നിങ്ങൾ ഓർക്കുന്നുവോ?
2019-ലെ വീക്ഷാഗോപുരത്തിന്റെ അടിസ്ഥാനത്തിൽ പിൻവരുന്ന ചോദ്യങ്ങൾക്ക് ഉത്തരം പറയാൻ കഴിയുമോ?
“നിനക്ക് എതിരെ ഉണ്ടാക്കുന്ന ഒരു ആയുധവും ഫലിക്കില്ല” എന്ന ദൈവത്തിന്റെ വാഗ്ദാനത്തിന്റെ അർഥം എന്താണ്? (യശ. 54:17)
‘ക്രൂരരായ അധികാരികളുടെ കോപംപോലുള്ള’ വിനാശകാരിയായ ശക്തികളിൽനിന്ന് ദൈവം നമ്മളെ സംരക്ഷിക്കുമെന്നു നമുക്ക് ഉറപ്പുണ്ടായിരിക്കാം. (യശ. 25:4, 5) നമുക്കു നിലനിൽക്കുന്ന ദോഷം വരുത്തുന്ന ഒന്നും ചെയ്യാൻ ശത്രുക്കൾക്ക് ഒരിക്കലും കഴിയില്ല.—w19.01, പേ. 6-7.
കനാന്യരോടും വഴിതെറ്റിപ്പോയ ഇസ്രായേല്യരോടും ഉള്ള ദൈവത്തിന്റെ ഇടപെടലുകൾ ദൈവത്തിന്റെ നീതി എങ്ങനെയാണു വെളിപ്പെടുത്തുന്നത്?
മ്ലേച്ഛമായ ലൈംഗികപ്രവൃത്തികളിൽ ഏർപ്പെടുകയും സ്ത്രീകളെയും കുട്ടികളെയും ഉപദ്രവിക്കുകയും ചെയ്തിരുന്നവരെ ദൈവം ന്യായം വിധിച്ചു. തന്നെ അനുസരിക്കുകയും മറ്റുള്ളവരോടു ന്യായത്തോടെ ഇടപെടുകയും ചെയ്തവരെ ദൈവം അനുഗ്രഹിച്ചു.—w19.02, പേ. 22-23.
അവിശ്വാസിയായ ഒരാൾ പ്രാർഥിക്കുന്ന ഒരിടത്ത് നമ്മൾ ആയിപ്പോയാൽ എന്തു ചെയ്യണം?
നമുക്കു നിശ്ശബ്ദരായി ആദരവോടെ നിൽക്കാം. പക്ഷേ പ്രാർഥനയുടെ ഒടുവിൽ “ആമേൻ” പറയുകയോ മറ്റുള്ളവരോടൊപ്പം കൈകൾ കൂപ്പുകയോ ചെയ്യരുത്. ആ സമയത്ത് നമുക്കു മൗനമായി യഹോവയോടു പ്രാർഥിക്കാൻ കഴിഞ്ഞേക്കും.—w19.03, പേ. 31.
കുട്ടികളോടുള്ള ലൈംഗിക ദുഷ്പെരുമാറ്റം എത്ര ഗൗരവമുള്ള കാര്യമാണ്?
അത് ഇരയ്ക്കെതിരെയും സഭയ്ക്കെതിരെയും ഗവൺമെന്റ് അധികാരികൾക്കെതിരെയും ദൈവത്തിനെതിരെയും ഉള്ള പാപമാണ്. അത്തരം തെറ്റുകൾ റിപ്പോർട്ട് ചെയ്യാൻ ഗവൺമെന്റ് അധികാരികൾ ആവശ്യപ്പെടുന്ന സ്ഥലങ്ങളിൽ മൂപ്പന്മാർ അത് അനുസരിക്കും.—w19.05, പേ. 9-10.
നമുക്ക് എങ്ങനെ നമ്മുടെ ചിന്താരീതി മാറ്റാനോ മെച്ചപ്പെടുത്താനോ കഴിയും?
അതിനു ചെയ്യേണ്ട കാര്യങ്ങൾ ഇതാണ്: യഹോവയോടു പ്രാർഥിക്കുക. സ്വയം വിലയിരുത്തുക എന്ന ലക്ഷ്യത്തിൽ ധ്യാനിക്കുക. കൂട്ടുകാരെ ജ്ഞാനപൂർവം തിരഞ്ഞെടുക്കുക.—w19.06, പേ. 11.
ഉപദ്രവങ്ങൾ നേരിടാൻ നമുക്ക് ഇപ്പോൾത്തന്നെ എങ്ങനെ ഒരുങ്ങാം?
