1-3. നമ്മൾ കരയാൻ ഇടയാ​യേ​ക്കാ​വുന്ന ചില സാഹച​ര്യ​ങ്ങൾ ഏതൊ​ക്കെ​യാണ്‌?

 നിങ്ങൾ എപ്പോ​ഴാണ്‌ അവസാ​ന​മാ​യി കരഞ്ഞത്‌? ഇടയ്‌ക്കൊ​ക്കെ സന്തോ​ഷം​കൊണ്ട്‌ നമ്മൾ കരയാ​റുണ്ട്‌. എന്നാൽ മിക്ക​പ്പോ​ഴും കരയു​ന്നതു സങ്കടം വരു​മ്പോ​ഴാണ്‌. ഉദാഹ​ര​ണ​ത്തിന്‌, പ്രിയ​പ്പെട്ട ആരെങ്കി​ലും മരിക്കു​മ്പോൾ നമ്മൾ കരയും. ഐക്യ​നാ​ടു​ക​ളിൽനി​ന്നുള്ള ലോറൽ സഹോ​ദരി പറയുന്നു: “എന്റെ മോളെ നഷ്ടപ്പെ​ട്ട​പ്പോൾ അതിന്റെ വേദന എനിക്ക്‌ ഒട്ടും താങ്ങാ​നാ​യില്ല. എന്നെ ആശ്വസി​പ്പി​ക്കാൻ ആർക്കും കഴിയി​ല്ലെന്നു തോന്നി​പ്പോ​യി. സങ്കടം​കൊണ്ട്‌ എന്റെ ഹൃദയം പൊട്ടി​പ്പോ​കു​മെന്നു ഞാൻ ഓർത്തു.” *

² മറ്റു ചില കാരണ​ങ്ങൾകൊ​ണ്ടും നമ്മൾ ചില​പ്പോൾ കരഞ്ഞേ​ക്കാം. ജപ്പാനി​ലെ ഒരു മുൻനി​ര​സേ​വി​ക​യായ ഹിരോ​മി സഹോ​ദരി പറയുന്നു: “ബൈബിൾസ​ന്ദേശം കേൾക്കാൻ ആളുകൾക്കു താത്‌പ​ര്യ​മി​ല്ലെന്നു കാണു​മ്പോൾ ഇടയ്‌ക്കൊ​ക്കെ എനിക്കു സങ്കടം വരാറുണ്ട്‌. ചില​പ്പോൾ ഞാൻ കണ്ണീ​രോ​ടെ യഹോ​വ​യോ​ടു പറയും, സത്യം അറിയാൻ ശരിക്കും ആഗ്രഹ​മു​ള്ള​വരെ കണ്ടെത്താൻ സഹായി​ക്കണേ എന്ന്‌.”

³ ഈ സഹോ​ദ​രി​മാർക്കു തോന്നി​യ​തു​പോ​ലെ നമ്മളിൽ പലർക്കും തോന്നാ​റുണ്ട്‌, ശരിയല്ലേ? (1 പത്രോ. 5:9) ‘സന്തോ​ഷ​ത്തോ​ടെ യഹോ​വയെ സേവി​ക്കാ​നാ​ണു’ നമ്മൾ ആഗ്രഹി​ക്കു​ന്നത്‌. പക്ഷേ ചില​പ്പോൾ കണ്ണീ​രോ​ടെ​യാ​യി​രി​ക്കും സേവി​ക്കു​ന്നത്‌. കാരണം പ്രിയ​പ്പെ​ട്ട​വരെ മരണത്തിൽ നഷ്ടപ്പെ​ടു​ന്ന​തി​ന്റെ വേദന​യോ നിരു​ത്സാ​ഹ​മോ ദൈവ​ത്തോ​ടുള്ള വിശ്വ​സ്‌ത​തയെ പരി​ശോ​ധി​ക്കുന്ന സാഹച​ര്യ​ങ്ങ​ളോ ഒക്കെ നമുക്കു നേരി​ട്ടേ​ക്കാം. (സങ്കീ. 6:6; 100:2) ഇത്തരം പ്രശ്‌നങ്ങൾ നേരി​ടു​മ്പോൾ നമുക്ക്‌ എന്തു ചെയ്യാം?

4. ഈ ലേഖന​ത്തിൽ നമ്മൾ എന്തായി​രി​ക്കും പഠിക്കു​ന്നത്‌?

⁴ യേശു​വി​ന്റെ ജീവി​ത​ത്തിൽനിന്ന്‌ നമുക്കു പലതും പഠിക്കാ​നാ​കും. ചില സന്ദർഭ​ങ്ങ​ളിൽ ശരിക്കും സങ്കടം​കൊണ്ട്‌ യേശു​വി​ന്റെ ‘കണ്ണു നിറ​ഞ്ഞൊ​ഴു​കി​യ​താ​യി’ ബൈബി​ളിൽ നമ്മൾ വായി​ക്കു​ന്നുണ്ട്‌. (യോഹ. 11:35; ലൂക്കോ. 19:41; 22:44; എബ്രാ. 5:7) ആ സന്ദർഭ​ങ്ങ​ളെ​ക്കു​റിച്ച്‌ നമുക്ക്‌ ഇപ്പോൾ നോക്കാം. അതിൽനിന്ന്‌, യേശു​വി​നെ​ക്കു​റി​ച്ചും പിതാ​വായ  യഹോ​വ​യെ​ക്കു​റി​ച്ചും എന്തു പഠിക്കാ​മെ​ന്നും നമ്മൾ കാണും. കൂടാതെ, സങ്കട​പ്പെ​ടു​ത്തുന്ന സാഹച​ര്യ​ങ്ങ​ളി​ലൂ​ടെ കടന്നു​പോ​കു​മ്പോൾ നമുക്ക്‌ എന്തു ചെയ്യാ​മെ​ന്നും പഠിക്കും.

