1-3. (എ) പൗലോ​സി​നെ​യും സംഘ​ത്തെ​യും പരിശു​ദ്ധാ​ത്മാവ്‌ വഴിന​യി​ച്ചത്‌ എങ്ങനെ? (ബി) ഏതു സംഭവങ്ങൾ നാം പരിചി​ന്തി​ക്കും?

 മാസി​ഡോ​ണി​യ​യി​ലെ ഫിലിപ്പി എന്ന പട്ടണത്തിൽനിന്ന്‌ ഒരു കൂട്ടം സ്‌ത്രീ​കൾ നടന്നു​നീ​ങ്ങു​ക​യാണ്‌. അധികം താമസി​യാ​തെ അവർ ഗാൻ​ഗൈ​റ്റ്‌സ്‌ എന്ന ചെറി​യൊ​രു നദിയു​ടെ തീര​ത്തെ​ത്തു​ന്നു. പതിവു​പോ​ലെ, ഇസ്രാ​യേ​ലി​ന്റെ ദൈവ​ത്തോ​ടു പ്രാർഥി​ക്കാ​നാ​യി അവർ നദീതീ​രത്ത്‌ ചെന്നി​രി​ക്കു​ന്നു. യഹോവ അവരെ നിരീ​ക്ഷി​ക്കു​ന്നുണ്ട്‌.—2 ദിന. 16:9; സങ്കീ. 65:2.

² അതേസ​മയം, ഫിലി​പ്പി​യിൽനിന്ന്‌ 800-ലധികം കിലോ​മീ​റ്റർ കിഴക്കുള്ള തെക്കൻ ഗലാത്യ​യി​ലെ ലുസ്‌ത്ര​യിൽനി​ന്നും ഒരു കൂട്ടം പുരു​ഷ​ന്മാർ യാത്ര​തി​രി​ക്കു​ന്നു. ദിവസങ്ങൾ യാത്ര​ചെ​യ്‌ത്‌ അവർ പടിഞ്ഞാ​റേക്കു പോകുന്ന ഒരു പ്രധാന റോമൻ വീഥി​യി​ലെ​ത്തു​ന്നു. ഏഷ്യ സംസ്ഥാ​ന​ത്തി​ലെ ഏറ്റവും ജനവാ​സ​മുള്ള പ്രദേ​ശ​ത്തേക്കു നയിക്കു​ന്ന​താണ്‌ ആ വീഥി. പൗലോ​സും ശീലാ​സും തിമൊ​ഥെ​യൊ​സും അടങ്ങുന്ന ആ സംഘം വളരെ ഉത്സാഹ​ത്തി​ലാണ്‌. ആ പാതയി​ലൂ​ടെ സഞ്ചരിച്ച്‌ എഫെ​സൊ​സി​ലും അടുത്തുള്ള പട്ടണങ്ങ​ളി​ലും എത്തുക​യാണ്‌ അവരുടെ ലക്ഷ്യം. അവി​ടെ​യുള്ള ആയിര​ക്ക​ണ​ക്കി​നാ​ളു​കൾ ക്രിസ്‌തു​വി​നെ​ക്കു​റി​ച്ചുള്ള സന്തോ​ഷ​വാർത്ത കേൾക്കേ​ണ്ട​തുണ്ട്‌. എന്നാൽ ഉദ്ദേശി​ച്ച​തു​പോ​ലെയല്ല കാര്യങ്ങൾ നടക്കു​ന്നത്‌. അങ്ങോട്ടു യാത്ര​തി​രി​ക്കും​മു​മ്പു​തന്നെ പരിശു​ദ്ധാ​ത്മാവ്‌ ഏതോ വിധത്തിൽ അവരെ തടയുന്നു; ഏഷ്യയിൽ പ്രസം​ഗി​ക്കു​ന്ന​തിൽനിന്ന്‌ അവരെ വിലക്കു​ന്നു. എന്തു​കൊണ്ട്‌? യേശു​ക്രി​സ്‌തു ദൈവാ​ത്മാ​വു​മു​ഖാ​ന്തരം അവരെ മറ്റൊ​രി​ട​ത്തേക്കു നയിക്കാൻ ആഗ്രഹി​ക്കു​ന്നു—ഏഷ്യാ​മൈ​ന​റി​ലൂ​ടെ, ഈജിയൻ കടലി​ന​പ്പു​റ​ത്തുള്ള ഗാൻ​ഗൈ​റ്റ്‌സ്‌ എന്ന ആ ചെറിയ നദിയു​ടെ തീര​ത്തേക്ക്‌.

³ അസാധാ​ര​ണ​മായ ഒരു യാത്ര​യാ​യി​രു​ന്നു അത്‌. യേശു പൗലോ​സി​നെ​യും കൂട്ട​രെ​യും മാസി​ഡോ​ണി​യ​യി​ലേക്കു നയിച്ച വിധത്തിൽനിന്ന്‌ നമുക്കു വിലപ്പെട്ട പല പാഠങ്ങ​ളും പഠിക്കാ​നാ​കും. ഏതാണ്ട്‌ എ.ഡി. 49-ൽ പൗലോസ്‌ ആരംഭിച്ച രണ്ടാം മിഷനറി പര്യട​ന​ത്തി​ലെ ചില സംഭവങ്ങൾ നമുക്കി​പ്പോൾ പരി​ശോ​ധി​ക്കാം.

4, 5. (എ) പൗലോ​സും സംഘവും ബിഥു​ന്യക്ക്‌ അടു​ത്തെ​ത്തു​മ്പോൾ എന്തു സംഭവി​ക്കു​ന്നു? (ബി) ശിഷ്യ​ന്മാർ എന്തു തീരു​മാ​ന​മെ​ടു​ത്തു, ഫലമെ​ന്താ​യി​രു​ന്നു?

