​ക്കുക, അല്ലെങ്കിൽ വാളി​നി​ര​യാ​കുക. യഹോവ പറയു​ന്നത്‌ കേട്ടനു​സ​രി​ക്കാ​നുള്ള മനസ്സൊ​രു​ക്കം ഉണ്ടെങ്കിൽ, അവർ ദേശത്തെ നല്ല ഫലം അനുഭ​വി​ക്കും. എന്നാൽ മത്സരഗ​തി​യിൽ തുടരു​ന്നെ​ങ്കി​ലോ, ശത്രു​ക്ക​ളു​ടെ വാളി​നി​ര​യാ​കും. ക്ഷമ പ്രകട​മാ​ക്കുന്ന ദൈവ​ത്തി​ന്റെ കരുണ​യും അനു​ഗ്ര​ഹ​വും പ്രാപി​ക്കു​ന്ന​തി​നു പകരം, ഒരു ജനത ശത്രു​ക്ക​ളു​ടെ വാളി​നി​ര​യാ​കാൻ ആഗ്രഹി​ക്കു​ന്നത്‌ അചിന്ത​നീ​യ​മാ​യി തോന്നു​ന്നു. എന്നിരു​ന്നാ​ലും, തുടർന്നുള്ള വാക്യ​ങ്ങ​ളിൽ യെശയ്യാവ്‌ വ്യക്തമാ​ക്കു​ന്നതു പോലെ, യെരൂ​ശ​ലേം അതാണ്‌ തിര​ഞ്ഞെ​ടു​ത്തത്‌.

പ്രിയ നഗരത്തെ ചൊല്ലി​യുള്ള വിലാപം

19, 20. (എ) യഹോ​വ​യോട്‌ അവന്റെ ജനം കാട്ടിയ വിശ്വാ​സ​വഞ്ചന അവൻ എങ്ങനെ അറിയി​ക്കു​ന്നു? (ബി) ഏതു വിധത്തി​ലാണ്‌ യെരൂ​ശ​ലേ​മിൽ ‘നീതി വസിച്ചി​രു​ന്നത്‌’?

¹⁹ യെരൂശലേമിൽ ഇപ്പോൾ ദുഷ്‌ടത എത്രമാ​ത്രം വ്യാപി​ച്ചി​രി​ക്കു​ന്നു എന്ന്‌ യെശയ്യാ​വു 1:21-23-ൽനിന്നു കാണാം. ഇപ്പോൾ യെശയ്യാവ്‌ നിശ്വ​സ്‌ത​ത​യിൽ ഒരു വിലാ​പ​ഗീ​തം എഴുതാൻ തുടങ്ങു​ന്നു: “വിശ്വ​സ്‌ത​ന​ഗരം  വേശ്യ​യാ​യി തീർന്നി​രി​ക്കു​ന്നതു എങ്ങനെ! അതിൽ ന്യായം നിറഞ്ഞി​രു​ന്നു; നീതി വസിച്ചി​രു​ന്നു; ഇപ്പോ​ഴോ, കുലപാ​ത​ക​ന്മാർ.”—യെശയ്യാ​വു 1:21.

²⁰ യെരൂശലേം നഗരം എത്രയോ അധഃപ​തി​ച്ചി​രി​ക്കു​ന്നു! ഒരു വിശ്വസ്‌ത ഭാര്യ ആയിരുന്ന അവൾ ഇതാ ഒരു വേശ്യയെ പോലെ ആയിത്തീർന്നി​രി​ക്കു​ന്നു. യഹോ​വ​യോട്‌ അവന്റെ ജനം കാട്ടിയ വിശ്വാ​സ​വ​ഞ്ച​ന​യും അവനു​ണ്ടായ ദുഃഖ​വും ഇത്ര ശക്തമായി പ്രതി​ഫ​ലി​പ്പി​ക്കാൻ മറ്റേതു ദൃഷ്ടാ​ന്ത​ത്തി​നു കഴിയും? ആ നഗരത്തിൽ “നീതി വസിച്ചി​രു​ന്നു.” എപ്പോൾ? ഇസ്രാ​യേൽ അസ്‌തി​ത്വ​ത്തിൽ വരുന്ന​തി​നു മുമ്പ്‌, അബ്രാ​ഹാ​മി​ന്റെ നാളിൽത്തന്നെ ആ നഗരം ശാലേം എന്നു വിളി​ക്ക​പ്പെ​ട്ടി​രു​ന്നു. രാജാ​വും പുരോ​ഹി​ത​നു​മായ ഒരുവ​നാണ്‌ അതിൽ ഭരണം നടത്തി​യി​രു​ന്നത്‌. അവന്റെ പേര്‌ മൽക്കീ​സേ​ദെക്‌ എന്നായി​രു​ന്നു. ‘നീതി​യു​ടെ രാജാവ്‌’ എന്നർഥ​മുള്ള ആ പേര്‌ അവനു ശരിക്കും യോജി​ക്കു​ന്ന​താ​യി​രു​ന്നു. (എബ്രായർ 7:2; ഉല്‌പത്തി 14:18-20) മൽക്കീ​സേ​ദെ​ക്കി​ന്റെ കാലത്തി​നും 1,000 വർഷത്തി​നു ശേഷം, ദാവീ​ദി​ന്റെ​യും ശലോ​മോ​ന്റെ​യും ഭരണകാ​ലത്ത്‌ യെരൂ​ശ​ലേം സമൃദ്ധി​യു​ടെ നെറു​ക​യിൽ എത്തി. പ്രത്യേ​കി​ച്ചും  അവിടത്തെ രാജാ​ക്ക​ന്മാർ യഹോ​വ​യു​ടെ വഴിക​ളിൽ നടന്നു​കൊണ്ട്‌ ജനങ്ങൾക്കു നല്ല മാതൃക വെച്ച​പ്പോൾ “അതിൽ . . . നീതി വസിച്ചി​രു​ന്നു.” എന്നിരു​ന്നാ​ലും, യെശയ്യാ​വി​ന്റെ കാലം ആയപ്പോ​ഴേ​ക്കും അതെല്ലാം ഒരു വിദൂ​ര​സ്‌മരണ മാത്ര​മാ​യി​രു​ന്നു.

