അനേകാ​യി​രങ്ങൾ: അക്ഷ. “പതിനാ​യി​രങ്ങൾ.” ഇവിടെ കാണുന്ന ഗ്രീക്കു​പ​ദ​ത്തി​ന്റെ അക്ഷരാർഥം “പതിനാ​യി​ര​ത്തി​ന്റെ കൂട്ടം” എന്നാ​ണെ​ങ്കി​ലും ക്ലിപ്‌ത​മ​ല്ലാത്ത, വലി​യൊ​രു സംഖ്യയെ കുറി​ക്കാ​നും അതിനാ​കും.

പുളിച്ച മാവ്‌: അഥവാ “യീസ്റ്റ്‌.” ഈ പദപ്ര​യോ​ഗം പലപ്പോ​ഴും പാപത്തിന്റെയും വഷളത്തത്തിന്റെയും പ്രതീ​ക​മാ​യി ബൈബി​ളിൽ ഉപയോ​ഗി​ച്ചി​ട്ടു​ണ്ടെ​ങ്കി​ലും ഇവിടെ അതു കുറി​ക്കു​ന്നതു ദുഷിച്ച ഉപദേ​ശ​ങ്ങ​ളെ​യും സ്വാധീ​ന​ത്തെ​യും ആണ്‌.​—മത്ത 16:6, 11, 12; 1കൊ 5:6-8.

വെളി​ച്ചത്ത്‌ കേൾക്കും: അതായത്‌, പരസ്യ​മാ​കും; എല്ലാവ​രും കേൾക്കും.

ഗീഹെന്ന: മത്ത 5:22-ന്റെ പഠനക്കു​റി​പ്പു കാണുക.

നിസ്സാ​ര​വി​ല​യുള്ള രണ്ടു നാണയ​ത്തുട്ട്‌: അക്ഷ. “രണ്ട്‌ അസ്സാറി​യൊൻ.” മുമ്പ്‌ ഗലീല​യിൽ മൂന്നാം പര്യടനം നടത്തിയ സന്ദർഭ​ത്തിൽ, ഒരു അസ്സാറി​യൊ​നി​നു രണ്ടു കുരു​വി​കളെ വാങ്ങാ​മെന്നു യേശു പറഞ്ഞി​രു​ന്നു. (മത്ത 10:29) 45 മിനിട്ട്‌ ജോലി ചെയ്യു​ന്ന​തിന്‌ ഒരാൾക്കു കിട്ടി​യി​രുന്ന കൂലി​യാ​യി​രു​ന്നു ഒരു അസ്സാറി​യൊൻ. (അനു. ബി14 കാണുക.) ഇപ്പോൾ ഏതാണ്ട്‌ ഒരു വർഷത്തി​നു ശേഷം, സാധ്യ​ത​യ​നു​സ​രിച്ച്‌ യഹൂദ്യ​യി​ലെ ശുശ്രൂ​ഷ​യു​ടെ സമയത്ത്‌, രണ്ട്‌ അസ്സാറി​യൊ​നിന്‌ അഞ്ചു കുരു​വി​കളെ കിട്ടു​മെന്നു യേശു പറഞ്ഞതാ​യി ലൂക്കോസ്‌ രേഖ​പ്പെ​ടു​ത്തി​യി​രി​ക്കു​ന്നു. ഈ രണ്ടു വിവര​ണങ്ങൾ താരത​മ്യം ചെയ്‌താൽ ഒരു കാര്യം വ്യക്തം: വ്യാപാ​രി​കൾ കുരു​വി​കളെ തീരെ വിലയി​ല്ലാ​ത്ത​താ​യി കണ്ടിരു​ന്നു. കാരണം അഞ്ചാമത്തെ കുരു​വി​യെ അവർ സൗജന്യ​മാ​യാ​ണു കൊടു​ത്തി​രു​ന്നത്‌.

കുരുവികൾ: മത്ത 10:29-ന്റെ പഠനക്കു​റി​പ്പു കാണുക.

നിങ്ങളുടെ തലയിലെ ഓരോ മുടി​യി​ഴ​യും എണ്ണിത്തി​ട്ട​പ്പെ​ടു​ത്തി​യി​രി​ക്കു​ന്നു: മത്ത 10:30-ന്റെ പഠനക്കു​റി​പ്പു കാണുക.

പൊതു​സ​ദസ്സ്‌: മറ്റൊരു സാധ്യത, “സിന​ഗോഗ്‌.” ഇവിടെ ഉപയോ​ഗി​ച്ചി​രി​ക്കുന്ന സുന​ഗോ​ഗേ എന്ന ഗ്രീക്കു​നാ​മ​ത്തി​ന്റെ അക്ഷരാർഥം “വിളിച്ചുകൂട്ടൽ; കൂടി​വ​രവ്‌” എന്നൊ​ക്കെ​യാണ്‌. ക്രിസ്‌തീയ ഗ്രീക്കു​തി​രു​വെ​ഴു​ത്തു​ക​ളിൽ മിക്ക​പ്പോ​ഴും ആ പദം കുറിക്കുന്നത്‌, ജൂതന്മാർ തിരു​വെ​ഴു​ത്തു വായി​ക്കാ​നും പഠിപ്പി​ക്കാ​നും പ്രസം​ഗി​ക്കാ​നും പ്രാർഥി​ക്കാ​നും കൂടി​വ​ന്നി​രുന്ന കെട്ടി​ട​ത്തെ​യോ സ്ഥലത്തെ​യോ ആണ്‌. (പദാവ​ലി​യിൽ “സിന​ഗോഗ്‌” കാണുക.) ഈ വാക്യ​ത്തി​ലും ആ പദത്തിനു “സിന​ഗോഗ്‌” എന്ന അർഥം വരാം. സിന​ഗോ​ഗു​ക​ളോ​ടു ചേർന്ന്‌ ജൂതന്മാ​രു​ടെ പ്രാ​ദേ​ശി​ക​കോ​ട​തി​കൾ പ്രവർത്തി​ക്കു​ക​യും ചെയ്‌തി​രു​ന്നു. (മത്ത 10:17-ന്റെ പഠനക്കു​റി​പ്പു കാണുക.) പക്ഷേ ഇവിടെ സുന​ഗോ​ഗേ എന്ന പദം കുറെ​ക്കൂ​ടെ വിശാ​ല​മായ അർഥത്തി​ലാ​യി​രി​ക്കാം ഉപയോ​ഗി​ച്ചി​രി​ക്കു​ന്നത്‌. സാധ്യ​ത​യ​നു​സ​രിച്ച്‌, ജൂതന്മാ​രും ജൂതന്മാ​ര​ല്ലാ​ത്ത​വ​രും ഉൾപ്പെടെ എല്ലാവർക്കും പ്രവേ​ശ​ന​മു​ണ്ടാ​യി​രുന്ന ചില പൊതു​സ​ദ​സ്സു​ക​ളെ​യാണ്‌ ഇവിടെ അതു കുറി​ക്കു​ന്നത്‌. ഒരു ക്രിസ്‌ത്യാ​നി​യെ നിയമ​പ​ര​മാ​യി വിചാരണ ചെയ്യാൻവേണ്ടി ആളുകൾ അത്തരത്തിൽ കൂടി​വ​രു​മാ​യി​രു​ന്നു. ക്രിസ്‌ത്യാ​നി​യാ​ണെ​ന്ന​തി​ന്റെ പേരിൽ ഒരാൾക്കു ശിക്ഷ വിധി​ക്കാൻപോ​ലും ഇത്തരം കൂട്ടങ്ങൾക്ക്‌ അധികാ​ര​മു​ണ്ടാ​യി​രു​ന്നു.

