സെഖര്യ 2:1-13
2 ഞാൻ നോക്കിയപ്പോൾ ഒരാൾ കൈയിൽ അളവുനൂൽ പിടിച്ചുകൊണ്ട്‌ പോകുന്നതു കണ്ടു.+
2 “എവിടെ പോകുകയാണ്‌” എന്നു ഞാൻ അദ്ദേഹത്തോടു ചോദിച്ചു.
“യരുശലേമിന്റെ നീളവും വീതിയും അളന്നുനോക്കാൻ പോകുകയാണ്‌”+ എന്ന്‌ അദ്ദേഹം മറുപടി പറഞ്ഞു.
3 അപ്പോൾ, എന്നോടു സംസാരിച്ചുകൊണ്ടിരുന്ന ദൈവദൂതൻ എന്റെ അടുത്തുനിന്ന്‌ പോയി. ആ ദൂതനെ കാണാൻ മറ്റൊരു ദൂതൻ വന്നു.
4 ആ ദൂതൻ അദ്ദേഹത്തോടു പറഞ്ഞു: “ഓടിച്ചെന്ന്‌ ആ ചെറുപ്പക്കാരനോടു പറയുക: ‘“യരുശലേമിൽ ആളുകളും വളർത്തുമൃഗങ്ങളും നിറയും.+ അങ്ങനെ അവൾ മതിലുകളില്ലാത്ത ഒരു ഗ്രാമംപോലെയാകും.+
5 ഞാൻ അവൾക്കു ചുറ്റും തീകൊണ്ടുള്ള ഒരു മതിലാകും.+ അവൾക്കു നടുവിൽ എന്റെ മഹത്ത്വമുണ്ടായിരിക്കും”+ എന്ന്‌ യഹോവ പ്രഖ്യാപിക്കുന്നു.’”
6 “പെട്ടെന്നാകട്ടെ! വടക്കേ ദേശത്തുനിന്ന്‌ ഓടിരക്ഷപ്പെടൂ!”+ എന്ന്‌ യഹോവ ആഹ്വാനം ചെയ്യുന്നു.
“ഞാൻ നിങ്ങളെ നാലുപാടും* ചിതറിച്ചുകളഞ്ഞല്ലോ”+ എന്ന്‌ യഹോവ പറയുന്നു.
7 “സീയോനേ വരൂ! ബാബിലോൺപുത്രിയോടൊപ്പം താമസിക്കുന്നവരേ, രക്ഷപ്പെടൂ!+
8 താൻ മഹത്ത്വപൂർണനായശേഷം,* നിങ്ങളെ കൊള്ളയടിച്ച ജനതകളുടെ അടുത്തേക്ക്‌ എന്നെ അയച്ച സൈന്യങ്ങളുടെ അധിപനായ യഹോവ+ പറയുന്നു: ‘നിങ്ങളെ തൊടുന്നവൻ എന്റെ കണ്ണിലെ കൃഷ്‌ണമണിയെ തൊടുന്നു.+
9 ഇപ്പോൾ ഞാൻ അവർക്കു നേരെ കൈ ഓങ്ങും. അവരുടെ അടിമകൾ അവരെ കൊള്ളയടിക്കും.’+ എന്നെ അയച്ചതു സൈന്യങ്ങളുടെ അധിപനായ യഹോവയാണെന്നു നിങ്ങൾ മനസ്സിലാക്കും.
10 “സീയോൻപുത്രിയേ, സന്തോഷിച്ചാർക്കുക.+ ഇതാ, ഞാൻ വരുന്നു.+ ഞാൻ നിങ്ങളുടെ ഇടയിൽ വസിക്കും”+ എന്ന്‌ യഹോവ പ്രഖ്യാപിക്കുന്നു.
11 “അന്ന്‌ അനേകം ജനതകൾ യഹോവയോടു ചേരും.+ അവർ എന്റെ ജനമായിത്തീരും. ഞാൻ നിങ്ങളുടെ ഇടയിൽ വസിക്കും.” എന്നെ അയച്ചതു സൈന്യങ്ങളുടെ അധിപനായ യഹോവയാണെന്നു നിങ്ങൾ അറിയും.
12 വിശുദ്ധനിലത്ത്‌ തനിക്കുള്ള ഓഹരിയായി യഹോവ യഹൂദയെ സ്വന്തമാക്കും. ദൈവം വീണ്ടും യരുശലേമിനെ തിരഞ്ഞെടുക്കും.+
13 മനുഷ്യരെല്ലാം യഹോവയുടെ മുമ്പാകെ മിണ്ടാതിരിക്കട്ടെ. ഇതാ, ദൈവം തന്റെ വിശുദ്ധവാസസ്ഥലത്തുനിന്ന്‌ നടപടിയെടുക്കുന്നു.
