1. യഹോവ നമുക്ക്‌ എന്തു പ്രത്യാശ നൽകി​യി​രി​ക്കു​ന്നു?

 യഹോവ നമുക്കു നിത്യ​ജീ​വന്റെ മഹത്തായ ഒരു പ്രത്യാശ തന്നിരി​ക്കു​ന്നു. ചിലർക്കു സ്വർഗ​ത്തിൽ അമർത്യ ആത്മവ്യ​ക്തി​ക​ളാ​യി നിത്യം ജീവി​ക്കാ​നുള്ള പ്രത്യാ​ശ​യാ​ണു​ള്ളത്‌. (1 കൊരി. 15:50, 53) എന്നാൽ ഭൂരി​പക്ഷം പേരും ഭൂമി​യിൽ പൂർണാ​രോ​ഗ്യ​ത്തോ​ടെ​യും സന്തോ​ഷ​ത്തോ​ടെ​യും എന്നെന്നും ജീവി​ക്കാൻ പ്രത്യാ​ശ​യു​ള്ള​വ​രാണ്‌. (വെളി. 21:3, 4) നമ്മുടെ പ്രത്യാശ സ്വർഗ​ത്തിൽ ജീവി​ക്കാ​നോ ഭൂമി​യിൽ ജീവി​ക്കാ​നോ ആയാലും നമുക്ക്‌ അതു വളരെ വില​പ്പെ​ട്ട​താണ്‌.

2. നമ്മുടെ പ്രത്യാശ എന്തിനെ അടിസ്ഥാ​ന​മാ​ക്കി​യു​ള്ള​താണ്‌, എന്തു​കൊ​ണ്ടാണ്‌ അങ്ങനെ പറയു​ന്നത്‌?

² ബൈബി​ളിൽ കാണുന്ന “പ്രത്യാശ” എന്ന വാക്കിനെ “നല്ല കാര്യങ്ങൾ സംഭവി​ക്കും എന്നുള്ള പ്രതീക്ഷ” എന്നു നിർവ​ചി​ക്കാ​നാ​കും. ഭാവി​യെ​ക്കു​റി​ച്ചുള്ള നമ്മുടെ പ്രത്യാശ ഉറപ്പുള്ള ഒന്നാണ്‌. കാരണം അതു തന്നിരി​ക്കു​ന്നത്‌ യഹോ​വ​യാണ്‌. (റോമ. 15:13) യഹോവ എന്താണു വാഗ്‌ദാ​നം ചെയ്‌തി​രി​ക്കു​ന്ന​തെ​ന്നും എല്ലായ്‌പോ​ഴും യഹോവ തന്റെ വാക്കു പാലി​ക്കു​മെ​ന്നും നമുക്ക്‌ അറിയാം. (സംഖ്യ 23:19) താൻ പറയുന്ന കാര്യങ്ങൾ അങ്ങനെ​തന്നെ ചെയ്യാ​നുള്ള ആഗ്രഹ​വും ശക്തിയും യഹോ​വ​യ്‌ക്കു​ണ്ടെന്ന കാര്യ​ത്തിൽ നമുക്ക്‌ ഒരു സംശയ​വു​മില്ല. അതു​കൊണ്ട്‌ നമ്മുടെ പ്രത്യാശ ഏതെങ്കി​ലും കെട്ടു​ക​ഥ​യെ​യോ വെറു​മൊ​രു ആഗ്രഹ​ത്തെ​യോ അടിസ്ഥാ​ന​മാ​ക്കി​യു​ള്ളതല്ല. മറിച്ച്‌, സത്യമാ​ണെന്നു നമുക്കു പൂർണ​ബോ​ധ്യ​മുള്ള കാര്യ​ങ്ങളെ അടിസ്ഥാ​ന​മാ​ക്കി​യു​ള്ള​താണ്‌.

3. ഈ ലേഖന​ത്തിൽ നമ്മൾ എന്തു പഠിക്കും? (സങ്കീർത്തനം 27:14)

³ സ്വർഗീ​യ​പി​താവ്‌ നമ്മളെ സ്‌നേ​ഹി​ക്കു​ന്നു. നമ്മൾ ദൈവ​ത്തി​ന്റെ വാഗ്‌ദാ​ന​ങ്ങ​ളിൽ പൂർണ​മാ​യി വിശ്വ​സി​ക്കാൻ ആഗ്രഹി​ക്കു​ക​യും ചെയ്യുന്നു. (സങ്കീർത്തനം 27:14 വായി​ക്കുക.) യഹോ​വ​യി​ലുള്ള നമ്മുടെ പ്രത്യാശ ശക്തമാ​ണെ​ങ്കിൽ പരീക്ഷ​ണ​ങ്ങ​ളൊ​ക്കെ ഉണ്ടാകു​മ്പോൾ സഹിച്ചു​നിൽക്കാ​നും ധൈര്യ​ത്തോ​ടെ​യും സന്തോ​ഷ​ത്തോ​ടെ​യും ഭാവി​യി​ലേക്കു നോക്കാ​നും നമുക്കു കഴിയും. ഈ ലേഖന​ത്തിൽ, പ്രത്യാശ എങ്ങനെ​യാ​ണു നമുക്കു സംരക്ഷണം നൽകു​ന്ന​തെന്നു നമ്മൾ പഠിക്കും. അതിനു​വേണ്ടി, ആദ്യം പ്രത്യാശ ഒരു നങ്കൂരം​പോ​ലെ​യും പടത്തൊ​പ്പി​പോ​ലെ​യും ആയിരി​ക്കു​ന്നത്‌ എങ്ങനെ​യാ​ണെന്നു കാണും. തുടർന്ന്‌ നമ്മുടെ പ്രത്യാശ എങ്ങനെ ശക്തമാ​ക്കാ​മെ​ന്നും മനസ്സി​ലാ​ക്കും.

