യശയ്യ 49:1-26
49 ദ്വീപുകളേ, ഞാൻ പറയുന്നതു കേൾക്കുക,ദൂരെയുള്ള ജനതകളേ,+ ശ്രദ്ധിക്കുക.
ഞാൻ ജനിക്കുന്നതിനു മുമ്പേ*+ യഹോവ എന്നെ വിളിച്ചിരിക്കുന്നു.
ഞാൻ എന്റെ അമ്മയുടെ ഗർഭത്തിലായിരുന്നപ്പോൾമുതൽ ദൈവം എന്റെ പേര്‌ വിളിച്ചിരിക്കുന്നു.
2 ദൈവം എന്റെ നാവ്‌* മൂർച്ചയേറിയ ഒരു വാൾപ്പോലെയാക്കി;തന്റെ കൈയുടെ നിഴലിൽ എന്നെ മറച്ചു;+
ദൈവം എന്നെ കൂർത്ത അമ്പുപോലെയാക്കി;തന്റെ ആവനാഴിയിൽ എന്നെ ഒളിപ്പിച്ചു.
3 ദൈവം എന്നോടു പറഞ്ഞു: “ഇസ്രായേലേ, നീ എന്റെ ദാസൻ,+നിന്നിലൂടെ ഞാൻ എന്റെ മഹത്ത്വം വെളിപ്പെടുത്തും.”+
4 എന്നാൽ ഞാൻ പറഞ്ഞു: “ഞാൻ അധ്വാനിച്ചതെല്ലാം വെറുതേയായി,
ഇല്ലാത്ത ഒന്നിനുവേണ്ടി ഞാൻ എന്റെ ഊർജം പാഴാക്കി.
എന്നാൽ യഹോവയാണ്‌ എന്നെ ന്യായം വിധിക്കുന്നത്‌,*എന്റെ കൂലി* എന്റെ ദൈവത്തിന്റെ കൈയിലുണ്ട്‌.”+
5 ഗർഭത്തിൽവെച്ചുതന്നെ എന്നെ തന്റെ ദാസനായി രൂപപ്പെടുത്തിയ യഹോവഇസ്രായേലിനെ തന്റെ അടുത്ത്‌ കൂട്ടിച്ചേർക്കേണ്ടതിന്‌+യാക്കോബിനെ തിരികെ കൊണ്ടുചെല്ലാൻ എന്നോടു പറഞ്ഞിരിക്കുന്നു.
ഞാൻ യഹോവയുടെ മുമ്പാകെ മഹത്ത്വമുള്ളവനായിത്തീരും,എന്റെ ദൈവം എന്റെ ബലമായിത്തീർന്നിരിക്കും.
6 ദൈവം പറഞ്ഞു: “യാക്കോബിന്റെ ഗോത്രങ്ങളെ എഴുന്നേൽപ്പിക്കാനുംഞാൻ ശേഷിപ്പിച്ച ഇസ്രായേൽ ജനത്തെ തിരികെ കൊണ്ടുവരാനും ഉള്ളഎന്റെ ദാസനായി മാത്രം നീ കഴിഞ്ഞാൽ പോരാ.
ഞാൻ നിന്നെ ജനതകൾക്ക്‌ ഒരു വെളിച്ചമായി നൽകിയിരിക്കുന്നു.+അങ്ങനെ ഭൂമിയുടെ അറ്റംവരെ എന്റെ രക്ഷ എത്തും.”+
7 ഭരണാധികാരികളുടെ ദാസനോട്‌, ജനതകൾ വെറുക്കുകയും സകലരും നിന്ദിക്കുകയും ചെയ്യുന്നവനോട്‌,+ ഇസ്രായേലിന്റെ വീണ്ടെടുപ്പുകാരനും ഇസ്രായേലിന്റെ പരിശുദ്ധനും ആയ യഹോവ പറയുന്നു:+
“ഇസ്രായേലിന്റെ പരിശുദ്ധനും വിശ്വസ്‌തദൈവവും+നിന്നെ തിരഞ്ഞെടുത്തവനും+ ആയ യഹോവ നിമിത്തംരാജാക്കന്മാർ കണ്ട്‌ എഴുന്നേൽക്കുകയുംപ്രഭുക്കന്മാർ കുമ്പിടുകയും ചെയ്യും.”
8 യഹോവ ഇങ്ങനെ പറയുന്നു:
“പ്രീതി തോന്നിയ കാലത്ത്‌ ഞാൻ നിനക്ക്‌ ഉത്തരം തന്നു,+രക്ഷയുടെ ദിവസത്തിൽ ഞാൻ നിന്നെ സഹായിച്ചു.+ജനത്തിനു നിന്നെ ഒരു ഉടമ്പടിയായി നൽകാനും+ ദേശം പൂർവസ്ഥിതിയിലാക്കാനുംവിജനമായിക്കിടക്കുന്ന അവരുടെ ഓഹരി അവർക്കു തിരികെ നൽകാനും+ഞാൻ നിന്നെ കാത്തുരക്ഷിച്ചു.
