അധ്യായം ആറ്‌

യഹോ​വ​യാം ദൈവം ഒരു ശേഷി​പ്പി​നോട്‌ കരുണ കാണി​ക്കു​ന്നു

യെശയ്യാവു 4:2-6

1, 2. യഹൂദ​യെ​യും യെരൂ​ശ​ലേ​മി​നെ​യും കുറിച്ച്‌ യെശയ്യാവ്‌ എന്തു മുൻകൂ​ട്ടി പറയുന്നു?

 ആളുകൾ തിങ്ങി​പ്പാർക്കുന്ന ഒരു പ്രദേ​ശത്ത്‌ കൊടു​ങ്കാറ്റ്‌ ആഞ്ഞടി​ക്കു​ന്നു. ഉഗ്രമായ കാറ്റി​ലും കോരി​ച്ചൊ​രി​യുന്ന മഴയി​ലും ശക്തമായ വെള്ളപ്പാ​ച്ച​ലി​ലും വീടു​ക​ളും വിളക​ളും നശിക്കു​ന്നു. ദേശത്തു മറ്റു പല നാശന​ഷ്‌ട​ങ്ങ​ളും ഉണ്ടാകു​ന്നു. പലർക്കും തങ്ങളുടെ ജീവനും നഷ്‌ട​മാ​കു​ന്നു. എന്നാൽ, പെട്ടെന്ന്‌ കൊടു​ങ്കാ​റ്റും പേമാ​രി​യും ശമിക്കു​ന്നു, ദേശ​ത്തെ​ങ്ങും ശാന്തത കളിയാ​ടു​ന്നു. ആ ദുരന്തത്തെ അതിജീ​വി​ച്ച​വർക്ക്‌ അത്‌ പുനഃ​സ്ഥാ​പ​ന​ത്തി​നും പുനർനിർമാ​ണ​ത്തി​നു​മുള്ള സമയമാണ്‌.

² സമാനമായ ഒരു സംഗതി​യാണ്‌ യഹൂദ​യെ​യും യെരൂ​ശ​ലേ​മി​നെ​യും സംബന്ധി​ച്ചു യെശയ്യാ പ്രവാ​ചകൻ മുൻകൂ​ട്ടി പറയു​ന്നത്‌. ദിവ്യ ന്യായ​വി​ധി​യു​ടെ മേഘങ്ങൾ അശുഭ​സൂ​ച​ക​മാ​യി വളരെ വേഗത്തിൽ അടുത്തു​വ​രി​ക​യാണ്‌—അതിനു നല്ല കാരണ​മു​ണ്ടു​താ​നും! ജനതയു​ടെ പാപഭാ​രം വലുതാണ്‌. ഭരണാ​ധി​കാ​രി​ക​ളും ജനങ്ങളും അനീതി​യും രക്തപാ​ത​ക​വും കൊണ്ടു ദേശത്തെ നിറച്ചി​രി​ക്കു​ന്നു. യെശയ്യാവ്‌ മുഖാ​ന്തരം യഹോവ, യഹൂദ​യു​ടെ പാപത്തെ വെളി​പ്പെ​ടു​ത്തു​ക​യും കുറ്റവാ​സ​ന​യുള്ള ആ ജനതയു​ടെ​മേൽ ന്യായ​വി​ധി നടപ്പാ​ക്കു​മെന്നു മുന്നറി​യി​പ്പു നൽകു​ക​യും ചെയ്യുന്നു. (യെശയ്യാ​വു 3:25) ഈ കൊടു​ങ്കാ​റ്റി​നെ​ത്തു​ടർന്ന്‌ യഹൂദാ​ദേശം പൂർണ​മാ​യി ശൂന്യ​മാ​യി​രി​ക്കും. ആ സന്ദേശം യെശയ്യാ​വി​നെ എത്രമാ​ത്രം ദുഃഖി​പ്പി​ച്ചി​രി​ക്കും!

3. യെശയ്യാ​വു 4:2-6-ലെ നിശ്വസ്‌ത സന്ദേശ​ത്തിൽ എന്തു സുവാർത്ത അടങ്ങി​യി​രി​ക്കു​ന്നു?

³ എന്നാൽ ഒരു സുവാർത്ത​യുണ്ട്‌! യഹോ​വ​യു​ടെ നീതി​നിഷ്‌ഠ ന്യായ​വി​ധി​യാ​കുന്ന കൊടു​ങ്കാ​റ്റു കടന്നു​പോ​കു​മ്പോൾ ഒരു ശേഷിപ്പ്‌ അതിജീ​വി​ക്കും. അതേ, യഹൂദ​യു​ടെ​മേൽ യഹോവ ന്യായ​വി​ധി നടപ്പാ​ക്കു​മെ​ങ്കി​ലും അവൻ അവരോ​ടു കരുണ കാണി​ക്കാ​തി​രി​ക്കില്ല.  അനുഗൃ​ഹീ​ത​മായ അത്തര​മൊ​രു കാലത്തി​ലേ​ക്കാണ്‌, യെശയ്യാ​വു 4:2-6-ൽ രേഖ​പ്പെ​ടു​ത്തി​യി​രി​ക്കുന്ന നിശ്വസ്‌ത സന്ദേശം വിരൽ ചൂണ്ടു​ന്നത്‌. സൂര്യൻ മേഘങ്ങ​ളു​ടെ മറവിൽനി​ന്നു പുറത്തു​വ​രു​ന്നതു പോ​ലെ​യാണ്‌ അത്‌; രംഗം ഇപ്പോൾ, യെശയ്യാ​വു 2:6-4:1-ൽ വിവരി​ച്ചി​രി​ക്കുന്ന ന്യായ​വി​ധി​യു​ടെ ദൃശ്യ​ങ്ങ​ളിൽനി​ന്നും ശബ്‌ദ​ങ്ങ​ളിൽനി​ന്നും മാറി, മനോ​ഹ​ര​മായ ഒരു പുതിയ ദേശ​ത്തെ​യും ജനത​യെ​യും കുറി​ച്ചു​ള്ള​താ​യി​ത്തീ​രു​ന്നു.

4. ഒരു ശേഷി​പ്പി​ന്റെ പുനഃ​സ്ഥി​തീ​ക​ര​ണത്തെ കുറി​ച്ചുള്ള യെശയ്യാ​വി​ന്റെ പ്രവച​നത്തെ സംബന്ധിച്ച്‌ നാം ചർച്ച ചെയ്യേ​ണ്ടത്‌ എന്തു​കൊണ്ട്‌?

⁴ ഒരു ശേഷി​പ്പി​ന്റെ പുനഃ​സ്ഥി​തീ​ക​ര​ണ​ത്തെ​യും തുടർന്ന്‌ അവർ അനുഭ​വി​ക്കുന്ന സുരക്ഷി​ത​ത്വ​ത്തെ​യും കുറി​ച്ചുള്ള യെശയ്യാ​വി​ന്റെ പ്രവച​ന​ത്തി​നു നമ്മുടെ ഈ ‘അന്ത്യകാ​ലത്ത്‌’ ഒരു നിവൃ​ത്തി​യുണ്ട്‌. (യെശയ്യാ​വു 2:2-4) അതു​കൊണ്ട്‌, ആ കാലോ​ചിത സന്ദേശത്തെ കുറിച്ചു നമുക്കു ചർച്ച ചെയ്യാം. അതിനു പ്രാവ​ച​നിക പ്രാധാ​ന്യം ഉണ്ടെന്നു മാത്രമല്ല യഹോ​വ​യു​ടെ കരുണയെ കുറിച്ച്‌ അതു നമ്മെ പഠിപ്പി​ക്കു​ക​യും വ്യക്തികൾ എന്നനി​ല​യിൽ അതിൽനിന്ന്‌ നമുക്ക്‌ എങ്ങനെ പ്രയോ​ജനം നേടാ​മെന്നു പറയു​ക​യും ചെയ്യുന്നു.