21, 22. കിട്ടവും വെള്ളം ചേർന്ന വീഞ്ഞും എന്തിനെ സൂചി​പ്പി​ക്കു​ന്നു, അത്തര​മൊ​രു വിശേ​ഷണം യഹൂദ​യി​ലെ നേതാ​ക്ക​ന്മാർക്കു ശരിക്കും യോജി​ക്കു​ന്നത്‌ എന്തു​കൊണ്ട്‌?

²¹ യെരൂശലേമിലെ പ്രശ്‌ന​ങ്ങ​ളു​ടെ മുഖ്യ കാരണ​ക്കാർ ജനത്തിന്റെ ഇടയിലെ നേതാ​ക്ക​ന്മാ​രാ​ണെന്നു തോന്നു​ന്നു. യെശയ്യാവ്‌ തന്റെ വിലാപം തുടരു​ന്നു: “നിന്റെ വെള്ളി കീടമാ​യും [“കിട്ടം ആയി,” “ഓശാന ബൈ.”] നിന്റെ വീഞ്ഞു വെള്ളം ചേർന്നും ഇരിക്കു​ന്നു. നിന്റെ പ്രഭു​ക്ക​ന്മാർ മത്സരികൾ; കള്ളന്മാ​രു​ടെ കൂട്ടാ​ളി​കൾ തന്നേ; അവർ ഒക്കെയും സമ്മാന​പ്രി​യ​രും [“കൈക്കൂ​ലി​പ്രി​യർ,” “ഓശാന ബൈ.”] പ്രതി​ഫലം കാംക്ഷി​ക്കു​ന്ന​വ​രും ആകുന്നു; അവർ അനാഥന്നു ന്യായം നടത്തി​ക്കൊ​ടു​ക്കു​ന്നില്ല; വിധവ​യു​ടെ വ്യവഹാ​രം അവരുടെ അടുക്കൽ വരുന്ന​തു​മില്ല.” (യെശയ്യാ​വു 1:22, 23) യെശയ്യാവ്‌ ഇവിടെ വായന​ക്കാ​രു​ടെ മുമ്പിൽ ഒന്നിനു പുറകെ ഒന്നായി രണ്ടു വാങ്‌മയ ചിത്രങ്ങൾ അവതരി​പ്പി​ക്കു​ക​യാണ്‌. നടക്കാ​നി​രി​ക്കുന്ന സംഗതി​കൾക്കാ​യി അവ അവരെ മാനസി​ക​മാ​യി ഒരുക്കു​ന്നു. ആലയിലെ കൊല്ലൻ, ഉരുക്കിയ വെള്ളി​ലോ​ഹ​ത്തിൽനിന്ന്‌ പാട​പോ​ലുള്ള കിട്ടം നീക്കം ചെയ്യുന്നു. ഇസ്രാ​യേ​ലി​ലെ പ്രഭു​ക്ക​ന്മാ​രും ന്യായാ​ധി​പ​ന്മാ​രും കിട്ടം പോ​ലെ​യാണ്‌. അവരെ നീക്കം ചെയ്യേ​ണ്ട​തുണ്ട്‌. വെള്ളം ചേർന്ന്‌ ഗുണവും രുചി​യും നഷ്‌ട​പ്പെട്ട വീഞ്ഞു പോ​ലെ​യാണ്‌ അവർ. അത്തരം പാനീയം ഓടയിൽ ഒഴിക്കാ​നേ കൊള്ളൂ!

²² ഈ വിശേ​ഷ​ണങ്ങൾ ആ നേതാ​ക്ക​ന്മാർക്കു ശരിക്കും യോജി​ക്കു​ന്ന​താ​യി 23-ാം വാക്യം പ്രകട​മാ​ക്കു​ന്നു. മോ​ശൈക ന്യായ​പ്ര​മാ​ണം ദൈവ​ജ​നത്തെ ശ്രേഷ്‌ഠ​രാ​ക്കു​ക​യും മറ്റു ജനതക​ളിൽനി​ന്നു വേർതി​രി​ച്ചു നിറു​ത്തു​ക​യും ചെയ്‌തു. ഉദാഹ​ര​ണ​ത്തിന്‌, അനാഥ​രെ​യും വിധവ​മാ​രെ​യും സംരക്ഷി​ക്ക​ണ​മെന്ന്‌ അത്‌ അവരോ​ടു കൽപ്പി​ച്ചി​രു​ന്നു. (പുറപ്പാ​ടു 22:22-24) എന്നാൽ യെശയ്യാ​വി​ന്റെ നാളിൽ, അനുകൂ​ല​മായ എന്തെങ്കി​ലും ന്യായ​വി​ധി ലഭിക്കു​മെന്ന പ്രതീക്ഷ അനാഥർക്ക്‌ ഉണ്ടായി​രു​ന്നില്ല. വിധവ​യു​ടെ കാര്യ​ത്തി​ലാ​ണെ​ങ്കിൽ, അവൾക്കു വേണ്ടി പോരാ​ടു​ന്നതു പോയിട്ട്‌ അവളുടെ സങ്കടം കേൾക്കാൻ പോലും ആരുമു​ണ്ടാ​യി​രു​ന്നില്ല. ഈ ന്യായാ​ധി​പ​ന്മാ​രും നേതാ​ക്ക​ന്മാ​രും സ്വാർഥ​പൂർവം പ്രവർത്തി​ക്കു​ന്ന​തിൽ വ്യാപൃ​ത​രാണ്‌. അവർ കൈക്കൂ​ലി വാങ്ങുന്നു, സമ്മാനങ്ങൾ കാംക്ഷി​ക്കു​ന്നു, കള്ളന്മാർക്കു കൂട്ടു​നിൽക്കു​ന്നു, ദ്രോ​ഹി​ക്ക​പ്പെ​ടു​ന്നവർ കഷ്‌ടത അനുഭ​വി​ക്കു​മ്പോൾ ദ്രോ​ഹി​ക്കു​ന്ന​വർക്ക്‌ അവർ സംരക്ഷ​ണ​മേ​കു​ന്നു. തങ്ങളുടെ ദുർഗ​തി​യിൽ അവർ ‘മത്സരികൾ’ അഥവാ കഠിന​ഹൃ​ദയർ ആയിത്തീർന്നി​രി​ക്കു​ന്നു എന്നതാണ്‌ ഏറെ മോശ​മായ സംഗതി. എത്ര ദയനീ​യ​മായ സ്ഥിതി​വി​ശേഷം!

