1-3. (എ) പൗലോ​സി​ന്റെ പുതിയ സഞ്ചാര കൂട്ടാളി ആരാണ്‌, അദ്ദേഹ​ത്തെ​ക്കു​റിച്ച്‌ നമുക്ക്‌ എന്തറി​യാം? (ബി) ഈ അധ്യാ​യ​ത്തി​ലൂ​ടെ നാം എന്താണു പഠിക്കാൻപോ​കു​ന്നത്‌?

 ആ ദുർഘ​ട​പാ​ത​യി​ലൂ​ടെ മുന്നോ​ട്ടു നീങ്ങവെ, പൗലോസ്‌ അപ്പോ​സ്‌തലൻ ചിന്താ​ഗ്ര​സ്‌ത​നാ​യി തന്നോ​ടൊ​പ്പ​മുള്ള ആ യുവാ​വി​നെ നോക്കു​ന്നു. തിമൊ​ഥെ​യൊസ്‌ എന്നാണ്‌ ആ യുവാ​വി​ന്റെ പേര്‌. ആരോ​ഗ്യ​വും ചുറു​ചു​റു​ക്കു​മുള്ള ആ ചെറു​പ്പ​ക്കാ​രന്‌ സാധ്യ​ത​യ​നു​സ​രിച്ച്‌ 20-നോട​ടു​ത്തോ അതിൽ അൽപ്പം കൂടു​ത​ലോ പ്രായ​മുണ്ട്‌. ഓരോ കാലടി വെക്കു​മ്പോ​ഴും തിമൊ​ഥെ​യൊസ്‌ തന്റെ പ്രിയ​പ്പെ​ട്ട​വ​രിൽനിന്ന്‌ അകലേക്കു നീങ്ങു​ക​യാണ്‌. അന്നു വൈകു​ന്നേ​ര​മാ​യ​പ്പോ​ഴേ​ക്കും തിമൊ​ഥെ​യൊസ്‌ സ്വന്തം നാടായ ലുസ്‌ത്ര​യും അതു​പോ​ലെ ഇക്കോ​ന്യ​യും ഒക്കെ പിന്നിട്ട്‌ വളരെ അകലെ എത്തിയി​രു​ന്നു. ഈ യാത്ര​യിൽ എന്തൊക്കെ പ്രതീ​ക്ഷി​ക്കാം? ഇതു തന്റെ രണ്ടാം മിഷനറി പര്യട​ന​മാ​യ​തി​നാൽ പൗലോ​സിന്‌ അതേക്കു​റിച്ച്‌ ഒരു ഏകദേശ ധാരണ​യുണ്ട്‌. നിരവധി പ്രശ്‌ന​ങ്ങ​ളും അപകട​ങ്ങ​ളും അഭിമു​ഖീ​ക​രി​ക്കേ​ണ്ടി​വ​രു​മെന്ന്‌ പൗലോ​സിന്‌ അറിയാം. എന്നാൽ അതെല്ലാം നേരി​ടാൻ ഈ ചെറു​പ്പ​ക്കാ​രന്‌ കഴിയു​മോ?

² തിമൊ​ഥെ​യൊ​സി​ന്റെ കാര്യ​ത്തിൽ പൗലോ​സിന്‌ നല്ല വിശ്വാ​സ​മുണ്ട്‌, ഒരുപക്ഷേ ആ ചെറു​പ്പ​ക്കാ​രനു തന്നെക്കു​റിച്ച്‌ ഉള്ളതി​ലു​മ​ധി​കം. അടുത്ത​കാ​ല​ത്തു​ണ്ടായ ചില സംഭവങ്ങൾ നല്ലൊരു സഞ്ചാര കൂട്ടാളി ഉണ്ടായി​രി​ക്കേ​ണ്ട​തി​ന്റെ ആവശ്യം പൗലോ​സി​നെ കൂടു​ത​ലാ​യി ബോധ്യ​പ്പെ​ടു​ത്തി​യി​രി​ക്കു​ന്നു. സഭകൾ സന്ദർശിച്ച്‌ അവയെ ശക്തി​പ്പെ​ടു​ത്തു​ക​യെന്ന വേല ഭംഗി​യാ​യി ചെയ്യു​ന്ന​തിന്‌ സഞ്ചാര ശുശ്രൂ​ഷ​ക​രു​ടെ ഭാഗത്ത്‌ അഭി​പ്രായ ഐക്യ​വും നല്ല നിശ്ചയ​ദാർഢ്യ​വും ആവശ്യ​മാ​ണെന്ന്‌ പൗലോ​സിന്‌ അറിയാം. എന്തു​കൊ​ണ്ടാ​യി​രി​ക്കും പൗലോസ്‌ അങ്ങനെ വിചാ​രി​ക്കു​ന്നത്‌? മുമ്പ്‌ തനിക്കും ബർന്നബാ​സി​നും ഇടയി​ലു​ണ്ടായ അഭി​പ്രാ​യ​ഭി​ന്നത തങ്ങൾ വേർപി​രി​യു​ന്ന​തി​ലേ​ക്കു​പോ​ലും നയിച്ചു​വെന്ന കാര്യം അദ്ദേഹം ഓർത്തി​രി​ക്കാം.

³ അഭി​പ്രാ​യ​വ്യ​ത്യാ​സങ്ങൾ ഏറ്റവും മെച്ചമാ​യി എങ്ങനെ പരിഹ​രി​ക്കാം എന്നതി​നെ​ക്കു​റിച്ച്‌ ഈ അധ്യാ​യ​ത്തി​ലൂ​ടെ നാം പഠിക്കു​ന്ന​താണ്‌. കൂടാതെ, പൗലോസ്‌ തന്റെ സഞ്ചാര കൂട്ടാ​ളി​യാ​യി തിമൊ​ഥെ​യൊ​സി​നെ തിര​ഞ്ഞെ​ടു​ത്ത​തി​ന്റെ കാരണ​ത്തെ​ക്കു​റി​ച്ചും അതു​പോ​ലെ ഇന്ന്‌ സർക്കിട്ട്‌ മേൽവി​ചാ​ര​ക​ന്മാർ ചെയ്യുന്ന വില​യേ​റിയ സേവന​ത്തെ​ക്കു​റി​ച്ചും നാം മനസ്സി​ലാ​ക്കും.

