1. ഏതൊക്കെ കാര്യ​ത്തിൽ നമുക്ക്‌ ഉറപ്പുണ്ട്‌?

 യഹോവ നമ്മളെ സ്‌നേ​ഹി​ക്കു​ന്നു​ണ്ടെ​ന്നും നമ്മുടെ ജീവിതം ഏറ്റവും നല്ലതാ​യി​രി​ക്കാൻ ആഗ്രഹി​ക്കു​ന്നു​ണ്ടെ​ന്നും ദൈവ​ജ​ന​മായ നമുക്ക്‌ അറിയാം. (റോമ. 8:35-39) കൂടാതെ, ബൈബിൾത​ത്ത്വ​ങ്ങൾ അനുസ​രി​ക്കു​ന്നതു എപ്പോ​ഴും പ്രയോ​ജനം ചെയ്യു​മെ​ന്നും നമുക്ക്‌ ഉറപ്പുണ്ട്‌. (യശ. 48:17, 18) എന്നാൽ ജീവി​ത​ത്തിൽ പ്രതീ​ക്ഷി​ക്കാത്ത ചില പ്രശ്‌നങ്ങൾ നേരി​ട്ടാൽ നമ്മൾ എങ്ങനെ പ്രതി​ക​രി​ക്കും?

2. നമുക്ക്‌ എന്തൊക്കെ പ്രശ്‌നങ്ങൾ നേരി​ട്ടേ​ക്കാം, അപ്പോൾ നമ്മൾ എങ്ങനെ​യെ​ല്ലാം ചിന്തി​ക്കാ​നി​ട​യുണ്ട്‌?

² യഹോ​വ​യു​ടെ എല്ലാ ദാസന്മാ​രും പല തരത്തി​ലുള്ള പ്രശ്‌നങ്ങൾ നേരി​ടു​ന്ന​വ​രാണ്‌. ഉദാഹ​ര​ണ​ത്തിന്‌, കുടും​ബ​ത്തി​ലെ ഒരു അംഗം ഏതെങ്കി​ലും വിധത്തിൽ നമ്മളെ നിരാ​ശ​പ്പെ​ടു​ത്തി​യേ​ക്കാം. ചില​പ്പോൾ ഗുരു​ത​ര​മായ ആരോ​ഗ്യ​പ്ര​ശ്‌ന​മു​ള്ള​തു​കൊണ്ട്‌ യഹോ​വ​യു​ടെ സേവന​ത്തിൽ നന്നായി ചെയ്യാൻ പറ്റാതെ വന്നേക്കാം. അല്ലെങ്കിൽ പ്രകൃ​തി​ദു​ര​ന്ത​ത്താൽ ഉണ്ടായ പ്രശ്‌നങ്ങൾ നമ്മൾ അനുഭ​വി​ക്കു​ന്നു​ണ്ടാ​കും. അതുമ​ല്ലെ​ങ്കിൽ വിശ്വാ​സ​ത്തി​ന്റെ പേരിൽ ഉപദ്ര​വങ്ങൾ നേരി​ടു​ന്നു​ണ്ടാ​കും. ഇതു​പോ​ലുള്ള പ്രശ്‌നങ്ങൾ വരു​മ്പോൾ ഒരുപക്ഷേ നമ്മൾ ചിന്തി​ച്ചേ​ക്കാം: ‘എന്തു​കൊ​ണ്ടാണ്‌ എനിക്ക്‌ ഇങ്ങനെ​യൊ​ക്കെ സംഭവി​ക്കു​ന്നത്‌? ഞാൻ എന്തെങ്കി​ലും തെറ്റ്‌ ചെയ്‌തി​ട്ടാ​ണോ? അതോ ഇനി യഹോ​വ​യു​ടെ അനു​ഗ്ര​ഹ​മി​ല്ലാ​ത്ത​തു​കൊ​ണ്ടാ​ണോ?’ നിങ്ങൾക്ക്‌ എപ്പോ​ഴെ​ങ്കി​ലും ഇങ്ങനെ തോന്നി​യി​ട്ടു​ണ്ടോ? ഉണ്ടെങ്കിൽ വിഷമി​ക്കേണ്ടാ. യഹോ​വ​യു​ടെ പല വിശ്വ​സ്‌ത​ദാ​സർക്കും ഇങ്ങനെ​യൊ​ക്കെ തോന്നി​യി​ട്ടുണ്ട്‌.—സങ്കീ. 22:1, 2; ഹബ. 1:2, 3.

3. സങ്കീർത്തനം 34:19-ൽനിന്ന്‌ നമുക്ക്‌ എന്തു പഠിക്കാം?

³ സങ്കീർത്തനം 34:19 വായി​ക്കുക. ഈ വാക്യ​ത്തിൽ പറഞ്ഞി​രി​ക്കുന്ന പ്രധാ​ന​പ്പെട്ട രണ്ടു കാര്യങ്ങൾ ശ്രദ്ധി​ക്കുക: (1) നീതി​മാ​ന്മാർക്കു പ്രശ്‌നങ്ങൾ ഉണ്ടാകു​ന്നു. (2) പ്രശ്‌ന​ങ്ങ​ളിൽനിന്ന്‌ യഹോവ നമ്മളെ വിടു​വി​ക്കു​ന്നു. യഹോവ എങ്ങനെ​യാണ്‌ അതു ചെയ്യു​ന്നത്‌? ഇപ്പോ​ഴത്തെ നമ്മുടെ ജീവി​ത​ത്തെ​ക്കു​റിച്ച്‌ ശരിയായ ഒരു കാഴ്‌ച​പ്പാ​ടു​ണ്ടാ​യി​രി​ക്കാൻ  സഹായി​ക്കു​ന്ന​താണ്‌ ഒരു വിധം. ദൈവത്തെ സേവി​ക്കു​ന്ന​തി​ലൂ​ടെ നമുക്ക്‌ സന്തോഷം കിട്ടു​മെന്ന്‌ യഹോവ ഉറപ്പു​ത​ന്നി​ട്ടുണ്ട്‌. എങ്കിലും ജീവി​ത​ത്തിൽ ഒരു പ്രശ്‌ന​വും ഉണ്ടാകി​ല്ലെന്ന്‌ ദൈവം പറഞ്ഞി​ട്ടില്ല. (യശ. 66:14) പകരം നമുക്ക്‌ എന്നും സന്തോ​ഷ​ത്തോ​ടെ ജീവി​ക്കാ​നാ​കുന്ന ഭാവി​യി​ലേക്കു നോക്കാ​നാണ്‌ യഹോവ ആവശ്യ​പ്പെ​ടു​ന്നത്‌. (2 കൊരി. 4:16-18) അതുവരെ ഓരോ ദിവസ​വും തന്നെ സേവി​ക്കാ​നുള്ള സഹായം ദൈവം നമുക്കു തരുന്നു.—വിലാ. 3:22-24.