5. യോഹ​ന്നാൻ 11:32-36-ലെ വിവര​ണ​ത്തിൽനിന്ന്‌ യേശു​വി​നെ​ക്കു​റിച്ച്‌ എന്തു മനസ്സി​ലാ​ക്കാം?

⁵ എ.ഡി. 32-ലെ മഞ്ഞുകാ​ലത്ത്‌ യേശു​വി​ന്റെ അടുത്ത കൂട്ടു​കാ​ര​നായ ലാസർ അസുഖം വന്ന്‌ മരിച്ചു. (യോഹ. 11:3, 14) ലാസറി​നു രണ്ടു പെങ്ങന്മാ​രു​ണ്ടാ​യി​രു​ന്നു, മറിയ​യും മാർത്ത​യും. യേശു​വിന്‌ ഈ കുടും​ബത്തെ ഒരുപാട്‌ ഇഷ്ടമാ​യി​രു​ന്നു. തങ്ങൾ ഒത്തിരി സ്‌നേ​ഹി​ച്ചി​രുന്ന ആങ്ങള മരിച്ച​പ്പോൾ ആ പെങ്ങന്മാർ ആകെ തകർന്നു​പോ​യി. ലാസർ മരിച്ച​ശേ​ഷ​മാ​ണു യേശു അവരുടെ ഗ്രാമ​മായ ബഥാന്യ​യി​ലേക്കു പോകു​ന്നത്‌. യേശു വരു​ന്നെന്നു കേട്ട ഉടനെ മാർത്ത കാണാൻ ഓടി​ച്ചെന്നു. എത്ര സങ്കട​ത്തോ​ടെ​യാ​യി​രി​ക്കും മാർത്ത യേശു​വി​നോട്‌, “കർത്താവേ, അങ്ങ്‌ ഇവി​ടെ​യു​ണ്ടാ​യി​രു​ന്നെ​ങ്കിൽ എന്റെ ആങ്ങള മരിക്കി​ല്ലാ​യി​രു​ന്നു” എന്നു പറഞ്ഞത്‌. (യോഹ. 11:21) അതു കഴിഞ്ഞ്‌ മറിയ​യും മറ്റുള്ള​വ​രും കരയു​ന്നതു കണ്ടപ്പോൾ യേശു​വി​ന്റെ​യും “കണ്ണു നിറ​ഞ്ഞൊ​ഴു​കി.”—യോഹ​ന്നാൻ 11:32-36 വായി​ക്കുക.

6. യേശു എന്തു​കൊ​ണ്ടാ​യി​രി​ക്കും ആ സന്ദർഭ​ത്തിൽ കരഞ്ഞത്‌?

⁶ എന്തു​കൊ​ണ്ടാ​യി​രി​ക്കും യേശു അപ്പോൾ കരഞ്ഞത്‌? തിരു​വെ​ഴു​ത്തു​ക​ളിൽനി​ന്നുള്ള ഉൾക്കാഴ്‌ച (ഇംഗ്ലീഷ്‌) എന്ന പുസ്‌തകം പറയുന്നു: “കൂട്ടു​കാ​ര​നായ ലാസർ മരിച്ച​തു​കൊ​ണ്ടും ലാസറി​ന്റെ പെങ്ങന്മാ​രു​ടെ സങ്കടം കണ്ടതു​കൊ​ണ്ടും യേശു ‘വല്ലാതെ അസ്വസ്ഥ​നാ​യി. യേശു​വി​ന്റെ കണ്ണു നിറ​ഞ്ഞൊ​ഴു​കി.’” * അസുഖം വന്നപ്പോൾ ലാസർ എത്ര വേദന സഹിച്ചി​രി​ക്കാ​മെ​ന്നും താൻ പെട്ടെ​ന്നു​തന്നെ മരിക്കു​മെന്നു മനസ്സി​ലാ​യ​പ്പോൾ ആ പ്രിയ കൂട്ടു​കാ​രൻ എത്രമാ​ത്രം വിഷമി​ച്ചി​ട്ടു​ണ്ടാ​കു​മെ​ന്നും യേശു ചിന്തി​ച്ചി​രി​ക്കാം. ഇനി, തങ്ങളുടെ ആങ്ങള മരിച്ച​പ്പോൾ മറിയ​യ്‌ക്കും മാർത്ത​യ്‌ക്കും എത്ര സങ്കടമാ​യെന്നു കണ്ടതും യേശു​വി​നെ വിഷമി​പ്പി​ച്ചി​ട്ടുണ്ട്‌. ഒരു അടുത്ത കൂട്ടു​കാ​ര​നോ ഒരു കുടും​ബാം​ഗ​മോ മരിച്ച​പ്പോൾ നിങ്ങൾക്കും അതു​പോ​ലെ സങ്കടം തോന്നി​ക്കാ​ണും. ഈ സംഭവ​ത്തിൽനി​ന്നും നമുക്കു പഠിക്കാ​നാ​കുന്ന മൂന്നു പാഠങ്ങൾ നോക്കാം.

7. തന്റെ കൂട്ടു​കാ​രെ ഓർത്ത്‌ യേശു കണ്ണീ​രൊ​ഴു​ക്കി​യ​തിൽനിന്ന്‌ യഹോ​വ​യെ​ക്കു​റിച്ച്‌ നമുക്ക്‌ എന്തു മനസ്സി​ലാ​ക്കാം?

