1. പല ചെറു​പ്പ​ക്കാ​രും ഇതുവരെ എന്തൊക്കെ ചെയ്‌തി​രി​ക്കു​ന്നു?

 ഓരോ വർഷവും ആയിര​ക്ക​ണ​ക്കി​നു ചെറു​പ്പ​ക്കാ​രാ​ണു സ്‌നാ​ന​മേൽക്കു​ന്നത്‌. നിങ്ങളും സ്‌നാ​ന​മേറ്റ ഒരാളാ​ണോ? അങ്ങനെ​യാ​ണെ​ങ്കിൽ നിങ്ങളു​ടെ ആ തീരു​മാ​നം സഹോ​ദ​ര​ങ്ങളെ ഒത്തിരി സന്തോ​ഷി​പ്പി​ച്ചി​ട്ടുണ്ട്‌, യഹോ​വ​യെ​യും. (സുഭാ. 27:11) ഇതുവരെ നിങ്ങൾ ചെയ്‌ത കാര്യ​ങ്ങ​ളെ​ക്കു​റിച്ച്‌ ഒന്നു ചിന്തി​ച്ചു​നോ​ക്കുക: ഒരുപക്ഷേ നിങ്ങൾ പല വർഷങ്ങൾ ഉത്സാഹ​ത്തോ​ടെ ബൈബിൾ പഠിച്ചു. അങ്ങനെ പഠിച്ച​പ്പോൾ ബൈബിൾ ദൈവ​ത്തി​ന്റെ വചനമാ​ണെന്നു നിങ്ങൾ മനസ്സി​ലാ​ക്കി. കൂടാതെ ആ ദൈവത്തെ അടുത്ത്‌ അറിയാ​നും സ്‌നേ​ഹി​ക്കാ​നും നിങ്ങൾക്കു കഴിഞ്ഞു. യഹോ​വ​യോ​ടുള്ള സ്‌നേഹം വളർന്ന​പ്പോൾ ജീവിതം യഹോ​വ​യ്‌ക്കു സമർപ്പി​ക്കാ​നും സ്‌നാ​ന​പ്പെ​ടാ​നും നിങ്ങൾ തീരു​മാ​നി​ച്ചു. എത്ര നല്ലൊരു തീരു​മാ​ന​മാ​ണു നിങ്ങൾ എടുത്തത്‌!

2. ഈ ലേഖന​ത്തിൽ നമ്മൾ എന്തു പഠിക്കും?

 ² സ്‌നാ​ന​പ്പെ​ടു​ന്ന​തി​നു മുമ്പ്‌ വിശ്വാ​സ​ത്തി​ന്റെ പല പരീക്ഷ​ണ​ങ്ങ​ളും നിങ്ങൾക്കു നേരി​ട്ടി​ട്ടു​ണ്ടാ​യി​രി​ക്കാം. എന്നാൽ മുന്നോ​ട്ടു പോകു​മ്പോൾ വിശ്വാ​സ​ത്തി​ന്റെ പുതി​യ​പു​തിയ പരീക്ഷ​ണങ്ങൾ നിങ്ങൾക്കു​ണ്ടാ​കും. യഹോ​വ​യോ​ടുള്ള നിങ്ങളു​ടെ സ്‌നേഹം തകർക്കാ​നും യഹോ​വ​യിൽനിന്ന്‌ നിങ്ങളെ അകറ്റാ​നും സാത്താൻ ശ്രമി​ച്ചു​കൊ​ണ്ടി​രി​ക്കു​ന്നു. (എഫെ. 4:14) അങ്ങനെ സംഭവി​ക്കാൻ നിങ്ങൾ ഒരിക്ക​ലും അനുവ​ദി​ക്ക​രുത്‌. ദൈവ​ത്തോ​ടു വിശ്വ​സ്‌ത​നാ​യി​രി​ക്കാ​നും യഹോ​വ​യ്‌ക്കു സമർപ്പി​ച്ച​പ്പോൾ കൊടുത്ത വാക്കിനു ചേർച്ച​യിൽ ജീവി​ക്കാ​നും നിങ്ങളെ എന്തു സഹായി​ക്കും? അതിനു​വേണ്ടി നിങ്ങൾ പക്വത​യി​ലേക്കു “വളരാൻ” ഉത്സാഹി​ക്കണം, അതായത്‌ പുരോ​ഗതി വരുത്തു​ന്ന​തിൽ തുടരണം. (എബ്രാ. 6:1) അത്‌ എങ്ങനെ ചെയ്യാം? അതി​നെ​ക്കു​റി​ച്ചാണ്‌ ഈ ലേഖന​ത്തിൽ നമ്മൾ പഠിക്കാൻപോ​കു​ന്നത്‌.

3. സ്‌നാ​ന​മേറ്റ ഓരോ ക്രിസ്‌ത്യാ​നി​യും എന്തു ചെയ്യണം?

³ പൗലോസ്‌ അപ്പോ​സ്‌തലൻ എഫെ​സൊ​സി​ലുള്ള സഹോ​ദ​ര​ങ്ങൾക്കു കൊടുത്ത ഉപദേശം സ്‌നാ​ന​മേറ്റ ഓരോ വ്യക്തി​യും അനുസ​രി​ക്കേ​ണ്ട​താണ്‌. “പൂർണ​വ​ളർച്ച​യെ​ത്തിയ” ക്രിസ്‌ത്യാ​നി​ക​ളാ​കാൻ പൗലോസ്‌ അവരെ പ്രോ​ത്സാ​ഹി​പ്പി​ച്ചു. (എഫെ. 4:13) ‘പുരോ​ഗതി വരുത്തു​ന്ന​തിൽ തുടരണം’ എന്നാണ്‌ അദ്ദേഹം അതിലൂ​ടെ ഉദ്ദേശി​ച്ചത്‌. പൗലോസ്‌ ആത്മീയ​വ​ളർച്ചയെ, ഒരു കുട്ടി​യു​ടെ വളർച്ച​യോ​ടു താരത​മ്യം ചെയ്‌തു. ഒരു കുട്ടി ജനിക്കു​മ്പോൾ മാതാ​പി​താ​ക്കൾക്കു സന്തോ​ഷ​വും അഭിമാ​ന​വും ഒക്കെ തോന്നും. എന്നാൽ ഒരു കുഞ്ഞിന്‌ എപ്പോ​ഴും ആ അവസ്ഥയിൽത്തന്നെ തുടരാൻ പറ്റില്ല​ല്ലോ. കുറച്ച്‌ കഴിയു​മ്പോൾ “കുട്ടി​ക​ളു​ടെ രീതികൾ” അവൻ ഉപേക്ഷി​ക്കണം. (1 കൊരി. 13:11) അതു​പോ​ലെ​യാ​ണു ക്രിസ്‌ത്യാ​നി​ക​ളും. സ്‌നാ​ന​പ്പെ​ട്ട​തി​നു ശേഷം നമ്മൾ പുരോ​ഗ​മി​ച്ചു​കൊ​ണ്ടി​രി​ക്കണം. അതിനു നമ്മളെ സഹായി​ക്കുന്ന ചില കാര്യങ്ങൾ ഇപ്പോൾ നോക്കാം.