“യഹോ​വ​യു​ടെ മുള”

5, 6. (എ) ആസന്നമായ കൊടു​ങ്കാ​റ്റി​നെ തുടർന്നുള്ള സമാധാ​ന​പൂർണ​മായ കാലത്തെ കുറിച്ച്‌ യെശയ്യാവ്‌ എങ്ങനെ വിവരി​ക്കു​ന്നു? (ബി) “മുള” എന്ന വാക്കിന്റെ അർഥ​മെന്ത്‌, യഹൂദാ​ദേ​ശത്തെ കുറിച്ച്‌ അത്‌ എന്തു സൂചി​പ്പി​ക്കു​ന്നു?

⁵ ആസന്നമായ കൊടു​ങ്കാ​റ്റി​നെ തുടർന്നു വരാനി​രി​ക്കുന്ന ഏറെ സമാധാ​ന​മുള്ള ഒരു കാലഘ​ട്ടത്തെ കുറിച്ചു പറയവെ, യെശയ്യാ​വി​ന്റെ ശബ്‌ദം ഹൃദ്യ​മാ​യി​ത്തീ​രു​ന്നു. അവൻ ഇങ്ങനെ എഴുതു​ന്നു: “അന്നാളിൽ യഹോ​വ​യു​ടെ മുള ഭംഗി​യും മഹത്വ​വും ഉള്ളതും ഭൂമി​യു​ടെ ഫലം യിസ്രാ​യേ​ലി​ലെ രക്ഷിത​ഗ​ണ​ത്തി​ന്നു മഹിമ​യും അഴകും ഉള്ളതും ആയിരി​ക്കും.”—യെശയ്യാ​വു 4:2.

⁶ പുനഃസ്ഥിതീകരണത്തെ കുറി​ച്ചാണ്‌ യെശയ്യാവ്‌ ഇവിടെ പറയു​ന്നത്‌. “മുള” എന്ന്‌ ഇവിടെ പരിഭാ​ഷ​പ്പെ​ടു​ത്തി​യി​രി​ക്കുന്ന എബ്രായ നാമം ‘മുളച്ചു​വ​രുന്ന ഒന്നിനെ, അങ്കുരത്തെ, അല്ലെങ്കിൽ ശാഖ’യെ സൂചി​പ്പി​ക്കു​ന്നു. യഹോ​വ​യിൽ നിന്നുള്ള സമൃദ്ധി​യോ​ടും വർധന​വി​നോ​ടും അനു​ഗ്ര​ഹ​ത്തോ​ടും അതു ബന്ധപ്പെ​ട്ടി​രി​ക്കു​ന്നു. പ്രത്യാ​ശ​യു​ടെ ഒരു ചിത്ര​മാണ്‌ യെശയ്യാവ്‌ ഇവിടെ നൽകു​ന്നത്‌—ആസന്നമായ ശൂന്യ​മാ​ക്ക​ലി​ന്റെ നാളുകൾ എക്കാല​ത്തേ​ക്കും നീണ്ടു​നിൽക്കു​ക​യില്ല. ഒരിക്കൽ  സമ്പന്നമാ​യി​രുന്ന യഹൂദാ​ദേശം യഹോ​വ​യു​ടെ അനു​ഗ്ര​ഹ​ത്താൽ വീണ്ടും സമൃദ്ധി കൈവ​രി​ക്കും. a—ലേവ്യ​പു​സ്‌തകം 26:3-5.

7. യഹോ​വ​യു​ടെ മുള ഏത്‌ അർഥത്തി​ലാണ്‌ “ഭംഗി​യും മഹത്വ​വും” ഉള്ളത്‌ ആയിരി​ക്കു​ന്നത്‌?

⁷ സംഭവിക്കാൻ പോകുന്ന സമൂല​മാ​റ്റ​ത്തി​ന്റെ മഹത്ത്വം വർണി​ക്കാൻ വളരെ വ്യക്തമായ ചില പദപ്ര​യോ​ഗങ്ങൾ യെശയ്യാവ്‌ ഉപയോ​ഗി​ക്കു​ന്നു. യഹോ​വ​യു​ടെ മുള “ഭംഗി​യും മഹത്വ​വും” ഉള്ളതാ​യി​രി​ക്കും. നൂറ്റാ​ണ്ടു​കൾക്കു മുമ്പ്‌ യഹോവ ഇസ്രാ​യേ​ല്യർക്കു നൽകിയ വാഗ്‌ദത്ത ദേശത്തി​ന്റെ മനോ​ഹാ​രി​തയെ മനസ്സി​ലേക്കു കൊണ്ടു​വ​രുന്ന ഒരു വാക്കാണ്‌ “ഭംഗി.” ‘സർവ​ദേ​ശ​ങ്ങ​ളു​ടെ​യും മഹത്വം’ [“രത്‌നം,” ന്യൂ അമേരി​ക്കൻ ബൈബിൾ] ആയി കരുത​പ്പെ​ട​ത്ത​ക്ക​വണ്ണം അത്‌ അതീവ സുന്ദര​മാ​യി​രു​ന്നു. (യെഹെ​സ്‌കേൽ 20:6) യഹൂദാ​ദേശം അതിന്റെ മുൻകാല മഹത്ത്വ​ത്തി​ലേ​ക്കും മനോ​ഹാ​രി​ത​യി​ലേ​ക്കും  പുനഃ​സ്ഥാ​പി​ക്ക​പ്പെ​ടും എന്ന്‌ യെശയ്യാ​വി​ന്റെ വാക്കുകൾ ഉറപ്പേ​കു​ന്നു. അതു തീർച്ച​യാ​യും ഭൂമി​യിൽ മനോ​ജ്ഞ​മായ ഒരു രത്‌നം​പോ​ലെ ആയിരി​ക്കും.

8. പുനഃ​സ്ഥാ​പിത ദേശത്തി​ന്റെ മനോ​ഹാ​രിത ആസ്വദി​ക്കാൻ ആരാണ്‌ ഉണ്ടായി​രി​ക്കുക, അവരുടെ വികാ​രത്തെ യെശയ്യാവ്‌ വർണി​ക്കു​ന്നത്‌ എങ്ങനെ?

⁸ പുനഃസ്ഥാപിത ദേശത്തി​ന്റെ മനോ​ഹാ​രിത ആസ്വദി​ക്കാൻ ആരാണ്‌ ഉണ്ടായി​രി​ക്കുക? ‘യിസ്രാ​യേ​ലി​ലെ രക്ഷിത​ഗണം’ എന്ന്‌ യെശയ്യാവ്‌ എഴുതു​ന്നു. അതേ, നേരത്തേ മുൻകൂ​ട്ടി പറഞ്ഞ ലജ്ജാവ​ഹ​മായ നാശത്തെ അതിജീ​വി​ക്കുന്ന കുറച്ചു പേർ ഉണ്ടായി​രി​ക്കും. (യെശയ്യാ​വു 3:25, 26) അതിജീ​വ​ക​രു​ടെ ഒരു ശേഷിപ്പ്‌ യഹൂദ​യി​ലേക്കു മടങ്ങി​വന്ന്‌ അതിന്റെ പുനഃ​സ്ഥാ​പ​ന​ത്തിൽ പങ്കു​ചേ​രും. മടങ്ങി​വ​രുന്ന ഇവർക്ക്‌—‘രക്ഷിതഗണ’ത്തിന്‌—പുനഃ​സ്ഥാ​പിത ദേശം നൽകുന്ന സമൃദ്ധ​മായ ഫലം “അഭിമാ​ന​വും മഹത്ത്വ​വും” ആയിരി​ക്കും. (യെശയ്യാ​വു 4:2, ഓശാന ബൈ.) ശൂന്യ​മാ​ക്ക​ലി​ന്റെ അപമാ​ന​ത്തി​നു പകരം അഭിമാ​നം ആയിരി​ക്കും അവർക്ക്‌ ഉണ്ടാകുക.