യഹോവയുമായുള്ള ബന്ധം നമ്മൾ ശക്തമാക്കണം. യഹോവ നമ്മളെ സ്നേഹിക്കുന്നെന്നും ഒരിക്കലും ഉപേക്ഷിക്കില്ലെന്നും ഉറപ്പുണ്ടായിരിക്കുക. ദിവസവും ബൈബിൾ വായിക്കുക, ക്രമമായി പ്രാർഥിക്കുക. രാജ്യാനുഗ്രഹങ്ങൾ യാഥാർഥ്യമാകുമെന്ന കാര്യത്തിൽ ഉറപ്പുള്ളവരായിരിക്കുക. ഇഷ്ടപ്പെട്ട തിരുവെഴുത്തുകളും സ്തുതിഗീതങ്ങളും മനഃപാഠമാക്കുക.—w19.07, പേ. 2-4.
കുടുംബാംഗങ്ങളെ രക്ഷയിലേക്കു നയിക്കാൻ നമുക്ക് എന്തു ചെയ്യാം?
നമ്മൾ കുടുംബാംഗങ്ങളുടെ വികാരങ്ങൾ മനസ്സിലാക്കണം, നമ്മുടെ നല്ല പെരുമാറ്റത്തിലൂടെ നല്ല ഒരു സാക്ഷ്യം കൊടുക്കണം, ക്ഷമയും നയവും കാണിക്കണം.—w19.08, പേ. 15-17.
മത്തായി 11:28-ൽ യേശു ഉറപ്പ് തന്നിട്ടുള്ളതുപോലെ, നമുക്ക് എങ്ങനെയാണു ഉന്മേഷം കിട്ടുന്നത്?
നമുക്കു സ്നേഹമുള്ള ക്രിസ്തീയ മേൽവിചാരകന്മാരുണ്ട്, ഏറ്റവും നല്ല സഹപ്രവർത്തകരുണ്ട്, ഏറ്റവും നല്ല നിയമനമുണ്ട്.—w19.09, പേ. 23.
ദൈവം എങ്ങനെയാണു നമുക്ക് ആഗ്രഹവും പ്രവർത്തിക്കാനുള്ള ശക്തിയും തരുന്നത്? (ഫിലി. 2:13)
ദൈവവചനം വായിക്കുകയും ധ്യാനിക്കുകയും ചെയ്യുമ്പോൾ, തന്റെ ഇഷ്ടം ചെയ്യാനുള്ള ആഗ്രഹവും പ്രവർത്തിക്കാനുള്ള ശക്തിയും തന്നുകൊണ്ട് ദൈവം പ്രവർത്തിക്കും. നമ്മുടെ കഴിവുകൾ മെച്ചപ്പെടുത്തുന്നതിനു നമ്മളെ സഹായിക്കാൻ ദൈവാത്മാവിനു കഴിയും.—w19.10, പേ. 21.
ഗൗരവമുള്ള ഒരു തീരുമാനം എടുക്കുന്നതിനു മുമ്പ് നമ്മൾ ഏതെല്ലാം പടികൾ സ്വീകരിക്കണം?
അഞ്ചു പടികൾ: നന്നായി ഗവേഷണം ചെയ്യുക. ജ്ഞാനത്തിനായി പ്രാർഥിക്കുക. നിങ്ങളുടെ തീരുമാനത്തിനു പിന്നിലെ കാരണത്തെക്കുറിച്ച് ചിന്തിക്കുക. കൃത്യമായ ലക്ഷ്യങ്ങൾ വെക്കുക. യാഥാർഥ്യബോധമുള്ളവരായിരിക്കുക.—w19.11, പേ. 27-29.
ദേഹിയുടെ അമർത്യത എന്ന ആശയം സാത്താൻ ഹവ്വയോടു പറഞ്ഞ വാക്കുകളിൽനിന്നാണോ ഉത്ഭവിച്ചത്?
തെളിവനുസരിച്ച്, അല്ല. ‘നീ മരിക്കില്ല’ എന്നാണു സാത്താൻ ഹവ്വയോടു പറഞ്ഞത്, അല്ലാതെ മരിച്ചതായി കാണപ്പെടുക മാത്രമേ ഉള്ളൂ എന്നല്ല. പ്രളയത്തിനു മുമ്പ് എന്തെങ്കിലും തെറ്റായ മതപരമായ ആശയങ്ങളുണ്ടായിരുന്നെങ്കിൽ അതെല്ലാം പ്രളയത്തിൽ ഒലിച്ചുപോയി. ബാബേൽ ഗോപുരം പണിതുകൊണ്ടിരുന്ന ആളുകളെ ദൈവം ചിതറിക്കുന്നതിനു മുമ്പായിരിക്കും ദേഹിയുടെ അമർത്യതയെക്കുറിച്ചുള്ള വിശ്വാസം ഉടലെടുത്തത്.—w19.12, പേ. 15.