4. ആത്മീയ​മാ​യി പുരോ​ഗ​മി​ക്കാൻ നമ്മളെ എന്തു സഹായി​ക്കും, വിശദീ​ക​രി​ക്കുക. (ഫിലി​പ്പി​യർ 1:9)

⁴ യഹോ​വയെ കൂടു​തൽക്കൂ​ടു​തൽ സ്‌നേ​ഹി​ക്കുക. നിങ്ങൾ ഇപ്പോൾത്തന്നെ യഹോ​വയെ ഒരുപാ​ടു സ്‌നേ​ഹി​ക്കു​ന്നുണ്ട്‌. എന്നാൽ യഹോ​വ​യോ​ടുള്ള സ്‌നേഹം നിങ്ങൾക്കു കൂട്ടാ​നാ​കും. എങ്ങനെ? അതിനുള്ള ഒരു വഴി അപ്പോ​സ്‌ത​ല​നായ പൗലോസ്‌ ഫിലി​പ്പി​യർ 1:9-ൽ (വായി​ക്കുക.) പറയു​ന്നുണ്ട്‌. “ശരിയായ അറിവി​ലും തികഞ്ഞ വകതി​രി​വി​ലും” ഫിലി​പ്പി​യി​ലെ ക്രിസ്‌ത്യാ​നി​ക​ളു​ടെ “സ്‌നേഹം ഇനിയു​മി​നി​യും വർധി​ക്കട്ടെ” എന്നാണു പൗലോസ്‌ പ്രാർഥി​ച്ചത്‌. യഹോ​വയെ എത്ര​ത്തോ​ളം അറിയു​ന്നോ അത്ര​ത്തോ​ളം നമ്മൾ യഹോ​വയെ സ്‌നേ​ഹി​ക്കും; യഹോ​വ​യു​ടെ വ്യക്തി​ത്വ​വും യഹോവ കാര്യങ്ങൾ ചെയ്യുന്ന രീതി​യും വിലമ​തി​ക്കും. കൂടാതെ യഹോ​വയെ സന്തോ​ഷി​പ്പി​ക്കാ​നും ദൈവത്തെ വിഷമി​പ്പി​ക്കുന്ന കാര്യങ്ങൾ ചെയ്യാ​തി​രി​ക്കാ​നും ഉള്ള നമ്മുടെ ആഗ്രഹം ശക്തമാ​കു​ക​യും ചെയ്യും. മാത്രമല്ല, നമ്മൾ എന്തു ചെയ്യാ​നാണ്‌ യഹോവ ആഗ്രഹി​ക്കു​ന്ന​തെന്നു മനസ്സി​ലാ​ക്കി അതനു​സ​രിച്ച്‌ ജീവി​ക്കാ​നും തയ്യാറാ​കും.

5-6. യഹോ​വ​യോ​ടുള്ള സ്‌നേഹം എങ്ങനെ കൂട്ടാം, വിശദീ​ക​രി​ക്കുക.

⁵ യഹോ​വ​യോ​ടുള്ള സ്‌നേഹം വർധി​ക്കു​ന്ന​തി​നു നമ്മൾ യേശു​വി​നെ​ക്കു​റിച്ച്‌ കൂടുതൽ മനസ്സി​ലാ​ക്കണം. കാരണം ദൈവ​ത്തി​ന്റെ ഗുണങ്ങ​ളൊ​ക്കെ യേശു തന്റെ ജീവി​ത​ത്തിൽ അങ്ങനെ​തന്നെ പകർത്തി. (എബ്രാ. 1:3) യേശു​വി​നെ കൂടുതൽ നന്നായി അറിയാ​നുള്ള വഴി നാലു സുവി​ശേ​ഷ​വി​വ​ര​ണങ്ങൾ പഠിക്കു​ന്ന​താണ്‌. ദിവസ​വും ബൈബിൾ വായി​ക്കുന്ന ഒരു ശീലം നിങ്ങൾക്കു​ണ്ടോ? അങ്ങനെ​യി​ല്ലെ​ങ്കിൽ യേശു​വി​നെ​ക്കു​റി​ച്ചുള്ള ആ വിവര​ണങ്ങൾ വായി​ച്ചു​കൊണ്ട്‌ നിങ്ങൾക്കു തുടങ്ങി​ക്കൂ​ടേ? ഈ ഭാഗങ്ങൾ വായി​ക്കു​മ്പോൾ യേശു​വി​ന്റെ ഗുണങ്ങ​ളെ​ക്കു​റിച്ച്‌ ചിന്തി​ക്കുക. യേശു​വി​ന്റെ കൂടെ​യാ​യി​രി​ക്കാ​നും യേശു​വി​നോ​ടു സംസാ​രി​ക്കാ​നും എല്ലാവ​രും ആഗ്രഹി​ച്ചി​രു​ന്നു. കുട്ടി​കൾക്കു​പോ​ലും യേശു​വി​ന്റെ അടുത്ത്‌ പോകാൻ മടി തോന്നി​യില്ല. യേശു സ്‌നേ​ഹ​ത്തോ​ടെ അവരെ കൈക​ളിൽ എടുക്കു​മാ​യി​രു​ന്നു. (മർക്കോ. 10:13-16) യേശു​വി​ന്റെ കൂടെ​യാ​യി​രി​ക്കാൻ ശിഷ്യ​ന്മാർക്കും വലിയ ഇഷ്ടമാ​യി​രു​ന്നു. മനസ്സി​ലു​ള്ള​തെ​ല്ലാം യേശു​വി​നോ​ടു തുറന്നു​പ​റ​യാൻ അവർക്ക്‌ ഒരു പേടി​യും തോന്നി​യില്ല. (മത്താ. 16:22) ഇക്കാര്യ​ത്തിൽ യേശു പിതാ​വി​നെ അനുക​രി​ക്കു​ക​യാ​യി​രു​ന്നു. യഹോ​വ​യെ​യും ആർക്കും എപ്പോൾ വേണ​മെ​ങ്കി​ലും സമീപി​ക്കാം. അതു​കൊണ്ട്‌ മനസ്സി​ലു​ള്ള​തെ​ല്ലാം തുറന്നു​പ​റ​ഞ്ഞു​കൊണ്ട്‌ നമുക്ക്‌ യഹോ​വ​യോ​ടു പ്രാർഥി​ക്കാ​നാ​കും. യഹോവ ഒരിക്ക​ലും നമ്മളെ കുറ്റ​പ്പെ​ടു​ത്തി​ല്ലെന്നു നമുക്ക്‌ ഉറപ്പു​ണ്ടാ​യി​രി​ക്കാം. യഹോവ നമ്മളെ സ്‌നേ​ഹി​ക്കു​ക​യും നമുക്കു​വേണ്ടി കരുതു​ക​യും ചെയ്യുന്നു.—1 പത്രോ. 5:7.