പിതൃ​സ്വത്ത്‌ വീതിച്ച്‌ എന്റെ പങ്കു തരാൻ: സഹോ​ദ​ര​ങ്ങൾക്ക്‌ ഇടയിൽ പിതൃ​സ്വത്ത്‌ പങ്കു​വെ​ക്കേ​ണ്ടത്‌ എങ്ങനെ​യെന്നു മോശ​യു​ടെ നിയമം വളരെ വ്യക്തമാ​യി പറഞ്ഞി​രു​ന്നു. കുടും​ബ​നാ​ഥന്റെ ഉത്തരവാ​ദി​ത്വ​ങ്ങൾ ഏറ്റെടു​ക്കേ​ണ്ടതു മൂത്ത മകനാ​യി​രു​ന്ന​തു​കൊണ്ട്‌, അയാൾക്കു സ്വത്തിന്റെ ഇരട്ടി ഓഹരി ലഭിക്കു​മാ​യി​രു​ന്നു. (ആവ 21:17) ബാക്കി​യുള്ള സ്വത്ത്‌ മറ്റ്‌ അനന്തരാ​വ​കാ​ശി​കൾക്കു വീതി​ച്ചു​കൊ​ടു​ക്കും. സാധ്യ​ത​യ​നു​സ​രിച്ച്‌ ഈ വാക്യ​ത്തിൽ പറഞ്ഞി​രി​ക്കുന്ന വ്യക്തി, തനിക്കു നിയമ​പ​ര​മാ​യി അർഹത​പ്പെട്ട ഓഹരി​യെ​ക്കാൾ കൂടുതൽ വേണ​മെന്ന്‌ ആഗ്രഹിച്ച ഒരു അത്യാ​ഗ്രഹി ആയിരു​ന്നു. അതു​കൊ​ണ്ടാ​യി​രി​ക്കാം യേശു നടത്തി​ക്കൊ​ണ്ടി​രുന്ന ആത്മീയ​ചർച്ച തടസ്സ​പ്പെ​ടു​ത്തി, ഇത്തര​മൊ​രു ഭൗതി​ക​വി​ഷയം എടുത്തി​ടാൻ അയാൾ മുതിർന്നത്‌. ആ തർക്കത്തിൽ ഉൾപ്പെ​ടാൻ ബുദ്ധി​പൂർവം വിസമ്മ​തിച്ച യേശു പക്ഷേ, അത്യാ​ഗ്ര​ഹ​ത്തിന്‌ എതിരെ മുന്നറി​യി​പ്പു കൊടു​ക്കു​ന്ന​താ​യി തുടർന്നുള്ള ഭാഗത്ത്‌ കാണാം.

മധ്യസ്ഥൻ: അഥവാ “വിഭാ​ഗി​ച്ചു​കൊ​ടു​ക്കു​ന്ന​യാൾ; വീതം​വെ​ച്ചു​കൊ​ടു​ക്കു​ന്ന​യാൾ.” മോശ​യു​ടെ നിയമം കൃത്യ​മാ​യി പറഞ്ഞി​ട്ടുള്ള ഒരു കാര്യ​ത്തിൽ താൻ ഉൾപ്പെ​ടേ​ണ്ട​തി​ല്ലെന്നു വ്യക്തമാ​ക്കു​ക​യാ​യി​രു​ന്നു യേശു ഇവിടെ. മാത്രമല്ല, സാമ്പത്തി​ക​തർക്ക​ങ്ങ​ളിൽ മധ്യസ്ഥ​രാ​യി​രി​ക്കാൻ മോശ​യു​ടെ നിയമം ചുമത​ല​പ്പെ​ടു​ത്തി​യി​ട്ടു​ള്ളതു മൂപ്പന്മാ​രെ​യാ​യി​രു​ന്നു. ഇനി, തന്നെ ഭൂമി​യി​ലേക്ക്‌ അയച്ചി​രി​ക്കു​ന്നത്‌ ഇത്തരം കാര്യ​ങ്ങ​ളിൽ ഉൾപ്പെ​ടാ​നല്ല, മറിച്ച്‌ ദൈവ​രാ​ജ്യ​ത്തെ​ക്കു​റി​ച്ചുള്ള സന്തോ​ഷ​വാർത്ത പ്രസം​ഗി​ക്കാ​നാണ്‌ എന്നും യേശു​വിന്‌ അറിയാ​മാ​യി​രു​ന്നു.

അത്യാ​ഗ്രഹം: അഥവാ “അർഹമ​ല്ലാ​ത്ത​തി​നു​വേ​ണ്ടി​യുള്ള എല്ലാ തരം അതി​മോ​ഹ​വും.” ഇവിടെ കാണുന്ന പ്ലെയൊ​നെ​ക്‌സിയ എന്ന ഗ്രീക്കു​പ​ദ​ത്തി​ന്റെ അക്ഷരാർഥം, “ഇനിയു​മി​നി​യും സ്വന്തമാ​ക്കുക” എന്നാണ്‌. ഇപ്പോ​ഴു​ള്ള​തി​ലും കൂടുതൽ സ്വന്തമാ​ക്കാ​നുള്ള അടങ്ങാത്ത ആഗ്രഹ​ത്തെ​യാണ്‌ അതു കുറി​ക്കു​ന്നത്‌. എഫ 4:19; 5:3 എന്നീ വാക്യ​ങ്ങ​ളി​ലും ഇതേ ഗ്രീക്കു​പദം കാണാം. കൊലോ 3:5-ൽ ‘അത്യാ​ഗ്ര​ഹത്തെ’ പൗലോസ്‌ വിളി​ച്ചി​രി​ക്കു​ന്നതു “വിഗ്ര​ഹാ​രാ​ധന” എന്നാണ്‌.

