സെഖര്യ 11:1-17
11 “ലബാനോനേ, നിന്റെ വാതിലുകൾ തുറക്കൂ,ഒരു തീ വന്ന്‌ നിന്റെ ദേവദാരുക്കളെ ദഹിപ്പിക്കട്ടെ.
2 ജൂനിപ്പർ മരമേ, വിലപിക്കൂ! ദേവദാരു മറിഞ്ഞുവീണിരിക്കുന്നു;നിന്റെ പ്രൗഢിയാർന്ന വൃക്ഷങ്ങൾ നശിച്ചുപോയി!
ബാശാനിലെ ഓക്ക്‌ മരങ്ങളേ, വിലപിക്കൂ!ഇടതൂർന്ന വനം ഇല്ലാതായിരിക്കുന്നു!
3 ശ്രദ്ധിക്കൂ! അതാ, ഇടയന്മാർ നിലവിളിക്കുന്നു;അവരുടെ പ്രൗഢി ഇല്ലാതായല്ലോ.
അതാ, യുവസിംഹങ്ങൾ* ഗർജിക്കുന്നു;യോർദാൻതീരത്തെ കുറ്റിക്കാടുകൾ നശിച്ചുപോയല്ലോ.
4 “എന്റെ ദൈവമായ യഹോവ പറയുന്നു: ‘അറുക്കാനുള്ള ആടുകളെ മേയ്‌ക്കുക.+
5 അവയെ വാങ്ങിയവർ അവയെ അറുക്കുന്നെങ്കിലും+ അവർക്കു ശിക്ഷ ലഭിക്കുന്നില്ല. അവയെ വിൽക്കുന്നവർ,+ “യഹോവയ്‌ക്കു സ്‌തുതി ലഭിക്കട്ടെ, ഞാൻ പണക്കാരനാകുമല്ലോ” എന്നു പറയുന്നു. അവയുടെ ഇടയന്മാർക്ക്‌ അവയോടു കരുണ തോന്നുന്നില്ല.’+
6 “‘ദേശത്ത്‌ താമസിക്കുന്നവരോടു ഞാൻ ഇനി കരുണ കാണിക്കില്ല’ എന്ന്‌ യഹോവ പ്രഖ്യാപിക്കുന്നു. ‘ഞാൻ ഓരോരുത്തരെയും അവരുടെ അയൽക്കാരന്റെയും രാജാവിന്റെയും കൈയിൽ ഏൽപ്പിക്കും. അവർ ദേശം തകർത്തുകളയും. എന്നാൽ ഞാൻ ആരെയും അവരുടെ കൈയിൽനിന്ന്‌ രക്ഷിക്കില്ല.’”
7 ദുരിതം അനുഭവിക്കുന്ന ആടുകളേ, നിങ്ങൾക്കുവേണ്ടി ഞാൻ അറുക്കാനുള്ള ആടുകളെ മേയ്‌ക്കാൻ തുടങ്ങി.+ ഞാൻ രണ്ടു കോൽ എടുത്തു; ഒന്നിനു പ്രീതി എന്നും മറ്റേതിന്‌ ഐക്യം എന്നും പേരിട്ടു.+ അങ്ങനെ ഞാൻ ആട്ടിൻപറ്റത്തെ മേയ്‌ക്കാൻ തുടങ്ങി.
8 ഒരു മാസത്തിനകം ഞാൻ മൂന്ന്‌ ഇടയന്മാരെ പിരിച്ചുവിട്ടു. എനിക്ക്‌ അവരുടെ പ്രവൃത്തികൾ സഹിക്കാനായില്ല, അവർക്ക്‌ എന്നെയും തീരെ ഇഷ്ടമില്ലായിരുന്നു.
9 ഞാൻ പറഞ്ഞു: “ഇനി ഞാൻ നിങ്ങളെ മേയ്‌ക്കില്ല. ചാകുന്നവ ചാകട്ടെ, നശിക്കുന്നവ നശിക്കട്ടെ. ബാക്കിയുള്ളവ പരസ്‌പരം കടിച്ചുകീറട്ടെ.”