⁶ യേശു​വിന്‌ ആളുക​ളോട്‌ അനുകമ്പ തോന്നി. അപ്പോ​സ്‌ത​ല​നായ മത്തായി പറയുന്നു: “ജനക്കൂ​ട്ടത്തെ കണ്ടപ്പോൾ യേശു​വിന്‌ അലിവ്‌ തോന്നി. കാരണം അവർ ഇടയനി​ല്ലാത്ത ആടുക​ളെ​പ്പോ​ലെ അവഗണി​ക്ക​പ്പെ​ട്ട​വ​രും മുറി​വേ​റ്റ​വ​രും ആയിരു​ന്നു.” (മത്താ. 9:36) യഹോ​വ​യ്‌ക്ക്‌ എങ്ങനെ​യാ​ണു തോന്നു​ന്നത്‌? യേശു പറഞ്ഞു: “ഈ ചെറി​യ​വ​രിൽ ഒരാൾപ്പോ​ലും നശിച്ചു​പോ​കു​ന്നതു സ്വർഗ​സ്ഥ​നായ എന്റെ പിതാ​വിന്‌ ഇഷ്ടമല്ല.” (മത്താ. 18:14) ഈ വാക്കുകൾ കാണി​ക്കു​ന്നത്‌ യഹോ​വ​യ്‌ക്ക്‌ നമ്മളെ ഒരുപാട്‌ ഇഷ്ടമാ​ണെ​ന്നല്ലേ? ഇതു ശരിക്കും നമ്മളെ സന്തോ​ഷി​പ്പി​ക്കു​ന്നു. യേശു​വി​നെ നമ്മൾ എത്ര​ത്തോ​ളം അറിയു​ന്നു​വോ അത്ര​ത്തോ​ളം യഹോ​വ​യോ​ടുള്ള നമ്മുടെ സ്‌നേഹം കൂടും.

7. പക്വത​യുള്ള ക്രിസ്‌ത്യാ​നി​ക​ളോ​ടൊ​പ്പം സമയം ചെലവ​ഴി​ക്കു​ന്നതു നിങ്ങളെ എങ്ങനെ സഹായി​ക്കും?

⁷ യഹോ​വ​യോ​ടുള്ള സ്‌നേഹം കൂടാ​നും ക്രിസ്‌ത്യാ​നി​യെന്ന നിലയിൽ പുരോ​ഗ​മി​ക്കാ​നും നമ്മളെ സഹായി​ക്കുന്ന മറ്റൊരു കാര്യം സഭയിലെ പക്വത​യുള്ള ക്രിസ്‌ത്യാ​നി​കളെ കൂട്ടു​കാ​രാ​ക്കു​ന്ന​താണ്‌. അവരുടെ സന്തോഷം നിങ്ങൾ ശ്രദ്ധി​ച്ചി​ട്ടു​ണ്ടോ? യഹോ​വയെ സേവി​ക്കാൻ തീരു​മാ​നി​ച്ച​തിൽ  അവർക്ക്‌ ഒരു വിഷമ​വു​മില്ല. ദൈവ​സേ​വ​ന​ത്തിൽ അവർക്കു​ണ്ടായ നല്ല അനുഭ​വ​ങ്ങ​ളെ​ക്കു​റിച്ച്‌ നമുക്ക്‌ അവരോ​ടു ചോദി​ക്കാം. ഇനി, പ്രധാ​ന​പ്പെട്ട ഒരു തീരു​മാ​ന​മെ​ടു​ക്കേണ്ട സമയത്ത്‌ ഉപദേ​ശ​ത്തി​നാ​യും അവരുടെ സഹായം തേടാം. “ധാരാളം ഉപദേ​ശ​ക​രു​ള്ള​പ്പോൾ വിജയം നേടാ​നാ​കു​ന്നു” എന്നാണ​ല്ലോ ബൈബിൾ പറയു​ന്നത്‌.—സുഭാ. 11:14.

8. ബൈബി​ളിൽ പറയുന്ന കാര്യ​ങ്ങ​ളെ​ക്കു​റിച്ച്‌ നിങ്ങൾക്കു സംശയ​മു​ണ്ടെ​ങ്കിൽ എന്തു ചെയ്യണം?