4. ഈ ലേഖന​ത്തിൽ നമ്മൾ എന്തു പഠിക്കും?

⁴ ബൈബിൾക്കാ​ല​ങ്ങ​ളി​ലെ​യും ഇപ്പോ​ഴ​ത്തെ​യും വിശ്വ​സ്‌ത​ദാ​സ​ന്മാ​രു​ടെ മാതൃ​ക​ക​ളിൽനിന്ന്‌ എന്തു പഠിക്കാ​മെന്നു നോക്കാം. പ്രതീ​ക്ഷി​ക്കാത്ത പല പ്രശ്‌ന​ങ്ങ​ളും നമുക്കും നേരി​ട്ടേ​ക്കാം. പക്ഷേ തന്നിൽ ആശ്രയി​ക്കു​ന്ന​വരെ യഹോവ ഒരിക്ക​ലും കൈവി​ടില്ല. (സങ്കീ. 55:22) ദൈവ​ത്തിൽ ആശ്രയിച്ച വിശ്വ​സ്‌ത​ദാ​സ​ന്മാ​രു​ടെ മാതൃ​ക​ക​ളെ​ക്കു​റിച്ച്‌ പഠിക്കു​മ്പോൾ നിങ്ങ​ളോ​ടു​തന്നെ ചോദി​ക്കുക: ‘ആ സാഹച​ര്യ​ത്തിൽ ഞാനാ​യി​രു​ന്നെ​ങ്കിൽ എന്തു ചെയ്‌തേനേ? ഈ മാതൃ​കകൾ യഹോ​വ​യി​ലുള്ള എന്റെ വിശ്വാ​സം എങ്ങനെ​യാ​ണു ശക്തമാ​ക്കു​ന്നത്‌? അതിൽനി​ന്നുള്ള എന്തൊക്കെ പാഠങ്ങൾ എനിക്കു ജീവി​ത​ത്തിൽ പകർത്താം?’

5. ലാബാൻ കാരണം യാക്കോ​ബിന്‌ എന്തെല്ലാം പ്രശ്‌ന​ങ്ങ​ളാ​ണു​ണ്ടാ​യത്‌? (പുറം​താ​ളി​ലെ ചിത്രം കാണുക.)

⁵ ബൈബിൾക്കാ​ല​ങ്ങ​ളിൽ യഹോ​വ​യു​ടെ ദാസന്മാർക്ക്‌ ഒട്ടും പ്രതീ​ക്ഷി​ക്കാ​തെ പല പ്രശ്‌ന​ങ്ങ​ളും നേരി​ടേ​ണ്ടി​വ​ന്നി​ട്ടുണ്ട്‌. യാക്കോ​ബി​ന്റെ ജീവി​തം​തന്നെ നോക്കുക. തങ്ങളുടെ ബന്ധുവും യഹോ​വ​യു​ടെ ആരാധ​ക​നും ആയ ലാബാന്റെ പെൺമ​ക്ക​ളിൽ ഒരാളെ വിവാഹം കഴിക്കാൻ അപ്പൻ യാക്കോ​ബി​നോട്‌ ആവശ്യ​പ്പെട്ടു. യഹോവ യാക്കോ​ബി​നെ സമൃദ്ധ​മാ​യി അനു​ഗ്ര​ഹി​ക്കു​മെന്ന്‌ ഉറപ്പു​കൊ​ടു​ക്കു​ക​യും ചെയ്‌തു. (ഉൽപ. 28:1-4) അപ്പൻ പറഞ്ഞതു​പോ​ലെ​തന്നെ അദ്ദേഹം കനാനിൽനിന്ന്‌ ലാബാന്റെ അടു​ത്തേക്കു പോയി. ലാബാനു രണ്ടു പെൺമ​ക്ക​ളാ​ണു​ണ്ടാ​യി​രു​ന്നത്‌, ലേയയും റാഹേ​ലും. ഇളയവ​ളായ റാഹേ​ലി​നോട്‌ ഇഷ്ടം തോന്നി​യിട്ട്‌ അവളെ വിവാഹം കഴിക്കാൻ യാക്കോബ്‌ ആഗ്രഹി​ച്ചു. അതിനു​വേണ്ടി ലാബാനെ ഏഴു വർഷം സേവി​ക്കാ​മെ​ന്നും സമ്മതിച്ചു. (ഉൽപ. 29:18) പക്ഷേ പ്രതീ​ക്ഷി​ച്ച​തു​പോ​ലെ കാര്യങ്ങൾ നടന്നില്ല. റാഹേ​ലി​നു പകരം മൂത്ത മകളായ ലേയയെ കൊടു​ത്തു​കൊണ്ട്‌ ലാബാൻ യാക്കോ​ബി​നെ ചതിച്ചു. എന്നാൽ ഏഴു വർഷം​കൂ​ടെ തന്നെ സേവി​ക്കാൻ തയ്യാറാ​ണെ​ങ്കിൽ ഒരാഴ്‌ച കഴിഞ്ഞ്‌ റാഹേ​ലി​നെ​യും ഭാര്യ​യാ​യി കൊടു​ക്കാ​മെന്നു ലാബാൻ സമ്മതിച്ചു. (ഉൽപ. 29:25-27) യാക്കോ​ബു​മാ​യുള്ള മറ്റ്‌ ഇടപാ​ടു​ക​ളി​ലും ലാബാൻ അന്യായം കാണിച്ചു. അങ്ങനെ മൊത്തം 20 വർഷമാ​ണു ലാബാൻ യാക്കോ​ബി​നോട്‌ അനീതി കാണി​ച്ചത്‌.—ഉൽപ. 31:41, 42.