9 തടവുകാരോടു ‘പുറത്ത്‌ വരുക!’ എന്നും+
ഇരുട്ടിൽ ഇരിക്കുന്നവരോടു+ ‘വെളിയിലേക്കു വരുക!’ എന്നും പറയാൻ
ഞാൻ നിന്നെ രക്ഷിച്ചിരിക്കുന്നു.അവർ വഴിയോരത്ത്‌ മേഞ്ഞുനടക്കും,നടന്നുറച്ച എല്ലാ പാതകൾക്കും* സമീപം മേച്ചിൽപ്പുറങ്ങളുണ്ടാകും.
10 അവർക്കു വിശക്കില്ല, അവർക്കു ദാഹിക്കില്ല,+കൊടുംചൂടോ പൊരിവെയിലോ അവർക്ക്‌ ഏൽക്കില്ല,+
അവരോടു കരുണയുള്ളവനായിരിക്കും അവരെ നയിക്കുന്നത്‌,+അവൻ അവരെ അരുവികൾക്കരികിലൂടെ നടത്തും.+
11 ഞാൻ എന്റെ പർവതങ്ങളെല്ലാം പാതകളാക്കും.എന്റെ പ്രധാനവീഥികളെല്ലാം ഉയർത്തും.+
12 അതാ, അവർ അങ്ങു ദൂരെനിന്ന്‌ വരുന്നു!+അതാ, അവർ വടക്കുനിന്നും പടിഞ്ഞാറുനിന്നുംസീനീം ദേശത്തുനിന്നും വരുന്നു!”+
13 ആകാശമേ, സന്തോഷിച്ചാർക്കുക, ഭൂമിയേ, ആനന്ദിക്കുക.+
പർവതങ്ങൾ ഉല്ലസിച്ച്‌ ആനന്ദഘോഷം മുഴക്കട്ടെ,+
യഹോവ തന്റെ ജനത്തെ ആശ്വസിപ്പിച്ചിരിക്കുന്നല്ലോ,+കഷ്ടപ്പെടുന്ന തന്റെ ജനത്തോട്‌ അവൻ കരുണ കാണിക്കുന്നു.+
14 എന്നാൽ സീയോൻ ഇങ്ങനെ പറയുന്നു:
“യഹോവ എന്നെ ഉപേക്ഷിച്ചിരിക്കുന്നു,+ യഹോവ എന്നെ മറന്നുകളഞ്ഞു.”+
15 മുല കുടിക്കുന്ന കുഞ്ഞിനെ ഒരു അമ്മയ്‌ക്കു മറക്കാനാകുമോ?താൻ പ്രസവിച്ച മകനോട്‌ ഒരു സ്‌ത്രീ അലിവ്‌ കാട്ടാതിരിക്കുമോ?
ഇവർ മറന്നുകളഞ്ഞാലും ഞാൻ നിന്നെ ഒരിക്കലും മറക്കില്ല.+
16 ഇതാ! എന്റെ കൈവെള്ളയിൽ ഞാൻ നിന്റെ പേര്‌ കൊത്തിവെച്ചിരിക്കുന്നു,
നിന്റെ മതിലുകൾ എപ്പോഴും എന്റെ മുന്നിലുണ്ട്‌.
17 നിന്റെ പുത്രന്മാർ ധൃതിയിൽ മടങ്ങിവരുന്നു.
നിന്നെ തകർത്ത്‌ നശിപ്പിച്ചവർ നിന്നെ വിട്ട്‌ പോകും.
18 തല ഉയർത്തി ചുറ്റും നോക്കുക!
അവരെല്ലാം ഒരുമിച്ചുകൂടുന്നു.+
അവർ നിന്റെ അടുത്തേക്കു വരുന്നു,
യഹോവ പ്രഖ്യാപിക്കുന്നു:“ഞാനാണെ, നീ അവരെയെല്ലാം ആഭരണംപോലെ അണിയും,ഒരു മണവാട്ടിയെപ്പോലെ നീ അവരെയെല്ലാം ധരിക്കും.
