സങ്കീർത്തനം 44:1-26
സംഗീതസംഘനായകന്‌; കോരഹുപുത്രന്മാർ+ രചിച്ചത്‌. മാസ്‌കിൽ.*
44 ദൈവമേ, പുരാതനകാലത്ത്‌,ഞങ്ങളുടെ പൂർവികരുടെ കാലത്ത്‌, അങ്ങ്‌ ചെയ്‌ത പ്രവൃത്തികൾഞങ്ങൾ സ്വന്തം കാതുകൊണ്ട്‌ കേട്ടിരിക്കുന്നു.+ഞങ്ങളുടെ പൂർവികർ അതു ഞങ്ങൾക്കു വിവരിച്ചുതന്നു.
2 അങ്ങയുടെ കൈയാൽ അങ്ങ്‌ ജനതകളെ ഓടിച്ചുകളഞ്ഞു;+എന്നിട്ട്‌ ഞങ്ങളുടെ പൂർവികരെ അവിടെ കുടിയിരുത്തി.+
അങ്ങ്‌ ജനതകളെ തകർത്ത്‌ അവരെ ഓടിച്ചുകളഞ്ഞു.+
3 വാളുകൊണ്ടല്ല അവർ ദേശം കൈവശമാക്കിയത്‌;+കൈക്കരുത്തുകൊണ്ടല്ല അവർ വിജയം വരിച്ചത്‌.+
പകരം അങ്ങയുടെ വലങ്കൈകൊണ്ടും കരബലംകൊണ്ടും+ മുഖപ്രകാശംകൊണ്ടും ആണ്‌;കാരണം അങ്ങയ്‌ക്ക്‌ അവരെ ഇഷ്ടമായിരുന്നു.+
4 ദൈവമേ, അങ്ങാണ്‌ എന്റെ രാജാവ്‌;+യാക്കോബിനു സമ്പൂർണവിജയം നൽകിയാലും.
5 അങ്ങയുടെ ശക്തിയാൽ ഞങ്ങൾ എതിരാളികളെ തുരത്തിയോടിക്കും;+ഞങ്ങൾക്കെതിരെ എഴുന്നേൽക്കുന്നവരെ അങ്ങയുടെ പേരിൽ ഞങ്ങൾ ചവിട്ടിമെതിക്കും.+
6 കാരണം ഞാൻ എന്റെ വില്ലിൽ ആശ്രയിക്കുന്നില്ല;എന്റെ വാളിന്‌ എന്നെ രക്ഷിക്കാനുമാകില്ല.+
7 അങ്ങാണ്‌ എതിരാളികളിൽനിന്ന്‌ ഞങ്ങളെ രക്ഷിച്ചത്‌.+ഞങ്ങളെ വെറുക്കുന്നവരെ അങ്ങ്‌ അപമാനിതരാക്കി.
8 ദിവസം മുഴുവൻ ഞങ്ങൾ ദൈവത്തെ സ്‌തുതിക്കും;അങ്ങയുടെ പേരിനു ഞങ്ങൾ എന്നും നന്ദിയേകും. (സേലാ)
9 എന്നാൽ ഇപ്പോൾ അങ്ങ്‌ ഞങ്ങളെ തള്ളിക്കളഞ്ഞ്‌ നാണംകെടുത്തിയിരിക്കുന്നു;ഞങ്ങളുടെ സൈന്യത്തോടൊപ്പം അങ്ങ്‌ പോരുന്നില്ല.
10 ശത്രുവിന്റെ മുന്നിൽനിന്ന്‌ ഞങ്ങൾ പിൻവാങ്ങാൻ അങ്ങ്‌ ഇടയാക്കുന്നു;+ഞങ്ങളെ വെറുക്കുന്നവർ കണ്ണിൽക്കാണുന്നതെല്ലാം എടുത്തുകൊണ്ടുപോകുന്നു.
11 ആടുകളെപ്പോലെ തിന്നുകളയാൻ അങ്ങ്‌ ഞങ്ങളെ ഏൽപ്പിച്ചുകൊടുക്കുന്നു;ജനതകളുടെ ഇടയിലേക്ക്‌ അങ്ങ്‌ ഞങ്ങളെ ചിതറിച്ചുകളഞ്ഞിരിക്കുന്നു.+
12 അങ്ങയുടെ ജനത്തെ അങ്ങ്‌ നിസ്സാരവിലയ്‌ക്കു വിറ്റുകളയുന്നു;+ഈ കച്ചവടത്തിൽനിന്ന്‌* അങ്ങ്‌ ലാഭമൊന്നും ഉണ്ടാക്കുന്നില്ല.