⁴ ഏഷ്യയിൽ പ്രസം​ഗി​ക്കു​ന്ന​തിൽനിന്ന്‌ പരിശു​ദ്ധാ​ത്മാവ്‌ വിലക്കി​യ​തി​നാൽ പൗലോ​സും സംഘവും വടക്കുള്ള ബിഥു​ന്യ​യി​ലെ പട്ടണങ്ങ​ളിൽ പ്രസം​ഗി​ക്കാൻ തീരു​മാ​നി​ച്ചു. അധികം ജനവാ​സ​മി​ല്ലാത്ത ഫ്രുഗ്യ, ഗലാത്യ പ്രദേ​ശ​ങ്ങ​ളി​ലെ കല്ലുപാ​കാത്ത വഴിക​ളി​ലൂ​ടെ ബിഥുന്യ ലക്ഷ്യമാ​ക്കി അവർ ദിവസ​ങ്ങ​ളോ​ളം സഞ്ചരി​ച്ചി​രി​ക്കാം. എന്നാൽ അവർ ബിഥു​ന്യക്ക്‌ അടു​ത്തെ​ത്തി​യ​പ്പോൾ യേശു പരിശു​ദ്ധാ​ത്മാ​വി​നെ ഉപയോ​ഗിച്ച്‌ വീണ്ടും അവരെ തടഞ്ഞു. (പ്രവൃ. 16:6, 7) പൗലോ​സും സംഘവും അപ്പോൾ ആകെ ആശയക്കു​ഴ​പ്പ​ത്തി​ലാ​യി​ട്ടു​ണ്ടാ​കണം. എന്ത്‌ പ്രസം​ഗി​ക്ക​ണ​മെ​ന്നും എങ്ങനെ പ്രസം​ഗി​ക്ക​ണ​മെ​ന്നും അവർക്ക്‌  അറിയാം, എന്നാൽ എവിടെ പ്രസം​ഗി​ക്ക​ണ​മെന്ന്‌ അറിയില്ല. ആദ്യം ഏഷ്യയി​ലേ​ക്കുള്ള വാതി​ലിൽ അവർ മുട്ടി, പക്ഷേ ഫലമു​ണ്ടാ​യില്ല. ഇപ്പോൾ ബിഥു​ന്യ​യി​ലേ​ക്കുള്ള വാതി​ലി​ലും മുട്ടി​നോ​ക്കി, അതും തുറന്നില്ല. എന്നാൽ പൗലോസ്‌ പിന്മാ​റാൻ തയ്യാറ​ല്ലാ​യി​രു​ന്നു. ഏതെങ്കി​ലും ഒരു വാതിൽ തുറന്നു​കി​ട്ടു​ന്ന​തു​വരെ മുട്ടി​ക്കൊ​ണ്ടി​രി​ക്കാൻ അദ്ദേഹം തീരു​മാ​നി​ച്ചു​റ​ച്ചി​രു​ന്നു. ഇപ്പോൾ, തികച്ചും ബുദ്ധി​ശൂ​ന്യ​മെന്നു തോന്നി​യേ​ക്കാ​വുന്ന ഒരു തീരു​മാ​നം അവർ എടുക്കു​ന്നു: ത്രോ​വാ​സി​ലേക്കു പോകുക. അങ്ങനെ അവർ പടിഞ്ഞാ​റേക്കു തിരിഞ്ഞ്‌, പട്ടണങ്ങൾ ഓരോ​ന്നും പിന്നിട്ട്‌ 550 കിലോ​മീ​റ്റർ നടന്ന്‌ അവസാനം മാസി​ഡോ​ണി​യ​യി​ലേ​ക്കുള്ള വാതിൽക്കൽ—ത്രോ​വാസ്‌ തുറമു​ഖത്ത്‌—എത്തുന്നു. (പ്രവൃ. 16:8) ഇപ്പോൾ മൂന്നാ​മ​തൊ​രു വാതി​ലിൽ പൗലോസ്‌ മുട്ടുന്നു. അതാ, ആ വാതിൽ മലർക്കെ തുറക്കു​ന്നു!

⁵ തുടർന്ന്‌ എന്താണു സംഭവി​ച്ച​തെന്ന്‌ ത്രോ​വാ​സിൽവെച്ചു പൗലോ​സി​ന്റെ സംഘ​ത്തോ​ടൊ​പ്പം ചേർന്ന സുവി​ശേഷ എഴുത്തു​കാ​ര​നായ ലൂക്കോസ്‌ വിവരി​ക്കു​ന്നു: “രാത്രി പൗലോ​സിന്‌ ഒരു ദിവ്യ​ദർശനം ഉണ്ടായി. മാസി​ഡോ​ണി​യ​ക്കാ​ര​നായ ഒരാൾ തന്റെ മുന്നിൽനിന്ന്‌, ‘മാസി​ഡോ​ണി​യ​യി​ലേക്കു വന്ന്‌ ഞങ്ങളെ സഹായി​ക്കണേ’ എന്ന്‌ അപേക്ഷി​ക്കു​ന്ന​താ​യി പൗലോസ്‌ കണ്ടു. ഈ ദർശനം ലഭിച്ച​പ്പോൾ, മാസി​ഡോ​ണി​യ​ക്കാ​രോ​ടു സന്തോ​ഷ​വാർത്ത അറിയി​ക്കാൻ ദൈവം ഞങ്ങളെ വിളി​ച്ചി​രി​ക്കു​ന്നു എന്നു ഞങ്ങൾക്കു മനസ്സി​ലാ​യി; ഉടനെ ഞങ്ങൾ അവി​ടേക്കു പുറ​പ്പെട്ടു.” a (പ്രവൃ. 16:9, 10) അങ്ങനെ അവസാനം എവിടെ പ്രസം​ഗി​ക്ക​ണ​മെന്ന്‌ പൗലോ​സി​നു മനസ്സി​ലാ​യി. തന്റെ യാത്ര പാതി​വ​ഴി​യിൽ ഉപേക്ഷി​ക്കാ​തി​രു​ന്ന​തിൽ പൗലോ​സിന്‌ എത്രമാ​ത്രം സന്തോഷം തോന്നി​യി​രി​ക്കണം! ഒട്ടും വൈകാ​തെ, അവർ നാലു​പേ​രും മാസി​ഡോ​ണി​യ​യി​ലേക്കു കപ്പൽക​യറി.

6, 7. (എ) പൗലോ​സി​ന്റെ യാത്ര​യിൽ സംഭവിച്ച കാര്യ​ങ്ങ​ളിൽനി​ന്നും നമുക്ക്‌ എന്തു പഠിക്കാ​നാ​കും? (ബി) പൗലോ​സി​ന്റെ അനുഭവം നമുക്ക്‌ എന്ത്‌ ഉറപ്പാണ്‌ നൽകു​ന്നത്‌?

⁶ ഈ വിവര​ണ​ത്തിൽനിന്ന്‌ എന്തു പാഠമാണ്‌ നമുക്ക്‌ ഉൾക്കൊ​ള്ളാ​നാ​കു​ന്നത്‌? പൗലോസ്‌ ഏഷ്യയി​ലേക്കു യാത്ര​തി​രി​ച്ച​ശേ​ഷം​മാ​ത്ര​മാണ്‌ ദൈവാ​ത്മാവ്‌ ഇടപെ​ട്ടത്‌, പൗലോസ്‌ ബിഥു​ന്യക്ക്‌ അടു​ത്തെ​ത്തി​യ​ശേ​ഷം​മാ​ത്ര​മാണ്‌ യേശു ഇടപെ​ട്ടത്‌, പൗലോസ്‌ ത്രോ​വാ​സിൽ എത്തിയ​ശേ​ഷം​മാ​ത്ര​മാണ്‌ യേശു അദ്ദേഹത്തെ മാസി​ഡോ​ണി​യ​യി​ലേക്കു നയിച്ചത്‌. സഭയുടെ തലയായ യേശു ഇന്ന്‌ നമ്മെ നയിക്കു​ന്ന​തും ഇതേ വിധത്തി​ലാ​യി​രി​ക്കാം.  (കൊലോ. 1:18) ഉദാഹ​ര​ണ​ത്തിന്‌, ഒരു മുൻനി​ര​സേ​വ​ക​നാ​യി സേവി​ക്കു​ന്ന​തി​നെ​യോ രാജ്യ​ഘോ​ഷ​ക​രു​ടെ ആവശ്യം കൂടു​ത​ലുള്ള ഒരു സ്ഥലത്തേക്കു മാറി​ത്താ​മ​സി​ക്കു​ന്ന​തി​നെ​യോ കുറിച്ച്‌ കുറെ​ക്കാ​ല​മാ​യി നാം ചിന്തി​ക്കു​ന്നു​ണ്ടാ​യി​രി​ക്കാം. എന്നിരു​ന്നാ​ലും, നമ്മുടെ ലക്ഷ്യങ്ങ​ളിൽ എത്തി​ച്ചേ​രു​ന്ന​തി​നു​വേണ്ട പടികൾ നാം സ്വീക​രി​ച്ച​ശേ​ഷം​മാ​ത്ര​മാ​യി​രി​ക്കും യേശു ദൈവാ​ത്മാ​വു​മു​ഖാ​ന്തരം നമ്മെ നയിക്കുക. ഉദാഹ​ര​ണ​ത്തിന്‌, ഒരു കാർ ഓടി​ക്കൊ​ണ്ടി​രി​ക്കു​മ്പോൾമാ​ത്രമേ അതിന്റെ ദിശ തിരി​ച്ചു​വി​ടാൻ ഡ്രൈ​വർക്കു കഴിയു​ക​യു​ള്ളൂ. സമാന​മാ​യി, നാം മുന്നോ​ട്ടു നീങ്ങു​ന്നെ​ങ്കിൽ, അതായത്‌ ലാക്കിൽ എത്തി​ച്ചേ​രാൻ ആത്മാർഥ​മാ​യി ശ്രമി​ക്കു​ന്നെ​ങ്കിൽ മാത്രമേ നമ്മുടെ ശുശ്രൂഷ വികസി​പ്പി​ക്കു​ന്ന​തിൽ യേശു നമ്മെ നയിക്കു​ക​യു​ള്ളൂ.