9. (എ) യെശയ്യാ​വി​ന്റെ വാക്കു​ക​ളു​ടെ നിവൃ​ത്തി​യാ​യി പൊ.യു.മു. 537-ൽ എന്തു സംഭവി​ച്ചു? (ബി) പ്രവാ​സ​കാ​ലത്ത്‌ ജനിച്ച ചില​രെ​യും ‘രക്ഷിതഗണ’ത്തിൽ ഉൾപ്പെ​ടു​ത്താ​വു​ന്നത്‌ എന്തു​കൊണ്ട്‌? (അടിക്കു​റിപ്പ്‌ കാണുക.)

⁹ യെശയ്യാവ്‌ പറഞ്ഞതു​പോ​ലെ​തന്നെ, ന്യായ​വി​ധി​യു​ടെ കൊടു​ങ്കാറ്റ്‌ പൊ.യു.മു. 607-ൽ വീശി​യ​ടി​ച്ചു. ബാബി​ലോ​ണി​യർ യെരൂ​ശ​ലേ​മി​നെ നശിപ്പി​ക്കു​ക​യും നിരവധി ഇസ്രാ​യേ​ല്യ​രെ വധിക്കു​ക​യും ചെയ്‌തു. വധിക്ക​പ്പെ​ടാ​തി​രുന്ന ചിലരെ ബാബി​ലോ​ണി​ലേക്കു പ്രവാ​സി​ക​ളാ​യി കൊണ്ടു​പോ​യി. ദൈവം കരുണ കാണി​ച്ചി​ല്ലാ​യി​രു​ന്നെ​ങ്കിൽ ആരും ജീവ​നോ​ടെ ശേഷി​ക്കു​മാ​യി​രു​ന്നില്ല. (നെഹെ​മ്യാ​വു 9:31) ക്രമേണ, യഹൂദാ​ദേശം പൂർണ​മാ​യും ശൂന്യ​മാ​യി​ത്തീർന്നു. (2 ദിനവൃ​ത്താ​ന്തം 36:17-21) തുടർന്ന്‌, പൊ.യു.മു. 537-ൽ, സത്യാ​രാ​ധന പുനഃ​സ്ഥാ​പി​ക്കാ​നാ​യി യഹൂദ​യി​ലേക്കു മടങ്ങാൻ ‘രക്ഷിത​ഗ​ണത്തെ’ കരുണാ​സ​മ്പ​ന്ന​നായ ദൈവം അനുവ​ദി​ച്ചു. b (എസ്രാ 1:1-4; 2:1) മടങ്ങി​യെ​ത്തുന്ന ആ പ്രവാ​സി​ക​ളു​ടെ ഹൃദയം​ഗ​മ​മായ അനുതാ​പം 137-ാം സങ്കീർത്ത​ന​ത്തിൽ ഭംഗി​യാ​യി വർണി​ച്ചി​രി​ക്കു​ന്നതു കാണാം. സാധ്യ​ത​യ​നു​സ​രിച്ച്‌, അവർ പ്രവാ​സ​ത്തിൽ ആയിരി​ക്കു​മ്പോ​ഴോ അതിനു​ശേഷം അധികം താമസി​യാ​തെ​യോ ആയിരി​ക്കാം ആ സങ്കീർത്തനം എഴുത​പ്പെ​ട്ടത്‌. യഹൂദ​യിൽ എത്തിയ അവർ നിലം ഉഴുത്‌ വിത്തു വിതച്ചു. ദൈവം തങ്ങളുടെ  ശ്രമങ്ങളെ അനു​ഗ്ര​ഹി​ച്ചു​കൊണ്ട്‌ ദേശത്തെ “ഏദെൻതോ​ട്ടം” പോലെ ആക്കുന്നു എന്നു കണ്ടപ്പോൾ അവർക്കു​ണ്ടായ സന്തോഷം ഒന്നു സങ്കൽപ്പി​ക്കുക!—യെഹെ​സ്‌കേൽ 36:34-36.

10, 11. (എ) 20-ാം നൂറ്റാ​ണ്ടി​ന്റെ തുടക്ക​ത്തിൽ ഏത്‌ അർഥത്തി​ലാണ്‌ ബൈബിൾ വിദ്യാർഥി​കൾ ‘മഹാബാ​ബി​ലോ​ണി’ന്റെ അടിമ​ത്ത​ത്തിൽ ആയിരു​ന്നത്‌? (ബി) ആത്മീയ ഇസ്രാ​യേ​ല്യ​രു​ടെ ശേഷി​പ്പി​നെ യഹോവ അനു​ഗ്ര​ഹി​ച്ചി​രി​ക്കു​ന്നത്‌ എങ്ങനെ?

¹⁰ സമാനമായ ഒരു പുനഃ​സ്ഥാ​പനം നമ്മുടെ നാളി​ലും സംഭവി​ച്ചി​രി​ക്കു​ന്നു. 20-ാം നൂറ്റാ​ണ്ടി​ന്റെ ആരംഭ​ത്തിൽ ബൈബിൾ വിദ്യാർഥി​കൾ—യഹോ​വ​യു​ടെ സാക്ഷികൾ അന്ന്‌ അങ്ങനെ​യാണ്‌ അറിയ​പ്പെ​ട്ടി​രു​ന്നത്‌—വ്യാജമത ലോക​സാ​മ്രാ​ജ്യ​മായ ‘മഹാബാ​ബി​ലോ​ണി​ന്റെ’ ആത്മീയ അടിമ​ത്ത​ത്തി​ലാ​യി​രു​ന്നു. (വെളി​പ്പാ​ടു 17:5, NW) വ്യാജമത പഠിപ്പി​ക്ക​ലു​കൾ പലതും തള്ളിക്ക​ള​ഞ്ഞെ​ങ്കി​ലും, ചില ബാബി​ലോ​ണി​യൻ ആശയങ്ങ​ളും ആചാര​ങ്ങ​ളും അവർ അപ്പോ​ഴും വെച്ചു​പു​ലർത്തി​യി​രു​ന്നു. പുരോ​ഹി​ത​വർഗം ഇളക്കി​വിട്ട എതിർപ്പി​ന്റെ ഫലമായി, അവരിൽ ചിലർ അക്ഷരീ​യ​മാ​യി തടവി​ലാ​യി. അവരുടെ ആത്മീയ ദേശം—മതപര​മായ അഥവാ ആത്മീയ​മായ സ്വത്ത്‌—ശൂന്യ​മാ​യി​ത്തീർന്നു.

¹¹ എന്നാൽ, 1919-ലെ വസന്തത്തിൽ ആത്മീയ ഇസ്രാ​യേ​ല്യ​രു​ടെ ശേഷി​പ്പി​നോട്‌ യഹോവ കരുണ കാട്ടി. (ഗലാത്യർ 6:16) അവരുടെ അനുതാ​പ​വും തന്നെ സത്യത്തിൽ ആരാധി​ക്കാ​നുള്ള ആഗ്രഹ​വും അവൻ കണ്ടു. അതു​കൊണ്ട്‌ അവൻ അക്ഷരീയ തടവിൽനിന്ന്‌, അതിലും പ്രധാ​ന​മാ​യി ആത്മീയ തടവിൽനിന്ന്‌, അവരെ വിടു​വി​ച്ചു. ഈ ‘രക്ഷിതഗണ’ത്തിന്‌ അവരുടെ ദൈവദത്ത ആത്മീയ സ്വത്തുക്കൾ അഥവാ ആത്മീയ അവസ്ഥ പുനഃ​സ്ഥാ​പി​ച്ചു കിട്ടി. അതു സമൃദ്ധ​മാ​യി പെരു​കാൻ ദൈവം അനുവ​ദി​ച്ചു. തുടർന്ന്‌ അവരുടെ ആത്മീയ അവസ്ഥ ആകർഷ​ക​മായ ഒരു നില കൈവ​രി​ക്കു​ക​യും ദൈവ​ഭ​യ​മുള്ള ദശലക്ഷ​ക്ക​ണ​ക്കിന്‌ ആളുകൾ സത്യാ​രാ​ധ​ന​യിൽ ശേഷി​പ്പി​നോ​ടു ചേരാൻ ഇടയാ​കു​ക​യും ചെയ്‌തു.

