യശയ്യ 59:1-21
59 രക്ഷിക്കാൻ കഴിയാത്ത വിധം യഹോവയുടെ കൈ ചെറുതല്ല,+കേൾക്കാനാകാത്ത വിധം ദൈവത്തിന്റെ ചെവി അടഞ്ഞിരിക്കുകയല്ല.*+
2 നിങ്ങളുടെതന്നെ തെറ്റുകളാണു നിങ്ങളെ നിങ്ങളുടെ ദൈവത്തിൽനിന്ന്‌ അകറ്റിയത്‌,+
നിങ്ങളുടെ പാപങ്ങൾ നിമിത്തമാണ്‌ അവൻ നിങ്ങളിൽനിന്ന്‌ മുഖം മറച്ചത്‌;നിങ്ങൾ പറയുന്നതു കേൾക്കാൻ അവൻ ഒരുക്കമല്ല.+
3 കാരണം, നിങ്ങളുടെ കൈകൾ രക്തംകൊണ്ട്‌ മലിനമായിരിക്കുന്നു,+നിങ്ങളുടെ വിരലുകളിൽ പാപക്കറ പുരണ്ടിരിക്കുന്നു.
നിങ്ങളുടെ ചുണ്ടുകൾ നുണ പറയുന്നു,+ നിങ്ങളുടെ നാവ്‌ അനീതി മന്ത്രിക്കുന്നു.
4 ആരും നീതിയോടെ സംസാരിക്കുന്നില്ല,+ആരും സത്യസന്ധരായി കോടതിയിൽ ചെല്ലുന്നില്ല.
അവർ മിഥ്യയിൽ* ആശ്രയിച്ച്‌+ അർഥശൂന്യമായി സംസാരിക്കുന്നു.
അവർ കുഴപ്പങ്ങൾ ഗർഭം ധരിച്ച്‌ ദോഷം പ്രസവിക്കുന്നു.+
5 അവർ വിഷസർപ്പത്തിന്റെ മുട്ടകൾ വിരിയിക്കുന്നു,അവയുടെ മുട്ടകൾ തിന്നുന്നവരെല്ലാം മരിച്ചുവീഴും,
മുട്ട പൊട്ടിയാൽ അണലി പുറത്തുവരും.അവർ ചിലന്തിവല നെയ്യുന്നു.+
6 അവരുടെ ചിലന്തിവല വസ്‌ത്രത്തിനു കൊള്ളില്ല,അവർ ഉണ്ടാക്കിയത്‌ ഉപയോഗിച്ച്‌ അവർക്കു ദേഹം മറയ്‌ക്കാനാകില്ല.+
അവർ ദ്രോഹം പ്രവർത്തിക്കുന്നു,അവരുടെ കൈകളിൽ ക്രൂരകൃത്യങ്ങൾ നിറഞ്ഞിരിക്കുന്നു.+
7 തിന്മ പ്രവർത്തിക്കാൻ അവരുടെ കാലുകൾ ഓടുന്നു,നിരപരാധിയുടെ രക്തം ചൊരിയാൻ അവർ വ്യഗ്രത കാട്ടുന്നു.+
അവരുടെ ചിന്തകൾ ദ്രോഹചിന്തകളാണ്‌;അവരുടെ വഴികളിൽ വിനാശവും കഷ്ടതയും ഉണ്ട്‌.+
8 സമാധാനത്തിന്റെ വഴി അവർക്ക്‌ അറിയില്ല,അവരുടെ പാതകളിൽ ന്യായം കാണാനില്ല.+
അവർ വളഞ്ഞ വഴികളിലൂടെ സഞ്ചരിക്കുന്നു;അതിലൂടെ നടക്കുന്ന ആർക്കും സമാധാനമുണ്ടാകില്ല.+
9 അതുകൊണ്ടാണു ന്യായം ഞങ്ങളിൽനിന്ന്‌ അകന്നിരിക്കുന്നത്‌,നീതി ഞങ്ങളുടെ അടുക്കലോളം എത്താത്തത്‌.