6. യാക്കോ​ബി​നു വേറേ എന്തെല്ലാം പ്രശ്‌ന​ങ്ങ​ളു​ണ്ടാ​യി?

⁶ യാക്കോ​ബി​നു വേറേ​യും ചില പ്രശ്‌ന​ങ്ങ​ളു​ണ്ടാ​യി. അദ്ദേഹ​ത്തി​നു കുറെ മക്കളു​ണ്ടാ​യി​രു​ന്നെ​ങ്കി​ലും അവർ തമ്മിൽ എപ്പോ​ഴും അത്ര സമാധാ​ന​ത്തി​ലും സന്തോ​ഷ​ത്തി​ലും ആയിരു​ന്നില്ല. സ്വന്തം അനിയ​നായ യോ​സേ​ഫി​നെ അവർ ഒരു അടിമ​യാ​യി വിൽക്കു​ക​പോ​ലും ചെയ്‌തു. യാക്കോ​ബി​ന്റെ രണ്ടു മക്കളായ ശിമെ​യോ​നും ലേവി​യും കുടും​ബ​ത്തി​നും യഹോ​വ​യു​ടെ പേരി​നും വലിയ നിന്ദ വരുത്തി. കൂടാതെ, യാക്കോ​ബി​ന്റെ പ്രിയ ഭാര്യ​യായ റാഹേൽ ഇളയ മകനെ പ്രസവി​ക്കുന്ന സമയത്ത്‌ മരിച്ചു​പോ​യി. ഇനി, യാക്കോ​ബി​നു വളരെ പ്രായ​മാ​യ​ശേഷം കടുത്ത ക്ഷാമം കാരണം ഈജി​പ്‌തി​ലേക്കു പോ​കേ​ണ്ട​താ​യും വന്നു.—ഉൽപ. 34:30; 35:16-19; 37:28; 45:9-11, 28.

7. യാക്കോ​ബി​നു തന്റെ സ്‌നേ​ഹ​വും അംഗീ​കാ​ര​വും ഉണ്ടെന്ന്‌ യഹോവ എങ്ങനെ​യാ​ണു തെളി​യി​ച്ചത്‌?

⁷ ഇത്രയ​ധി​കം പ്രശ്‌നങ്ങൾ സഹി​ക്കേ​ണ്ടി​വ​ന്നെ​ങ്കി​ലും യാക്കോ​ബിന്‌ ഒരിക്ക​ലും യഹോ​വ​യി​ലും യഹോ​വ​യു​ടെ വാഗ്‌ദാ​ന​ങ്ങ​ളി​ലും ഉള്ള വിശ്വാ​സം നഷ്ടപ്പെ​ട്ടില്ല. അതു​കൊ​ണ്ടു​തന്നെ യാക്കോ​ബി​നു തന്റെ സ്‌നേ​ഹ​വും അംഗീ​കാ​ര​വും ഉണ്ടെന്ന്‌ യഹോ​വ​യും തെളി​യി​ച്ചു. ഉദാഹ​ര​ണ​ത്തിന്‌, ലാബാൻ യാക്കോ​ബി​നോട്‌ അന്യാ​യ​മാ​യി പെരു​മാ​റി​യെ​ങ്കി​ലും ധാരാളം സ്വത്തുക്കൾ നൽകി യഹോവ യാക്കോ​ബി​നെ അനു​ഗ്ര​ഹി​ച്ചു. ഇനി, വർഷങ്ങൾക്കു മുമ്പ്‌ മരിച്ചു​പോ​യെന്നു കരുതിയ തന്റെ പ്രിയ​പ്പെട്ട മകനായ യോ​സേ​ഫി​നോ​ടൊ​പ്പം വീണ്ടു​മാ​യി​രി​ക്കാൻ കഴിഞ്ഞ​പ്പോൾ യാക്കോ​ബിന്‌ യഹോ​വ​യോട്‌ എത്ര നന്ദി തോന്നി​ക്കാ​ണു​മെന്നു ചിന്തി​ക്കുക. യഹോ​വ​യു​മാ​യുള്ള വളരെ അടുത്ത സൗഹൃ​ദ​മാണ്‌ ഈ പ്രശ്‌ന​ങ്ങ​ളൊ​ക്കെ വിജയ​ക​ര​മാ​യി സഹിക്കാൻ യാക്കോ​ബി​നെ സഹായി​ച്ചത്‌. (ഉൽപ. 30:43; 32:9, 10; 46:28-30) ഇതു​പോ​ലെ യഹോ​വ​യു​മാ​യി അടുത്ത ബന്ധമു​ണ്ടെ​ങ്കിൽ അപ്രതീ​ക്ഷി​ത​മാ​യി ഉണ്ടാകുന്ന പ്രശ്‌ന​ങ്ങളെ വിജയ​ക​ര​മാ​യി തരണം ചെയ്യാൻ നമുക്കും കഴിയും.

8. ദാവീദ്‌ രാജാവ്‌ എന്തു ചെയ്യാൻ ആഗ്രഹി​ച്ചു?