⁸ സംശയങ്ങൾ തീർക്കുക.  2-ാം ഖണ്ഡിക​യിൽ കണ്ടതു​പോ​ലെ നമ്മൾ ആത്മീയ​മാ​യി പുരോ​ഗ​മി​ക്കു​ന്നതു തടയാൻ സാത്താൻ ശ്രമി​ക്കു​ന്നു. അതിനു​വേണ്ടി ബൈബി​ളിൽനിന്ന്‌ നമ്മൾ പഠിച്ച കാര്യങ്ങൾ സത്യമാ​ണോ എന്നൊരു സംശയം സാത്താൻ നമ്മുടെ മനസ്സി​ലേക്കു കൊണ്ടു​വ​ന്നേ​ക്കാം. ഉദാഹ​ര​ണ​ത്തിന്‌, മനുഷ്യ​നെ ദൈവം സൃഷ്ടി​ച്ചതല്ല, പകരം നമ്മൾ പരിണ​മിച്ച്‌ ഉണ്ടായ​താ​ണെന്ന്‌ ആളുകൾ പറഞ്ഞേ​ക്കാം. നിങ്ങൾ ചെറു​താ​യി​രു​ന്ന​പ്പോൾ ആ വിഷയ​ത്തെ​ക്കു​റിച്ച്‌ അധിക​മൊ​ന്നും ചിന്തി​ച്ചി​ട്ടു​ണ്ടാ​കില്ല. എന്നാൽ ഇപ്പോൾ നിങ്ങൾ കുറച്ചു​കൂ​ടെ വളർന്ന്‌ വലുതാ​യി; സ്‌കൂ​ളി​ലൊ​ക്കെ അതി​നെ​ക്കു​റിച്ച്‌ പഠിപ്പി​ക്കു​മ്പോൾ അതു വിശ്വ​സി​ക്കാൻ നിങ്ങൾക്കു തോന്നി​യേ​ക്കാം. അധ്യാ​പകർ പരിണാ​മത്തെ പിന്തു​ണച്ച്‌ പറയുന്ന കാര്യ​ങ്ങ​ളൊ​ക്കെ ശരിയാ​ണെ​ന്നോ അതിൽ കാര്യ​മു​ണ്ടെ​ന്നോ നിങ്ങൾ ചിന്തി​ക്കാൻ ഇടയുണ്ട്‌. പക്ഷേ സ്രഷ്ടാ​വുണ്ട്‌ എന്നതി​നുള്ള തെളി​വു​കൾ അവർ ഇതുവരെ പരി​ശോ​ധി​ച്ചി​ട്ടി​ല്ലാ​യി​രി​ക്കും. എന്നാൽ സുഭാ​ഷി​തങ്ങൾ 18:17-ലെ ആശയം ഓർക്കു​ന്നതു നല്ലതാണ്‌. അവിടെ പറയുന്നു: “ആദ്യം പരാതി ബോധി​പ്പി​ക്കു​ന്ന​വന്റെ ഭാഗത്താ​ണു ശരി​യെന്നു തോന്നും; എന്നാൽ എതിർകക്ഷി വന്ന്‌ അവനെ ചോദ്യം ചെയ്യു​ന്ന​തു​വരെ മാത്രം.” അതു​കൊണ്ട്‌ കേൾക്കു​ന്ന​തെ​ല്ലാം കണ്ണുമ​ടച്ച്‌ വിശ്വ​സി​ക്ക​രുത്‌. പകരം ബൈബി​ളിൽ അതെക്കു​റിച്ച്‌ എന്താണു പറഞ്ഞി​രി​ക്കു​ന്ന​തെന്നു ശ്രദ്ധിച്ച്‌ പഠിക്കുക. ഈ വിഷയ​ത്തെ​ക്കു​റിച്ച്‌ നമ്മുടെ പ്രസി​ദ്ധീ​ക​ര​ണ​ങ്ങ​ളിൽ പറഞ്ഞി​രി​ക്കുന്ന കാര്യങ്ങൾ നന്നായി മനസ്സി​ലാ​ക്കുക. മുമ്പ്‌ പരിണാ​മ​ത്തിൽ വിശ്വ​സി​ച്ചി​രുന്ന സഹോ​ദ​ര​ങ്ങ​ളോ​ടു സംസാ​രി​ക്കുക. * സ്‌നേ​ഹ​വാ​നായ ഒരു സ്രഷ്ടാ​വു​ണ്ടെന്ന്‌ അവർക്കു ബോധ്യം വന്നത്‌ എങ്ങനെ​യാ​ണെന്ന്‌ അവരോ​ടു ചോദി​ക്കാ​വു​ന്ന​താണ്‌. അങ്ങനെ സംസാ​രി​ക്കു​മ്പോൾ ഒരു സ്രഷ്ടാ​വുണ്ട്‌ എന്നതി​നുള്ള തെളി​വു​കൾ നിങ്ങൾക്കു കണ്ടെത്താ​നാ​കും.

9. മെലി​സ്സ​യു​ടെ അനുഭ​വ​ത്തിൽനിന്ന്‌ നിങ്ങൾ എന്താണു പഠിച്ചത്‌?

⁹ സൃഷ്ടി​യെ​ക്കു​റിച്ച്‌ ആഴത്തിൽ പഠിച്ചതു മെലിസ്സ സഹോ​ദ​രിക്ക്‌ ഒരുപാ​ടു ഗുണം ചെയ്‌തു. * സഹോ​ദരി പറയുന്നു: “പരിണാ​മ​മാ​ണു ശരി​യെന്നു വിശ്വ​സി​പ്പി​ക്കുന്ന രീതി​യി​ലാ​യി​രു​ന്നു സ്‌കൂ​ളിൽ ടീച്ചർമാർ പഠിപ്പി​ച്ചി​രു​ന്നത്‌. എന്റെ സംശയങ്ങൾ തീർക്കു​ന്ന​തി​നു​വേണ്ടി കൂടുതൽ പഠിക്കാൻ ആദ്യ​മൊ​ക്കെ എനിക്കു പേടി തോന്നി. കാരണം കൂടുതൽ പഠിച്ചു​വ​രു​മ്പോൾ പരിണാ​മ​മെ​ങ്ങാ​നും ശരിയാ​ണെന്ന്‌ എനിക്കു തോന്നി​യാ​ലോ? അത്‌ എനിക്ക്‌ ഒട്ടും ഉൾക്കൊ​ള്ളാൻ കഴിയു​മാ​യി​രു​ന്നില്ല. എന്നാൽ ഒന്നും കണ്ണുമ​ടച്ച്‌ വിശ്വ​സി​ക്കാൻ യഹോവ ആഗ്രഹി​ക്കു​ന്നി​ല്ലെന്ന കാര്യം ഞാൻ ഓർത്തു. അതു​കൊണ്ട്‌ എന്റെ സംശയം തീർക്കാൻതന്നെ ഞാൻ തീരു​മാ​നി​ച്ചു. അതിനു​വേണ്ടി  നിങ്ങ​ളെ​ക്കു​റിച്ച്‌ കരുത​ലുള്ള ഒരു സ്രഷ്ടാ​വു​ണ്ടോ? (ഇംഗ്ലീഷ്‌), ജീവൻ സൃഷ്ടി​ക്ക​പ്പെ​ട്ട​തോ? (ഇംഗ്ലീഷ്‌), ജീവന്റെ ഉത്ഭവം—പ്രസക്ത​മായ അഞ്ചു ചോദ്യ​ങ്ങൾ എന്നീ പ്രസി​ദ്ധീ​ക​ര​ണങ്ങൾ ഞാൻ വായിച്ചു. എന്റെ മനസ്സി​ലു​ണ്ടായ പല ചോദ്യ​ങ്ങൾക്കും തൃപ്‌തി​ക​ര​മായ ഉത്തരം അവയി​ലു​ണ്ടാ​യി​രു​ന്നു. ഞാൻ ഇതു കുറച്ചു​കൂ​ടെ നേരത്തേ ചെയ്യേ​ണ്ട​താ​യി​രു​ന്നെന്നു ചിന്തി​ച്ചു​പോ​യി.”

