1. ദാനി​യേ​ലി​നെ ബാബി​ലോൺകാർക്ക്‌ ഇഷ്ടമാ​യത്‌ എന്തു​കൊണ്ട്‌?

 ബാബി​ലോൺകാർ ഒരു യുദ്ധത​ട​വു​കാ​ര​നാ​യി ദാനി​യേ​ലി​നെ വീട്ടിൽനിന്ന്‌ ദൂരേക്കു പിടി​ച്ചു​കൊണ്ട്‌ പോകു​മ്പോൾ അദ്ദേഹം വളരെ ചെറു​പ്പ​മാ​യി​രു​ന്നു. ദാനി​യേ​ലി​നെ അവർക്ക്‌ ഒരുപാട്‌ ഇഷ്ടമായി. കാരണം അവർ നോക്കി​യത്‌ “കണ്ണിനു കാണാ​നാ​കുന്ന” കാര്യ​ങ്ങ​ളാ​യി​രു​ന്നു. (1 ശമു. 16:7) കുലീ​ന​കു​ടും​ബ​ത്തിൽനി​ന്നുള്ള, “വൈക​ല്യ​ങ്ങ​ളൊ​ന്നു​മി​ല്ലാത്ത . . . കണ്ടാൽ കൊള്ളാ​വുന്ന” ഒരു ചെറു​പ്പ​ക്കാ​രൻ! അതു​കൊ​ണ്ടു​തന്നെ നല്ല പരിശീ​ല​ന​മൊ​ക്കെ നൽകി ദാനി​യേ​ലി​നെ ഒരു ഉന്നതപ​ദ​വി​യിൽ നിയമി​ക്കാൻ ബാബി​ലോൺകാർ തീരു​മാ​നി​ച്ചു.—ദാനി. 1:3, 4, 6.

2. യഹോവ ദാനി​യേ​ലി​നെ എങ്ങനെ​യാ​ണു കണ്ടിരു​ന്നത്‌? (യഹസ്‌കേൽ 14:14)

² യഹോ​വ​യ്‌ക്കും ദാനി​യേ​ലി​നെ ഇഷ്ടമാ​യി​രു​ന്നു. എന്നാൽ അത്‌ അദ്ദേഹ​ത്തി​ന്റെ സൗന്ദര്യ​മോ സമൂഹ​ത്തി​ലെ നിലയോ നോക്കി​യി​ട്ടാ​യി​രു​ന്നില്ല. മറിച്ച്‌ ദാനി​യേൽ എങ്ങനെ​യുള്ള വ്യക്തി​യാ​യി​രു​ന്നു എന്നതിന്റെ അടിസ്ഥാ​ന​ത്തി​ലാ​യി​രു​ന്നു. വർഷങ്ങ​ളോ​ളം തന്നെ വിശ്വ​സ്‌ത​മാ​യി സേവിച്ച നോഹ​യു​ടെ​യും ഇയ്യോ​ബി​ന്റെ​യും പേരി​നൊ​പ്പം യഹോവ ഒരിക്കൽ ദാനി​യേ​ലി​ന്റെ പേരും പറഞ്ഞു. സാധ്യ​ത​യ​നു​സ​രിച്ച്‌ ആ സമയത്ത്‌ അദ്ദേഹ​ത്തിന്‌ ഏതാണ്ട്‌ 20 വയസ്സേ ഉള്ളൂ എന്നോർക്കുക. (ഉൽപ. 5:32; 6:9, 10; ഇയ്യോ. 42:16, 17; യഹസ്‌കേൽ 14:14 വായി​ക്കുക.) ഇനി, അദ്ദേഹ​ത്തി​ന്റെ ജീവി​ത​കാ​ല​ത്തെ​ല്ലാം യഹോവ അദ്ദേഹത്തെ പ്രിയ​പ്പെ​ട്ട​വ​നാ​യി കാണു​ക​യും ചെയ്‌തു.—ദാനി. 10:11, 19.

3. ഈ ലേഖന​ത്തിൽ നമ്മൾ എന്താണു പഠിക്കു​ന്നത്‌?

³ ഈ ലേഖന​ത്തിൽ, ദാനി​യേ​ലി​നെ യഹോ​വ​യ്‌ക്കു പ്രിയ​പ്പെ​ട്ട​വ​നാ​ക്കിയ രണ്ടു ഗുണങ്ങ​ളെ​ക്കു​റിച്ച്‌ കാണും. ആദ്യം, അദ്ദേഹ​ത്തിന്‌ ആ ഗുണങ്ങൾ കാണി​ക്കേ​ണ്ടി​വന്ന സാഹച​ര്യ​ങ്ങ​ളെ​ക്കു​റിച്ച്‌ നോക്കും. അടുത്ത​താ​യി, അവ വളർത്തി​യെ​ടു​ക്കാൻ ദാനി​യേ​ലി​നെ സഹായി​ച്ചത്‌ എന്താ​ണെന്നു പഠിക്കും. തുടർന്ന്‌, നമുക്ക്‌ എങ്ങനെ ആ ഗുണങ്ങൾ അനുക​രി​ക്കാ​മെ​ന്നും ചർച്ച ചെയ്യും. ഈ ലേഖനം പ്രധാ​ന​മാ​യും ചെറു​പ്പ​ക്കാ​രെ ഉദ്ദേശിച്ച്‌ തയ്യാറാ​ക്കി​യ​താ​ണെ​ങ്കി​ലും നമു​ക്കെ​ല്ലാം ദാനി​യേ​ലി​ന്റെ മാതൃ​ക​യിൽനിന്ന്‌ പലതും പഠിക്കാ​നാ​കും.

4. ദാനി​യേൽ ധൈര്യം കാണി​ച്ച​തി​ന്റെ ഒരു ഉദാഹ​രണം പറയുക.