4. പ്രത്യാശ എങ്ങനെ​യാണ്‌ ഒരു നങ്കൂരം​പോ​ലെ​യാ​യി​രി​ക്കു​ന്നത്‌? (എബ്രായർ 6:19)

⁴ എബ്രാ​യർക്കുള്ള കത്തിൽ അപ്പോ​സ്‌ത​ല​നായ പൗലോസ്‌ പ്രത്യാ​ശയെ ഒരു നങ്കൂര​ത്തോ​ടു താരത​മ്യ​പ്പെ​ടു​ത്തി. (എബ്രായർ 6:19  വായി​ക്കുക.) കടലി​ലൂ​ടെ ഒരുപാ​ടു യാത്രകൾ നടത്തി​യി​ട്ടുള്ള ആളാണു പൗലോസ്‌. അതു​കൊണ്ട്‌ കാറ്റിൽപ്പെട്ട്‌ ഒഴുകി​പ്പോ​കാ​തെ നങ്കൂരം എങ്ങനെ​യാ​ണു കപ്പലിനെ പിടി​ച്ചു​നി​റു​ത്തു​ന്ന​തെന്ന്‌ അദ്ദേഹ​ത്തി​നു നന്നായി അറിയാ​മാ​യി​രു​ന്നു. ഒരിക്കൽ പൗലോസ്‌ കപ്പലിൽ യാത്ര ചെയ്‌ത സമയത്ത്‌ വലി​യൊ​രു കൊടു​ങ്കാ​റ്റു​ണ്ടാ​യി. അപ്പോൾ കപ്പൽ പാറ​ക്കെ​ട്ടു​ക​ളിൽ ചെന്ന്‌ ഇടിക്കാ​തി​രി​ക്കാൻ ജോലി​ക്കാർ നങ്കൂരങ്ങൾ ഇറക്കു​ന്നത്‌ അദ്ദേഹം കണ്ടു. (പ്രവൃ. 27:29, 39-41) നങ്കൂരം ഒരു കപ്പലിനെ ഒഴുകി​പ്പോ​കാ​തെ പിടി​ച്ചു​നി​റു​ത്തു​ന്ന​തു​പോ​ലെ നമ്മുടെ പ്രത്യാശ കൊടു​ങ്കാ​റ്റു​പോ​ലുള്ള പ്രശ്‌നങ്ങൾ ഉണ്ടാകു​മ്പോ​ഴും യഹോ​വ​യിൽനിന്ന്‌ അകന്നു​പോ​കാ​തി​രി​ക്കാൻ നമ്മളെ സഹായി​ക്കും. പ്രത്യാ​ശ​യു​ള്ള​തു​കൊണ്ട്‌ ജീവി​ത​ത്തിൽ വലിയ പരീക്ഷ​ണങ്ങൾ നേരി​ടു​മ്പോൾ ശാന്തരാ​യി നിൽക്കാ​നും നമുക്കു കഴിയും. കാരണം പെട്ടെ​ന്നു​തന്നെ കാര്യ​ങ്ങ​ളെ​ല്ലാം ശരിയാ​കു​മെന്ന ഉറച്ച​ബോ​ധ്യം നമുക്കുണ്ട്‌. നമുക്ക്‌ ഉപദ്ര​വങ്ങൾ സഹി​ക്കേ​ണ്ടി​വ​രു​മെന്നു യേശു മുൻകൂ​ട്ടി​പ്പ​റ​ഞ്ഞി​ട്ടു​ണ്ടെന്ന്‌ ഓർക്കുക. (യോഹ. 15:20) അതു​കൊ​ണ്ടു​തന്നെ ഭാവി​പ്ര​ത്യാ​ശ​യെ​ക്കു​റിച്ച്‌ നമ്മൾ കൂടെ​ക്കൂ​ടെ ചിന്തി​ക്കണം. അങ്ങനെ​യാ​കു​മ്പോൾ പ്രശ്‌നങ്ങൾ ഉണ്ടാകു​മ്പോ​ഴും യഹോ​വയെ സേവി​ക്കു​ന്ന​തിൽ തുടരാൻ നമുക്കാ​കും.

5. ക്രൂര​മായ മരണത്തെ നേരി​ടാൻ പ്രത്യാശ യേശു​വി​നെ എങ്ങനെ​യാ​ണു സഹായി​ച്ചത്‌?

