സുഭാഷിതങ്ങൾ 20:1-30
20 വീഞ്ഞു പരിഹാസിയും+ മദ്യം തോന്നിയവാസിയും+ ആണ്‌;അവയാൽ വഴിതെറ്റിപ്പോകുന്നവർ ജ്ഞാനികളല്ല.+
2 രാജാവിന്റെ ഭയങ്കരത്വം സിംഹത്തിന്റെ* മുരൾച്ചപോലെ;+രാജകോപം ഉണർത്തുന്നവൻ സ്വന്തം ജീവൻ അപകടത്തിലാക്കുന്നു.+
3 കലഹത്തിൽനിന്ന്‌ ഒഴിഞ്ഞുമാറുന്നത്‌ ഒരു മനുഷ്യനു മാന്യത;+എന്നാൽ വിഡ്‌ഢികളെല്ലാം അതിൽ ചെന്ന്‌ ചാടും.+
4 മടിയൻ മഞ്ഞുകാലത്ത്‌ നിലം ഉഴുന്നില്ല;കൊയ്‌ത്തുകാലത്ത്‌ ഒന്നുമില്ലാതെവരുമ്പോൾ അവന്‌ ഇരക്കേണ്ടിവരും.*+
5 മനുഷ്യന്റെ ഹൃദയത്തിലെ ചിന്തകൾ* ആഴമുള്ള വെള്ളം;എന്നാൽ വകതിരിവുള്ളവൻ അതു കോരിയെടുക്കും.
6 തങ്ങളുടെ സ്‌നേഹം വിശ്വസ്‌തമാണെന്നു പലരും അവകാശപ്പെടുന്നു;എന്നാൽ വിശ്വസ്‌തനായ ആരെങ്കിലുമുണ്ടോ?
7 നീതിമാൻ നിഷ്‌കളങ്കതയോടെ* നടക്കുന്നു;+
അവനു ശേഷമുള്ള അവന്റെ മക്കളും* സന്തോഷമുള്ളവർ.+
8 ന്യായം വിധിക്കാൻ രാജാവ്‌ സിംഹാസനത്തിൽ ഇരിക്കുമ്പോൾ+അദ്ദേഹം കണ്ണുകൊണ്ട്‌ ദുഷ്ടതയെല്ലാം അരിച്ചുമാറ്റുന്നു.+
9 “ഞാൻ എന്റെ ഹൃദയം ശുദ്ധീകരിച്ചു;+ഞാൻ ഇപ്പോൾ പാപമില്ലാത്തവനാണ്‌”+ എന്ന്‌ ആർക്കു പറയാനാകും?
10 സത്യസന്ധമല്ലാത്ത അളവുകളും തെറ്റായ തൂക്കക്കട്ടികളും*യഹോവയ്‌ക്ക്‌ അറപ്പാണ്‌.+
11 ഒരു കൊച്ചുകുഞ്ഞുപോലും അവന്റെ പ്രവൃത്തികൾകൊണ്ട്‌താൻ നിഷ്‌കളങ്കനും നേരുള്ളവനും ആണോ എന്നു വെളിപ്പെടുത്തുന്നു.+
12 കേൾക്കുന്ന കാതും കാണുന്ന കണ്ണും—ഇവ രണ്ടും യഹോവ ഉണ്ടാക്കി.+
13 ഉറക്കത്തെ സ്‌നേഹിക്കരുത്‌, നീ ദരിദ്രനായിത്തീരും.+
കണ്ണു തുറക്കൂ, നീ ആഹാരം കഴിച്ച്‌ തൃപ്‌തനാകും.+
14 സാധനം വാങ്ങുന്നവൻ, “ഇതു കൊള്ളില്ല, തീരെ കൊള്ളില്ല” എന്നു പറയുന്നു;എന്നിട്ട്‌ അവൻ പോയി വീമ്പിളക്കുന്നു.+
15 സ്വർണവും ധാരാളം പവിഴക്കല്ലുകളും* ഉണ്ട്‌;എന്നാൽ അറിവുള്ള അധരങ്ങൾ അതിലും വിലപിടിപ്പുള്ളത്‌.+
16 ഒരുവൻ അന്യനു ജാമ്യം നിന്നിട്ടുണ്ടെങ്കിൽ അവന്റെ വസ്‌ത്രം പിടിച്ചുവാങ്ങുക;+ഒരു അന്യദേശക്കാരിക്കുവേണ്ടി* അങ്ങനെ ചെയ്‌തിട്ടുണ്ടെങ്കിൽ അവനിൽനിന്ന്‌ പണയവസ്‌തു പിടിച്ചെടുക്കുക.+
17 വഞ്ചിച്ച്‌ നേടിയ ആഹാരം ഒരുവനു രുചികരമായി തോന്നുന്നു;എന്നാൽ പിന്നീട്‌ അവന്റെ വായിൽ ചരൽ നിറയും.+
18 കൂടിയാലോചിച്ചാൽ* പദ്ധതികൾ വിജയിക്കും.*+വിദഗ്‌ധമാർഗനിർദേശത്തിനു* ചേർച്ചയിൽ യുദ്ധം ചെയ്യുക.+
19 പരദൂഷണം പറയുന്നവൻ രഹസ്യങ്ങൾ പാട്ടാക്കുന്നു;+പരകാര്യങ്ങൾ പറഞ്ഞുനടക്കുന്നവന്റെ* അടുത്ത്‌ പോകരുത്‌.