4. തന്റെ രണ്ടാം മിഷനറി പര്യട​ന​ത്തിൽ എന്തു ചെയ്യാൻ പൗലോസ്‌ നിശ്ചയി​ച്ചി​രു​ന്നു?

⁴ നാലു സഹോ​ദ​ര​ന്മാ​രു​ടെ—പൗലോസ്‌, ബർന്നബാസ്‌, യൂദാസ്‌, ശീലാസ്‌—ഒരു പ്രതി​നി​ധി​സം​ഘം, പരി​ച്ഛേ​ദ​ന​യെ​ക്കു​റി​ച്ചുള്ള ഭരണസം​ഘ​ത്തി​ന്റെ തീരു​മാ​നം അറിയി​ച്ചു​കൊണ്ട്‌ അന്ത്യോ​ക്യ സഭയെ ബലപ്പെ​ടു​ത്തി​യ​തി​നെ​ക്കു​റിച്ച്‌ കഴിഞ്ഞ അധ്യാ​യ​ത്തിൽ നാം കണ്ടിരു​ന്ന​ല്ലോ. തുടർന്ന്‌ പൗലോസ്‌ എന്താണു ചെയ്‌തത്‌? ഒരു പുതിയ സന്ദർശന പരിപാ​ടിക്ക്‌ പൗലോസ്‌ പദ്ധതി​യി​ട്ടു. പൗലോസ്‌ ബർന്നബാ​സി​നെ സമീപിച്ച്‌ ഇങ്ങനെ പറഞ്ഞു:  “വരൂ, നമ്മൾ യഹോ​വ​യു​ടെ വചനം അറിയിച്ച നഗരങ്ങ​ളി​ലെ​ല്ലാം മടങ്ങി​ച്ചെന്ന്‌ സഹോ​ദ​ര​ന്മാർ എങ്ങനെ​യി​രി​ക്കു​ന്നെന്ന്‌ അന്വേ​ഷി​ക്കാം.” (പ്രവൃ. 15:36) പുതു​താ​യി ക്രിസ്‌ത്യാ​നി​ക​ളാ​യി​ത്തീർന്ന​വ​രു​ടെ അടുക്കൽ ഒരു സൗഹൃ​ദ​സ​ന്ദർശനം നടത്തു​ന്ന​തി​നെ​ക്കു​റി​ച്ചല്ല പൗലോസ്‌ ഇവിടെ പറയു​ന്നത്‌. പൗലോ​സി​ന്റെ രണ്ടാം മിഷനറി പര്യട​ന​ത്തി​ന്റെ ഉദ്ദേശ്യം എന്തായി​രു​ന്നു​വെന്ന്‌ പ്രവൃ​ത്തി​ക​ളു​ടെ പുസ്‌തകം വ്യക്തമാ​ക്കു​ന്നുണ്ട്‌: ഒന്നാമ​താ​യി, ഭരണസം​ഘ​ത്തി​ന്റെ തീർപ്പു​കൾ തുടർന്നും സഭകളെ അറിയി​ക്കുക. (പ്രവൃ. 16:4) രണ്ടാമത്‌, ഒരു സഞ്ചാര മേൽവി​ചാ​ര​ക​നെ​ന്ന​നി​ല​യിൽ, വിശ്വാ​സ​ത്തിൽ ഉറപ്പു​ള്ള​വ​രാ​യി​ത്തീ​രാൻ സഹോ​ദ​ര​ങ്ങളെ സഹായി​ച്ചു​കൊണ്ട്‌ സഭകളെ ആത്മീയ​മാ​യി ബലപ്പെ​ടു​ത്തുക. (റോമ. 1:11, 12) അപ്പോ​സ്‌ത​ല​ന്മാർ വെച്ച ഈ മാതൃക ഇന്ന്‌ യഹോ​വ​യു​ടെ സാക്ഷി​ക​ളു​ടെ സംഘടന പിൻപ​റ്റു​ന്നത്‌ എങ്ങനെ​യാണ്‌?

5. ആധുനി​ക​കാല ഭരണസം​ഘം സഭകൾക്ക്‌ മാർഗ​നിർദേ​ശ​വും പ്രോ​ത്സാ​ഹ​ന​വും നൽകു​ന്നത്‌ എങ്ങനെ?

⁵ ഇന്ന്‌ തന്റെ സഭയെ നയിക്കു​ന്ന​തി​നാ​യി ക്രിസ്‌തു യഹോ​വ​യു​ടെ സാക്ഷി​ക​ളു​ടെ ഭരണസം​ഘത്തെ ഉപയോ​ഗി​ക്കു​ന്നു. വിശ്വ​സ്‌ത​രായ ഈ അഭിഷിക്ത സഹോ​ദ​ര​ന്മാർ കത്തുകൾ, ഇലക്‌​ട്രോ​ണിക്‌ രൂപത്തി​ലും അച്ചടിച്ച രൂപത്തി​ലും ഉള്ള പ്രസി​ദ്ധീ​ക​ര​ണങ്ങൾ, യോഗങ്ങൾ തുടങ്ങി​യ​വ​യി​ലൂ​ടെ ലോക​മെ​ങ്ങു​മുള്ള സഭകൾക്ക്‌ മാർഗ​നിർദേ​ശ​വും പ്രോ​ത്സാ​ഹ​ന​വും നൽകുന്നു. ഓരോ സഭയു​മാ​യും അടുത്ത ബന്ധം പുലർത്താ​നും ഭരണസം​ഘം ശ്രമി​ക്കു​ന്നു. അവർ അതു ചെയ്യു​ന്നത്‌ സഞ്ചാര മേൽവി​ചാ​ര​ക​ന്മാ​രി​ലൂ​ടെ​യാണ്‌. ലോക​മെ​ങ്ങും സർക്കിട്ട്‌ മേൽവി​ചാ​ര​ക​ന്മാ​രാ​യി സേവി​ക്കു​ന്ന​തി​നു യോഗ്യ​രായ ആയിര​ക്ക​ണ​ക്കിന്‌ മൂപ്പന്മാ​രെ ഭരണസം​ഘം നേരിട്ട്‌ നിയമി​ച്ചി​ട്ടുണ്ട്‌.