 ⁸ ദാവീദ്‌ രാജാ​വിന്‌ യഹോ​വ​യു​ടെ സേവന​ത്തിൽ താൻ ആഗ്രഹി​ച്ച​തെ​ല്ലാം ചെയ്യാൻ കഴിഞ്ഞില്ല. ഉദാഹ​ര​ണ​ത്തിന്‌, യഹോ​വ​യ്‌ക്ക്‌ ഒരു ആലയം പണിയാൻ അദ്ദേഹം ഒരുപാട്‌ ആഗ്രഹി​ച്ചി​രു​ന്നു. ആ കാര്യം നാഥാൻ പ്രവാ​ച​ക​നോ​ടു പറയു​ക​യും ചെയ്‌തു. അതിനു മറുപ​ടി​യാ​യി നാഥാൻ പറഞ്ഞു: “അങ്ങയുടെ ആഗ്രഹം​പോ​ലെ ചെയ്‌തു​കൊ​ള്ളൂ. ദൈവം അങ്ങയു​ടെ​കൂ​ടെ​യുണ്ട്‌.” (1 ദിന. 17:1, 2) അതു കേട്ട​പ്പോൾ ദാവീ​ദിന്‌ എത്ര സന്തോഷം തോന്നി​ക്കാ​ണും! ഒരുപക്ഷേ ആ വലിയ നിർമാ​ണ​പ്ര​വർത്ത​ന​ത്തി​നു​വേണ്ടി എന്തൊക്കെ ചെയ്യാ​നു​ണ്ടെന്ന്‌ അദ്ദേഹം അപ്പോൾത്തന്നെ ചിന്തി​ച്ചു​തു​ട​ങ്ങി​യി​ട്ടു​മു​ണ്ടാ​കും.

9. വിഷമി​പ്പി​ക്കുന്ന വാർത്ത കേട്ട​പ്പോൾ ദാവീദ്‌ എന്താണു ചെയ്‌തത്‌?

⁹ പക്ഷേ “ആ രാത്രി​തന്നെ” യഹോവ നാഥാൻ പ്രവാ​ച​ക​നോട്‌ ദേവാ​ലയം പണിയു​ന്നതു ദാവീദ്‌ ആയിരി​ക്കില്ല, പകരം അദ്ദേഹ​ത്തി​ന്റെ മക്കളിൽ ഒരാളാ​യി​രി​ക്കും എന്നു പറഞ്ഞു. (1 ദിന. 17:3, 4, 11, 12) വിഷമി​പ്പി​ക്കുന്ന ആ വാർത്ത നാഥാൻ പ്രവാ​ചകൻ ദാവീ​ദി​നെ അറിയി​ച്ചു. ഇതു കേട്ട​പ്പോൾ ദാവീദ്‌ എന്താണു ചെയ്‌തത്‌? അദ്ദേഹം ചെയ്യണ​മെന്നു വിചാ​രിച്ച കാര്യ​ത്തി​നു മാറ്റം വരുത്തി. താൻ ആഗ്രഹി​ച്ച​തു​പോ​ലെ ആലയം പണിയാൻ കഴിഞ്ഞി​ല്ലെ​ങ്കി​ലും മകനായ ശലോ​മോൻ ചെയ്യാൻപോ​കുന്ന ആ വലിയ പദ്ധതിക്കു വേണ്ട പണവും മറ്റു സാധന​ങ്ങ​ളും ശേഖരി​ക്കു​ന്ന​തിന്‌ അദ്ദേഹം കൂടുതൽ ശ്രദ്ധ​കൊ​ടു​ത്തു.—1 ദിന. 29:1-5.

10. യഹോവ എങ്ങനെ​യാ​ണു ദാവീ​ദി​നെ അനു​ഗ്ര​ഹി​ച്ചത്‌?

¹⁰ ദേവാ​ലയം പണിയു​ന്നതു ദാവീദ്‌ ആയിരി​ക്കി​ല്ലെന്ന്‌ അറിയിച്ച ഉടൻതന്നെ യഹോവ ദാവീ​ദു​മാ​യി ഒരു ഉടമ്പടി ചെയ്‌തു. ദാവീ​ദി​ന്റെ വംശത്തിൽപ്പെട്ട ഒരാൾ എന്നെന്നും ഭരിക്കു​മെന്നു ദൈവം അപ്പോൾ ഉറപ്പു​കൊ​ടു​ത്തു. (2 ശമു. 7:16) പുതിയ ലോക​ത്തിൽ ആയിരം​വർഷ ഭരണത്തി​ന്റെ സമയത്ത്‌ തന്റെ പിൻഗാ​മി​യായ യേശു​വാ​ണു ഭരിക്കു​ന്ന​തെന്ന്‌ അറിയു​മ്പോൾ ദാവീ​ദിന്‌ എത്ര സന്തോഷം തോന്നും! ഇതിൽനിന്ന്‌ നമുക്ക്‌ എന്തു പഠിക്കാം? ആഗ്രഹി​ക്കു​ന്ന​തെ​ല്ലാം യഹോ​വ​യ്‌ക്കു​വേണ്ടി ചെയ്യാൻ നമുക്കു കഴിഞ്ഞി​ല്ലെ​ങ്കി​ലും പ്രതീ​ക്ഷി​ക്കാത്ത മറ്റു ചില അനു​ഗ്ര​ഹങ്ങൾ യഹോവ നൽകി​യേ​ക്കാം.

11. ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾ പ്രതീ​ക്ഷിച്ച സമയത്ത്‌ ദൈവ​രാ​ജ്യം വന്നി​ല്ലെ​ങ്കി​ലും യഹോവ എങ്ങനെ​യാണ്‌ അവരെ അനു​ഗ്ര​ഹി​ച്ചത്‌? (പ്രവൃ​ത്തി​കൾ 6:7)