10-11. മോശ​മായ കാര്യങ്ങൾ ഒഴിവാ​ക്കാൻ നിങ്ങൾക്ക്‌ എന്തു ചെയ്യാം? (1 തെസ്സ​ലോ​നി​ക്യർ 4:3, 4)

¹⁰ മോശ​മായ കാര്യങ്ങൾ ഒഴിവാ​ക്കുക. കൗമാ​ര​പ്രാ​യ​ത്തിൽ ലൈം​ഗി​ക​ത​യിൽ ഏർപ്പെ​ടാ​നുള്ള ആഗ്രഹം ശക്തമാ​യി​രു​ന്നേ​ക്കാം. ആ മോശ​മായ ആഗ്രഹ​ത്തി​ന​നു​സ​രിച്ച്‌ പ്രവർത്തി​ക്കാൻ മറ്റുള്ളവർ നമ്മളെ നിർബ​ന്ധി​ക്കു​ക​യും ചെയ്‌തേ​ക്കാം. നമ്മൾ അങ്ങനെ ചെയ്‌തു​കാ​ണാ​നാ​ണു സാത്താ​നും ആഗ്രഹി​ക്കു​ന്നത്‌. എന്നാൽ അത്തരം പ്രലോ​ഭ​ന​ങ്ങളെ നമുക്ക്‌ എങ്ങനെ എതിർത്തു​നിൽക്കാം? (1 തെസ്സ​ലോ​നി​ക്യർ 4:3, 4 വായി​ക്കുക.) അതിനു​വേണ്ടി നിങ്ങളു​ടെ ഉള്ളിലു​ള്ളത്‌ യഹോ​വ​യോ​ടു തുറന്നു​പ​റ​യുക. പിടി​ച്ചു​നിൽക്കാ​നുള്ള ശക്തി തരണേ എന്ന്‌ യഹോ​വ​യോട്‌ അപേക്ഷി​ക്കുക. (മത്താ. 6:13) യഹോവ എപ്പോ​ഴും നമ്മളെ സഹായി​ക്കാ​നാണ്‌ ആഗ്രഹി​ക്കു​ന്നത്‌, ശിക്ഷി​ക്കാ​നല്ല എന്നു നമുക്ക്‌ ഓർക്കാം. (സങ്കീ. 103:13, 14) ഇനി, സഹായ​ത്തി​നാ​യി ദൈവ​വ​ച​ന​ത്തി​ലേ​ക്കും നമുക്കു തിരി​യാം. നേരത്തേ കണ്ട മെലിസ്സ സഹോ​ദ​രി​ക്കും മോശ​മായ ചിന്തക​ളു​ണ്ടാ​യി​രു​ന്നു. സഹോ​ദരി പറയുന്നു: “ദിവസ​വും ബൈബിൾ വായി​ച്ചതു തെറ്റായ ചിന്തകൾക്കെ​തി​രെ പോരാ​ടാൻ എന്നെ സഹായി​ച്ചു. ഞാൻ യഹോ​വ​യ്‌ക്കു​വേണ്ടി ജീവി​ക്കേ​ണ്ട​താ​ണെ​ന്നും യഹോ​വ​യു​ടെ സഹായം എനിക്ക്‌ ആവശ്യ​മാ​ണെ​ന്നും അത്‌ എന്നെ ഓർമി​പ്പി​ച്ചു.”—സങ്കീ. 119:9.

¹¹ പ്രശ്‌നങ്ങൾ ഒറ്റയ്‌ക്കു കൈകാ​ര്യം ചെയ്യാൻ ശ്രമി​ക്ക​രുത്‌. അതെക്കു​റിച്ച്‌ മാതാ​പി​താ​ക്ക​ളോ​ടു സംസാ​രി​ക്കുക. എന്നാൽ ഇതു​പോ​ലുള്ള കാര്യങ്ങൾ അവരോ​ടു സംസാ​രി​ക്കാൻ അത്ര എളുപ്പമല്ല. പക്ഷേ പറയാ​തി​രി​ക്ക​രുത്‌. മെലിസ്സ പറയുന്നു: “ധൈര്യ​ത്തി​നാ​യി ഞാൻ യഹോ​വ​യോ​ടു പ്രാർഥി​ച്ചു. എന്നിട്ട്‌ എന്റെ പ്രശ്‌ന​ത്തെ​ക്കു​റിച്ച്‌ ഡാഡി​യോ​ടു തുറന്നു​പ​റഞ്ഞു. അപ്പോൾ എനിക്കു വലിയ ആശ്വാസം തോന്നി. യഹോവ എന്നെക്കു​റിച്ച്‌ അഭിമാ​നി​ക്കു​ന്നു​ണ്ടെന്ന്‌ എനിക്ക്‌ ഉറപ്പാ​യി​രു​ന്നു.”

12. നിങ്ങൾക്ക്‌ എങ്ങനെ നല്ല തീരു​മാ​ന​ങ്ങ​ളെ​ടു​ക്കാം?