⁵ ക്രൂര​മായ ഒരു മരണമാ​ണു തന്നെ കാത്തി​രി​ക്കു​ന്ന​തെന്ന്‌ അറിഞ്ഞി​ട്ടും ദൈവ​ത്തോ​ടു വിശ്വ​സ്‌ത​നാ​യി തുടരാൻ പ്രത്യാശ യേശു​വി​നെ സഹായി​ച്ചു. യേശു​വി​ന്റെ പ്രത്യാശ എത്ര ശക്തമാ​യി​രു​ന്നെന്നു പത്രോസ്‌ അപ്പോ​സ്‌ത​ലന്റെ വാക്കുകൾ കാണി​ക്കു​ന്നു. എ.ഡി. 33-ലെ പെന്തി​ക്കോ​സ്‌തിൽ പത്രോസ്‌ അപ്പോ​സ്‌തലൻ സങ്കീർത്ത​ന​പ്പു​സ്‌ത​ക​ത്തിൽനി​ന്നുള്ള ഒരു പ്രവചനം ഉദ്ധരി​ച്ചു​കൊണ്ട്‌ ഇങ്ങനെ പറഞ്ഞു: “ഞാൻ പ്രത്യാ​ശ​യോ​ടെ കഴിയും; കാരണം അങ്ങ്‌ എന്നെ ശവക്കു​ഴി​യിൽ വിട്ടു​ക​ള​യില്ല; അങ്ങയുടെ വിശ്വ​സ്‌തൻ ജീർണി​ച്ചു​പോ​കാൻ അനുവ​ദി​ക്കു​ക​യു​മില്ല. . . . അങ്ങയുടെ സന്നിധി​യിൽവെച്ച്‌ അങ്ങ്‌ എന്നിൽ ആഹ്ലാദം നിറയ്‌ക്കും.” (പ്രവൃ. 2:25-28; സങ്കീ. 16:8-11) താൻ മരി​ക്കേ​ണ്ടി​വ​രു​മെന്നു യേശു​വിന്‌ അറിയാ​മാ​യി​രു​ന്നു. എങ്കിലും തന്നെ ദൈവം ഉയിർപ്പി​ക്കു​മെ​ന്നും തനിക്കു വീണ്ടും പിതാ​വി​നോ​ടൊ​പ്പം സ്വർഗ​ത്തിൽ സന്തോ​ഷ​ത്തോ​ടെ ഒരുമി​ച്ചാ​യി​രി​ക്കാൻ കഴിയു​മെ​ന്നും ഉള്ള ഉറച്ച പ്രത്യാശ യേശു​വി​നു​ണ്ടാ​യി​രു​ന്നു. —എബ്രാ. 12:2, 3.

6. പ്രത്യാ​ശ​യെ​ക്കു​റിച്ച്‌ ഒരു സഹോ​ദരൻ എന്തു പറഞ്ഞു?

⁶ പ്രയാ​സ​ങ്ങ​ളു​ണ്ടാ​യ​പ്പോൾ സഹിച്ചു​നിൽക്കാൻ പ്രത്യാശ ധാരാളം സഹോ​ദ​ര​ങ്ങളെ സഹായി​ച്ചി​ട്ടുണ്ട്‌. ഇംഗ്ലണ്ടിൽ താമസി​ച്ചി​രുന്ന ലിയൊ​ണാർഡ്‌ ചിൻ സഹോ​ദ​രന്റെ അനുഭവം നോക്കാം. ഒന്നാം ലോക​മ​ഹാ​യു​ദ്ധ​ത്തി​ന്റെ സമയത്ത്‌ സൈന്യ​ത്തിൽ ചേരാൻ സമ്മതി​ക്കാ​ഞ്ഞ​തു​കൊണ്ട്‌ സഹോ​ദ​രനെ തടവി​ലാ​ക്കി. ആദ്യത്തെ രണ്ടു മാസം സഹോ​ദ​രനെ ഏകാന്ത​ത​ട​വി​ലി​ട്ടു. തുടർന്ന്‌ കുറെ​ക്കാ​ലം അദ്ദേഹ​ത്തെ​ക്കൊണ്ട്‌ കഠിന​മാ​യി ജോലി ചെയ്യിച്ചു. അദ്ദേഹം പിന്നീട്‌ ഇങ്ങനെ എഴുതി: “പ്രയാ​സങ്ങൾ ഉണ്ടാകു​മ്പോൾ സഹിച്ചു​നിൽക്കാൻ പ്രത്യാശ എത്ര ആവശ്യ​മാ​ണെന്ന്‌ എന്റെ അനുഭവം എന്നെ പഠിപ്പി​ച്ചു. നമുക്കു യേശു​വി​ന്റെ​യും അപ്പോ​സ്‌ത​ല​ന്മാ​രു​ടെ​യും പ്രവാ​ച​ക​ന്മാ​രു​ടെ​യും നല്ല മാതൃ​ക​ക​ളുണ്ട്‌. കൂടാതെ ബൈബിൾ നൽകുന്ന വില​യേ​റിയ വാഗ്‌ദാ​ന​ങ്ങ​ളു​മുണ്ട്‌. ഇതെല്ലാം നമുക്കു ശക്തമായ പ്രത്യാശ തരുന്നു. പരീക്ഷ​ണങ്ങൾ ഉണ്ടാകു​മ്പോൾ സഹിച്ചു​നിൽക്കാൻ അവ സഹായി​ക്കു​ക​യും ചെയ്യും.” ലിയൊ​ണാർഡ്‌ സഹോ​ദ​രനു പ്രത്യാശ ഒരു നങ്കൂര​മാ​യി​രു​ന്നു. നമ്മുടെ കാര്യ​ത്തി​ലും അതിന്‌ അങ്ങനെ​യാ​യി​രി​ക്കാൻ കഴിയും.

7. പരീക്ഷ​ണങ്ങൾ എങ്ങനെ​യാ​ണു നമ്മുടെ പ്രത്യാ​ശയെ ശക്തമാ​ക്കു​ന്നത്‌? (റോമർ 5:3-5; യാക്കോബ്‌ 1:12)

⁷ ആദ്യമാ​യി സന്തോ​ഷ​വാർത്ത കേട്ട​പ്പോൾ നമുക്ക്‌ ഒരു പ്രത്യാശ കിട്ടി. എന്നാൽ പിന്നീടു പല പരീക്ഷ​ണങ്ങൾ സഹിച്ചു​നിൽക്കു​ക​യും യഹോ​വ​യു​ടെ സഹായം അനുഭ​വി​ച്ച​റി​യു​ക​യും യഹോ​വ​യു​ടെ അംഗീ​കാ​രം നമുക്കു​ണ്ടെന്നു മനസ്സി​ലാ​ക്കു​ക​യും ചെയ്‌ത​പ്പോൾ നമ്മുടെ പ്രത്യാശ കൂടുതൽ ശക്തമായി. (റോമർ 5:3-5; യാക്കോബ്‌ 1:12 വായി​ക്കുക.) പരീക്ഷ​ണങ്ങൾ നേരി​ടേ​ണ്ടി​വ​രു​മ്പോൾ നമ്മൾ ആകെ തളർന്നു​പോ​കാ​നാ​ണു സാത്താൻ ആഗ്രഹി​ക്കു​ന്നത്‌. പക്ഷേ യഹോ​വ​യു​ടെ സഹായ​ത്താൽ നമുക്ക്‌ അവ ഓരോ​ന്നും വിജയ​ക​ര​മാ​യി നേരി​ടാൻ കഴിയും.

