യഹസ്‌കേൽ 38:1-23
38 എനിക്കു വീണ്ടും യഹോവയുടെ സന്ദേശം കിട്ടി:
2 “മനുഷ്യപുത്രാ, മേശെക്കിന്റെയും തൂബലിന്റെയും+ പ്രധാനതലവനായ* മാഗോഗ്‌ ദേശത്തെ ഗോഗിനു+ നേരെ മുഖം തിരിച്ച്‌ അവന്‌ എതിരെ പ്രവചിക്കൂ!+
3 നീ ഇങ്ങനെ പറയണം: ‘പരമാധികാരിയായ യഹോവ പറയുന്നു: “മേശെക്കിന്റെയും തൂബലിന്റെയും പ്രധാനതലവനായ* ഗോഗേ, ഞാൻ ഇതാ, നിനക്ക്‌ എതിരെ തിരിഞ്ഞിരിക്കുകയാണ്‌.
4 ഞാൻ നിന്നെ പിന്നോട്ടു തിരിച്ച്‌ താടിയെല്ലിൽ കൊളുത്തിട്ട്‌+ നിന്നെയും നിന്റെ മുഴുവൻ സൈന്യത്തെയും+ മോടിയോടെ വസ്‌ത്രം ധരിച്ച കുതിരപ്പടയാളികളെയും കുതിരകളെയും പുറത്ത്‌ കൊണ്ടുവരും. വൻപരിചകളും ചെറുപരിചകളും* ഏന്തിയ ഒരു വൻസമൂഹമാണ്‌ അവർ; എല്ലാവരും വാൾ എടുത്ത്‌ പോരാടുന്നവർ!
5 പേർഷ്യയും എത്യോപ്യയും പൂതും+ അവരുടെകൂടെയുണ്ട്‌; അവർക്കെല്ലാം ചെറുപരിചയും പടത്തൊപ്പിയും ഉണ്ട്‌.
6 ഗോമെരും എല്ലാ പടയാളികളും വടക്ക്‌ അതിവിദൂരഭാഗത്തുനിന്നുള്ള തോഗർമഗൃഹവും+ എല്ലാ പടയാളികളും ഒപ്പമുണ്ട്‌. അതെ, അനേകം ജനതകൾ നിന്റെകൂടെയുണ്ട്‌.+
7 “‘“ഒരുങ്ങിയിരിക്കൂ! നീയും നിന്റെകൂടെ കൂടിവന്നിട്ടുള്ള എല്ലാ സൈന്യങ്ങളും തയ്യാറായിക്കൊള്ളൂ! നീയായിരിക്കും അവരുടെ സൈന്യാധിപൻ.*
8 “‘“ഏറെ നാളുകൾ കഴിഞ്ഞ്‌ നിന്നിലേക്കു ശ്രദ്ധ തിരിക്കും.* വാളിന്റെ കെടുതികൾക്കിരയായിട്ടും രക്ഷപ്പെട്ട്‌ മടങ്ങിവന്നവരുടെ ദേശം, കാലങ്ങളായി നശിച്ചുകിടന്നിരുന്ന ഇസ്രായേൽമലകളിലേക്കു നിരവധി ജനതകളിൽനിന്ന്‌ കൂട്ടിചേർക്കപ്പെട്ടവരുടെ ദേശം, നീ അവസാനവർഷങ്ങളിൽ ആക്രമിക്കും. ഈ ദേശത്ത്‌ താമസിക്കുന്നവരെ ജനതകളിൽനിന്ന്‌ തിരികെ കൊണ്ടുവന്നതാണ്‌. അവരെല്ലാം സുരക്ഷിതരായി കഴിയുന്നു.+
9 ഒരു കൊടുങ്കാറ്റുപോലെ നീ അവർക്കെതിരെ വരും. നീയും നിന്റെ സർവസൈന്യവും നിന്റെകൂടെയുള്ള അനേകം ജനതകളും മേഘംപോലെ അവരുടെ ദേശം മൂടും.”’