എന്നോ​ടു​തന്നെ: അഥവാ “എന്റെ ദേഹി​യോ​ടു​തന്നെ.” കാലങ്ങ​ളാ​യി “ദേഹി” എന്നു പരിഭാ​ഷ​പ്പെ​ടു​ത്തി​യി​ട്ടുള്ള സൈക്കി എന്ന ഗ്രീക്കു​പദം 19, 20 വാക്യ​ങ്ങ​ളിൽ മൂന്നു പ്രാവ​ശ്യം കാണാം. സന്ദർഭം നോക്കി​യാണ്‌ ഈ പദത്തിന്റെ അർഥം തീരു​മാ​നി​ക്കാ​റു​ള്ളത്‌. (പദാവ​ലി​യിൽ “ദേഹി” കാണുക.) ഇവിടെ ഈ പദം കുറി​ക്കു​ന്നത്‌ ആ വ്യക്തി​യെ​ത്ത​ന്നെ​യാണ്‌. അതായത്‌, ആളുകൾക്കു കാണു​ക​യും സ്‌പർശി​ക്കു​ക​യും ചെയ്യാ​വുന്ന, ആ വ്യക്തിയെ മുഴു​വ​നു​മാണ്‌. അല്ലാതെ മനുഷ്യ​ശ​രീ​ര​ത്തിന്‌ അകത്തുള്ള, കാണാ​നോ സ്‌പർശി​ക്കാ​നോ കഴിയാത്ത എന്തി​നെ​യെ​ങ്കി​ലു​മല്ല. അതു​കൊണ്ട്‌, “എന്നോ​ടു​തന്നെ” എന്ന പദപ്ര​യോ​ഗ​ത്തി​നും “എന്റെ ദേഹി​യോ​ടു​തന്നെ” എന്ന പദപ്ര​യോ​ഗ​ത്തി​നും അടിസ്ഥാ​ന​പ​ര​മാ​യി ഒരേ അർഥമാണ്‌.​—ഈ വാക്യ​ത്തി​ലെ നീ എന്നതിന്റെ പഠനക്കു​റി​പ്പും ലൂക്ക 12:20-ന്റെ പഠനക്കു​റി​പ്പും കാണുക.

നീ: അഥവാ “ദേഹീ നീ.” ബുദ്ധി​ശൂ​ന്യ​നായ ആ മനുഷ്യൻ ഇവിടെ തന്നോ​ടു​തന്നെ സംസാ​രി​ക്കു​ക​യാണ്‌. ഈ വാക്യ​ത്തി​ലെ എന്നോ​ടു​തന്നെ എന്നതിന്റെ പഠനക്കു​റി​പ്പിൽ വിശദീ​ക​രി​ച്ചി​രി​ക്കു​ന്ന​തു​പോ​ലെ, കാലങ്ങ​ളാ​യി “ദേഹി” എന്നു പരിഭാ​ഷ​പ്പെ​ടു​ത്തി​യി​ട്ടുള്ള സൈക്കി എന്ന ഗ്രീക്കു​പദം ഇവിടെ ആ വ്യക്തി​യെ​ത്ത​ന്നെ​യാ​ണു കുറി​ക്കു​ന്നത്‌.​—പദാവ​ലി​യിൽ “ദേഹി” കാണുക.

മൂഢാ: ബൈബി​ളിൽ “മൂഢൻ” എന്നതു​പോ​ലുള്ള പദപ്ര​യോ​ഗങ്ങൾ പൊതു​വേ ഉപയോ​ഗി​ച്ചി​രി​ക്കു​ന്നതു മാനസി​ക​മായ കഴിവു​ക​ളോ ബുദ്ധി​യോ കുറഞ്ഞ​വരെ കുറി​ക്കാ​നല്ല, മറിച്ച്‌ ദൈവ​ത്തി​ന്റെ നീതി​യുള്ള നിലവാ​ര​ങ്ങ​ളു​മാ​യി യോജി​ക്കാത്ത, വിവേ​ക​ശൂ​ന്യ​മായ തീരു​മാ​നങ്ങൾ എടുക്കു​ന്ന​വ​രെ​യാണ്‌.

അവർ നിന്റെ ജീവൻ നിന്നോ​ടു ചോദി​ക്കും: ഈ ദൃഷ്ടാ​ന്ത​ത്തിൽ “അവർ” എന്നു പറഞ്ഞി​രി​ക്കു​ന്നത്‌, ഏതെങ്കി​ലു​മൊ​രു കൂട്ടം മനുഷ്യ​രെ​യോ ദൂതന്മാ​രെ​യോ ഉദ്ദേശി​ച്ചല്ല. വാസ്‌ത​വ​ത്തിൽ ഇവിടെ, “ചോദിക്കുക” എന്നു പരിഭാഷപ്പെടുത്തിയിരിക്കുന്ന ഗ്രീക്ക്‌ ക്രിയാരൂപത്തിന്റെ ധർമം, ആ മനുഷ്യന്‌ എന്തു സംഭവിക്കാൻപോകുന്നു എന്നു സൂചിപ്പിക്കുക മാത്രമാണ്‌. അതുകൊണ്ടുതന്നെ ഈ പദപ്ര​യോ​ഗത്തെ (“അവർ” എന്ന പദം ഒഴിവാ​ക്കി) “നിന്റെ ജീവൻ നിന്നോ​ടു ചോദി​ക്കും” എന്നും പരിഭാ​ഷ​പ്പെ​ടു​ത്താം. ഈ ദൃഷ്ടാ​ന്ത​ത്തി​ലെ ധനിക​നായ മനുഷ്യൻ മരിക്കു​ന്നത്‌ എങ്ങനെ​യാ​യി​രി​ക്കു​മെ​ന്നോ അദ്ദേഹ​ത്തി​ന്റെ ജീവ​നെ​ടു​ക്കു​ന്നത്‌ ആരായി​രി​ക്കു​മെ​ന്നോ യേശു പറഞ്ഞില്ല എന്ന കാര്യം ശ്രദ്ധി​ക്കുക. മരിക്കു​ന്നത്‌ എങ്ങനെ​യാ​യാ​ലും, ആ രാത്രി​തന്നെ അയാൾക്കു മരണം സംഭവി​ക്കും എന്നതി​നാ​യി​രു​ന്നു ഇവിടെ പ്രാധാ​ന്യം.

നിന്റെ ജീവൻ: അഥവാ “നിന്റെ ദേഹി.” ലൂക്ക 12:19-ന്റെ പഠനക്കു​റി​പ്പിൽ പറഞ്ഞി​രി​ക്കു​ന്ന​തു​പോ​ലെ, കാലങ്ങ​ളാ​യി “ദേഹി” എന്നു പരിഭാ​ഷ​പ്പെ​ടു​ത്തി​യി​ട്ടുള്ള സൈക്കി എന്ന ഗ്രീക്കു​പ​ദ​ത്തി​ന്റെ അർഥം സന്ദർഭം നോക്കി​യാ​ണു തീരു​മാ​നി​ക്കു​ന്നത്‌. ഇവിടെ അത്‌ ഒരാളു​ടെ ജീവനെ കുറി​ക്കു​ന്നു.​—പദാവ​ലി​യിൽ “ദേഹി” കാണുക.