6, 7. സർക്കിട്ട്‌ മേൽവി​ചാ​ര​ക​ന്മാ​രു​ടെ ചില ഉത്തരവാ​ദി​ത്വ​ങ്ങൾ എന്തെല്ലാം?

⁶ തങ്ങൾ സന്ദർശി​ക്കുന്ന സഭകളി​ലുള്ള എല്ലാവർക്കും വ്യക്തി​ഗ​ത​മായ ശ്രദ്ധയും ആത്മീയ പ്രോ​ത്സാ​ഹ​ന​വും നൽകാൻ ആധുനി​ക​കാല സഞ്ചാര മേൽവി​ചാ​ര​ക​ന്മാർ പ്രത്യേ​കം ശ്രദ്ധി​ക്കു​ന്നു. പൗലോ​സി​നെ​പ്പോ​ലെ​യുള്ള ആദിമ​കാല ക്രിസ്‌ത്യാ​നി​ക​ളു​ടെ മാതൃക പിൻപ​റ്റി​ക്കൊ​ണ്ടാണ്‌ അവർ അതു ചെയ്യു​ന്നത്‌. പൗലോസ്‌ തന്റെ സഹമേൽവി​ചാ​ര​കനെ ഉദ്‌ബോ​ധി​പ്പി​ച്ചത്‌ എങ്ങനെ​യെന്നു നോക്കുക: “ദൈവ​വ​ചനം പ്രസം​ഗി​ക്കുക. അനുകൂ​ല​കാ​ല​ത്തും പ്രതി​കൂ​ല​കാ​ല​ത്തും ചുറു​ചു​റു​ക്കോ​ടെ അതു ചെയ്യുക. വിദഗ്‌ധ​മായ പഠിപ്പി​ക്കൽരീ​തി ഉപയോ​ഗിച്ച്‌ അങ്ങേയറ്റം ക്ഷമയോ​ടെ ശാസി​ക്കു​ക​യും താക്കീതു ചെയ്യു​ക​യും പ്രോ​ത്സാ​ഹി​പ്പി​ക്കു​ക​യും ചെയ്യുക. . . . സുവി​ശേ​ഷ​കന്റെ ജോലി ചെയ്യുക.”—2 തിമൊ. 4:2, 5.

⁷ ആ വാക്കു​കൾക്കു ചേർച്ച​യിൽ സർക്കിട്ട്‌ മേൽവി​ചാ​ര​ക​ന്മാർ—വിവാ​ഹി​ത​രാ​ണെ​ങ്കിൽ അവരുടെ ഭാര്യ​മാ​രും—പ്രചാ​ര​ക​രോ​ടൊ​പ്പം വയൽശു​ശ്രൂ​ഷ​യു​ടെ വിവിധ വശങ്ങളിൽ പങ്കെടു​ക്കു​ന്നു. അവർ തീക്ഷ്‌ണ​ത​യുള്ള ശുശ്രൂ​ഷ​ക​രും വിദഗ്‌ധ​രായ അധ്യാ​പ​ക​രു​മാണ്‌. അവരുടെ ആ തീക്ഷ്‌ണ​ത​യും വൈദ​ഗ്‌ധ്യ​വും പ്രചാ​ര​ക​രു​ടെ​മേൽ ഒരു ക്രിയാ​ത്മക സ്വാധീ​നം ചെലു​ത്തു​ന്നു. (റോമ. 12:11; 2 തിമൊ. 2:15) സർക്കിട്ട്‌ വേലയി​ലുള്ള സഹോ​ദ​രങ്ങൾ ആത്മത്യാ​ഗ​പ​ര​മായ സ്‌നേഹം കാണി​ക്കു​ന്ന​തി​ലും ഉത്തമ മാതൃ​ക​ക​ളാണ്‌. അവർ മനസ്സോ​ടെ മറ്റുള്ള​വരെ സേവി​ക്കു​ന്നു. പ്രതി​കൂല കാലാ​വ​സ്ഥ​യെ​യും നേരി​ടേണ്ടി വന്നേക്കാ​വുന്ന അപകട​ങ്ങ​ളെ​യും ഗണ്യമാ​ക്കാ​തെ​യാണ്‌ അവർ ഈ വേലയിൽ തുടരു​ന്നത്‌. (ഫിലി. 2:3, 4) ബൈബി​ള​ധി​ഷ്‌ഠിത പ്രസം​ഗങ്ങൾ നടത്തി​ക്കൊ​ണ്ടും അവർ സഹോ​ദ​ര​ങ്ങളെ പ്രോ​ത്സാ​ഹി​പ്പി​ക്കു​ക​യും പഠിപ്പി​ക്കു​ക​യും ഉദ്‌ബോ​ധി​പ്പി​ക്കു​ക​യും ചെയ്യുന്നു. സർക്കിട്ട്‌ മേൽവി​ചാ​ര​ക​ന്മാ​രു​ടെ ജീവി​ത​ഗതി നിരീ​ക്ഷി​ക്കു​ക​യും അവരുടെ വിശ്വാ​സം അനുക​രി​ക്കു​ക​യും ചെയ്യു​ന്ന​തിൽനിന്ന്‌ മുഴു​സ​ഭ​യും പ്രയോ​ജ​നം​നേ​ടു​ന്നു.—എബ്രാ. 13:7.