⁷ എന്നാൽ നമ്മുടെ ശ്രമങ്ങൾക്ക്‌ ഉടനടി ഫലം ലഭിക്കു​ന്നി​ല്ലെ​ങ്കി​ലോ? ദൈവാ​ത്മാവ്‌ നമ്മെ നയിക്കു​ന്നി​ല്ലെന്നു കരുതി നാം പിന്മാ​റ​ണ​മോ? പൗലോ​സി​നും ശുശ്രൂ​ഷ​യിൽ തടസ്സങ്ങൾ നേരിട്ടു. എന്നുവ​രി​കി​ലും ഏതെങ്കി​ലു​മൊ​രു വാതിൽ തുറന്നു​കി​ട്ടു​ന്ന​തു​വരെ പൗലോസ്‌ മുട്ടി​ക്കൊ​ണ്ടി​രു​ന്നു. സമാന​മാ​യി നാമും “പ്രവർത്ത​ന​ത്തി​നുള്ള ഒരു വലിയ വാതിൽ” തുറന്നു​കി​ട്ടും​വരെ സ്ഥിരോ​ത്സാ​ഹ​ത്തോ​ടെ പ്രവർത്തി​ക്കേ​ണ്ട​തുണ്ട്‌. അപ്പോൾ നമുക്കും പൗലോ​സി​നെ​പ്പോ​ലെ അനു​ഗ്ര​ഹങ്ങൾ കൊയ്യാ​നാ​കും.—1 കൊരി. 16:9.

8. (എ) ഫിലിപ്പി പട്ടണ​ത്തെ​ക്കു​റി​ച്ചു വിവരി​ക്കുക. (ബി) പൗലോസ്‌ ‘ഒരു പ്രാർഥ​നാ​സ്ഥ​ലത്ത്‌’ പ്രസം​ഗി​ച്ച​തു​കൊണ്ട്‌ എന്തു ഫലമു​ണ്ടാ​യി?

⁸ മാസി​ഡോ​ണി​യ​യിൽ എത്തി​ച്ചേർന്ന പൗലോ​സും സംഘവും അവി​ടെ​യുള്ള ഫിലിപ്പി പട്ടണത്തി​ലേക്കു പോയി. ഫിലി​പ്പി​യി​ലെ ആളുകൾ തങ്ങൾ റോമൻ പൗരന്മാ​രാ​ണെ​ന്ന​തിൽ അഭിമാ​നം​കൊ​ണ്ടി​രു​ന്നു. ഉദ്യോ​ഗ​ത്തിൽനി​ന്നു വിരമിച്ച്‌ അവിടെ താമസ​മാ​ക്കി​യി​രുന്ന റോമൻ സൈനി​കരെ സംബന്ധി​ച്ചി​ട​ത്തോ​ളം മാസി​ഡോ​ണി​യ​യി​ലെ റോം ആയിരു​ന്നു ഫിലിപ്പി. നഗരക​വാ​ട​ത്തി​നു വെളി​യിൽ നദിക്ക​രി​കെ “ഒരു പ്രാർഥ​നാ​സ്ഥ​ല​മു​ണ്ടെന്ന്‌” മിഷന​റി​മാർ കരുതി. b ശബത്തു ദിവസം അവിടം സന്ദർശിച്ച അവർക്ക്‌ ദൈവത്തെ ആരാധി​ക്കാൻ കൂടി​വ​ന്നി​രുന്ന അനേകം സ്‌ത്രീ​കളെ കാണാ​നാ​യി. അവർ അവി​ടെ​യി​രുന്ന്‌ ആ സ്‌ത്രീ​ക​ളോ​ടു സംസാ​രി​ക്കാൻ തുടങ്ങി. ലുദിയ എന്നു​പേ​രുള്ള ഒരു സ്‌ത്രീ​യും അക്കൂട്ട​ത്തി​ലു​ണ്ടാ​യി​രു​ന്നു. എല്ലാം കേട്ടു​കൊണ്ട്‌ അവിടെ ഇരിക്കു​ക​യാ​യി​രുന്ന ‘ലുദി​യ​യു​ടെ ഹൃദയം യഹോവ തുറന്നു.’ കേട്ട കാര്യ​ങ്ങ​ളാൽ പ്രചോ​ദി​ത​യായ ലുദിയ തന്റെ ഭവനത്തി​ലു​ള്ള​വ​രോ​ടൊ​പ്പം സ്‌നാ​ന​മേറ്റു. പിന്നീട്‌ പൗലോ​സി​നെ​യും കൂടെ​യു​ള്ള​വ​രെ​യും തന്റെ വീട്ടിൽ വന്നുതാ​മ​സി​ക്കാൻ ലുദിയ നിർബ​ന്ധി​ക്കു​ക​യും അതിന്‌ അവർ സമ്മതി​ക്കു​ക​യും ചെയ്‌തു. c—പ്രവൃ. 16:13-15.

9. ഇന്ന്‌ പലരും പൗലോ​സി​ന്റെ മാതൃക പിൻപ​റ്റി​യി​രി​ക്കു​ന്നത്‌ എങ്ങനെ, അവർ എന്ത്‌ അനു​ഗ്ര​ഹങ്ങൾ ആസ്വദി​ക്കു​ന്നു?