⁴ ധൈര്യ​മുള്ള ആളുകൾക്കും പേടി തോന്നാം. പക്ഷേ ശരിയായ കാര്യങ്ങൾ ചെയ്യു​ന്ന​തിൽനിന്ന്‌ തങ്ങളെ തടയാൻ അവർ ആ ഭയത്തെ അനുവ​ദി​ക്കില്ല. ദാനി​യേൽ നല്ല ധൈര്യ​ശാ​ലി​യായ ഒരു ചെറു​പ്പ​ക്കാ​ര​നാ​യി​രു​ന്നു. അദ്ദേഹം ധൈര്യം കാണിച്ച രണ്ടു സന്ദർഭ​ങ്ങ​ളെ​ക്കു​റിച്ച്‌ നമുക്കു നോക്കാം. ആദ്യത്തെ സംഭവം നടക്കു​ന്നതു സാധ്യ​ത​യ​നു​സ​രിച്ച്‌ ബാബി​ലോൺകാർ യരുശ​ലേം നശിപ്പിച്ച്‌ ഏതാണ്ട്‌ രണ്ടു വർഷം കഴിഞ്ഞ​പ്പോ​ഴാണ്‌. ബാബി​ലോൺ രാജാ​വായ നെബൂ​ഖ​ദ്‌നേസർ ഒരു സ്വപ്‌നം കണ്ടു. ഭീമാ​കാ​ര​മായ പ്രതി​മ​യെ​ക്കു​റി​ച്ചുള്ള ആ സ്വപ്‌നം അദ്ദേഹത്തെ വളരെ അസ്വസ്ഥ​നാ​ക്കി. ആ സ്വപ്‌ന​വും അർഥവും എന്താ​ണെന്നു പറഞ്ഞി​ല്ലെ​ങ്കിൽ ദാനി​യേൽ ഉൾപ്പെ​ടെ​യുള്ള തന്റെ ജ്ഞാനി​ക​ളെ​യെ​ല്ലാം കൊന്നു​ക​ള​യു​മെന്ന്‌ അദ്ദേഹം ഭീഷണി​പ്പെ​ടു​ത്തി. (ദാനി. 2:3-5) ദാനി​യേൽ അപ്പോൾ പെട്ടെന്നു പ്രവർത്തി​ച്ചി​ല്ലെ​ങ്കിൽ പലരു​ടെ​യും ജീവൻ നഷ്ടമാ​കു​മാ​യി​രു​ന്നു. അതു​കൊണ്ട്‌ അദ്ദേഹം രാജാ​വി​ന്റെ അടുത്ത്‌ ചെന്ന്‌ “സ്വപ്‌ന​ത്തി​ന്റെ അർഥം വിശദീ​ക​രി​ക്കാ​മെ​ന്നും അതിനു കുറച്ച്‌ സമയം തരണ​മെ​ന്നും അപേക്ഷി​ച്ചു.” (ദാനി. 2:16) അങ്ങനെ ചെയ്യാൻ അദ്ദേഹ​ത്തി​നു നല്ല ധൈര്യ​വും വിശ്വാ​സ​വും വേണമാ​യി​രു​ന്നു. കാരണം മുമ്പൊ​രി​ക്ക​ലും ദാനി​യേൽ സ്വപ്‌ന​ങ്ങ​ളു​ടെ അർഥം വിശദീ​ക​രി​ച്ച​താ​യി ബൈബി​ളിൽ എവി​ടെ​യും പറഞ്ഞി​ട്ടില്ല. ഇനി, “കനിവ്‌ തോന്നി ഈ രഹസ്യം വെളി​പ്പെ​ടു​ത്തി​ത്ത​ര​ണ​മെന്നു സ്വർഗ​സ്ഥ​നായ ദൈവ​ത്തോ​ടു പ്രാർഥി​ക്കാൻ” കൂട്ടു​കാ​രായ ശദ്രക്ക്‌, മേശക്ക്‌, അബേദ്‌-നെഗൊ b എന്നിവ​രോട്‌ ആവശ്യ​പ്പെ​ടു​ക​യും ചെയ്‌തു. (ദാനി. 2:18) യഹോവ അവരുടെ പ്രാർഥ​ന​യ്‌ക്ക്‌ ഉത്തരം കൊടു​ത്തു. അങ്ങനെ ദൈവ​ത്തി​ന്റെ സഹായ​ത്താൽ ദാനി​യേൽ ആ സ്വപ്‌ന​ത്തി​ന്റെ അർഥം വിശദീ​ക​രി​ച്ചു. ദാനി​യേ​ലും കൂട്ടു​കാ​രും രക്ഷപ്പെ​ടു​ക​യും ചെയ്‌തു.

5. ദാനി​യേ​ലി​നു ധൈര്യം കാണി​ക്കേ​ണ്ടി​വന്ന മറ്റൊരു സാഹച​ര്യം ഏതാണ്‌?

⁵ ദാനി​യേൽ, പ്രതി​മ​യെ​ക്കു​റി​ച്ചുള്ള സ്വപ്‌ന​ത്തി​ന്റെ അർഥം വിശദീ​ക​രിച്ച്‌ കുറച്ച്‌ നാൾ കഴിഞ്ഞ​പ്പോൾ അദ്ദേഹ​ത്തി​ന്റെ ധൈര്യം പരീക്ഷി​ക്കുന്ന മറ്റൊരു സാഹച​ര്യ​മു​ണ്ടാ​യി. രാജാവ്‌ വീണ്ടും ഒരു സ്വപ്‌നം കണ്ടു. ഇത്തവണ ഒരു പടുകൂ​റ്റൻ മരമാണു കണ്ടത്‌. ദാനി​യേൽ ധൈര്യ​ത്തോ​ടെ ആ സ്വപ്‌ന​ത്തി​ന്റെ അർഥം രാജാ​വി​നോ​ടു വിശദീ​ക​രി​ച്ചു. രാജാ​വിന്‌ സുബോ​ധം നഷ്ടപ്പെ​ടു​മെ​ന്നും കുറെ​ക്കാ​ല​ത്തേക്കു രാജസ്ഥാ​നത്ത്‌ ഉണ്ടാകി​ല്ലെ​ന്നും ഉള്ള സന്ദേശം​പോ​ലും അതിൽ ഉൾപ്പെ​ട്ടി​രു​ന്നു. (ദാനി. 4:25) രാജാവ്‌ അതിനെ തനി​ക്കെ​തി​രെ​യുള്ള ധിക്കാ​ര​മാ​യി കണ്ടിരു​ന്നെ​ങ്കിൽ ദാനി​യേ​ലി​നു വധശിക്ഷ കിട്ടാ​മാ​യി​രു​ന്നു. എന്നിട്ടും ദാനി​യേൽ ധൈര്യ​ത്തോ​ടെ ആ സന്ദേശം രാജാ​വി​നെ അറിയി​ച്ചു.

6. ജീവി​ത​കാ​ല​ത്തെ​ല്ലാം ധൈര്യം കാണി​ക്കാൻ ദാനി​യേ​ലി​നെ സഹായി​ച്ചത്‌ എന്തായി​രി​ക്കണം?