8. പൗലോ​സി​ന്റെ നിർദേ​ശ​ത്തോട്‌ ബർന്നബാസ്‌ എങ്ങനെ പ്രതി​ക​രി​ച്ചു?

⁸ സഹോ​ദ​ര​ങ്ങളെ സന്ദർശി​ക്കാ​നുള്ള പൗലോ​സി​ന്റെ നിർദേശം ബർന്നബാ​സി​നു സ്വീകാ​ര്യ​മാ​യി​രു​ന്നു.  (പ്രവൃ. 15:36) അവർ ഇരുവ​രും ഒരുമ​യോ​ടെ സഞ്ചാര കൂട്ടാ​ളി​ക​ളാ​യി പ്രവർത്തി​ച്ചി​ട്ടുണ്ട്‌. മാത്രമല്ല, സന്ദർശി​ക്കാ​നി​രുന്ന പ്രദേ​ശ​ങ്ങ​ളെ​യും ആളുക​ളെ​യും കുറിച്ച്‌ അവർക്ക്‌ നല്ലൊരു ധാരണ​യു​മു​ണ്ടാ​യി​രു​ന്നു. (പ്രവൃ. 13:2–14:28) അതു​കൊണ്ട്‌ ഒരുമിച്ച്‌ ഈ ദൗത്യ​ത്തി​നാ​യി പുറ​പ്പെ​ടു​ന്നത്‌ യുക്തി​സ​ഹ​വും പ്രാ​യോ​ഗി​ക​വു​മാ​യി അവർക്കു തോന്നി​യി​രി​ക്കണം. എന്നാൽ ഒരു പ്രശ്‌നം ഉയർന്നു​വന്നു. പ്രവൃ​ത്തി​കൾ 15:37 അതേക്കു​റി​ച്ചു പറയുന്നു: “മർക്കോസ്‌ എന്ന്‌ അറിയ​പ്പെ​ട്ടി​രുന്ന യോഹ​ന്നാ​നെ​യും കൂടെ​ക്കൊ​ണ്ടു​പോ​ക​ണ​മെന്നു ബർന്നബാസ്‌ നിർബന്ധം പിടിച്ചു.” ബർന്നബാസ്‌ ഇക്കാര്യ​ത്തിൽ വെറുതെ ഒരു നിർദേ​ശം​വെ​ക്കു​ക​യാ​യി​രു​ന്നില്ല. മറിച്ച്‌ ഈ മിഷനറി പര്യട​ന​ത്തിൽ ബന്ധുവായ മർക്കോ​സി​നെ കൂടെ​ക്കൊ​ണ്ടു​പോ​ക​ണ​മെന്ന്‌ അദ്ദേഹം ‘നിർബന്ധം പിടി​ക്കു​ക​യാ​യി​രു​ന്നു.’

9. പൗലോസ്‌ ബർന്നബാ​സി​നോ​ടു വിയോ​ജി​ക്കാൻ കാരണ​മെന്ത്‌?

⁹ പൗലോസ്‌ അതി​നോ​ടു യോജി​ച്ചില്ല. എന്തായി​രു​ന്നു കാരണം? വിവരണം പറയുന്നു: “പംഫു​ല്യ​യിൽവെച്ച്‌ അവരെ വിട്ട്‌ പോകു​ക​യും പ്രവർത്ത​ന​ത്തിൽ പങ്കു​ചേ​രാ​തി​രി​ക്കു​ക​യും ചെയ്‌ത മർക്കോ​സി​നെ കൂടെ​ക്കൊ​ണ്ടു​പോ​കാൻ പൗലോ​സി​നു താത്‌പ​ര്യ​മി​ല്ലാ​യി​രു​ന്നു.” (പ്രവൃ. 15:38) പൗലോ​സി​നോ​ടും ബർന്നബാ​സി​നോ​ടും ഒപ്പം ആദ്യ മിഷനറി പര്യട​ന​ത്തിൽ മർക്കോ​സും ഉണ്ടായി​രു​ന്നെ​ങ്കി​ലും അത്‌ പൂർത്തീ​ക​രി​ക്കു​ന്ന​തു​വരെ മർക്കോസ്‌ അവരോ​ടൊ​പ്പം തുടർന്നില്ല. (പ്രവൃ. 12:25; 13:13) ആ പര്യട​ന​ത്തി​നി​ട​യിൽ പംഫു​ല്യ​യിൽവെച്ച്‌ മർക്കോസ്‌ തന്റെ നിയമനം ഉപേക്ഷിച്ച്‌ യരുശ​ലേ​മി​ലെ വീട്ടി​ലേക്കു മടങ്ങി​പ്പോ​യി​രു​ന്നു. മർക്കോസ്‌ അങ്ങനെ ചെയ്‌ത​തി​ന്റെ കാരണം ബൈബിൾ വ്യക്തമാ​ക്കു​ന്നില്ല. എന്നാൽ പൗലോസ്‌ അപ്പോ​സ്‌തലൻ അതിനെ നിരു​ത്ത​ര​വാ​ദി​ത്വ​പ​ര​മായ ഒരു നടപടി​യാ​യി​ട്ടാ​ണു കണ്ടത്‌. അതു​കൊണ്ട്‌ മർക്കോ​സി​നെ എത്ര​ത്തോ​ളം ആശ്രയി​ക്കാം എന്നതിൽ അദ്ദേഹ​ത്തി​നു സംശയം ഉണ്ടായി​രു​ന്നി​രി​ക്കണം.

10. പൗലോ​സും ബർന്നബാ​സും തമ്മിലു​ണ്ടായ തർക്കം എന്തി​ലേക്കു നയിച്ചു, അനന്തര​ഫലം എന്തായി​രു​ന്നു?

