സങ്കീർത്തനം 73:1-28
ആസാഫ്‌ രചിച്ച ശ്രുതിമധുരമായ ഗാനം.+
73 ദൈവം ഇസ്രായേലിനോട്‌, ഹൃദയശുദ്ധിയുള്ളവരോട്‌,+ നല്ലവനാണ്‌, സംശയമില്ല.
2 എന്റെ കാലടികൾ വഴിതെറ്റുന്ന ഘട്ടത്തോളം എത്തിയതാണ്‌;എന്റെ ചുവടുകൾ വഴുതിപ്പോയേനേ.+
3 കാരണം ദുഷ്ടന്റെ സമാധാനം കണ്ടപ്പോൾഗർവികളോട്‌* എനിക്ക്‌ അസൂയ തോന്നി.+
4 അവരുടേതു വേദനയില്ലാത്ത മരണം;അവരുടെ ശരീരം ആരോഗ്യമുള്ളത്‌.*+
5 മറ്റു മനുഷ്യർക്കുള്ള ആകുലതകൾ അവർക്കില്ല;+മറ്റുള്ളവർക്കുള്ള ദുരിതങ്ങളുമില്ല.+
6 അതിനാൽ, ധാർഷ്ട്യം അവരുടെ മാല;+അക്രമം അവരുടെ വസ്‌ത്രം.
7 സമൃദ്ധിയാൽ അവരുടെ കണ്ണ്‌ ഉന്തിനിൽക്കുന്നു;സകല ഭാവനകളെയും വെല്ലുന്നതാണ്‌ അവരുടെ നേട്ടങ്ങൾ.
8 അവർ ചീത്ത പറയുന്നു, അധിക്ഷേപിക്കുന്നു.+
ദ്രോഹിക്കുമെന്നു ഗർവത്തോടെ ഭീഷണി മുഴക്കുന്നു.+
9 ആകാശത്തോളം ഉയർന്നതുപോലെയാണ്‌ അവരുടെ സംസാരം;അവരുടെ നാവ്‌ ഭൂമിയിലെങ്ങും വീമ്പിളക്കി നടക്കുന്നു.
10 അങ്ങനെ, ദൈവജനം* അവരുടെ പക്ഷം ചേരുന്നു,അവരുടെ ജലസമൃദ്ധിയിൽനിന്ന്‌ കുടിക്കുന്നു.
11 അവർ പറയുന്നു: “ദൈവം എങ്ങനെ അറിയാനാണ്‌?+
അത്യുന്നതന്‌ ഇതൊക്കെ അറിയാനാകുമോ?”
12 അതെ, ദുഷ്ടന്മാർക്ക്‌ ഇങ്ങനെയാണ്‌; അവരുടെ ജീവിതം പരമസുഖം.+
അവർ സമ്പത്തു വാരിക്കൂട്ടുന്നു.+
13 ഞാൻ ഹൃദയം ശുദ്ധമായി സൂക്ഷിച്ചതുംനിഷ്‌കളങ്കതയിൽ കൈ കഴുകി വെടിപ്പാക്കിയതും വെറുതേയായല്ലോ.+
14 ദിവസം മുഴുവൻ ഞാൻ അസ്വസ്ഥനായിരുന്നു;+രാവിലെതോറും എനിക്കു ശിക്ഷണം കിട്ടി.+
15 എന്നാൽ ഇക്കാര്യങ്ങൾ ഞാൻ പറഞ്ഞിരുന്നെങ്കിൽഅങ്ങയുടെ ജനത്തെ വഞ്ചിക്കുകയായിരുന്നേനേ.
16 ഇതു മനസ്സിലാക്കാൻ ശ്രമിച്ചപ്പോൾഎനിക്ക്‌ ആകെ അസ്വസ്ഥത തോന്നി;
17 എന്നാൽ ദൈവത്തിന്റെ മഹത്ത്വമാർന്ന വിശുദ്ധമന്ദിരത്തിൽ ചെന്നപ്പോൾ അതു മാറി.അവരുടെ ഭാവി എന്താകുമെന്നു ഞാൻ അപ്പോൾ തിരിച്ചറിഞ്ഞു.