⁶ തന്റെ ജീവി​ത​കാ​ല​ത്തെ​ല്ലാം ധൈര്യം കാണി​ക്കാൻ ദാനി​യേ​ലി​നെ സഹായി​ച്ചത്‌ എന്തായി​രി​ക്കണം? ചെറു​പ്പ​ത്തിൽ അപ്പന്റെ​യും അമ്മയു​ടെ​യും നല്ല മാതൃ​ക​യിൽനിന്ന്‌ ദാനി​യേൽ ഉറപ്പാ​യും പലതും പഠിച്ചി​ട്ടുണ്ട്‌. ഇസ്രാ​യേ​ല്യ​മാ​താ​പി​താ​ക്കൾക്ക്‌  യഹോവ നൽകിയ നിർദേ​ശങ്ങൾ അവർ അനുസ​രി​ക്കു​ക​യും കുട്ടി​യാ​യി​രുന്ന ദാനി​യേ​ലി​നെ ദൈവ​നി​യ​മങ്ങൾ പഠിപ്പി​ക്കു​ക​യും ചെയ്‌തി​ട്ടുണ്ട്‌ എന്നതിനു സംശയ​മില്ല. (ആവ. 6:6-9) അതു​കൊണ്ട്‌ പത്തു കല്പനകൾ മാത്രമല്ല ദൈവ​നി​യമം ആവശ്യ​പ്പെ​ട്ടി​രുന്ന ചെറി​യ​ചെ​റിയ കാര്യ​ങ്ങൾപോ​ലും അദ്ദേഹ​ത്തിന്‌ അറിയാ​മാ​യി​രു​ന്നു. ഉദാഹ​ര​ണ​ത്തിന്‌, ഒരു ഇസ്രാ​യേ​ല്യന്‌ എന്തു കഴിക്കാം, എന്തു കഴിക്കാൻ പാടില്ല എന്നതു​പോ​ലുള്ള കാര്യങ്ങൾ അദ്ദേഹം മനസ്സി​ലാ​ക്കി​യി​രു​ന്നു. c (ലേവ്യ 11:4-8; ദാനി. 1:8, 11-13) കൂടാതെ ദൈവ​ജ​ന​ത്തി​ന്റെ ചരി​ത്ര​വും അദ്ദേഹം പഠിച്ചു. അതു​കൊണ്ട്‌ അവർ യഹോ​വ​യു​ടെ നിലവാ​ര​ങ്ങൾക്ക​നു​സ​രിച്ച്‌ ജീവി​ക്കാ​തി​രു​ന്ന​പ്പോൾ എന്തു സംഭവി​ച്ചു എന്നത്‌ അദ്ദേഹ​ത്തിന്‌ അറിയാ​മാ​യി​രു​ന്നു. (ദാനി. 9:10, 11) ഇനി, സ്വന്തം ജീവി​താ​നു​ഭ​വ​ത്തി​ലൂ​ടെ അദ്ദേഹം മറ്റൊരു കാര്യ​വും മനസ്സി​ലാ​ക്കി: എന്തൊക്കെ സംഭവി​ച്ചാ​ലും യഹോ​വ​യും ശക്തരായ ദൈവ​ദൂ​ത​ന്മാ​രും തന്നെ സഹായി​ക്കാ​നു​ണ്ടാ​യി​രി​ക്കും.—ദാനി. 2:19-24; 10:12, 18, 19.

7. മറ്റ്‌ എന്തെല്ലാം കാര്യ​ങ്ങ​ളാ​ണു ധൈര്യ​മു​ള്ള​വ​നാ​യി​രി​ക്കാൻ ദാനി​യേ​ലി​നെ സഹായി​ച്ചത്‌? (ചിത്ര​വും കാണുക.)

⁷ ധൈര്യ​മു​ള്ള​വ​നാ​യി​രി​ക്കാൻ ദാനി​യേ​ലി​നെ സഹായിച്ച മറ്റൊരു കാര്യം യിരെമ്യ പ്രവാ​ച​ക​ന്റേത്‌ ഉൾപ്പെ​ടെ​യുള്ള പ്രവച​ന​ങ്ങ​ളെ​ക്കു​റിച്ച്‌ അദ്ദേഹം പഠിച്ചു എന്നതാണ്‌. അതിലൂ​ടെ ബാബി​ലോ​ണി​ലെ ജൂതന്മാ​രു​ടെ വർഷങ്ങ​ളാ​യുള്ള അടിമത്തം പെട്ടെ​ന്നു​തന്നെ അവസാ​നി​ക്കു​മെന്ന്‌ അദ്ദേഹ​ത്തി​നു മനസ്സി​ലാ​യി. (ദാനി. 9:2) ഇനി, ബൈബിൾപ്ര​വ​ച​നങ്ങൾ നിറ​വേ​റു​ന്നതു സ്വന്തം കണ്ണാൽ കണ്ടത്‌, യഹോ​വ​യി​ലുള്ള അദ്ദേഹ​ത്തി​ന്റെ വിശ്വാ​സ​വും ആശ്രയ​വും ശക്തമാക്കി. അതും ധൈര്യ​മു​ള്ള​വ​നാ​യി​രി​ക്കാൻ അദ്ദേഹത്തെ സഹായി​ച്ചു. (റോമർ 8:31, 32, 37-39 താരത​മ്യം ചെയ്യുക.) ഏറ്റവും പ്രധാ​ന​മാ​യി, ദാനി​യേൽ കൂടെ​ക്കൂ​ടെ തന്റെ സ്വർഗീ​യ​പി​താ​വി​നോ​ടു പ്രാർഥി​ച്ചി​രു​ന്നു. (ദാനി. 6:10) അദ്ദേഹം തന്റെ കുറ്റങ്ങ​ളൊ​ക്കെ ഏറ്റുപ​റ​യു​ക​യും തന്റെ ഉള്ളിൽ തോന്നിയ കാര്യ​ങ്ങ​ളെ​ല്ലാം തുറന്നു​പ​റ​യു​ക​യും ചെയ്‌തു. കൂടാതെ യഹോ​വ​യു​ടെ സഹായ​ത്തി​നാ​യി അപേക്ഷി​ക്കു​ക​യും ചെയ്‌തു. (ദാനി. 9:4, 5, 19) ദാനി​യേ​ലും നമ്മളെ​പ്പോ​ലെ​ത​ന്നെ​യുള്ള ഒരു മനുഷ്യ​നാ​യി​രു​ന്നു. ധൈര്യം അദ്ദേഹ​ത്തി​നു ജന്മനാ കിട്ടി​യതല്ല, അദ്ദേഹം അതു വളർത്തി​യെ​ടു​ത്ത​താണ്‌. ദൈവ​വ​ചനം നന്നായി പഠിച്ചു​കൊ​ണ്ടും പ്രാർഥി​ച്ചു​കൊ​ണ്ടും യഹോ​വ​യിൽ പൂർണ​മാ​യി ആശ്രയി​ച്ചു​കൊ​ണ്ടും ആണ്‌ അദ്ദേഹം അതു ചെയ്‌തത്‌.

8. നമുക്ക്‌ എങ്ങനെ ധൈര്യം വളർത്തി​യെ​ടു​ക്കാം?