8. പ്രത്യാശ എങ്ങനെ​യാ​ണു പടത്തൊ​പ്പി​പോ​ലെ​യാ​യി​രി​ക്കു​ന്നത്‌? (1 തെസ്സ​ലോ​നി​ക്യർ 5:8)

⁸ ബൈബിൾ പ്രത്യാ​ശയെ പടത്തൊ​പ്പി​യോ​ടും താരത​മ്യ​പ്പെ​ടു​ത്തി​യി​രി​ക്കു​ന്നു. (1 തെസ്സ​ലോ​നി​ക്യർ 5:8 വായി​ക്കുക.) യുദ്ധത്തി​ന്റെ സമയത്ത്‌ ശത്രു​ക്ക​ളു​ടെ ആക്രമ​ണ​ത്തിൽ തലയ്‌ക്കു പരി​ക്കേൽക്കാ​തി​രി​ക്കാൻവേണ്ടി ഒരു പടയാളി പടത്തൊ​പ്പി ധരിക്കും. നമ്മൾ ഇന്ന്‌ ഒരു ആത്മീയ​യു​ദ്ധ​ത്തി​ലാണ്‌. നമ്മുടെ ചിന്തകളെ ദുഷി​പ്പി​ക്കുക എന്ന ലക്ഷ്യത്തിൽ ഉണ്ടാക്കി​യി​രി​ക്കുന്ന പല പ്രലോ​ഭ​ന​ങ്ങ​ളും ആശയങ്ങ​ളും സാത്താൻ നമ്മുടെ നേരെ തൊടു​ത്തു​വി​ട്ടു​കൊ​ണ്ടി​രി​ക്കു​ന്നു. അതു​കൊണ്ട്‌ സാത്താന്റെ  ആക്രമ​ണ​ങ്ങ​ളിൽനിന്ന്‌ നമ്മൾ മനസ്സിനെ സംരക്ഷി​ക്കേ​ണ്ട​തുണ്ട്‌. ഒരു പടത്തൊ​പ്പി പടയാ​ളി​യു​ടെ തലയെ സംരക്ഷി​ക്കു​ന്ന​തു​പോ​ലെ പ്രത്യാശ നമ്മുടെ ചിന്തകളെ സംരക്ഷി​ക്കും. അങ്ങനെ നമുക്ക്‌ യഹോ​വ​യോ​ടു വിശ്വ​സ്‌ത​രാ​യി തുടരാ​നാ​കും.

9. പ്രത്യാ​ശ​യി​ല്ലാ​ത്ത​വ​രു​ടെ ജീവിതം എങ്ങനെ​യു​ള്ള​താ​യി​രി​ക്കും?

⁹ നമുക്കുള്ള നിത്യ​ജീ​വന്റെ പ്രത്യാശ ശരിയായ തിര​ഞ്ഞെ​ടു​പ്പു​കൾ നടത്താൻ നമ്മളെ സഹായി​ക്കും. എന്നാൽ ആ പ്രത്യാശ ശക്തമ​ല്ലെ​ങ്കിൽ നമ്മൾ സ്വന്തം ആഗ്രഹ​ങ്ങൾക്കു വേണ്ടതി​ല​ധി​കം പ്രാധാ​ന്യം കൊടു​ക്കാൻതു​ട​ങ്ങും. അങ്ങനെ നിത്യ​ജീ​വന്റെ പ്രത്യാശ നമ്മുടെ മനസ്സിൽനിന്ന്‌ മായാൻ ഇടയാ​കും. കൊരി​ന്തി​ലെ ആദ്യകാല ക്രിസ്‌ത്യാ​നി​ക​ളിൽ ചിലരു​ടെ കാര്യ​ത്തിൽ അങ്ങനെ സംഭവി​ച്ചു. ദൈവം നൽകി​യി​രുന്ന പ്രധാ​ന​പ്പെട്ട ഒരു വാഗ്‌ദാ​ന​ത്തി​ലുള്ള അവരുടെ വിശ്വാ​സം, അതായത്‌ പുനരു​ത്ഥാ​ന​പ്ര​ത്യാ​ശ​യി​ലുള്ള അവരുടെ വിശ്വാ​സം, അവർക്കു നഷ്ടപ്പെട്ടു. (1 കൊരി. 15:12) പുനരു​ത്ഥാ​ന​ത്തിൽ വിശ്വാ​സ​മി​ല്ലാത്ത ആളുകൾ തങ്ങളുടെ ആഗ്രഹങ്ങൾ എങ്ങനെ തൃപ്‌തി​പ്പെ​ടു​ത്താം എന്നതി​നെ​ക്കു​റിച്ച്‌ മാത്ര​മാ​യി​രി​ക്കും ചിന്തി​ക്കുക എന്നു പൗലോസ്‌ അപ്പോ​സ്‌തലൻ പറഞ്ഞു. (1 കൊരി. 15:32) ഇന്നുള്ള അനേക​രും അങ്ങനെ​യാണ്‌. ദൈവം നൽകുന്ന വാഗ്‌ദാ​ന​ങ്ങ​ളിൽ വിശ്വാ​സ​മി​ല്ലാത്ത അവർ ചിന്തി​ക്കു​ന്നത്‌, ‘ജീവിതം ഇപ്പോൾ എങ്ങനെ സന്തോ​ഷ​മു​ള്ള​താ​ക്കാം’ എന്നു മാത്ര​മാണ്‌. എന്നാൽ നമ്മൾ ഭാവി​യെ​ക്കു​റിച്ച്‌ ദൈവം നൽകി​യി​രി​ക്കുന്ന വാഗ്‌ദാ​ന​ങ്ങ​ളിൽ പൂർണ​മാ​യും വിശ്വ​സി​ക്കു​ന്നു. സ്വന്തം ഇഷ്ടങ്ങൾക്കു മാത്രം പ്രാധാ​ന്യം കൊടു​ത്തു​കൊ​ണ്ടുള്ള ഒരു ജീവി​ത​രീ​തി തിര​ഞ്ഞെ​ടു​ക്കു​ക​യാ​ണെ​ങ്കിൽ അത്‌ യഹോ​വ​യു​മാ​യുള്ള നമ്മുടെ ബന്ധം തകർക്കും. അത്തരം ഒരു ജീവി​ത​രീ​തി​യി​ലേക്കു പോകാ​തെ നമ്മുടെ ചിന്തകളെ സംരക്ഷി​ക്കാൻ പ്രത്യാശ ഒരു പടത്തൊ​പ്പി​പോ​ലെ നമ്മളെ സഹായി​ക്കു​ന്നു.—1 കൊരി. 15:33, 34.