12. യെശയ്യാ​വി​ന്റെ വാക്കുകൾ, യഹോ​വ​യ്‌ക്കു തന്റെ ജനത്തോ​ടുള്ള കരുണയെ എടുത്തു​കാ​ണി​ക്കു​ന്നത്‌ എങ്ങനെ?

¹² യെശയ്യാവിന്റെ വാക്കുകൾ, ദൈവ​ത്തി​നു തന്റെ ജനത്തോ​ടുള്ള കരുണയെ എടുത്തു​കാ​ണി​ക്കു​ന്ന​താണ്‌. ഒരു ജനത എന്ന നിലയിൽ ഇസ്രാ​യേ​ല്യർ യഹോ​വ​യോ​ടു മത്സരി​ച്ചെ​ങ്കി​ലും, അനുതാ​പം പ്രകട​മാ​ക്കിയ ശേഷി​പ്പി​നോട്‌ അവൻ കരുണ കാണിച്ചു. ഗുരു​ത​ര​മായ പാപങ്ങൾ ചെയ്യു​ന്ന​വർക്കു പോലും പ്രത്യാ​ശ​യോ​ടെ യഹോ​വ​യി​ലേക്കു തിരി​യാൻ കഴിയു​മെന്ന അറിവിൽനി​ന്നു നമുക്ക്‌ ആശ്വാസം കണ്ടെത്താ​നാ​കും. തങ്ങൾക്കു യഹോ​വ​യിൽനി​ന്നു കരുണ ലഭിക്കു​ക​യില്ല എന്ന്‌ അനുതാ​പ​മു​ള്ളവർ വിചാ​രി​ക്കേ​ണ്ട​തില്ല. കാരണം, പശ്ചാത്താ​പ​വി​വ​ശ​മായ  ഒരു ഹൃദയത്തെ യഹോവ തള്ളിക്ക​ള​യു​ക​യില്ല. (സങ്കീർത്തനം 51:17) ബൈബിൾ ഇങ്ങനെ പ്രസ്‌താ​വി​ക്കു​ന്നു: “യഹോവ കരുണ​യും കൃപയും നിറഞ്ഞവൻ ആകുന്നു; ദീർഘ​ക്ഷ​മ​യും മഹാദ​യ​യും ഉള്ളവൻ തന്നേ. അപ്പന്നു മക്കളോ​ടു കരുണ തോന്നു​ന്നതു പോലെ യഹോ​വെക്കു തന്റെ ഭക്തന്മാ​രോ​ടു കരുണ തോന്നു​ന്നു.” (സങ്കീർത്തനം 103:8, 13) കാരു​ണ്യ​വാ​നായ അത്തര​മൊ​രു ദൈവം തീർച്ച​യാ​യും നമ്മുടെ മുഴു സ്‌തു​തി​യും അർഹി​ക്കു​ന്നു!

ഒരു ശേഷിപ്പ്‌ യഹോ​വ​യ്‌ക്കു വിശു​ദ്ധ​മാ​യി​ത്തീ​രു​ന്നു

13. യെശയ്യാ​വു 4:4-ൽ രേഖ​പ്പെ​ടു​ത്തി​യി​രി​ക്കുന്ന പ്രകാരം, യഹോവ കരുണ കാണി​ക്കുന്ന ശേഷി​പ്പി​നെ യെശയ്യാവ്‌ എങ്ങനെ വർണി​ക്കു​ന്നു?

¹³ യഹോവ കരുണ കാണി​ക്കുന്ന ശേഷി​പ്പി​നെ കുറിച്ച്‌ നാം ഇതി​നോ​ടകം മനസ്സി​ലാ​ക്കി കഴിഞ്ഞി​രി​ക്കു​ന്നു. എന്നാൽ, യെശയ്യാവ്‌ അവരെ കുറിച്ചു കൂടു​ത​ലായ വിശദാം​ശങ്ങൾ ഇപ്പോൾ നൽകുന്നു. അവൻ ഇപ്രകാ​രം എഴുതു​ന്നു: “സീയോ​നിൽ മിഞ്ചി​യി​രി​ക്കു​ന്ന​വ​നും [ബാക്കി​യു​ള്ള​വ​നും] യെരൂ​ശ​ലേ​മിൽ ശേഷി​ച്ചി​രി​ക്കു​ന്ന​വ​നും, ഇങ്ങനെ യെരൂ​ശ​ലേ​മിൽ ജീവനു​ള്ള​വ​രു​ടെ കൂട്ടത്തിൽ പേർ എഴുതി​യി​രി​ക്കുന്ന ഏവനും തന്നേ, വിശുദ്ധൻ എന്നു വിളി​ക്ക​പ്പെ​ടും.”—യെശയ്യാ​വു 4:4.

14. ‘ബാക്കി​യുള്ള’വരും ‘ശേഷി​ച്ചി​രി​ക്കുന്ന’വരും ആരാണ്‌, യഹോ​വ​യ്‌ക്ക്‌ അവരോ​ടു കരുണ തോന്നു​ന്നത്‌ എന്തു​കൊണ്ട്‌?

¹⁴ ‘ബാക്കി​യുള്ള’വരും ‘ശേഷി​ച്ചി​രി​ക്കുന്ന’വരും ആരാണ്‌? 2-ാം വാക്യ​ത്തിൽ പരാമർശിച്ച രക്ഷിത​ഗണം ആണ്‌ അവർ, അതായത്‌ യഹൂദ​യി​ലേക്കു മടങ്ങാൻ അനുവാ​ദം ലഭിക്കുന്ന യഹൂദാ പ്രവാ​സി​കൾ. യഹോ​വ​യ്‌ക്ക്‌ അവരോ​ടു കരുണ തോന്നു​ന്നത്‌ എന്തു​കൊ​ണ്ടാ​ണെന്ന്‌ യെശയ്യാവ്‌ വിശദീ​ക​രി​ക്കു​ന്നു—അവർ അവന്‌ ‘വിശുദ്ധർ’ ആയിരി​ക്കും. വിശു​ദ്ധിക്ക്‌ “മതപര​മായ ശുദ്ധി അല്ലെങ്കിൽ നിർമലത; പാവന​ത്വം” എന്നൊക്കെ അർഥമുണ്ട്‌. വാക്കി​ലും പ്രവൃ​ത്തി​യി​ലും ശുദ്ധി​യു​ള്ളവൻ അഥവാ നിർമലൻ ആയിരി​ക്കു​ന്നത്‌ വിശു​ദ്ധി​യിൽ ഉൾപ്പെ​ട്ടി​രി​ക്കു​ന്നു. അതിൽ, ശരിയായ, ഉചിത​മായ കാര്യങ്ങൾ സംബന്ധിച്ച്‌ യഹോ​വ​യു​ടെ നിലവാ​ര​ങ്ങ​ളിൽ എത്തി​ച്ചേ​രു​ന്ന​തും ഉൾപ്പെ​ടു​ന്നു. ‘വിശുദ്ധർ’ ആയിരി​ക്കു​ന്ന​വ​രോട്‌ യഹോ​വ​യ്‌ക്കു കരുണ തോന്നും. “വിശു​ദ്ധ​ന​ഗ​ര​മായ” യെരൂ​ശ​ലേ​മി​ലേക്കു മടങ്ങാൻ അവൻ അവരെ അനുവ​ദി​ക്കും.—നെഹെ​മ്യാ​വു 11:1.