¹⁰ പൗലോസ്‌ തന്റെ തീരു​മാ​ന​ത്തിൽ ഉറച്ചു​നി​ന്നു. എന്നാൽ വിട്ടു​കൊ​ടു​ക്കാൻ ബർന്നബാ​സും തയ്യാറാ​യില്ല. “ഇതിന്റെ പേരിൽ അവർ തമ്മിൽ വലി​യൊ​രു വഴക്ക്‌ ഉണ്ടായി. ഒടുവിൽ രണ്ടു പേരും രണ്ടു വഴിക്കു പോയി” എന്ന്‌ പ്രവൃ​ത്തി​കൾ 15:39 പറയുന്നു. ബർന്നബാസ്‌, മർക്കോ​സി​നെ​യും കൂട്ടി തന്റെ സ്വന്തനാ​ടായ സൈ​പ്ര​സി​ലേക്കു പോയി. പൗലോസ്‌ തന്റെ പദ്ധതി​ക​ളു​മാ​യി മുന്നോ​ട്ടു​പോ​കു​ക​യും ചെയ്‌തു. വിവരണം പറയുന്നു: “പൗലോസ്‌ ശീലാ​സി​നെ​യും കൂട്ടി യാത്ര തിരിച്ചു. സഹോ​ദ​ര​ന്മാർ പൗലോ​സി​നെ യഹോ​വ​യു​ടെ കൈയിൽ ഭരമേൽപ്പിച്ച്‌ യാത്ര​യാ​ക്കി.” (പ്രവൃ. 15:40) അവർ ഒരുമിച്ച്‌ “സിറി​യ​യി​ലൂ​ടെ​യും കിലി​ക്യ​യി​ലൂ​ടെ​യും സഞ്ചരിച്ച്‌ സഭകളെ ശക്തി​പ്പെ​ടു​ത്തി.”—പ്രവൃ. 15:41.

11. നമ്മെ വേദനി​പ്പിച്ച ഒരാളു​മാ​യുള്ള ബന്ധത്തിൽ സ്ഥായി​യായ വിള്ളൽ ഉണ്ടാകാ​തി​രി​ക്കാൻ ഏതെല്ലാം ഗുണങ്ങൾ അനിവാ​ര്യ​മാണ്‌?

¹¹ ഈ വിവരണം നമ്മുടെ സ്വന്തം അപൂർണ​ത​യെ​ക്കു​റിച്ച്‌ നമ്മെ ഓർമ​പ്പെ​ടു​ത്തി​യേ​ക്കാം. ഭരണസം​ഘ​ത്തി​ന്റെ പ്രത്യേക പ്രതി​നി​ധി​ക​ളാ​യി വർത്തി​ച്ച​വ​രാ​യി​രു​ന്നു പൗലോ​സും ബർന്നബാ​സും. പൗലോ​സാ​കട്ടെ, ആ ഭരണസം​ഘ​ത്തി​ലെ ഒരു അംഗമാ​യി​ത്തീ​രു​ക​പോ​ലും ചെയ്‌തി​രി​ക്കണം. എന്നിരു​ന്നാ​ലും ഈ പ്രത്യേക സാഹച​ര്യ​ത്തിൽ അവർ ഇരുവ​രും തങ്ങളുടെ അപൂർണ​ത​യ്‌ക്ക്‌ വശംവ​ദ​രാ​യി. ആകട്ടെ, തങ്ങൾക്കി​ട​യിൽ ഉണ്ടായ ഈ അകൽച്ച എക്കാല​വും തുടരാൻ അവർ അനുവ​ദി​ച്ചോ? അപൂർണ​രാ​യി​രു​ന്നെ​ങ്കി​ലും അവർ ഇരുവ​രും താഴ്‌മ​യു​ള്ള​വ​രാ​യി​രു​ന്നു, ക്രിസ്‌തു​വി​ന്റെ മാനസി​ക​ഭാ​വ​മു​ള്ളവർ. പിന്നീട്‌ അവർ സഹോ​ദ​ര​സ്‌നേ​ഹ​വും ക്ഷമിക്കാ​നുള്ള മനസ്സൊ​രു​ക്ക​വും കാണി​ച്ചു​വെ​ന്ന​തി​നു സംശയ​മില്ല. (എഫെ. 4:1-3) കാലാ​ന്ത​ര​ത്തിൽ പൗലോ​സും മർക്കോ​സും മറ്റു ദിവ്യാ​ധി​പത്യ നിയമ​ന​ങ്ങ​ളിൽ ഒരുമി​ച്ചു പ്രവർത്തി​ക്കു​ന്ന​താ​യി നാം കാണു​ന്നുണ്ട്‌. a—കൊലോ. 4:10.

12. പൗലോ​സി​നെ​യും ബർന്നബാ​സി​നെ​യും അനുക​രി​ച്ചു​കൊണ്ട്‌ ഇന്നത്തെ മേൽവി​ചാ​ര​ക​ന്മാർ ഏതു ഗുണങ്ങൾ പ്രകട​മാ​ക്കണം?

 ¹² ദേഷ്യം​കൊ​ണ്ടു പൊട്ടി​ത്തെ​റി​ക്കു​ന്നത്‌ ബർന്നബാ​സി​ന്റെ​യോ പൗലോ​സി​ന്റെ​യോ സ്വഭാ​വ​മാ​യി​രു​ന്നില്ല. സ്‌നേ​ഹ​വും ഔദാ​ര്യ​വും ഉള്ളവനാ​യി​രു​ന്നു ബർന്നബാസ്‌. യോ​സേഫ്‌ എന്ന യഥാർഥ പേര്‌ വിളി​ക്കു​ന്ന​തി​നു പകരം, അപ്പോ​സ്‌ത​ല​ന്മാർ അദ്ദേഹത്തെ “ആശ്വാ​സ​പു​ത്രൻ” എന്നർഥ​മുള്ള ബർന്നബാസ്‌ എന്നു വിളി​ച്ചി​രു​ന്നു എന്നതു​തന്നെ കാണി​ക്കു​ന്നത്‌ അതാണ്‌. (പ്രവൃ. 4:37) ആർദ്ര​ത​യും സൗമ്യ​ത​യും ഉള്ളവനാ​യി​ട്ടാണ്‌ പൗലോ​സും അറിയ​പ്പെ​ട്ടി​രു​ന്നത്‌. (1 തെസ്സ. 2:7, 8) ഇന്ന്‌ സർക്കിട്ട്‌ മേൽവി​ചാ​ര​ക​ന്മാർ ഉൾപ്പെടെ എല്ലാ ക്രിസ്‌തീയ മേൽവി​ചാ​ര​ക​ന്മാ​രും പൗലോ​സി​നെ​യും ബർന്നബാ​സി​നെ​യും പോലെ താഴ്‌മ കാണി​ക്കാ​നും സഹമൂ​പ്പ​ന്മാ​രോ​ടും മറ്റു സഭാം​ഗ​ങ്ങ​ളോ​ടും ആർദ്ര​ത​യോ​ടെ ഇടപെ​ടാ​നും എപ്പോ​ഴും ശ്രമി​ക്കേ​ണ്ട​താണ്‌.—1 പത്രോ. 5:2, 3.