10. തെറ്റായ ന്യായ​വാ​ദ​ങ്ങ​ളിൽനിന്ന്‌ പ്രത്യാശ നമ്മളെ സംരക്ഷി​ക്കു​ന്നത്‌ എങ്ങനെ?

¹⁰ ‘യഹോ​വയെ സന്തോ​ഷി​പ്പി​ക്കാൻ ശ്രമി​ക്കു​ന്ന​തിൽ ഒരു കാര്യ​വു​മില്ല’ എന്നതു​പോ​ലുള്ള തെറ്റായ ചിന്തക​ളിൽനിന്ന്‌ പ്രത്യാശ എന്ന പടത്തൊ​പ്പി നമ്മളെ സംരക്ഷി​ക്കും. ചില ആളുകൾ ഇങ്ങനെ ചിന്തി​ച്ചേ​ക്കാം: ‘എനിക്ക്‌ ഒരിക്ക​ലും നിത്യ​ജീ​വൻ കിട്ടാൻപോ​കു​ന്നില്ല. അതിനുള്ള യോഗ്യ​ത​യൊ​ന്നും എനിക്കില്ല. ദൈവം പറയു​ന്ന​തു​പോ​ലെ എല്ലാം ചെയ്യാൻ എന്നെ​ക്കൊണ്ട്‌ ഒരിക്ക​ലും കഴിയില്ല.’ ഇയ്യോ​ബി​ന്റെ അടുത്ത്‌ വന്ന വ്യാജാ​ശ്വാ​സ​ക​രിൽ ഒരാളായ എലീഫ​സും ഏതാണ്ട്‌ ഇങ്ങനെ​യൊ​ക്കെ​യാണ്‌ അദ്ദേഹ​ത്തോ​ടു പറഞ്ഞത്‌. എലീഫസ്‌ പറഞ്ഞു: “നശ്വര​നായ മനുഷ്യ​നു ശുദ്ധി​യു​ള്ള​വ​നാ​യി​രി​ക്കാൻ കഴിയു​മോ?” എന്നിട്ട്‌ അദ്ദേഹം ദൈവ​ത്തെ​ക്കു​റിച്ച്‌ ഇങ്ങനെ പറഞ്ഞു: “ദൈവ​ത്തി​നു തന്റെ വിശു​ദ്ധ​രെ​പ്പോ​ലും വിശ്വാ​സ​മില്ല, സ്വർഗം​പോ​ലും ദൈവ​ത്തി​ന്റെ കണ്ണിൽ ശുദ്ധമല്ല.” (ഇയ്യോ. 15:14, 15) എത്ര വലിയ നുണകൾ! നമ്മൾ ഇങ്ങനെ ചിന്തി​ക്കാൻ ആഗ്രഹി​ക്കു​ന്നതു സാത്താ​നാണ്‌. അവ നമ്മുടെ പ്രത്യാ​ശ​യ്‌ക്കു മങ്ങലേൽപ്പി​ക്കു​മെന്നു സാത്താന്‌ അറിയാം. അത്തരം നുണക​ളെ​ല്ലാം തള്ളിക്ക​ള​യുക. എന്നിട്ട്‌ യഹോവ നൽകുന്ന വാഗ്‌ദാ​ന​ങ്ങ​ളിൽ മാത്രം ശ്രദ്ധി​ക്കുക. നമുക്കു നിത്യ​ജീ​വൻ ലഭിക്കാ​നാണ്‌ യഹോവ ആഗ്രഹി​ക്കു​ന്നത്‌. തീർച്ച​യാ​യും ദൈവം അതിനു നമ്മളെ സഹായി​ക്കു​ക​യും ചെയ്യും.—1 തിമൊ. 2:3, 4.

11. പ്രത്യാ​ശി​ക്കുന്ന കാര്യങ്ങൾ നടക്കു​ന്നതു കാണാ​നാ​യി നമ്മൾ ക്ഷമയോ​ടെ കാത്തി​രി​ക്കേ​ണ്ടത്‌ എന്തു​കൊണ്ട്‌?