⁷ യഹോ​വ​യ്‌ക്കു നിങ്ങളു​ടെ സങ്കടം മനസ്സി​ലാ​കും. യേശു തന്റെ പിതാ​വി​ന്റെ ‘തനിപ്പ​കർപ്പാണ്‌.’ (എബ്രാ. 1:3) ലാസർ മരിച്ച​പ്പോൾ കരഞ്ഞതി​ലൂ​ടെ പ്രിയ​പ്പെ​ട്ട​വരെ മരണത്തിൽ നഷ്ടമാ​കു​മ്പോൾ യഹോ​വ​യ്‌ക്കു തോന്നുന്ന സങ്കടമാ​ണു യേശു കാണി​ച്ചു​ത​ന്നത്‌. (യോഹ. 14:9) അതു​കൊണ്ട്‌ നിങ്ങളു​ടെ  പ്രിയ​പ്പെട്ട ആരെങ്കി​ലും മരിച്ചു​പോ​യി​ട്ടു​ണ്ടെ​ങ്കിൽ ഇക്കാര്യം ഓർക്കുക: യഹോവ നിങ്ങളു​ടെ സങ്കടം കാണുക മാത്രമല്ല നിങ്ങളു​ടെ​കൂ​ടെ സങ്കട​പ്പെ​ടു​ക​യും ചെയ്യു​ന്നുണ്ട്‌. നിങ്ങളു​ടെ തകർന്ന മനസ്സിന്റെ വേദന മാറ്റാൻ യഹോവ ആഗ്രഹി​ക്കു​ന്നു.—സങ്കീ. 34:18; 147:3.

8. നമ്മുടെ പ്രിയ​പ്പെ​ട്ട​വരെ യേശു തിരികെ ജീവനി​ലേക്കു കൊണ്ടു​വ​രു​മെന്നു നമുക്ക്‌ എന്തു​കൊണ്ട്‌ വിശ്വ​സി​ക്കാം?

⁸ നിങ്ങളു​ടെ പ്രിയ​പ്പെ​ട്ട​വരെ തിരികെ ജീവനി​ലേക്കു കൊണ്ടു​വ​രാൻ യേശു ഒരുപാട്‌ ആഗ്രഹി​ക്കു​ന്നു. യേശു കരയു​ന്ന​തി​നു തൊട്ടു​മുമ്പ്‌ മാർത്ത​യ്‌ക്ക്‌ ഈ ഉറപ്പു​കൊ​ടു​ത്തു: “നിന്റെ ആങ്ങള എഴു​ന്നേ​റ്റു​വ​രും.” യേശു പറഞ്ഞതു മാർത്ത വിശ്വ​സി​ച്ചു. (യോഹ. 11:23-27) യഹോ​വ​യു​ടെ വിശ്വ​സ്‌ത​യായ ഒരു ആരാധി​ക​യാ​യി​രുന്ന മാർത്ത​യ്‌ക്ക്‌, നൂറ്റാ​ണ്ടു​കൾക്കു മുമ്പ്‌ പ്രവാ​ച​ക​ന്മാ​രായ ഏലിയ​യും എലീശ​യും മരിച്ച​വരെ ഉയിർപ്പിച്ച കാര്യം അറിയാ​മാ​യി​രു​ന്നു. (1 രാജാ. 17:17-24; 2 രാജാ. 4:32-37) ഇനി, യേശു ആളുകളെ ഉയിർപ്പി​ച്ച​തി​നെ​ക്കു​റി​ച്ചും മാർത്ത കേട്ടി​ട്ടു​ണ്ടാ​യി​രു​ന്നി​രി​ക്കണം. (ലൂക്കോ. 7:11-15; 8:41, 42, 49-56) മരിച്ചു​പോയ പ്രിയ​പ്പെ​ട്ട​വരെ കാണാ​നാ​കു​മെന്നു നിങ്ങൾക്കും വിശ്വ​സി​ക്കാം. കാരണം മരിച്ച​വരെ ജീവനി​ലേക്കു കൊണ്ടു​വ​രാൻവേണ്ടി യേശു കാത്തി​രി​ക്കു​ക​യാണ്‌. ലാസർ മരിച്ച​പ്പോൾ സങ്കടത്തി​ലായ തന്റെ കൂട്ടു​കാ​രെ ആശ്വസി​പ്പി​ക്കുന്ന സമയത്ത്‌ യേശു കരഞ്ഞതിൽനിന്ന്‌ നമുക്ക്‌ അതു മനസ്സി​ലാ​ക്കാം.

9. യേശു​വി​നെ​പ്പോ​ലെ വേർപാ​ടി​ന്റെ വേദന അനുഭ​വി​ക്കു​ന്ന​വരെ നമുക്ക്‌ എങ്ങനെ സഹായി​ക്കാം? ഒരു ഉദാഹ​രണം പറയുക.

