അധ്യായം ഇരുപ​ത്തി​യൊന്ന്‌

സത്യാ​രാ​ധന ലോക​മെ​ങ്ങും വ്യാപി​ക്കു​ന്നു

യെശയ്യാവു 60:1-22

1. യെശയ്യാ​വു 60-ാം അധ്യാ​യ​ത്തിൽ പ്രോ​ത്സാ​ഹ​ജ​ന​ക​മായ എന്തു സന്ദേശം അടങ്ങി​യി​രി​ക്കു​ന്നു?

 ഉത്തേജ​നാ​ത്മ​ക​മായ ഒരു നാടകം പോ​ലെ​യാണ്‌ യെശയ്യാവ്‌ 60-ാം അധ്യായം എഴുതി​യി​രി​ക്കു​ന്നത്‌. പ്രാരംഭ വാക്യങ്ങൾ ഹൃദയ​സ്‌പർശി​യായ ഒരു രംഗത്തി​ലേക്കു നമ്മുടെ ശ്രദ്ധ ആകർഷി​ക്കു​ന്നു. തുടർന്ന്‌ സത്വരം നടക്കുന്ന സംഭവ​ങ്ങ​ളു​ടെ ഒരു പരമ്പര​യാണ്‌, അതു നമ്മെ അതിന്റെ പാരമ്യ​ത്തി​ലേക്കു നയിക്കു​ന്നു. പുരാതന യെരൂ​ശ​ലേ​മിൽ സത്യാ​രാ​ധ​ന​യു​ടെ പുനഃ​സ്ഥാ​പ​ന​വും ഇന്ന്‌ അതിന്റെ ലോക​വ്യാ​പക വികസ​ന​വും ഈ അധ്യായം മനോ​ഹ​ര​മായ വാക്കു​ക​ളിൽ വർണി​ക്കു​ന്നു. മാത്രമല്ല, വിശ്വ​സ്‌ത​രായ എല്ലാ ദൈവ​ദാ​സ​ന്മാർക്കു​മാ​യി കരുതി​വെ​ച്ചി​രി​ക്കുന്ന നിത്യാ​നു​ഗ്ര​ഹ​ങ്ങളെ കുറി​ച്ചും അതു പറയുന്നു. യെശയ്യാ പ്രവച​ന​ത്തി​ന്റെ മനോ​ഹ​ര​മായ ഈ ഭാഗത്തി​ന്റെ നിവൃ​ത്തി​യിൽ നമുക്ക്‌ ഓരോ​രു​ത്തർക്കും ഒരു പങ്കു വഹിക്കാൻ കഴിയും. അതിനാൽ നമുക്ക്‌ അതു വിശദ​മാ​യി പരി​ശോ​ധി​ക്കാം.

അന്ധകാ​ര​ത്തിൽ വെളിച്ചം പ്രകാ​ശി​ക്കു​ന്നു

2. അന്ധകാ​ര​ത്തിൽ കിടക്കുന്ന സ്‌ത്രീക്ക്‌ എന്തു കൽപ്പന ലഭിച്ചി​രി​ക്കു​ന്നു, അവൾ അനുസ​രണം പ്രകട​മാ​ക്കു​ന്നത്‌ ഇന്ന്‌ അടിയ​ന്തി​ര​മാ​യി​രി​ക്കു​ന്നത്‌ എന്തു​കൊണ്ട്‌?

² യെശയ്യാവിന്റെ ഈ അധ്യാ​യ​ത്തി​ലെ പ്രാരംഭ വാക്കുകൾ, ദാരു​ണാ​വ​സ്ഥ​യിൽ ആയിരി​ക്കുന്ന ഒരു സ്‌ത്രീ​യെ അഭിസം​ബോ​ധന ചെയ്‌തു​കൊ​ണ്ടു​ള്ള​താണ്‌. അവൾ ഇപ്പോൾ അന്ധകാ​ര​ത്തിൽ നിലത്തു കമിഴ്‌ന്നു കിടക്കു​ക​യാണ്‌. പെട്ടെന്ന്‌, യെശയ്യാവ്‌ മുഖാ​ന്തരം യഹോവ പിൻവ​രുന്ന പ്രകാരം വിളിച്ചു പറയു​മ്പോൾ അന്ധകാ​രത്തെ കീറി​മു​റി​ച്ചു​കൊണ്ട്‌ വെളിച്ചം പ്രകാ​ശി​ക്കു​ന്നു: “[സ്‌ത്രീ​യേ,] എഴു​ന്നേ​ററു പ്രകാ​ശിക്ക; നിന്റെ പ്രകാശം വന്നിരി​ക്കു​ന്നു; യഹോ​വ​യു​ടെ തേജസ്സും [“മഹത്ത്വം,” NW] നിന്റെ​മേൽ ഉദിച്ചി​രി​ക്കു​ന്നു.” (യെശയ്യാ​വു 60:1) അതേ, ആ സ്‌ത്രീ എഴു​ന്നേറ്റ്‌ ദൈവ​ത്തി​ന്റെ മഹത്ത്വത്തെ  പ്രതി​ഫ​ലി​പ്പി​ക്കണം! അത്‌ അടിയ​ന്തി​ര​മാ​യി​രി​ക്കു​ന്നത്‌ എന്തു​കൊണ്ട്‌? പ്രവചനം ഇങ്ങനെ തുടരു​ന്നു: “അന്ധകാരം ഭൂമി​യെ​യും കൂരി​രു​ട്ടു ജാതി​ക​ളെ​യും മൂടുന്നു; നിന്റെ​മേ​ലോ യഹോവ ഉദിക്കും; അവന്റെ തേജസ്സും [“മഹത്ത്വം,” NW] നിന്റെ​മേൽ പ്രത്യ​ക്ഷ​മാ​കും.” (യെശയ്യാ​വു 60:2) അവൾക്കു ചുറ്റും ഇപ്പോ​ഴും ഇരുട്ടിൽ തപ്പിത്ത​ട​യു​ന്ന​വ​രു​ടെ പ്രയോ​ജ​ന​ത്തി​നാ​യി “സ്‌ത്രീ” ‘പ്രകാ​ശി​ക്കണം.’ അതിന്റെ ഫലം എന്തായി​രി​ക്കും? “ജാതികൾ നിന്റെ പ്രകാ​ശ​ത്തി​ലേ​ക്കും രാജാ​ക്ക​ന്മാർ നിന്റെ ഉദയ​ശോ​ഭ​യി​ലേ​ക്കും വരും.” (യെശയ്യാ​വു 60:3) ഈ പ്രാരംഭ വാക്കുകൾ, തുടർന്നുള്ള വാക്യ​ങ്ങ​ളിൽ വിശദ​മാ​യി വിവരി​ച്ചി​രി​ക്കുന്ന കാര്യ​ത്തി​ന്റെ രത്‌ന​ച്ചു​രു​ക്ക​മാണ്‌. സത്യാ​രാ​ധന ലോക​വ്യാ​പ​ക​മാ​യി വികസി​ക്ക​ണ​മെ​ന്ന​താണ്‌ അത്‌!

3. (എ) ആരാണ്‌ ഈ “സ്‌ത്രീ”? (ബി) അവൾ അന്ധകാ​ര​ത്തിൽ കിടന്നി​രു​ന്നത്‌ എന്തു​കൊണ്ട്‌?

³ ഭാവി സംഭവ​ങ്ങളെ കുറി​ച്ചാണ്‌ സംസാ​രി​ക്കു​ന്ന​തെ​ങ്കി​ലും, “പ്രകാശം വന്നിരി​ക്കു​ന്നു” എന്ന്‌ യഹോവ “സ്‌ത്രീ”യോടു പറയുന്നു. പ്രവചനം നിവൃ​ത്തി​യേ​റു​മെ​ന്ന​തി​ന്റെ ഉറപ്പിനെ ഇതു സ്ഥിരീ​ക​രി​ക്കു​ന്നു. ഇവിടെ പരാമർശി​ച്ചി​രി​ക്കുന്ന “സ്‌ത്രീ” സീയോൻ അഥവാ യഹൂദ​യു​ടെ തലസ്ഥാന നഗരമായ യെരൂ​ശ​ലേം ആണ്‌. (യെശയ്യാ​വു 52:1, 2; 60:14) ആ നഗരം മുഴു രാഷ്‌ട്ര​ത്തെ​യും പ്രതി​നി​ധാ​നം ചെയ്യുന്നു. ഈ പ്രവച​ന​ത്തി​ന്റെ ആദ്യ നിവൃ​ത്തി​യു​ടെ സമയത്ത്‌ ഈ “സ്‌ത്രീ” അന്ധകാ​ര​ത്തിൽ കിടക്കു​ക​യാണ്‌. പൊ.യു.മു. 607-ൽ യെരൂ​ശ​ലേം നശിപ്പി​ക്ക​പ്പെ​ട്ടതു മുതൽ അവൾ ആ അവസ്ഥയി​ലാണ്‌. എന്നിരു​ന്നാ​ലും, പൊ.യു.മു. 537-ൽ പ്രവാ​സി​ക​ളായ യഹൂദ​ന്മാ​രു​ടെ ഒരു വിശ്വസ്‌ത ശേഷിപ്പ്‌ യെരൂ​ശ​ലേ​മി​ലേക്ക്‌ മടങ്ങി​വന്ന്‌ നിർമ​ലാ​രാ​ധന പുനഃ​സ്ഥാ​പി​ക്കു​ന്നു. അങ്ങനെ ഒടുവിൽ തന്റെ സ്‌ത്രീ​യു​ടെ​മേൽ വെളിച്ചം പ്രകാ​ശി​ക്കാൻ യഹോവ ഇടയാ​ക്കു​ന്നു. അവന്റെ പുനഃ​സ്ഥി​തീ​ക​രി​ക്ക​പ്പെട്ട ജനം ആത്മീയ അന്ധകാ​ര​ത്തിൽ ആണ്ടുകി​ട​ക്കുന്ന ജനതക​ളു​ടെ ഇടയിൽ പ്രകാ​ശ​ത്തി​ന്റെ ഒരു ഉറവായി വർത്തി​ക്കു​ന്നു.

വലിയ നിവൃത്തി

4. യെശയ്യാ പ്രവച​ന​ത്തി​ലെ “സ്‌ത്രീ”യെ ഇന്നു ഭൂമി​യിൽ പ്രതി​നി​ധാ​നം ചെയ്യു​ന്നത്‌ ആർ, വ്യാപ​ക​മായ അർഥത്തിൽ ആ പ്രാവ​ച​നിക വാക്കുകൾ ആർക്കു ബാധക​മാ​കു​ന്നു?