¹¹ പ്രത്യാശ ശക്തമാക്കി നിറു​ത്താൻ എല്ലായ്‌പോ​ഴും അത്ര എളുപ്പമല്ല. ദൈവം തന്റെ വാഗ്‌ദാ​നം പാലി​ക്കു​ന്നതു കാണാൻ കാത്തി​രി​ക്കേ​ണ്ടി​വ​രു​മ്പോൾ നമ്മൾ ചില​പ്പോൾ അക്ഷമരാ​യേ​ക്കാം. എന്നാൽ ഒരു കാര്യം ഓർക്കുക: യഹോവ എന്നെന്നു​മു​ള്ള​വ​നാണ്‌. സമയ​ത്തെ​ക്കു​റി​ച്ചുള്ള യഹോ​വ​യു​ടെ കാഴ്‌ച​പ്പാട്‌ നമ്മു​ടേ​തിൽനിന്ന്‌ വളരെ വ്യത്യ​സ്‌ത​വു​മാണ്‌. (2 പത്രോ. 3:8, 9) ഏറ്റവും ശരിയായ സമയത്ത്‌, ഏറ്റവും ശരിയായ രീതി​യിൽ യഹോവ തന്റെ വാക്കു പാലി​ക്കു​മെന്ന്‌ ഉറപ്പാണ്‌. പക്ഷേ അതു നമ്മൾ പ്രതീ​ക്ഷി​ക്കുന്ന സമയത്താ​യി​രി​ക്ക​ണ​മെ​ന്നില്ല. യഹോവ തന്റെ വാഗ്‌ദാ​ന​ങ്ങൾക്കു ചേർച്ച​യിൽ പ്രവർത്തി​ക്കുന്ന സമയത്തി​നാ​യി ക്ഷമയോ​ടെ കാത്തി​രി​ക്കു​മ്പോൾ നമുക്ക്‌ എങ്ങനെ നമ്മുടെ പ്രത്യാശ ശക്തമാക്കി നിറു​ത്താം?—യാക്കോ. 5:7, 8.

12. എബ്രായർ 11:1, 6 അനുസ​രിച്ച്‌ പ്രത്യാശ എങ്ങനെ​യാ​ണു വിശ്വാ​സ​വു​മാ​യി ബന്ധപ്പെ​ട്ടി​രി​ക്കു​ന്നത്‌?

¹² യഹോ​വ​യു​മാ​യി വളരെ അടുത്ത ഒരു ബന്ധം നമുക്കു​ണ്ടെ​ങ്കിൽ നമ്മുടെ പ്രത്യാശ കൂടുതൽ ശക്തമാ​യി​രി​ക്കും. കാരണം നമ്മൾ പ്രത്യാ​ശി​ക്കുന്ന കാര്യങ്ങൾ നടക്കാൻ ഇടയാ​ക്കു​ന്നത്‌ യഹോ​വ​യാണ്‌. പ്രത്യാ​ശയെ ബൈബിൾ ‘യഹോവ ഉണ്ടെന്നും തന്നെ ആത്മാർഥ​മാ​യി അന്വേ​ഷി​ക്കു​ന്ന​വർക്കു ദൈവം പ്രതി​ഫലം നൽകു​മെ​ന്നും’ ഉള്ള വിശ്വാ​സ​വു​മാ​യി ബന്ധപ്പെ​ടു​ത്തി​യി​രി​ക്കു​ന്നു. (എബ്രായർ 11:1, 6 വായി​ക്കുക.) യഹോവ ഉണ്ടെന്നു നമ്മൾ ശരിക്കും വിശ്വ​സി​ക്കു​ന്നു​ണ്ടെ​ങ്കിൽ ദൈവം തന്റെ വാക്കു പാലി​ക്കു​മെ​ന്നും നമുക്ക്‌ ഉറപ്പാ​യി​രി​ക്കും.  അതു​കൊണ്ട്‌ ദൈവ​വു​മാ​യുള്ള നമ്മുടെ ബന്ധം ആഴമു​ള്ള​താ​ക്കാൻ നമുക്കു ചെയ്യാ​നാ​കുന്ന ചില കാര്യങ്ങൾ ഇനി നോക്കാം. അങ്ങനെ നമുക്കു നമ്മുടെ പ്രത്യാശ കൂടുതൽ ശക്തമാ​ക്കാം.

13. നമുക്ക്‌ എങ്ങനെ ദൈവ​ത്തോട്‌ അടുക്കാം?

¹³ യഹോ​വ​യോ​ടു പ്രാർഥി​ക്കുക, ദൈവ​വ​ചനം വായി​ക്കുക. യഹോ​വയെ നമുക്കു കാണാ​നാ​കില്ല. എങ്കിലും നമുക്ക്‌ യഹോ​വ​യോട്‌ അടുത്ത്‌ ചെല്ലാ​നാ​കും. പ്രാർഥ​ന​യി​ലൂ​ടെ നമുക്കു ദൈവ​ത്തോ​ടു സംസാ​രി​ക്കാം. യഹോവ തീർച്ച​യാ​യും നമ്മുടെ പ്രാർഥന കേൾക്കും. (യിരെ. 29:11, 12) ഇനി, ദൈവ​വ​ചനം വായി​ക്കു​ക​യും അതെക്കു​റിച്ച്‌ ചിന്തി​ക്കു​ക​യും ചെയ്യു​ന്ന​തി​ലൂ​ടെ ദൈവം പറയു​ന്നതു നമുക്കു ശ്രദ്ധി​ക്കാ​നും പറ്റും. മുൻകാ​ല​ങ്ങ​ളിൽ തന്നോടു വിശ്വ​സ്‌ത​രാ​യി​രു​ന്ന​വർക്കു​വേണ്ടി ദൈവം എങ്ങനെ​യെ​ല്ലാ​മാ​ണു കരുതി​യ​തെന്നു വായി​ക്കു​മ്പോൾ നമ്മുടെ പ്രത്യാശ കൂടുതൽ ശക്തമാ​കും. കാരണം ദൈവ​വ​ച​ന​ത്തിൽ ‘എഴുതി​യി​ട്ടു​ള്ള​തെ​ല്ലാം നമ്മളെ പഠിപ്പി​ക്കാ​നും അങ്ങനെ നമ്മുടെ സഹനത്താ​ലും തിരു​വെ​ഴു​ത്തു​കൾ നൽകുന്ന ആശ്വാ​സ​ത്താ​ലും നമുക്കു പ്രത്യാശ ഉണ്ടാകാ​നും വേണ്ടി​യാണ്‌.’—റോമ. 15:4.