 യഹോവ തന്റെ ജനത്തെ ശുദ്ധീ​ക​രി​ക്കും

23. പ്രതി​യോ​ഗി​ക​ളോ​ടുള്ള എന്തു വികാരം യഹോവ പ്രകടി​പ്പി​ക്കു​ന്നു?

²³ അത്തരം അധികാര ദുർവി​നി​യോ​ഗം യഹോവ എക്കാല​വും വെച്ചു​പൊ​റു​പ്പി​ക്കു​ക​യില്ല. യെശയ്യാവ്‌ തുടർന്നു പറയുന്നു: “അതു​കൊ​ണ്ടു യിസ്രാ​യേ​ലി​ന്റെ വല്ലഭനാ​യി സൈന്യ​ങ്ങ​ളു​ടെ യഹോ​വ​യായ കർത്താവു അരുളി​ച്ചെ​യ്യു​ന്നു: ഹാ, ഞാൻ എന്റെ വൈരി​ക​ളോ​ടു പകവീട്ടി എന്റെ ശത്രു​ക്ക​ളോ​ടു പ്രതി​കാ​രം നടത്തും.” (യെശയ്യാ​വു 1:24) യഹോ​വ​യ്‌ക്ക്‌ ഇവിടെ ‘കർത്താവ്‌,’ ‘യിസ്രാ​യേ​ലി​ന്റെ വല്ലഭൻ,’ ‘സൈന്യ​ങ്ങ​ളു​ടെ യഹോവ’ എന്നീ മൂന്നു സ്ഥാന​പ്പേ​രു​കൾ നൽകി​യി​രി​ക്കു​ന്നു. അവന്റെ ഉചിത​മായ കർതൃ​ത്വ​ത്തെ​യും വലിയ അധികാ​ര​ത്തെ​യും ഊന്നി​പ്പ​റ​യു​ന്ന​വ​യാണ്‌ അവ. യഹോ​വ​യ്‌ക്കു സഹതാപം തോന്നു​ന്നെ​ങ്കി​ലും ക്രോധം പ്രകടി​പ്പി​ക്കാ​നുള്ള അവന്റെ ദൃഢനി​ശ്ച​യത്തെ ധ്വനി​പ്പി​ക്കു​ന്ന​താ​യി​രി​ക്കാം ഈ വാക്യ​ത്തി​ലെ “ഹാ” എന്ന പ്രയോ​ഗം. യഹോ​വ​യ്‌ക്ക്‌ അങ്ങനെ തോന്നു​ന്ന​തി​നു നിശ്ചയ​മാ​യും കാരണ​മു​ണ്ടു​താ​നും.

24. തന്റെ ജനത്തി​നാ​യി യഹോവ എന്തു ശുദ്ധീ​കരണ പ്രക്രി​യ​യാണ്‌ ഉദ്ദേശി​ക്കു​ന്നത്‌?

²⁴ യഹോവയുടെ ജനം തങ്ങളെ​ത്തന്നെ അവന്റെ ശത്രുക്കൾ ആക്കിയി​രി​ക്കു​ന്നു. അവർ ശരിക്കും ദിവ്യ​ക്രോ​ധം അർഹി​ക്കു​ന്നു. യഹോവ അവരോ​ടു ‘പകവീ​ട്ടും,’ അതായത്‌ അവരെ നശിപ്പി​ക്കും. തന്റെ നാമം വഹിക്കുന്ന ജനത്തെ അവൻ പാടേ ഇല്ലാതാ​ക്കും എന്നാണോ അതിന്റെ അർഥം? അല്ല. കാരണം, യഹോവ ഇങ്ങനെ തുടർന്നു പറയുന്നു: “ഞാൻ നിനക്ക്‌ എതിരെ എന്റെ കരം തിരി​ക്കും. ക്ഷാരജ​ലം​കൊണ്ട്‌ എന്നപോ​ലെ നിന്നിലെ കിട്ടം ഞാൻ ഉരുക്കി​ക്ക​ള​യും; നിന്നിലെ കലർപ്പെ​ല്ലാം നീക്കി​ക്ക​ള​യും.” (യെശയ്യാ​വു 1:25, “ഓശാന ബൈ.”) യഹോവ ഇവിടെ ശുദ്ധീ​കരണ പ്രക്രി​യയെ ഒരു ദൃഷ്‌ടാ​ന്ത​മാ​യി ഉപയോ​ഗി​ക്കു​ക​യാണ്‌. അമൂല്യ​മായ ലോഹ​ത്തിൽനിന്ന്‌ കിട്ടം നീങ്ങി​ക്കി​ട്ടാൻ പ്രാചീന കാലങ്ങ​ളി​ലെ ശുദ്ധീ​കരണ വിദഗ്‌ധർ ഒരുതരം ക്ഷാരജലം ഉപയോ​ഗി​ച്ചി​രു​ന്നു. തന്റെ ജനത്തിലെ എല്ലാവ​രെ​യും ദുഷ്‌ട​രാ​യി യഹോവ വീക്ഷി​ക്കു​ന്നി​ല്ലാ​ത്ത​തി​നാൽ, സമാന​മായ ഒരു വിധത്തിൽ, അവൻ ‘അവരെ ഉചിത​മാ​യി ശിക്ഷി​ക്കും.’ അവൻ അവരുടെ ഇടയിൽനിന്ന്‌ ‘കലർപ്പ്‌’ അഥവാ മാലി​ന്യ​ങ്ങൾ, അതായത്‌ പഠിക്കാ​നും അനുസ​രി​ക്കാ​നും വിസമ്മ​തി​ക്കുന്ന മത്സരി​ക​ളും അനഭി​കാ​മ്യ​രു​മായ വ്യക്തി​കളെ, മാത്രമേ നീക്കി​ക്ക​ളയൂ. c (യിരെ​മ്യാ​വു 46:28) ഇങ്ങനെ ചരിത്രം മുൻകൂ​ട്ടി എഴുതാ​നുള്ള പദവി യെശയ്യാ​വി​നു ലഭിച്ചി​രി​ക്കു​ന്നു.