⁹ വേർപാ​ടി​ന്റെ വേദന​യി​ലാ​യി​രി​ക്കു​ന്ന​വരെ സഹായി​ക്കുക. യേശു മാർത്ത​യു​ടെ​യും മറിയ​യു​ടെ​യും കൂടെ കരയുക മാത്രമല്ല ചെയ്‌തത്‌. അവർക്കു പറയാ​നു​ള്ളതു കേൾക്കു​ക​യും അവരെ ആശ്വസി​പ്പി​ക്കു​ക​യും ചെയ്‌തു. പ്രിയ​പ്പെ​ട്ട​വ​രു​ടെ വേർപാ​ടിൽ വേദനി​ക്കു​ന്ന​വ​രു​ടെ കാര്യ​ത്തിൽ നമുക്കും അതുതന്നെ ചെയ്യാം. ഓസ്‌​ട്രേ​ലി​യ​യിൽ താമസി​ക്കുന്ന ഡാൻ എന്നു പേരുള്ള ഒരു മൂപ്പൻ പറയുന്നു: “എന്റെ ഭാര്യ മരിച്ചു​ക​ഴി​ഞ്ഞ​പ്പോൾ എനിക്കു മറ്റുള്ള​വ​രു​ടെ സഹായം വേണമാ​യി​രു​ന്നു. രാത്രി​യെ​ന്നോ പകലെ​ന്നോ ഇല്ലാതെ ഞാൻ പറയു​ന്ന​തെ​ല്ലാം കേട്ടി​രി​ക്കാൻ പല സഹോ​ദ​ര​ങ്ങ​ളും തയ്യാറാ​യി. പലപ്പോ​ഴും ഞാൻ അവരുടെ മുന്നിൽ ഇരുന്ന്‌ പൊട്ടി​ക്ക​ര​ഞ്ഞി​ട്ടുണ്ട്‌. അവർ എന്റെ കാറു കഴുകാ​നും സാധനങ്ങൾ വാങ്ങി​ത്ത​രാ​നും ഭക്ഷണം ഉണ്ടാക്കാ​നും ഒക്കെ മനസ്സോ​ടെ മുന്നോ​ട്ടു​വന്നു. ചില​പ്പോ​ഴൊ​ക്കെ തനിയെ അതൊ​ന്നും ചെയ്യാൻ എനിക്കു പറ്റില്ലാ​യി​രു​ന്നു. ഇനി, മിക്ക​പ്പോ​ഴും അവർ എന്റെകൂ​ടെ ഇരുന്ന്‌ പ്രാർഥി​ക്കു​മാ​യി​രു​ന്നു. അങ്ങനെ അവർ യഥാർഥ സ്‌നേ​ഹി​ത​രും ‘കഷ്ടതക​ളു​ടെ സമയത്ത്‌’ കൂടപ്പി​റ​പ്പും ആണെന്നു തെളി​യി​ച്ചു.”—സുഭാ. 17:17.

10. ലൂക്കോസ്‌ 19:36-40-ൽ ഏതു സംഭവ​ത്തെ​ക്കു​റി​ച്ചാ​ണു പറഞ്ഞി​രി​ക്കു​ന്നത്‌, തുടർന്ന്‌ എന്തു സംഭവി​ച്ചു?

¹⁰ എ.ഡി. 33 നീസാൻ 9-ന്‌ യേശു യരുശ​ലേ​മിൽ എത്തി. യേശു നഗരത്തിന്‌ അടുത്ത്‌ എത്തിയ​പ്പോൾ ആളുകൾ യേശു​വി​നെ തങ്ങളുടെ രാജാ​വാ​യി സ്വീക​രി​ക്കാൻവേണ്ടി അവരുടെ പുറങ്കു​പ്പാ​യങ്ങൾ വഴിയിൽ വിരിച്ചു. എല്ലാവ​രും വലിയ സന്തോ​ഷ​ത്തി​ലാ​യി​രു​ന്നു. (ലൂക്കോസ്‌ 19:36-40 വായി​ക്കുക.) എന്നാൽ ശിഷ്യ​ന്മാർ ഒട്ടും പ്രതീ​ക്ഷി​ക്കാത്ത ഒരു കാര്യ​മാ​ണു തുടർന്ന്‌ സംഭവി​ച്ചത്‌. “യേശു നഗരത്തിന്‌ അടുത്ത്‌ എത്തിയ​പ്പോൾ അതിനെ നോക്കി കരഞ്ഞു.” എന്നിട്ട്‌, നിറക​ണ്ണു​ക​ളോ​ടെ യരുശ​ലേ​മി​ലെ ആളുകൾക്കു സംഭവി​ക്കാൻപോ​കുന്ന ദുരന്ത​ത്തെ​ക്കു​റിച്ച്‌ പറഞ്ഞു.—ലൂക്കോ. 19:41-44.

11. യരുശ​ലേ​മിൽ താമസി​ക്കു​ന്ന​വരെ ഓർത്ത്‌ യേശു കരഞ്ഞത്‌ എന്തു​കൊ​ണ്ടാണ്‌?

¹¹ യേശു​വി​ന്റെ മനസ്സു വേദനി​ക്കാൻ കാരണ​മു​ണ്ടാ​യി​രു​ന്നു. കാര്യം അവർ തന്നെ സന്തോ​ഷ​ത്തോ​ടെ സ്വീക​രി​ക്കു​ന്നു​ണ്ടെ​ങ്കി​ലും അവി​ടെ​യുള്ള ജൂതന്മാ​രിൽ മിക്കവ​രും ദൈവ​രാ​ജ്യ​സ​ന്ദേശം കേൾക്കാ​നോ അതനു​സ​രിച്ച്‌ പ്രവർത്തി​ക്കാ​നോ തയ്യാറാ​കി​ല്ലെന്നു യേശു​വിന്‌ അറിയാ​മാ​യി​രു​ന്നു. അതു​കൊ​ണ്ടു​തന്നെ യരുശ​ലേം നശിപ്പി​ക്ക​പ്പെ​ടു​ക​യും ആരെങ്കി​ലും ആ നാശത്തെ അതിജീ​വി​ച്ചാൽ അവർ ബന്ദിക​ളാ​യി പോ​കേ​ണ്ടി​വ​രു​ക​യും ചെയ്യു​മാ​യി​രു​ന്നു. (ലൂക്കോ. 21:20-24) യേശു പറഞ്ഞതു​പോ​ലെ​തന്നെ മിക്കവ​രും യേശു​വി​നെ തള്ളിക്ക​ളഞ്ഞു. നിങ്ങളു​ടെ പ്രദേ​ശത്ത്‌ മിക്ക ആളുക​ളും ദൈവ​രാ​ജ്യ​സ​ന്ദേ​ശ​ത്തോട്‌ എങ്ങനെ​യാ​ണു പ്രതി​ക​രി​ക്കു​ന്നത്‌? വളരെ കുറച്ച്‌ പേർ മാത്രമേ സത്യം സ്വീക​രി​ക്കാൻ തയ്യാറാ​കു​ന്നു​ള്ളോ? എങ്കിൽ യേശു​വി​ന്റെ കണ്ണീരിൽനിന്ന്‌ നിങ്ങൾക്കു ചില കാര്യങ്ങൾ പഠിക്കാ​നാ​കും. മൂന്നു പാഠങ്ങ​ളെ​ക്കു​റിച്ച്‌ നമുക്ക്‌ ഇപ്പോൾ നോക്കാം.