19 നിന്റെ ദേശം തകർന്നും നശിച്ചും കിടന്നു,+ ജനവാസസ്ഥലങ്ങൾ വിജനമായിത്തീർന്നു.എന്നാൽ അതിൽ നിവാസികൾ തിങ്ങിനിറയും.+നിന്നെ വിഴുങ്ങിയവർ+ അങ്ങ്‌ അകലെയായിരിക്കും.+
20 മക്കളെ നഷ്ടപ്പെട്ട കാലത്ത്‌ നിനക്കു ജനിച്ച പുത്രന്മാർ ഇങ്ങനെ പറയുന്നതു നീ കേൾക്കും:‘എനിക്കു താമസിക്കാൻ ഇവിടെ തീരെ സ്ഥലമില്ല,
എനിക്ക്‌ ഇവിടെ കുറച്ചുകൂടെ സ്ഥലം വേണം.’+
21 അപ്പോൾ നീ ഇങ്ങനെ മനസ്സിൽ പറയും:‘ഞാൻ മക്കളെ നഷ്ടപ്പെട്ടവളും വന്ധ്യയും ആയിരുന്നു,ഞാൻ തടവുകാരിയായി അന്യദേശത്ത്‌ താമസിച്ചു,പിന്നെ എനിക്കു കിട്ടിയ ഈ മക്കൾ ആരുടേതാണ്‌?
ആരാണ്‌ ഇവരെ വളർത്തിയത്‌?+
ഞാൻ ഒറ്റയ്‌ക്കു കഴിയുകയായിരുന്നു,+പിന്നെ ഇവരെല്ലാം എവിടെനിന്ന്‌ വന്നു?’”+
22 പരമാധികാരിയാം കർത്താവായ യഹോവ പറയുന്നു:
“ഞാൻ ജനതകൾ കാൺകെ എന്റെ കൈ പൊക്കും,ജനങ്ങൾക്കായി ഞാൻ എന്റെ അടയാളം* ഉയർത്തും.+
അവർ നിന്റെ പുത്രന്മാരെ കൈകളിൽ* എടുത്തുകൊണ്ടുവരും;നിന്റെ പുത്രിമാരെ തോളിൽ വെച്ച്‌ കൊണ്ടുവരും.+
23 രാജാക്കന്മാർ നിന്റെ രക്ഷിതാക്കളാകും,+അവരുടെ രാജ്ഞിമാർ നിന്റെ വളർത്തമ്മമാരും.
അവർ നിലംവരെ കുമ്പിട്ട്‌ നിന്നെ നമസ്‌കരിക്കും,+അവർ നിന്റെ കാലിലെ പൊടി നക്കും.+ഞാൻ യഹോവയാണെന്നു നീ അറിയേണ്ടിവരും.എന്നിൽ പ്രത്യാശ വെക്കുന്നവർ അപമാനിതരാകില്ല.”+
24 കരുത്തനായ ഒരുവന്റെ കൈയിൽനിന്ന്‌ ബന്ദികളെ രക്ഷപ്പെടുത്താനാകുമോ?മർദകനായ ഭരണാധികാരിയുടെ കൈയിൽനിന്ന്‌ തടവുകാരെ മോചിപ്പിക്കാനാകുമോ?
25 എന്നാൽ യഹോവ പറയുന്നത്‌ ഇതാണ്‌:
“കരുത്തനായവന്റെ ബന്ദികളെപ്പോലും രക്ഷിക്കും,+മർദകന്റെ തടവുകാരെയും മോചിപ്പിക്കും.+
നിന്നെ എതിർക്കുന്നവരെ ഞാനും എതിർക്കും,+ഞാൻ നിന്റെ പുത്രന്മാരെ രക്ഷിക്കും.
26 നിന്നെ ഉപദ്രവിക്കുന്നവർ സ്വന്തം മാംസം തിന്നാൻ ഞാൻ ഇടയാക്കും.മധുരമുള്ള വീഞ്ഞുപോലെ അവർ സ്വന്തം രക്തം കുടിക്കും, അവർ കുടിച്ച്‌ മത്തരാകും.
യാക്കോബിന്റെ ശക്തനായ ദൈവവും+നിന്റെ രക്ഷകനും+ നിന്റെ വീണ്ടെടുപ്പുകാരനും+ ആയയഹോവയാണു ഞാനെന്നു സകലരും അറിയേണ്ടിവരും.”+
അടിക്കുറിപ്പുകള്‍
^ അക്ഷ. “ഗർഭപാത്രത്തിൽവെച്ചുതന്നെ.”
^ അക്ഷ. “വായ്‌.”
^ അഥവാ “യഹോവ എനിക്കു ന്യായം നടത്തിത്തരും.”
^ അഥവാ “പ്രതിഫലം.”
^ മറ്റൊരു സാധ്യത “തരിശായ എല്ലാ കുന്നുകൾക്കും.”
^ അഥവാ “കൊടിമരം.”
^ അക്ഷ. “മാർവിടത്തിൽ.”