⁹ ലുദി​യ​യു​ടെ സ്‌നാനം ആ മിഷന​റി​മാർക്കു കൈവ​രു​ത്തിയ സന്തോ​ഷ​ത്തെ​ക്കു​റി​ച്ചൊ​ന്നു ചിന്തി​ക്കുക! ‘മാസി​ഡോ​ണി​യ​യി​ലേക്കു വരാനുള്ള’ ക്ഷണം സ്വീക​രി​ച്ച​തിൽ പൗലോസ്‌ എത്ര സന്തോ​ഷി​ച്ചു​കാ​ണും! ദൈവ​ഭ​ക്ത​രായ ആ സ്‌ത്രീ​ക​ളു​ടെ പ്രാർഥ​ന​യ്‌ക്ക്‌ ഉത്തരമ​രു​ളാൻ യഹോവ തന്നെയും തന്റെ സഹകാ​രി​ക​ളെ​യും ഉപയോ​ഗി​ച്ച​തിൽ അദ്ദേഹം തീർച്ച​യാ​യും നന്ദിയു​ള്ളവൻ ആയിരു​ന്നി​രി​ക്കണം! സമാന​മാ​യി ഇന്നും അനേകം സഹോ​ദ​രീ​സ​ഹോ​ദ​ര​ന്മാർ—ചെറു​പ്പ​ക്കാ​രും പ്രായ​മാ​യ​വ​രും ഏകാകി​ക​ളും വിവാ​ഹി​ത​രും—രാജ്യ​പ്ര​ചാ​ര​ക​രു​ടെ ആവശ്യം അധിക​മുള്ള സ്ഥലങ്ങളി​ലേക്ക്‌ മാറി​ത്താ​മ​സി​ച്ചി​രി​ക്കു​ന്നു. അവർക്ക്‌ പ്രയാ​സ​ങ്ങ​ളും ബുദ്ധി​മു​ട്ടു​ക​ളും നേരി​ടേ​ണ്ടി​വ​രാ​റുണ്ട്‌ എന്നതു സത്യം​തന്നെ. എന്നാൽ ലുദി​യ​യെ​പ്പോ​ലുള്ള ആളുകൾ ബൈബിൾസ​ത്യം സ്വീക​രി​ക്കു​ന്നതു കാണു​മ്പോൾ ലഭിക്കുന്ന സന്തോ​ഷ​ത്തോ​ടുള്ള താരത​മ്യ​ത്തിൽ അവ ഒന്നുമല്ല. ജീവി​ത​ത്തിൽ  ചില പൊരു​ത്ത​പ്പെ​ടു​ത്ത​ലു​കൾ വരുത്തി​ക്കൊണ്ട്‌ ആവശ്യ​മേ​റെ​യുള്ള ഒരു പ്രദേ​ശ​ത്തേക്കു കടന്നു​ചെ​ല്ലാൻ നിങ്ങൾ തയ്യാറാ​ണോ? അങ്ങനെ​യെ​ങ്കിൽ നിങ്ങൾക്ക്‌ ധാരാളം അനു​ഗ്ര​ഹങ്ങൾ ആസ്വദി​ക്കാ​നാ​കും. 20-നുമേൽ പ്രായ​മുള്ള ഏരൺ എന്ന യുവസ​ഹോ​ദ​രന്റെ കാര്യ​മെ​ടു​ക്കുക. മധ്യ അമേരി​ക്ക​യി​ലുള്ള ഒരു രാജ്യ​ത്തേക്കു മാറി​ത്താ​മ​സിച്ച ഏരൺ പറയുന്നു: “മറ്റൊരു ദേശത്തു സേവി​ക്കു​ന്നത്‌ ആത്മീയ​മാ​യി വളരാ​നും യഹോ​വ​യോ​ടു കൂടുതൽ അടുക്കാ​നും എന്നെ സഹായി​ച്ചി​രി​ക്കു​ന്നു. വയൽസേ​വ​ന​ത്തിൽനി​ന്നു ലഭിക്കുന്ന സന്തോഷം പറഞ്ഞറി​യി​ക്കാ​നാ​വില്ല, എനിക്ക്‌ ഇപ്പോൾ എട്ടു ബൈബിൾപ​ഠ​ന​മുണ്ട്‌!” ആവശ്യ​മേ​റെ​യുള്ള സ്ഥലങ്ങളി​ലേക്കു മാറി​ത്താ​മ​സി​ച്ചി​രി​ക്കുന്ന അനേകർക്കും ഇതുത​ന്നെ​യാണ്‌ പറയാ​നു​ള്ളത്‌.

10. പൗലോ​സി​ന്റെ​യും സഹകാ​രി​ക​ളു​ടെ​യും പ്രവർത്ത​ന​ത്തി​നെ​തി​രെ എതിർപ്പ്‌ ഇളക്കി​വി​ടാ​നാ​യി ഭൂതങ്ങൾ കരുക്കൾ നീക്കി​യത്‌ എങ്ങനെ?

¹⁰ സാത്താ​നും അവന്റെ ഭൂതങ്ങ​ളും സ്വൈ​ര​വി​ഹാ​രം നടത്തി​യി​രുന്ന ഒരു പ്രദേ​ശ​ത്താണ്‌ ഇപ്പോൾ സന്തോ​ഷ​വാർത്ത വേരു​പി​ടി​ക്കു​ന്നത്‌. അതു കണ്ട്‌ സാത്താൻ അങ്ങേയറ്റം ക്ഷുഭി​ത​നാ​യി​ത്തീർന്നി​രി​ക്കണം. അതു​കൊ​ണ്ടു​തന്നെ പൗലോ​സി​ന്റെ​യും സഹകാ​രി​ക​ളു​ടെ​യും പ്രവർത്ത​ന​ത്തി​നെ​തി​രെ എതിർപ്പ്‌ ഇളക്കി​വി​ടാ​നാ​യി ഭൂതങ്ങൾ പ്രവർത്തി​ച്ച​തിൽ അതിശ​യ​മില്ല. പൗലോ​സും സംഘവും പ്രാർഥ​നാ​സ്ഥലം സന്ദർശി​ക്കു​മ്പോ​ഴെ​ല്ലാം, ഭാവി​ഫലം പറഞ്ഞു​കൊണ്ട്‌ യജമാ​ന​ന്മാർക്കു വളരെ​യ​ധി​കം ആദായം ഉണ്ടാക്കി​ക്കൊ​ടു​ത്തി​രുന്ന ഭൂതബാ​ധി​ത​യായ ഒരു പെൺകു​ട്ടി, “ഇവർ അത്യു​ന്ന​ത​നായ ദൈവ​ത്തി​ന്റെ ദാസന്മാർ; രക്ഷയ്‌ക്കുള്ള വഴി നിങ്ങളെ അറിയി​ക്കു​ന്നവർ” എന്നു വിളി​ച്ചു​പ​റ​ഞ്ഞു​കൊണ്ട്‌ അവരുടെ പിന്നാലെ ചെല്ലു​മാ​യി​രു​ന്നു. ആ പെൺകു​ട്ടി​യു​ടെ പ്രവച​ന​ങ്ങ​ളും പൗലോ​സി​ന്റെ പഠിപ്പി​ക്ക​ലു​ക​ളും ഒരേ ഉറവിൽനി​ന്നാ​ണെന്ന ധാരണ കേൾവി​ക്കാ​രിൽ ഉളവാ​ക്കാൻ വേണ്ടി​യാ​യി​രു​ന്നി​രി​ക്കണം ഭൂതം ആ പെൺകു​ട്ടി​യെ​ക്കൊണ്ട്‌ അങ്ങനെ പറയി​ച്ചി​രു​ന്നത്‌. ക്രിസ്‌തു​വി​ന്റെ യഥാർഥ ശിഷ്യ​ന്മാ​രിൽനിന്ന്‌ ആളുക​ളു​ടെ ശ്രദ്ധ അകറ്റാ​നാ​യി​രു​ന്നു ഈ തന്ത്രം. എന്നാൽ ഭൂതത്തെ പുറത്താ​ക്കി​ക്കൊണ്ട്‌ പൗലോസ്‌ അവളുടെ വായടച്ചു.—പ്രവൃ. 16:16-18.