18 അങ്ങ്‌ അവരെ നിശ്ചയമായും വഴുവഴുപ്പുള്ളിടത്ത്‌ നിറുത്തുന്നു;+
നാശത്തിലേക്ക്‌ അവരെ തള്ളിയിടുന്നു.+
19 എത്ര ക്ഷണത്തിലാണ്‌ അവർ നശിച്ചുപോയത്‌!+
എത്ര പെട്ടെന്നായിരുന്നു അവരുടെ ദാരുണമായ അന്ത്യം!
20 യഹോവേ, ഉണരുമ്പോൾ മാഞ്ഞുപോകുന്ന സ്വപ്‌നംപോലെയല്ലോ അവർ;അങ്ങ്‌ എഴുന്നേൽക്കുമ്പോൾ അവരെ തള്ളിക്കളയുമല്ലോ.*
21 എന്നാൽ, എന്റെ ഹൃദയത്തിൽ അമർഷം നിറഞ്ഞിരുന്നു;+ഉള്ളിന്റെ ഉള്ളിൽ* എനിക്കു കടുത്ത വേദന തോന്നി.
22 ഞാൻ ബുദ്ധിയും ബോധവും ഇല്ലാതെ ചിന്തിച്ചു;അങ്ങയുടെ മുന്നിൽ ഞാൻ വെറുമൊരു മൃഗത്തെപ്പോലെയായിരുന്നു.
23 എന്നാൽ, ഇപ്പോൾ ഞാൻ അങ്ങയുടെ കൂടെത്തന്നെയാണ്‌;അങ്ങ്‌ എന്റെ വലങ്കൈ പിടിച്ചിരിക്കുന്നു.+
24 ഉപദേശത്താൽ അങ്ങ്‌ എന്നെ വഴിനടത്തുന്നു;+അങ്ങനെ, എന്നെ മഹത്ത്വത്തിലേക്കു നയിക്കുന്നു.+
25 അങ്ങല്ലാതെ സ്വർഗത്തിൽ എനിക്ക്‌ ആരാണുള്ളത്‌?
ഭൂമിയിലും അങ്ങയെയല്ലാതെ മറ്റൊന്നും ഞാൻ ആഗ്രഹിക്കുന്നില്ല.+
26 എന്റെ ശരീരവും ഹൃദയവും തളർന്നുപോയേക്കാം;എന്നാൽ, ദൈവം എന്റെ ഹൃദയത്തിന്റെ പാറ, എന്നും എന്റെ ഓഹരി.+
27 അങ്ങയിൽനിന്ന്‌ അകന്നുനിൽക്കുന്നവർ തീർച്ചയായും നശിച്ചുപോകും.
അങ്ങയെ ഉപേക്ഷിച്ച്‌ അവിശ്വസ്‌തരാകുന്ന* ഏവരെയും അങ്ങ്‌ ഇല്ലാതാക്കും.*+
28 എന്നാൽ, ഞാൻ ദൈവത്തോട്‌ അടുത്ത്‌ ചെല്ലും; അതല്ലോ എനിക്കു നല്ലത്‌.+
ദൈവത്തിന്റെ പ്രവൃത്തികളെല്ലാം വർണിക്കേണ്ടതിനു+ഞാൻ പരമാധികാരിയാം യഹോവയെ എന്റെ അഭയമാക്കിയിരിക്കുന്നു.
അടിക്കുറിപ്പുകള്‍
^ അഥവാ “പൊങ്ങച്ചം പറയുന്നവരോട്‌.”
^ അഥവാ “അവർക്കു കുടവയറുണ്ട്‌.”
^ അക്ഷ. “അവന്റെ ജനം.”
^ അക്ഷ. “അവരുടെ രൂപത്തെ പുച്ഛിച്ചുതള്ളുമല്ലോ.”
^ അക്ഷ. “എന്റെ വൃക്കകളിൽ.”
^ അഥവാ “അസാന്മാർഗികളെപ്പോലെ പെരുമാറുന്ന.”
^ അക്ഷ. “നിശ്ശബ്ദരാക്കും.”