സങ്കീർത്തനം 118:1-29
118 യഹോവയോടു നന്ദി പറയുവിൻ, ദൈവം നല്ലവനല്ലോ;+ദൈവത്തിന്റെ അചഞ്ചലസ്‌നേഹം എന്നും നിലനിൽക്കുന്നത്‌.
2 “ദൈവത്തിന്റെ അചഞ്ചലമായ സ്‌നേഹം എന്നും നിലനിൽക്കുന്നത്‌” എന്ന്‌
ഇസ്രായേൽ ഇപ്പോൾ പറയട്ടെ.
3 “ദൈവത്തിന്റെ അചഞ്ചലമായ സ്‌നേഹം എന്നും നിലനിൽക്കുന്നത്‌” എന്ന്‌
അഹരോൻഗൃഹത്തിലുള്ളവർ ഇപ്പോൾ പറയട്ടെ.
4 “ദൈവത്തിന്റെ അചഞ്ചലമായ സ്‌നേഹം എന്നും നിലനിൽക്കുന്നത്‌” എന്ന്‌
യഹോവയെ ഭയപ്പെടുന്നവർ ഇപ്പോൾ പറയട്ടെ.
5 എന്റെ കഷ്ടതയിൽ ഞാൻ യാഹിനെ* വിളിച്ചപേക്ഷിച്ചു;യാഹ്‌ എനിക്ക്‌ ഉത്തരമേകി; എന്നെ സുരക്ഷിതസ്ഥാനത്തേക്കു* കൊണ്ടുവന്നു.+
6 യഹോവ എന്റെ പക്ഷത്തുണ്ട്‌; ഞാൻ പേടിക്കില്ല.+
മനുഷ്യന്‌ എന്നോട്‌ എന്തു ചെയ്യാനാകും?+
7 എന്റെ സഹായിയായി* യഹോവ എന്റെ പക്ഷത്തുണ്ട്‌;+എന്നെ വെറുക്കുന്നവരുടെ വീഴ്‌ച ഞാൻ കാണും.+
8 മനുഷ്യരെ ആശ്രയിക്കുന്നതിനെക്കാൾയഹോവയെ അഭയമാക്കുന്നതു നല്ലത്‌.+
9 പ്രഭുക്കന്മാരെ ആശ്രയിക്കുന്നതിനെക്കാൾയഹോവയെ അഭയമാക്കുന്നതു നല്ലത്‌.+
10 ജനതകൾ ഒന്നടങ്കം എന്നെ ചുറ്റിവളഞ്ഞു,എന്നാൽ, യഹോവയുടെ നാമത്തിൽഞാൻ അവരെയെല്ലാം തുരത്തിയോടിച്ചു.+
11 അവർ എന്നെ വളഞ്ഞു; അതെ, നാലു വശത്തുനിന്നും വളഞ്ഞു,എന്നാൽ, യഹോവയുടെ നാമത്തിൽഞാൻ അവരെയെല്ലാം തുരത്തിയോടിച്ചു.
12 തേനീച്ച പൊതിയുംപോലെ അവർ എന്നെ വളഞ്ഞു,പക്ഷേ, മുൾപ്പടർപ്പിലെ തീ അണയ്‌ക്കുംപോലെ അവരെ പെട്ടെന്ന്‌ അണച്ചുകളഞ്ഞു.
യഹോവയുടെ നാമത്തിൽ ഞാൻ അവരെയെല്ലാം തുരത്തി.+
13 എന്നെ വീഴ്‌ത്താൻ അവർ* ആഞ്ഞ്‌ തള്ളി;എന്നാൽ യഹോവ എന്നെ സഹായിച്ചു.
14 യാഹ്‌ എന്റെ സങ്കേതവും ബലവും;ദൈവം എന്റെ രക്ഷയായിരിക്കുന്നു.+
15 നീതിമാന്മാരുടെ കൂടാരങ്ങളിൽസന്തോഷാരവവും രക്ഷയുടെ* ആർപ്പുവിളിയും മുഴങ്ങുന്നു.