¹¹ ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്കും ചില പ്രശ്‌നങ്ങൾ നേരിട്ടു. ഉദാഹ​ര​ണ​ത്തിന്‌ അവർ പ്രതീ​ക്ഷി​ച്ച​തു​പോ​ലെ എല്ലാ കാര്യ​ങ്ങ​ളും നടന്നില്ല. ദൈവ​രാ​ജ്യം വരാൻ അവർ ഒരുപാട്‌ ആഗ്രഹി​ച്ചെ​ങ്കി​ലും അത്‌ എപ്പോൾ വരു​മെന്ന്‌ അവർക്ക്‌ അറിയി​ല്ലാ​യി​രു​ന്നു. (പ്രവൃ. 1:6, 7) അതു​കൊണ്ട്‌ അവർ എന്തു ചെയ്‌തു? ഉത്സാഹ​ത്തോ​ടെ പ്രസം​ഗ​പ്ര​വർത്തനം ചെയ്‌തു​കൊ​ണ്ടി​രു​ന്നു. കൂടു​തൽക്കൂ​ടു​തൽ സ്ഥലങ്ങളിൽ സന്തോ​ഷ​വാർത്ത അറിയി​ച്ച​പ്പോൾ യഹോവ അവരുടെ പ്രവർത്ത​ന​ങ്ങളെ അനു​ഗ്ര​ഹി​ക്കു​ന്നത്‌ അവർ അനുഭ​വി​ച്ച​റി​ഞ്ഞു.—പ്രവൃ​ത്തി​കൾ 6:7 വായി​ക്കുക.

12. ക്ഷാമം ഉണ്ടായ​പ്പോൾ ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾ എന്താണു ചെയ്‌തത്‌?

¹² ഒരിക്കൽ “ലോകം മുഴുവൻ” വലി​യൊ​രു ക്ഷാമം ഉണ്ടായി. (പ്രവൃ. 11:28) ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്കും അതിന്റെ ബുദ്ധി​മു​ട്ടു​കൾ അനുഭ​വി​ക്കേ​ണ്ട​താ​യി​വന്നു. ആ സമയത്ത്‌ എന്തൊക്കെ ചിന്തകൾ അവരുടെ മനസ്സി​ലൂ​ടെ കടന്നു​പോ​യി​ട്ടു​ണ്ടാ​കും? വീട്ടി​ലു​ള്ള​വർക്ക്‌ എങ്ങനെ ഭക്ഷണം കൊടു​ക്കു​മെന്ന്‌ ഓർത്ത്‌ തീർച്ച​യാ​യും കുടും​ബ​നാ​ഥ​ന്മാർ ഉത്‌ക​ണ്‌ഠ​പ്പെ​ട്ടി​ട്ടുണ്ട്‌. ശുശ്രൂഷ കൂടുതൽ നന്നായി ചെയ്യാൻ ആഗ്രഹിച്ച ചെറു​പ്പ​ക്കാ​രു​ടെ കാര്യ​മോ? ക്ഷാമം ഒക്കെ മാറി​യിട്ട്‌ അതു ചെയ്‌താൽ മതി​യെന്ന്‌ അവർ ചിന്തി​ച്ചു​കാ​ണു​മോ? സാഹച​ര്യം മോശ​മാ​യി​രു​ന്നെ​ങ്കി​ലും അന്നത്തെ ക്രിസ്‌ത്യാ​നി​കൾ അതി​നോ​ടു പൊരു​ത്ത​പ്പെട്ടു. തങ്ങൾക്കു പറ്റുന്ന​തു​പോ​ലെ​യെ​ല്ലാം അവർ സന്തോ​ഷ​വാർത്ത അറിയി​ക്കു​ന്ന​തിൽ തുടർന്നു. കൂടാതെ തങ്ങൾക്കുള്ള വസ്‌തു​വ​കകൾ യഹൂദ്യ​യി​ലുള്ള പ്രിയ സഹോ​ദ​ര​ങ്ങൾക്കു സന്തോ​ഷ​ത്തോ​ടെ കൊടു​ക്കു​ക​യും ചെയ്‌തു.—പ്രവൃ. 11:29, 30.

13. ക്ഷാമത്തി​ന്റെ സമയത്ത്‌ എന്തെല്ലാം അനു​ഗ്ര​ഹ​ങ്ങ​ളാണ്‌ ആ ക്രിസ്‌ത്യാ​നി​കൾക്കു കിട്ടി​യത്‌?

¹³ ക്ഷാമത്തി​ന്റെ സമയത്ത്‌ ആ ക്രിസ്‌ത്യാ​നി​കൾക്ക്‌ എന്തൊക്കെ അനു​ഗ്ര​ഹ​ങ്ങ​ളാ​ണു കിട്ടി​യത്‌? ദുരി​താ​ശ്വാ​സ​പ്ര​വർത്ത​ന​ത്തി​ന്റെ ഭാഗമാ​യി അവർക്കു വേണ്ട അവശ്യ​സാ​ധ​ന​ങ്ങ​ളെ​ല്ലാം കിട്ടി​യ​പ്പോൾ യഹോ​വ​യു​ടെ സഹായം അവർ അനുഭ​വി​ച്ച​റി​ഞ്ഞു. (മത്താ. 6:31-33) അവരെ സഹായിച്ച സഹോ​ദ​ര​ങ്ങ​ളോ​ടും അവർക്കു കൂടുതൽ അടുപ്പം തോന്നി​യി​രി​ക്കാം. ഇനി, ദുരി​താ​ശ്വാ​സ​പ്ര​വർത്ത​ന​ങ്ങൾക്കു സംഭാവന കൊടു​ത്ത​വർക്കും മറ്റ്‌ ഏതെങ്കി​ലും വിധത്തിൽ അതിൽ ഉൾപ്പെ​ട്ട​വർക്കും കൊടു​ക്കു​ന്ന​തി​ന്റെ സന്തോഷം കിട്ടി. (പ്രവൃ. 20:35) സാഹച​ര്യ​ങ്ങൾക്കു  മാറ്റം വന്നപ്പോ​ഴും അതി​നോ​ടു പൊരു​ത്ത​പ്പെ​ടാൻ തയ്യാറാ​യ​തു​കൊണ്ട്‌ യഹോവ അവരെ​യെ​ല്ലാം അനു​ഗ്ര​ഹി​ച്ചു.