¹² ബൈബിൾത​ത്ത്വ​ങ്ങൾക്കു ചേർച്ച​യിൽ തീരു​മാ​ന​ങ്ങ​ളെ​ടു​ക്കുക. വളർന്നു​വ​രു​ന്ന​ത​നു​സ​രിച്ച്‌ സ്വന്തമാ​യി തീരു​മാ​ന​മെ​ടു​ക്കാൻ നിങ്ങൾക്കു കൂടു​തൽക്കൂ​ടു​തൽ സ്വാത​ന്ത്ര്യം കിട്ടും. എന്നാൽ നിങ്ങൾക്ക്‌ അനുഭ​വ​പ​രി​ചയം കുറവാണ്‌. യഹോ​വ​യു​മാ​യുള്ള നിങ്ങളു​ടെ ബന്ധം തകർത്തേ​ക്കാ​വുന്ന ഒരു തീരു​മാ​ന​മെ​ടു​ക്കാ​തി​രി​ക്കാൻ നിങ്ങൾക്ക്‌ എങ്ങനെ കഴിയും? (സുഭാ. 22:3) ശരിയായ തീരു​മാ​ന​മെ​ടു​ക്കാൻ ഓരോ കാര്യ​ത്തെ​ക്കു​റി​ച്ചും കൃത്യ​മായ നിയമ​മൊ​ന്നും വേണ​മെ​ന്നി​ല്ലെന്നു ക്യാരി എന്നു പേരുള്ള ഒരു സഹോ​ദരി മനസ്സി​ലാ​ക്കി. സഹോ​ദരി പറയുന്നു: “കുറെ നിയമങ്ങൾ അറിയു​ന്ന​തി​നെ​ക്കാൾ ബൈബിൾത​ത്ത്വ​ങ്ങൾ മനസ്സി​ലാ​ക്കു​ന്ന​താ​ണു പ്രധാനം എന്നു ഞാൻ തിരി​ച്ച​റി​ഞ്ഞു.” ബൈബിൾ വായി​ക്കു​മ്പോൾ നിങ്ങ​ളോ​ടു​തന്നെ ഇങ്ങനെ ചോദി​ക്കുക: ‘ഈ ഭാഗത്തു​നിന്ന്‌ യഹോ​വ​യു​ടെ ചിന്ത​യെ​ക്കു​റിച്ച്‌ എനിക്ക്‌ എന്താണു പഠിക്കാൻ പറ്റിയത്‌? ശരിയായ കാര്യങ്ങൾ ചെയ്യാൻ എന്നെ സഹായി​ക്കുന്ന തത്ത്വങ്ങൾ ഈ ഭാഗത്തു​ണ്ടോ? ആ തത്ത്വങ്ങൾക്കു ചേർച്ച​യിൽ പ്രവർത്തി​ക്കു​ന്നത്‌ എനിക്ക്‌ എങ്ങനെ പ്രയോ​ജനം ചെയ്യും?’ (സങ്കീ. 19:7; യശ. 48:17, 18) ബൈബിൾ വായി​ക്കു​ക​യും ബൈബിൾത​ത്ത്വ​ങ്ങ​ളെ​ക്കു​റിച്ച്‌ ചിന്തി​ക്കു​ക​യും ചെയ്യു​ന്നെ​ങ്കിൽ യഹോ​വയെ സന്തോ​ഷി​പ്പി​ക്കുന്ന നല്ല തീരു​മാ​ന​ങ്ങ​ളെ​ടു​ക്കാൻ നിങ്ങൾക്കു കൂടുതൽ എളുപ്പ​മാ​യി​രി​ക്കും. ഇങ്ങനെ​യൊ​ക്കെ ചെയ്യു​മ്പോൾ വ്യക്തമായ ഒരു നിയമം ഇല്ലാത്ത സാഹച​ര്യ​ത്തി​ലും യഹോ​വ​യു​ടെ ചിന്ത മനസ്സി​ലാ​ക്കി തീരു​മാ​ന​മെ​ടു​ക്കാൻ നിങ്ങൾക്കാ​കും.

13. നല്ല കൂട്ടു​കാർക്ക്‌ നിങ്ങളെ എങ്ങനെ സ്വാധീ​നി​ക്കാൻ കഴിയും? (സുഭാ​ഷി​തങ്ങൾ 13:20)

¹³ യഹോ​വയെ സ്‌നേ​ഹി​ക്കു​ന്ന​വരെ കൂട്ടു​കാ​രാ​ക്കുക. 7-ാം ഖണ്ഡിക​യിൽ കണ്ടതു​പോ​ലെ നമ്മുടെ കൂട്ടു​കാർക്ക്‌ ആത്മീയ​മാ​യി പുരോ​ഗ​മി​ക്കാൻ നമ്മളെ സഹായി​ക്കാ​നാ​കും. (സുഭാ​ഷി​തങ്ങൾ 13:20 വായി​ക്കുക.) സാറ എന്നു പേരുള്ള ഒരു സഹോ​ദ​രി​ക്കു ദൈവ​സേ​വ​ന​ത്തി​ലുള്ള സന്തോഷം നഷ്ടപ്പെ​ട്ടു​തു​ടങ്ങി. എന്നാൽ സന്തോഷം തിരി​ച്ചു​കി​ട്ടാൻ ചില കാര്യങ്ങൾ സഹോ​ദ​രി​യെ സഹായി​ച്ചു. സാറ പറയുന്നു: “കൃത്യ​സ​മ​യത്ത്‌ എനിക്കു ചില നല്ല കൂട്ടു​കാ​രെ കിട്ടി. ചെറു​പ്പ​ക്കാ​രി​യായ ഒരു സഹോ​ദ​രി​യു​ടെ​കൂ​ടെ ഞാൻ എല്ലാ ആഴ്‌ച​യും വീക്ഷാ​ഗോ​പു​രം പഠിച്ചു. മറ്റൊരു കൂട്ടു​കാ​രി മീറ്റി​ങ്ങിൽ അഭി​പ്രാ​യം പറഞ്ഞു​തു​ട​ങ്ങാൻ എന്നെ സഹായി​ച്ചു. ഇനി, കൂട്ടു​കാർ സഹായി​ച്ച​തു​കൊണ്ട്‌ വ്യക്തി​പ​ര​മായ പഠനത്തി​നും പ്രാർഥ​ന​യ്‌ക്കും ഒക്കെ ഞാൻ കൂടുതൽ പ്രാധാ​ന്യം കൊടു​ക്കാൻതു​ടങ്ങി. അങ്ങനെ യഹോ​വ​യു​മാ​യുള്ള എന്റെ സൗഹൃദം കൂടുതൽ ശക്തമായി. എന്റെ പഴയ സന്തോഷം എനിക്കു തിരി​ച്ചു​കി​ട്ടി.”

14. ജൂലിയൻ എങ്ങനെ​യാ​ണു നല്ല കൂട്ടു​കാ​രെ കണ്ടെത്തി​യത്‌?