10 ഞാൻ പ്രീതി എന്ന കോൽ എടുത്ത്‌ ഒടിച്ചുകളഞ്ഞു,+ സകല ജനങ്ങളുമായി ഉണ്ടാക്കിയ ഉടമ്പടി അസാധുവാക്കി.
11 അന്നു ഞാൻ അങ്ങനെ ചെയ്യുന്നതു കണ്ടപ്പോൾ, ദുരിതം അനുഭവിക്കുന്ന ആടുകൾക്ക്‌ അത്‌ യഹോവ പറഞ്ഞതാണെന്നു മനസ്സിലായി.
12 ഞാൻ അവരോടു പറഞ്ഞു: “നിങ്ങൾക്കു ശരിയെന്നു തോന്നുന്നെങ്കിൽ എന്റെ കൂലി തരുക. ഇല്ലെങ്കിൽ തരേണ്ടാ.” അവർ എനിക്കു കൂലിയായി 30 വെള്ളിനാണയം തന്നു.*+
13 അപ്പോൾ യഹോവ എന്നോടു പറഞ്ഞു: “അതു ഖജനാവിനു നേരെ എറിയുക. അവർ എന്റെ വിലയായി കണക്കാക്കിയ ‘വലിയൊരു’ തുകയല്ലേ അത്‌?”+ അങ്ങനെ ഞാൻ ആ 30 വെള്ളിനാണയം യഹോവയുടെ ഭവനത്തിലെ ഖജനാവിലേക്ക്‌ എറിഞ്ഞു.+
14 പിന്നെ ഞാൻ ഐക്യം എന്നു പേരുള്ള രണ്ടാമത്തെ കോൽ ഒടിച്ചുകളഞ്ഞു,+ യഹൂദയും ഇസ്രായേലും തമ്മിലുള്ള സാഹോദര്യം ഇല്ലാതാക്കി.+
15 യഹോവ എന്നോടു പറഞ്ഞു: “ഒന്നിനും കൊള്ളാത്ത ഒരു ഇടയന്റെ പണിയായുധം എടുക്കുക.+
16 ദേശത്ത്‌ ഒരു ഇടയൻ എഴുന്നേൽക്കാൻ ഞാൻ ഇടയാക്കും. ചാകാറായ ആടുകളെ അവൻ പരിപാലിക്കില്ല.+ അവൻ കുഞ്ഞാടുകളെ തിരയുകയോ മുറിവേറ്റവയെ ശുശ്രൂഷിക്കുകയോ എഴുന്നേറ്റുനിൽക്കാൻ ശേഷിയുള്ളവയ്‌ക്കു തീറ്റ കൊടുക്കുകയോ ഇല്ല.+ പകരം, അവൻ കൊഴുത്ത ആടുകളുടെ മാംസം തിന്നും,+ ആടുകളുടെ കുളമ്പുകൾ മുറിച്ചെടുക്കും.+
17 ആട്ടിൻപറ്റത്തെ ഉപേക്ഷിക്കുന്ന,+ ഒരു ഗുണവുമില്ലാത്ത എന്റെ ഇടയന്റെ കാര്യം കഷ്ടം!+
അവന്റെ കൈക്കും വലതുകണ്ണിനും വാളുകൊണ്ട്‌ വെട്ടേൽക്കും.
അവന്റെ കൈ പൂർണമായും ശോഷിച്ചുപോകും,അവന്റെ വലതുകണ്ണിന്റെ കാഴ്‌ച നഷ്ടപ്പെടും.”*
അടിക്കുറിപ്പുകള്‍
^ അഥവാ “സടയുള്ള, വളർച്ചയെത്തിയ സിംഹങ്ങൾ.”
^ അക്ഷ. “തൂക്കിത്തന്നു.”
^ അക്ഷ. “വലംകണ്ണു മങ്ങും.”