13, 14. (എ) തിമൊ​ഥെ​യൊസ്‌ ആരായി​രു​ന്നു, പൗലോസ്‌ എപ്പോ​ഴാ​യി​രി​ക്കാം തിമൊ​ഥെ​യൊ​സി​നെ ആദ്യമാ​യി കണ്ടത്‌? (ബി) പൗലോസ്‌ തിമൊ​ഥെ​യൊ​സി​നെ പ്രത്യേ​കം ശ്രദ്ധി​ച്ചത്‌ എന്തു​കൊ​ണ്ടാ​യി​രു​ന്നു? (സി) തിമൊ​ഥെ​യൊ​സിന്‌ എന്തു നിയമനം ലഭിച്ചു?

¹³ രണ്ടാം മിഷനറി പര്യട​ന​ത്തി​ന്റെ ഭാഗമാ​യി പൗലോസ്‌ റോമൻ സംസ്ഥാ​ന​മായ ഗലാത്യ സന്ദർശി​ച്ചു. അവിടെ ചില സഭകൾ ഉണ്ടായി​രു​ന്നു. പിന്നീട്‌ “പൗലോസ്‌ ദർബ്ബെ​യി​ലും പിന്നെ ലുസ്‌ത്ര​യി​ലും എത്തി.” വിവരണം തുടർന്ന്‌ പറയുന്നു: “അവിടെ തിമൊ​ഥെ​യൊസ്‌ എന്നൊരു ശിഷ്യ​നു​ണ്ടാ​യി​രു​ന്നു. തിമൊ​ഥെ​യൊ​സി​ന്റെ അമ്മ വിശ്വാ​സി​യായ ഒരു ജൂതസ്‌ത്രീ​യും അപ്പൻ ഗ്രീക്കു​കാ​ര​നും ആയിരു​ന്നു.”—പ്രവൃ. 16:1. b

¹⁴ തെളി​വ​നു​സ​രിച്ച്‌, ഏകദേശം എ.ഡി. 47-ൽ പൗലോസ്‌ ആദ്യമാ​യി ഈ പ്രദേ​ശത്തു വന്നപ്പോൾ തിമൊ​ഥെ​യൊ​സി​ന്റെ കുടും​ബത്തെ പരിച​യ​പ്പെ​ട്ടി​രി​ക്കണം. ഇപ്പോൾ രണ്ടുമൂ​ന്നു വർഷത്തി​നു​ശേഷം തന്റെ രണ്ടാം സന്ദർശ​ന​ത്തിൽ പൗലോസ്‌ തിമൊ​ഥെ​യൊ​സി​നെ പ്രത്യേ​കം ശ്രദ്ധി​ക്കു​ന്നു. എന്തു​കൊ​ണ്ടാ​ണത്‌? കാരണം, “സഹോ​ദ​ര​ന്മാർക്കു തിമൊ​ഥെ​യൊ​സി​നെ​ക്കു​റിച്ച്‌ വളരെ നല്ല അഭി​പ്രാ​യ​മാ​യി​രു​ന്നു.” സ്വന്തം പട്ടണത്തി​ലുള്ള സഹോ​ദ​ര​ന്മാർക്ക്‌ തിമൊ​ഥെ​യൊസ്‌ പ്രിയ​ങ്ക​ര​നാ​യി​രു​ന്നു എന്നു മാത്രമല്ല അയൽസ​ഭ​യി​ലും തിമൊ​ഥെ​യൊ​സി​നു നല്ലൊരു പേരു​ണ്ടാ​യി​രു​ന്നു. ലുസ്‌ത്ര​യി​ലും ഏതാണ്ട്‌ 30 കിലോ​മീ​റ്റർ അകലെ​യുള്ള ഇക്കോ​ന്യ​യി​ലും ഉള്ള സഹോ​ദ​ര​ന്മാർക്ക്‌ തിമൊ​ഥെ​യൊ​സി​നെ​ക്കു​റി​ച്ചു നല്ലതു​മാ​ത്രമേ പറയാ​നു​ണ്ടാ​യി​രു​ന്നു​ള്ളു​വെന്ന്‌ വിവരണം പറയുന്നു. (പ്രവൃ. 16:2) പരിശു​ദ്ധാ​ത്മാ​വി​ന്റെ മാർഗ​നിർദേ​ശ​ത്തിൻകീ​ഴിൽ മൂപ്പന്മാർ തിമൊ​ഥെ​യൊ​സി​നെ ഭാരിച്ച ഒരു ഉത്തരവാ​ദി​ത്വം ഭരമേൽപ്പി​ച്ചു. എന്തായി​രു​ന്നു അത്‌? ഒരു സഞ്ചാര ശുശ്രൂ​ഷകൻ എന്നനി​ല​യിൽ പൗലോ​സി​നെ​യും ശീലാ​സി​നെ​യും സഹായി​ക്കുക!—പ്രവൃ. 16:3.

15, 16. തിമൊ​ഥെ​യൊ​സിന്‌ നല്ലൊരു പേര്‌ സമ്പാദി​ക്കാ​നാ​യത്‌ എങ്ങനെ?