15. (എ) ‘യെരൂ​ശ​ലേ​മിൽ ജീവനു​ള്ള​വ​രു​ടെ കൂട്ടത്തിൽ പേർ എഴുതി​യി​രി​ക്കു​ന്നു’ എന്ന പ്രയോ​ഗം ഏത്‌ യഹൂദാ സമ്പ്രദാ​യത്തെ കുറിച്ചു നമ്മെ ഓർമി​പ്പി​ക്കു​ന്നു? (ബി) യെശയ്യാ​വി​ന്റെ വാക്കു​ക​ളിൽ ഗൗരവ​മായ എന്തു മുന്നറി​യിപ്പ്‌ അടങ്ങി​യി​രി​ക്കു​ന്നു?

¹⁵ ഈ വിശ്വസ്‌ത ശേഷിപ്പ്‌ യെരൂ​ശ​ലേ​മിൽ തുടർന്നും ഉണ്ടായി​രി​ക്കു​മോ?  അവരുടെ പേരുകൾ ‘യെരൂ​ശ​ലേ​മിൽ ജീവനു​ള്ള​വ​രു​ടെ കൂട്ടത്തിൽ എഴുതി​യി​രി​ക്കും.’ ഇസ്രാ​യേ​ലി​ലെ കുടും​ബ​ങ്ങ​ളു​ടെ​യും ഗോ​ത്ര​ങ്ങ​ളു​ടെ​യും കൃത്യ​ത​യുള്ള രേഖകൾ സൂക്ഷി​ക്കുന്ന യഹൂദാ സമ്പ്രദാ​യത്തെ കുറിച്ച്‌ ഇതു നമ്മെ ഓർമി​പ്പി​ക്കു​ന്നു. (നെഹെ​മ്യാ​വു 7:5) ഒരാളു​ടെ പേര്‌ രേഖയിൽ ഉണ്ടെങ്കിൽ അയാൾ ജീവി​ച്ചി​രി​ക്കു​ന്നു എന്നർഥം. കാരണം, മരിക്കുന്ന ആളിന്റെ പേര്‌ രേഖയിൽനി​ന്നു നീക്കം ചെയ്‌തി​രു​ന്നു. യഹോ​വ​യിൽ നിന്ന്‌ ജീവന്റെ സമ്മാനം ലഭിക്കു​ന്ന​വ​രു​ടെ പേരുകൾ അടങ്ങുന്ന പ്രതീ​കാ​ത്മക രേഖയെ കുറിച്ച്‌, അഥവാ പുസ്‌ത​കത്തെ കുറിച്ചു ബൈബി​ളി​ന്റെ ചില ഭാഗങ്ങ​ളിൽ നാം വായി​ക്കു​ന്നു. ഈ പുസ്‌ത​ക​ത്തിൽ പേരു​ണ്ടാ​യി​രി​ക്കു​ന്ന​തിന്‌ ചില വ്യവസ്ഥ​കൾക്കു ചേർച്ച​യിൽ ജീവി​ക്കേ​ണ്ട​തുണ്ട്‌. അല്ലാത്ത​പക്ഷം യഹോ​വ​യ്‌ക്ക്‌ അതിൽനി​ന്നു പേരുകൾ ‘മായി​ച്ചു​ക​ള​യാൻ’ സാധി​ക്കും. (പുറപ്പാ​ടു 32:32, 33; സങ്കീർത്തനം 69:28) അപ്പോൾ, യെശയ്യാ​വി​ന്റെ വാക്കു​ക​ളിൽ ഗൗരവ​മായ ഒരു മുന്നറി​യിപ്പ്‌ അടങ്ങി​യി​രി​ക്കു​ന്നതു കാണാം—ദൈവ​ദൃ​ഷ്‌ടി​യിൽ വിശു​ദ്ധ​രാ​യി നില​കൊ​ള്ളു​ന്നെ​ങ്കിൽ മാത്രമേ പ്രവാ​സ​ത്തിൽനി​ന്നു മടങ്ങി​വ​രു​ന്ന​വർക്കു പുനഃ​സ്ഥാ​പിത ദേശത്ത്‌ ജീവി​ച്ചി​രി​ക്കാ​നാ​വൂ.

16. (എ) പൊ.യു.മു. 537-ൽ, യഹൂദ​യി​ലേക്കു മടങ്ങാൻ താൻ അനുവ​ദി​ക്കു​ന്നവർ എങ്ങനെ​യു​ള്ളവർ ആയിരി​ക്ക​ണ​മെന്ന്‌ യഹോവ ആവശ്യ​പ്പെട്ടു? (ബി) അഭിഷി​ക്ത​രോ​ടും “വേറെ ആടുക”ളോടും യഹോവ കാണിച്ച കരുണ വൃഥാ​വാ​യി​രു​ന്നി​ട്ടില്ല എന്നു പറയാൻ കഴിയു​ന്നത്‌ എന്തു​കൊണ്ട്‌?

¹⁶ പൊ.യു.മു. 537-ൽ യഹൂദാ പ്രവാ​സി​ക​ളിൽ ഒരു ശേഷിപ്പ്‌ യെരൂ​ശ​ലേ​മി​ലേക്കു മടങ്ങി​യത്‌ സത്യാ​രാ​ധന പുനഃ​സ്ഥാ​പി​ക്കുക എന്ന ശുദ്ധമായ ആന്തര​ത്തോ​ടെ ആയിരു​ന്നു. യെശയ്യാവ്‌ ശക്തമായി കുറ്റം​വി​ധിച്ച പുറജാ​തീയ മതാചാ​ര​ങ്ങ​ളാ​ലോ അശുദ്ധ​മായ നടത്തയാ​ലോ മലിന​രായ ആർക്കും മടങ്ങു​ന്ന​തി​നുള്ള അവകാ​ശ​മി​ല്ലാ​യി​രു​ന്നു. (യെശയ്യാ​വു 1:15-17) യഹോ​വ​യു​ടെ ദൃഷ്‌ടി​യിൽ വിശു​ദ്ധ​രാ​യ​വർക്കു മാത്രമേ യഹൂദ​യി​ലേക്കു മടങ്ങാൻ സാധി​ക്കു​മാ​യി​രു​ന്നു​ള്ളൂ. (യെശയ്യാ​വു 35:8) സമാന​മാ​യി, 1919-ൽ ആത്മീയ അടിമ​ത്ത​ത്തിൽനി​ന്നു വിടു​വി​ക്ക​പ്പെട്ട അഭിഷിക്ത ശേഷി​പ്പും ഇപ്പോൾ അവരോ​ടു ചേർന്നി​രി​ക്കുന്ന, ഭൗമിക നിത്യ​ജീ​വന്റെ പ്രത്യാ​ശ​യുള്ള ദശലക്ഷ​ക്ക​ണ​ക്കി​നു വരുന്ന “വേറെ ആടുക”ളും ദൈവ​ദൃ​ഷ്‌ടി​യിൽ വിശു​ദ്ധ​രാ​യി​രി​ക്കാൻ എല്ലാ ശ്രമവും നടത്തി​യി​രി​ക്കു​ന്നു. (യോഹ​ന്നാൻ 10:16) ബാബി​ലോ​ണി​യൻ പഠിപ്പി​ക്ക​ലു​ക​ളും ആചാര​ങ്ങ​ളും അവർ ഉപേക്ഷി​ച്ചി​രി​ക്കു​ന്നു. ധാർമി​കത സംബന്ധിച്ച ദൈവ​ത്തി​ന്റെ ഉന്നത നിലവാ​ര​ങ്ങ​ളോ​ടു പറ്റിനിൽക്കാൻ അവർ വ്യക്തി​പ​ര​മാ​യി ശ്രമി​ക്കു​ന്നു. (1 പത്രൊസ്‌ 1:14-16) യഹോവ അവരോ​ടു കാട്ടിയ കരുണ വൃഥാ​വാ​യി​രു​ന്നി​ട്ടില്ല.