11. ദാസി​പ്പെൺകു​ട്ടി​യിൽനി​ന്നു ഭൂതത്തെ പുറത്താ​ക്കി​യ​തി​നെ​ത്തു​ടർന്ന്‌ പൗലോ​സി​നും ശീലാ​സി​നും എന്തു സംഭവി​ച്ചു?

¹¹ ആ ദാസി​പ്പെൺകു​ട്ടി​യു​ടെ യജമാ​ന​ന്മാർ തങ്ങളുടെ വരുമാ​ന​മാർഗം നിലച്ചു​പോ​യെന്നു കണ്ട്‌ കോപാ​കു​ല​രാ​യി. അവർ പൗലോ​സി​നെ​യും ശീലാ​സി​നെ​യും വലിച്ചി​ഴച്ച്‌ മജിസ്‌​റ്റ്രേ​ട്ടു​മാ​രു​ടെ (റോമൻ പ്രതി​നി​ധി​ക​ളായ അധികാ​രി​ക​ളു​ടെ) കോട​തി​കൂ​ടി​യി​രുന്ന ചന്തസ്ഥലത്ത്‌ കൊണ്ടു​വന്നു. അധികാ​രി​ക​ളു​ടെ മുൻവി​ധി​യും ദേശസ്‌നേ​ഹ​വും മുത​ലെ​ടു​ത്തു​കൊണ്ട്‌ ആ യജമാ​ന​ന്മാർ ഇങ്ങനെ പറഞ്ഞു: ‘റോമാ​ക്കാ​രായ നമുക്ക്‌ അംഗീ​ക​രി​ക്കാ​നാ​കാത്ത ആചാരങ്ങൾ പഠിപ്പി​ച്ചു​കൊണ്ട്‌ ജൂതന്മാ​രായ ഇവർ നമ്മുടെ നഗരത്തിൽ പ്രശ്‌ന​ങ്ങ​ളു​ണ്ടാ​ക്കു​ന്നു.’ അതു കേൾക്കേണ്ട താമസം, ചന്തസ്ഥല​ത്തു​ണ്ടാ​യി​രുന്ന “ജനം ഒന്നടങ്കം അവർക്കെ​തി​രെ (പൗലോ​സി​നും ശീലാ​സി​നും എതിരെ) ഇളകി.” അധികാ​രി​കൾ അവരെ “വടി​കൊണ്ട്‌ അടിക്കാൻ” കല്പിക്കുകയും ചെയ്‌തു. തുടർന്ന്‌ അവരെ വലിച്ചി​ഴച്ച്‌ ജയിലി​ലേക്കു കൊണ്ടു​പോ​യി. അടി​കൊ​ണ്ടു മുറി​വേറ്റ അവരെ ജയില​ധി​കാ​രി ജയിലി​ന്റെ ഉള്ളറയി​ലാ​ക്കി അവരുടെ കാലുകൾ തടിവി​ല​ങ്ങിൽ ഇട്ട്‌ പൂട്ടി. (പ്രവൃ. 16:19-24) ആ അറയുടെ വാതി​ല​ട​ഞ്ഞ​പ്പോൾ പൗലോ​സി​നും ശീലാ​സി​നും പരസ്‌പരം കാണാൻപോ​ലും കഴിയാ​ത്തത്ര കൂരി​രു​ട്ടാ​യി​രു​ന്നി​രി​ക്കണം അവിടെ. എന്നാൽ യഹോവ അവരെ കാണു​ന്നു​ണ്ടാ​യി​രു​ന്നു.—സങ്കീ. 139:12.

12. (എ) ആദിമ​കാല ക്രിസ്‌ത്യാ​നി​കൾ ഉപദ്ര​വത്തെ എങ്ങനെ​യാണ്‌ വീക്ഷി​ച്ചത്‌, എന്തു​കൊണ്ട്‌? (ബി) സാത്താ​നും അവന്റെ പിണി​യാ​ളു​ക​ളും ഇന്നും ഏതു തരത്തി​ലുള്ള എതിർപ്പു​കൾ കൊണ്ടു​വ​രു​ന്നു?

¹² ‘അവർ നിങ്ങളെ ഉപദ്ര​വി​ക്കും’ എന്ന്‌ യേശു തന്റെ അനുഗാ​മി​ക​ളോ​ടു വർഷങ്ങൾക്കു​മുമ്പ്‌ പറഞ്ഞി​രു​ന്നു. (യോഹ. 15:20) അതു​കൊണ്ട്‌ എതിർപ്പു​കൾ നേരി​ടാൻ തയ്യാറാ​യാണ്‌ പൗലോ​സും സംഘവും മാസി​ഡോ​ണി​യ​യി​ലേക്കു കടന്നു​ചെ​ന്നത്‌. ഉപദ്രവം  ആഞ്ഞടി​ച്ച​പ്പോൾ അവർ അതിനെ കണ്ടത്‌ യഹോ​വ​യു​ടെ അംഗീ​കാ​ര​മി​ല്ലാ​യ്‌മ​യു​ടെ സൂചന​യാ​യി​ട്ടല്ല, സാത്താന്റെ ക്രോ​ധ​ത്തി​ന്റെ ഒരു പ്രകട​ന​മാ​യി​ട്ടാണ്‌. ഫിലി​പ്പി​യിൽ ഉപയോ​ഗി​ച്ച​തു​പോ​ലുള്ള തന്ത്രങ്ങ​ളാണ്‌ ഇന്നും സാത്താന്റെ പിണി​യാ​ളു​കൾ പ്രയോ​ഗി​ക്കു​ന്നത്‌. നമ്മെ എതിർക്കുന്ന ചിലർ സ്‌കൂ​ളി​ലും ജോലി​സ്ഥ​ല​ത്തും ഒക്കെ നുണ​പ്ര​ചാ​ര​ണങ്ങൾ നടത്തി​ക്കൊണ്ട്‌ നമു​ക്കെ​തി​രെ എതിർപ്പി​നു തിരി​കൊ​ളു​ത്തു​ന്നു. ചില രാജ്യ​ങ്ങ​ളിൽ മതമണ്ഡ​ല​ത്തിൽനി​ന്നുള്ള എതിരാ​ളി​കൾ ഫലത്തിൽ ഇങ്ങനെ പറഞ്ഞു​കൊണ്ട്‌ കോട​തി​ക​ളിൽ നമു​ക്കെ​തി​രെ ആരോ​പ​ണങ്ങൾ ഉന്നയി​ക്കു​ന്നു: ‘“പാരമ്പര്യ വിശ്വാ​സി​ക​ളായ” നമുക്ക്‌ അംഗീ​ക​രി​ക്കാ​നാ​കാത്ത ആചാരങ്ങൾ പഠിപ്പി​ച്ചു​കൊണ്ട്‌ ഈ സാക്ഷികൾ പ്രശ്‌ന​മു​ണ്ടാ​ക്കു​ന്നു.’ ചില സ്ഥലങ്ങളിൽ നമ്മുടെ സഹാരാ​ധകർ മർദന​ത്തിന്‌ ഇരയാ​കു​ക​യും തടവി​ലാ​ക്ക​പ്പെ​ടു​ക​യും ചെയ്യുന്നു. എന്നാൽ യഹോവ ഇതെല്ലാം കാണു​ന്നുണ്ട്‌.—1 പത്രോ. 3:12.

