സങ്കീർത്തനം 139:1-24
സംഗീതസംഘനായകന്‌; ദാവീദ്‌ രചിച്ച ശ്രുതിമധുരമായ ഗാനം.
139 യഹോവേ, അങ്ങ്‌ എന്നെ സൂക്ഷ്‌മമായി പരിശോധിച്ചിരിക്കുന്നു; അങ്ങ്‌ എന്നെ അറിയുന്നല്ലോ.+
2 ഞാൻ ഇരിക്കുന്നതും എഴുന്നേൽക്കുന്നതും അങ്ങ്‌ അറിയുന്നു.+
ദൂരത്തുനിന്ന്‌ എന്റെ ചിന്തകൾ മനസ്സിലാക്കുന്നു.+
3 എന്റെ നടപ്പും കിടപ്പും അങ്ങ്‌ നിരീക്ഷിക്കുന്നു;*എന്റെ എല്ലാ വഴികളും അങ്ങയ്‌ക്കു സുപരിചിതമാണ്‌.+
4 യഹോവേ, പറയാൻ ഞാൻ നാക്കെടുത്തില്ല,അതിനു മുമ്പേ അങ്ങ്‌ അതു മുഴുവൻ അറിയുന്നല്ലോ.+
5 എന്റെ മുന്നിലും പിന്നിലും അങ്ങുണ്ട്‌. അങ്ങ്‌ എന്നെ വലയം ചെയ്യുന്നു.അങ്ങയുടെ കൈ എന്റെ മേൽ വെക്കുന്നു.
6 അത്തരം അറിവ്‌ എന്റെ ഗ്രഹണശക്തിക്ക്‌ അതീതം.*
എനിക്ക്‌ എത്തിപ്പിടിക്കാനാകാത്തത്ര ഉയരത്തിലാണ്‌ അത്‌.*+
7 അങ്ങയുടെ ആത്മാവിൽനിന്ന്‌ എനിക്ക്‌ എങ്ങോട്ട്‌ ഓടിമറയാനാകും?അങ്ങയുടെ കൺവെട്ടത്തുനിന്ന്‌ എവിടേക്ക്‌ ഓടിയകലാനാകും?+
8 ഞാൻ സ്വർഗത്തിലേക്കു കയറിയാൽ അങ്ങ്‌ അവിടെയുണ്ടാകും;ശവക്കുഴിയിൽ* കിടക്ക വിരിച്ചാൽ അവിടെയും അങ്ങുണ്ടാകും.+
9 ഏറ്റവും അകലെയുള്ള കടൽത്തീരത്ത്‌ കഴിയാൻപുലരിയുടെ ചിറക്‌ അണിഞ്ഞ്‌ ഞാൻ പറന്നകന്നാൽ
10 അവിടെയും അങ്ങയുടെ കൈകൾ എന്നെ നയിക്കും,അങ്ങയുടെ വലങ്കൈ എന്നെ താങ്ങും.+
11 “ഇരുൾ എന്നെ മൂടിക്കളയുമല്ലോ!” എന്നു ഞാൻ പറഞ്ഞാൽ
എനിക്കു ചുറ്റുമുള്ള ഇരുൾ വെളിച്ചമായി മാറും.
12 കൂരിരുൾപ്പോലും അങ്ങയ്‌ക്ക്‌ ഒരു ഇരുട്ടല്ല;പകരം, രാത്രി പകൽപോലെ പ്രകാശിക്കും;+ഇരുളോ അങ്ങയ്‌ക്കു വെളിച്ചംപോലെ.+
13 അങ്ങാണല്ലോ എന്റെ വൃക്കകൾ നിർമിച്ചത്‌;അമ്മയുടെ ഗർഭപാത്രത്തിൽ അങ്ങ്‌ എന്നെ മറച്ചുവെച്ചു.*+
14 ഭയാദരവ്‌ തോന്നുംവിധം അതിശയകരമായി എന്നെ ഉണ്ടാക്കിയതിനാൽ+ ഞാൻ അങ്ങയെ സ്‌തുതിക്കുന്നു.
അങ്ങയുടെ പ്രവൃത്തികൾ അത്ഭുതാവഹം;+ഇക്കാര്യം എനിക്കു നന്നായി അറിയാം.