17. ആരുടെ പേരു​ക​ളാണ്‌ യഹോവ “ജീവപു​സ്‌ത​ക​ത്തിൽ” എഴുതു​ന്നത്‌, നമുക്ക്‌ എന്തു ദൃഢനി​ശ്ചയം ഉണ്ടായി​രി​ക്കണം?

 ¹⁷ ഇസ്രായേലിലെ വിശു​ദ്ധരെ യഹോവ ശ്രദ്ധി​ക്കു​ക​യും അവരുടെ പേരുകൾ ‘ജീവനു​ള്ള​വ​രു​ടെ കൂട്ടത്തിൽ എഴുതു’കയും ചെയ്‌ത​താ​യി ഓർക്കുക. ഇന്നും, ‘നമ്മുടെ ശരീര​ങ്ങളെ ജീവനും വിശു​ദ്ധി​യും ദൈവ​ത്തി​നു പ്രസാ​ദ​വു​മുള്ള യാഗമാ​യി സമർപ്പി​ക്കവെ,’ മനസ്സും ശരീര​വും ശുദ്ധി​യു​ള്ള​താ​യി കാത്തു​സൂ​ക്ഷി​ക്കാ​നുള്ള നമ്മുടെ ശ്രമങ്ങളെ യഹോവ ശ്രദ്ധി​ക്കു​ന്നു. (റോമർ 12:1) അത്തരം ശുദ്ധമായ ജീവിതം നയിക്കുന്ന എല്ലാവ​രു​ടെ​യും പേരുകൾ ദൈവം “ജീവപു​സ്‌ത​ക​ത്തിൽ” എഴുതു​ക​യും ചെയ്യുന്നു. സ്വർഗ​ത്തിൽ അല്ലെങ്കിൽ ഭൂമി​യിൽ നിത്യ​ജീ​വൻ ലഭിക്കു​ന്ന​വ​രു​ടെ പേരു​ക​ളാണ്‌ ഈ പ്രതീ​കാ​ത്മക രേഖയിൽ അടങ്ങി​യി​രി​ക്കു​ന്നത്‌. (ഫിലി​പ്പി​യർ 4:3; മലാഖി 3:16) അതു​കൊണ്ട്‌, ദൈവ​ദൃ​ഷ്‌ടി​യിൽ വിശു​ദ്ധ​രാ​യി നില​കൊ​ള്ളാൻ നമുക്കു പരമാ​വധി ശ്രമി​ക്കാം. അങ്ങനെ ചെയ്‌തു​കൊണ്ട്‌ ആ “പുസ്‌തക”ത്തിൽ നമ്മുടെ പേരുകൾ നിലനി​റു​ത്താൻ നമുക്കു സാധി​ച്ചേ​ക്കും.—വെളി​പ്പാ​ടു 3:5.

സ്‌നേ​ഹ​പൂർവ​ക​മായ പരിപാ​ല​ന​ത്തി​ന്റെ ഒരു വാഗ്‌ദാ​നം

18, 19. യെശയ്യാ​വു 4:3, 5 പറയു​ന്ന​ത​നു​സ​രിച്ച്‌, യഹോവ നടത്തുന്ന ശുദ്ധീ​ക​രണം എന്ത്‌, അത്‌ നടത്ത​പ്പെ​ടു​ന്നത്‌ എങ്ങനെ?

¹⁸ പുനഃസ്ഥാപിത ദേശത്തെ നിവാ​സി​കൾ എങ്ങനെ വിശുദ്ധർ ആയിത്തീ​രു​മെ​ന്നും അവർക്കു ലഭിക്കാൻ പോകുന്ന അനു​ഗ്ര​ഹങ്ങൾ എന്തെല്ലാം ആയിരി​ക്കു​മെ​ന്നും യെശയ്യാവ്‌ വ്യക്തമാ​ക്കു​ന്നു. അവൻ ഇങ്ങനെ പറയുന്നു: “ന്യായ​വി​ധി​യു​ടെ കാററു​കൊ​ണ്ടും ദഹനത്തി​ന്റെ കാററു​കൊ​ണ്ടും സീയോൻപു​ത്രി​മാ​രു​ടെ മലിനത കഴുകി​ക്ക​ള​ക​യും യെരൂ​ശ​ലേ​മി​ന്റെ രക്തപാ​തകം അതിന്റെ നടുവിൽനി​ന്നു നീക്കി വെടി​പ്പാ​ക്കു​ക​യും ചെയ്‌ത​ശേഷം . . . യഹോവ സീയോൻപർവ്വ​ത​ത്തി​ലെ സകലവാ​സ​സ്ഥ​ല​ത്തി​ന്മേ​ലും അതിലെ സഭാ​യോ​ഗ​ങ്ങ​ളി​ന്മേ​ലും പകലിന്നു ഒരു മേഘവും പുകയും രാത്രി​ക്കു അഗ്നിജ്വാ​ല​യു​ടെ പ്രകാ​ശ​വും സൃഷ്ടി​ക്കും; സകല​തേ​ജ​സ്സി​ന്നും മീതെ ഒരു വിതാനം ഉണ്ടായി​രി​ക്കും.”—യെശയ്യാ​വു 4:3, 5.

¹⁹ പുറമേ ആകർഷ​ക​മായ ആഭരണങ്ങൾ അണിഞ്ഞവർ എങ്കിലും ഉള്ളിൽ ധാർമിക ദുഷിപ്പ്‌ നിറഞ്ഞി​രുന്ന ‘സീയോൻപു​ത്രി​മാ​രെ’ മുമ്പ്‌ യെശയ്യാവ്‌ ശാസി​ക്കു​ക​യു​ണ്ടാ​യി. കൂടാതെ, ജനത്തിനു പൊതു​വെ​യുള്ള രക്തപാ​ത​കത്തെ അവൻ തുറന്നു​കാ​ട്ടു​ക​യും സ്വയം കഴുകി​വെ​ടി​പ്പാ​ക്കാൻ അവരെ പ്രോ​ത്സാ​ഹി​പ്പി​ക്കു​ക​യും ചെയ്‌തു. (യെശയ്യാ​വു 1:15, 16; 3:16-23) എന്നാൽ ഇവിടെ, ദൈവം​തന്നെ അവരുടെ “മലിനത” അഥവാ ധാർമിക അശുദ്ധി “കഴുകി​ക്ക​ള​യു​ക​യും” ‘രക്തക്കറകൾ  തുടച്ചു​മാ​റ്റു​ക​യും’ ചെയ്യുന്ന ഒരു സമയത്തി​നാ​യി അവൻ കാത്തി​രി​ക്കു​ക​യാണ്‌. (യെശയ്യാ​വു 4:4, പി.ഒ.സി. ബൈ.) ഈ ശുദ്ധീ​ക​രണം എങ്ങനെ​യാ​യി​രി​ക്കും നടക്കുക? “ന്യായ​വി​ധി​യു​ടെ കാററു​കൊ​ണ്ടും ദഹനത്തി​ന്റെ കാററു​കൊ​ണ്ടും” ആയിരി​ക്കും. അശുദ്ധ ജനതയു​ടെ മേലുള്ള ദൈവ​ത്തി​ന്റെ ന്യായ​വി​ധി​യു​ടെ​യും ഉഗ്ര​കോ​പ​ത്തി​ന്റെ​യും പ്രകട​നങ്ങൾ ആയിരി​ക്കും യെരൂ​ശ​ലേ​മി​ന്റെ ആസന്ന നാശവും ബാബി​ലോ​ണി​യൻ പ്രവാ​സ​വും. ഈ ദുരന്ത​ങ്ങളെ അതിജീ​വിച്ച്‌ സ്വദേ​ശ​ത്തേക്കു മടങ്ങു​ന്നവർ താഴ്‌മ​യുള്ള, ശുദ്ധീ​ക​രണം പ്രാപിച്ച വ്യക്തികൾ ആയിരി​ക്കും. അതു​കൊ​ണ്ടാണ്‌ അവർ യഹോ​വ​യ്‌ക്കു വിശു​ദ്ധ​രാ​യി​രി​ക്കു​ന്ന​തും അവന്റെ കരുണ പ്രാപി​ക്കു​ന്ന​തും.—മലാഖി 3:2, 3 താരത​മ്യം ചെയ്യുക.