12. തന്റെ അയൽക്കാ​രെ ഓർത്ത്‌ യേശു കരഞ്ഞതിൽനിന്ന്‌ യഹോ​വ​യെ​ക്കു​റിച്ച്‌ നമുക്ക്‌ എന്തു പഠിക്കാം?

¹² യഹോ​വ​യ്‌ക്ക്‌ ആളുക​ളെ​ക്കു​റിച്ച്‌ ചിന്തയുണ്ട്‌. യേശു കരഞ്ഞതിൽനി​ന്നും യഹോ​വ​യ്‌ക്ക്‌ ആളുക​ളെ​ക്കു​റിച്ച്‌ എത്രമാ​ത്രം ചിന്തയു​ണ്ടെന്നു നമുക്കു മനസ്സി​ലാ​ക്കാം. ‘ആരും നശിച്ചു​പോ​കാ​തെ എല്ലാവ​രും മാനസാ​ന്ത​ര​പ്പെ​ടാ​നാ​ണു ദൈവം ആഗ്രഹി​ക്കു​ന്നത്‌.’ (2 പത്രോ. 3:9) ദൈവ​രാ​ജ്യ​ത്തി​ന്റെ  സന്തോ​ഷ​വാർത്ത​യെ​ക്കു​റിച്ച്‌ പഠിക്കാൻ ആളുകളെ സഹായി​ക്കു​ന്ന​തി​നു നമുക്കു കഴിവി​ന്റെ പരമാ​വധി ശ്രമി​ക്കാം. അങ്ങനെ അയൽക്കാ​രോ​ടു സ്‌നേ​ഹ​മു​ണ്ടെന്നു നമുക്കും തെളി​യി​ക്കാം.—മത്താ. 22:39. *

13-14. യേശു എങ്ങനെ​യാണ്‌ ആളുക​ളോട്‌ അനുകമ്പ കാണി​ച്ചത്‌, നമുക്ക്‌ എങ്ങനെ ആ ഗുണം വളർത്തി​യെ​ടു​ക്കാം?

¹³ പ്രസം​ഗ​പ്ര​വർത്ത​ന​ത്തിൽ യേശു കഠിനാ​ധ്വാ​നം ചെയ്‌തു. കിട്ടുന്ന എല്ലാ അവസര​ങ്ങ​ളി​ലും ആളുകളെ പഠിപ്പി​ക്കാൻ തയ്യാറാ​യി​ക്കൊണ്ട്‌ അവരോ​ടു സ്‌നേ​ഹ​മു​ണ്ടെന്നു യേശു തെളി​യി​ച്ചു. (ലൂക്കോ. 19:47, 48) എന്താണ്‌ അതിനു പ്രേരി​പ്പി​ച്ചത്‌? ആളുക​ളോ​ടു തോന്നിയ അനുകമ്പ. ചില സന്ദർഭ​ങ്ങ​ളിൽ ഒരുപാ​ടു പേർ യേശു പറയു​ന്നതു കേൾക്കാൻ വന്നിട്ട്‌ യേശു​വി​നും ശിഷ്യ​ന്മാർക്കും ‘ഭക്ഷണം കഴിക്കാൻപോ​ലും പറ്റിയില്ല.’ (മർക്കോ. 3:20) ഇനി, ഒരു മനുഷ്യൻ രാത്രി​യിൽ സംസാ​രി​ക്കാൻ ആഗ്രഹി​ച്ച​പ്പോൾ യേശു അതിനും തയ്യാറാ​യി. (യോഹ. 3:1, 2) യേശു പറയു​ന്നതു കേൾക്കാൻ മനസ്സു​കാ​ണിച്ച മിക്കവ​രും ശിഷ്യ​ന്മാ​രാ​യി​ത്തീർന്നില്ല. എന്നാൽ അവർക്കെ​ല്ലാ​വർക്കും ദൈവ​രാ​ജ്യ​സ​ന്ദേശം കേൾക്കാ​നുള്ള അവസരം കിട്ടി. ഇന്നും എല്ലാവ​രോ​ടും സന്തോ​ഷ​വാർത്ത അറിയി​ച്ചു​കൊണ്ട്‌ സമഗ്ര​മാ​യി സാക്ഷീ​ക​രി​ക്കാൻ നമ്മൾ ആഗ്രഹി​ക്കു​ന്നു. (പ്രവൃ. 10:42) അതിനു പ്രസം​ഗ​പ്ര​വർത്തനം ചെയ്യുന്ന രീതി​കൾക്കു നമ്മൾ ചില മാറ്റങ്ങൾ വരു​ത്തേ​ണ്ട​തു​ണ്ടാ​യി​രി​ക്കാം.