⁴ യെശയ്യാവിലെ ഈ പ്രാവ​ച​നിക വചനങ്ങൾക്ക്‌ പുരാതന  യെരൂ​ശ​ലേ​മി​ന്റെ മേലുള്ള നിവൃ​ത്തി​യിൽ മാത്രമല്ല നമുക്കു താത്‌പ​ര്യ​മു​ള്ളത്‌. ഇന്ന്‌ യഹോ​വ​യു​ടെ സ്വർഗീയ “സ്‌ത്രീ”യെ ഭൂമി​യിൽ പ്രതി​നി​ധാ​നം ചെയ്യു​ന്നത്‌ ‘ദൈവ​ത്തി​ന്റെ ഇസ്രാ​യേൽ’ ആണ്‌. (ഗലാത്യർ 6:16) പൊ.യു. 33-ലെ പെന്തെ​ക്കൊ​സ്‌ത്‌ മുതൽ ഇന്നോളം നിലനി​ന്നു​പോന്ന ആത്മാഭി​ഷിക്ത അംഗങ്ങൾ അടങ്ങിയ ഈ ആത്മീയ ജനതയു​ടെ മൊത്ത സംഖ്യ 1,44,000 ആണ്‌. ‘ഭൂമി​യിൽനി​ന്നു വിലെക്കു വാങ്ങപ്പെട്ട’ അവർക്കു ക്രിസ്‌തു​വി​നോ​ടൊത്ത്‌ സ്വർഗ​ത്തിൽ ഭരിക്കു​ന്ന​തി​നുള്ള പ്രത്യാ​ശ​യുണ്ട്‌. (വെളി​പ്പാ​ടു 14:1, 3) യെശയ്യാ​വു 60-ാം അധ്യാ​യ​ത്തി​ന്റെ ആധുനിക നിവൃത്തി “അന്ത്യകാ​ലത്തു” ഭൂമി​യിൽ ജീവി​ച്ചി​രി​ക്കുന്ന 1,44,000-ത്തിൽ ശേഷി​ക്കുന്ന അംഗങ്ങളെ കേന്ദ്രീ​ക​രി​ക്കു​ന്നു. (2 തിമൊ​ഥെ​യൊസ്‌ 3:1) ഈ അഭിഷിക്ത ക്രിസ്‌ത്യാ​നി​ക​ളു​ടെ സഹകാ​രി​ക​ളായ “വേറെ ആടുക”ളിൽ പെട്ട “മഹാപു​രു​ഷാര”ത്തിനും ഈ പ്രവചനം ബാധക​മാണ്‌.—വെളി​പ്പാ​ടു 7:9; യോഹ​ന്നാൻ 10:11, 16.

5. ദൈവ​ത്തി​ന്റെ ഇസ്രാ​യേ​ലി​ലെ അതിജീ​വ​ക​രായ അംഗങ്ങൾ അന്ധകാ​ര​ത്തിൽ കിടന്നത്‌ എപ്പോൾ, യഹോ​വ​യു​ടെ പ്രകാശം അവരു​ടെ​മേൽ ചൊരി​യ​പ്പെ​ട്ടത്‌ എപ്പോൾ?

⁵ ഇരുപതാം നൂറ്റാ​ണ്ടി​ന്റെ തുടക്ക​ത്തിൽ, കുറെ കാലം ദൈവ​ത്തി​ന്റെ ഇസ്രാ​യേ​ലിൽ പെട്ടവർ പ്രതീ​കാ​ത്മക അർഥത്തിൽ അന്ധകാ​ര​ത്തിൽ കിടക്കു​ക​യാ​യി​രു​ന്നു. ഒന്നാം ലോക​യു​ദ്ധം അവസാ​നി​ക്കാ​റാ​യ​പ്പോൾ, വെളി​പ്പാ​ടു പുസ്‌ത​ക​ത്തിൽ വിവരി​ച്ചി​രി​ക്കുന്ന ഒരു പ്രതീ​കാ​ത്മക സാഹച​ര്യ​ത്തിൽ ആയിരു​ന്നു അവർ. അതായത്‌, “ആത്മിക​മാ​യി സൊ​ദോം എന്നും മിസ്ര​യീം എന്നും പേരുള്ള മഹാന​ഗ​ര​ത്തി​ന്റെ വീഥി​യിൽ അവരുടെ ശവം” കിടന്നു. (വെളി​പ്പാ​ടു 11:8) എന്നാൽ, 1919-ൽ യഹോവ അവരു​ടെ​മേൽ പ്രകാശം ചൊരി​ഞ്ഞു. അപ്പോൾ അവർ എഴു​ന്നേ​റ്റു​നിന്ന്‌ ദൈവ​ത്തി​ന്റെ മഹത്ത്വത്തെ പ്രതി​ഫ​ലി​പ്പി​ക്കു​ക​യും ദൈവ​രാ​ജ്യ സുവാർത്ത നിർഭയം ഘോഷി​ക്കു​ക​യും ചെയ്‌തു.—മത്തായി 5:14-16; 24:14.

6. യേശു​വി​ന്റെ രാജകീയ സാന്നി​ധ്യ​ത്തെ കുറി​ച്ചുള്ള പ്രഖ്യാ​പ​ന​ത്തോ​ടു ലോകം പൊതു​വെ എങ്ങനെ പ്രതി​ക​രി​ച്ചി​രി​ക്കു​ന്നു, യഹോ​വ​യു​ടെ പ്രകാ​ശ​ത്തി​ലേക്ക്‌ ആർ ആകർഷി​ക്ക​പ്പെ​ട്ടി​രി​ക്കു​ന്നു?

⁶ “ഈ അന്ധകാ​ര​ത്തി​ന്റെ ലോകാ​ധി​പ​തിക”ളുടെ തലവനായ സാത്താന്റെ സ്വാധീ​ന​വ​ല​യ​ത്തിൽപ്പെട്ട മനുഷ്യ​വർഗം പൊതു​വെ, “ലോക​ത്തി​ന്റെ വെളിച്ച”മായ യേശു​ക്രി​സ്‌തു​വി​ന്റെ രാജകീയ സാന്നി​ധ്യ​ത്തെ കുറി​ച്ചുള്ള അറിയിപ്പ്‌ തള്ളിക്ക​ളഞ്ഞു. (എഫെസ്യർ 6:12; യോഹ​ന്നാൻ 8:12; 2 കൊരി​ന്ത്യർ 4:3, 4) ‘രാജാ​ക്ക​ന്മാ​രും’ (സ്വർഗീയ രാജ്യ​ത്തി​ന്റെ അഭിഷിക്ത അവകാ​ശി​കൾ ആയിത്തീ​രു​ന്നവർ)  ‘ജാതി​ക​ളും’ (വേറെ ആടുക​ളു​ടെ മഹാപു​രു​ഷാ​രം) ഉൾപ്പെടെ ദശലക്ഷ​ക്ക​ണ​ക്കിന്‌ ആളുകൾ യഹോ​വ​യു​ടെ പ്രകാ​ശ​ത്തി​ലേക്ക്‌ ആകർഷി​ക്ക​പ്പെ​ട്ടി​രി​ക്കു​ന്നു.

വികസനം വലിയ സന്തോ​ഷ​ത്തി​നു കാരണ​മാ​കു​ന്നു

7. ഹൃദ്യ​മായ എന്തു കാഴ്‌ച​യാണ്‌ “സ്‌ത്രീ”യുടെ കണ്ണുകളെ വരവേ​റ്റത്‌?

⁷ യെശയ്യാവു 60:3-ൽ നൽകി​യി​രി​ക്കുന്ന മുഖ്യ വിഷയത്തെ വികസി​പ്പി​ക്കവേ, യഹോവ ആ “സ്‌ത്രീ”ക്കു മറ്റൊരു കൽപ്പന കൊടു​ക്കു​ന്നു: “നീ തല പൊക്കി ചുററും നോക്കുക.” ആ “സ്‌ത്രീ” അങ്ങനെ ചെയ്യു​മ്പോൾ ഹൃദ്യ​മായ കാഴ്‌ച​യാണ്‌ അവളുടെ കണ്ണുകളെ വരവേൽക്കു​ന്നത്‌—അതാ, അവളുടെ മക്കൾ വീട്ടി​ലേക്കു വരുന്നു! “അവർ എല്ലാവ​രും ഒന്നിച്ചു​കൂ​ടി നിന്റെ അടുക്കൽ വരുന്നു; നിന്റെ പുത്ര​ന്മാർ ദൂരത്തു​നി​ന്നു വരും; നിന്റെ പുത്രി​മാ​രെ പാർശ്വ​ത്തി​ങ്കൽ വഹിച്ചു​കൊ​ണ്ടു വരും.” (യെശയ്യാ​വു 60:4) 1919-ൽ തുടങ്ങിയ അന്താരാ​ഷ്‌ട്ര രാജ്യ​പ്ര​സംഗ വേലയു​ടെ ഫലമായി ആയിര​ക്ക​ണ​ക്കിന്‌ അഭിഷിക്ത ‘പുത്ര​ന്മാ​രും’ ‘പുത്രി​മാ​രും’ കൂടെ ദൈവ​ത്തി​ന്റെ ഇസ്രാ​യേ​ലി​നോ​ടു ചേരു​ക​യു​ണ്ടാ​യി. അങ്ങനെ, ക്രിസ്‌തു​വി​നോ​ടൊ​പ്പം ഭരിക്കാൻ പോകുന്ന മുൻകൂ​ട്ടി പറയപ്പെട്ട 1,44,000 പേരുടെ സംഖ്യ പൂർണ​മാ​ക്കാൻ യഹോവ നടപടി സ്വീക​രി​ച്ചു.—വെളി​പ്പാ​ടു 5:9, 10.

8. ദൈവ​ത്തി​ന്റെ ഇസ്രാ​യേ​ലിന്‌ 1919 മുതൽ സന്തോ​ഷി​ക്കാൻ എന്തു കാരണം ഉണ്ടായി​രി​ക്കു​ന്നു?

⁸ ഈ വർധന സന്തോ​ഷ​ത്തി​നു കാരണ​മാ​യി. “അപ്പോൾ നീ കണ്ടു ശോഭി​ക്കും; നിന്റെ ഹൃദയം പിടെച്ചു വികസി​ക്കും; സമു​ദ്ര​ത്തി​ന്റെ ധനം നിന്റെ അടുക്കൽ ചേരും; ജാതി​ക​ളു​ടെ സമ്പത്തു നിന്റെ അടുക്കൽ വരും.” (യെശയ്യാ​വു 60:5) 1920-കളിലും 1930-കളിലും നടന്ന അഭിഷി​ക്ത​രു​ടെ കൂട്ടി​ച്ചേർപ്പ്‌ ദൈവ​ത്തി​ന്റെ ഇസ്രാ​യേ​ലി​നു വലിയ സന്തോഷം കൈവ​രു​ത്തി. അവർക്കു സന്തോ​ഷി​ക്കു​ന്ന​തി​നു കൂടു​ത​ലായ ഒരു കാരണ​വും ഉണ്ടായി​രു​ന്നു. പ്രത്യേ​കി​ച്ചും 1930-കളുടെ മധ്യം മുതൽ, ദൈവ​ത്തിൽനിന്ന്‌ അകന്നു​പോയ മനുഷ്യ​വർഗ​മാ​കുന്ന ‘കടലി’ന്റെ ഭാഗമാ​യി​രുന്ന ആളുകൾ ദൈവ​ത്തി​ന്റെ ഇസ്രാ​യേ​ലി​നോ​ടൊ​പ്പം ആരാധി​ക്കാൻ സകല ജനതക​ളിൽനി​ന്നു​മാ​യി കൂടി​വ​ന്നി​രി​ക്കു​ന്നു. (യെശയ്യാ​വു 57:20; ഹഗ്ഗായി 2:7) തങ്ങൾക്കു തോന്നിയ വിധത്തി​ലല്ല അവർ ദൈവത്തെ സേവി​ക്കു​ന്നത്‌. പകരം, അവർ ദൈവ​ത്തി​ന്റെ “സ്‌ത്രീ”യുടെ അടുക്ക​ലേക്കു വന്ന്‌ ദൈവ​ത്തി​ന്റെ ഏകീകൃത ആട്ടിൻകൂ​ട്ട​ത്തി​ന്റെ ഭാഗമാ​യി​ത്തീ​രു​ന്നു.  അതിന്റെ ഫലമായി, ദൈവ​ത്തി​ന്റെ എല്ലാ ദാസന്മാ​രും സത്യാ​രാ​ധ​ന​യു​ടെ വികസ​ന​ത്തിൽ പങ്കു​ചേ​രു​ന്നു.