14. യഹോവ മറ്റു ദൈവ​ദാ​സർക്കു​വേണ്ടി ചെയ്‌ത കാര്യ​ങ്ങ​ളെ​ക്കു​റിച്ച്‌ നമ്മൾ ചിന്തി​ക്കേ​ണ്ടത്‌ എന്തു​കൊണ്ട്‌?

¹⁴ യഹോവ തന്റെ വാക്കു പാലി​ച്ച​തി​നെ​ക്കു​റിച്ച്‌ ചിന്തി​ക്കുക. അബ്രാ​ഹാ​മി​ന്റെ​യും സാറയു​ടെ​യും കാര്യ​ത്തിൽ യഹോവ എന്താണു ചെയ്‌ത​തെന്ന്‌ ഓർക്കുക: അവർക്കു രണ്ടു പേർക്കും കുട്ടികൾ ജനിക്കാ​നുള്ള പ്രായം കഴിഞ്ഞു​പോ​യി​രു​ന്നു. എങ്കിലും ദൈവം അവരോ​ടു പറഞ്ഞു, അവർക്ക്‌ ഒരു കുഞ്ഞു​ണ്ടാ​കു​മെന്ന്‌. (ഉൽപ. 18:10) ഇതു കേട്ട​പ്പോൾ അബ്രാ​ഹാം എങ്ങനെ​യാ​ണു പ്രതി​ക​രി​ച്ചത്‌? ബൈബിൾ പറയുന്നു: “താൻ അനേകം ജനതകൾക്കു പിതാ​വാ​കും എന്ന്‌ അബ്രാ​ഹാം പ്രത്യാ​ശ​യോ​ടെ വിശ്വ​സി​ച്ചു.” (റോമ. 4:18) മനുഷ്യ​രു​ടെ നോട്ട​ത്തിൽ അബ്രാ​ഹാ​മിന്‌ ഒരു പ്രതീ​ക്ഷ​യ്‌ക്കും വകയി​ല്ലാ​യി​രു​ന്നു. എന്നാൽ യഹോവ തന്റെ വാക്കു പാലി​ക്കു​മെന്ന്‌ അദ്ദേഹം ഉറച്ചു​വി​ശ്വ​സി​ച്ചു. അബ്രാ​ഹാ​മിന്‌ ഒരിക്ക​ലും നിരാ​ശ​പ്പെ​ടേ​ണ്ടി​വ​ന്നില്ല. (റോമ. 4:19-21) ഇതു​പോ​ലുള്ള ബൈബിൾവി​വ​ര​ണങ്ങൾ നമ്മളെ ഒരു കാര്യം പഠിപ്പി​ക്കു​ന്നു: യഹോവ എപ്പോ​ഴും തന്റെ വാക്കു പാലി​ക്കും, അത്‌ എത്ര അസാധ്യ​മാ​ണെന്നു നമുക്കു തോന്നി​യാ​ലും.

15. ദൈവം നമുക്കു​വേണ്ടി ഇതുവരെ ചെയ്‌തു​തന്ന കാര്യ​ങ്ങ​ളെ​ക്കു​റിച്ച്‌ ചിന്തി​ക്കേ​ണ്ടത്‌ എന്തു​കൊണ്ട്‌?

¹⁵ യഹോവ നിങ്ങൾക്കു​വേണ്ടി ഇതുവരെ ചെയ്‌തി​ട്ടുള്ള കാര്യ​ങ്ങ​ളെ​ക്കു​റിച്ച്‌ ചിന്തി​ക്കുക. തന്റെ വചനത്തി​ലൂ​ടെ ദൈവം നൽകി​യി​രി​ക്കുന്ന  വാഗ്‌ദാ​ന​ങ്ങ​ളെ​ക്കു​റി​ച്ചും നിങ്ങളു​ടെ കാര്യ​ത്തിൽ എങ്ങനെ​യാ​ണു ദൈവം ആ വാക്കു പാലി​ച്ചി​രി​ക്കു​ന്നത്‌ എന്നതി​നെ​ക്കു​റി​ച്ചും ഓർക്കാ​നാ​കും. ഉദാഹ​ര​ണ​ത്തിന്‌ നിങ്ങളു​ടെ ജീവി​താ​വ​ശ്യ​ങ്ങൾക്കു​വേണ്ടി പിതാവ്‌ കരുതു​മെന്നു യേശു ഉറപ്പു​തന്നു. (മത്താ. 6:32, 33) കൂടാതെ നമ്മൾ ചോദി​ക്കു​മ്പോൾ ദൈവം പരിശു​ദ്ധാ​ത്മാ​വി​നെ നൽകു​മെ​ന്നും യേശു പറഞ്ഞു. (ലൂക്കോ. 11:13) യഹോവ ആ വാക്കെ​ല്ലാം പാലി​ച്ചി​രി​ക്കു​ന്നു. നിങ്ങളു​ടെ കാര്യ​ത്തിൽ സത്യമാ​യി​ത്തീർന്ന മറ്റു വാഗ്‌ദാ​ന​ങ്ങ​ളെ​ക്കു​റി​ച്ചും ചിന്തി​ക്കാം. ഉദാഹ​ര​ണ​ത്തിന്‌ ദൈവം നമ്മളോ​ടു ക്ഷമിക്കു​മെ​ന്നും നമ്മളെ ആശ്വസി​പ്പി​ക്കു​മെ​ന്നും ദൈവ​ത്തോട്‌ അടുത്ത്‌ ചെല്ലാൻ നമുക്കു വേണ്ട​തെ​ല്ലാം തരു​മെ​ന്നും പറഞ്ഞി​ട്ടുണ്ട്‌. (മത്താ. 6:14; 24:45; 2 കൊരി. 1:3) ഇപ്പോൾത്തന്നെ ദൈവം നിങ്ങൾക്കു​വേണ്ടി ചെയ്‌ത കാര്യ​ങ്ങ​ളെ​ക്കു​റിച്ച്‌ ധ്യാനി​ക്കു​ന്നത്‌, ഭാവി​യിൽ ദൈവം തന്റെ വാക്കു പാലി​ക്കു​മെന്ന നിങ്ങളു​ടെ പ്രത്യാശ കൂടുതൽ ശക്തമാ​ക്കും.