⁸ ധൈര്യം വളർത്തി​യെ​ടു​ക്കാൻ നമുക്ക്‌ എന്തു ചെയ്യാം? നമ്മുടെ മാതാ​പി​താ​ക്കൾ നല്ല ധൈര്യ​ശാ​ലി​ക​ളാ​യി​രി​ക്കാം. ധൈര്യം കാണി​ക്കാൻ അവർ നമ്മളെ ഉപദേ​ശി​ക്കു​ക​യും ചെയ്‌തേ​ക്കാം. പക്ഷേ, ഒരു കുടും​ബ​സ്വത്ത്‌ കൈമാ​റി​ത്ത​രു​ന്ന​തു​പോ​ലെ ഈ ഗുണം നമുക്കു തരാൻ അവർക്കാ​കില്ല. ധൈര്യം നേടു​ന്നത്‌ ഒരു പുതിയ കഴിവ്‌ വളർത്തി​യെ​ടു​ക്കു​ന്ന​തു​പോ​ലെയാ​ണെന്നു പറയാം. ഉദാഹ​ര​ണ​ത്തിന്‌, നിങ്ങൾക്ക്‌ ഏതെങ്കി​ലും ഒരു കഴിവ്‌ വളർത്തി​യെ​ടു​ക്ക​ണ​മെ​ന്നി​രി​ക്കട്ടെ. അത്‌ എങ്ങനെ ചെയ്യാം? ഒരു മാർഗം, അതു പഠിപ്പി​ക്കുന്ന വ്യക്തി ചെയ്യു​ന്നതു നന്നായി നിരീ​ക്ഷി​ച്ചിട്ട്‌ അത്‌ അനുക​രി​ക്കുക എന്നതാണ്‌. ധൈര്യം വളർത്തി​യെ​ടു​ക്കാ​നും അതുതന്നെ നമുക്കു ചെയ്യാം. മറ്റുള്ളവർ എങ്ങനെ​യാ​ണു ധൈര്യം കാണി​ക്കു​ന്ന​തെന്നു നന്നായി നിരീ​ക്ഷി​ക്കു​ക​യും അവരുടെ ആ മാതൃക അനുക​രി​ക്കു​ക​യും ചെയ്യുക. നമ്മൾ ഇതുവരെ, ദാനി​യേ​ലി​ന്റെ ജീവി​ത​ത്തിൽനിന്ന്‌ എന്താണു പഠിച്ചത്‌? ദൈവ​വ​ചനം നന്നായി പഠിക്കണം. യഹോ​വ​യോ​ടു കൂടെ​ക്കൂ​ടെ മനസ്സു തുറന്ന്‌ സംസാ​രി​ച്ചു​കൊണ്ട്‌ ദൈവ​വു​മാ​യി ഒരു ഉറ്റബന്ധം വളർത്തി​യെ​ടു​ക്കണം. കൂടാതെ നമ്മളെ സഹായി​ക്കാൻ യഹോവ എപ്പോ​ഴും കൂടെ​യു​ണ്ടാ​യി​രി​ക്കു​മെന്ന ഉറച്ച​ബോ​ധ്യ​ത്തോ​ടെ യഹോ​വ​യിൽ ആശ്രയി​ക്കു​ക​യും വേണം. അങ്ങനെ​യൊ​ക്കെ ചെയ്യു​ന്നെ​ങ്കിൽ വിശ്വാ​സ​ത്തി​ന്റെ പരീക്ഷ​ണങ്ങൾ നേരി​ടു​മ്പോൾ നമ്മൾ ധൈര്യ​മു​ള്ള​വ​രാ​യി​രി​ക്കും.

9. ധൈര്യം കാണി​ക്കു​ന്ന​തു​കൊണ്ട്‌ എന്തെല്ലാം പ്രയോ​ജ​ന​ങ്ങ​ളുണ്ട്‌?

⁹ ധൈര്യം കാണി​ക്കു​ന്ന​തു​കൊണ്ട്‌ പല പ്രയോ​ജ​ന​ങ്ങ​ളുണ്ട്‌. ബെന്നിന്റെ അനുഭവം നോക്കാം. ജർമനി​യിൽ അദ്ദേഹം പഠിച്ച സ്‌കൂ​ളി​ലു​ള്ള​വ​രെ​ല്ലാം പരിണാ​മ​ത്തി​ലാ​ണു വിശ്വ​സി​ച്ചി​രു​ന്നത്‌. സൃഷ്ടി​യെ​ക്കു​റിച്ച്‌ ബൈബിൾ പറയുന്ന കാര്യങ്ങൾ ഒരു കെട്ടു​ക​ഥ​യാ​ണെന്ന്‌ അവർ ചിന്തി​ച്ചി​രു​ന്നു. ജീവൻ സൃഷ്ടി​ക്ക​പ്പെ​ട്ട​താ​ണെന്നു വിശ്വ​സി​ക്കു​ന്ന​തി​ന്റെ കാരണ​ത്തെ​ക്കു​റിച്ച്‌ ക്ലാസിൽ എല്ലാവ​രോ​ടും വിശദീ​ക​രി​ക്കാൻ ഒരിക്കൽ ബെന്നിന്‌ അവസരം കിട്ടി. തന്റെ വിശ്വാ​സ​ത്തെ​ക്കു​റിച്ച്‌ ബെൻ ധൈര്യ​ത്തോ​ടെ അവരോ​ടു വിശദീ​ക​രി​ച്ചു. എന്തായി​രു​ന്നു ഫലം? ബെൻ പറയുന്നു: “ഞാൻ പറഞ്ഞ​തെ​ല്ലാം ടീച്ചർ നന്നായി ശ്രദ്ധിച്ചു. എന്നിട്ട്‌, എന്റെ ഭാഗം ശരിയാ​ണെന്നു തെളി​യി​ക്കാൻ ഞാൻ ഉപയോ​ഗിച്ച ലേഖന​ത്തി​ന്റെ കോപ്പി​കൾ ഉണ്ടാക്കി ക്ലാസിലെ എല്ലാ കുട്ടി​കൾക്കും കൊടു​ത്തു.” ബെന്നിന്റെ കൂട്ടു​കാർ അതെക്കു​റിച്ച്‌ എന്താണു പറഞ്ഞത്‌? “അവർ പലരും ഞാൻ പറഞ്ഞ​തൊ​ക്കെ കേട്ടു.  ഞാൻ അങ്ങനെ ചെയ്‌തത്‌ അവർക്ക്‌ ഇഷ്ടപ്പെ​ട്ടെന്നു പറയു​ക​യും ചെയ്‌തു.” ബെന്നിന്റെ അനുഭവം കാണി​ക്കു​ന്ന​തു​പോ​ലെ നമ്മൾ ധൈര്യ​മു​ള്ള​വ​രാ​യി​രു​ന്നാൽ മറ്റുള്ള​വ​രു​ടെ ആദരവ്‌ നേടാ​നാ​കും. മാത്രമല്ല അതിലൂ​ടെ യഹോ​വ​യെ​ക്കു​റിച്ച്‌ അറിയാൻ ആത്മാർഥ​ഹൃ​ദ​യ​രായ ആളുകളെ സഹായി​ക്കാ​നും കഴി​ഞ്ഞേ​ക്കും. ധൈര്യം വളർത്തി​യെ​ടു​ക്കാ​നുള്ള എത്ര നല്ല കാരണ​ങ്ങ​ളാണ്‌ അവ!

10. വിശ്വ​സ്‌തത എന്നാൽ എന്താണ്‌?

¹⁰ ബൈബി​ളിൽ “വിശ്വ​സ്‌തത,” “അചഞ്ചല​സ്‌നേഹം” എന്നൊക്കെ പരിഭാഷ ചെയ്‌തി​രി​ക്കുന്ന എബ്രായ വാക്ക്‌ ഉറ്റ സ്‌നേ​ഹത്തെ സൂചി​പ്പി​ക്കുന്ന ഒന്നാണ്‌. ദൈവ​ത്തി​നു തന്റെ ദാസന്മാ​രോ​ടുള്ള സ്‌നേ​ഹത്തെ വർണി​ക്കാ​നാ​ണു മിക്ക​പ്പോ​ഴും അത്‌ ഉപയോ​ഗി​ച്ചി​ട്ടു​ള്ളത്‌. ദൈവ​ദാ​സ​ന്മാർക്കി​ട​യി​ലെ സ്‌നേ​ഹ​ത്തെ​ക്കു​റിച്ച്‌ പറയാ​നും ഇതേ പദം ഉപയോ​ഗി​ച്ചി​ട്ടുണ്ട്‌. (2 ശമു. 9:6, 7) കാലം കടന്നു​പോ​കു​ന്ന​ത​നു​സ​രിച്ച്‌ നമ്മുടെ വിശ്വ​സ്‌തത കൂടു​തൽക്കൂ​ടു​തൽ ശക്തമാ​കും. ദാനി​യേൽ പ്രവാ​ച​കന്റെ ജീവിതം അതു തെളി​യി​ക്കു​ന്നത്‌ എങ്ങനെ​യാ​ണെന്നു നോക്കാം.