ജാതികൾ യെരൂ​ശ​ലേ​മിൽ കൂടി​വ​രു​ന്നു

9, 10. യെരൂ​ശ​ലേ​മിൽ ആർ കൂടി​വ​രു​ന്ന​താ​യി കാണാം, യഹോവ അവരെ എങ്ങനെ കൈ​ക്കൊ​ള്ളു​ന്നു?

⁹ യെശയ്യാവിന്റെ സമകാ​ലി​കർക്കു പരിചി​ത​മായ ദൃഷ്ടാ​ന്തങ്ങൾ ഉപയോ​ഗി​ച്ചു​കൊണ്ട്‌ യഹോവ വികസ​നത്തെ വർണി​ക്കു​ന്നു. സീയോൻ പർവത​ത്തി​നു മുകളിൽനിന്ന്‌ “സ്‌ത്രീ” ആദ്യം കിഴക്കേ ചക്രവാ​ള​ത്തി​ലേക്കു നോക്കു​ന്നു. അവൾ അവിടെ എന്താണു കാണു​ന്നത്‌? “ഒട്ടകങ്ങ​ളു​ടെ കൂട്ടവും മിദ്യാ​നി​ലെ​യും ഏഫയി​ലെ​യും ചിറെ​റാ​ട്ട​ക​ങ്ങ​ളും നിന്നെ മൂടും; ശേബയിൽനി​ന്നു അവരൊ​ക്കെ​യും വരും; പൊന്നും കുന്തു​രു​ക്ക​വും അവർ കൊണ്ടു​വന്നു യഹോ​വ​യു​ടെ സ്‌തു​തി​യെ ഘോഷി​ക്കും.” (യെശയ്യാ​വു 60:6) നാനാ ഗോ​ത്ര​ങ്ങ​ളിൽ പെട്ട സഞ്ചാരി​ക​ളായ വ്യാപാ​രി​ക​ളു​ടെ ഒട്ടകക്കൂ​ട്ടങ്ങൾ യെരൂ​ശ​ലേ​മി​ലേ​ക്കുള്ള വഴിയി​ലൂ​ടെ പോകു​ന്നു. (ഉല്‌പത്തി 37:25, 28; ന്യായാ​ധി​പ​ന്മാർ 6:1, 5; 1 രാജാ​ക്ക​ന്മാർ 10:1, 2) ദേശത്തെ മൂടുന്ന പ്രളയം പോലെ എവി​ടെ​യും ഒട്ടകങ്ങ​ളാണ്‌! വ്യാപാ​രി​കൾ വില​യേ​റിയ സമ്മാനങ്ങൾ കൊണ്ടു​വ​രു​ന്നു, അവർക്ക്‌ സമാധാ​ന​പ​ര​മായ ഉദ്ദേശ്യ​ങ്ങ​ളാണ്‌ ഉള്ളതെന്ന്‌ അതു സൂചി​പ്പി​ക്കു​ന്നു. യഹോ​വയെ ആരാധി​ക്കാ​നും അവനു തങ്ങളുടെ ഏറ്റവും മികച്ചതു നൽകാ​നും അവർ ആഗ്രഹി​ക്കു​ന്നു.

¹⁰ ഈ വ്യാപാ​രി​കൾ മാത്രമല്ല യെരൂ​ശ​ലേ​മി​ലേക്കു പോകു​ന്നത്‌. “കേദാ​രി​ലെ ആടുകൾ ഒക്കെയും നിന്റെ അടുക്കൽ ഒന്നിച്ചു​കൂ​ടും; നെബാ​യോ​ത്തി​ലെ മുട്ടാ​ടു​കൾ നിനക്കു ശുശ്രൂ​ഷ​ചെ​യ്യും.” ആടുകളെ മേയ്‌ക്കുന്ന ഗോ​ത്ര​ങ്ങ​ളും യെരൂ​ശ​ലേ​മി​ലേക്കു യാത്ര ചെയ്യു​ക​യാണ്‌. തങ്ങളുടെ ഏറ്റവും വില​യേ​റിയ വസ്‌തു​ക്ക​ളു​മാ​യി—ആട്ടിൻകൂ​ട്ട​ങ്ങ​ളു​മാ​യി—എത്തുന്ന അവർ തങ്ങളെ​ത്തന്നെ ശുശ്രൂ​ഷ​ക​രാ​യി സമർപ്പി​ക്കു​ന്നു. യഹോവ അവരെ എങ്ങനെ കൈ​ക്കൊ​ള്ളും? അവൻ പറയുന്നു: “അവ പ്രസാ​ദ​മുള്ള യാഗമാ​യി എന്റെ പീഠത്തി​ന്മേൽ വരും; അങ്ങനെ ഞാൻ എന്റെ മഹത്വ​മുള്ള ആലയത്തെ മഹത്വ​പ്പെ​ടു​ത്തും.” (യെശയ്യാ​വു 60:7) യഹോവ അവരുടെ സമ്മാനങ്ങൾ സ്വീക​രിച്ച്‌ നിർമ​ലാ​രാ​ധ​ന​യിൽ ഉപയോ​ഗി​ക്കും.—യെശയ്യാ​വു 56:7; യിരെ​മ്യാ​വു 49:28, 29.

11, 12. (എ) പടിഞ്ഞാ​റേക്കു നോക്കു​മ്പോൾ സ്‌ത്രീ എന്താണു കാണു​ന്നത്‌? (ബി) അനേകർ യെരൂ​ശ​ലേ​മി​ലേക്ക്‌ ധൃതി​പ്പെട്ടു വരുന്നത്‌ എന്തിന്‌

 ¹¹ ഇപ്പോൾ പടിഞ്ഞാ​റൻ ചക്രവാ​ള​ത്തി​ലേക്കു നോക്കാൻ “സ്‌ത്രീ”യോടു നിർദേ​ശി​ച്ച​ശേഷം യഹോവ ഇങ്ങനെ ചോദി​ക്കു​ന്നു: “മേഘം​പോ​ലെ​യും തങ്ങളുടെ കിളി​വാ​തി​ലു​ക​ളി​ലേക്കു പ്രാവു​ക​ളെ​പ്പോ​ലെ​യും പറന്നു​വ​രുന്ന ഇവർ ആർ?” യഹോ​വ​തന്നെ അതിന്‌ ഉത്തരം പറയുന്നു: “ദൂരത്തു​നി​ന്നു നിന്റെ മക്കളെ അവരുടെ പൊന്നും വെള്ളി​യു​മാ​യി നിന്റെ ദൈവ​മായ യഹോ​വ​യു​ടെ നാമത്തി​ന്നും അവൻ നിന്നെ മഹത്വ​പ്പെ​ടു​ത്തി​യി​രി​ക്ക​കൊ​ണ്ടു യിസ്രാ​യേ​ലി​ന്റെ പരിശു​ദ്ധ​ന്നും കൊണ്ടു​വ​രേ​ണ്ട​തി​ന്നു ദ്വീപു​വാ​സി​ക​ളും തർശീ​ശ്‌ക​പ്പ​ലു​കൾ ആദ്യമാ​യും എനിക്കാ​യി കാത്തി​രി​ക്കു​ന്നു.”—യെശയ്യാ​വു 60:8, 9.

¹² മഹാസമുദ്രത്തിനു കുറുകെ പടിഞ്ഞാ​റോട്ട്‌ നോക്കി​ക്കൊണ്ട്‌ നിങ്ങൾ “സ്‌ത്രീ”യോടു കൂടെ നിൽക്കു​ന്ന​താ​യി സങ്കൽപ്പി​ക്കുക. എന്താണു കാണു​ന്നത്‌? അങ്ങ്‌ ദൂരെ ഒരു കൂട്ടം വെള്ള​പ്പൊ​ട്ടു​ക​ളു​ടെ ഒരു മേഘം ജലോ​പ​രി​ത​ല​ത്തി​നു മുകളി​ലൂ​ടെ തെന്നി​നീ​ങ്ങി വരുന്ന​താ​യി കാണാം. അവ പക്ഷികളെ പോലെ തോന്നി​ക്കു​ന്നു. എന്നാൽ കൂടുതൽ അടുത്തു​വ​രു​മ്പോൾ, അവ പായ്‌ക്ക​പ്പ​ലു​കൾ ആണെന്നു കാണാ​നാ​കും. അവ ‘ദൂരത്തു​നി​ന്നാണ്‌’ വന്നിരി​ക്കു​ന്നത്‌. a (യെശയ്യാ​വു 49:12) സീയോ​നു നേരെ അനവധി കപ്പലുകൾ പാഞ്ഞു​വ​രു​ന്ന​തി​നാൽ, അവ കൂടു​ക​ളി​ലേക്കു പറക്കുന്ന പ്രാവു​കൾ പോലെ തോന്നി​ക്കു​ന്നു. ഈ കപ്പലുകൾ ഇത്ര ധൃതി​യിൽ വരുന്നത്‌ എന്തിനാണ്‌? വിദൂര തുറമു​ഖ​ങ്ങ​ളിൽ നിന്നുള്ള യഹോ​വ​യു​ടെ ആരാധ​കരെ എത്തിക്കാ​നുള്ള തിടു​ക്ക​ത്തി​ലാണ്‌ അവ. ആ പുതി​യ​വ​രെ​ല്ലാ​വ​രും—കിഴക്കു​നിന്ന്‌ അല്ലെങ്കിൽ പടിഞ്ഞാ​റു​നിന്ന്‌ ഉള്ളവരും സമീപ ദേശങ്ങ​ളിൽ അല്ലെങ്കിൽ വിദൂര ദേശങ്ങ​ളിൽ ഉള്ളവരും—തങ്ങളുടെ സർവസ്വ​വും തങ്ങളുടെ ദൈവ​മായ യഹോ​വ​യു​ടെ നാമത്തി​നാ​യി അർപ്പി​ക്കാൻ യെരൂ​ശ​ലേ​മി​ലേക്കു ധൃതി​പ്പെട്ടു വരുക​യാണ്‌.—യെശയ്യാ​വു 55:5.

13. ആധുനിക കാലങ്ങ​ളിൽ ‘പുത്ര​ന്മാ​രും’ ‘പുത്രി​മാ​രും’ ആർ, ‘ജാതി​ക​ളു​ടെ സമ്പത്ത്‌’ ആർ?