¹⁴ വേണ്ട മാറ്റങ്ങൾ വരുത്താൻ തയ്യാറാ​കുക. നമ്മൾ എപ്പോ​ഴും ഒരേ സമയത്തു​ത​ന്നെ​യാ​ണു പ്രസം​ഗ​പ്ര​വർത്തനം ചെയ്യു​ന്ന​തെ​ങ്കിൽ ബൈബിൾ പഠിക്കാൻ താത്‌പ​ര്യ​മുള്ള ചിലരെ കണ്ടെത്താൻ കഴിയാ​തെ​വ​ന്നേ​ക്കാം. മെറ്റിൽഡ എന്നു പേരുള്ള ഒരു മുൻനി​ര​സേ​വിക പറയുന്നു: “ഞാനും ഭർത്താ​വും വ്യത്യസ്‌ത സമയങ്ങ​ളിൽ ആളുകളെ കണ്ടെത്താൻ ശ്രമി​ക്കു​ന്നു. അതിരാ​വി​ലെ ഞങ്ങൾ ബിസി​നെസ്സ്‌ മേഖല​ക​ളിൽ പ്രവർത്തി​ക്കും. ഉച്ചയാ​കു​മ്പോ​ഴേ​ക്കും പൊതു​വേ ആളുകളെ വഴിയി​ലൊ​ക്കെ കാണാ​നാ​കു​ന്ന​തു​കൊണ്ട്‌ ആ സമയത്ത്‌ ഞങ്ങൾ സാഹി​ത്യ​കൈ​വണ്ടി ഉപയോ​ഗിച്ച്‌ സാക്ഷീ​ക​രി​ക്കും. വൈകു​ന്നേ​ര​മാ​ണു വീടു​തോ​റും പോകു​ന്നത്‌. കാരണം അപ്പോൾ ആളുകളെ വീടു​ക​ളിൽ കാണാ​റുണ്ട്‌.” നമ്മുടെ സൗകര്യം നോക്കി പ്രസം​ഗ​പ്ര​വർത്തനം ചെയ്യു​ന്ന​തി​നു പകരം കൂടുതൽ ആളുകളെ കണ്ടെത്താൻ കഴിയുന്ന സമയത്ത്‌ അതു ചെയ്യാൻ തയ്യാറാ​കണം. അങ്ങനെ ചെയ്യു​ന്നെ​ങ്കിൽ യഹോ​വ​യ്‌ക്കു സന്തോ​ഷ​മാ​കും.

15. ലൂക്കോസ്‌ 22:39-44 അനുസ​രിച്ച്‌ യേശു​വി​ന്റെ മരണത്തി​നു തൊട്ടു​മു​മ്പുള്ള രാത്രി​യിൽ എന്തു സംഭവി​ച്ചു?

¹⁵ എ.ഡി. 33 നീസാൻ 14-ാം തീയതി രാത്രി യേശു ഗത്ത്‌ശെമന തോട്ട​ത്തി​ലേക്കു പോയി, അവി​ടെ​വെച്ച്‌ യഹോ​വ​യോ​ടു പ്രാർഥി​ച്ചു. (ലൂക്കോസ്‌ 22:39-44 വായി​ക്കുക.) യേശു ‘ഉറക്കെ നിലവി​ളി​ച്ചും കണ്ണീ​രൊ​ഴു​ക്കി​യും കൊണ്ട്‌ ഉള്ളുരു​കി പ്രാർഥി​ച്ചത്‌’ ആ സമയത്താണ്‌. (എബ്രാ. 5:7) മരണത്തി​നു  തൊട്ടു​മു​മ്പുള്ള ആ രാത്രി​യിൽ എന്തിനു​വേ​ണ്ടി​യാണ്‌ യേശു പ്രാർഥി​ച്ചത്‌? യഹോ​വ​യോ​ടു വിശ്വ​സ്‌ത​നാ​യി നിൽക്കാ​നും യഹോ​വ​യു​ടെ ഇഷ്ടം ചെയ്യാ​നും ഉള്ള ശക്തിക്കു​വേണ്ടി. തന്റെ മകന്റെ ആത്മാർഥ​ത​യോ​ടെ​യുള്ള പ്രാർഥന കേട്ട യഹോവ ഒരു ദൂതനെ അയച്ച്‌ യേശു​വി​നെ ശക്തി​പ്പെ​ടു​ത്തി.

16. ഗത്ത്‌ശെമന തോട്ട​ത്തിൽവെച്ച്‌ പ്രാർഥി​ക്കു​മ്പോൾ എന്തു​കൊ​ണ്ടാണ്‌ യേശു കരഞ്ഞത്‌?

¹⁶ ഗത്ത്‌ശെമന തോട്ട​ത്തിൽവെച്ച്‌ പ്രാർഥി​ക്കു​മ്പോൾ യേശു കരഞ്ഞു​പോ​യി. അതിനു പല കാരണ​ങ്ങ​ളു​ണ്ടാ​യി​രു​ന്നു. ഒന്ന്‌, ഒരു ദൈവ​നി​ന്ദ​ക​നാ​യി ആളുകൾ തന്നെ കാണു​മ​ല്ലോ എന്ന ചിന്ത യേശു​വി​നു സഹിക്കാ​നാ​യില്ല. രണ്ട്‌, വലി​യൊ​രു ഉത്തരവാ​ദി​ത്വ​മാ​ണു തന്റെ മേൽ ഉള്ളതെന്നു യേശു​വിന്‌ അറിയാ​മാ​യി​രു​ന്നു, അതായത്‌ യഹോ​വ​യോ​ടു വിശ്വ​സ്‌ത​നാ​യി നിന്നു​കൊണ്ട്‌ ദൈവ​ത്തി​ന്റെ സത്‌പേ​രി​നു വന്നിരി​ക്കുന്ന കളങ്കം ഇല്ലാതാ​ക്കാ​നുള്ള ഉത്തരവാ​ദി​ത്വം. നിങ്ങൾ ഇപ്പോൾ, യഹോ​വ​യോ​ടുള്ള നിങ്ങളു​ടെ വിശ്വ​സ്‌തത പരി​ശോ​ധി​ക്കുന്ന ഒരു സാഹച​ര്യ​ത്തി​ലൂ​ടെ കടന്നു​പോ​കു​ക​യാ​ണോ? എങ്കിൽ യേശു കരഞ്ഞതിൽനിന്ന്‌ നിങ്ങൾക്കു ചിലതു പഠിക്കാ​നാ​കും. മൂന്നു പാഠങ്ങ​ളെ​ക്കു​റിച്ച്‌ ഇപ്പോൾ നോക്കാം.