11. പ്രായ​മാ​യ​പ്പോൾ ദാനി​യേ​ലി​ന്റെ വിശ്വ​സ്‌തത പരീക്ഷി​ക്ക​പ്പെ​ട്ടത്‌ എങ്ങനെ? (പുറം​താ​ളി​ലെ ചിത്രം കാണുക.)

¹¹ യഹോ​വ​യോ​ടുള്ള ദാനി​യേ​ലി​ന്റെ വിശ്വ​സ്‌തത പലപ്പോ​ഴും പരീക്ഷി​ക്ക​പ്പെ​ട്ടി​ട്ടുണ്ട്‌. എന്നാൽ 90-നുമേൽ പ്രായ​മു​ള്ള​പ്പോ​ഴാണ്‌ അത്തരത്തി​ലുള്ള ഏറ്റവും വലിയ പരീക്ഷണം അദ്ദേഹ​ത്തി​നു നേരി​ട്ടത്‌. ആ സമയമാ​യ​പ്പോ​ഴേ​ക്കും മേദ്യ​രും പേർഷ്യ​ക്കാ​രും ബാബി​ലോൺ കീഴട​ക്കു​ക​യും ദാര്യാ​വേശ്‌ രാജാവ്‌ അവിടെ ഭരണം നടത്തു​ക​യും ചെയ്‌തി​രു​ന്നു. രാജ​കൊ​ട്ടാ​ര​ത്തി​ലെ ഉദ്യോ​ഗ​സ്ഥ​ന്മാർക്കു ദാനി​യേ​ലി​നോ​ടു വെറു​പ്പാ​യി​രു​ന്നു. ദാനി​യേ​ലി​ന്റെ ദൈവ​ത്തെ​യും അവർ ആദരി​ച്ചി​രു​ന്നില്ല. അതു​കൊണ്ട്‌ എങ്ങനെ​യും ദാനി​യേ​ലി​നെ വകവരു​ത്താൻ അവർ പദ്ധതി​യി​ട്ടു. അവർ ഒരു നിയമം എഴുതി​യു​ണ്ടാ​ക്കി​യിട്ട്‌, രാജാ​വി​നെ​ക്കൊണ്ട്‌ അതിൽ ഒപ്പു​വെ​പ്പി​ച്ചു. അതനു​സ​രിച്ച്‌ 30-ദിവസ​ത്തേക്കു രാജാ​വി​നോ​ടു മാത്രമേ പ്രാർഥി​ക്കാ​നാ​കു​മാ​യി​രു​ന്നു​ള്ളൂ. ദാനി​യേൽ ദൈവ​ത്തോ​ടു വിശ്വ​സ്‌ത​നാ​യി​രി​ക്കു​മോ അതോ രാജാ​വി​നോ​ടു വിശ്വ​സ്‌ത​നാ​യി​രി​ക്കു​മോ എന്നതിന്റെ പരീക്ഷ​ണ​മാ​കു​മാ​യി​രു​ന്നു അത്‌. മറ്റെല്ലാ​വ​രെ​യും​പോ​ലെ രാജാ​വി​നോ​ടുള്ള തന്റെ വിശ്വ​സ്‌തത തെളി​യി​ക്കാൻ ദാനി​യേൽ ആ ദിവസ​ങ്ങ​ളിൽ യഹോ​വ​യോ​ടു പ്രാർഥി​ക്കാ​തി​രു​ന്നാൽ മാത്രം മതിയാ​യി​രു​ന്നു. പക്ഷേ, അങ്ങനെ ചെയ്യാൻ അദ്ദേഹം തയ്യാറാ​യില്ല. അതു​കൊണ്ട്‌ അദ്ദേഹത്തെ സിംഹ​ക്കു​ഴി​യിൽ എറിഞ്ഞു. എന്നാൽ സിംഹ​ങ്ങ​ളു​ടെ വായ്‌ അടച്ചു​ക​ള​ഞ്ഞു​കൊണ്ട്‌ യഹോവ ദാനി​യേ​ലി​ന്റെ വിശ്വ​സ്‌ത​ത​യ്‌ക്കു പ്രതി​ഫലം നൽകി. (ദാനി. 6:12-15, 20-22) ദാനി​യേ​ലി​നെ​പ്പോ​ലെ നമുക്ക്‌ എങ്ങനെ യഹോ​വ​യോട്‌ അചഞ്ചല​മായ വിശ്വ​സ്‌തത കാണി​ക്കാ​നാ​കും?

12. ദാനി​യേൽ എങ്ങനെ​യാണ്‌ യഹോ​വ​യോട്‌ അചഞ്ചല​മായ വിശ്വ​സ്‌തത വളർത്തി​യെ​ടു​ത്തത്‌?

¹² നമ്മൾ നേരത്തേ കണ്ടതു​പോ​ലെ യഹോ​വ​യോ​ടു ശക്തമായ സ്‌നേ​ഹ​മു​ണ്ടെ​ങ്കിൽ നമുക്കു വിശ്വ​സ്‌ത​രാ​യി​രി​ക്കാ​നാ​കും. യഹോ​വ​യോ​ടുള്ള ദാനി​യേ​ലി​ന്റെ വിശ്വ​സ്‌തത തകർക്കാൻ പറ്റാത്ത​താ​യി​രു​ന്നു. കാരണം അദ്ദേഹം തന്റെ സ്വർഗീ​യ​പി​താ​വി​നെ അത്രയ​ധി​കം സ്‌നേ​ഹി​ച്ചി​രു​ന്നു. യഹോ​വ​യു​ടെ ഗുണങ്ങ​ളെ​ക്കു​റി​ച്ചും യഹോവ എങ്ങനെ​യൊ​ക്കെ​യാണ്‌ അതു കാണി​ച്ചി​ട്ടു​ള്ളത്‌ എന്നതി​നെ​ക്കു​റി​ച്ചും  സമയ​മെ​ടുത്ത്‌ ചിന്തി​ച്ച​തു​കൊ​ണ്ടാ​ണു ദാനി​യേ​ലിന്‌ അത്തരത്തി​ലുള്ള സ്‌നേഹം വളർത്തി​യെ​ടു​ക്കാ​നാ​യത്‌. (ദാനി. 9:4) കൂടാതെ, തനിക്കും തന്റെ ജനത്തി​നും വേണ്ടി യഹോവ ചെയ്‌തി​ട്ടുള്ള എല്ലാ നല്ല കാര്യ​ങ്ങ​ളെ​ക്കു​റി​ച്ചും അദ്ദേഹം നന്ദി​യോ​ടെ ചിന്തി​ച്ച​തും ആ സ്‌നേഹം വളരാൻ സഹായി​ച്ചു.—ദാനി. 2:20-23; 9:15, 16.