25. (എ) പൊ.യു.മു. 607-ൽ യഹോവ തന്റെ ജനത്തെ ശുദ്ധീ​ക​രി​ച്ചത്‌ എങ്ങനെ? (ബി) ആധുനിക നാളു​ക​ളിൽ എപ്പോ​ഴാണ്‌ യഹോവ തന്റെ ജനത്തെ ശുദ്ധീ​ക​രി​ച്ചത്‌?

²⁵ യഹോവ തന്റെ ജനത്തെ ശുദ്ധീ​ക​രി​ക്കു​ക​തന്നെ ചെയ്‌തു. അവരുടെ ഇടയിൽനി​ന്നു കിട്ടമായ ദുഷിച്ച നേതാ​ക്ക​ന്മാ​രെ​യും മറ്റു മത്സരി​ക​ളെ​യും  നീക്കം ചെയ്‌തു​കൊ​ണ്ടാണ്‌ അവൻ അതു ചെയ്‌തത്‌. യെശയ്യാ​വു മരിച്ച്‌ വർഷങ്ങൾക്കു ശേഷം, അതായത്‌ പൊ.യു.മു. 607-ൽ, യെരൂ​ശ​ലേം നശിപ്പി​ക്ക​പ്പെട്ടു, ശത്രുക്കൾ അതിലെ നിവാ​സി​കളെ ബാബി​ലോ​ണി​ലേക്കു പ്രവാ​സി​ക​ളാ​യി പിടി​ച്ചു​കൊ​ണ്ടു​പോ​യി. ഈ സംഭവ​ത്തിന്‌, വളരെ കാലത്തി​നു ശേഷം ദൈവം കൈ​ക്കൊണ്ട മറ്റൊരു നടപടി​യു​മാ​യി കുറെ​യൊ​ക്കെ സാമ്യ​മുണ്ട്‌. ഇസ്രാ​യേ​ല്യ​രു​ടെ ബാബി​ലോ​ണി​യൻ പ്രവാസം കഴിഞ്ഞ്‌ വളരെ കാലത്തി​നു ശേഷം എഴുത​പ്പെട്ട മലാഖി 3:1-5-ലെ പ്രവചനം, ദൈവം വീണ്ടും ഒരു ശുദ്ധീ​കരണ പ്രക്രിയ കൂടെ നടത്തു​മെന്നു വ്യക്തമാ​ക്കി. “നിയമ​ദൂത”നായ യേശു​ക്രി​സ്‌തു​വി​ന്റെ കൂടെ യഹോ​വ​യാം ദൈവം ആത്മീയ ആലയത്തി​ലേക്കു വരുന്ന ഒരു കാല​ത്തേ​ക്കാണ്‌ അതു വിരൽ ചൂണ്ടി​യത്‌. ഒന്നാം ലോക​മ​ഹാ​യു​ദ്ധ​ത്തി​ന്റെ ഒടുവി​ലാണ്‌ അതു സംഭവി​ച്ച​തെന്നു തെളി​വു​കൾ സൂചി​പ്പി​ക്കു​ന്നു. യഹോവ, ക്രിസ്‌ത്യാ​നി​കൾ എന്ന്‌ അവകാ​ശ​പ്പെട്ട എല്ലാവ​രെ​യും പരി​ശോ​ധിച്ച്‌ സത്യ​ക്രി​സ്‌ത്യാ​നി​കളെ വ്യാജ​ക്രി​സ്‌ത്യാ​നി​ക​ളിൽനി​ന്നു വേർതി​രി​ച്ചു. ഫലം എന്തായി​രു​ന്നു?

26-28. (എ) യെശയ്യാ​വു 1:26-ന്റെ പ്രാരംഭ നിവൃത്തി എന്ത്‌? (ബി) നമ്മുടെ കാലത്ത്‌ ഈ പ്രവചനം നിവൃ​ത്തി​യേ​റി​യി​രി​ക്കു​ന്നത്‌ എങ്ങനെ? (സി) ഈ പ്രവചനം ഇന്നത്തെ മൂപ്പന്മാർക്ക്‌ എങ്ങനെ പ്രയോ​ജനം ചെയ്‌തേ​ക്കാം?