¹⁵ വളരെ ചെറു​പ്പ​ത്തിൽത്തന്നെ തിമൊ​ഥെ​യൊ​സിന്‌ എങ്ങനെ​യാണ്‌ ഇത്ര നല്ലൊരു പേര്‌ സമ്പാദി​ക്കാ​നാ​യത്‌? തിമൊ​ഥെ​യൊ​സി​ന്റെ ബുദ്ധി​സാ​മർഥ്യ​മോ ആകാര​മോ കഴിവു​ക​ളോ നിമി​ത്ത​മാ​യി​രു​ന്നോ അത്‌? ഇത്തരം കാര്യ​ങ്ങൾക്കാണ്‌ മനുഷ്യർ പലപ്പോ​ഴും കൂടുതൽ പ്രാധാ​ന്യം കല്പിക്കുന്നത്‌. പ്രവാ​ച​ക​നായ ശമു​വേൽപോ​ലും ഒരിക്കൽ പുറമേ കാണുന്ന കാര്യ​ങ്ങ​ളാൽ വളരെ​യ​ധി​കം സ്വാധീ​നി​ക്ക​പ്പെട്ടു. എന്നാൽ യഹോവ ശമു​വേ​ലി​നെ പിൻവ​രു​ന്ന​പ്ര​കാ​രം ഓർമ​പ്പെ​ടു​ത്തി: “മനുഷ്യൻ കാണു​ന്ന​തു​പോ​ലെയല്ല ദൈവം കാണു​ന്നത്‌. കണ്ണിനു കാണാ​നാ​കു​ന്നതു മാത്രം മനുഷ്യൻ കാണുന്നു. യഹോ​വ​യോ ഹൃദയ​ത്തിന്‌ ഉള്ളിലു​ള്ളതു കാണുന്നു.” (1 ശമു. 16:7) കഴിവു​ക​ളോ പ്രാപ്‌തി​ക​ളോ അല്ല,  തിമൊ​ഥെ​യൊ​സി​ന്റെ ആന്തരിക ഗുണങ്ങ​ളാണ്‌ സഹവി​ശ്വാ​സി​കൾക്കി​ട​യിൽ തിമൊ​ഥെ​യൊ​സി​നു നല്ലൊരു പേര്‌ നേടി​ക്കൊ​ടു​ത്തത്‌.

¹⁶ വർഷങ്ങൾക്കു​ശേഷം അപ്പോ​സ്‌ത​ല​നായ പൗലോസ്‌ തിമൊ​ഥെ​യൊ​സി​ന്റെ ചില ആത്മീയ ഗുണങ്ങ​ളെ​ക്കു​റി​ച്ചു പരാമർശി​ക്കു​ക​യു​ണ്ടാ​യി. തിമൊ​ഥെ​യൊ​സി​ന്റെ സന്മനസ്സി​നെ​യും നിസ്സ്വാർഥ സ്‌നേ​ഹ​ത്തെ​യും ദിവ്യാ​ധി​പത്യ നിയമ​നങ്ങൾ നിറ​വേ​റ്റു​ന്ന​തി​ലുള്ള ശുഷ്‌കാ​ന്തി​യെ​യും കുറിച്ച്‌ പൗലോസ്‌ വിവരി​ച്ചു. (ഫിലി. 2:20-22) തിമൊ​ഥെ​യൊ​സി​ന്റെ “കാപട്യ​മി​ല്ലാത്ത വിശ്വാ​സ​ത്തെ​പ്പ​റ്റി​യും” പൗലോസ്‌ സംസാ​രി​ച്ചു.—2 തിമൊ. 1:5.

17. ഇന്ന്‌ യുവജ​ന​ങ്ങൾക്ക്‌ തിമൊ​ഥെ​യൊ​സി​നെ എങ്ങനെ അനുക​രി​ക്കാ​നാ​കും?

¹⁷ ഇന്ന്‌ അനേകം യുവജ​നങ്ങൾ ദൈവ​ത്തി​നു പ്രസാ​ദ​ക​ര​മായ ഗുണങ്ങൾ വളർത്തി​യെ​ടു​ത്തു​കൊണ്ട്‌ തിമൊ​ഥെ​യൊ​സി​നെ അനുക​രി​ക്കു​ന്നു. അങ്ങനെ വളരെ ചെറു​പ്പ​ത്തിൽത്തന്നെ ദൈവ​മു​മ്പാ​കെ​യും അതു​പോ​ലെ സഹാരാ​ധ​കർക്കി​ട​യി​ലും അവർക്കു നല്ലൊരു പേര്‌ നേടി​യെ​ടു​ക്കാ​നാ​യി​രി​ക്കു​ന്നു. (സുഭാ. 22:1; 1 തിമൊ. 4:15) ഇരട്ടജീ​വി​തം നയിക്കാൻ വിസമ്മ​തി​ച്ചു​കൊണ്ട്‌ അവർ കാപട്യ​മി​ല്ലാത്ത വിശ്വാ​സം പ്രകട​മാ​ക്കു​ന്നു. (സങ്കീ. 26:4) ഈ ചെറു​പ്പ​ക്കാർ സഭയ്‌ക്ക്‌ ഒരു മുതൽക്കൂ​ട്ടാണ്‌. അവർ സന്തോ​ഷ​വാർത്ത​യു​ടെ പ്രചാ​ര​ക​രാ​യി​ത്തീ​രാൻ യോഗ്യത പ്രാപി​ക്കു​ക​യും പിന്നീട്‌ യഹോ​വ​യ്‌ക്ക്‌ തങ്ങളെ​ത്തന്നെ സമർപ്പിച്ച്‌ സ്‌നാ​ന​മേൽക്കു​ക​യും ചെയ്യു​ന്നത്‌ കാണു​മ്പോൾ അവരുടെ സഹാരാ​ധകർ എത്ര പ്രോ​ത്സാ​ഹി​ത​രാ​യി​ത്തീ​രു​ന്നു!