13. (എ) യഹോ​വ​യോ​ടു വിശ്വ​സ്‌ത​രാ​യി​രി​ക്കു​ന്നതു ബുദ്ധി​മു​ട്ടാ​ക്കുന്ന എന്തെല്ലാം പ്രശ്‌നങ്ങൾ നമ്മുടെ ചെറു​പ്പ​ക്കാർക്കു നേരി​ട്ടേ​ക്കാം? (ചിത്ര​വും കാണുക.) (ബി) യഹോ​വ​യു​ടെ സാക്ഷികൾ സ്വവർഗ​ര​തി​യെ അനുകൂ​ലി​ക്കു​ന്നു​ണ്ടോ എന്ന്‌ ആരെങ്കി​ലും ചോദി​ച്ചാൽ നിങ്ങൾ എന്ത്‌ ഉത്തരം പറയും? (JW.ORG-ൽ “യഥാർഥ​നീ​തി സമാധാ​നം വിളയി​ക്കും” എന്ന വീഡി​യോ കാണുക.)

¹³ ദാനി​യേ​ലിന്‌ ഉണ്ടായി​രു​ന്ന​തു​പോ​ലുള്ള ഒരു സാഹച​ര്യ​മാ​ണു നമ്മുടെ ചെറു​പ്പ​ക്കാർക്കു​മു​ള്ളത്‌. യഹോ​വ​യെ​യും ദൈവ​ത്തി​ന്റെ നിലവാ​ര​ങ്ങ​ളെ​യും ആദരി​ക്കാത്ത ആളുക​ളാണ്‌ അവർക്കു ചുറ്റും. അങ്ങനെ​യുള്ള ആളുകൾക്കു തങ്ങളു​ടേ​തിൽനിന്ന്‌ വ്യത്യ​സ്‌ത​മായ വിശ്വാ​സ​ങ്ങ​ളോ അഭി​പ്രാ​യ​ങ്ങ​ളോ ഉള്ളവരെ ഇഷ്ടമല്ല. യഹോ​വ​യോ​ടുള്ള നമ്മുടെ കുട്ടി​ക​ളു​ടെ വിശ്വ​സ്‌തത തകർക്കാൻപോ​ലും അവർ ചില​പ്പോൾ ശ്രമി​ക്കാ​റുണ്ട്‌. അതിന്റെ ഒരു ഉദാഹ​ര​ണ​മാണ്‌ ഓസ്‌​ട്രേ​ലി​യ​യിൽ താമസി​ക്കുന്ന ഗ്രേയിൻ എന്ന ചെറു​പ്പ​ക്കാ​ര​നു​ണ്ടായ അനുഭവം. ഹൈസ്‌കൂ​ളിൽ പഠിക്കുന്ന കാലത്ത്‌ അവനു വലി​യൊ​രു പ്രശ്‌നം നേരിട്ടു. ഒരു ദിവസം ടീച്ചർ ക്ലാസിൽ എല്ലാവ​രോ​ടു​മാ​യി, നിങ്ങളു​ടെ കൂട്ടു​കാ​രിൽ ആരെങ്കി​ലും താൻ ഒരു സ്വവർഗ​ര​തി​ക്കാ​ര​നാ​ണെന്നു പറഞ്ഞാൽ എന്തായി​രി​ക്കും നിങ്ങളു​ടെ പ്രതി​ക​രണം എന്നു ചോദി​ച്ചു. ആ കൂട്ടു​കാ​രനെ അനുകൂ​ലി​ക്കുന്ന എല്ലാവ​രും ക്ലാസിന്റെ ഒരു വശത്തും അല്ലാത്തവർ മറുവ​ശ​ത്തും നിൽക്കാൻ ടീച്ചർ ആവശ്യ​പ്പെട്ടു. ഗ്രേയിൻ പറയുന്നു: “ഞാനും സാക്ഷി​യായ എന്റെ കൂട്ടു​കാ​ര​നും ഒഴികെ എല്ലാവ​രും അതിനെ അനുകൂ​ലി​ച്ചു​കൊണ്ട്‌ ഒരു വശത്ത്‌ നിന്നു.” യഹോ​വ​യോ​ടു വിശ്വ​സ്‌ത​നാ​യി തുടരു​ന്നതു ശരിക്കും ബുദ്ധി​മു​ട്ടാ​ക്കുന്ന കാര്യ​ങ്ങ​ളാ​ണു പിന്നീട്‌ അവിടെ നടന്നത്‌. “തുടർന്നുള്ള സമയം മുഴുവൻ ബാക്കി കുട്ടി​ക​ളെ​ല്ലാം ചേർന്ന്‌ ഞങ്ങളെ കളിയാ​ക്കി. ടീച്ചർപോ​ലും അവരു​ടെ​കൂ​ടെ ചേർന്നു! എന്റെ വിശ്വാ​സ​ത്തെ​ക്കു​റിച്ച്‌ വളരെ ശാന്തമായ രീതി​യിൽ വിശദീ​ക​രി​ക്കാൻ ഞാൻ കഴിവി​ന്റെ പരമാ​വധി ശ്രമിച്ചു. പക്ഷേ ഒരു വാക്കു​പോ​ലും അവർ ശ്രദ്ധി​ച്ചില്ല.” ആ സാഹച​ര്യ​ത്തിൽ ഗ്രേയി​നിന്‌ എന്താണു തോന്നി​യത്‌? ഗ്രേയിൻ പറയുന്നു: “അവരുടെ കളിയാ​ക്കൽ കേൾക്കു​ന്നത്‌ ഒട്ടും സുഖമുള്ള കാര്യ​മാ​യി​രു​ന്നില്ല. പക്ഷേ യഹോ​വ​യോ​ടു വിശ്വ​സ്‌ത​നാ​യി നിൽക്കാ​നും എന്റെ വിശ്വാ​സ​ത്തെ​ക്കു​റിച്ച്‌ സംസാ​രി​ക്കാ​നും കഴിഞ്ഞ​തിൽ എനിക്ക്‌ ഒരുപാ​ടു സന്തോഷം തോന്നി.”

14. യഹോ​വ​യോ​ടു വിശ്വ​സ്‌ത​രാ​യി തുടരാ​നുള്ള തീരു​മാ​നം ശക്തമാ​ക്കാൻ നമുക്കു ചെയ്യാ​നാ​കുന്ന ഒരു കാര്യം എന്താണ്‌?