¹³ ഈ ലോക​ത്തി​ലെ അന്ധകാ​ര​ത്തിൽ യഹോ​വ​യു​ടെ “സ്‌ത്രീ”  പ്രകാശം ചൊരി​യാൻ തുടങ്ങി​യ​തിൽപ്പി​ന്നെ ഉണ്ടായി​രി​ക്കുന്ന ലോക​വ്യാ​പക വികസ​ന​ത്തി​ന്റെ എത്ര വ്യക്തമായ ചിത്ര​മാണ്‌ യെശയ്യാ​വു 60:4-9 വരച്ചു​കാ​ട്ടു​ന്നത്‌! ആദ്യം സ്വർഗീയ സീയോ​നി​ലെ ‘പുത്ര​ന്മാ​രും’ ‘പുത്രി​മാ​രും,’ അതായത്‌ അഭിഷിക്ത ക്രിസ്‌ത്യാ​നി​കൾ ആയിത്തീർന്നവർ, വന്നു. അവർ 1931-ൽ പരസ്യ​മാ​യി തങ്ങളെ​ത്തന്നെ യഹോ​വ​യു​ടെ സാക്ഷി​ക​ളാ​യി തിരി​ച്ച​റി​യി​ച്ചു. തുടർന്ന്‌ സൗമ്യ​രു​ടെ ഒരു വലിയ കൂട്ടം, ‘ജാതി​ക​ളു​ടെ സമ്പത്തും’ ‘സമു​ദ്ര​ത്തി​ന്റെ ധനവും,’ ക്രിസ്‌തു​വി​ന്റെ സഹോ​ദ​ര​ന്മാ​രു​ടെ ശേഷി​പ്പി​നോ​ടു ചേരാൻ ധൃതി​പ്പെ​ട്ടു​വന്നു. b ഭൂമി​യു​ടെ നാലു കോണു​ക​ളിൽനി​ന്നും എല്ലാ ജീവിത തുറക​ളിൽനി​ന്നും വരുന്ന യഹോ​വ​യു​ടെ ഈ ദാസന്മാ​രെ​ല്ലാം തങ്ങളുടെ അഖിലാണ്ഡ കർത്താ​വായ യഹോ​വയെ സ്‌തു​തി​ക്കു​ന്ന​തി​ലും മുഴു അഖിലാ​ണ്ഡ​ത്തി​ലും അവന്റെ അതിമ​ഹ​ത്തായ നാമം വാഴ്‌ത്തു​ന്ന​തി​ലും ദൈവ​ത്തി​ന്റെ ഇസ്രാ​യേ​ലി​നോ​ടു ചേരുന്നു.

14. നവാഗതർ ‘[ദൈവ​ത്തി​ന്റെ യാഗ]പീഠത്തി​ന്മേൽ വരുന്നത്‌’ എങ്ങനെ?

¹⁴ എന്നാൽ, ജനതക​ളിൽ നിന്നുള്ള ഈ നവാഗതർ “[ദൈവ​ത്തി​ന്റെ യാഗ]പീഠത്തി​ന്മേൽ വരു”മെന്നതി​ന്റെ അർഥം എന്താണ്‌? യാഗപീ​ഠ​ത്തി​ന്മേൽ ഒരു യാഗം വെച്ചി​രി​ക്കു​ന്നു എന്ന്‌. പൗലൊസ്‌ അപ്പൊ​സ്‌തലൻ പിൻവ​രുന്ന പ്രകാരം എഴുതി​യ​പ്പോൾ യാഗം ഉൾപ്പെ​ടുന്ന ഒരു പദപ്ര​യോ​ഗം അവൻ ഉപയോ​ഗി​ച്ചു: “ഞാൻ . . . നിങ്ങളെ പ്രബോ​ധി​പ്പി​ക്കു​ന്നതു: നിങ്ങൾ ബുദ്ധി​യുള്ള ആരാധ​ന​യാ​യി നിങ്ങളു​ടെ ശരീര​ങ്ങളെ ജീവനും വിശു​ദ്ധി​യും ദൈവ​ത്തി​ന്നു പ്രസാ​ദ​വു​മുള്ള യാഗമാ​യി സമർപ്പി​പ്പിൻ.” (റോമർ 12:1) യഥാർഥ ക്രിസ്‌ത്യാ​നി​കൾ കഠിന​ശ്രമം ചെയ്യാൻ സന്നദ്ധരാണ്‌. (ലൂക്കൊസ്‌ 9:23, 24) അവർ തങ്ങളുടെ സമയവും ഊർജ​വും കഴിവു​ക​ളും സത്യാ​രാ​ധ​ന​യു​ടെ ഉന്നമന​ത്തി​നു ചെലവി​ടു​ന്നു. (റോമർ 6:13) അങ്ങനെ ചെയ്യവേ, അവർ ദൈവ​ത്തി​നു സ്വീകാ​ര്യ​മായ സ്‌തോ​ത്ര​യാ​ഗങ്ങൾ അർപ്പി​ക്കു​ന്നു. (എബ്രായർ 13:15) ചെറു​പ്പ​ക്കാ​രും പ്രായ​മു​ള്ള​വ​രു​മായ യഹോ​വ​യു​ടെ ദശലക്ഷ​ക്ക​ണ​ക്കിന്‌ ആരാധകർ ദൈവ​രാ​ജ്യ താത്‌പ​ര്യ​ങ്ങൾ കഴിഞ്ഞി​ട്ടുള്ള സ്ഥാനമേ തങ്ങളുടെ വ്യക്തിഗത മോഹ​ങ്ങൾക്കു നൽകു​ന്നു​ള്ളൂ! അവർ യഥാർഥ ആത്മത്യാ​ഗ​ത്തി​ന്റെ മനോ​ഭാ​വം പ്രകട​മാ​ക്കു​ന്നു.—മത്തായി 6:33; 2 കൊരി​ന്ത്യർ 5:15.

 നവാഗതർ വികസ​ന​ത്തിൽ പങ്കെടു​ക്കു​ന്നു

15. (എ) പുരാതന കാലങ്ങ​ളിൽ, അന്യജാ​തി​ക്കാ​രോ​ടുള്ള ബന്ധത്തിൽ യഹോവ എങ്ങനെ കരുണ കാട്ടി? (ബി) ആധുനിക കാലത്ത്‌ സത്യാ​രാ​ധന ഉന്നമി​പ്പി​ക്കു​ന്ന​തിൽ ‘അന്യജാ​തി​ക്കാർ’ പങ്കു വഹിച്ചി​രി​ക്കു​ന്നത്‌ എങ്ങനെ?

¹⁵ നവാഗതർ യഹോ​വ​യു​ടെ “സ്‌ത്രീ”യെ പിന്തു​ണ​യ്‌ക്കാൻ തങ്ങളുടെ വസ്‌തു​വ​ക​ക​ളും വ്യക്തിഗത സേവന​ങ്ങ​ളും ലഭ്യമാ​ക്കു​ന്നു. “അന്യജാ​തി​ക്കാർ നിന്റെ മതിലു​കളെ പണിയും; അവരുടെ രാജാ​ക്ക​ന്മാർ നിനക്കു ശുശ്രൂ​ഷ​ചെ​യ്യും; എന്റെ ക്രോ​ധ​ത്തിൽ ഞാൻ നിന്നെ അടിച്ചു; എങ്കിലും എന്റെ പ്രീതി​യിൽ എനിക്കു നിന്നോ​ടു കരുണ തോന്നും.” (യെശയ്യാ​വു 60:10) അന്യജാ​തി​ക്കാർ യെരൂ​ശ​ലേ​മി​ലെ നിർമാണ പ്രവർത്ത​ന​ത്തിൽ സഹായിച്ച പൊ.യു.മു. ആറാം നൂറ്റാ​ണ്ടിൽ യഹോ​വ​യു​ടെ കരുണ പ്രകട​മാ​ക്ക​പ്പെട്ടു. (എസ്രാ 3:7; നെഹെ​മ്യാ​വു 3:26) ഇന്നത്തെ വലിയ നിവൃ​ത്തി​യിൽ, “അന്യജാ​തി​ക്കാർ” അതായത്‌ മഹാപു​രു​ഷാ​രം സത്യാ​രാ​ധന ഉന്നമി​പ്പി​ക്കു​ന്ന​തിൽ അഭിഷിക്ത ശേഷി​പ്പി​നെ പിന്താ​ങ്ങു​ന്നു. അവർ തങ്ങളുടെ ബൈബിൾ വിദ്യാർഥി​ക​ളിൽ ക്രിസ്‌തീയ ഗുണങ്ങൾ നട്ടുവ​ളർത്തു​ക​യും അങ്ങനെ ക്രിസ്‌തീയ സഭകളെ കെട്ടു​പണി ചെയ്യു​ക​യും യഹോ​വ​യു​ടെ സംഘട​ന​യു​ടെ നഗരതു​ല്യ​മായ “മതിലു​കളെ” ബലവത്താ​ക്കു​ക​യും ചെയ്യുന്നു. (1 കൊരി​ന്ത്യർ 3:10-15) രാജ്യ​ഹാ​ളു​ക​ളു​ടെ​യും സമ്മേള​ന​ഹാ​ളു​ക​ളു​ടെ​യും ബെഥേൽ ഭവനങ്ങ​ളു​ടെ​യും നിർമാ​ണ​ത്തിൽ കഠിന​മാ​യി യത്‌നി​ച്ചു​കൊണ്ട്‌ അവർ അക്ഷരീ​യ​മാ​യും നിർമാണ പ്രവർത്ത​ന​ത്തിൽ ഏർപ്പെ​ടു​ന്നു. അങ്ങനെ അവർ അഭിഷിക്ത ക്രിസ്‌ത്യാ​നി​ക​ളോ​ടു ചേർന്ന്‌ യഹോ​വ​യു​ടെ സംഘട​ന​യു​ടെ വർധി​ച്ചു​വ​രുന്ന ആവശ്യ​ങ്ങൾക്കാ​യി കരുതു​ന്നു.—യെശയ്യാ​വു 61:5.

16, 17. (എ) ദൈവ​ത്തി​ന്റെ സംഘട​ന​യു​ടെ “വാതി​ലു​കൾ” തുറന്നി​ട്ടി​രി​ക്കു​ന്നത്‌ എങ്ങനെ? (ബി) ‘രാജാ​ക്ക​ന്മാർ’ സീയോ​നു ശുശ്രൂഷ ചെയ്‌തി​രി​ക്കു​ന്നത്‌ എങ്ങനെ? (സി) തുറന്നു​കി​ട​ക്കാൻ യഹോവ ആഗ്രഹി​ക്കുന്ന “വാതി​ലു​കൾ” അടയ്‌ക്കാൻ ശ്രമി​ക്കു​ന്ന​വർക്ക്‌ എന്തു സംഭവി​ക്കും?