17. യേശു​വി​ന്റെ ആത്മാർഥ​മായ പ്രാർഥ​ന​യ്‌ക്ക്‌ ഉത്തരം കൊടു​ത്ത​തിൽനിന്ന്‌ യഹോ​വ​യെ​ക്കു​റിച്ച്‌ നമുക്ക്‌ എന്തു പഠിക്കാം?

¹⁷ നിങ്ങളു​ടെ ഉള്ളുരു​കി​യുള്ള പ്രാർഥന യഹോവ കേൾക്കു​ന്നു. യേശു ആത്മാർഥ​മാ​യി അപേക്ഷി​ച്ച​പ്പോൾ യഹോവ അതു കേട്ടു. കാരണം തന്റെ പിതാ​വി​നോ​ടു വിശ്വ​സ്‌ത​നാ​യി നിൽക്കു​ക​യും പിതാ​വി​ന്റെ പേരിനു വന്നിരി​ക്കുന്ന കളങ്കം ഇല്ലാതാ​ക്കു​ക​യും ചെയ്യുക എന്നതാ​യി​രു​ന്നു യേശു​വി​ന്റെ പ്രധാ​ന​ല​ക്ഷ്യം. നമ്മു​ടെ​യും പ്രധാ​ന​ല​ക്ഷ്യം അതുത​ന്നെ​യാ​ണെ​ങ്കിൽ സഹായ​ത്തി​നാ​യി യഹോ​വ​യോ​ടു പ്രാർഥി​ക്കു​മ്പോൾ യഹോവ അതിന്‌ ഉത്തരം തരും.—സങ്കീ. 145:18, 19.

18. നമ്മുടെ അവസ്ഥ മനസ്സി​ലാ​ക്കുന്ന ഒരു സുഹൃ​ത്തി​നെ​പ്പോ​ലെ​യാണ്‌ യേശു എന്നു പറയാ​വു​ന്നത്‌ എന്തു​കൊണ്ട്‌?

¹⁸ നമ്മുടെ അവസ്ഥ യേശു​വി​നു ശരിക്കും മനസ്സി​ലാ​കും. നമ്മൾ വലിയ പ്രയാ​സ​ത്തി​ലാ​യി​രി​ക്കു​മ്പോൾ നമ്മുടെ വിഷമം ശരിക്കും മനസ്സി​ലാ​ക്കുന്ന ഒരു കൂട്ടു​കാ​ര​നോ കൂട്ടു​കാ​രി​യോ ഉണ്ടായി​രി​ക്കു​ന്നത്‌ എത്ര ആശ്വാ​സ​മാ​ണല്ലേ? പ്രത്യേ​കിച്ച്‌ ആ വ്യക്തി നമ്മു​ടേ​തു​പോ​ലുള്ള പ്രയാ​സങ്ങൾ അനുഭ​വി​ച്ചി​ട്ടുള്ള ഒരാളാ​ണെ​ങ്കിൽ അദ്ദേഹ​ത്തി​നു നമ്മുടെ വിഷമം മനസ്സി​ലാ​ക്കാൻ എളുപ്പ​മാ​യി​രി​ക്കും. യേശു അങ്ങനെ​യുള്ള ഒരു സുഹൃ​ത്താണ്‌. പ്രതി​സ​ന്ധി​ക​ളു​ണ്ടാ​കു​മ്പോൾ നമ്മൾ തളർന്നു​പോ​യേ​ക്കാ​മെ​ന്നും നമുക്കു സഹായം വേണ​മെ​ന്നും യേശു​വിന്‌ അറിയാം. “സഹായം ആവശ്യ​മുള്ള സമയത്തു​തന്നെ” നമുക്ക്‌ അതു കിട്ടു​ന്നെന്നു യേശു ഉറപ്പു​വ​രു​ത്തു​ക​യും ചെയ്യും. (എബ്രാ. 4:15, 16) ഗത്ത്‌ശെമന തോട്ട​ത്തിൽവെച്ച്‌ ഒരു ദൈവ​ദൂ​തൻ നൽകിയ സഹായം യേശു സ്വീക​രി​ച്ചു. അതു​പോ​ലെ യഹോവ തരുന്ന സഹായം സ്വീക​രി​ക്കാൻ നമ്മളും തയ്യാറാ​കണം. അതു ചില​പ്പോൾ ഒരു പ്രസി​ദ്ധീ​ക​ര​ണ​ത്തി​ലൂ​ടെ​യോ വീഡി​യോ​യി​ലൂ​ടെ​യോ പ്രസം​ഗ​ത്തി​ലൂ​ടെ​യോ ലഭി​ച്ചേ​ക്കാം. അതല്ലെ​ങ്കിൽ ഒരു മൂപ്പനോ സഹോ​ദ​ര​ങ്ങ​ളിൽ ആരെങ്കി​ലു​മോ  നമ്മളെ സന്ദർശി​ക്കു​ന്ന​തി​ലൂ​ടെ​യാ​യി​രി​ക്കാം കിട്ടു​ന്നത്‌.