14. അപ്പോ​സ്‌ത​ല​നായ പൗലോ​സി​നും ബർന്നബാ​സി​നും എന്തു സംഭവി​ച്ചു, എന്തായി​രു​ന്നു അതിന്റെ ഫലം? (പ്രവൃ​ത്തി​കൾ 14:21, 22)

¹⁴ ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾക്കു പലപ്പോ​ഴും ഉപദ്ര​വങ്ങൾ സഹി​ക്കേ​ണ്ട​താ​യി​വന്നു. ചില​പ്പോൾ അത്‌ അവർ ഒട്ടും പ്രതീ​ക്ഷി​ക്കാത്ത സമയത്താ​യി​രു​ന്നു. ലുസ്‌ത്ര​യിൽ പ്രസം​ഗ​പ്ര​വർത്തനം ചെയ്‌തു​കൊ​ണ്ടി​രുന്ന ബർന്നബാ​സി​നും അപ്പോ​സ്‌ത​ല​നായ പൗലോ​സി​നും എന്താണു സംഭവി​ച്ച​തെന്നു നോക്കാം. ആദ്യം അവിടത്തെ ആളുകൾ അവരെ സ്വീക​രി​ക്കു​ക​യും അവർ പറയു​ന്നതു കേൾക്കു​ക​യും ചെയ്‌തു. എന്നാൽ പിന്നീട്‌ എതിരാ​ളി​കൾ “ജനക്കൂ​ട്ടത്തെ ഇളക്കി​വി​ട്ടു.” അപ്പോൾ ആദ്യ​മൊ​ക്കെ പൗലോ​സി​നെ ശ്രദ്ധി​ക്കാൻ തയ്യാറായ ചിലർതന്നെ അദ്ദേഹത്തെ കല്ലെറി​യു​ക​യും മരി​ച്ചെന്നു കരുതി ഉപേക്ഷി​ക്കു​ക​യും ചെയ്‌തു. (പ്രവൃ. 14:19) എന്നാൽ പൗലോ​സും ബർന്നബാ​സും മറ്റു സ്ഥലങ്ങളിൽ പ്രസം​ഗ​പ്ര​വർത്തനം ചെയ്യു​ന്ന​തിൽ തുടർന്നു. എന്തായി​രു​ന്നു ഫലം? ‘കുറെ പേരെ ശിഷ്യ​രാ​ക്കാൻ’ അവർക്കു കഴിഞ്ഞു. കൂടാതെ അവരുടെ മാതൃ​ക​യും അവർ പറഞ്ഞ കാര്യ​ങ്ങ​ളും സഹോ​ദ​ര​ങ്ങളെ ഒരുപാ​ടു ബലപ്പെ​ടു​ത്തു​ക​യും ചെയ്‌തു. (പ്രവൃ​ത്തി​കൾ 14:21, 22 വായി​ക്കുക.) അങ്ങനെ അപ്രതീ​ക്ഷി​ത​മാ​യി ഉപദ്രവം നേരി​ട്ടി​ട്ടും പൗലോ​സും ബർന്നബാ​സും പ്രസം​ഗ​പ്ര​വർത്തനം നിറു​ത്താ​തി​രു​ന്ന​തു​കൊണ്ട്‌ ഒരുപാ​ടു പേർക്ക്‌ അതിന്റെ പ്രയോ​ജനം കിട്ടി. അതു​പോ​ലെ നമ്മളും യഹോവ ഏൽപ്പിച്ച പ്രവർത്തനം ചെയ്യു​ന്ന​തിൽ മടുത്തു​പോ​കാ​തെ തുടർന്നാൽ യഹോവ ഉറപ്പാ​യും നമ്മളെ അനു​ഗ്ര​ഹി​ക്കും.

15. എ. എച്ച്‌. മാക്‌മി​ല്ലൻ സഹോ​ദ​രന്റെ അനുഭ​വ​ത്തിൽനിന്ന്‌ നമുക്ക്‌ എന്തു പഠിക്കാം?