²⁶ യഹോവ ഉത്തരം നൽകുന്നു: “ഞാൻ നിന്റെ ന്യായാ​ധി​പ​ന്മാ​രെ ആദിയി​ങ്കൽ എന്നപോ​ലെ​യും നിന്റെ ആലോ​ച​ന​ക്കാ​രെ ആരംഭ​ത്തി​ങ്കൽ എന്നപോ​ലെ​യും ആക്കും; അതി​ന്റെ​ശേഷം നീ നീതി​പു​രം എന്നും വിശ്വ​സ്‌ത​ന​ഗരം എന്നും വിളി​ക്ക​പ്പെ​ടും. സീയോൻ ന്യായ​ത്താ​ലും അതിൽ മനം തിരി​യു​ന്നവർ നീതി​യാ​ലും വീണ്ടെ​ടു​ക്ക​പ്പെ​ടും.” (യെശയ്യാ​വു 1:26, 27) പുരാതന യെരൂ​ശ​ലേ​മിൽ ഈ പ്രവച​ന​ത്തി​ന്റെ പ്രാരംഭ നിവൃത്തി ഉണ്ടായി. പൊ.യു.മു. 537-ൽ ആ പ്രവാ​സി​കൾ തങ്ങളുടെ പ്രിയ നഗരത്തി​ലേക്കു മടങ്ങി. മുൻകാ​ല​ത്തെ​പ്പോ​ലെ വിശ്വ​സ്‌ത​രായ ന്യായാ​ധി​പ​ന്മാ​രും ആലോ​ച​ന​ക്കാ​രും അവരുടെ ഇടയിൽ പിന്നെ​യും ഉണ്ടായി. മടങ്ങി​യെ​ത്തിയ ആ വിശ്വസ്‌ത ശേഷി​പ്പിന്‌ ദൈവ​ത്തി​ന്റെ വഴിക​ളിൽ നടക്കാൻ ആവശ്യ​മായ സഹായ​വും മാർഗ​നിർദേ​ശ​വും നൽകു​ന്ന​തിൽ പ്രവാ​ച​ക​ന്മാ​രായ ഹഗ്ഗായി​യും സെഖര്യാ​വും പുരോ​ഹി​ത​നായ യോശു​വ​യും ശാസ്‌ത്രി​യായ എസ്രാ​യും ഗവർണ​റായ സെരു​ബ്ബാ​ബേ​ലു​മൊ​ക്കെ പങ്കു​ചേർന്നു. എന്നിരു​ന്നാ​ലും, 20-ാം നൂറ്റാ​ണ്ടിൽ അതി​നെ​ക്കാൾ സുപ്ര​ധാ​ന​മായ ഒരു നിവൃത്തി പ്രസ്‌തുത പ്രവച​ന​ത്തിന്‌ ഉണ്ടായി.

²⁷ ഇക്കാലത്തെ യഹോ​വ​യു​ടെ ജനം 1919-ൽ പരി​ശോ​ധ​ന​യു​ടെ ഒരു കാലഘ​ട്ടത്തെ അതിജീ​വിച്ച്‌ പുറത്തു​വന്നു. വ്യാജമത ലോക​സാ​മ്രാ​ജ്യ​മായ മഹാബാ​ബി​ലോ​ണി​ന്റെ ആത്മീയ അടിമ​ത്ത​ത്തിൽനിന്ന്‌ അവർ വിടു​വി​ക്ക​പ്പെട്ടു. ആ വിശ്വസ്‌ത അഭിഷിക്ത ശേഷി​പ്പും ക്രൈ​സ്‌ത​വ​ലോ​ക​ത്തി​ലെ വിശ്വാ​സ​ത്യാ​ഗി​ക​ളായ പുരോ​ഹി​ത​വർഗ​വും തമ്മിലുള്ള  വ്യത്യാ​സം സ്‌പഷ്ട​മാ​യി​ത്തീർന്നു. ദൈവം വീണ്ടും തന്റെ ജനത്തെ അനു​ഗ്ര​ഹി​ച്ചു​കൊണ്ട്‌ അവരു​ടെ​മേൽ ‘ആദ്യ​ത്തെ​പ്പോ​ലെ ന്യായാ​ധി​പ​ന്മാ​രെ​യും ആലോ​ച​ന​ക്കാ​രെ​യും ആക്കി​വെച്ചു.’ ഈ വിശ്വസ്‌ത പുരു​ഷ​ന്മാർ മനുഷ്യ​രു​ടെ പാരമ്പ​ര്യ​ങ്ങൾ അനുസ​രി​ച്ചല്ല, മറിച്ച്‌ ദൈവ​ത്തി​ന്റെ വചന​പ്ര​കാ​ര​മാണ്‌ അവന്റെ ജനത്തെ ബുദ്ധി​യു​പ​ദേ​ശി​ക്കു​ന്നത്‌. ഇന്ന്‌ എണ്ണം കുറഞ്ഞു​വ​രുന്ന “ചെറിയ ആട്ടിൻകൂട്ട”ത്തിന്റെ​യും അവരുടെ സഹകാ​രി​ക​ളായ, ദശലക്ഷ​ങ്ങ​ളാ​യി വർധി​ച്ചു​കൊ​ണ്ടി​രി​ക്കുന്ന “വേറെ ആടുക”ളുടെ​യും ഇടയിൽ ഇത്തരത്തി​ലുള്ള ആയിര​ക്ക​ണ​ക്കി​നു പുരു​ഷ​ന്മാ​രുണ്ട്‌.—ലൂക്കൊസ്‌ 12:32; യോഹ​ന്നാൻ 10:16; യെശയ്യാ​വു 32:1, 2; 60:17; 61:3, 4.