 ¹⁴ നിങ്ങൾക്ക്‌ എങ്ങനെ നല്ല കൂട്ടു​കാ​രെ കണ്ടെത്താം? ഇപ്പോൾ മൂപ്പനാ​യി സേവി​ക്കുന്ന ജൂലിയൻ സഹോ​ദരൻ പറയുന്നു: “ചെറു​പ്പ​ത്തിൽ വയൽസേ​വ​ന​ത്തിന്‌ ഒരുമിച്ച്‌ പ്രവർത്തി​ച്ചി​രു​ന്ന​വരെ ഞാൻ കൂട്ടു​കാ​രാ​ക്കി​യി​രു​ന്നു. അവർ നല്ല ഉത്സാഹ​മു​ള്ള​വ​രാ​യി​രു​ന്നു. വയൽസേ​വനം എത്ര രസമാ​ണെന്നു കാണാൻ അവർ എന്നെ സഹായി​ച്ചു. അങ്ങനെ ഞാൻ മുഴു​സ​മ​യ​സേ​വനം ലക്ഷ്യം വെച്ചു. ഇനി, എന്റെ പ്രായ​ത്തി​ലുള്ള ആളുകളെ മാത്രം കൂട്ടു​കാ​രാ​ക്കാൻ ശ്രമി​ച്ച​തു​കൊ​ണ്ടാണ്‌ എനിക്ക്‌ അധികം കൂട്ടു​കാ​രൊ​ന്നും ഇല്ലാത്ത​തെ​ന്നും മനസ്സി​ലാ​ക്കി. പിന്നീട്‌ ബഥേലിൽ ചെന്ന​പ്പോ​ഴും എനിക്കു കുറെ കൂട്ടു​കാ​രെ കിട്ടി. അവരുടെ മാതൃക നല്ല വിനോ​ദങ്ങൾ തിര​ഞ്ഞെ​ടു​ക്കാൻ എന്നെ സഹായി​ച്ചു. അങ്ങനെ യഹോ​വ​യോ​ടു കൂടുതൽ അടുക്കാ​നു​മാ​യി.”

15. പൗലോസ്‌ തിമൊ​ഥെ​യൊ​സിന്‌ ഏതു കാര്യ​ത്തെ​ക്കു​റിച്ച്‌ മുന്നറി​യി​പ്പു നൽകി? (2 തിമൊ​ഥെ​യൊസ്‌ 2:20-22)

¹⁵ സഭയി​ലുള്ള ചില​രോ​ടു കൂട്ടു​കൂ​ടു​ന്നത്‌ യഹോ​വ​യു​മാ​യുള്ള നിങ്ങളു​ടെ ബന്ധം തകർത്തേ​ക്കാ​മെന്നു തോന്നി​യാൽ നിങ്ങൾ എന്തു ചെയ്യണം? ഒന്നാം നൂറ്റാ​ണ്ടി​ലെ ക്രിസ്‌തീ​യ​സ​ഭ​യി​ലും അങ്ങനെ ചിലരു​ണ്ടെന്നു പൗലോ​സിന്‌ അറിയാ​മാ​യി​രു​ന്നു. അതു​കൊണ്ട്‌ അവരിൽനിന്ന്‌ അകന്നി​രി​ക്കാൻ പൗലോസ്‌ തിമൊ​ഥെ​യൊ​സി​നു മുന്നറി​യി​പ്പു നൽകി. (2 തിമൊ​ഥെ​യൊസ്‌ 2:20-22 വായി​ക്കുക.) യഹോ​വ​യു​മാ​യുള്ള നമ്മുടെ ബന്ധം വളരെ വില​പ്പെ​ട്ട​താണ്‌. നമ്മൾ ഒത്തിരി ശ്രമം ചെയ്‌തി​ട്ടാണ്‌ യഹോ​വ​യു​മാ​യി അങ്ങനെ​യൊ​രു ബന്ധത്തി​ലേക്ക്‌ എത്തിയത്‌. അതു തകർക്കാൻ നമ്മൾ ആരെയും അനുവ​ദി​ക്ക​രുത്‌.—സങ്കീ. 26:4.

16. എങ്ങനെ​യുള്ള ലക്ഷ്യങ്ങൾ നിങ്ങൾക്കു വെക്കാം?

¹⁶ നല്ല ലക്ഷ്യങ്ങൾ വെക്കുക. വിശ്വാ​സം ശക്തമാ​കാ​നും യഹോ​വ​യു​മാ​യി ഒരു അടുത്ത ബന്ധത്തി​ലേക്കു വരാനും സഹായി​ക്കുന്ന ലക്ഷ്യങ്ങൾ വെക്കുക. (എഫെ. 3:16) ഉദാഹ​ര​ണ​ത്തിന്‌ പതിവാ​യി ബൈബിൾ വായി​ക്കു​ക​യും പഠിക്കു​ക​യും ചെയ്യുന്ന കാര്യ​ത്തിൽ മെച്ച​പ്പെ​ടാൻ നിങ്ങൾക്ക്‌ ഒരു ലക്ഷ്യം വെക്കാ​വു​ന്ന​താണ്‌. (സങ്കീ. 1:2, 3) അല്ലെങ്കിൽ കൂടെ​ക്കൂ​ടെ പ്രാർഥി​ക്കാ​നും മനസ്സു​തു​റന്ന്‌ യഹോ​വ​യോ​ടു സംസാ​രി​ക്കാ​നും നിങ്ങൾക്കു ശ്രമി​ക്കാം. ഇനി, വിനോ​ദം തിര​ഞ്ഞെ​ടു​ക്കുന്ന കാര്യ​ത്തി​ലും സമയം ഏറ്റവും നന്നായി ഉപയോ​ഗി​ക്കുന്ന കാര്യ​ത്തി​ലും നിങ്ങൾക്കു മെച്ച​പ്പെ​ടാ​നാ​കും. (എഫെ. 5:15, 16) പുരോ​ഗ​മി​ക്കാ​നാ​യി നിങ്ങൾ ശ്രമി​ക്കു​ന്നതു കാണു​മ്പോൾ യഹോ​വ​യ്‌ക്കു സന്തോ​ഷ​മാ​കും.

17. മറ്റുള്ള​വരെ സഹായി​ക്കു​ന്നതു നിങ്ങൾക്ക്‌ എങ്ങനെ​യാ​ണു പ്രയോ​ജനം ചെയ്യു​ന്നത്‌?