വെളിച്ചം ഉണ്ടാകുമെന്നു ഞങ്ങൾ പ്രതീക്ഷിച്ചു; എന്നാൽ ഇതാ, ഇരുട്ടു മാത്രം!തെളിച്ചം ഉണ്ടാകാൻ കൊതിച്ചു; എന്നാൽ ഇതാ, ഞങ്ങൾ ഇരുളിൽ നടക്കുന്നു!+
10 ഞങ്ങൾ അന്ധരെപ്പോലെ മതിൽ തപ്പിനടക്കുന്നു;കണ്ണില്ലാത്തവരെപ്പോലെ ഞങ്ങൾ തപ്പിത്തടയുന്നു.+
ഇരുട്ടു വീഴുന്ന നേരത്ത്‌ എന്നപോലെ നട്ടുച്ചയ്‌ക്കും ഞങ്ങൾ തട്ടിവീഴുന്നു,ബലവാന്മാരുടെ ഇടയിൽ ഞങ്ങൾ മരിച്ചവരെപ്പോലെ കഴിയുന്നു.
11 ഞങ്ങളെല്ലാം കരടികളെപ്പോലെ മുരളുന്നു,സങ്കടപ്പെട്ട്‌ പ്രാവുകളെപ്പോലെ കുറുകുന്നു.
ഞങ്ങൾ ന്യായത്തിനായി പ്രത്യാശിക്കുന്നു, അതു കിട്ടുന്നില്ല;രക്ഷയ്‌ക്കായി ആഗ്രഹിക്കുന്നു; എന്നാൽ അതു ഞങ്ങളിൽനിന്ന്‌ ഏറെ അകലെയാണ്‌.
12 ഞങ്ങൾ ഒരുപാടു തവണ അങ്ങയോടു ധിക്കാരം കാണിച്ചു,+ഞങ്ങളുടെ ഓരോ പാപവും ഞങ്ങൾക്കെതിരെ സാക്ഷി പറയുന്നു.+
ഞങ്ങളുടെ മത്സരങ്ങളെക്കുറിച്ചെല്ലാം ഞങ്ങൾ ഓർക്കുന്നു,ഞങ്ങളുടെ തെറ്റുകളെക്കുറിച്ച്‌ ഞങ്ങൾക്കു നന്നായി അറിയാം.+
13 ഞങ്ങൾ ലംഘനങ്ങൾ ചെയ്‌തു; യഹോവയെ തള്ളിപ്പറഞ്ഞു,ഞങ്ങൾ ഞങ്ങളുടെ ദൈവത്തിനു പുറംതിരിഞ്ഞു.
ദ്രോഹിക്കുന്നതിനെക്കുറിച്ചും ധിക്കാരം കാണിക്കുന്നതിനെക്കുറിച്ചും സംസാരിച്ചു;+ഞങ്ങൾ നുണകൾ ഗർഭം ധരിച്ചു; ഹൃദയത്തിൽനിന്ന്‌ അസത്യങ്ങൾ മന്ത്രിച്ചു.+
14 നീതിയെ തിരികെ ഓടിച്ചിരിക്കുന്നു,+ന്യായം ദൂരെ മാറിനിൽക്കുന്നു;+സത്യം* പൊതുസ്ഥലത്ത്‌* ഇടറിവീണിരിക്കുന്നു,നേരിന്‌ അങ്ങോട്ടു പ്രവേശിക്കാനാകുന്നില്ല.
15 സത്യം* അപ്രത്യക്ഷമായിരിക്കുന്നു,+തെറ്റിൽനിന്ന്‌ അകന്നുമാറുന്ന സകലരും കൊള്ളയടിക്കപ്പെടുന്നു.