¹⁶ ഈ ആത്മീയ നിർമാണ പരിപാ​ടി​യു​ടെ ഫലമായി ഓരോ വർഷവും ലക്ഷക്കണ​ക്കിന്‌ ‘അന്യജാ​തി​ക്കാർ’ യഹോ​വ​യു​ടെ സംഘട​ന​യോ​ടൊത്ത്‌ സഹവസി​ക്കാൻ തുടങ്ങു​ന്നു. ഇനിയും ധാരാളം പേർക്കാ​യി കവാടം തുറന്നു കിടക്കു​ക​യാണ്‌. യഹോവ ഇങ്ങനെ പറയുന്നു: “ജാതി​ക​ളു​ടെ സമ്പത്തി​നേ​യും യാത്രാ​സം​ഘ​ത്തിൽ അവരുടെ രാജാ​ക്ക​ന്മാ​രെ​യും നിന്റെ അടുക്കൽ കൊണ്ടു​വ​രേ​ണ്ട​തി​ന്നു നിന്റെ വാതി​ലു​കൾ രാവും പകലും അടെക്ക​പ്പെ​ടാ​തെ എല്ലായ്‌പോ​ഴും തുറന്നി​രി​ക്കും.” (യെശയ്യാ​വു 60:11) ജാതി​ക​ളു​ടെ  സമ്പത്ത്‌ സീയോ​നി​ലേക്കു കൊണ്ടു​വ​രു​ന്ന​തിൽ നേതൃ​ത്വ​മെ​ടു​ക്കുന്ന ഈ ‘രാജാ​ക്ക​ന്മാർ’ ആരാണ്‌? പുരാതന കാലങ്ങ​ളിൽ, സീയോ​നു ‘ശുശ്രൂഷ ചെയ്യാൻ’ യഹോവ ചില ഭരണാ​ധി​കാ​രി​ക​ളു​ടെ ഹൃദയ​ങ്ങളെ പ്രേരി​പ്പി​ക്കു​ക​യു​ണ്ടാ​യി. ഉദാഹ​ര​ണ​ത്തിന്‌, ആലയം പുനർനിർമി​ക്കു​ന്ന​തിന്‌ യഹൂദ​ന്മാ​രെ യെരൂ​ശ​ലേ​മി​ലേക്കു തിരികെ അയയ്‌ക്കാൻ കോ​രെശ്‌ നേതൃ​ത്വ​മെ​ടു​ത്തു. പിൽക്കാ​ലത്ത്‌, അർത്ഥഹ്‌ശ​ഷ്ടാവ്‌ വിഭവങ്ങൾ സംഭാ​വ​ന​യാ​യി നൽകു​ക​യും യെരൂ​ശ​ലേ​മി​ന്റെ  മതിലു​കൾ പുനർനിർമി​ക്കാൻ നെഹെ​മ്യാ​വി​നെ അയയ്‌ക്കു​ക​യും ചെയ്‌തു. (എസ്രാ 1:2, 3; നെഹെ​മ്യാ​വു 2:1-8) “രാജാ​വി​ന്റെ ഹൃദയം യഹോ​വ​യു​ടെ കയ്യിൽ നീർത്തോ​ടു​ക​ണക്കെ ഇരിക്കു​ന്നു” എന്നു പറഞ്ഞി​രി​ക്കു​ന്നത്‌ എത്ര ശരിയാണ്‌. (സദൃശ​വാ​ക്യ​ങ്ങൾ 21:1) പ്രബല​രായ രാജാ​ക്ക​ന്മാർ തന്റെ ഹിതത്തി​നു ചേർച്ച​യിൽ പ്രവർത്തി​ക്കാൻ ഇടയാ​ക്കു​ന്ന​തി​നു നമ്മുടെ ദൈവ​ത്തി​നു കഴിയും.

 ¹⁷ ആധുനിക കാലങ്ങ​ളിൽ നിരവധി ‘രാജാ​ക്ക​ന്മാർ’ അഥവാ ലൗകിക അധികാ​രി​കൾ യഹോ​വ​യു​ടെ സംഘട​ന​യു​ടെ “വാതി​ലു​കൾ” അടയ്‌ക്കാൻ ശ്രമി​ച്ചി​ട്ടുണ്ട്‌. എന്നാൽ, ചിലർ ആ “വാതി​ലു​കൾ” തുറന്നി​രി​ക്കാൻ സഹായ​ക​മായ തീരു​മാ​നങ്ങൾ ചെയ്‌തു​കൊണ്ട്‌ സീയോ​നു ശുശ്രൂഷ ചെയ്‌തി​രി​ക്കു​ന്നു. (റോമർ 13:4) 1919-ൽ, ലൗകിക അധികാ​രി​കൾ ജോസഫ്‌ എഫ്‌. റഥർഫോർഡി​നെ​യും സഹകാ​രി​ക​ളെ​യും അന്യാ​യ​മായ തടവിൽനി​ന്നു മോചി​പ്പി​ച്ചു. (വെളി​പ്പാ​ടു 11:13) സ്വർഗ​ത്തിൽനി​ന്നു പുറത്താ​ക്ക​പ്പെ​ട്ട​ശേഷം സാത്താൻ അഴിച്ചു​വിട്ട പീഡന​മാ​കുന്ന പ്രളയത്തെ മനുഷ്യ ഗവൺമെ​ന്റു​കൾ “വിഴു​ങ്ങി​ക്ക​ളഞ്ഞു.” (വെളി​പ്പാ​ടു 12:16) ചില ഗവൺമെ​ന്റു​കൾ ചില​പ്പോ​ഴൊ​ക്കെ യഹോ​വ​യു​ടെ സാക്ഷി​കളെ ഉദ്ദേശി​ച്ചു മാത്രം മതസഹി​ഷ്‌ണുത പ്രോ​ത്സാ​ഹി​പ്പി​ച്ചി​ട്ടുണ്ട്‌. ഇത്തരത്തി​ലുള്ള ശുശ്രൂഷ, സൗമ്യ​രു​ടെ കൂട്ടങ്ങൾക്ക്‌ തുറന്നു​കി​ട​ക്കുന്ന “വാതി​ലുക”ളിലൂടെ യഹോ​വ​യു​ടെ സംഘട​ന​യി​ലേക്കു പ്രവേ​ശി​ക്കുക എളുപ്പ​മാ​ക്കി​യി​ട്ടുണ്ട്‌. ഈ “വാതി​ലു​കൾ” അടയ്‌ക്കാൻ ശ്രമി​ക്കുന്ന ശത്രു​ക്കൾക്ക്‌ എന്തു സംഭവി​ക്കും? അവർ ഒരിക്ക​ലും വിജയി​ക്കു​ക​യില്ല. അവരെ കുറിച്ച്‌ യഹോവ പറയുന്നു: “നിന്നെ സേവി​ക്കാത്ത ജാതി​യും രാജ്യ​വും നശിച്ചു​പോ​കും; ആ ജാതികൾ അശേഷം ശൂന്യ​മാ​യ്‌പോ​കും.” (യെശയ്യാ​വു 60:12) അങ്ങേയറ്റം വൈകി​യാൽത്തന്നെ, ദൈവ​ത്തി​ന്റെ “സ്‌ത്രീ”ക്കെതിരെ പോരാ​ടുന്ന എല്ലാവ​രും—വ്യക്തി​ക​ളാ​കട്ടെ സംഘട​ന​ക​ളാ​കട്ടെ—ആസന്നമായ അർമ​ഗെ​ദോൻ യുദ്ധത്തിൽ നശിക്കും.—വെളി​പ്പാ​ടു 16:14, 16.

18. (എ) ഇസ്രാ​യേ​ലിൽ വൃക്ഷങ്ങൾ തഴച്ചു​വ​ള​രു​മെന്ന വാഗ്‌ദാ​ന​ത്താൽ എന്ത്‌ അർഥമാ​ക്കു​ന്നു? (ബി) ഇന്ന്‌ ‘യഹോ​വ​യു​ടെ പാദസ്ഥാ​നം’ എന്താണ്‌?

¹⁸ ന്യായവിധിയുടെ ഈ മുന്നറി​യി​പ്പു നൽകി​യ​ശേഷം ആനന്ദ​ത്തെ​യും സമൃദ്ധി​യെ​യും സംബന്ധിച്ച വാഗ്‌ദാ​ന​ങ്ങളെ കുറിച്ചു പ്രവചനം പറയുന്നു. “സ്‌ത്രീ”യോടു സംസാ​രി​ച്ചു​കൊണ്ട്‌ യഹോവ പ്രസ്‌താ​വി​ക്കു​ന്നു: “എന്റെ വിശു​ദ്ധ​മ​ന്ദി​ര​മുള്ള സ്ഥലത്തിന്നു ഭംഗി​വ​രു​ത്തു​വാ​നാ​യി ലെബാ​നോ​ന്റെ മഹത്വ​വും സരളവൃ​ക്ഷ​വും പയിനും പുന്നയും ഒരു​പോ​ലെ നിന്റെ അടുക്കൽ വരും; അങ്ങനെ ഞാൻ എന്റെ പാദസ്ഥാ​നത്തെ മഹത്വീ​ക​രി​ക്കും.” (യെശയ്യാ​വു 60:13) തഴച്ചു​വ​ള​രുന്ന വൃക്ഷങ്ങൾ മനോ​ഹാ​രി​ത​യു​ടെ​യും ഫലഭൂ​യി​ഷ്‌ഠ​ത​യു​ടെ​യും പ്രതീ​ക​ങ്ങ​ളാണ്‌. (യെശയ്യാ​വു 41:19; 55:13) ഈ വാക്യ​ത്തി​ലുള്ള ‘വിശു​ദ്ധ​മ​ന്ദി​രം,’ ‘പാദസ്ഥാ​നം’ എന്നീ പ്രയോ​ഗങ്ങൾ യെരൂ​ശ​ലേ​മി​ലെ ആലയത്തെ സൂചി​പ്പി​ക്കു​ന്നു. (1 ദിനവൃ​ത്താ​ന്തം 28:2; സങ്കീർത്തനം 99:5) എങ്കിലും, ക്രിസ്‌തു​വി​ന്റെ യാഗത്തി​ന്റെ  അടിസ്ഥാ​ന​ത്തിൽ ആരാധ​ന​യിൽ യഹോ​വയെ സമീപി​ക്കാ​നുള്ള ക്രമീ​ക​ര​ണ​മായ വലിയ ആത്മീയ ആലയത്തെ മുൻനി​ഴ​ലാ​ക്കുന്ന ഒരു പ്രതീ​ക​മാണ്‌ യെരൂ​ശ​ലേ​മി​ലെ ആലയ​മെന്ന്‌ പൗലൊസ്‌ അപ്പൊ​സ്‌തലൻ വിശദീ​ക​രി​ച്ചു. (എബ്രായർ 8:1-5; 9:2-10, 23) ഇന്ന്‌ യഹോവ തന്റെ “പാദസ്ഥാ​നത്തെ,” ഈ വലിയ ആത്മീയ ആലയത്തി​ന്റെ ഭൗമിക പ്രാകാ​ര​ങ്ങളെ, മഹത്ത്വീ​ക​രി​ക്കു​ന്നു. സകല ജനതക​ളി​ലെ​യും ആളുകൾക്ക്‌ അവിടെ സത്യാ​രാ​ധ​ന​യിൽ പങ്കുപ​റ്റാൻ കഴി​യേ​ണ്ട​തിന്‌ അവ അവരെ ആകർഷി​ക്കു​ന്നു.—യെശയ്യാ​വു 2:1-4; ഹഗ്ഗായി 2:7.

19. എന്തു സമ്മതി​ക്കാൻ ശത്രുക്കൾ നിർബ​ന്ധി​ത​രാ​കും, ഏറ്റവും വൈകു​ന്ന​പക്ഷം അവർ അത്‌ ചെയ്യു​ന്നത്‌ എപ്പോൾ ആയിരി​ക്കും?

