ദിനവൃത്താന്തം ഒന്നാം ഭാഗം 10:1-14
10 അക്കാലത്ത്‌ ഫെലിസ്‌ത്യർ ഇസ്രായേലിനോടു യുദ്ധം ചെയ്‌തു. ഇസ്രായേല്യർ ഫെലിസ്‌ത്യരുടെ മുന്നിൽനിന്ന്‌ തോറ്റോടി. ധാരാളം ആളുകൾ ഗിൽബോവ പർവതത്തിൽവെച്ച്‌ കൊല്ലപ്പെട്ടു.+
2 ഫെലിസ്‌ത്യർ ശൗലിനെയും ആൺമക്കളെയും വിടാതെ പിന്തുടർന്നു. അവർ ശൗലിന്റെ മക്കളായ യോനാഥാനെയും അബീനാദാബിനെയും മൽക്കീ-ശുവയെയും+ കൊന്നുകളഞ്ഞു.
3 ശൗലിന്‌ എതിരെ പോരാട്ടം രൂക്ഷമായി. വില്ലാളികൾ ശൗലിനെ കണ്ട്‌ അമ്പ്‌ എയ്‌തു. ശൗലിനു മുറിവേറ്റു.+
4 ശൗൽ തന്റെ ആയുധവാഹകനോടു പറഞ്ഞു: “നിന്റെ വാൾ ഊരി എന്നെ കുത്തുക. ഇല്ലെങ്കിൽ ഈ അഗ്രചർമികൾ വന്ന്‌ എന്നോടു ക്രൂരമായി* പെരുമാറും.”+ പക്ഷേ ആയുധവാഹകൻ വല്ലാതെ പേടിച്ചുപോയിരുന്നതുകൊണ്ട്‌ അതിനു തയ്യാറായില്ല. അതുകൊണ്ട്‌ ശൗൽ വാൾ പിടിച്ച്‌ അതിനു മുകളിലേക്കു വീണു.+
5 ശൗൽ മരിച്ചെന്നു കണ്ടപ്പോൾ ആയുധവാഹകനും സ്വന്തം വാളിനു മുകളിലേക്കു വീണ്‌ മരിച്ചു.
6 അങ്ങനെ ശൗലും മൂന്ന്‌ ആൺമക്കളും മരിച്ചു; ശൗലിന്റെ വീട്ടിലുള്ളവരെല്ലാം ഒരുമിച്ച്‌ മരണമടഞ്ഞു.+
7 ശൗലും മക്കളും മരിച്ചെന്നും മറ്റെല്ലാവരും ഓടിരക്ഷപ്പെട്ടെന്നും കണ്ടപ്പോൾ താഴ്‌വരയിലുള്ള ഇസ്രായേൽ ജനം മുഴുവൻ അവരുടെ നഗരങ്ങൾ ഉപേക്ഷിച്ച്‌ ഓടിപ്പോയി. അപ്പോൾ ഫെലിസ്‌ത്യർ വന്ന്‌ അവിടെ താമസമാക്കി.
8 കൊല്ലപ്പെട്ടവരുടെ വസ്‌തുക്കൾ കൊള്ളയടിക്കാൻ പിറ്റേന്നു ഫെലിസ്‌ത്യർ വന്നപ്പോൾ ശൗലും ആൺമക്കളും ഗിൽബോവ പർവതത്തിൽ മരിച്ചുകിടക്കുന്നതു കണ്ടു.+
9 അവർ ശൗലിന്റെ വസ്‌ത്രം ഊരി തല വെട്ടിയെടുത്തു. ശൗലിന്റെ കവചവും* കൈക്കലാക്കി. എന്നിട്ട്‌ ആ വാർത്ത അവരുടെ വിഗ്രഹങ്ങളെയും+ ജനത്തെയും അറിയിക്കാൻ ഫെലിസ്‌ത്യദേശത്ത്‌ എല്ലായിടത്തും സന്ദേശം അയച്ചു.
10 അവർ ശൗലിന്റെ കവചം അവരുടെ ദൈവത്തിന്റെ ക്ഷേത്രത്തിൽ വെച്ചു. ശൗലിന്റെ തല ദാഗോന്റെ ഭവനത്തിൽ തറച്ചുവെച്ചു.+
11 ഫെലിസ്‌ത്യർ ശൗലിനോടു ചെയ്‌തതെല്ലാം ഗിലെയാദിലെ യാബേശിലുള്ളവർ+ കേട്ടപ്പോൾ+
12 അവിടെയുള്ള യോദ്ധാക്കളെല്ലാം ചെന്ന്‌ ശൗലിന്റെയും ആൺമക്കളുടെയും മൃതശരീരങ്ങൾ എടുത്ത്‌ യാബേശിലേക്കു കൊണ്ടുവന്നു. അവർ അവരുടെ അസ്ഥികൾ യാബേശിലെ വലിയ മരത്തിനു ചുവട്ടിൽ അടക്കം ചെയ്‌തു.+ എന്നിട്ട്‌ ഏഴു ദിവസം ഉപവസിച്ചു.
13 അങ്ങനെ, യഹോവയോട്‌ അവിശ്വസ്‌തത കാണിച്ച ശൗൽ മരിച്ചു. കാരണം യഹോവ പറഞ്ഞത്‌ അയാൾ അനുസരിച്ചില്ല.+ മാത്രമല്ല, ദൈവത്തോടു ചോദിക്കുന്നതിനു പകരം ശൗൽ ആത്മാക്കളുടെ ഉപദേശം തേടുന്ന സ്‌ത്രീയോട്‌* അരുളപ്പാടു ചോദിച്ചു.+
14 അതുകൊണ്ട്‌ യഹോവ ശൗലിനെ കൊന്നുകളഞ്ഞിട്ട്‌ രാജാധികാരം യിശ്ശായിയുടെ മകനായ ദാവീദിനു കൊടുത്തു.+