13. “രക്ഷ ലഭിക്കാൻ ഞാൻ എന്തു ചെയ്യണം” എന്ന്‌ ജയില​ധി​കാ​രി ചോദി​ക്കാൻ ഇടയായത്‌ എങ്ങനെ?

¹³ അന്നത്തെ ആ സംഭവ​ങ്ങ​ളു​ടെ ഫലമാ​യു​ണ്ടായ വേദന​യിൽനി​ന്നും നടുക്ക​ത്തിൽനി​ന്നും പൂർണ​മാ​യി മുക്തരാ​കാൻ പൗലോ​സി​നും ശീലാ​സി​നും കുറച്ചു​സ​മയം വേണ്ടി​വ​ന്നി​രി​ക്കണം. എന്നിരു​ന്നാ​ലും അർധരാ​ത്രി​യോ​ടെ അവർ ‘പ്രാർഥി​ക്കാ​നും ദൈവത്തെ പാടി സ്‌തു​തി​ക്കാ​നും’ തുടങ്ങി. പെട്ടെന്ന്‌ ജയിലി​ന്റെ അടിസ്ഥാ​നം ഇളകു​മാറ്‌ വലി​യൊ​രു ഭൂകമ്പ​മു​ണ്ടാ​യി. ഉറക്കമു​ണർന്ന ജയില​ധി​കാ​രി കണ്ടത്‌ ജയിലി​ന്റെ വാതി​ലു​കൾ തുറന്നു​കി​ട​ക്കു​ന്ന​താണ്‌. തടവു​കാർ രക്ഷപ്പെ​ട്ടെ​ന്നു​തന്നെ അയാൾ വിചാ​രി​ച്ചു. താൻ ശിക്ഷി​ക്ക​പ്പെ​ടു​മ​ല്ലോ എന്നു കരുതി അയാൾ തന്റെ “വാൾ ഊരി സ്വയം കുത്തി മരിക്കാൻ ഒരുങ്ങി.” അപ്പോൾ പൗലോസ്‌ ഉറക്കെ വിളി​ച്ചു​പ​റഞ്ഞു: “അരുത്‌, സാഹസ​മൊ​ന്നും കാണി​ക്ക​രുത്‌; ഞങ്ങളെ​ല്ലാം ഇവി​ടെ​ത്ത​ന്നെ​യുണ്ട്‌.” ഭയന്നു​വി​റച്ച്‌ ജയില​ധി​കാ​രി അവരോട്‌, “യജമാ​ന​ന്മാ​രേ, രക്ഷ ലഭിക്കാൻ ഞാൻ എന്തു ചെയ്യണം” എന്നു ചോദി​ച്ചു. പൗലോ​സി​നും ശീലാ​സി​നും അദ്ദേഹത്തെ രക്ഷിക്കാൻ സാധി​ക്കി​ല്ലാ​യി​രു​ന്നു, യേശു​വി​നു​മാ​ത്രമേ അതിനു കഴിയു​മാ​യി​രു​ന്നു​ള്ളൂ. അതു​കൊണ്ട്‌ അവർ ഇങ്ങനെ മറുപടി പറഞ്ഞു: “കർത്താ​വായ യേശു​വിൽ വിശ്വ​സി​ക്കുക; താങ്കൾക്കു . . . രക്ഷ ലഭിക്കും.”—പ്രവൃ. 16:25-31.

14. (എ) പൗലോ​സും ശീലാ​സും ജയില​ധി​കാ​രി​യെ എങ്ങനെ സഹായി​ച്ചു? (ബി) ഉപദ്ര​വങ്ങൾ സന്തോ​ഷ​ത്തോ​ടെ സഹിച്ച​തി​ന്റെ ഫലമായി പൗലോ​സി​നും ശീലാ​സി​നും എന്ത്‌ അനു​ഗ്രഹം ലഭിച്ചു?

¹⁴ ജയില​ധി​കാ​രി ആത്മാർഥ​മാ​യാ​ണോ അപ്രകാ​രം ചോദി​ച്ചത്‌? പൗലോ​സിന്‌ അദ്ദേഹ​ത്തി​ന്റെ ആത്മാർഥ​ത​യിൽ സംശയ​മി​ല്ലാ​യി​രു​ന്നു. തിരു​വെ​ഴു​ത്തു​ക​ളെ​ക്കു​റിച്ച്‌ അറിവി​ല്ലാത്ത ജനതക​ളിൽപ്പെട്ട ഒരാളാ​യി​രു​ന്നു അദ്ദേഹം. ഒരു ക്രിസ്‌ത്യാ​നി​യാ​യി​ത്തീ​ര​ണ​മെ​ങ്കിൽ ആദ്യം അദ്ദേഹം അടിസ്ഥാന തിരു​വെ​ഴു​ത്തു​സ​ത്യ​ങ്ങൾ പഠിക്കു​ക​യും അവ അംഗീ​ക​രി​ക്കു​ക​യും ചെയ്യണ​മാ​യി​രു​ന്നു. അതു​കൊണ്ട്‌ പൗലോ​സും ശീലാ​സും സമയ​മെ​ടുത്ത്‌ “യഹോ​വ​യു​ടെ വചനം” അദ്ദേഹ​ത്തി​നു വിശദീ​ക​രി​ച്ചു കൊടു​ത്തു. തിരു​വെ​ഴു​ത്തു​ക​ളെ​ക്കു​റിച്ച്‌ പഠിപ്പി​ക്കു​ന്ന​തിൽ മുഴു​കിയ അവർ മർദന​മേ​റ്റ​തി​ന്റെ വേദന കുറച്ചു സമയ​ത്തേ​ക്കെ​ങ്കി​ലും മറന്നി​രി​ക്കണം. എന്നാൽ ജയില​ധി​കാ​രി അവരുടെ പുറത്തെ ആഴമേ​റിയ മുറി​വു​കൾ ശ്രദ്ധി​ക്കു​ക​യും അവ കഴുകി വൃത്തി​യാ​ക്കു​ക​യും ചെയ്‌തു. ഒട്ടും​താ​മ​സി​യാ​തെ അദ്ദേഹ​വും വീട്ടി​ലുള്ള എല്ലാവ​രും സ്‌നാ​ന​മേറ്റു. ഉപദ്ര​വങ്ങൾ സന്തോ​ഷ​ത്തോ​ടെ സഹിച്ച​തിന്‌ പൗലോ​സി​നും ശീലാ​സി​നും എത്ര വലിയ അനു​ഗ്ര​ഹ​മാ​ണു ലഭിച്ചത്‌!—പ്രവൃ. 16:32-34.