¹⁹ തുടർന്ന്‌ എതിരാ​ളി​ക​ളിൽ ശ്രദ്ധ കേന്ദ്രീ​ക​രി​ച്ചു​കൊണ്ട്‌ യഹോവ പറയുന്നു: “നിന്നെ ക്ലേശി​പ്പി​ച്ച​വ​രു​ടെ പുത്ര​ന്മാർ നിന്റെ അടുക്കൽ വണങ്ങി​ക്കൊ​ണ്ടു വരും; നിന്നെ നിന്ദി​ച്ച​വ​രൊ​ക്കെ​യും നിന്റെ കാൽ പിടിച്ചു നമസ്‌ക​രി​ക്കും; അവർ നിന്നെ യഹോ​വ​യു​ടെ നഗരം എന്നും യിസ്രാ​യേ​ലിൻ പരിശു​ദ്ധന്റെ സീയോൻ എന്നും വിളി​ക്കും.” (യെശയ്യാ​വു 60:14) ദൈവ​ത്തി​ന്റെ അനു​ഗ്ര​ഹ​ത്താൽ അവന്റെ ജനത്തിന്റെ വർധന​വും ശ്രേഷ്‌ഠ​മായ ജീവി​ത​രീ​തി​യും കാണു​മ്പോൾ, ചില എതിരാ​ളി​കൾ വണങ്ങി​ക്കൊണ്ട്‌ ദൈവ​ത്തി​ന്റെ “സ്‌ത്രീ”യെ വിളി​ക്കാൻ പ്രേരി​ത​രാ​കും. അതിന്റെ അർഥം, അഭിഷിക്ത ശേഷി​പ്പും അവരുടെ സഹകാ​രി​ക​ളും തീർച്ച​യാ​യും ദൈവ​ത്തി​ന്റെ സ്വർഗീയ സംഘട​നയെ, ‘യഹോ​വ​യു​ടെ നഗരത്തെ, യിസ്രാ​യേ​ലിൻ പരിശു​ദ്ധന്റെ സീയോ​നെ,’ പ്രതി​നി​ധാ​നം ചെയ്യുന്നു എന്ന്‌ സമ്മതി​ക്കാൻ അവർ നിർബ​ന്ധി​ത​രാ​കും, ഏറ്റവും വൈകു​ന്ന​പക്ഷം അർമ​ഗെ​ദോ​നി​ലെ​ങ്കി​ലും.

ലഭ്യമായ വിഭവങ്ങൾ ഉപയോ​ഗി​ക്കൽ

20. “സ്‌ത്രീ”യുടെ അവസ്ഥയിൽ എത്ര വലിയ മാറ്റം ഉണ്ടാകു​ന്നു?

²⁰ യഹോവയുടെ “സ്‌ത്രീ”യുടെ അവസ്ഥയിൽ എത്ര വലിയ മാറ്റമാണ്‌ ഉണ്ടാകു​ന്നത്‌! യഹോവ ഇങ്ങനെ പറയുന്നു: “ആരും കടന്നു​പോ​കാ​ത​വണ്ണം നീ നിർജ്ജ​ന​വും ദ്വേഷ​വി​ഷ​യ​വും ആയിരു​ന്ന​തി​ന്നു പകരം ഞാൻ നിന്നെ നിത്യ​മാ​ഹാ​ത്മ്യ​വും [“പ്രൗഢി​യു​റ​റ​വ​ളും,” “പി.ഒ.സി. ബൈ.”] തലമു​റ​ത​ല​മു​റ​യാ​യുള്ള ആനന്ദവും ആക്കിത്തീർക്കും. നീ ജാതി​ക​ളു​ടെ പാൽ കുടി​ക്കും; രാജാ​ക്ക​ന്മാ​രു​ടെ മുല കുടി​ക്കും; യഹോ​വ​യായ ഞാൻ നിന്റെ രക്ഷകൻ എന്നും യാക്കോ​ബി​ന്റെ വല്ലഭൻ നിന്റെ വീണ്ടെ​ടു​പ്പു​കാ​രൻ എന്നും നീ അറിയും.”—യെശയ്യാ​വു 60:15, 16.

21. (എ) പുരാതന യെരൂ​ശ​ലേം “പ്രൗഢി​യു​ററ”തായി​ത്തീ​രു​ന്നത്‌ എങ്ങനെ? (ബി) 1919 മുതൽ യഹോ​വ​യു​ടെ അഭിഷിക്ത ദാസന്മാർ ആസ്വദി​ച്ചി​രി​ക്കുന്ന അനു​ഗ്ര​ഹങ്ങൾ എന്തെല്ലാം, അവർ “ജാതി​ക​ളു​ടെ പാൽ” കുടി​ച്ചി​രി​ക്കു​ന്നത്‌ എങ്ങനെ?

 ²¹ പ്രതീകാത്മകമായി പറഞ്ഞാൽ, “ആരും കടന്നു​പോ​കാ​ത​വണ്ണം” 70 വർഷക്കാ​ലം പുരാതന യെരൂ​ശ​ലേം അസ്‌തി​ത്വ​ത്തിൽ പോലു​മി​ല്ലാ​താ​യി. എന്നാൽ പൊ.യു.മു. 537 മുതൽ ആ നഗരത്തെ “പ്രൗഢി​യു​ററ”താക്കി​ക്കൊണ്ട്‌ യഹോവ അതിനെ ജനവാ​സ​മു​ള്ളത്‌ ആക്കി. സമാന​മാ​യി, ഒന്നാം ലോക​യു​ദ്ധ​ത്തി​ന്റെ അവസാ​ന​ത്തോ​ട​ടുത്ത്‌ ദൈവ​ത്തി​ന്റെ ഇസ്രാ​യേ​ലിന്‌ ‘നിർജ്ജന’മെന്നു തോന്നിയ ശൂന്യ​ത​യു​ടെ ഒരു കാലഘട്ടം അനുഭ​വ​പ്പെട്ടു. എന്നാൽ, 1919-ൽ യഹോവ തന്റെ അഭിഷിക്ത ദാസന്മാ​രെ അടിമ​ത്ത​ത്തിൽനി​ന്നു തിരികെ വാങ്ങി. അന്നുമു​തൽ അഭൂത​പൂർവ​മായ വികസ​ന​വും ആത്മീയ സമൃദ്ധി​യും നൽകി അവൻ അവരെ അനു​ഗ്ര​ഹി​ച്ചി​രി​ക്കു​ന്നു. സത്യാ​രാ​ധന ഉന്നമി​പ്പി​ക്കാൻ രാഷ്‌ട്ര​ങ്ങ​ളു​ടെ വിഭവങ്ങൾ ഉപയോ​ഗി​ച്ചു​കൊണ്ട്‌ അവന്റെ ജനം “ജാതി​ക​ളു​ടെ പാൽ” കുടി​ച്ചി​രി​ക്കു​ന്നു. ഉദാഹ​ര​ണ​ത്തിന്‌, ആധുനിക സാങ്കേ​തി​ക​വി​ദ്യ ഉപയോ​ഗി​ക്കു​ന്ന​തി​ന്റെ ഫലമായി ബൈബി​ളും ബൈബിൾ സാഹി​ത്യ​ങ്ങ​ളും നൂറു​ക​ണ​ക്കി​നു ഭാഷക​ളിൽ പരിഭാ​ഷ​പ്പെ​ടു​ത്തി പ്രസി​ദ്ധീ​ക​രി​ക്കുക സാധ്യ​മാ​യി​രി​ക്കു​ന്നു. തന്മൂലം, ഓരോ വർഷവും ലക്ഷക്കണ​ക്കിന്‌ ആളുകൾ യഹോ​വ​യു​ടെ സാക്ഷി​ക​ളോ​ടൊ​ത്തു ബൈബിൾ പഠിക്കു​ക​യും യേശു​ക്രി​സ്‌തു മുഖാ​ന്തരം യഹോവ തങ്ങളുടെ രക്ഷകനും വീണ്ടെ​ടു​പ്പു​കാ​ര​നും ആണെന്നു മനസ്സി​ലാ​ക്കു​ക​യും ചെയ്‌തി​രി​ക്കു​ന്നു.—പ്രവൃ​ത്തി​കൾ 5:31; 1 യോഹ​ന്നാൻ 4:14.

സംഘട​നാ​പ​ര​മായ അഭിവൃ​ദ്ധി

22. എങ്ങനെ​യുള്ള പ്രത്യേക പുരോ​ഗ​തി​യാണ്‌ യഹോവ വാഗ്‌ദാ​നം ചെയ്യു​ന്നത്‌?

²² യഹോവയുടെ ജനത്തിന്റെ അംഗസം​ഖ്യ​യി​ലെ വർധന​വി​നൊ​പ്പം സംഘട​നാ​പ​ര​മായ പുരോ​ഗതി സംഭവി​ച്ചി​രി​ക്കു​ന്ന​താ​യും കാണാം. യഹോവ ഇപ്രകാ​രം പ്രസ്‌താ​വി​ക്കു​ന്നു: “ഞാൻ താമ്ര​ത്തി​ന്നു പകരം സ്വർണ്ണം വരുത്തും; ഇരിമ്പി​ന്നു പകരം വെള്ളി​യും മരത്തിന്നു പകരം താമ്ര​വും കല്ലിന്നു പകരം ഇരിമ്പും വരുത്തും; ഞാൻ സമാധാ​നത്തെ നിനക്കു നായക​ന്മാ​രും നീതിയെ നിനക്കു അധിപ​തി​മാ​രും ആക്കും.” (യെശയ്യാ​വു 60:17) താമ്രം മാറ്റി സ്വർണം കൊണ്ടു​വ​രു​ന്നത്‌ ഒരു പുരോ​ഗ​തി​യാണ്‌, പരാമർശി​ച്ചി​രി​ക്കുന്ന മറ്റു ലോഹ​ങ്ങ​ളു​ടെ കാര്യ​ത്തി​ലും അതു സത്യമാണ്‌. ഇതിനു ചേർച്ച​യിൽ, അന്ത്യനാ​ളു​ക​ളിൽ ഉടനീളം യഹോ​വ​യു​ടെ  ജനം മെച്ചപ്പെട്ട സംഘട​നാ​പ​ര​മായ പൊരു​ത്ത​പ്പെ​ടു​ത്ത​ലു​കൾക്കു വിധേ​യ​രാ​യി​രി​ക്കു​ന്നു.

23, 24. മെച്ചപ്പെട്ട സംഘാ​ട​ന​പ​ര​മായ എന്തെല്ലാം ക്രമീ​ക​ര​ണ​ങ്ങ​ളാണ്‌ 1919 മുതൽ യഹോ​വ​യു​ടെ ജനം അനുഭ​വി​ച്ചി​രി​ക്കു​ന്നത്‌?