10 “പരമാധികാരിയായ യഹോവ പറയുന്നു: ‘ആ ദിവസം നിന്റെ ഹൃദയത്തിൽ ചില ചിന്തകൾ നാമ്പിടും. നീ ഒരു കുതന്ത്രം മനയും.
11 നീ പറയും: “ചുറ്റുമതിലില്ലാത്ത ഗ്രാമങ്ങളുടെ ദേശം ഞാൻ ആക്രമിക്കും.+ ആരുടെയും ശല്യമില്ലാതെ സുരക്ഷിതരായി താമസിക്കുന്നവരുടെ നേരെ ഞാൻ വരും. അവരുടെ ഗ്രാമങ്ങൾക്കു മതിലുകളുടെയോ ഓടാമ്പലുകളുടെയോ കവാടങ്ങളുടെയോ സംരക്ഷണമില്ല.”
12 ഒരു വൻകൊള്ള നടത്താനും ഒരിക്കൽ നശിച്ചുകിടന്നതും ഇപ്പോൾ ആൾപ്പാർപ്പുള്ളതും ആയ സ്ഥലങ്ങൾ+ ആക്രമിക്കാനും ആണ്‌ നിന്റെ പദ്ധതി. ജനതകളുടെ ഇടയിൽനിന്ന്‌ തിരികെ കൊണ്ടുവന്ന ജനത്തെ+—ഭൂമിയുടെ നടുവിൽ താമസിച്ച്‌ ധനവും വസ്‌തുവകകളും സമ്പാദിച്ചുകൂട്ടുന്ന+ ജനത്തെ—ആക്രമിക്കാനാണു നീ നോക്കുന്നത്‌.
13 “‘ശേബയും+ ദേദാനും+ തർശീശ്‌ വ്യാപാരികളും+ അവരുടെ എല്ലാ വീരയോദ്ധാക്കളും* നിന്നോടു ചോദിക്കും: “ഒരു വൻകൊള്ള നടത്താനാണോ നീ ആക്രമിക്കുന്നത്‌? സ്വർണവും വെള്ളിയും കൊണ്ടുപോകാനാണോ നീ നിന്റെ സൈന്യത്തെ ഒന്നിച്ചുകൂട്ടുന്നത്‌? സമ്പത്തും വസ്‌തുവകകളും അപഹരിക്കാനും വലിയ തോതിൽ കൊള്ളമുതൽ കൈക്കലാക്കാനും ആണോ നീ നോക്കുന്നത്‌?”’
14 “അതുകൊണ്ട്‌ മനുഷ്യപുത്രാ, പ്രവചിക്കൂ! ഗോഗിനോടു പറയൂ: ‘പരമാധികാരിയായ യഹോവ പറയുന്നു: “അന്ന്‌ എന്റെ ജനമായ ഇസ്രായേൽ സുരക്ഷിതരായി കഴിയുമ്പോൾ നീ അത്‌ അറിയാതിരിക്കുമോ?+
15 നീ നിന്റെ സ്ഥലത്തുനിന്ന്‌, വടക്ക്‌ അതിവിദൂരഭാഗങ്ങളിൽനിന്ന്‌,+ വരും. നിന്റെകൂടെ അനേകം ജനതകളും ഉണ്ടായിരിക്കും. എല്ലാവരും കുതിരപ്പുറത്ത്‌ ഒരു വൻസമൂഹമായി, ഒരു മഹാസൈന്യമായി, വരും.+
16 മേഘം ദേശത്തെ മൂടുന്നതുപോലെ നീ എന്റെ ജനമായ ഇസ്രായേലിന്‌ എതിരെ വരും. ഗോഗേ, അവസാനനാളുകളിൽ ഞാൻ നിന്നെ എന്റെ ദേശത്തിന്‌ എതിരെ വരുത്തും.+ ജനതകൾ എന്നെ അറിയാൻവേണ്ടി അവർ കാൺകെ ഞാൻ നിന്നെ കൈകാര്യം ചെയ്യും. അങ്ങനെ, ഞാൻ എന്നെ വിശുദ്ധീകരിക്കും.”’+
17 “പരമാധികാരിയായ യഹോവ പറയുന്നു: ‘നിന്നെക്കുറിച്ചുതന്നെയല്ലേ മുൻകാലങ്ങളിൽ എന്റെ ദാസന്മാരായ ഇസ്രായേൽപ്രവാചകന്മാരിലൂടെ ഞാൻ സംസാരിച്ചത്‌? നിന്നെ അവർക്കെതിരെ കൊണ്ടുവരുമെന്ന്‌ അവർ വർഷങ്ങളോളം പ്രവചിച്ചിരുന്നില്ലേ?’