15. (എ) ഇന്ന്‌ അനേകം സാക്ഷി​ക​ളും പൗലോ​സി​ന്റെ​യും ശീലാ​സി​ന്റെ​യും മാതൃക എങ്ങനെ​യാണ്‌ പിൻപ​റ്റി​യി​രി​ക്കു​ന്നത്‌? (ബി) നമ്മുടെ പ്രദേ​ശ​ത്തു​ള്ള​വരെ നാം വീണ്ടും​വീ​ണ്ടും സന്ദർശി​ക്കേ​ണ്ടത്‌ എന്തു​കൊണ്ട്‌?

¹⁵ പൗലോ​സി​നെ​യും ശീലാ​സി​നെ​യും പോലെ ഇന്നും യഹോ​വ​യു​ടെ സാക്ഷി​ക​ളായ അനേകർ വിശ്വാ​സ​ത്തെ​പ്രതി തടവി​ലാ​യി​രി​ക്കെ സന്തോ​ഷ​വാർത്ത പ്രസം​ഗി​ക്കു​ക​യും നല്ല ഫലങ്ങൾ കൊയ്യു​ക​യും ചെയ്‌തി​ട്ടുണ്ട്‌. നമ്മുടെ വേലയ്‌ക്ക്‌ നിരോ​ധ​ന​മു​ണ്ടാ​യി​രുന്ന ഒരു രാജ്യത്തെ കാര്യം​തന്നെ എടുക്കുക. ഒരു സമയത്ത്‌ അവി​ടെ​യു​ണ്ടാ​യി​രുന്ന 40 ശതമാനം  സാക്ഷി​ക​ളും സത്യം പഠിച്ചത്‌ ജയിലി​ലാ​യി​രി​ക്കെ​യാണ്‌. (യശ. 54:17) ജയില​ധി​കാ​രി​യു​ടെ കാര്യ​ത്തിൽ, ഭൂകമ്പ​മു​ണ്ടാ​യ​ശേ​ഷം​മാ​ത്ര​മാണ്‌ അദ്ദേഹം സഹായം ആവശ്യ​പ്പെ​ട്ട​തെന്ന്‌ ഓർക്കുക. സമാന​മാ​യി, ജീവി​തത്തെ പിടി​ച്ചു​ല​യ്‌ക്കുന്ന ഏതെങ്കി​ലും സംഭവത്തെ തുടർന്നാ​യി​രി​ക്കാം, മുമ്പൊ​രി​ക്ക​ലും സന്തോ​ഷ​വാർത്ത​യ്‌ക്കു ചെവി​കൊ​ടു​ത്തി​ട്ടി​ല്ലാത്ത ചിലർ സുവി​ശേഷം ശ്രദ്ധി​ക്കാൻ തയ്യാറാ​കു​ന്നത്‌. മടുത്തു​പോ​കാ​തെ, നമ്മുടെ പ്രദേ​ശ​ത്തു​ള്ള​വരെ വീണ്ടും​വീ​ണ്ടും സന്ദർശി​ക്കു​ന്ന​തി​ലൂ​ടെ അവരെ സഹായി​ക്കാൻ എപ്പോ​ഴും തയ്യാറാ​ണെന്നു കാണി​ക്കു​ക​യാ​യി​രി​ക്കും നാം.

16. പൗലോ​സി​നെ​യും ശീലാ​സി​നെ​യും അടിപ്പിച്ച്‌ ജയിലി​ലാ​ക്കി​യ​തി​ന്റെ പിറ്റേ ദിവസം കാര്യങ്ങൾ നേരെ തിരി​ഞ്ഞത്‌ എങ്ങനെ?

¹⁶ പൗലോ​സി​നെ​യും ശീലാ​സി​നെ​യും അടിപ്പിച്ച്‌ ജയിലി​ലാ​ക്കി​യ​തി​ന്റെ പിറ്റേന്ന്‌ രാവിലെ, അവരെ വിട്ടയ​യ്‌ക്കാൻ അധികാ​രി​കൾ ഉത്തരവി​ട്ടു. എന്നാൽ പൗലോ​സി​ന്റെ പ്രതി​ക​രണം ഇങ്ങനെ​യാ​യി​രു​ന്നു: “റോമാ​ക്കാ​രായ ഞങ്ങളെ അവർ വിചാരണ ചെയ്യാതെ പരസ്യ​മാ​യി അടിപ്പിച്ച്‌ ജയിലി​ലാ​ക്കി; എന്നിട്ട്‌ ഇപ്പോൾ രഹസ്യ​മാ​യി വിട്ടയ​യ്‌ക്കു​ന്നോ? അതു പറ്റില്ല, അവർതന്നെ വന്ന്‌ ഞങ്ങളെ പുറത്ത്‌ കൊണ്ടു​പോ​കട്ടെ.” പൗലോ​സും ശീലാ​സും റോമൻ പൗരന്മാ​രാ​ണെന്നു കേട്ട​പ്പോൾ, അവരുടെ പൗരാ​വ​കാ​ശം തങ്ങൾ മാനി​ച്ചില്ല എന്ന കാരണ​ത്താൽ അധികാ​രി​കൾ ഭയപ്പെട്ടു. d അതോടെ കാര്യങ്ങൾ നേരെ തിരിഞ്ഞു. ശിഷ്യ​ന്മാ​രെ പരസ്യ​മാ​യി അടിപ്പിച്ച അധികാ​രി​കൾ ഇപ്പോൾ അവരോട്‌ പരസ്യ​മാ​യി ക്ഷമാപണം നടത്തേണ്ട സ്ഥിതി​യി​ലാ​യി. ഫിലിപ്പി വിട്ടു​പോ​ക​ണ​മെന്ന്‌ അവർ പൗലോ​സി​നോ​ടും ശീലാ​സി​നോ​ടും അപേക്ഷി​ച്ചു. അവർ അതിനു സമ്മതി​ച്ചെ​ങ്കി​ലും പുതു​താ​യി സത്യം സ്വീക​രിച്ച ശിഷ്യ​ന്മാ​രെ പ്രോ​ത്സാ​ഹി​പ്പി​ച്ച​ശേ​ഷ​മാണ്‌ അവർ അവിടം വിട്ട്‌ പോയത്‌.

17. പൗലോ​സി​ന്റെ​യും ശീലാ​സി​ന്റെ​യും സഹിഷ്‌ണുത നിരീ​ക്ഷിച്ച പുതിയ ശിഷ്യ​ന്മാർക്ക്‌ സുപ്ര​ധാ​ന​മായ ഏതു പാഠം പഠിക്കാൻ കഴിഞ്ഞു?