²³ മൂപ്പന്മാരെയും ഡീക്കന്മാ​രെ​യും ജനാധി​പ​ത്യ​പ​ര​മാ​യി തിര​ഞ്ഞെ​ടു​ക്കുന്ന ഒരു രീതി​യാണ്‌ 1919 കാലഘ​ട്ട​ത്തിൽ സഭകളിൽ നിലവി​ലി​രു​ന്നത്‌. എന്നാൽ ആ വർഷം, സഭയുടെ വയൽസേവന പ്രവർത്ത​ന​ങ്ങൾക്കു മേൽനോ​ട്ടം വഹിക്കാൻ ഒരു സേവന ഡയറക്‌ടറെ ദിവ്യാ​ധി​പ​ത്യ​പ​ര​മാ​യി നിയമി​ച്ചു. എന്നാൽ, ചിലയി​ട​ങ്ങ​ളിൽ തിര​ഞ്ഞെ​ടു​ക്ക​പ്പെട്ട മൂപ്പന്മാർ സേവന ഡയറക്‌ടറെ എതിർക്കു​ക​യു​ണ്ടാ​യി. 1932 ആയപ്പോ​ഴേ​ക്കും ആ അവസ്ഥയ്‌ക്കു മാറ്റം വന്നു. മൂപ്പന്മാ​രെ​യും ഡീക്കന്മാ​രെ​യും തിര​ഞ്ഞെ​ടു​ക്കുന്ന രീതി അവസാ​നി​പ്പി​ക്കാൻ വീക്ഷാ​ഗോ​പു​രം മാസി​ക​യി​ലൂ​ടെ സഭകൾക്കു നിർദേശം ലഭിച്ചു. തുടർന്ന്‌, സേവന ഡയറക്‌ട​റോ​ടൊ​പ്പം പ്രവർത്തി​ക്കാൻ സഭകൾ ഒരു സേവന കമ്മിറ്റി​യെ തിര​ഞ്ഞെ​ടു​ക്കേ​ണ്ടി​യി​രു​ന്നു. അതൊരു വലിയ പുരോ​ഗതി ആയിരു​ന്നു.

²⁴ സഭയിലെ എല്ലാ ദാസന്മാ​രെ​യും ദിവ്യാ​ധി​പ​ത്യ​പ​ര​മാ​യി നിയമി​ക്കുന്ന രീതി 1938-ൽ നിലവിൽ വന്നതോ​ടെ, കൂടുതൽ “സ്വർണ്ണം” കൊണ്ടു​വ​ര​പ്പെട്ടു. സഭയുടെ ചുമതല കമ്പനി ദാസ​ന്റെ​യും (പിൽക്കാ​ലത്ത്‌, സഭാദാ​സൻ) അദ്ദേഹ​ത്തോ​ടൊ​പ്പം പ്രവർത്തി​ക്കുന്ന മറ്റു ദാസന്മാ​രു​ടെ​യും കരങ്ങളി​ലാ​യി, അവരെ​ല്ലാം നിയമി​ക്ക​പ്പെ​ട്ടത്‌ “വിശ്വ​സ്‌ത​നും വിവേ​കി​യു​മായ അടിമ”യുടെ മേൽനോ​ട്ട​ത്തിൽ ആയിരു​ന്നു. c (മത്തായി 24:45-47, NW) എന്നാൽ, സഭയുടെ മേൽനോ​ട്ടം വഹി​ക്കേ​ണ്ടത്‌ ഒരു വ്യക്തിയല്ല മറിച്ച്‌ മൂപ്പന്മാ​രു​ടെ ഒരു സംഘമാണ്‌ എന്ന്‌ 1972-ൽ ദൈവ​ജനം തിരു​വെ​ഴു​ത്തു​ക​ളിൽനി​ന്നു മനസ്സി​ലാ​ക്കി. (ഫിലി​പ്പി​യർ 1:1) സഭാത​ല​ത്തി​ലും ഭരണസംഘ തലത്തി​ലും മറ്റു ചില മാറ്റങ്ങൾ നിലവിൽ വന്നു. ഭരണസംഘ തലത്തിൽ ഉണ്ടായ മാറ്റത്തി​ന്റെ ഒരു ഉദാഹ​ര​ണ​മാണ്‌ 2000 ഒക്‌ടോ​ബർ 7-ന്‌ നടന്നത്‌. അന്ന്‌, വാച്ച്‌ടവർ സൊ​സൈറ്റി ഓഫ്‌ പെൻസിൽവേ​നി​യ​യു​ടെ​യും ബന്ധപ്പെട്ട മറ്റു കോർപ്പ​റേ​ഷ​നു​ക​ളു​ടെ​യും ഡയറക്‌ടർമാ​രാ​യി സേവി​ച്ചി​രുന്ന ഭരണസം​ഘാം​ഗങ്ങൾ സ്വമേ​ധയാ ആ സ്ഥാനങ്ങൾ വേണ്ടെന്നു വെച്ചതാ​യി അറിയി​ക്കു​ക​യു​ണ്ടാ​യി. അങ്ങനെ, വിശ്വ​സ്‌ത​നും വിവേ​കി​യു​മായ അടിമയെ പ്രതി​നി​ധാ​നം ചെയ്യുന്ന  ഭരണസം​ഘ​ത്തിന്‌ “ദൈവ​ത്തി​ന്റെ സഭ”യുടെ​യും അതി​നോ​ടൊ​ത്തു സഹവസി​ക്കുന്ന വേറെ ആടുക​ളു​ടെ​യും മേലുള്ള ആത്മീയ മേൽനോ​ട്ട​ത്തി​നു കൂടുതൽ ശ്രദ്ധ നൽകാൻ സാധി​ക്കു​ന്നു. (പ്രവൃ​ത്തി​കൾ 20:28) അത്തരം എല്ലാ ക്രമീ​ക​ര​ണ​ങ്ങ​ളും പുരോ​ഗതി തന്നെയാണ്‌. അവ യഹോ​വ​യു​ടെ സംഘട​നയെ ബലപ്പെ​ടു​ത്തു​ക​യും അവന്റെ ആരാധ​കർക്ക്‌ അനു​ഗ്രഹം കൈവ​രു​ത്തു​ക​യും ചെയ്‌തി​രി​ക്കു​ന്നു.

25. യഹോ​വ​യു​ടെ ജനത്തിന്റെ സംഘാ​ട​ന​പ​ര​മായ പുരോ​ഗ​തി​ക്കു പിന്നിൽ ആരാണ്‌, അവർ എന്തെല്ലാം അനു​ഗ്ര​ഹങ്ങൾ കൊയ്‌തി​രി​ക്കു​ന്നു?

²⁵ ഈ പുരോ​ഗ​തി​ക​ളു​ടെ​യെ​ല്ലാം പിന്നിൽ ആരാണ്‌? ഏതെങ്കി​ലും മനുഷ്യ​രു​ടെ സംഘാ​ട​ന​പ​ര​മായ കഴിവി​ന്റെ​യോ വിദഗ്‌ധ​മായ ചിന്തയു​ടെ​യോ ഫലമാ​ണോ അവ? അല്ല. കാരണം, ‘ഞാൻ സ്വർണ്ണം വരുത്തും’ എന്നു പ്രസ്‌താ​വി​ച്ചത്‌ യഹോ​വ​യാണ്‌. ഉണ്ടായി​ട്ടുള്ള ഈ പുരോ​ഗ​തി​ക​ളെ​ല്ലാം ദിവ്യ മാർഗ​നിർദേ​ശ​ത്തി​ന്റെ ഫലമാണ്‌. യഹോ​വ​യു​ടെ ജനം അവന്റെ മാർഗ​നിർദേ​ശ​ത്തി​നു കീഴ്‌പെ​ടു​ക​യും പൊരു​ത്ത​പ്പെ​ടു​ത്ത​ലു​കൾ വരുത്തു​ക​യും ചെയ്യു​മ്പോൾ, അത്‌ അവരുടെ അനു​ഗ്ര​ഹ​ങ്ങ​ളിൽ കലാശി​ക്കും. അവരുടെ ഇടയിൽ സമാധാ​നം നിലനിൽക്കും, നീതി​യോ​ടുള്ള സ്‌നേഹം അവനെ സേവി​ക്കാൻ അവരെ പ്രേരി​പ്പി​ക്കും.

26. സത്യ​ക്രി​സ്‌ത്യാ​നി​കളെ തിരി​ച്ച​റി​യി​ക്കുന്ന എന്തു മുഖമു​ദ്ര ശത്രുക്കൾ പോലും ശ്രദ്ധി​ക്കു​ന്നു?

²⁶ ദൈവദത്ത സമാധാ​ന​ത്തിന്‌ പരിവർത്തന ശക്തിയുണ്ട്‌. യഹോവ ഈ വാഗ്‌ദാ​നം നൽകുന്നു: “ഇനി നിന്റെ ദേശത്തു സാഹസ​വും [“അക്രമ​വും,” NW] നിന്റെ അതിരി​ന്ന​കത്തു ശൂന്യ​വും നാശവും കേൾക്ക​യില്ല; നിന്റെ മതിലു​കൾക്കു രക്ഷ എന്നും നിന്റെ വാതി​ലു​കൾക്കു സ്‌തുതി എന്നും നീ പേർ പറയും.” (യെശയ്യാ​വു 60:18) എത്ര സത്യം! സമാധാ​നം സത്യ​ക്രി​സ്‌ത്യാ​നി​ക​ളു​ടെ മുഖമു​ദ്ര​യാ​ണെന്നു ശത്രുക്കൾ പോലും സമ്മതി​ക്കു​ന്നു. (മീഖാ 4:3) യഹോ​വ​യു​ടെ സാക്ഷികൾ തങ്ങളുടെ ഇടയിൽത്ത​ന്നെ​യും ദൈവ​വു​മാ​യും ആസ്വദി​ക്കുന്ന ഈ സമാധാ​നം, ഓരോ ക്രിസ്‌തീയ യോഗ​സ്ഥ​ല​ത്തെ​യും ഈ അക്രമാ​സക്ത ലോക​ത്തി​ലെ മരുപ്പച്ച ആക്കിത്തീർക്കു​ന്നു. (1 പത്രൊസ്‌ 2:17) ഭൂവാ​സി​ക​ളെ​ല്ലാം “യഹോ​വ​യാൽ ഉപദേ​ശി​ക്ക​പ്പെട്ട” വ്യക്തികൾ ആയിത്തീ​രു​മ്പോൾ ഉണ്ടായി​രി​ക്കുന്ന സമാധാ​ന​സ​മൃ​ദ്ധി​യു​ടെ ഒരു പൂർവ​വീ​ക്ഷ​ണ​മാണ്‌ ഇത്‌.—യെശയ്യാ​വു 11:9; 54:13.

 ദിവ്യ അംഗീ​കാ​ര​ത്തി​ന്റെ മഹത്തായ വെളിച്ചം

27. യഹോ​വ​യു​ടെ “സ്‌ത്രീ”യുടെ മേൽ ഏതു നിത്യ​പ്ര​കാ​ശം ശോഭി​ക്കു​ന്നു?