²⁸ സഭയെ ധാർമി​ക​വും ആത്മീയ​വു​മാ​യി ശുദ്ധമാ​യി സൂക്ഷി​ക്കു​ന്ന​തി​നും ദുഷ്‌പ്ര​വൃ​ത്തി​ക്കാ​രെ തിരു​ത്തു​ന്ന​തി​നു​മാ​യി തങ്ങൾ ചില​പ്പോ​ഴൊ​ക്കെ ‘ന്യായാ​ധി​പ​ന്മാ​രാ​യി’ പ്രവർത്തി​ക്കു​ന്നു എന്ന്‌ മൂപ്പന്മാർ തിരി​ച്ച​റി​യു​ന്നു. കരുണ​യും നീതി​യും സംബന്ധിച്ച ദൈവ​ത്തി​ന്റെ സമനി​ല​യുള്ള വീക്ഷണം അനുക​രി​ച്ചു​കൊണ്ട്‌ ദൈവിക വിധത്തിൽ കാര്യങ്ങൾ ചെയ്യു​ന്ന​തിൽ അവർ ആഴമായ താത്‌പ​ര്യ​മെ​ടു​ക്കു​ന്നു. മിക്ക​പ്പോ​ഴും ‘ആലോ​ച​ന​ക്കാ​രാ’യും അവർ സേവി​ക്കു​ന്നു. പ്രഭു​ക്ക​ന്മാ​രോ ഏകാധി​പ​തി​ക​ളോ ആയിരി​ക്കു​ന്ന​തിൽനി​ന്നു വളരെ വ്യത്യ​സ്‌ത​മാണ്‌ ഇത്‌. ‘അജഗണ​ത്തി​ന്റെ​മേൽ ആധിപ​ത്യം’ നടത്തുന്നു എന്നൊരു തോന്നൽ പോലും ഉളവാ​കാത്ത വിധത്തിൽ പ്രവർത്തി​ക്കാൻ അവർ ആത്മാർഥ​മാ​യി ശ്രമി​ക്കു​ന്നു.—1 പത്രൊസ്‌ 5:3, പി.ഒ.സി. ബൈ.

29, 30. (എ) ശുദ്ധീ​കരണ പ്രവർത്ത​ന​ത്തിൽനി​ന്നു പ്രയോ​ജനം നേടാൻ വിസമ്മ​തി​ക്കു​ന്ന​വർക്ക്‌ എന്തു സംഭവി​ക്കു​മെന്ന്‌ യഹോവ പ്രഖ്യാ​പി​ക്കു​ന്നു? (ബി) ഏത്‌ അർഥത്തിൽ ആളുകൾ തങ്ങളുടെ വൃക്ഷങ്ങ​ളെ​യും തോട്ട​ങ്ങ​ളെ​യും കുറിച്ചു ‘നാണി​ക്കു​ന്നു’?

²⁹ യെശയ്യാവിന്റെ പ്രവച​ന​ത്തിൽ പരാമർശി​ച്ചി​രി​ക്കുന്ന “കിട്ട”ത്തിന്റെ കാര്യ​മോ? ദൈവ​ത്തി​ന്റെ ശുദ്ധീ​കരണ പ്രവർത്ത​ന​ത്തിൽനി​ന്നു പ്രയോ​ജനം നേടാൻ വിസമ്മ​തി​ക്കു​ന്ന​വർക്ക്‌ എന്തു സംഭവി​ക്കും? യെശയ്യാവ്‌ തുടരു​ന്നു: “എന്നാൽ അതി​ക്ര​മി​കൾക്കും പാപി​കൾക്കും ഒരു​പോ​ലെ നാശം ഭവിക്കും;  യഹോ​വയെ ഉപേക്ഷി​ക്കു​ന്നവർ മുടി​ഞ്ഞു​പോ​കും. നിങ്ങൾ താല്‌പ​ര്യം വെച്ചി​രുന്ന കരു​വേ​ല​ക​ങ്ങ​ളെ​ക്കു​റി​ച്ചു നാണി​ക്കും; നിങ്ങൾ തിര​ഞ്ഞെ​ടു​ത്തി​രുന്ന തോട്ട​ങ്ങൾനി​മി​ത്തം ലജ്ജിക്കും.” (യെശയ്യാ​വു 1:28, 29) യഹോ​വ​യു​ടെ പ്രവാ​ച​ക​ന്മാർ നൽകിയ മുന്നറി​യി​പ്പിൻ സന്ദേശ​ങ്ങളെ അവഗണി​ച്ചു​കൊണ്ട്‌ അവനെ​തി​രെ അതി​ക്രമം കാട്ടു​ക​യും പാപ​പ്ര​വൃ​ത്തി​ക​ളിൽ ഏർപ്പെ​ടു​ക​യും ചെയ്യു​ന്ന​വർക്ക്‌ പൊ.യു.മു. 607-ൽ തീർച്ച​യാ​യും ‘നാശം ഭവിക്കു​ന്നു,’ അവർ ‘മുടി​ഞ്ഞു​പോ​കു​ന്നു.’ എന്നിരു​ന്നാ​ലും, ഈ വാക്യങ്ങൾ കരു​വേ​ല​ക​ങ്ങ​ളെ​യും തോട്ട​ങ്ങ​ളെ​യും പരാമർശി​ക്കു​ന്നത്‌ എന്തു​കൊ​ണ്ടാണ്‌?