16. പ്രത്യാശ വില​യേ​റിയ ഒരു സമ്മാന​മാ​യി​രി​ക്കു​ന്നത്‌ എന്തു​കൊണ്ട്‌?

¹⁶ നമുക്കുള്ള നിത്യ​ജീ​വന്റെ പ്രത്യാശ ദൈവ​ത്തിൽനി​ന്നുള്ള വില​യേ​റിയ ഒരു സമ്മാന​മാണ്‌. ആ നല്ല ഭാവി​ക്കാ​യി നമ്മൾ ആകാം​ക്ഷ​യോ​ടെ കാത്തി​രി​ക്കു​ന്നു. അതു വരു​മെന്ന്‌ ഉറപ്പാണ്‌. ഈ പ്രത്യാശ നമുക്ക്‌ ഒരു നങ്കൂര​മാണ്‌. പരീക്ഷ​ണ​ങ്ങ​ളും ഉപദ്ര​വ​ങ്ങ​ളും ഉണ്ടാകു​മ്പോൾ സഹിച്ചു​നിൽക്കാ​നും മരണ​ത്തെ​പ്പോ​ലും നേരി​ടാ​നും അതു നമ്മളെ സഹായി​ക്കു​ന്നു. കൂടാതെ ഈ പ്രത്യാശ ഒരു പടത്തൊ​പ്പി​യു​മാണ്‌. അതു നമ്മുടെ ചിന്തകളെ സംരക്ഷി​ക്കു​ന്നു. അതു​കൊണ്ട്‌ തെറ്റായ കാര്യ​ങ്ങളെ തള്ളിക്ക​ളഞ്ഞ്‌ ശരിയായ കാര്യങ്ങൾ ചെയ്യാൻ നമുക്കു കഴിയു​ന്നു. ബൈബി​ളി​നെ അടിസ്ഥാ​ന​മാ​ക്കി​യുള്ള നമ്മുടെ ഈ പ്രത്യാശ യഹോ​വ​യെ​ക്കു​റിച്ച്‌ കൂടുതൽ മനസ്സി​ലാ​ക്കാൻ നമ്മളെ സഹായി​ക്കു​ന്നു. ദൈവം നമ്മളെ എത്രമാ​ത്രം സ്‌നേ​ഹി​ക്കു​ന്നെന്ന്‌ അതു കാണി​ച്ചു​ത​രു​ന്നു. പ്രത്യാശ ശക്തമാക്കി നിറു​ത്തു​ക​യാ​ണെ​ങ്കിൽ നമുക്ക്‌ അത്‌ ഒരുപാ​ടു പ്രയോ​ജനം ചെയ്യും.

17. പ്രത്യാശ നമുക്കു സന്തോഷം നൽകു​ന്നത്‌ എങ്ങനെ?

¹⁷ പൗലോസ്‌ അപ്പോ​സ്‌തലൻ റോമർക്ക്‌ എഴുതിയ കത്തിൽ ഇങ്ങനെ പ്രോ​ത്സാ​ഹി​പ്പി​ച്ചു: “പ്രത്യാശ ഓർത്ത്‌ സന്തോ​ഷി​ക്കുക.” (റോമ. 12:12) പൗലോ​സി​നു തന്റെ പ്രത്യാ​ശ​യിൽ സന്തോ​ഷി​ക്കാൻ കഴിഞ്ഞു. കാരണം താൻ വിശ്വ​സ്‌ത​നാ​യി തുടരു​ക​യാ​ണെ​ങ്കിൽ സ്വർഗ​ത്തിൽ നിത്യം ജീവി​ക്കാ​നുള്ള അനു​ഗ്രഹം തനിക്കു കിട്ടു​മെന്ന്‌ അദ്ദേഹ​ത്തിന്‌ ഉറപ്പാ​യി​രു​ന്നു. നമ്മുടെ പ്രത്യാശ ഓർത്ത്‌ നമുക്കും സന്തോ​ഷി​ക്കാം. കാരണം യഹോവ തന്റെ വാക്കു പാലി​ക്കു​മെന്ന്‌ നമുക്ക്‌ ഉറപ്പുണ്ട്‌. സങ്കീർത്ത​ന​ക്കാ​രൻ എഴുതി​യ​തു​പോ​ലെ ‘തന്റെ ദൈവ​മായ യഹോ​വ​യിൽ പ്രത്യാശ വെക്കു​ന്നവൻ സന്തുഷ്ടൻ. ദൈവം എപ്പോ​ഴും വിശ്വ​സ്‌ത​നാണ്‌’ എന്നു നമുക്ക്‌ അറിയാം.—സങ്കീ. 146:5, 6.