ദൈവ​മു​മ്പാ​കെ സമ്പന്നൻ: അഥവാ “ദൈവ​ത്തി​ന്റെ നോട്ട​ത്തിൽ സമ്പന്നൻ.” ദൈവം പ്രാധാ​ന്യ​മു​ള്ള​താ​യി കാണുന്ന കാര്യ​ങ്ങ​ളിൽ സമ്പന്നൻ എന്നാണ്‌ അതിന്റെ അർഥം.

നിങ്ങളു​ടെ ജീവൻ: അഥവാ “നിങ്ങളു​ടെ ദേഹി.” കാലങ്ങ​ളാ​യി “ദേഹി” എന്നു പരിഭാ​ഷ​പ്പെ​ടു​ത്തി​യി​ട്ടുള്ള സൈക്കി എന്ന ഗ്രീക്കു​പദം ഇവിടെ ഒരാളു​ടെ ജീവനെ കുറി​ക്കു​ന്നു.​—പദാവ​ലി​യിൽ “ദേഹി” കാണുക.

ഇനി ഉത്‌ക​ണ്‌ഠ​പ്പെ​ട​രുത്‌: അഥവാ “ആകുല​പ്പെ​ടു​ന്നതു നിറു​ത്തുക.” ഇവിടെ ഉപയോ​ഗി​ച്ചി​രി​ക്കുന്ന മെറി​മ്‌നാ​ഓ എന്ന ഗ്രീക്കു​ക്രി​യ​യു​ടെ കാലം, ഇപ്പോൾത്തന്നെ ചെയ്‌തു​കൊ​ണ്ടി​രി​ക്കുന്ന ഒരു കാര്യം നിറു​ത്തു​ന്ന​തി​നെ​യാ​ണു സൂചി​പ്പി​ക്കു​ന്നത്‌. ‘ഉത്‌ക​ണ്‌ഠ​പ്പെ​ടുക’ എന്നതിന്റെ ഗ്രീക്കു​പ​ദ​ത്തിന്‌, ഒരാളു​ടെ മനസ്സിനെ കലുഷി​ത​മാ​ക്കുന്ന, അയാളു​ടെ ശ്രദ്ധ പതറി​ക്കുന്ന തരം ആകുല​തയെ കുറി​ക്കാ​നാ​കും. ഇത്‌ അയാളു​ടെ സന്തോഷം കവർന്നെ​ടു​ക്കും. ലൂക്ക 12:11, 25, 26 എന്നീ വാക്യ​ങ്ങ​ളി​ലും ലൂക്കോസ്‌ ഇതേ ഗ്രീക്കു​പദം ഉപയോ​ഗി​ച്ചി​ട്ടുണ്ട്‌. 1കൊ 7:32-34; ഫിലി 4:6 എന്നിവി​ട​ങ്ങ​ളിൽ പൗലോ​സും ഇതേ ക്രിയാ​പദം ഉപയോ​ഗി​ച്ചി​രി​ക്കു​ന്ന​താ​യി കാണാം.​—മത്ത 6:25-ന്റെ പഠനക്കു​റി​പ്പു കാണുക.

ജീവൻ: അഥവാ “ദേഹി.” കഴിഞ്ഞ വാക്യ​ത്തി​ലെ​പ്പോ​ലെ ഇവി​ടെ​യും സൈക്കി എന്ന ഗ്രീക്കു​പദം ഒരാളു​ടെ ജീവ​നെ​യാ​ണു കുറി​ക്കു​ന്നത്‌. അതു​കൊണ്ട്‌ ഇവിടെ, ജീവനും (ദേഹി​യും) ശരീര​വും ചേരു​ന്ന​താണ്‌ ഒരു വ്യക്തി.

കാക്ക: അക്ഷ. “മലങ്കാക്ക.” ക്രിസ്‌തീയ ഗ്രീക്കു​തി​രു​വെ​ഴു​ത്തു​ക​ളിൽ ഈ പക്ഷി​യെ​ക്കു​റിച്ച്‌ ഇവിടെ മാത്രമേ പറഞ്ഞി​ട്ടു​ള്ളൂ. ഗിരി​പ്ര​ഭാ​ഷ​ണ​ത്തി​നി​ടെ ഇതി​നോ​ടു സമാന​മായ ഒരു നിർദേശം കൊടു​ത്ത​പ്പോൾ യേശു ഏതെങ്കി​ലും ഒരു പ്രത്യേ​ക​പ​ക്ഷി​യെ​ക്കു​റിച്ച്‌ എടുത്തു​പ​റ​ഞ്ഞില്ല. (മത്ത 6:26) ഗലീല​യിൽ ഗിരി​പ്ര​ഭാ​ഷണം നടത്തി ഏതാണ്ട്‌ 18 മാസം കഴിഞ്ഞ്‌, യഹൂദ്യ​യി​ലെ ശുശ്രൂ​ഷ​യു​ടെ സമയത്താ​ണു ലൂക്കോ​സി​ന്റെ വിവര​ണ​ത്തി​ലെ ഈ ഭാഗം യേശു പറഞ്ഞത്‌. യേശു ഇവിടെ കാക്ക​യെ​ക്കു​റിച്ച്‌ എടുത്തു​പ​റ​ഞ്ഞ​തി​ലൂ​ടെ, താൻ പറയുന്ന കാര്യ​ത്തിന്‌ കൂടുതൽ ഊന്നൽ നൽകു​ക​യാ​യി​രു​ന്നു. എങ്ങനെ? നിയമ​യു​ട​മ്പ​ടി​യിൽ മലങ്കാ​ക്കയെ അശുദ്ധ​മാ​യാ​ണു കണക്കാ​ക്കി​യി​രു​ന്നത്‌. (ലേവ 11:13, 15) ഈ അശുദ്ധ​പ​ക്ഷി​ക്കു​വേ​ണ്ടി​പ്പോ​ലും ദൈവം കരുതു​ന്നെ​ങ്കിൽ തന്നിൽ ആശ്രയി​ക്കുന്ന തന്റെ ജനത്തെ ദൈവം ഒരിക്ക​ലും ഉപേക്ഷി​ക്കില്ല എന്ന പാഠമാ​യി​രി​ക്കാം യേശു ഇതിലൂ​ടെ പഠിപ്പി​ച്ചത്‌.