³⁰ ഇസ്രായേൽ ജനത വീണ്ടും വീണ്ടും വിഗ്ര​ഹാ​രാ​ധ​ന​യിൽ ഏർപ്പെ​ടു​ന്നു. വൃക്ഷങ്ങ​ളും ഉദ്യാ​ന​ങ്ങ​ളും തോപ്പു​ക​ളു​മൊ​ക്കെ അവരുടെ ഈ അധമ പ്രവൃ​ത്തി​ക​ളോ​ടു ബന്ധപ്പെ​ട്ടി​രി​ക്കു​ന്നു. ഉദാഹ​ര​ണ​ത്തിന്‌, ബാലി​നെ​യും അവന്റെ പത്‌നി​യായ അസ്‌തോ​രെ​ത്തി​നെ​യും ആരാധി​ക്കു​ന്നവർ, വേനൽക്കാ​ലത്ത്‌ ഈ ദേവനും ദേവി​യും മൃതാ​വ​സ്ഥ​യി​ലാ​ണെ​ന്നും അവരെ കുഴി​ച്ചു​മൂ​ടി​യി​രി​ക്കു​ക​യാ​ണെ​ന്നും വിശ്വ​സി​ക്കു​ന്നു. അവരുടെ വിശ്വാ​സ​പ്ര​കാ​രം ദേശത്ത്‌ സമൃദ്ധി ഉണ്ടാക​ണ​മെ​ങ്കിൽ, അവർ ഉണർന്ന്‌ സംഭോ​ഗ​ത്തി​ലേർപ്പെ​ടണം. അവരെ ഉണർത്താ​നാ​യി, വിഗ്ര​ഹാ​രാ​ധകർ വൃക്ഷ​ത്തോ​പ്പു​ക​ളി​ലെ​യും തോട്ട​ങ്ങ​ളി​ലെ​യും “വിശുദ്ധ” വൃക്ഷങ്ങൾക്കു കീഴിൽ കൂടി​വന്ന്‌ വികട​മായ കാമ​കേ​ളി​ക​ളിൽ മുഴു​കു​ന്നു. ദേശത്തു മഴ കിട്ടു​ക​യും ഫലസമൃ​ദ്ധി ഉണ്ടാകു​ക​യും ചെയ്യു​മ്പോൾ, അതിനുള്ള ബഹുമതി ആ ദേവനും ദേവി​ക്കും ലഭിക്കു​ന്നു; അങ്ങനെ ആ മഴയും ഫലസമൃ​ദ്ധി​യു​മൊ​ക്കെ അവരുടെ അന്ധവി​ശ്വാ​സ​ങ്ങളെ ഒന്നുകൂ​ടി അരക്കി​ട്ടു​റ​പ്പി​ക്കു​ക​യാ​ണു ചെയ്യു​ന്നത്‌. എന്നാൽ മത്സരി​ക​ളായ ആ വിഗ്ര​ഹാ​രാ​ധ​കരെ യഹോവ നശിപ്പി​ക്കു​മ്പോൾ ഒരു വിഗ്ര​ഹ​ദേ​വ​നും അവരുടെ രക്ഷയ്‌ക്കെ​ത്തു​ന്നില്ല. അപ്പോൾ, ആ മത്സരികൾ പ്രസ്‌തുത വൃക്ഷങ്ങ​ളെ​യും തോട്ട​ങ്ങ​ളെ​യും കുറിച്ചു ‘നാണി​ക്കു​ന്നു.’

31. വിഗ്ര​ഹാ​രാ​ധ​കർക്ക്‌ നാണ​ക്കേ​ടി​നെ​ക്കാൾ മോശ​മായ എന്തു സംഭവി​ക്കു​ന്നു?

³¹ വിഗ്രഹാരാധകരായ യഹൂദാ നിവാ​സി​കൾക്ക്‌ നാണ​ക്കേ​ടി​നെ​ക്കാൾ മോശ​മായ ഒന്നു സംഭവി​ക്കാൻ പോകു​ക​യാണ്‌. തന്റെ ദൃഷ്‌ടാ​ന്ത​ത്തിന്‌ അൽപ്പം മാറ്റം വരുത്തി​ക്കൊണ്ട്‌ ആ വിഗ്ര​ഹാ​രാ​ധ​കരെ യഹോവ ഒരു വൃക്ഷ​ത്തോട്‌ ഉപമി​ക്കു​ന്നു. “നിങ്ങൾ ഇല പൊഴിഞ്ഞ കരു​വേ​ല​കം​പോ​ലെ​യും വെള്ളമി​ല്ലാത്ത തോട്ടം​പോ​ലെ​യും ഇരിക്കും.” (യെശയ്യാ​വു 1:30) മധ്യപൂർവ ദേശത്തെ വരണ്ട കാലാ​വ​സ്ഥ​യിൽ ഈ ഉദാഹ​രണം വളരെ അനു​യോ​ജ്യ​മാണ്‌. സ്ഥിരമാ​യി വെള്ളം ലഭിക്കാ​ത്ത​പക്ഷം ഏതൊരു വൃക്ഷവും തോട്ട​വും താമസി​യാ​തെ ഉണങ്ങി​പ്പോ​കും. ഉണങ്ങി​പ്പോയ അത്തരം വൃക്ഷങ്ങൾക്കും തോട്ട​ങ്ങൾക്കും തീ പിടി​ക്കാൻ വളരെ എളുപ്പ​മാണ്‌. അതു​കൊണ്ട്‌, തുടർന്നു​വ​രുന്ന 31-ാം വാക്യ​ത്തി​ലെ ദൃഷ്‌ടാ​ന്തം നന്നായി ഇണങ്ങു​ന്ന​താണ്‌.

32. (എ) 31-ാം വാക്യ​ത്തിൽ പരാമർശി​ച്ചി​രി​ക്കുന്ന “ബലവാൻ” ആരാണ്‌? (ബി) ഏത്‌ അർഥത്തിൽ അവൻ ‘ചണനാര്‌’ ആയിത്തീ​രും, ഏത്‌ “തീപ്പൊ​രി”യിൽ അവൻ വെന്തു​പോ​കും, അതിന്റെ ഫലമെ​ന്താ​യി​രി​ക്കും?