¹⁵ 1914-ൽ ചില കാര്യങ്ങൾ സംഭവി​ക്കു​മെന്ന്‌ അതിനു കുറച്ച്‌ മുമ്പുള്ള വർഷങ്ങ​ളിൽ യഹോ​വ​യു​ടെ ജനം പ്രതീ​ക്ഷി​ച്ചി​രു​ന്നു. ഉദാഹ​ര​ണ​ത്തിന്‌, എ. എച്ച്‌. മാക്‌മി​ല്ലൻ സഹോ​ദ​രന്റെ കാര്യ​മെ​ടു​ക്കാം. അക്കാലത്ത്‌ പലരും ചിന്തി​ച്ച​തു​പോ​ലെ താനും പെട്ടെ​ന്നു​തന്നെ സ്വർഗ​ത്തി​ലേക്കു പോകു​മെന്ന്‌ അദ്ദേഹം പ്രതീ​ക്ഷി​ച്ചു. 1914 സെപ്‌റ്റം​ബ​റിൽ നടത്തിയ ഒരു പ്രസം​ഗ​ത്തിൽ അദ്ദേഹം ഇങ്ങനെ​യാ​ണു പറഞ്ഞത്‌: “ഇത്‌ ഒരുപക്ഷേ ഞാൻ നടത്തുന്ന അവസാ​നത്തെ പരസ്യ​പ്ര​സം​ഗ​മാ​യി​രി​ക്കും.” എന്നാൽ അത്‌ അദ്ദേഹ​ത്തി​ന്റെ അവസാ​നത്തെ പ്രസം​ഗ​മാ​യി​രു​ന്നില്ല. പിന്നീട്‌ സഹോ​ദരൻ എഴുതി: “പെട്ടെ​ന്നു​തന്നെ സ്വർഗ​ത്തിൽ പോകാ​മെന്നു ചിന്തി​ച്ച​തി​ലൂ​ടെ ഞങ്ങളിൽ പലരും ഒരുപക്ഷേ അൽപ്പം തിടുക്കം കാണി​ക്കു​ക​യാ​യി​രു​ന്നു. ഞങ്ങൾ ചെയ്യേ​ണ്ടി​യി​രുന്ന കാര്യം കർത്താ​വി​ന്റെ വേലയിൽ തിര​ക്കോ​ടെ പ്രവർത്തി​ക്കുക എന്നുള്ള​താ​യി​രു​ന്നു.” അദ്ദേഹം അങ്ങനെ​തന്നെ ചെയ്‌തു. തീക്ഷ്‌ണ​ത​യോ​ടെ പ്രസം​ഗ​പ്ര​വർത്ത​ന​ത്തിൽ ഏർപ്പെട്ടു. സൈന്യ​ത്തിൽ ചേരാൻ വിസമ്മ​തി​ച്ച​തി​ന്റെ പേരിൽ ജയിലിൽ കഴിഞ്ഞി​രുന്ന പല സഹോ​ദ​ര​ങ്ങ​ളെ​യും പ്രോ​ത്സാ​ഹി​പ്പി​ക്കാ​നുള്ള അവസര​വും അദ്ദേഹ​ത്തി​നു കിട്ടി. വളരെ പ്രായ​മാ​യ​പ്പോൾപ്പോ​ലും അദ്ദേഹം വിശ്വ​സ്‌ത​ത​യോ​ടെ മീറ്റി​ങ്ങി​നും വരുമാ​യി​രു​ന്നു. തനിക്കു കിട്ടാൻപോ​കുന്ന പ്രതി​ഫ​ല​ത്തി​നാ​യി കാത്തി​രുന്ന സമയം മുഴുവൻ ഏറ്റവും നന്നായി ഉപയോ​ഗി​ച്ച​തു​കൊണ്ട്‌ മാക്‌മി​ല്ലൻ സഹോ​ദ​രന്‌ എന്തു പ്രയോ​ജ​ന​മാ​ണു കിട്ടി​യത്‌? 1966-ൽ മരിക്കു​ന്ന​തി​നു കുറച്ച്‌ നാൾ മുമ്പ്‌ അദ്ദേഹം എഴുതി: “മുമ്പ​ത്തെ​പ്പോ​ലെ​തന്നെ എന്റെ വിശ്വാ​സം ഇന്നും ശക്തമാണ്‌.” നമുക്ക്‌ അനുക​രി​ക്കാൻ പറ്റിയ എത്ര നല്ല മാതൃക! പ്രത്യേ​കിച്ച്‌, പ്രതീ​ക്ഷി​ച്ച​തി​ലും കൂടുതൽ കാലമാ​യി നമ്മൾ ഒരു പ്രശ്‌ന​ത്തി​ലൂ​ടെ കടന്നു​പോ​കു​ക​യാ​ണെ​ങ്കിൽ.—എബ്രാ. 13:7.

16. അപ്രതീ​ക്ഷി​ത​മായ എന്തു പ്രശ്‌ന​മാ​ണു ഹെർബർട്ട്‌ ജനിങ്‌സ്‌ സഹോ​ദ​ര​നും ഭാര്യ​ക്കും നേരി​ട്ടത്‌? (യാക്കോബ്‌ 4:14)

¹⁶ യഹോ​വ​യു​ടെ ജനത്തിൽ പലരും പ്രതീ​ക്ഷി​ക്കാത്ത ആരോ​ഗ്യ​പ്ര​ശ്‌നങ്ങൾ നേരി​ടു​ന്നുണ്ട്‌. ഉദാഹ​ര​ണ​ത്തിന്‌ ഹെർബർട്ട്‌ ജനിങ്‌സ്‌ സഹോദരന്റെ b കാര്യം നോക്കാം. ഘാനയി​ലെ മിഷനറി സേവനം അദ്ദേഹ​വും ഭാര്യ​യും എത്ര നന്നായി ആസ്വദി​ച്ചി​രു​ന്നെന്ന്‌ അദ്ദേഹ​ത്തി​ന്റെ ജീവി​ത​ക​ഥ​യിൽ പറഞ്ഞി​ട്ടുണ്ട്‌. എന്നാൽ കുറച്ച്‌ നാൾ കഴിഞ്ഞ​പ്പോൾ അദ്ദേഹ​ത്തിന്‌ ഒരു അസുഖം ഉണ്ടെന്നു കണ്ടെത്തി. വികാ​രങ്ങൾ പെട്ടെന്നു മാറി​മ​റി​യുന്ന ഒരു കടുത്ത രോഗ​മാ​യി​രു​ന്നു അത്‌. ആ സാഹച​ര്യ​ത്തെ​ക്കു​റിച്ച്‌ യാക്കോബ്‌ 4:14-ലെ വാക്കുകൾ കടമെ​ടു​ത്തു​കൊണ്ട്‌ ജനിങ്‌സ്‌ സഹോ​ദരൻ പറഞ്ഞത്‌, അതു “ഞങ്ങൾ പ്രതീ​ക്ഷി​ക്കാത്ത ഒരു ‘നാളെ’” ആയിരു​ന്നു എന്നാണ്‌. (വായി​ക്കുക.) അദ്ദേഹം എഴുതി: “യാഥാർഥ്യ​ത്തെ അഭിമു​ഖീ​ക​രി​ച്ചു​കൊണ്ട്‌ ഘാനയി​ലെ ഞങ്ങളുടെ പ്രിയ സുഹൃ​ത്തു​ക്കളെ വിട്ട്‌ (ചികി​ത്സ​യ്‌ക്കാ​യി) കാനഡ​യി​ലേക്കു മടങ്ങാൻ ഞങ്ങൾ ക്രമീ​ക​ര​ണങ്ങൾ ചെയ്‌തു.”  ഇത്ര​യൊ​ക്കെ പ്രശ്‌നങ്ങൾ ഉണ്ടായി​ട്ടും തുടർന്നും വിശ്വ​സ്‌ത​മാ​യി സേവി​ക്കാൻ ജനിങ്‌സ്‌ സഹോ​ദ​ര​നെ​യും ഭാര്യ​യെ​യും യഹോവ സഹായി​ച്ചു.

17. ജനിങ്‌സ്‌ സഹോ​ദ​രന്റെ അനുഭവം എങ്ങനെ​യാ​ണു മറ്റു സഹോ​ദ​ര​ങ്ങൾക്കു പ്രയോ​ജ​ന​പ്പെ​ട്ടത്‌?