ആയുസ്സ്‌: മത്ത 6:27-ന്റെ പഠനക്കു​റി​പ്പു കാണുക.

ഒരു മുഴം: മത്ത 6:27-ന്റെ പഠനക്കു​റി​പ്പു കാണുക.

ഈ ചെറി​യൊ​രു കാര്യം​പോ​ലും: അഥവാ “ഇത്ര നിസ്സാ​ര​മാ​യൊ​രു കാര്യം​പോ​ലും.” അക്ഷ. “ഏറ്റവും ചെറിയ കാര്യം​പോ​ലും.” ഒരാളു​ടെ ആയുസ്സി​നോട്‌ ഒരു മുഴ​മെ​ങ്കി​ലും കൂട്ടു​ന്ന​തി​നെ​ക്കു​റിച്ച്‌ മുൻവാ​ക്യ​ത്തിൽ പറഞ്ഞതി​നെ​യാ​യി​രി​ക്കാം ചെറി​യൊ​രു കാര്യം എന്ന്‌ ഇവിടെ പരാമർശി​ച്ചി​രി​ക്കു​ന്നത്‌. മനുഷ്യർക്ക്‌ അവരുടെ ആയുസ്സ്‌ അൽപ്പം​പോ​ലും, അതായത്‌ ഒരു മുഴം​പോ​ലും, കൂട്ടാൻ കഴിയി​ല്ലെ​ങ്കിൽപ്പി​ന്നെ അവർ എന്തിന്‌ ധാരാളം സമ്പത്തും ഭക്ഷ്യവ​സ്‌തു​ക്ക​ളും വസ്‌ത്ര​ങ്ങ​ളും വാരി​ക്കൂ​ട്ടു​ന്ന​തി​നെ​ക്കു​റി​ച്ചും അനേകം വീടു​ക​ളും നിലങ്ങ​ളും സ്വന്തമാ​ക്കു​ന്ന​തി​നെ​ക്കു​റി​ച്ചും ചിന്തിച്ച്‌ ഇത്രമാ​ത്രം ഉത്‌ക​ണ്‌ഠ​പ്പെ​ടണം?

ലില്ലി​ച്ചെടി: ഇത്‌ അനെമണി പൂവാ​ണെ​ന്നാ​ണു ചിലരു​ടെ അഭി​പ്രാ​യം. എന്നാൽ ഇതു ടൂലിപ്പ്‌, ഹൈയാ​സിന്ത്‌, ഐറിസ്‌, ഗ്ലാഡി​യോ​ലസ്‌ എന്നിവ​പോ​ലെ ലില്ലി​പ്പൂ​ക്ക​ളോ​ടു സാമ്യ​മുള്ള മറ്റേ​തെ​ങ്കി​ലും പൂക്കളും ആകാം. ആ പ്രദേ​ശത്ത്‌ കാണ​പ്പെ​ടുന്ന വിവി​ധ​തരം കാട്ടു​പൂ​ക്ക​ളെ​ക്കു​റി​ച്ചാ​ണു യേശു പറഞ്ഞ​തെന്ന്‌ അഭി​പ്രാ​യ​പ്പെ​ടുന്ന ചിലർ, ഇവിടെ കാണുന്ന ഗ്രീക്കു​പ​ദത്തെ പരിഭാ​ഷ​പ്പെ​ടു​ത്തി​യി​രി​ക്കു​ന്നതു കുറെ​ക്കൂ​ടെ വിശാ​ല​മായ അർഥത്തിൽ “പൂക്കൾ,” “കാട്ടു​പൂ​ക്കൾ” എന്നൊ​ക്കെ​യാണ്‌.

ഉത്‌ക​ണ്‌ഠ​പ്പെ​ടു​ന്നത്‌ ഒഴിവാ​ക്കുക: അഥവാ “ആകുല​പ്പെ​ടു​ന്നതു നിറു​ത്തുക.” മെറ്റി​യോ​റി​സോ​മായ്‌ എന്ന ഗ്രീക്കു​പദം ക്രിസ്‌തീയ ഗ്രീക്കു​തി​രു​വെ​ഴു​ത്തു​ക​ളിൽ ഇവിടെ മാത്രമേ കാണു​ന്നു​ള്ളൂ. ഗ്രീക്കു സാഹി​ത്യ​ഭാ​ഷ​യിൽ അതിന്റെ അർഥം “പൊങ്ങി ഉയർന്നു​നിൽക്കുക; (വായുവിൽ എന്നപോ​ലെ) തൂങ്ങി​നിൽക്കുക” എന്നൊ​ക്കെ​യാ​യി​രു​ന്നു. പ്രക്ഷു​ബ്ധ​മായ കടലിൽ കപ്പൽ ആടിയു​ല​യു​ന്ന​തി​നെ കുറി​ക്കാൻപോ​ലും ഈ പദം ഉപയോ​ഗി​ക്കാ​റുണ്ട്‌. എന്നാൽ ഇവിടെ അത്‌ ഉത്‌ക​ണ്‌ഠ​യെ​യോ മനസ്സിന്റെ അസ്വസ്ഥ​ത​യെ​യോ സൂചി​പ്പി​ക്കാൻ ആലങ്കാ​രി​ക​മായ അർഥത്തി​ലാണ്‌ ഉപയോ​ഗി​ച്ചി​രി​ക്കു​ന്നത്‌. സന്ദേഹ​മോ ഉത്‌ക​ണ്‌ഠ​യോ കാരണം ആടിയു​ല​യുന്ന അഥവാ ചഞ്ചലപ്പെട്ട ഒരു മനസ്സിനെ അതു കുറി​ക്കു​ന്നു.

ദാനം ചെയ്യുക: മത്ത 6:2-ന്റെ പഠനക്കു​റി​പ്പു കാണുക.