²⁷ യെരൂശലേമിന്മേൽ പ്രകാ​ശി​ക്കുന്ന വെളി​ച്ച​ത്തി​ന്റെ തീവ്രത സംബന്ധിച്ച്‌ യഹോവ നൽകുന്ന ഒരു വിവര​ണ​മാണ്‌ ഇത്‌: “ഇനി പകൽനേ​രത്തു നിന്റെ വെളിച്ചം സൂര്യനല്ല; നിനക്കു നിലാ​വെട്ടം തരുന്നതു ചന്ദ്രനു​മല്ല; യഹോവ നിനക്കു നിത്യ​പ്ര​കാ​ശ​വും നിന്റെ ദൈവം നിന്റെ തേജസ്സും ആകുന്നു. നിന്റെ സൂര്യൻ ഇനി അസ്‌ത​മി​ക്ക​യില്ല; നിന്റെ ചന്ദ്രൻ മറഞ്ഞു​പോ​ക​യു​മില്ല; യഹോവ നിന്റെ നിത്യ പ്രകാ​ശ​മാ​യി​രി​ക്കും; നിന്റെ ദുഃഖ​കാ​ലം തീർന്നു​പോ​കും.” (യെശയ്യാ​വു 60:19, 20) യഹോവ തന്റെ “സ്‌ത്രീ”ക്ക്‌ ‘നിത്യ പ്രകാശം’ ആയി തുടരും. അവൻ സൂര്യനെ പോലെ ‘അസ്‌ത​മി​ക്കുക’യോ ചന്ദ്രനെ പോലെ ‘മറഞ്ഞു​പോ​കുക’യോ ഇല്ല. d അവന്റെ അംഗീ​കാ​ര​ത്തി​ന്റെ നിത്യ​വെ​ളി​ച്ചം ദൈവ​ത്തി​ന്റെ “സ്‌ത്രീ”യുടെ മനുഷ്യ പ്രതി​നി​ധി​ക​ളായ അഭിഷിക്ത ക്രിസ്‌ത്യാ​നി​ക​ളു​ടെ​മേൽ പ്രകാ​ശി​ക്കു​ന്നു. ലോക​ത്തി​ലെ രാഷ്‌ട്രീയ, സാമ്പത്തിക രംഗത്തെ യാതൊ​രു അന്ധകാ​ര​ത്തി​നും മൂടി​ക്ക​ള​യാ​നാ​വാത്ത ആത്മീയ വെളി​ച്ച​ത്തി​ന്റെ ശോഭ അവർ മഹാപു​രു​ഷാ​ര​ത്തോ​ടൊ​പ്പം ആസ്വദി​ക്കു​ക​യാണ്‌. യഹോവ അവരുടെ മുമ്പാകെ വെച്ചി​രി​ക്കുന്ന ശോഭ​ന​മായ ഭാവി​യിൽ അവർക്ക്‌ ഉറച്ച വിശ്വാ​സ​മുണ്ട്‌.—റോമർ 2:7; വെളി​പ്പാ​ടു 21:3-5.

28. (എ) തിരി​ച്ചെ​ത്തുന്ന യെരൂ​ശ​ലേം നിവാ​സി​കളെ കുറിച്ച്‌ എന്തു വാഗ്‌ദാ​നം ചെയ്‌തി​രി​ക്കു​ന്നു? (ബി) അഭിഷിക്ത ക്രിസ്‌ത്യാ​നി​കൾ 1919-ൽ എന്തു കൈവ​ശ​മാ​ക്കി? (സി) നീതി​മാ​ന്മാർ എത്രകാ​ല​ത്തേക്കു ഭൂമിയെ കൈവ​ശ​മാ​ക്കും?

²⁸ യെരൂശലേം നിവാ​സി​കളെ കുറിച്ച്‌ യഹോവ ഇങ്ങനെ തുടർന്നു പറയുന്നു: “നിന്റെ ജനമൊ​ക്കെ​യും നീതി​മാ​ന്മാ​രാ​കും; ഞാൻ മഹത്വ​പ്പെ​ടേ​ണ്ട​തി​ന്നു എന്റെ നടുത​ല​യു​ടെ മുളയും എന്റെ കൈക​ളു​ടെ പ്രവൃ​ത്തി​യും ആയിട്ടു അവർ ദേശത്തെ സദാകാ​ല​ത്തേക്കു കൈവ​ശ​മാ​ക്കും.” (യെശയ്യാ​വു 60:21) അക്ഷരീയ ഇസ്രാ​യേൽ ബാബി​ലോ​ണിൽനി​ന്നു മടങ്ങി​വ​ന്ന​പ്പോൾ ‘ദേശം കൈവ​ശ​മാ​ക്കി.’ അവരുടെ കാര്യ​ത്തിൽ ‘സദാകാ​ലം’ എന്നത്‌ പൊ.യു. ഒന്നാം നൂറ്റാ​ണ്ടിൽ റോമൻ സൈന്യ​ങ്ങൾ യെരൂ​ശ​ലേ​മി​നെ​യും യഹൂദ ദേശ​ത്തെ​യും നശിപ്പി​ച്ചതു വരെയുള്ള കാലഘട്ടം ആയിരു​ന്നു. 1919-ൽ അഭിഷിക്ത ക്രിസ്‌ത്യാ​നി​ക​ളു​ടെ ശേഷിപ്പ്‌ ആത്മീയ അടിമ​ത്ത​ത്തിൽനി​ന്നു  പുറത്തു​വ​രു​ക​യും ഒരു ആത്മീയ ദേശം കൈവ​ശ​മാ​ക്കു​ക​യും ചെയ്‌തു. (യെശയ്യാ​വു 66:8) ഈ ദേശത്തി​ന്റെ അഥവാ പ്രവർത്തന മണ്ഡലത്തി​ന്റെ പ്രത്യേ​കത, അതിന്റെ മങ്ങി​പ്പോ​കാത്ത പറുദീ​സാ​തു​ല്യ​മായ ആത്മീയ സമൃദ്ധി​യാണ്‌. പുരാതന ഇസ്രാ​യേ​ലിൽനി​ന്നു ഭിന്നമാ​യി ഒരു കൂട്ടമെന്ന നിലയിൽ ആത്മീയ ഇസ്രാ​യേൽ അവിശ്വ​സ്‌തത കാട്ടു​ക​യില്ല. മാത്രമല്ല, ഭൂമി “സമാധാ​ന​സ​മൃ​ദ്ധി” കളിയാ​ടുന്ന ഒരു അക്ഷരീയ പറുദീസ ആയിത്തീ​രു​മ്പോൾ യെശയ്യാ​വി​ന്റെ പ്രവച​ന​ത്തിന്‌ ഒരു ഭൗതിക നിവൃ​ത്തി​യും ഉണ്ടാകും. അപ്പോൾ ഭൗമിക പ്രത്യാ​ശ​യുള്ള നീതി​മാ​ന്മാർ ഭൂമിയെ എന്നേക്കും “കൈവ​ശ​മാ​ക്കും.”—സങ്കീർത്തനം 37:11, 29.

29, 30. “കുറഞ്ഞവൻ” ‘ആയിരം’ ആയിത്തീർന്നി​രി​ക്കു​ന്നത്‌ എങ്ങനെ?

²⁹ യെശയ്യാവു 60-ാം അധ്യാ​യ​ത്തി​ന്റെ ഒടുവിൽ ഒരു മഹത്തായ വാഗ്‌ദാ​നം കാണാം. തന്റെ നാമത്തെ ചൊല്ലി യഹോവ അതിന്‌ ഉറപ്പു നൽകുന്നു. അവൻ ഇപ്രകാ​രം പ്രസ്‌താ​വി​ക്കു​ന്നു: “കുറഞ്ഞവൻ ആയിര​വും ചെറി​യവൻ മഹാജാ​തി​യും ആയിത്തീ​രും; യഹോ​വ​യായ ഞാൻ തക്ക സമയത്തു അതിനെ ശീഘ്ര​മാ​യി നിവർത്തി​ക്കും.” (യെശയ്യാ​വു 60:22) ചിതറി​പ്പോയ അഭിഷി​ക്തർ 1919-ൽ പ്രവർത്ത​ന​ത്തി​ലേക്കു പുനഃ​സ്ഥി​തീ​ക​രി​ക്ക​പ്പെ​ട്ട​പ്പോൾ അവർ “കുറഞ്ഞവൻ” ആയിരു​ന്നു. e എന്നാൽ ശേഷി​ക്കുന്ന ആത്മീയ ഇസ്രാ​യേ​ല്യർ കൂട്ടി​ച്ചേർക്ക​പ്പെ​ട്ട​പ്പോൾ അവരുടെ സംഖ്യ വർധിച്ചു. മഹാപു​രു​ഷാ​ര​ത്തി​ന്റെ കൂട്ടി​ച്ചേർക്കൽ തുടങ്ങി​യ​തോ​ടെ, അത്യധി​ക​മായ വർധനവ്‌ ഉണ്ടായി.

³⁰ അധികനാൾ കഴിയു​ന്ന​തി​നു മുമ്പ്‌, ദൈവ​ജ​ന​ത്തി​ന്റെ ഇടയിൽ കളിയാ​ടുന്ന നീതി​യും സമാധാ​ന​വും പരമാർഥ​ഹൃ​ദ​യ​രായ അനേകരെ ആകർഷി​ക്കു​ക​യും “ചെറി​യവൻ” അക്ഷരാർഥ​ത്തിൽത്തന്നെ ഒരു “മഹാജാ​തി” ആയിത്തീ​രു​ക​യും ചെയ്‌തു. ഇപ്പോൾ അവരുടെ സംഖ്യ ലോക​ത്തി​ലെ പല പരമാ​ധി​കാര രാഷ്‌ട്ര​ങ്ങ​ളി​ലെ ജനസം​ഖ്യ​യെ​ക്കാ​ളും അധിക​മാണ്‌. വ്യക്തമാ​യും, യഹോവ യേശു​ക്രി​സ്‌തു മുഖാ​ന്തരം രാജ്യ​വേ​ല​യ്‌ക്കു നേതൃ​ത്വം നൽകു​ക​യും അതിന്റെ വേഗം വർധി​പ്പി​ക്കു​ക​യും ചെയ്‌തി​രി​ക്കു​ന്നു. സത്യാ​രാ​ധ​ന​യു​ടെ ലോക​വ്യാ​പക വികസനം കാണാ​നും അതിൽ ഒരു പങ്കുണ്ടാ​യി​രി​ക്കാ​നും കഴിയു​ന്നത്‌ എത്ര പുളക​പ്ര​ദ​മാണ്‌! ഇക്കാര്യ​ങ്ങൾ ദീർഘ​കാ​ലം മുമ്പേ പ്രവചിച്ച യഹോ​വ​യ്‌ക്ക്‌ ഈ വർധനവ്‌ മഹത്ത്വം കൈവ​രു​ത്തു​ന്നു എന്നു മനസ്സി​ലാ​ക്കു​ന്നത്‌ നമുക്ക്‌ എത്ര വലിയ സന്തോഷം കൈവ​രു​ത്തു​ന്നു.

[അടിക്കു​റി​പ്പു​കൾ]

[അധ്യയന ചോദ്യ​ങ്ങൾ]

?

 [305-ാം പേജിലെ ചിത്രം]

‘എഴു​ന്നേൽക്കാൻ’ “സ്‌ത്രീ”ക്കു കൽപ്പന ലഭിക്കു​ന്നു

[312, 313 പേജു​ക​ളി​ലെ ചിത്രം]

“തർശീ​ശ്‌ക​പ്പ​ലു​കൾ” യഹോ​വ​യു​ടെ ആരാധ​കരെ കൊണ്ടു​വ​രു​ന്നു