15 രഹസ്യത്തിൽ എന്നെ ഉണ്ടാക്കിയപ്പോൾ,ഭൂമിയുടെ ആഴങ്ങളിൽ എന്നെ നെയ്‌തെടുത്തപ്പോൾ,+എന്റെ അസ്ഥികൾ അങ്ങയ്‌ക്കു മറഞ്ഞിരുന്നില്ല.
16 ഞാൻ വെറുമൊരു ഭ്രൂണമായിരുന്നപ്പോൾ അങ്ങയുടെ കണ്ണുകൾ എന്നെ കണ്ടു;അതിന്റെ ഭാഗങ്ങളെല്ലാം—അവയിൽ ഒന്നുപോലും ഉണ്ടാകുന്നതിനു മുമ്പേഅവ രൂപംകൊള്ളുന്ന ദിവസങ്ങൾപോലും—അങ്ങയുടെ പുസ്‌തകത്തിൽ രേഖപ്പെടുത്തിയിരുന്നു.
17 അതുകൊണ്ട്‌, അങ്ങയുടെ ചിന്തകൾ എനിക്ക്‌ എത്രയോ അമൂല്യം!+
ദൈവമേ, അവയുടെ ആകത്തുക എത്ര വലുത്‌!+
18 എണ്ണാൻ നോക്കിയാൽ അവ മണൽത്തരികളെക്കാൾ അധികം!+
ഞാൻ ഉണരുമ്പോഴും അങ്ങയുടെകൂടെത്തന്നെ.*+
19 ദൈവമേ, അങ്ങ്‌ ദുഷ്ടന്മാരെ നിഗ്രഹിച്ചിരുന്നെങ്കിൽ!+
അപ്പോൾ, അക്രമാസക്തർ* എന്നെ വിട്ടകന്നേനേ;
20 അവർ അങ്ങയ്‌ക്കെതിരെ ദുഷ്ടലാക്കോടെ കാര്യങ്ങൾ പറയുന്നവർ;തിരുനാമം വിലയില്ലാത്ത വിധം ഉപയോഗിക്കുന്ന അവർ അങ്ങയുടെ ശത്രുക്കളല്ലോ.+
21 യഹോവേ, അങ്ങയെ വെറുക്കുന്നവരെ ഞാൻ വെറുക്കുന്നില്ലേ?+അങ്ങയെ ധിക്കരിക്കുന്നവരെ എനിക്ക്‌ അറപ്പല്ലേ?+
22 എനിക്ക്‌ അവരോടു വെറുപ്പു മാത്രമേ ഉള്ളൂ;+അവർ എന്റെ യഥാർഥശത്രുക്കളായി മാറിയിരിക്കുന്നു.
23 ദൈവമേ, എന്നെ സൂക്ഷ്‌മമായി പരിശോധിച്ച്‌ എന്റെ മനസ്സ്‌ അറിയേണമേ.+
എന്നെ പരിശോധിച്ച്‌ എന്റെ ഉത്‌കണ്‌ഠകൾ മനസ്സിലാക്കേണമേ.+
24 എന്നിൽ ഹാനികരമായ ഏതെങ്കിലും സ്വഭാവരീതികളുണ്ടോ എന്നു നോക്കേണമേ;+നിത്യതയുടെ പാതയിൽ എന്നെ നയിക്കേണമേ.+
അടിക്കുറിപ്പുകള്‍
^ അക്ഷ. “അളക്കുന്നു.”
^ അഥവാ “അത്‌ എനിക്കു മനസ്സിലാകുന്നതിനും അപ്പുറമാണ്‌.”
^ അഥവാ “അത്‌ എനിക്ക്‌ അത്യത്ഭുതം!”
^ മറ്റൊരു സാധ്യത “അങ്ങ്‌ എന്നെ നെയ്‌തെടുത്തു.”
^ മറ്റൊരു സാധ്യത “ഉണരുമ്പോഴും അവ എണ്ണുകയായിരിക്കും.”
^ അഥവാ “രക്തം ചൊരിഞ്ഞ്‌ കുറ്റക്കാരായവർ.”
