1980-കളുടെ അവസാ​ന​ത്തിൽ, ഞങ്ങളുടെ മീറ്റി​ങ്ങു​ക​ളിൽ വീക്ഷാ​ഗോ​പു​രം മാസിക അതു നടത്തുന്ന സഹോ​ദ​രനു മാത്ര​മാണ്‌ ഉണ്ടായി​രു​ന്നത്‌. സാധാ​ര​ണ​ഗ​തി​യിൽ, എഴുതി​യെ​ടുത്ത ഒരു കോപ്പി​യാ​യി​രി​ക്കും അത്‌. മൂപ്പനാ​യി സേവി​ക്കുന്ന ഗെനാഡി ഗുഡാ​ഡ്‌സെ സഹോ​ദ​രനെ സമീപിച്ച് നമ്മുടെ മാസി​കകൾ പ്രിന്‍റ് ചെയ്യു​ന്ന​തി​നെ​ക്കു​റിച്ച് ഞാൻ ഒരിക്കൽ സംസാ​രി​ച്ചു.

സഹോ​ദ​ര​ങ്ങൾ സ്വയം നിർമിച്ച ഒരു മിമി​യോ​ഗ്രാഫ്‌ യന്ത്രം ഉപയോ​ഗി​ച്ചാണ്‌ അതുവരെ ഏതാനും പ്രസി​ദ്ധീ​ക​ര​ണങ്ങൾ ഉണ്ടാക്കി​യി​രു​ന്നത്‌. സ്ഥിരമാ​യി മാസി​കകൾ പ്രിന്‍റ് ചെയ്യു​ന്ന​തി​നു കുറച്ചു​കൂ​ടി നല്ല മിമി​യോ​ഗ്രാഫ്‌ യന്ത്രവും അനുഭ​വ​പ​രി​ച​യ​മുള്ള ഒരു ടൈപ്പി​സ്റ്റും ടൈപ്പ്റൈ​റ്റ​റും ആവശ്യ​ത്തി​നു സ്റ്റെൻസിൽ പേപ്പറു​ക​ളും വേണമാ​യി​രു​ന്നു. പക്ഷേ എല്ലാ അച്ചടി ഉപകര​ണ​ങ്ങ​ളും, കടലാസ്‌ പോലും ഗവൺമെ​ന്‍റി​ന്‍റെ നിയ​ന്ത്ര​ണ​ത്തി​ലാ​യി​രു​ന്നു. ഒരു പ്രത്യേക സുരക്ഷാ​വി​ഭാ​ഗ​മാ​യി​രു​ന്നു അതു കൈകാ​ര്യം ചെയ്‌തി​രു​ന്നത്‌.

ഗവൺമെ​ന്‍റി​ന്‍റെ നിയ​ന്ത്ര​ണ​ത്തിൽപ്പെ​ടാത്ത കാലഹ​ര​ണ​പ്പെട്ട ചില പഴയ ഉപകര​ണ​ങ്ങ​ളെ​ക്കു​റിച്ച് എന്‍റെ ഒരു പരിച​യ​ക്കാ​രന്‌ അറിയാ​മാ​യി​രു​ന്നു. അദ്ദേഹ​ത്തി​ന്‍റെ സഹായ​ത്തോ​ടെ ഞാൻ ഒരു ടൈപ്പ്​റൈറ്റർ സംഘടി​പ്പി​ച്ചു. എന്‍റെ അനിയ​ത്തി​ക്കു ടൈപ്പ് ചെയ്യാൻ അറിയാ​മാ​യി​രു​ന്നു. സഹോ​ദ​രങ്ങൾ ഒരു പുതിയ മിമി​യോ​ഗ്രാഫ്‌ യന്ത്രം ഉണ്ടാക്കി. അതു​പോ​ലെ  സ്റ്റെൻസി​ലു​കൾ വാങ്ങാൻ ഒരിട​വും അവർ കണ്ടെത്തി. ആഗ്രഹി​ച്ച​തു​പോ​ലെ കാര്യ​ങ്ങ​ളെ​ല്ലാം ഒത്തുവന്നു. അങ്ങനെ, അധികം​താ​മ​സി​യാ​തെ ജോർജി​യൻ ഭാഷയി​ലുള്ള വീക്ഷാ​ഗോ​പു​ര​ത്തി​ന്‍റെ ഒരു ലക്കം ആദ്യമാ​യി ഞങ്ങൾ നിർമി​ച്ചു.

എന്നാൽ പുതി​യൊ​രു പ്രശ്‌നം ഉടലെ​ടു​ത്തു. ഒരു ദിവസം, ഗെനാഡി സഹോ​ദരൻ എന്നോടു പറഞ്ഞു: “സ്റ്റെൻസി​ലു​കൾ വാങ്ങാൻ നമുക്കു വേറൊ​രു സ്ഥലം നോക്കണം.” ഒരു ഗവൺമെന്‍റ് ഓഫീ​സിൽ കുറെ​യ​ധി​കം സ്റ്റെൻസി​ലു​കൾ അദ്ദേഹം കണ്ടിരു​ന്നു. പക്ഷേ അധികാ​രി​കൾ അദ്ദേഹത്തെ നോട്ട​മി​ട്ടി​രു​ന്ന​തി​നാൽ അതു വാങ്ങാൻ അദ്ദേഹ​ത്തി​നു കഴിഞ്ഞില്ല. അത്‌ എങ്ങനെ വാങ്ങാൻ കഴിയും? ഞാൻ അദ്ദേഹ​ത്തോട്‌ ആവർത്തിച്ച് പറഞ്ഞു: “അതു നടക്കില്ല!” എന്നാൽ ഗെനാഡി സഹോ​ദ​രന്‍റെ ഉറച്ച മറുപടി ഇതായി​രു​ന്നു; “‘അതു നടക്കില്ല!’ എന്ന പറച്ചിൽ നിറുത്ത്‌. കാരണം ‘ദൈവ​ത്തിന്‌ എല്ലാം സാധ്യ​മാണ്‌!’’’—മത്താ. 19:26.

അൽപ്പം ഭയം ഉണ്ടായി​രു​ന്നെ​ങ്കി​ലും ഗെനാഡി സഹോ​ദ​രന്‍റെ വാക്കിന്‍റെ ബലത്തിൽ അടുത്ത ദിവസം ഞാൻ ആ ഓഫീ​സി​ലേക്കു പോയി. യഹോ​വ​യു​ടെ സഹായ​ത്താൽ എനിക്കു സഹായ​മ​ന​സ്ഥി​തി​യുള്ള ഒരു ടൈപ്പി​സ്റ്റി​നെ കാണാൻ കഴിഞ്ഞു. അവർ എന്‍റെ അപേക്ഷ അവിടത്തെ ഓഫീ​സ​റു​ടെ മുമ്പാകെ വെക്കാ​മെന്നു പറഞ്ഞു. അവരുടെ ഭർത്താ​വാ​യി​രു​ന്നു ആ ഓഫീസർ! പെട്ടെ​ന്നു​തന്നെ ഞങ്ങൾ അവിടെ നിന്നും സ്ഥിരമാ​യി സ്റ്റെൻസി​ലു​കൾ വാങ്ങാൻ തുടങ്ങി. പിന്നീ​ട​ങ്ങോ​ട്ടു സാധനങ്ങൾ കിട്ടു​ന്ന​തി​നു ഞങ്ങൾക്ക് യാതൊ​രു പ്രശ്‌ന​വും ഉണ്ടായി​ട്ടില്ല.