18 “പരമാധികാരിയായ യഹോവ പ്രഖ്യാപിക്കുന്നു: ‘ഗോഗ്‌ ഇസ്രായേൽ ദേശത്തെ ആക്രമിക്കുന്ന ആ ദിവസം, എന്റെ ഉഗ്രകോപം കത്തിക്കാളും.+
19 എന്റെ ആവേശത്തിൽ, എന്റെ കോപാഗ്നിയിൽ, ഞാൻ സംസാരിക്കും. അന്ന്‌ ഇസ്രായേൽ ദേശത്ത്‌ ഒരു വൻഭൂകമ്പമുണ്ടാകും.
20 ഞാൻ കാരണം കടലിലെ മത്സ്യങ്ങളും ആകാശത്തിലെ പക്ഷികളും കാട്ടിലെ മൃഗങ്ങളും എല്ലാ ഇഴജന്തുക്കളും ഭൂമുഖത്തുള്ള എല്ലാ മനുഷ്യരും പേടിച്ചുവിറയ്‌ക്കും. മലകൾ ഇടിഞ്ഞുവീഴും.+ ചെങ്കുത്തായ പാറകൾ തകർന്നുവീഴും. എല്ലാ മതിലുകളും നിലംപൊത്തും.’
21 “പരമാധികാരിയായ യഹോവ പ്രഖ്യാപിക്കുന്നു: ‘ഞാൻ ഗോഗിന്‌ എതിരെ എന്റെ എല്ലാ മലകളിലേക്കും ഒരു വാൾ അയയ്‌ക്കും. ഓരോരുത്തരുടെയും വാൾ സ്വന്തം സഹോദരന്‌ എതിരെ ഉയരും.+
22 മാരകമായ പകർച്ചവ്യാധിയാലും+ രക്തച്ചൊരിച്ചിലിനാലും ഞാൻ അവനെ ന്യായം വിധിക്കും. ഞാൻ അവന്റെ മേലും അവന്റെ സൈന്യത്തിന്റെ മേലും അവന്റെകൂടെയുള്ള അനേകം ജനതകളുടെ മേലും പെരുമഴയും ആലിപ്പഴവും+ തീയും+ ഗന്ധകവും*+ പെയ്യിക്കും.+
23 അനേകം ജനതകൾ കാൺകെ ഞാൻ എന്നെ വെളിപ്പെടുത്തുകയും മഹത്ത്വീകരിക്കുകയും വിശുദ്ധീകരിക്കുകയും ചെയ്യും. അങ്ങനെ, ഞാൻ യഹോവയാണെന്ന്‌ അവർ അറിയേണ്ടിവരും.’
അടിക്കുറിപ്പുകള്‍
^ അഥവാ “മുഖ്യപ്രഭുവായ.”
^ അഥവാ “മുഖ്യപ്രഭുവായ.”
^ സാധാരണയായി വില്ലാളികളാണ്‌ ഇവ ഉപയോഗിച്ചിരുന്നത്‌.
^ അക്ഷ. “കാവൽക്കാരൻ.”
^ അഥവാ “നിന്നെ വിളിച്ചുവരുത്തും.”
^ അഥവാ “സടയുള്ള, വളർച്ചയെത്തിയ സിംഹങ്ങളും.”
^ അതായത്‌, സൾഫർ.