ഇയ്യോബ്‌ 19:1-29
19 അപ്പോൾ ഇയ്യോബ്‌ പറഞ്ഞു:
2 “നിങ്ങൾ എത്ര നേരം എന്നെ ഇങ്ങനെ വേദനിപ്പിക്കും?+വാക്കുകൾകൊണ്ട്‌ എന്നെ തകർക്കും?+
3 പത്തു പ്രാവശ്യം നിങ്ങൾ എന്നെ ശകാരിച്ചു;*എന്നോടു ക്രൂരമായി പെരുമാറാൻ നിങ്ങൾക്കു നാണമില്ലേ?+
4 ഞാൻ തെറ്റു ചെയ്‌തിട്ടുണ്ടെങ്കിൽഅതിന്റെ ഫലം ഞാൻ അനുഭവിച്ചുകൊള്ളാം.
5 ഞാൻ അപമാനിതനായതിൽ ഒരു തെറ്റുമില്ല എന്നു പറഞ്ഞ്‌എന്നെക്കാൾ വലിയവരാകാനാണു നിങ്ങൾ ശ്രമിക്കുന്നതെങ്കിൽ
6 അറിഞ്ഞുകൊള്ളൂ: ദൈവമാണ്‌ എന്നെ വഴിതെറ്റിച്ചത്‌;ദൈവം തന്റെ വലയിൽ എന്നെ വീഴിച്ചു.
7 ‘ദ്രോഹം, ദ്രോഹം!’ എന്നു ഞാൻ വിളിച്ചുകൂകി; പക്ഷേ ആരും എന്നെ സഹായിച്ചില്ല.+ഞാൻ സഹായത്തിനായി നിലവിളിച്ചു; പക്ഷേ എനിക്കു നീതി കിട്ടിയില്ല.+
8 ദൈവം എന്റെ വഴി കൻമതിൽകൊണ്ട്‌ കെട്ടിയടച്ചു, എനിക്ക്‌ അപ്പുറം കടക്കാനാകുന്നില്ല;ദൈവം എന്റെ പാതകൾ ഇരുട്ടുകൊണ്ട്‌ മൂടിയിരിക്കുന്നു.+
9 ദൈവം എന്റെ മഹത്ത്വം അഴിച്ചുകളഞ്ഞു;എന്റെ തലയിൽനിന്ന്‌ കിരീടം എടുത്തുമാറ്റി.
10 ഞാൻ നശിക്കുംവരെ എന്റെ നാലു വശത്തുനിന്നും ദൈവം എന്നെ തകർക്കുന്നു;ഒരു മരംപോലെ എന്റെ പ്രത്യാശ പിഴുതുകളയുന്നു.
11 ദൈവകോപം എനിക്കു നേരെ ആളിക്കത്തുന്നു,ദൈവം എന്നെ ഒരു ശത്രുവായി കാണുന്നു.+
12 ദൈവത്തിന്റെ പടക്കൂട്ടങ്ങൾ ഒരുമിച്ചുവന്ന്‌ എന്നെ ഉപരോധിക്കുന്നു;അവർ എന്റെ കൂടാരത്തിനു ചുറ്റും പാളയമടിക്കുന്നു.
13 ദൈവം എന്റെ സഹോദരന്മാരെ ദൂരേക്ക്‌ ഓടിച്ചുവിട്ടു;എന്നെ അറിയാവുന്നവർ എന്നിൽനിന്ന്‌ അകന്നുമാറിയിരിക്കുന്നു.+
14 എന്റെ ഉറ്റ ചങ്ങാതിമാർ* എന്നെ വിട്ട്‌ പോയി;എനിക്ക്‌ അടുത്ത്‌ അറിയാവുന്നവർ എന്നെ മറന്നു.+
15 എന്റെ അതിഥികളും+ എന്റെ ദാസിമാരും എന്നെ അന്യനായി കാണുന്നു;അവർ എന്നെ ഒരു അന്യദേശക്കാരനായി കണക്കാക്കുന്നു.
16 ഞാൻ എന്റെ ദാസനെ വിളിക്കുമ്പോൾ അവൻ വിളി കേൾക്കുന്നില്ല;എനിക്ക്‌ അവനോടു കരുണയ്‌ക്കായി യാചിക്കേണ്ടിവരുന്നു.
17 എന്റെ ശ്വാസംപോലും എന്റെ ഭാര്യക്ക്‌ അറപ്പായിത്തീർന്നു;+എന്റെ സഹോദരന്മാർ* എന്നെ വെറുക്കുന്നു.