20. (എ) ‘മേഘം,’ ‘പുക’ ‘അഗ്നിജ്വാ​ല’ എന്നീ വാക്കുകൾ എന്തിനെ കുറിച്ച്‌ നമ്മെ അനുസ്‌മ​രി​പ്പി​ക്കു​ന്നു? (ബി) ശുദ്ധീ​ക​രി​ക്ക​പ്പെട്ട പ്രവാ​സി​കൾ ഭയപ്പെ​ടേ​ണ്ട​തി​ല്ലാ​ത്തത്‌ എന്തു​കൊണ്ട്‌?

²⁰ ശുദ്ധീകരിക്കപ്പെട്ട ഈ ശേഷി​പ്പി​നെ താൻ സ്‌നേ​ഹ​പൂർവം പരിപാ​ലി​ക്കു​മെന്ന്‌ യെശയ്യാവ്‌ മുഖാ​ന്തരം യഹോവ വാഗ്‌ദാ​നം ചെയ്യുന്നു. ‘മേഘം,’ ‘പുക’ ‘അഗ്നിജ്വാ​ല’ എന്നീ വാക്കുകൾ, ഈജി​പ്‌തിൽനി​ന്നു പോന്ന ഇസ്രാ​യേ​ല്യർക്കാ​യി യഹോവ എങ്ങനെ കരുതി എന്ന്‌ നമ്മെ അനുസ്‌മ​രി​പ്പി​ക്കു​ന്നു. ഒരു ‘അഗ്നി​മേ​ഘ​സ്‌തം​ഭം,’ പിൻതു​ടർന്നു​വന്ന  ഈജി​പ്‌തു​കാ​രിൽനിന്ന്‌ ഇസ്രാ​യേ​ല്യ​രെ സംരക്ഷി​ക്കു​ക​യും മരുഭൂ​മി​യിൽ അവരെ വഴിന​യി​ക്കു​ക​യും ചെയ്‌തു. (പുറപ്പാ​ടു 13:21, 22; 14:19, 20, 24) യഹോവ സീനായി പർവത​ത്തിൽ ഇറങ്ങി​യ​പ്പോൾ പർവതം “മുഴു​വ​നും പുക​കൊ​ണ്ടു മൂടി.” (പുറപ്പാ​ടു 19:18) അതു​കൊണ്ട്‌, ശുദ്ധീ​ക​രി​ക്ക​പ്പെട്ട പ്രവാ​സി​കൾ ഭയപ്പെ​ടേ​ണ്ട​തില്ല. കാരണം, യഹോവ അവരുടെ സംരക്ഷകൻ ആയിരി​ക്കും. അവർ കൂടി​വ​രു​ന്നത്‌ ഭവനങ്ങ​ളിൽ ആയിരു​ന്നാ​ലും വിശുദ്ധ കൺ​വെൻ​ഷ​നു​ക​ളിൽ ആയിരു​ന്നാ​ലും അവൻ അവരോ​ടു കൂടെ ഉണ്ടായി​രി​ക്കും.

21, 22. (എ) സാധാ​ര​ണ​ഗ​തി​യിൽ ഒരു കൂടാരം അഥവാ മാടം കെട്ടി​യി​രു​ന്നത്‌ എന്തിനു വേണ്ടി​യാണ്‌? (ബി) എന്തു പ്രതീ​ക്ഷ​യാണ്‌ ശുദ്ധീ​ക​രണം പ്രാപിച്ച ശേഷി​പ്പി​ന്റെ മുമ്പാ​കെ​യു​ള്ളത്‌?

²¹ അനുദിന ജീവി​ത​ത്തിൽ ശ്രദ്ധ കേന്ദ്രീ​ക​രി​ച്ചു​കൊണ്ട്‌ ദിവ്യ സംരക്ഷ​ണത്തെ കുറി​ച്ചുള്ള തന്റെ വർണന യെശയ്യാവ്‌ ഇങ്ങനെ ഉപസം​ഹ​രി​ക്കു​ന്നു: “പകൽ, വെയിൽ കൊള്ളാ​തി​രി​പ്പാൻ തണലാ​യും കൊടു​ങ്കാ​റ​റും മഴയും തട്ടാതി​രി​പ്പാൻ സങ്കേത​വും മറവി​ട​വു​മാ​യും ഒരു കൂടാരം ഉണ്ടായി​രി​ക്കും.” (യെശയ്യാ​വു 4:6) ഉഷ്‌ണ​കാ​ലത്തെ കൊടും​ചൂ​ടിൽനി​ന്നും അതു​പോ​ലെ മഴക്കാ​ലത്തെ തണുപ്പിൽനി​ന്നും ശക്തമായ കാറ്റിൽ നിന്നു​മുള്ള സംരക്ഷ​ണ​ത്തി​നാ​യി മുന്തി​രി​ത്തോ​ട്ട​ങ്ങ​ളി​ലും വയലു​ക​ളി​ലും കൂടാരം അഥവാ മാടം കെട്ടി​യി​രു​ന്നു.—യോനാ 4:5 താരത​മ്യം ചെയ്യുക.

²² പീഡനത്തിന്റെ ഉഗ്രമായ ചൂടും എതിർപ്പി​ന്റെ ഉഗ്രമായ കാറ്റു​ക​ളും നേരി​ടു​മ്പോൾ ശുദ്ധീ​ക​രണം പ്രാപിച്ച ശേഷിപ്പ്‌, യഹോവ തങ്ങളുടെ സംരക്ഷ​ണ​ത്തി​ന്റെ​യും സുരക്ഷി​ത​ത്വ​ത്തി​ന്റെ​യും ഉറവി​ട​വും യഥാർഥ സങ്കേത​വു​മാ​ണെന്നു കണ്ടെത്തും. (സങ്കീർത്തനം 91:1, 2; 121:5) സന്തോ​ഷ​ക​ര​മായ ഒരു പ്രതീ​ക്ഷ​യാണ്‌ അവർക്കു മുമ്പാ​കെ​യു​ള്ളത്‌: അശുദ്ധ​മായ ബാബി​ലോ​ണി​യൻ വിശ്വാ​സ​ങ്ങ​ളും ആചാര​ങ്ങ​ളും അവർ ഉപേക്ഷി​ക്കു​ക​യും ശുദ്ധീ​ക​ര​ണാർഥം യഹോവ നടത്തുന്ന ന്യായ​വി​ധി​ക്കു വിധേ​യ​മാ​കു​ക​യും ശുദ്ധി​യു​ള്ള​വ​രാ​യി നില​കൊ​ള്ളാൻ ശ്രമി​ക്കു​ക​യും ചെയ്യു​ന്നെ​ങ്കിൽ, ദിവ്യ സംരക്ഷ​ണ​ത്തി​ന്റെ ആലങ്കാ​രിക “മറവിട”ത്തിൽ അവർ സുരക്ഷി​ത​രാ​യി​രി​ക്കും.

23. യഹോവ അഭിഷിക്ത ശേഷി​പ്പി​നെ​യും അവരുടെ സഹകാ​രി​ക​ളെ​യും അനു​ഗ്ര​ഹി​ച്ചി​രി​ക്കു​ന്നത്‌ എന്തു​കൊണ്ട്‌?