¹⁴ ദാനി​യേ​ലി​നെ​പ്പോ​ലെ യഹോ​വയെ നമ്മൾ എത്രയ​ധി​കം സ്‌നേ​ഹി​ക്കു​ന്നോ അത്രയ​ധി​ക​മാ​യി ദൈവ​ത്തോ​ടു വിശ്വ​സ്‌ത​രാ​യി​രി​ക്കാ​നുള്ള നമ്മുടെ തീരു​മാ​ന​വും ശക്തമാ​കും. യഹോ​വ​യോ​ടുള്ള സ്‌നേഹം വളർത്താ​നുള്ള ഒരു വിധം ദൈവ​ത്തി​ന്റെ ഗുണങ്ങ​ളെ​ക്കു​റിച്ച്‌ പഠിക്കുക എന്നതാണ്‌. ഉദാഹ​ര​ണ​ത്തിന്‌ ദൈവ​ത്തി​ന്റെ സൃഷ്ടി​ക​ളെ​ക്കു​റിച്ച്‌ നമുക്കു പഠിക്കാം. (റോമ. 1:20) അതിനു​വേണ്ടി “ആരുടെ കരവി​രുത്‌?” എന്ന പരമ്പര​യി​ലുള്ള ലേഖനങ്ങൾ വായി​ക്കു​ക​യോ വീഡി​യോ​കൾ കാണു​ക​യോ ചെയ്യാ​വു​ന്ന​താണ്‌. അങ്ങനെ ചെയ്യു​മ്പോൾ യഹോ​വ​യോ​ടുള്ള നമ്മുടെ സ്‌നേ​ഹ​വും ആദരവും കൂടുതൽ ശക്തമാ​കും. കൂടാതെ ജീവൻ സൃഷ്ടി​ക്ക​പ്പെ​ട്ട​തോ? (ഇംഗ്ലീഷ്‌), ജീവന്റെ ഉത്ഭവം—പ്രസക്ത​മായ അഞ്ചു ചോദ്യ​ങ്ങൾ എന്നീ ലഘുപ​ത്രി​ക​ക​ളി​ലെ വിവര​ങ്ങ​ളും അതിനു നിങ്ങളെ സഹായി​ക്കും. ആ പ്രസി​ദ്ധീ​ക​ര​ണ​ങ്ങ​ളെ​ക്കു​റിച്ച്‌ ഡെന്മാർക്കിൽനി​ന്നുള്ള എസ്ഥേർ എന്ന ചെറു​പ്പ​ക്കാ​രി​യായ സഹോ​ദരി പറഞ്ഞതു ശ്രദ്ധി​ക്കുക: “അതിലെ ന്യായ​വാ​ദങ്ങൾ സൂപ്പറാണ്‌! നിങ്ങൾ എന്തു വിശ്വ​സി​ക്ക​ണ​മെന്ന്‌ ആ ലഘുപ​ത്രി​ക​ക​ളിൽ പറഞ്ഞി​ട്ടില്ല. പകരം, കുറെ വസ്‌തു​തകൾ അവതരി​പ്പി​ക്കുക മാത്രമേ ചെയ്‌തി​ട്ടു​ള്ളൂ. എന്നിട്ട്‌, തീരു​മാ​നം നിങ്ങൾക്കു വിട്ടി​രി​ക്കു​ക​യാണ്‌.” നേരത്തേ കണ്ട ബെൻ ഇങ്ങനെ പറയുന്നു: “വിശ്വാ​സത്തെ ശരിക്കും ബലപ്പെ​ടു​ത്തുന്ന വിവര​ങ്ങ​ളാണ്‌ അതിലു​ള്ളത്‌. ദൈവ​മാ​ണു ജീവൻ സൃഷ്ടി​ച്ച​തെന്ന്‌ അവ എന്നെ ബോധ്യ​പ്പെ​ടു​ത്തി.” ഇവയൊ​ക്കെ പഠിച്ചു​ക​ഴി​യു​മ്പോൾ ബൈബി​ളി​ലെ ഈ വാക്കു​ക​ളോട്‌ ഒരുപക്ഷേ നിങ്ങളും യോജി​ക്കും: “ഞങ്ങളുടെ ദൈവ​മായ യഹോവേ, മഹത്ത്വ​വും ബഹുമാ​ന​വും ശക്തിയും ലഭിക്കാൻ അങ്ങ്‌ യോഗ്യ​നാണ്‌. കാരണം അങ്ങാണ്‌ എല്ലാം സൃഷ്ടി​ച്ചത്‌.”—വെളി. 4:11. d

15. യഹോ​വ​യു​മാ​യുള്ള സൗഹൃദം ശക്തമാ​ക്കാൻ നിങ്ങൾക്ക്‌ മറ്റ്‌ എന്തുകൂ​ടെ ചെയ്യാം?

¹⁵ യഹോ​വ​യോ​ടുള്ള സ്‌നേഹം കൂടുതൽ ശക്തമാ​ക്കാ​നുള്ള മറ്റൊരു വഴി ദൈവ​ത്തി​ന്റെ പുത്ര​നായ യേശു​വി​നെ​ക്കു​റിച്ച്‌ പഠിക്കുക എന്നതാണ്‌. ജർമനി​യിൽ താമസി​ക്കുന്ന സമീറ എന്ന ചെറു​പ്പ​ക്കാ​രി ചെയ്‌തത്‌ അതാണ്‌. സഹോ​ദരി പറയുന്നു: “യേശു​വി​ലൂ​ടെ യഹോ​വ​യെ​ക്കു​റിച്ച്‌ കൂടുതൽ നന്നായി മനസ്സി​ലാ​ക്കാൻ എനിക്കു കഴിഞ്ഞു.” സമീറ ഒരു കുട്ടി​യാ​യി​രു​ന്ന​പ്പോൾ, യഹോ​വ​യ്‌ക്കു തന്നെ സ്‌നേ​ഹി​ക്കാ​നും തന്റെ സുഹൃ​ത്താ​യി​ത്തീ​രാ​നും  കഴിയു​മെന്നു മനസ്സി​ലാ​ക്കാൻ ബുദ്ധി​മു​ട്ടു തോന്നി. എന്നാൽ യേശു​വിന്‌ അതു പറ്റു​മെന്ന്‌ അവൾക്ക്‌ അറിയാ​മാ​യി​രു​ന്നു. “കുട്ടി​ക​ളെ​യൊ​ക്കെ ഒരുപാ​ടു സ്‌നേ​ഹിച്ച ഒരു വ്യക്തി​യാ​യി​രു​ന്ന​തു​കൊണ്ട്‌ യേശു​വി​നെ എനിക്ക്‌ ഇഷ്ടമാ​യി​രു​ന്നു” എന്നു സമീറ പറയുന്നു. എന്നാൽ യേശു​വി​നെ​ക്കു​റിച്ച്‌ കൂടു​തൽക്കൂ​ടു​തൽ പഠിച്ച​പ്പോൾ യഹോ​വ​യോ​ടുള്ള അവളുടെ സ്‌നേ​ഹ​വും വർധിച്ചു. അതെങ്ങനെ? അവൾ പറയുന്നു: “യേശു തന്റെ പിതാ​വി​നെ അങ്ങനെ​തന്നെ അനുക​രി​ക്കു​ക​യാ​യി​രു​ന്നെന്നു പതി​യെ​പ്പ​തി​യെ എനിക്കു മനസ്സി​ലാ​യി. അവർ തമ്മിൽ ഒരുപാ​ടു സാമ്യ​മുണ്ട്‌. യഹോവ യേശു​വി​നെ ഭൂമി​യി​ലേക്ക്‌ അയച്ചതി​ന്റെ ഒരു കാരണം​പോ​ലും, തന്നെ കൂടുതൽ നന്നായി മനസ്സി​ലാ​ക്കാൻ ആളുകളെ സഹായി​ക്കുക എന്നതാ​ണെന്നു ഞാൻ തിരി​ച്ച​റി​ഞ്ഞു.” (യോഹ. 14:9) യഹോ​വ​യോ​ടുള്ള സൗഹൃദം കൂടുതൽ ശക്തമാ​ക്കാൻ നിങ്ങൾ ആഗ്രഹി​ക്കു​ന്നെ​ങ്കിൽ യേശു​വി​നെ​ക്കു​റിച്ച്‌ കൂടുതൽ പഠിക്കാൻ സമയം മാറ്റി​വെ​ക്കുക. അങ്ങനെ ചെയ്യു​മ്പോൾ യഹോ​വ​യോ​ടുള്ള നിങ്ങളു​ടെ സ്‌നേ​ഹ​വും വിശ്വ​സ്‌ത​ത​യും ഇനിയു​മി​നി​യും വർധി​ക്കും.