വസ്‌ത്രം ധരിച്ച്‌ തയ്യാറാ​യി​രി​ക്കുക: അക്ഷ. “അര കെട്ടി ഇരിക്കുക.” ഇതൊരു ഭാഷാ​ശൈ​ലി​യാണ്‌. കായി​കാ​ധ്വാ​നം ഉൾപ്പെട്ട ജോലി ചെയ്യാ​നോ ഓടാ​നോ ഒക്കെയുള്ള സൗകര്യ​ത്തി​നാ​യി നീണ്ട പുറങ്കു​പ്പാ​യ​ത്തി​ന്റെ താഴത്തെ അറ്റം കാലു​കൾക്ക്‌ ഇടയി​ലൂ​ടെ മുകളി​ലേക്ക്‌ എടുത്ത്‌ ഒരു അരപ്പട്ട​കൊണ്ട്‌ അരയിൽ കെട്ടി​നി​റു​ത്തു​ന്ന​തി​നെ​യാണ്‌ ഇതു കുറി​ക്കു​ന്നത്‌. ക്രമേണ അത്‌, ഒരു കാര്യം ചെയ്യാ​നുള്ള ഒരുക്കത്തെ സൂചി​പ്പി​ക്കുന്ന പദപ്ര​യോ​ഗ​മാ​യി മാറി. എബ്രായ തിരു​വെ​ഴു​ത്തു​ക​ളിൽ പലയി​ട​ത്തും സമാന​മായ പദപ്ര​യോ​ഗങ്ങൾ കാണാം. (ഉദാഹ​ര​ണങ്ങൾ: പുറ 12:11, അടിക്കു​റിപ്പ്‌; 1രാജ 18:46, അടിക്കു​റിപ്പ്‌; 2രാജ 3:21; 4:29; സുഭ 31:17, അടിക്കു​റിപ്പ്‌; യിര 1:17, അടിക്കു​റിപ്പ്‌) ഈ വാക്യ​ത്തിൽ ആ ക്രിയ​യു​ടെ രൂപം സൂചി​പ്പി​ക്കു​ന്നത്‌, ആത്മീയ​പ്ര​വർത്ത​നങ്ങൾ ചെയ്യാൻ ദൈവ​സേ​വ​കർക്ക്‌ എപ്പോ​ഴു​മു​ണ്ടാ​യി​രി​ക്കേണ്ട മനസ്സൊ​രു​ക്ക​ത്തെ​യാണ്‌. ലൂക്ക 12:37-ൽ (അടിക്കു​റിപ്പ്‌) ഇതേ ഗ്രീക്കു​ക്രിയ, “സേവനം ചെയ്‌തു​കൊ​ടു​ക്കാൻ അര കെട്ടി” എന്നു പരിഭാ​ഷ​പ്പെ​ടു​ത്തി​യി​ട്ടുണ്ട്‌. 1പത്ര 1:13-ലെ, “മനസ്സു​കളെ ശക്തമാ​ക്കുക” എന്ന പദപ്ര​യോ​ഗ​ത്തി​ന്റെ അക്ഷരാർഥം “മനസ്സിന്റെ അര കെട്ടുക” എന്നാണ്‌.

വസ്‌ത്രം മാറി: അക്ഷ. “സേവനം ചെയ്‌തു​കൊ​ടു​ക്കാൻ അര കെട്ടി.”​—ലൂക്ക 12:35; 17:8 എന്നിവ​യു​ടെ പഠനക്കു​റി​പ്പു​കൾ കാണുക.

രണ്ടാം യാമം: അതായത്‌, രാത്രി ഏകദേശം 9 മണിമു​തൽ അർധരാ​ത്രി​വ​രെ​യുള്ള സമയം. രാത്രി​യെ നാലു യാമങ്ങ​ളാ​യി തിരി​ച്ചി​രുന്ന ഗ്രീക്ക്‌, റോമൻ സമ്പ്രദാ​യ​മാണ്‌ ഇതിന്‌ ആധാരം. എന്നാൽ മുമ്പ്‌ എബ്രാ​യ​രു​ടെ രീതി, രാത്രി​യെ നാലു മണിക്കൂർ വീതമുള്ള മൂന്നു യാമങ്ങ​ളാ​യി തിരി​ക്കു​ന്ന​താ​യി​രു​ന്നു. (പുറ 14:24; ന്യായ 7:19) പക്ഷേ എ.ഡി. ഒന്നാം നൂറ്റാ​ണ്ടാ​യ​പ്പോ​ഴേ​ക്കും അവരും റോമൻ സമ്പ്രദാ​യം സ്വീക​രി​ച്ചി​രു​ന്നു.​—മത്ത 14:25; മർ 13:35 എന്നിവ​യു​ടെ പഠനക്കു​റി​പ്പു​കൾ കാണുക.

മൂന്നാം യാമം: അതായത്‌, അർധരാ​ത്രി​മു​തൽ അതിരാ​വി​ലെ ഏകദേശം 3 മണിവ​രെ​യുള്ള സമയം.​—മർ 13:35-ന്റെ പഠനക്കു​റി​പ്പു കാണുക.

പരിചാ​ര​ക​ഗണം: അഥവാ “വീട്ടിലെ പണിക്കാർ.” മത്ത 24:45-ലെ “വീട്ടു​ജോ​ലി​ക്കാർ” (ഗ്രീക്കിൽ, ഒയി​ക്കേ​റ്റെ​യിയ) എന്ന പദപ്ര​യോ​ഗം​പോ​ലെ​തന്നെ ഈ പദപ്ര​യോ​ഗ​വും (ഗ്രീക്കിൽ, തെറാ​പെ​യിയ) യജമാ​നന്റെ വീട്ടിൽ ജോലി ചെയ്യുന്ന എല്ലാവ​രെ​യും കുറി​ക്കു​ന്നു. മത്തായി ഉപയോ​ഗി​ച്ചി​രി​ക്കുന്ന പദത്തിന്റെ ഏതാണ്ട്‌ അതേ അർഥം​വ​രുന്ന ഒരു പദംത​ന്നെ​യാ​ണു ലൂക്കോ​സും ഉപയോ​ഗി​ച്ചി​രി​ക്കു​ന്ന​തെ​ങ്കി​ലും ലൂക്കോ​സി​ന്റെ വിവര​ണ​ത്തി​ലേത്‌, ഗ്രീക്ക്‌ സാഹി​ത്യ​ഭാ​ഷ​യിൽ പൊതു​വേ കാണുന്ന ഒരു പദമാണ്‌. ലൂക്കോസ്‌ ഈ പദം ഉപയോ​ഗി​ക്കാ​നുള്ള കാരണം അദ്ദേഹ​ത്തി​ന്റെ വിദ്യാ​ഭ്യാ​സ​വും പശ്ചാത്ത​ല​വും ഒക്കെയാ​യി​രി​ക്കാം.