20 അപ്പനെയും അമ്മയെയും ശപിക്കുന്നവന്റെ വിളക്ക്‌ഇരുട്ടാകുമ്പോൾ കെട്ടുപോകും.+
21 ആദ്യം അത്യാഗ്രഹത്തോടെ കൈക്കലാക്കിയ അവകാശംഅവസാനം അനുഗ്രഹമായിരിക്കില്ല.+
22 “ഞാൻ ഇതിനു പ്രതികാരം ചെയ്യും”+ എന്നു പറയരുത്‌.
യഹോവയിൽ പ്രത്യാശ വെക്കുക,+ അവൻ നിന്നെ രക്ഷിക്കും.+
23 കൃത്യതയില്ലാത്ത തൂക്കക്കട്ടികൾ* യഹോവയ്‌ക്ക്‌ അറപ്പാണ്‌;കള്ളത്തുലാസു നല്ലതല്ല.
24 മനുഷ്യന്റെ കാലടികളെ യഹോവ നിയന്ത്രിക്കുന്നു;+ഒരു മനുഷ്യനു തന്റെ വഴികൾ* എങ്ങനെ മനസ്സിലാകും?
25 “ഇതു വിശുദ്ധം”+ എന്നു തിടുക്കത്തിൽ വിളിച്ചുപറഞ്ഞിട്ട്‌
പിന്നീടു മാത്രം അതെക്കുറിച്ച്‌ ആലോചിക്കുന്നവൻ കുടുക്കിലാകും.+
26 ബുദ്ധിമാനായ രാജാവ്‌ ദുഷ്ടന്മാരെ അരിച്ചുമാറ്റുന്നു;+അവരുടെ മുകളിലൂടെ മെതിവണ്ടി ഓടിക്കുന്നു.+
27 മനുഷ്യന്റെ ശ്വാസം യഹോവയുടെ വിളക്കാണ്‌;അതു മനുഷ്യന്റെ ഉള്ളം പരിശോധിക്കുന്നു.
28 അചഞ്ചലസ്‌നേഹവും വിശ്വസ്‌തതയും രാജാവിനെ കാക്കുന്നു;+അചഞ്ചലസ്‌നേഹത്താൽ അദ്ദേഹം സിംഹാസനം നിലനിറുത്തുന്നു.+
29 ചെറുപ്പക്കാരുടെ ശക്തിയാണ്‌+ അവരുടെ മഹത്ത്വം;വൃദ്ധരുടെ നര+ അവരുടെ തേജസ്സ്‌.
30 മുറിവുകളും ചതവുകളും തിന്മ നീക്കിക്കളയുന്നു;+ചുട്ട അടി ഒരുവന്റെ ഉള്ളം ശുദ്ധീകരിക്കുന്നു.
അടിക്കുറിപ്പുകള്‍
^ അഥവാ “സടയുള്ള, വളർച്ചയെത്തിയ സിംഹത്തിന്റെ.”
^ മറ്റൊരു സാധ്യത “അവൻ കൊയ്‌ത്തുകാലത്ത്‌ തേടിനടക്കും, എന്നാൽ ഒന്നും കിട്ടില്ല.”
^ അഥവാ “ഉദ്ദേശ്യങ്ങൾ.” അക്ഷ. “ഉപദേശം.”
^ അക്ഷ. “ആൺമക്കളും.”
^ അഥവാ “ധർമനിഷ്‌ഠയോടെ.” പദാവലിയിൽ “ധർമനിഷ്‌ഠ” കാണുക.
^ അഥവാ “രണ്ടു തരം തൂക്കക്കട്ടികളും രണ്ടു തരം അളവുപാത്രങ്ങളും.”
^ അഥവാ “അന്യദേശക്കാരനുവേണ്ടി.”
^ അഥവാ “ഉപദേശം തേടിയാൽ.”
^ അഥവാ “ഉറപ്പുള്ളതാകും.”
^ അഥവാ “ജ്ഞാനമുള്ള ഉപദേശത്തിന്‌.”
^ അഥവാ “വായ്‌കൊണ്ട്‌ വശീകരിക്കുന്നവന്റെ.”
^ അഥവാ “രണ്ടു തരം തൂക്കക്കട്ടികൾ.”
^ അഥവാ “താൻ പോകേണ്ട വഴി.”