യഹോവയുടെ വലങ്കൈ ശക്തി തെളിയിക്കുന്നു.+
16 യഹോവയുടെ വലങ്കൈ ഉന്നതമായിരിക്കുന്നു;യഹോവയുടെ വലങ്കൈ ശക്തി തെളിയിക്കുന്നു.+
17 ഇല്ല, ഞാൻ മരിക്കില്ല;യാഹിന്റെ പ്രവൃത്തികൾ വർണിക്കാൻ ഞാൻ ജീവിച്ചിരിക്കും.+
18 യാഹ്‌ എനിക്കു നല്ല ശിക്ഷണം നൽകി;+എങ്കിലും എന്നെ മരണത്തിനു വിട്ടുകൊടുത്തില്ല.+
19 എനിക്കായി നീതികവാടങ്ങൾ തുറന്നുതരേണമേ;+അകത്ത്‌ പ്രവേശിച്ച്‌ ഞാൻ യാഹിനെ സ്‌തുതിക്കും.
20 ഇത്‌ യഹോവയുടെ കവാടം.
നീതിമാൻ അതിലൂടെ പ്രവേശിക്കും.+
21 ഞാൻ അങ്ങയെ സ്‌തുതിക്കും;അങ്ങ്‌ എനിക്ക്‌ ഉത്തരം തന്നല്ലോ,+ എന്നെ രക്ഷിച്ചല്ലോ.
22 പണിയുന്നവർ തള്ളിക്കളഞ്ഞ കല്ല്‌മുഖ്യ മൂലക്കല്ലായിത്തീർന്നിരിക്കുന്നു.*+
23 ഇതിനു പിന്നിൽ യഹോവയാണ്‌;+നമുക്ക്‌ ഇതൊരു അതിശയംതന്നെ.+
24 ഇത്‌ യഹോവ ഒരുക്കിയ ദിവസം;നമുക്ക്‌ ആനന്ദിച്ചുല്ലസിക്കാനുള്ള ദിവസം.
25 യഹോവേ, ദയവുചെയ്‌ത്‌ ഞങ്ങളെ രക്ഷിച്ചാലും! ഞങ്ങൾ യാചിക്കുകയാണ്‌.
യഹോവേ, ദയവുചെയ്‌ത്‌ ഞങ്ങൾക്കു വിജയം തരേണമേ.
26 യഹോവയുടെ നാമത്തിൽ വരുന്നവൻ അനുഗൃഹീതൻ;+യഹോവയുടെ ഭവനത്തിൽനിന്ന്‌ ഞങ്ങൾ നിങ്ങളെ അനുഗ്രഹിക്കുന്നു.
27 യഹോവയാണു ദൈവം,നമുക്കു വെളിച്ചം തരുന്ന ദൈവം.+
മരച്ചില്ലകൾ കൈയിൽ ഏന്തി ഉത്സവഘോഷയാത്രയിൽ പങ്കെടുക്കുവിൻ!+യാഗപീഠത്തിന്റെ കൊമ്പുകൾവരെ ചെല്ലുവിൻ!+
28 അങ്ങ്‌ എന്റെ ദൈവം; ഞാൻ അങ്ങയെ സ്‌തുതിക്കും;എന്റെ ദൈവമേ, ഞാൻ അങ്ങയെ പുകഴ്‌ത്തും.+
29 യഹോവയോടു നന്ദി പറയുവിൻ,+ ദൈവം നല്ലവനല്ലോ;ദൈവത്തിന്റെ അചഞ്ചലസ്‌നേഹം എന്നും നിലനിൽക്കുന്നത്‌.+
അടിക്കുറിപ്പുകള്‍
^ യഹോവ എന്ന പേരിന്റെ ഹ്രസ്വരൂപമാണ്‌ “യാഹ്‌.”
^ അഥവാ “വിശാലമായ ഒരു സ്ഥലത്തേക്ക്‌.”
^ മറ്റൊരു സാധ്യത “എന്നെ സഹായിക്കുന്നവരോടൊപ്പം.”
^ മറ്റൊരു സാധ്യത “നീ.”
^ അഥവാ “വിജയത്തിന്റെ.”
^ അക്ഷ. “മൂലയുടെ തലയായിത്തീർന്നിരിക്കുന്നു.”