ഇതെല്ലാം കണ്ട്‌ യഹോവയ്‌ക്ക്‌ അമർഷം തോന്നി,*ന്യായം ഒരിടത്തും കാണാനില്ലായിരുന്നു.+
16 അവിടെ ആരുമില്ല എന്ന്‌ അവൻ കണ്ടു,ആരും ഇടപെടാത്തതു കണ്ട്‌ അവൻ അതിശയിച്ചുപോയി.അതുകൊണ്ട്‌ അവന്റെ സ്വന്തം കൈ രക്ഷ* കൊണ്ടുവന്നു.അവന്റെ നീതി അവനെ തുണച്ചു.
17 ഒരു പടച്ചട്ടപോലെ അവൻ നീതി അണിഞ്ഞു,തലയിൽ രക്ഷ* എന്ന പടത്തൊപ്പി വെച്ചു.+
പ്രതികാരത്തെ അവൻ തന്റെ വസ്‌ത്രമാക്കി,+തീക്ഷ്‌ണതയെ മേലങ്കിയായി ധരിച്ചു.
18 അവരുടെ പ്രവൃത്തികൾക്ക്‌ അവൻ പകരം കൊടുക്കും:+
അവന്റെ എതിരാളികൾക്കു ക്രോധവും ശത്രുക്കൾക്കു ശിക്ഷയും കൊടുക്കും.+
ദ്വീപുകൾക്കു കൊടുക്കാനുള്ളത്‌ അവൻ കൊടുത്തുതീർക്കും.
19 പടിഞ്ഞാറുള്ളവർ* യഹോവയുടെ പേരുംകിഴക്കുള്ളവർ* ദൈവത്തിന്റെ തേജസ്സും ഭയപ്പെടും.യഹോവയുടെ ആത്മാവ്‌ നയിക്കുന്ന,കുതിച്ചുപായുന്ന ഒരു നദിപോലെ അവൻ വരും.
20 “സീയോനിലേക്കു വീണ്ടെടുപ്പുകാരൻ+ വരും,+ലംഘനങ്ങൾ വിട്ടുമാറിയ,+ യാക്കോബിന്റെ വംശജരുടെ അടുത്തേക്ക്‌ അവൻ വരും” എന്ന്‌ യഹോവ പ്രഖ്യാപിക്കുന്നു.
21 “അവരോടുള്ള എന്റെ ഉടമ്പടി ഇതാണ്‌”+ എന്ന്‌ യഹോവ പറയുന്നു. “നിന്നിലുള്ള എന്റെ ആത്മാവും നിന്റെ വായിൽ ഞാൻ വെച്ചിരിക്കുന്ന എന്റെ വാക്കുകളും നീങ്ങിപ്പോകില്ല. അവ നിന്റെ വായിൽനിന്നോ നിന്റെ മക്കളുടെ വായിൽനിന്നോ കൊച്ചുമക്കളുടെ വായിൽനിന്നോ മാറിപ്പോകില്ല” എന്ന്‌ യഹോവ പറയുന്നു. “ഇന്നുമുതൽ എന്നെന്നും അത്‌ അവിടെയുണ്ടായിരിക്കും.”
അടിക്കുറിപ്പുകള്‍
^ അക്ഷ. “ഭാരമുള്ളതല്ല.”
^ അഥവാ “ശൂന്യതയിൽ.”
^ അഥവാ “സത്യസന്ധത.”
^ അഥവാ “പൊതുചത്വരത്തിൽ.”
^ അഥവാ “സത്യസന്ധത.”
^ അക്ഷ. “ഇതെല്ലാം യഹോവ കണ്ടു; അത്‌ അവന്റെ കണ്ണിൽ മോശമായിരുന്നു.”
^ അഥവാ “വിജയം.”
^ അഥവാ “വിജയം.”
^ അഥവാ “സൂര്യാസ്‌തമയത്തിലുള്ളവർ.”
^ അഥവാ “സൂര്യോദയത്തിലുള്ളവർ.”