19. പരി​ശോ​ധ​ന​കളെ നേരി​ടാ​നുള്ള ശക്തി കിട്ടാൻ നിങ്ങൾക്ക്‌ എന്തു ചെയ്യാം? ഒരു ഉദാഹ​രണം പറയുക.

¹⁹ യഹോവ നിങ്ങൾക്ക്‌ ‘സമാധാ​നം’ തരും. യഹോവ എങ്ങനെ​യാ​ണു നമ്മളെ ശക്തി​പ്പെ​ടു​ത്തു​ന്നത്‌? നമ്മൾ പ്രാർഥി​ക്കു​മ്പോൾ “മനുഷ്യ​ബു​ദ്ധിക്ക്‌ അതീത​മായ ദൈവ​സ​മാ​ധാ​നം” തന്നു​കൊണ്ട്‌. (ഫിലി. 4:6, 7) യഹോവ തരുന്ന ആ സമാധാ​നം നമ്മുടെ മനസ്സിനെ ശാന്തമാ​ക്കും, ശരിയാ​യി ചിന്തി​ക്കാൻ സഹായി​ക്കു​ക​യും ചെയ്യും. അക്കാര്യം അനുഭ​വി​ച്ച​റിഞ്ഞ ഒരാളാ​ണു ലോയിസ്‌. സഹോ​ദരി പറയുന്നു: “ഞാൻ ഒറ്റയ്‌ക്കാ​ണ​ല്ലോ എന്ന്‌ എനിക്ക്‌ ഇടയ്‌ക്കി​ടെ തോന്നാ​റുണ്ട്‌. അങ്ങനെ​വ​രു​മ്പോൾ യഹോവ എന്നെ സ്‌നേ​ഹി​ക്കു​ന്നില്ല എന്നൊക്ക ഞാൻ ചിന്തി​ച്ചു​പോ​കും. പക്ഷേ അപ്പോൾത്തന്നെ ഞാൻ യഹോ​വ​യോട്‌ അതെക്കു​റിച്ച്‌ പറയും. അങ്ങനെ പ്രാർഥിച്ച്‌ കഴിയു​മ്പോൾ മനസ്സു ശാന്തമാ​കു​ന്നു.” പ്രാർഥി​ക്കു​ന്ന​തി​ലൂ​ടെ നമുക്കും സമാധാ​നം നേടാ​നാ​കു​മെ​ന്നാ​ണു സഹോ​ദ​രി​യു​ടെ അനുഭവം കാണി​ക്കു​ന്നത്‌.

20. യേശു കരഞ്ഞ മൂന്നു സന്ദർഭ​ങ്ങ​ളിൽനിന്ന്‌ നമ്മൾ എന്തെല്ലാം പാഠങ്ങ​ളാ​ണു പഠിച്ചത്‌?

²⁰ യേശു കരഞ്ഞ ആ മൂന്നു സന്ദർഭ​ങ്ങ​ളിൽനി​ന്നും നമുക്ക്‌ ആശ്വാസം തരുന്ന​തും ജീവി​ത​ത്തിൽ പകർത്താ​വു​ന്ന​തും ആയ എന്തെല്ലാം പാഠങ്ങ​ളാ​ണു നമ്മൾ പഠിച്ചത്‌? പ്രിയ​പ്പെ​ട്ടവർ മരിച്ചു​പോ​കു​മ്പോൾ യഹോ​വ​യും യേശു​വും നമ്മളെ സഹായി​ക്കു​മെ​ന്നും അത്തരം വേദന അനുഭ​വി​ക്കുന്ന മറ്റുള്ള​വരെ സഹായി​ക്കാൻ നമ്മളും തയ്യാറാ​ക​ണ​മെ​ന്നും നമ്മൾ പഠിച്ചു. യഹോ​വ​യു​ടെ​യും യേശു​വി​ന്റെ​യും അനുക​മ്പ​യെ​ക്കു​റിച്ച്‌ പഠിച്ചത്‌ ആളുക​ളോട്‌ സന്തോ​ഷ​വാർത്ത അറിയി​ക്കു​ക​യും അവരെ പഠിപ്പി​ക്കു​ക​യും ചെയ്യു​മ്പോൾ അനുകമ്പ കാണി​ക്കാൻ നമുക്ക്‌ ഒരു പ്രോ​ത്സാ​ഹ​ന​മാ​യി. യഹോ​വ​യും ദൈവ​ത്തി​ന്റെ പ്രിയ മകനും നമ്മുടെ വിഷമങ്ങൾ മനസ്സി​ലാ​ക്കു​ന്നുണ്ട്‌, നമ്മുടെ ബലഹീ​ന​ത​ക​ളിൽ സഹതാപം കാണി​ക്കു​ന്നുണ്ട്‌, സഹിച്ചു​നിൽക്കു​ന്ന​തി​നു നമ്മളെ സഹായി​ക്കാൻ ആഗ്രഹി​ക്കു​ന്നുണ്ട്‌ എന്നൊക്കെ അറിഞ്ഞത്‌ എത്ര ആശ്വാ​സ​മാ​യി! നമ്മുടെ “കണ്ണുക​ളിൽനിന്ന്‌ കണ്ണീ​രെ​ല്ലാം തുടച്ചു​ക​ള​യും” എന്ന വാഗ്‌ദാ​നം യഹോവ പെട്ടെ​ന്നു​തന്നെ നിറ​വേ​റ്റും. അതുവരെ ഈ ലേഖന​ത്തി​ലൂ​ടെ പഠിച്ച പാഠങ്ങൾ നമുക്കു ജീവി​ത​ത്തിൽ പ്രാവർത്തി​ക​മാ​ക്കാം.—വെളി. 21:4.