18 കൊച്ചുകുട്ടികൾപോലും എന്നെ കളിയാക്കുന്നു;ഞാൻ എഴുന്നേൽക്കുമ്പോൾ അവർ എന്നെ പരിഹസിക്കുന്നു.
19 എന്റെ ഉറ്റ സുഹൃത്തുക്കൾക്കെല്ലാം എന്നോട്‌ അറപ്പാണ്‌;+ഞാൻ സ്‌നേഹിച്ചവർ എനിക്ക്‌ എതിരെ തിരിഞ്ഞിരിക്കുന്നു.+
20 എന്റെ ശരീരം എല്ലും തോലും ആയിരിക്കുന്നു;+തലനാരിഴയ്‌ക്കാണു* ഞാൻ രക്ഷപ്പെടുന്നത്‌.
21 ദൈവം എന്നെ കൈ നീട്ടി അടിച്ചിരിക്കുന്നു.+എന്നോടു കരുണ കാണിക്കേണമേ; എന്റെ കൂട്ടുകാരേ, എന്നോടു കരുണ കാണിക്കേണമേ.
22 ദൈവം ചെയ്യുന്നതുപോലെ നിങ്ങളും എന്തിന്‌ എന്നെ ഉപദ്രവിക്കുന്നു?+എന്തിന്‌ എന്നെ ഇങ്ങനെ ആക്രമിച്ചുകൊണ്ടിരിക്കുന്നു?*+
23 എന്റെ വാക്കുകളെല്ലാം ഒന്ന്‌ എഴുതിവെച്ചിരുന്നെങ്കിൽ!അവ ഒരു പുസ്‌തകത്തിൽ കുറിച്ചുവെക്കാൻ കഴിഞ്ഞിരുന്നെങ്കിൽ!
24 ഉളിയും ഈയവും കൊണ്ട്‌അതു മായാതെ ഒരു പാറയിൽ കൊത്തിവെച്ചിരുന്നെങ്കിൽ!
25 എന്റെ വിമോചകൻ*+ ജീവിച്ചിരിപ്പുണ്ടെന്ന്‌ എനിക്ക്‌ അറിയാം;ഭാവിയിൽ അവൻ വരും, ഭൂമിയുടെ മേൽ* നിൽക്കും.
26 ഇങ്ങനെ എന്റെ തൊലി നശിച്ചശേഷംജീവനുള്ളപ്പോൾത്തന്നെ ഞാൻ ദൈവത്തെ കാണും.
27 അതെ, ഞാൻ ദൈവത്തെ കാണും,മറ്റാരുടെയുമല്ല, എന്റെ സ്വന്തം കണ്ണുകൾ ദൈവത്തെ കാണും.+
എന്നാൽ ഉള്ളിന്റെ ഉള്ളിൽ എനിക്ക്‌ ഒന്നും താങ്ങാനാകുന്നില്ല.
28 ‘ഞങ്ങൾ അവനെ ഉപദ്രവിക്കുന്നില്ലല്ലോ’ എന്നു നിങ്ങൾ പറയുന്നു;+
പ്രശ്‌നങ്ങളുടെ കാരണം ഞാനാണല്ലോ.
29 എന്നാൽ നിങ്ങൾ വാളിനെ ഭയന്നുകൊള്ളൂ!+വാൾ തെറ്റുകൾക്കു ശിക്ഷ നൽകുന്നു.ഒരു ന്യായാധിപനുണ്ടെന്ന കാര്യം നിങ്ങൾ ഓർക്കണം.”+
അടിക്കുറിപ്പുകള്‍
^ അഥവാ “അപമാനിച്ചു.”
^ അഥവാ “എന്റെ ബന്ധുക്കൾ.”
^ അക്ഷ. “എന്റെ ഗർഭപാത്രത്തിന്റെ പുത്രന്മാർ.” അതായത്‌, എന്നെ ചുമന്ന ഗർഭപാത്രത്തിന്റെ (എന്റെ അമ്മയുടെ ഗർഭപാത്രത്തിന്റെ) പുത്രന്മാർ.
^ അക്ഷ. “എന്റെ പല്ലിന്റെ തൊലിയുംകൊണ്ടാണ്‌.”
^ അക്ഷ. “എന്റെ മാംസംകൊണ്ട്‌ തൃപ്‌തിവരാത്തത്‌ എന്ത്‌?”
^ അഥവാ “വീണ്ടെടുപ്പുകാരൻ.”
^ അക്ഷ. “പൊടിയിൽ.”