18. (എ) സഞ്ചാര ശുശ്രൂ​ഷകർ എന്നനി​ല​യിൽ പൗലോ​സി​നും തിമൊ​ഥെ​യൊ​സി​നും ഏതെല്ലാം പ്രത്യേക നിയമ​നങ്ങൾ ആസ്വദി​ക്കാ​നാ​യി? (ബി) സഭകൾ എങ്ങനെ അനു​ഗ്ര​ഹി​ക്ക​പ്പെട്ടു?

¹⁸ പൗലോ​സും തിമൊ​ഥെ​യൊ​സും വർഷങ്ങ​ളോ​ളം ഒരുമി​ച്ചു പ്രവർത്തി​ച്ചു. സഞ്ചാര ശുശ്രൂ​ഷകർ എന്നനി​ല​യിൽ ഭരണസം​ഘ​ത്തി​നു​വേണ്ടി പല ദൗത്യ​ങ്ങ​ളും അവർ നിറ​വേ​റ്റി​യി​ട്ടുണ്ട്‌. ബൈബിൾ വിവരണം പറയുന്നു: “അവർ നഗരം​തോ​റും സഞ്ചരിച്ച്‌, യരുശ​ലേ​മി​ലെ അപ്പോ​സ്‌ത​ല​ന്മാ​രും മൂപ്പന്മാ​രും എടുത്ത തീരു​മാ​നങ്ങൾ അവി​ടെ​യു​ള്ള​വരെ അറിയി​ച്ചു. അവർ അവ പിൻപറ്റി.” (പ്രവൃ. 16:4) യരുശ​ലേ​മി​ലുള്ള അപ്പോ​സ്‌ത​ല​ന്മാ​രും മൂപ്പന്മാ​രും കൈ​ക്കൊണ്ട തീർപ്പു​കൾ സഭകൾ പിൻപ​റ്റി​യെ​ന്നു​ള്ള​തി​നു സംശയ​മില്ല. അവരുടെ ആ അനുസ​ര​ണ​ത്തി​ന്റെ ഫലമായി “സഭകളു​ടെ വിശ്വാ​സം ശക്തമായി; അംഗസം​ഖ്യ ദിവസേന വർധിച്ചു.”—പ്രവൃ. 16:5.

19, 20. ക്രിസ്‌ത്യാ​നി​കൾ ‘നേതൃ​ത്വ​മെ​ടു​ക്കു​ന്ന​വരെ’ അനുസ​രി​ക്കേ​ണ്ടത്‌ എന്തു​കൊണ്ട്‌?

¹⁹ സമാന​മാ​യി, ഇന്നത്തെ യഹോ​വ​യു​ടെ സാക്ഷി​ക​ളും ‘തങ്ങൾക്കി​ട​യിൽ നേതൃ​ത്വ​മെ​ടു​ക്കു​ന്ന​വ​രിൽ’ നിന്നുള്ള നിർദേ​ശ​ങ്ങൾക്ക്‌ അനുസ​ര​ണ​യോ​ടെ കീഴ്‌പെ​ടു​ക​യും അങ്ങനെ അനു​ഗ്ര​ഹങ്ങൾ ആസ്വദി​ക്കു​ക​യും ചെയ്യുന്നു. (എബ്രാ. 13:17) ഈ ലോക​ത്തി​ന്റെ രംഗം സദാ മാറി​ക്കൊ​ണ്ടി​രി​ക്കു​ന്ന​തി​നാൽ, “വിശ്വ​സ്‌ത​നും വിവേ​കി​യും ആയ അടിമ” പ്രദാ​നം​ചെ​യ്യുന്ന ആത്മീയ ആഹാരം നാം അപ്പപ്പോൾ ഭക്ഷി​ക്കേ​ണ്ടതു വളരെ പ്രധാ​ന​മാണ്‌. (മത്താ. 24:45; 1 കൊരി. 7:29-31) അങ്ങനെ ചെയ്യു​ന്നത്‌ സത്യത്തിൽനിന്ന്‌ അകന്നു​പോ​കാ​തി​രി​ക്കാ​നും “ലോക​ത്തി​ന്റെ കറ പറ്റാതെ” സൂക്ഷി​ക്കാ​നും നമ്മെ സഹായി​ക്കും.—യാക്കോ. 1:27.

²⁰ പൗലോ​സി​നെ​യും ബർന്നബാ​സി​നെ​യും മർക്കോ​സി​നെ​യും ഒന്നാം നൂറ്റാ​ണ്ടി​ലെ മറ്റ്‌ അഭിഷിക്ത മൂപ്പന്മാ​രെ​യും പോലെ, ഭരണസം​ഘാം​ഗങ്ങൾ ഉൾപ്പെ​ടെ​യുള്ള ഇന്നത്തെ ക്രിസ്‌തീയ മേൽവി​ചാ​ര​ക​ന്മാ​രും അപൂർണ​രാ​ണെ​ന്നു​ള്ളതു സത്യം​തന്നെ. (റോമ. 5:12; യാക്കോ. 3:2) എന്നിരു​ന്നാ​ലും ദൈവ​വ​ചനം കർശന​മാ​യി പിൻപ​റ്റു​ക​യും അപ്പോ​സ്‌ത​ല​ന്മാ​രു​ടെ മാതൃ​ക​യോ​ടു പറ്റിനിൽക്കു​ക​യും ചെയ്‌തു​കൊണ്ട്‌ ഭരണസം​ഘം തങ്ങൾ ആശ്രയ​യോ​ഗ്യ​രാ​ണെന്നു തെളി​യി​ക്കു​ന്നു. (2 തിമൊ. 1:13, 14) തത്‌ഫ​ല​മാ​യി സഭകൾ ശക്തി​പ്പെ​ടു​ക​യും വിശ്വാ​സ​ത്തിൽ ഉറയ്‌ക്കു​ക​യും ചെയ്‌തി​രി​ക്കു​ന്നു.