വിവേകി: അഥവാ “ബുദ്ധി​മാൻ.” ഇവിടെ ഉപയോ​ഗി​ച്ചി​രി​ക്കുന്ന ഫ്രോ​നി​മൊസ്‌ എന്ന ഗ്രീക്ക്‌ നാമവി​ശേ​ഷണം കുറി​ക്കു​ന്നത്‌, ഗ്രാഹ്യ​ത്തോ​ടൊ​പ്പം ഉൾക്കാ​ഴ്‌ച​യും ദീർഘ​വീ​ക്ഷ​ണ​വും വകതി​രി​വും വിവേ​ച​ന​യും പ്രാ​യോ​ഗി​ക​ജ്ഞാ​ന​വും ചേരുന്ന ഒരു ഗുണ​ത്തെ​യാണ്‌. ഇതേ ഗ്രീക്കു​പ​ദ​ത്തി​ന്റെ മറ്റൊരു രൂപം ലൂക്ക 16:8-ൽ കാണാം. അവിടെ അതു ‘ബുദ്ധി​ശാ​ലി​കൾ’ എന്നാണു പരിഭാ​ഷ​പ്പെ​ടു​ത്തി​യി​രി​ക്കു​ന്നത്‌. മത്ത 7:24; 25:2, 4, 8, 9 എന്നീ വാക്യ​ങ്ങ​ളിൽ ഇതേ ഗ്രീക്കു​പദം ഉപയോ​ഗി​ച്ചി​ട്ടുണ്ട്‌. ഉൽ 41:33, 39-ൽ യോ​സേ​ഫി​നെ​ക്കു​റിച്ച്‌ പറയു​ന്നി​ടത്ത്‌ സെപ്‌റ്റു​വ​ജി​ന്റി​ലും ഇതേ പദമാണു കാണു​ന്നത്‌.

കാര്യസ്ഥൻ: അഥവാ “വീട്ടിലെ കാര്യം നോക്കി​ന​ട​ത്തു​ന്ന​യാൾ.” ഇവിടെ കാണുന്ന ഓയി​കൊ​നോ​മൊസ്‌ എന്ന ഗ്രീക്കു​പദം, വീട്ടിലെ ജോലി​ക്കാ​രു​ടെ മേൽനോ​ട്ട​ത്തി​നാ​യി നിയമി​ച്ചി​രുന്ന ഒരാ​ളെ​യാ​ണു കുറി​ക്കു​ന്നത്‌. എന്നാൽ അയാളും ആ വീട്ടിലെ ഒരു ജോലി​ക്കാ​രൻത​ന്നെ​യാ​യി​രു​ന്നു. പുരാ​ത​ന​കാ​ലത്ത്‌, പൊതു​വേ വിശ്വ​സ്‌ത​നായ ഒരു അടിമ​യെ​യാണ്‌ ആ സ്ഥാനത്ത്‌ നിയമി​ച്ചി​രു​ന്നത്‌. തന്റെ യജമാ​നന്റെ കാര്യ​ങ്ങ​ളെ​ല്ലാം നോക്കി​ന​ട​ത്താ​നുള്ള ചുമതല അയാൾക്കാ​യി​രു​ന്നു. അതു​കൊ​ണ്ടു​തന്നെ ഒരാളെ വളരെ​യ​ധി​കം വിശ്വ​സി​ച്ചേൽപ്പി​ച്ചി​രുന്ന ഒരു ഉത്തരവാ​ദി​ത്വ​മാ​യി​രു​ന്നു അത്‌. അബ്രാ​ഹാ​മി​നു​ള്ളതു “മുഴുവൻ നോക്കി​ന​ട​ത്തി​യി​രുന്ന” ദാസൻ അഥവാ ജോലി​ക്കാ​രൻ അങ്ങനെ​യൊ​രു കാര്യ​സ്ഥ​നാ​യി​രു​ന്നു. (ഉൽ 24:2) യോ​സേ​ഫും അത്തര​മൊ​രു കാര്യ​സ്ഥ​നാ​യി​രു​ന്നെന്ന്‌ ഉൽ 39:4 പറയുന്നു. യേശു​വി​ന്റെ ദൃഷ്ടാ​ന്ത​ത്തി​ലെ ‘കാര്യ​സ്ഥ​നെ​ക്കു​റിച്ച്‌’ ഏകവച​ന​ത്തി​ലാ​ണു പറഞ്ഞി​രി​ക്കു​ന്ന​തെ​ങ്കി​ലും ആ കാര്യസ്ഥൻ ഒരൊറ്റ വ്യക്തിയെ മാത്ര​മാ​ണു ചിത്രീ​ക​രി​ക്കു​ന്ന​തെന്ന്‌ അതിന്‌ അർഥമില്ല. പലർ ചേർന്ന ഒരു കൂട്ടത്തെ സൂചി​പ്പി​ക്കാൻ ഏകവച​ന​നാ​മം ഉപയോ​ഗി​ച്ചി​രി​ക്കു​ന്ന​തി​ന്റെ ഉദാഹ​ര​ണങ്ങൾ തിരു​വെ​ഴു​ത്തു​ക​ളി​ലുണ്ട്‌. ഉദാഹ​ര​ണ​ത്തിന്‌, ഇസ്രാ​യേൽ ജനത​യോ​ടു സംസാ​രി​ച്ച​പ്പോൾ യഹോവ പറഞ്ഞ വാക്കുകൾ ശ്രദ്ധി​ക്കുക. “നിങ്ങൾ എന്റെ സാക്ഷികൾ (ബഹുവ​ചനം) . . . അതെ, ഞാൻ തിര​ഞ്ഞെ​ടുത്ത എന്റെ ദാസൻ (ഏകവചനം)” എന്നാണു ദൈവം പറഞ്ഞത്‌. (യശ 43:10) സമാന​മാ​യി, ഈ ദൃഷ്ടാ​ന്ത​ത്തി​ലെ കാര്യ​സ്ഥ​നും പലർ ചേർന്ന​താണ്‌. മത്ത 24:45-ൽ കാണുന്ന സമാന്ത​ര​വി​വ​ര​ണ​ത്തി​ലെ ദൃഷ്ടാ​ന്ത​ത്തിൽ ഈ കാര്യ​സ്ഥനെ, “വിശ്വ​സ്‌ത​നും വിവേ​കി​യും ആയ അടിമ” എന്നു വിളി​ച്ചി​രി​ക്കു​ന്നു.

അടിമ: 42-ാം വാക്യ​ത്തിൽ പറഞ്ഞി​രി​ക്കുന്ന കാര്യ​സ്ഥ​നെ​യാണ്‌ ഇവിടെ “അടിമ” എന്നു വിളി​ച്ചി​രി​ക്കു​ന്നത്‌. (ലൂക്ക 12:42-ന്റെ പഠനക്കു​റി​പ്പു കാണുക.) വിശ്വ​സ്‌ത​നാ​യി​രു​ന്നാൽ ആ ‘അടിമ​യ്‌ക്കു’ പ്രതി​ഫലം ലഭിക്കു​മാ​യി​രു​ന്നു. (ലൂക്ക 12:44) മത്ത 24:45-47-ൽ കാണുന്ന സമാന്ത​ര​വി​വ​ര​ണ​ത്തി​ലെ ദൃഷ്ടാ​ന്ത​ത്തിൽ ഈ കാര്യ​സ്ഥനെ, “വിശ്വ​സ്‌ത​നും വിവേ​കി​യും ആയ അടിമ” എന്നാണു വിളി​ച്ചി​രി​ക്കു​ന്നത്‌.​—ലൂക്ക 12:45-ന്റെ പഠനക്കു​റി​പ്പു കാണുക.