¹⁷ പൗലോ​സും ശീലാ​സും റോമൻ പൗരന്മാ​രാ​ണെന്ന്‌ അധികാ​രി​കൾ നേര​ത്തേ​തന്നെ അറിയു​ക​യും അവരുടെ അവകാശം മാനി​ക്കു​ക​യും ചെയ്‌തി​രു​ന്നെ​ങ്കിൽ സാധ്യ​ത​യ​നു​സ​രിച്ച്‌ അവർക്ക്‌ അടി​യേൽക്കേണ്ടി വരില്ലാ​യി​രു​ന്നു. (പ്രവൃ. 22:25, 26) എന്നാൽ അത്‌, ക്രിസ്‌തു​വി​നു​വേണ്ടി കഷ്ടം സഹിക്കു​ന്ന​തിൽനിന്ന്‌ ഒഴിവാ​കാൻ ആ പുരു​ഷ​ന്മാർ തങ്ങളുടെ അവകാശം ഉപയോ​ഗ​പ്പെ​ടു​ത്തി എന്ന ധാരണ ഫിലി​പ്പി​യി​ലുള്ള ശിഷ്യ​ന്മാർക്കു നൽകു​മാ​യി​രു​ന്നു. റോമൻ പൗരന്മാ​ര​ല്ലാത്ത ശിഷ്യ​ന്മാ​രു​ടെ വിശ്വാ​സത്തെ അത്‌ എങ്ങനെ ബാധി​ക്കു​മാ​യി​രു​ന്നു? പ്രഹര​മേൽക്കു​ന്ന​തിൽനിന്ന്‌ അവർക്കു നിയമ​സം​ര​ക്ഷണം ലഭിക്കു​മാ​യി​രു​ന്നി​ല്ല​ല്ലോ. അതു​കൊണ്ട്‌ പൗലോ​സും ശീലാ​സും ഉപദ്രവം സഹിച്ചു​കൊണ്ട്‌ ക്രിസ്‌തു​ശി​ഷ്യ​ന്മാർക്ക്‌ ഉപദ്ര​വ​ത്തി​ന്മ​ധ്യേ സഹിച്ചു​നിൽക്കാൻ കഴിയു​മെന്ന്‌ സ്വന്തം മാതൃ​ക​യാൽ കാണി​ച്ചു​കൊ​ടു​ത്തു. എന്നാൽ പിന്നീട്‌ പൗലോ​സും ശീലാ​സും തങ്ങളുടെ പൗരാ​വ​കാ​ശം അംഗീ​ക​രി​ച്ചു​കി​ട്ടാൻ ആവശ്യ​പ്പെ​ട്ട​തു​മൂ​ലം, നിയമ​വി​രു​ദ്ധ​മാ​യി പ്രവർത്തിച്ച ആ അധികാ​രി​കൾ പൊതു​ജ​ന​സ​മക്ഷം തങ്ങളുടെ തെറ്റു സമ്മതി​ക്കാൻ നിർബ​ന്ധി​ത​രാ​യി. ക്രിസ്‌ത്യാ​നി​കൾക്ക്‌ എതി​രെ​യുള്ള ഉപദ്ര​വങ്ങൾ തടയാ​നും ഭാവി​യിൽ ഇതു​പോ​ലെ​യുള്ള ആക്രമ​ണങ്ങൾ നേരി​ടു​ന്ന​പക്ഷം ഒരു പരിധി​വ​രെ​യുള്ള നിയമ​സം​ര​ക്ഷണം ഉറപ്പു​വ​രു​ത്താ​നും അത്‌ ഇടയാക്കി.

18. (എ) ഇന്നത്തെ ക്രിസ്‌തീയ മേൽവി​ചാ​ര​ക​ന്മാർ പൗലോ​സി​ന്റെ മാതൃക പിൻപ​റ്റു​ന്നത്‌ എങ്ങനെ? (ബി) ഇന്ന്‌ നാം ‘സന്തോ​ഷ​വാർത്ത​യ്‌ക്കു​വേണ്ടി വാദിച്ച്‌ അതു നിയമ​പ​ര​മാ​യി സ്ഥാപി​ച്ചെ​ടു​ക്കു​ന്നത്‌’ എങ്ങനെ?

¹⁸ ഇന്ന്‌ ക്രിസ്‌തീയ സഭയിലെ മേൽവി​ചാ​ര​ക​ന്മാ​രും തങ്ങളുടെ മാതൃ​ക​യാൽ സഭാം​ഗ​ങ്ങളെ നയിക്കു​ന്നു. സഹവി​ശ്വാ​സി​കൾ ചെയ്യാൻ പ്രതീ​ക്ഷി​ക്കുന്ന കാര്യങ്ങൾ ചെയ്‌തു​കാ​ണി​ക്കാൻ ക്രിസ്‌തീയ ഇടയന്മാർ ഒരുക്ക​മു​ള്ള​വ​രാണ്‌. നമ്മുടെ പ്രയോ​ജ​ന​ത്തി​നാ​യി നിയമ​പ​ര​മായ  അവകാ​ശങ്ങൾ എപ്പോൾ, എങ്ങനെ ഉപയോ​ഗി​ക്ക​ണ​മെന്ന്‌ പൗലോ​സി​നെ​പ്പോ​ലെ നാം ശ്രദ്ധാ​പൂർവം തൂക്കി​നോ​ക്കു​ന്നു. നമ്മുടെ ആരാധ​ന​യ്‌ക്കുള്ള തടസ്സങ്ങൾ നീങ്ങി​ക്കി​ട്ടാ​നാ​യി ആവശ്യ​മെ​ങ്കിൽ നാം പ്രാ​ദേ​ശി​ക​ത​ല​ത്തി​ലോ ദേശീ​യ​ത​ല​ത്തി​ലോ അന്താരാ​ഷ്‌ട്ര​ത​ല​ത്തി​ലോ ഉള്ള കോട​തി​കളെ സമീപി​ക്കു​ന്നു. നമ്മുടെ ലക്ഷ്യം സാമൂ​ഹിക പരിഷ്‌ക​ര​ണമല്ല, പകരം ഫിലി​പ്പി​യി​ലെ തടവിൽനിന്ന്‌ മോചി​ത​നാ​യി ഏതാണ്ട്‌ പത്തു വർഷത്തി​നു​ശേഷം പൗലോസ്‌ അവിടത്തെ സഭയ്‌ക്ക്‌ എഴുതി​യ​തു​പോ​ലെ ‘സന്തോ​ഷ​വാർത്ത​യ്‌ക്കു​വേണ്ടി വാദിച്ച്‌ അതു നിയമ​പ​ര​മാ​യി സ്ഥാപി​ച്ചെ​ടു​ക്കുക’ എന്നതാണ്‌. (ഫിലി. 1:7) എന്നാൽ കോട​തി​വി​ധി​കൾ എന്തുത​ന്നെ​യാ​യാ​ലും പൗലോ​സി​നെ​യും സഹകാ​രി​ക​ളെ​യും പോലെ ദൈവാ​ത്മാവ്‌ നയിക്കു​ന്നി​ട​ത്തെ​ല്ലാം “സന്തോ​ഷ​വാർത്ത അറിയി​ക്കാൻ” നാം ദൃഢചി​ത്ത​രാണ്‌.—പ്രവൃ. 16:10.