16. യഹോ​വ​യോ​ടു വിശ്വ​സ്‌ത​രാ​യി​രി​ക്കു​ന്ന​തി​ന്റെ പ്രയോ​ജനം എന്താണ്‌? (സങ്കീർത്തനം 18:25; മീഖ 6:8)

¹⁶ പരസ്‌പരം വിശ്വ​സ്‌ത​രാ​യി​രി​ക്കു​ന്ന​വർക്കി​ട​യിൽ മിക്ക​പ്പോ​ഴും നിലനിൽക്കുന്ന ഒരു സ്‌നേ​ഹ​ബ​ന്ധ​മു​ണ്ടാ​യി​രി​ക്കും. (രൂത്ത്‌ 1:14-17) ഇനി, യഹോ​വ​യോ​ടു വിശ്വ​സ്‌ത​രാ​യി​രി​ക്കു​ന്ന​വർക്ക്‌ നല്ല മനസ്സമാ​ധാ​ന​വും സംതൃ​പ്‌തി​യും തോന്നും. കാരണം, വിശ്വ​സ്‌ത​നോ​ടു താൻ വിശ്വ​സ്‌തത കാണി​ക്കു​മെന്ന്‌ യഹോവ വാക്കു തന്നിട്ടുണ്ട്‌. (സങ്കീർത്തനം 18:25; മീഖ 6:8 വായി​ക്കുക.) ഇതെക്കു​റി​ച്ചൊ​ന്നു ചിന്തി​ക്കുക: സർവശ​ക്ത​നായ സ്രഷ്ടാവ്‌ വെറും നിസ്സാ​ര​രായ നമ്മളെ എന്നും സ്‌നേ​ഹി​ക്കു​മെന്നു വാക്കു തന്നിരി​ക്കു​ന്നു. യഹോ​വ​യ്‌ക്കു നമ്മളോ​ടുള്ള ആ സ്‌നേഹം തകർക്കാൻ ഒരു പരീക്ഷ​ണ​ത്തി​നോ ഒരു എതിരാ​ളി​ക്കോ മരണത്തി​നു​പോ​ലു​മോ ഒരിക്ക​ലും കഴിയില്ല. (ദാനി. 12:13; ലൂക്കോ. 20:37, 38; റോമ. 8:38, 39) അതു​കൊണ്ട്‌ ദാനി​യേ​ലി​നെ അനുക​രി​ച്ചു​കൊണ്ട്‌ യഹോ​വ​യോ​ടു വിശ്വ​സ്‌ത​രാ​യി തുടരു​ന്നത്‌ എത്ര പ്രധാ​ന​മാണ്‌, അല്ലേ?

17-18. അടുത്ത ലേഖന​ത്തിൽ നമ്മൾ എന്താണു പഠിക്കു​ന്നത്‌?

¹⁷ ഈ ലേഖന​ത്തിൽ നമ്മൾ ദാനി​യേ​ലി​ന്റെ രണ്ടു ഗുണങ്ങ​ളെ​ക്കു​റിച്ച്‌ മാത്ര​മാ​ണു ചർച്ച ചെയ്‌തത്‌. എന്നാൽ അദ്ദേഹ​ത്തിൽനിന്ന്‌ പഠിക്കാൻ ഇനിയും ഒരുപാ​ടു കാര്യ​ങ്ങ​ളുണ്ട്‌. ഉദാഹ​ര​ണ​ത്തിന്‌, കുറെ ദർശന​ങ്ങ​ളി​ലൂ​ടെ​യും സ്വപ്‌ന​ങ്ങ​ളി​ലൂ​ടെ​യും യഹോവ ദാനി​യേ​ലി​നു പലതും കാണി​ച്ചു​കൊ​ടു​ത്തു. ഭാവി​യിൽ നടക്കാ​നി​രി​ക്കുന്ന കാര്യ​ങ്ങ​ളെ​ക്കു​റി​ച്ചുള്ള സന്ദേശ​ങ്ങ​ളാണ്‌ അവയി​ലു​ണ്ടാ​യി​രു​ന്നത്‌. അതു വിശദീ​ക​രി​ക്കാ​നുള്ള കഴിവും യഹോവ അദ്ദേഹ​ത്തി​നു നൽകി. അവയിൽ പലതും ഇപ്പോൾത്തന്നെ നടന്നു​ക​ഴി​ഞ്ഞു. മറ്റു പലതും ഇനി നടക്കാ​നി​രി​ക്കു​ന്നതേ ഉള്ളൂ. ഭൂമി​യിൽ ജീവി​ക്കുന്ന ഓരോ വ്യക്തി​യെ​യും ബാധി​ക്കുന്ന സംഭവ​ങ്ങ​ളാ​യി​രി​ക്കും അവ.

¹⁸ അടുത്ത ലേഖന​ത്തിൽ, ദാനി​യേ​ലി​ന്റെ പുസ്‌ത​ക​ത്തിൽ കാണുന്ന രണ്ടു പ്രവച​ന​ങ്ങ​ളെ​ക്കു​റി​ച്ചാ​യി​രി​ക്കും നമ്മൾ പഠിക്കു​ന്നത്‌. അവയുടെ അർഥം മനസ്സി​ലാ​ക്കു​ന്നത്‌, നമ്മൾ ചെറു​പ്പ​ക്കാ​രോ പ്രായ​മാ​യ​വ​രോ ആയാലും, ഇപ്പോൾത്തന്നെ ശരിയായ തീരു​മാ​ന​മെ​ടു​ക്കാൻ നമ്മളെ സഹായി​ക്കും. കൂടാതെ ആ പ്രവച​നങ്ങൾ നമ്മുടെ ധൈര്യ​വും വിശ്വ​സ്‌ത​ത​യും ശക്തമാ​ക്കു​ക​യും ചെയ്യും. അങ്ങനെ​യാ​കു​മ്പോൾ പെട്ടെ​ന്നു​തന്നെ ഉണ്ടാകാൻ പോകുന്ന വിശ്വാ​സ​ത്തി​ന്റെ പരീക്ഷ​ണ​ങ്ങളെ വിജയ​ക​ര​മാ​യി നേരി​ടാൻ നമുക്കാ​കും.