ആ അടിമ: ലൂക്ക 12:42-ൽ പറഞ്ഞി​രി​ക്കുന്ന കാര്യ​സ്ഥ​നെ​ക്കു​റി​ച്ചാണ്‌ ഇവിടെ അടിമ എന്നു പറഞ്ഞി​രി​ക്കു​ന്നത്‌. വിശ്വ​സ്‌ത​നാ​യി​രു​ന്നാൽ ‘ആ അടിമ​യ്‌ക്കു’ പ്രതി​ഫലം ലഭിക്കും. (ലൂക്ക 12:43, 44) എന്നാൽ അവിശ്വ​സ്‌ത​നെ​ങ്കിൽ അയാളെ ‘കഠിന​മാ​യി ശിക്ഷി​ക്കും.’ (ലൂക്ക 12:46) വാസ്‌ത​വ​ത്തിൽ യേശു​വി​ന്റെ വാക്കുകൾ, വിശ്വ​സ്‌ത​നായ കാര്യ​സ്ഥ​നുള്ള ഒരു മുന്നറി​യി​പ്പാണ്‌. ഇനി, മത്ത 24:45-51-ൽ കാണുന്ന സമാന്ത​ര​വി​വ​ര​ണ​ത്തി​ലെ ദൃഷ്ടാ​ന്ത​ത്തിൽ ‘ദുഷ്ടനായ ആ അടിമ എന്നെങ്കി​ലും . . . ഹൃദയ​ത്തിൽ പറഞ്ഞാൽ’ എന്ന വാക്കു​ക​ളു​ടെ അർഥവും ഇതി​നോ​ടു സമാന​മാണ്‌. ഭാവി​യിൽ ‘ആ അടിമ ദുഷ്ടനാ​യി​ത്തീ​രും’ എന്നു പ്രവചി​ക്കു​ക​യാ​യി​രു​ന്നില്ല യേശു; ‘ദുഷ്ടനായ ഒരു അടിമയെ’ യേശു നിയമി​ക്കു​ക​യു​മ​ല്ലാ​യി​രു​ന്നു. മറിച്ച്‌ വിശ്വ​സ്‌ത​നായ അടിമ എന്നെങ്കി​ലും ദുഷ്ടനായ ഒരു അടിമ​യു​ടെ സ്വഭാ​വ​വി​ശേ​ഷ​തകൾ കാണി​ച്ചു​തു​ട​ങ്ങി​യാൽ എന്തു സംഭവി​ക്കും എന്ന മുന്നറി​യി​പ്പു നൽകു​ക​യാ​യി​രു​ന്നു.

അയാളെ കഠിന​മാ​യി ശിക്ഷിച്ച്‌: മത്ത 24:51-ന്റെ പഠനക്കു​റി​പ്പു കാണുക.

ഒരു തീ കൊളു​ത്താൻ: യേശു​വി​ന്റെ വരവ്‌, ജൂതന്മാർക്കു പ്രക്ഷു​ബ്ധ​മായ ഒരു സമയത്തി​നു തുടക്കം കുറിച്ചു. ആ കാലഘട്ടം അവർക്ക്‌, ഒരു ആലങ്കാ​രി​കാർഥ​ത്തിൽ തീപോ​ലെ അനുഭ​വ​പ്പെട്ടു. യേശു എങ്ങനെ​യാണ്‌ ആ തീ കൊളു​ത്തി​യത്‌? യേശു ജനശ്ര​ദ്ധ​യി​ലേക്കു കൊണ്ടു​വന്ന പല വിഷയ​ങ്ങ​ളും ചൂടു​പി​ടിച്ച വാഗ്വാ​ദ​ങ്ങൾക്കു വഴി​വെച്ചു. പല വ്യാ​ജോ​പ​ദേ​ശ​ങ്ങ​ളും പാരമ്പ​ര്യ​ങ്ങ​ളും ആ അഗ്നിയിൽ കത്തിയ​മർന്നു. ഉദാഹ​ര​ണ​ത്തിന്‌, മിശിഹ ഇസ്രാ​യേൽ രാഷ്‌ട്രത്തെ റോമൻ ഭരണത്തിൽനിന്ന്‌ വിടു​വി​ക്കു​മെ​ന്നാ​യി​രു​ന്നു യേശു ഭൂമി​യി​ലു​ണ്ടാ​യി​രുന്ന സമയത്ത്‌ ജൂതന്മാ​രു​ടെ പ്രതീക്ഷ. എന്നാൽ ആ ദേശീ​യ​ത്വ​ചി​ന്താ​ഗ​തി​ക​ളെ​യെ​ല്ലാം അസ്ഥാന​ത്താ​ക്കി​ക്കൊണ്ട്‌ യേശു ലജ്ജാക​ര​മായ മരണത്തി​നു കീഴടങ്ങി. ഇനി, മനുഷ്യ​രു​ടെ മുമ്പി​ലുള്ള ഏറ്റവും പ്രധാ​ന​പ്പെട്ട വിഷയം ദൈവ​രാ​ജ്യ​മാ​ണെന്നു തീക്ഷ്‌ണ​മായ പ്രസം​ഗ​പ്ര​വർത്ത​ന​ത്തി​ലൂ​ടെ യേശു കാണി​ച്ചു​കൊ​ടു​ത്ത​തും ആ ദേശ​ത്തെ​ങ്ങും ചൂടു​പി​ടിച്ച തർക്കങ്ങൾക്കു തിരി​കൊ​ളു​ത്തി.​—1കൊ 1:23.

അവസാ​നത്തെ ചില്ലി​ക്കാശ്‌: അക്ഷ. “അവസാ​നത്തെ ലെപ്‌ടോൺ.” ലെപ്‌ടോൺ എന്ന ഗ്രീക്കു​പ​ദ​ത്തി​ന്റെ അർഥം “ചെറുത്‌, കനം കുറഞ്ഞത്‌” എന്നൊ​ക്കെ​യാണ്‌. ഒരു ദിനാ​റെ​യു​ടെ 1/128 ആയിരു​ന്നു ഒരു ലെപ്‌ടോൺ. ഇതു തെളി​വ​നു​സ​രിച്ച്‌ ഇസ്രാ​യേ​ലിൽ ഉപയോ​ഗ​ത്തി​ലി​രുന്ന, ചെമ്പോ വെങ്കല​മോ കൊണ്ടുള്ള നാണയ​ങ്ങ​ളിൽ ഏറ്റവും ചെറു​താ​യി​രു​ന്നു.​—പദാവ​ലി​യിൽ “ലെപ്‌ടോൺ” എന്നതും അനു. ബി14-ഉം കാണുക.