¹⁷ മറ്റുള്ള​വരെ സഹായി​ക്കു​ന്ന​തി​ലൂ​ടെ​യും നിങ്ങൾക്കു പുരോ​ഗ​മി​ക്കാം. യേശു പറഞ്ഞു: “വാങ്ങു​ന്ന​തി​നെ​ക്കാൾ സന്തോഷം കൊടു​ക്കു​ന്ന​തി​ലാണ്‌.” (പ്രവൃ. 20:35) നിങ്ങളു​ടെ ഊർജ​വും സമയവും ഒക്കെ മറ്റുള്ള​വരെ സഹായി​ക്കാ​നാ​യി ഉപയോ​ഗി​ക്കു​മ്പോൾ അതു നിങ്ങൾക്ക്‌ ഒത്തിരി ഗുണം ചെയ്യും. ഉദാഹ​ര​ണ​ത്തിന്‌ സഭയിലെ പ്രായ​മു​ള്ള​വ​രെ​യും രോഗി​ക​ളെ​യും ഒക്കെ സഹായി​ക്കാൻ നിങ്ങൾക്കു ലക്ഷ്യം വെക്കാം. സാധനങ്ങൾ വാങ്ങാ​നോ  ഇലക്‌​ട്രോ​ണിക്‌ ഉപകര​ണങ്ങൾ ഉപയോ​ഗി​ക്കാ​നോ നിങ്ങൾക്ക്‌ അവരെ സഹായി​ക്കാ​നാ​കു​മോ? നിങ്ങൾ ഒരു സഹോ​ദ​ര​നാ​ണെ​ങ്കിൽ സഹോ​ദ​ര​ങ്ങളെ കൂടുതൽ സഹായി​ക്കാ​നാ​യി നിങ്ങൾക്ക്‌ ഒരു ശുശ്രൂ​ഷാ​ദാ​സ​നാ​കാൻ ലക്ഷ്യം വെക്കാം. (ഫിലി. 2:4) ഇനി, മറ്റുള്ള​വ​രോ​ടു സന്തോ​ഷ​വാർത്ത അറിയി​ച്ചു​കൊണ്ട്‌ അവരോ​ടും നിങ്ങൾക്കു സ്‌നേഹം കാണി​ക്കാ​വു​ന്ന​താണ്‌. (മത്താ. 9:36, 37) സാധി​ക്കു​മെ​ങ്കിൽ ഏതെങ്കി​ലും തരത്തി​ലുള്ള ഒരു മുഴു​സ​മ​യ​സേ​വനം ചെയ്യു​ന്ന​തും നിങ്ങളു​ടെ ലക്ഷ്യമാ​ക്കുക.

18. മുഴു​സമയ ശുശ്രൂ​ഷ​യി​ലാ​യി​രി​ക്കു​ന്നതു യഹോ​വ​യോ​ടു കൂടുതൽ അടുക്കാൻ നിങ്ങളെ എങ്ങനെ സഹായി​ക്കും?

¹⁸ മുഴു​സമയ ശുശ്രൂഷ യഹോ​വ​യോ​ടു കൂടുതൽ അടുക്കാ​നുള്ള പല അവസര​ങ്ങ​ളും നിങ്ങൾക്കു തുറന്നു​ത​രും. മുൻനി​ര​സേ​വനം ചെയ്‌താൽ രാജ്യ​സു​വി​ശേ​ഷ​കർക്കുള്ള സ്‌കൂ​ളിൽ പങ്കെടു​ക്കാ​നുള്ള അവസരം കിട്ടി​യേ​ക്കും. ഇനി, ചില​പ്പോൾ ബഥേലിൽ സേവി​ക്കാ​നോ നമ്മുടെ ഏതെങ്കി​ലും ഒരു നിർമാണ പ്രവർത്ത​ന​ത്തിൽ പങ്കെടു​ക്കാ​നോ കഴി​ഞ്ഞേ​ക്കാം. കെയ്‌റ്റ്‌ലീൻ എന്നു പേരുള്ള ഒരു യുവ മുൻനി​ര​സേ​വിക ഇങ്ങനെ പറഞ്ഞു: “അനുഭ​വ​പ​രി​ച​യ​മുള്ള സഹോ​ദ​ര​ങ്ങ​ളോ​ടൊ​പ്പം പ്രസം​ഗ​പ്ര​വർത്തനം ചെയ്‌തത്‌ സ്‌നാ​ന​ത്തി​നു ശേഷം യഹോ​വ​യോ​ടു കൂടുതൽ അടുക്കാൻ എന്നെ സഹായി​ച്ചു. അവരുടെ മാതൃക ബൈബിൾ നന്നായി പഠിക്കാ​നും മറ്റുള്ള​വരെ പഠിപ്പി​ക്കാ​നുള്ള കഴിവ്‌ മെച്ച​പ്പെ​ടു​ത്താ​നും എനിക്കു നല്ലൊരു പ്രോ​ത്സാ​ഹ​ന​മാ​യി​രു​ന്നു.”

19. ആത്മീയ​മാ​യി പുരോ​ഗ​മി​ക്കു​മ്പോൾ നിങ്ങൾക്ക്‌ എന്തെല്ലാം അനു​ഗ്ര​ഹങ്ങൾ കിട്ടും?

¹⁹ ആത്മീയ​മാ​യി പുരോ​ഗ​മി​ക്കു​ക​യാ​ണെ​ങ്കിൽ യഹോവ നിങ്ങൾക്ക്‌ ഒരുപാട്‌ അനു​ഗ്ര​ഹങ്ങൾ തരും. നിങ്ങളു​ടെ സമയവും ഊർജ​വും വെറുതേ പാഴാ​ക്കി​ക്ക​ള​യാ​തെ പ്രയോ​ജ​ന​മുള്ള കാര്യ​ങ്ങൾക്കാ​യി ഉപയോ​ഗി​ക്കാ​നാ​കും. (1 യോഹ. 2:17) മോശ​മായ തീരു​മാ​നങ്ങൾ എടുത്ത​തി​ന്റെ വിഷമങ്ങൾ നിങ്ങൾക്ക്‌ അനുഭ​വി​ക്കേ​ണ്ടി​വ​രില്ല. അപ്പോൾ നിങ്ങൾ ചെയ്യുന്ന കാര്യങ്ങൾ വിജയി​ക്കും. നിങ്ങൾക്കു ജീവി​ത​ത്തിൽ സന്തോഷം ആസ്വദി​ക്കാ​നു​മാ​കും. (സുഭാ. 16:3) ഇനി, നിങ്ങളു​ടെ നല്ല മാതൃക, സഭയി​ലുള്ള ചെറു​പ്പ​ക്കാ​രെ​യും പ്രായ​മു​ള്ള​വ​രെ​യും പ്രോ​ത്സാ​ഹി​പ്പി​ക്കും. (1 തിമൊ. 4:12) ഏറ്റവും പ്രധാ​ന​മാ​യി യഹോ​വയെ ഒരു സുഹൃ​ത്താ​ക്കാൻ പറ്റിയ​തി​ന്റെ​യും യഹോ​വയെ സന്തോ​ഷി​പ്പി​ക്കു​ന്ന​തി​ന്റെ​യും സമാധാ​ന​വും സംതൃ​പ്‌തി​യും നിങ്ങൾക്കു കിട്ടും.—സുഭാ. 23:15, 16.