 ³² “ബലവാൻ ചണനാ​രു​പോ​ലെ​യും അവന്റെ പണി തീപ്പൊ​രി​പോ​ലെ​യും ആകും; കെടു​ത്തു​വാൻ ആരുമി​ല്ലാ​തെ രണ്ടും ഒരുമി​ച്ചു വെന്തു​പോ​കും.” (യെശയ്യാ​വു 1:31) ഈ “ബലവാൻ” ആരാണ്‌? പണവും പ്രതാ​പ​വു​മുള്ള ഒരുവ​നെ​യാണ്‌ ഈ വാക്യ​ത്തിൽ ഉപയോ​ഗി​ച്ചി​രി​ക്കുന്ന എബ്രായ പദം സൂചി​പ്പി​ക്കു​ന്നത്‌. സമ്പദ്‌സ​മൃ​ദ്ധി​യുള്ള, അഹങ്കാ​രി​യായ വ്യാജ​ദൈവ ആരാധ​കനെ ആയിരി​ക്കാം അതു​കൊണ്ട്‌ ഉദ്ദേശി​ക്കു​ന്നത്‌. യഹോ​വ​യെ​യും സത്യാ​രാ​ധ​ന​യെ​യും ഉപേക്ഷി​ക്കു​ന്നവർ ഇന്ന്‌ അനവധി​യാണ്‌, യെശയ്യാ​വി​ന്റെ കാലത്തും അങ്ങനെ ആയിരു​ന്നു. അവരിൽ ചിലർ പ്രത്യ​ക്ഷ​ത്തിൽ തങ്ങളുടെ ഉദ്യമ​ങ്ങ​ളിൽ വിജയം കൈവ​രി​ക്കുക പോലും ചെയ്യുന്നു. എന്നാൽ, അത്തരക്കാർ ‘ചണനാര്‌’ പോലെ ആയിത്തീ​രു​മെന്ന്‌ യഹോവ മുന്നറി​യി​പ്പു നൽകുന്നു. പ്രതീ​കാ​ത്മ​ക​മാ​യി പറഞ്ഞാൽ, ദുർബ​ല​മായ, ഉണങ്ങിയ പരുക്കൻ ചണനാ​രു​കൾ അറ്റു​പോ​കാൻ തീ ഒന്നു തൊട്ടാൽ മതി. (ന്യായാ​ധി​പ​ന്മാർ 16:8, 9) വിഗ്ര​ഹാ​രാ​ധ​കന്റെ പണി—അവന്റെ വിഗ്ര​ഹ​ദേ​വ​ന്മാ​രോ സമ്പത്തോ യഹോ​വ​യ്‌ക്കു പകരം അയാൾ ആരാധി​ക്കുന്ന എന്തുത​ന്നെ​യോ ആയി​ക്കൊ​ള്ളട്ടെ അത്‌—“തീപ്പൊ​രി” പോലെ ആയിത്തീ​രും. ഈ തീപ്പൊ​രി​യും ചണവും ഒരു​പോ​ലെ കത്തിയ​മ​രും, ആർക്കും കെടു​ത്താ​നാ​കാത്ത തീയിൽ അത്‌ എരിഞ്ഞ​മർന്ന്‌ ഇല്ലാതാ​കും. യഹോ​വ​യു​ടെ കുറ്റമറ്റ ന്യായ​ത്തീർപ്പു​കളെ തകിടം മറിക്കാൻ പ്രപഞ്ച​ത്തിൽ ഒരു ശക്തിക്കു​മാ​വില്ല.

33. (എ) ദൈവ​ത്തി​ന്റെ ആസന്നമായ ന്യായ​വി​ധി​യെ കുറി​ച്ചുള്ള മുന്നറി​യി​പ്പു​കൾ അവന്റെ കരുണ​യു​ടെ പ്രതി​ഫ​ലനം കൂടി ആയിരി​ക്കു​ന്നത്‌ എങ്ങനെ? (ബി) യഹോവ ഇപ്പോൾ മനുഷ്യ​വർഗ​ത്തിന്‌ എന്ത്‌ അവസരം വെച്ചു​നീ​ട്ടു​ന്നു, അതു നമ്മെ ഓരോ​രു​ത്ത​രെ​യും എങ്ങനെ ബാധി​ക്കു​ന്നു?

³³ 18-ാം വാക്യ​ത്തിൽ കാണുന്ന കരുണ​യു​ടെ​യും ക്ഷമയു​ടെ​യും സന്ദേശ​ത്തോ​ടു നിരക്കു​ന്ന​താ​ണോ ഈ അന്തിമ സന്ദേശം? തീർച്ച​യാ​യും! യഹോവ തന്റെ ദാസന്മാ​രെ ഉപയോ​ഗിച്ച്‌ അത്തരം മുന്നറി​യി​പ്പു​കൾ രേഖ​പ്പെ​ടു​ത്തു​ക​യും അവർ മുഖാ​ന്തരം അവ അറിയി​ക്കു​ക​യും ചെയ്‌തി​രി​ക്കു​ന്നത്‌ അവൻ കാരു​ണ്യ​വാൻ ആയതു​കൊ​ണ്ടാണ്‌. ‘ആരും നശിച്ചു​പോ​കാ​തെ എല്ലാവ​രും മാനസാ​ന്ത​ര​പ്പെ​ടാ​നാണ്‌’ അവൻ ആഗ്രഹി​ക്കു​ന്നത്‌. (2 പത്രൊസ്‌ 3:9) ദൈവ​ത്തി​ന്റെ മുന്നറി​യി​പ്പിൻ സന്ദേശങ്ങൾ പ്രഖ്യാ​പി​ക്കു​ക​യെന്ന പദവി ഇന്നത്തെ ഓരോ സത്യ​ക്രി​സ്‌ത്യാ​നി​ക്കും ഉണ്ട്‌. അങ്ങനെ ചെയ്യു​ക​വഴി, അനുതാ​പം പ്രകട​മാ​ക്കുന്ന ഏവർക്കും യഹോ​വ​യു​ടെ ഉദാര​മായ ക്ഷമയിൽനി​ന്നു പ്രയോ​ജനം നേടാ​നും തത്‌ഫ​ല​മാ​യി നിത്യ​ജീ​വൻ പ്രാപി​ക്കാ​നു​മുള്ള അവസരം ലഭിക്കു​ന്നു. വൈകു​ന്ന​തി​നു മുമ്പ്‌, താനു​മാ​യി ‘രമ്യത​പ്പെ​ടാ​നുള്ള’ അവസരം യഹോവ എല്ലാവർക്കും വെച്ചു​നീ​ട്ടു​ന്നത്‌ അവൻ മനുഷ്യ​രോ​ടു കാണി​ക്കുന്ന എത്ര വലിയ ദയയാണ്‌!

[അടിക്കുറിപ്പുകൾ]

[അധ്യയന ചോദ്യ​ങ്ങൾ]