²³ ശുദ്ധീകരണം നടന്ന ശേഷമാണ്‌ അനു​ഗ്ര​ഹങ്ങൾ ലഭിക്കു​ന്നത്‌ എന്നതു ശ്രദ്ധി​ക്കുക. നമ്മുടെ നാളി​ലും അതു സത്യമാ​ണെന്നു തെളി​ഞ്ഞി​രി​ക്കു​ന്നു. 1919-ൽ അഭിഷിക്ത ശേഷിപ്പ്‌ ശുദ്ധീ​ക​ര​ണ​ത്തി​നു വിധേ​യ​മാ​യി, യഹോവ അവരുടെ അശുദ്ധി ‘കഴുകി​ക്ക​ളഞ്ഞു.’ അന്നു മുതൽ, വേറെ ആടുക​ളു​ടെ “മഹാപു​രു​ഷാ​രം” യഹോ​വ​യാൽ ശുദ്ധീ​ക​രി​ക്ക​പ്പെ​ടു​ന്ന​തി​നു തങ്ങളെ​ത്തന്നെ അർപ്പി​ച്ചി​രി​ക്കു​ന്നു.  (വെളി​പ്പാ​ടു 7:9) ഇങ്ങനെ ശുദ്ധീ​ക​രി​ക്ക​പ്പെട്ട ശേഷി​പ്പി​നും അവരുടെ സഹകാ​രി​കൾക്കും അനു​ഗ്രഹം ലഭിച്ചി​രി​ക്കു​ന്നു—യഹോവ അവരെ തന്റെ സംരക്ഷ​ണാ​ത്മക കരുത​ലിൽ ആക്കി​വെ​ച്ചി​രി​ക്കു​ന്നു. അവർ തളർന്നു​പോ​കാ​തി​രി​ക്കാൻ പീഡന​ത്തി​ന്റെ ചൂടി​നെ​യോ എതിർപ്പി​ന്റെ ഉഗ്രമായ കാറ്റു​ക​ളെ​യോ യഹോവ അത്ഭുത​ക​ര​മാ​യി തടയു​ന്നില്ല. എന്നാൽ ‘വെയിൽ കൊള്ളാ​തി​രി​ക്കാ​നുള്ള തണലാ​യും കൊടു​ങ്കാ​റ്റും മഴയും തട്ടാതി​രി​ക്കാ​നുള്ള മറവി​ട​മാ​യും ഒരു കൂടാരം’ പണിതാ​ലെന്ന പോലെ അവൻ അവരെ സംരക്ഷി​ക്കു​ന്നു. എങ്ങനെ?

24. ഒരു സംഘടന എന്ന നിലയിൽ യഹോവ തന്റെ ജനത്തെ അനു​ഗ്ര​ഹി​ച്ചി​രി​ക്കു​ന്നു എന്നതിന്‌ എന്തു തെളി​വുണ്ട്‌?

²⁴ ഇതു പരിചി​ന്തി​ക്കുക: ചരി​ത്ര​ത്തി​ലെ ഏറ്റവും പ്രബല​മായ ചില ഗവൺമെ​ന്റു​കൾ യഹോ​വ​യു​ടെ സാക്ഷി​ക​ളു​ടെ പ്രസം​ഗ​വേല നിരോ​ധി​ക്കു​ക​യോ അവരെ​ത്തന്നെ പാടേ ഇല്ലായ്‌മ ചെയ്യാൻ ശ്രമി​ക്കു​ക​യോ ചെയ്‌തി​ട്ടുണ്ട്‌. എന്നാൽ, സാക്ഷികൾ ഉറച്ച നിലപാ​ടു സ്വീക​രി​ക്കു​ക​യും അവിരാ​മം തങ്ങളുടെ പ്രസം​ഗ​വേ​ല​യിൽ തുടരു​ക​യും ചെയ്‌തി​രി​ക്കു​ന്നു! പ്രത്യ​ക്ഷ​ത്തിൽ നിസ്സഹാ​യ​രാ​യി കാണ​പ്പെ​ടുന്ന ഈ ചെറിയ കൂട്ടത്തി​ന്റെ പ്രവർത്ത​നത്തെ ഇല്ലാതാ​ക്കാൻ ശക്തമായ രാഷ്‌ട്ര​ങ്ങൾക്കു സാധി​ക്കാ​ഞ്ഞത്‌ എന്തു​കൊ​ണ്ടാണ്‌? എന്തു​കൊ​ണ്ടെ​ന്നാൽ, യാതൊ​രു മനുഷ്യ​നും നശിപ്പി​ക്കാൻ കഴിയാത്ത സംരക്ഷ​ണ​ത്തി​ന്റെ ഒരു “കൂടാര”ത്തിൽ യഹോവ തന്റെ ശുദ്ധി​യുള്ള ദാസരെ ആക്കി​വെ​ച്ചി​രി​ക്കു​ന്നു!

25. യഹോവ സംരക്ഷ​ക​നാ​യി ഉള്ളത്‌ വ്യക്തി​പ​ര​മാ​യി നമുക്ക്‌ ഓരോ​രു​ത്തർക്കും എന്ത്‌ അർഥമാ​ക്കു​ന്നു?

²⁵ വ്യക്തിപരമായി നമ്മെ സംബന്ധി​ച്ചെന്ത്‌? യഹോവ നമ്മുടെ സംരക്ഷ​ക​നാ​യി​രി​ക്കു​ന്നതു നിമിത്തം ഈ ലോക​ത്തിൽ നമ്മുടെ ജീവിതം തികച്ചും പ്രശ്‌ന​ര​ഹി​ത​മാ​യി​രി​ക്കും എന്ന്‌ അർഥമില്ല. വിശ്വസ്‌ത ക്രിസ്‌ത്യാ​നി​ക​ളിൽ അനേകർക്കും, ദാരി​ദ്ര്യം, പ്രകൃതി വിപത്തു​കൾ, യുദ്ധം, രോഗം, മരണം എന്നിങ്ങനെ കഠിന​മായ പല പ്രതി​കൂ​ലാ​വ​സ്ഥ​ക​ളെ​യും അഭിമു​ഖീ​ക​രി​ക്കേ​ണ്ട​താ​യി വന്നിട്ടുണ്ട്‌. അത്തരം പ്രശ്‌നങ്ങൾ നേരി​ടു​മ്പോൾ, ദൈവം നമ്മോടു കൂടെ ഉണ്ടെന്ന കാര്യം നമുക്കു മറക്കാ​തി​രി​ക്കാം. അവൻ നമ്മെ ആത്മീയ​മാ​യി സംരക്ഷി​ക്കു​ക​യും കഷ്‌ട​പ്പാ​ടു​കൾ വിശ്വ​സ്‌ത​മാ​യി സഹിച്ചു​നിൽക്കാൻ നമുക്ക്‌ ആവശ്യ​മാ​യത്‌—“അത്യന്ത​ശക്തി” പോലും—നൽകു​ക​യും ചെയ്യുന്നു. (2 കൊരി​ന്ത്യർ 4:7) അവൻ നമ്മോ​ടു​കൂ​ടെ ഉള്ളതി​നാൽ നാം ഭയപ്പെ​ടേ​ണ്ട​തില്ല. ദൈവ​ദൃ​ഷ്‌ടി​യിൽ നിർമ​ല​രാ​യി തുടരു​ന്നി​ട​ത്തോ​ളം കാലം, യാതൊ​ന്നി​നും “ദൈവ​സ്‌നേ​ഹ​ത്തിൽനി​ന്നു നമ്മെ വേറു​പി​രി​പ്പാൻ കഴിക​യില്ല.”—റോമർ 8:38, 39.

[അടിക്കു​റി​പ്പു​കൾ]

[അധ്യയന ചോദ്യ​ങ്ങൾ]

 [63-ാം പേജിലെ ചിത്രം]

ദിവ്യ ന്യായ​വി​ധി​യു​ടെ കൊടു​ങ്കാറ്റ്‌ യഹൂദ​യു​ടെ​മേൽ വരുക​യാണ്‌