13 അങ്ങ്‌ ഞങ്ങളെ അയൽക്കാർക്കു പരിഹാസവിഷയമാക്കുന്നു.ചുറ്റുമുള്ളവരുടെയെല്ലാം നിന്ദയ്‌ക്കും അവഹേളനത്തിനും ഞങ്ങൾ പാത്രമാകുന്നു.
14 രാഷ്‌ട്രങ്ങൾ ഞങ്ങളെ പുച്ഛിക്കാൻ* അങ്ങ്‌ ഇടയാക്കുന്നു;+ജനതകൾ ഞങ്ങളെ കളിയാക്കി തല കുലുക്കുന്നു.
15 ദിവസം മുഴുവൻ ഞാൻ അപമാനിതനായി കഴിയുന്നു;നാണക്കേട്‌ എന്നെ മൂടുന്നു;
16 അവരുടെ കളിയാക്കലും അധിക്ഷേപവും ആണ്‌ അതിനു കാരണം;ശത്രു ഞങ്ങളോടു പ്രതികാരവും ചെയ്യുന്നു.
17 ഇത്രയൊക്കെ അനുഭവിച്ചിട്ടും ഞങ്ങൾ അങ്ങയെ മറന്നിട്ടില്ല;അങ്ങയുടെ ഉടമ്പടി ലംഘിച്ചിട്ടുമില്ല.+
18 ഞങ്ങളുടെ ഹൃദയം വ്യതിചലിച്ചിട്ടില്ല;ഞങ്ങളുടെ കാലടികൾ അങ്ങയുടെ പാതയിൽനിന്ന്‌ മാറിയിട്ടില്ല.
19 എന്നാൽ കുറുനരികൾ കഴിയുന്നിടത്തുവെച്ച്‌ അങ്ങ്‌ ഞങ്ങളെ തകർത്തുകളഞ്ഞു;കൂരിരുട്ടിനാൽ അങ്ങ്‌ ഞങ്ങളെ മൂടി.
20 ഞങ്ങളുടെ ദൈവത്തിന്റെ പേര്‌ ഞങ്ങൾ മറന്നാൽ,ഒരു അന്യദൈവത്തോടു പ്രാർഥിക്കാൻ ഞങ്ങൾ കൈ വിരിച്ചാൽ,
21 ദൈവം അതു കണ്ടുപിടിക്കില്ലേ?
ദൈവം ഹൃദയരഹസ്യങ്ങൾപോലും അറിയുന്നു.+
22 അങ്ങയെപ്രതി ദിവസം മുഴുവൻ ഞങ്ങൾ കൊല്ലപ്പെടുകയാണ്‌;കശാപ്പിനുള്ള ആടുകളെപ്പോലെയാണു ഞങ്ങളെ കാണുന്നത്‌.+
23 യഹോവേ, എഴുന്നേൽക്കേണമേ. അങ്ങ്‌ എന്താണ്‌ ഇങ്ങനെ ഉറങ്ങുന്നത്‌?+
ഉണരേണമേ. എന്നേക്കുമായി ഞങ്ങളെ തള്ളിക്കളയരുതേ.+
24 അങ്ങ്‌ എന്താണു മുഖം മറച്ചിരിക്കുന്നത്‌?
ഞങ്ങളുടെ കഷ്ടതയും ഞെരുക്കവും അങ്ങ്‌ മറന്നുകളയുന്നത്‌ എന്താണ്‌?
25 ഞങ്ങളെ പൊടിയിൽ തള്ളിയിട്ടിരിക്കുന്നല്ലോ;ഞങ്ങളുടെ ശരീരം നിലംപറ്റിയിരിക്കുന്നു.+
26 ഞങ്ങളുടെ രക്ഷകനായി എഴുന്നേൽക്കേണമേ!+
അങ്ങയുടെ അചഞ്ചലമായ സ്‌നേഹത്തെ കരുതി ഞങ്ങളെ രക്ഷിക്കേണമേ.*+
അടിക്കുറിപ്പുകള്‍
^ അഥവാ “അവരുടെ വിലകൊണ്ട്‌.”
^ അക്ഷ. “ഒരു പഴഞ്ചൊല്ലാക്കാൻ.”
^ അക്ഷ. “വീണ്ടെടുക്കേണമേ.”