¹⁷ തന്റെ ജീവി​ത​ക​ഥ​യിൽ ജനിങ്‌സ്‌ സഹോ​ദരൻ തുറന്നു​പറഞ്ഞ പല കാര്യ​ങ്ങ​ളും മറ്റുള്ള​വരെ ഒരുപാ​ടു സഹായി​ച്ചി​ട്ടുണ്ട്‌. ഒരു സഹോ​ദരി എഴുതി: “ഈ കാലത്തി​നി​ട​യ്‌ക്കു മറ്റൊരു ലേഖന​വും ഇതു​പോ​ലെ എന്നെ ആഴത്തിൽ സ്‌പർശി​ച്ചി​ട്ടില്ല. . . . ചികി​ത്സ​യ്‌ക്കു പോ​കേ​ണ്ടി​യി​രു​ന്ന​തി​നാൽ ജനിങ്‌സ്‌ സഹോ​ദ​രന്‌ നിയമനം ഒഴി​യേ​ണ്ടി​വ​ന്നെന്നു വായി​ച്ചത്‌ എന്റെ സാഹച​ര്യ​ത്തെ സമനി​ല​യോ​ടെ വീക്ഷി​ക്കാൻ എന്നെ സഹായി​ച്ചു.” അതു​പോ​ലെ​തന്നെ ഒരു സഹോ​ദ​ര​നും ഇങ്ങനെ എഴുതി: ‘പത്തു വർഷം സഭയിൽ മൂപ്പനാ​യി സേവി​ച്ച​ശേഷം, ഒരു മാനസി​ക​രോ​ഗം നിമിത്തം എനിക്കു നിയമനം ഒഴി​യേ​ണ്ടി​വന്നു. എന്റെ ജീവിതം ഒരു പരാജ​യ​മാ​ണെന്നു തോന്നി​യി​രു​ന്ന​തു​കൊണ്ട്‌ യഹോ​വ​യു​ടെ ജനത്തിന്റെ അസാധാ​രണ നേട്ടങ്ങൾ വിവരി​ക്കുന്ന ജീവി​ത​ക​ഥകൾ മിക്ക​പ്പോ​ഴും ഞാൻ വായി​ക്കു​മാ​യി​രു​ന്നില്ല. പക്ഷേ ജനിങ്‌സ്‌ സഹോ​ദ​രന്റെ സഹിഷ്‌ണുത എനിക്കു പ്രോ​ത്സാ​ഹ​ന​മേകി.’ ഇതു നമ്മളെ ഒരു കാര്യം ഓർമി​പ്പി​ക്കു​ന്നു: അപ്രതീ​ക്ഷി​ത​മായ പ്രശ്‌നങ്ങൾ ഉണ്ടാകു​മ്പോൾ സഹിച്ചു​നി​ന്നാൽ മറ്റുള്ള​വർക്കും അതൊരു പ്രോ​ത്സാ​ഹ​ന​മാ​കും. അങ്ങനെ വിശ്വാ​സം കാണി​ക്കു​ന്ന​തി​ലും സഹിച്ചു​നിൽക്കു​ന്ന​തി​ലും ജീവി​ക്കുന്ന മാതൃ​ക​യാ​കാൻ നമുക്കു കഴിയും.—1 പത്രോ. 5:9.

18. ചിത്ര​ത്തിൽ പുനര​വ​ത​രി​പ്പി​ച്ചി​രി​ക്കുന്ന നൈജീ​രി​യ​യി​ലെ വിധവ​യു​ടെ അനുഭ​വ​ത്തിൽനിന്ന്‌ നമുക്ക്‌ എന്തു പഠിക്കാം?

¹⁸ കോവിഡ്‌-19 മഹാമാ​രി​പോ​ലുള്ള ദുരന്തങ്ങൾ യഹോ​വ​യു​ടെ ജനത്തിൽ പലരു​ടെ​യും ജീവിതം ബുദ്ധി​മു​ട്ടി​ലാ​ക്കി. ഉദാഹ​ര​ണ​ത്തിന്‌ നൈജീ​രി​യ​യി​ലുള്ള വിധവ​യായ ഒരു സഹോ​ദ​രി​യു​ടെ കൈയിൽ അധികം പണമോ ഭക്ഷണസാ​ധ​ന​ങ്ങ​ളോ ഉണ്ടായി​രു​ന്നില്ല. ഒരു ദിവസം രാവിലെ സഹോ​ദ​രി​യു​ടെ വീട്ടിൽ ഒരു നേര​ത്തേ​ക്കുള്ള അരി മാത്രമേ ബാക്കി​യു​ണ്ടാ​യി​രു​ന്നു​ള്ളൂ. അപ്പോൾ മകൾ സഹോ​ദ​രി​യോട്‌ അതുകൂ​ടെ തീർന്നാൽ പിന്നെ എന്തു ചെയ്യു​മെന്നു ചോദി​ച്ചു. പണമോ വേറേ ഭക്ഷണസാ​ധ​ന​ങ്ങ​ളോ ഇനിയി​ല്ലെ​ന്നും സാരെ​ഫാ​ത്തി​ലെ വിധവ​യെ​പ്പോ​ലെ ഉള്ളതു കഴിച്ചിട്ട്‌ യഹോ​വ​യ്‌ക്കാ​യി കാത്തി​രി​ക്കാ​മെ​ന്നും സഹോ​ദരി പറഞ്ഞു. (1 രാജാ. 17:8-16) ഉച്ചയ്‌ക്ക്‌ എന്തു കഴിക്കു​മെന്നു ചിന്തി​ക്കു​ന്ന​തി​നു മുമ്പു​തന്നെ ദുരി​താ​ശ്വാ​സ​പ്ര​വർത്ത​ന​ത്തി​ന്റെ ഭാഗമാ​യി  വിതരണം ചെയ്‌തി​രുന്ന ഭക്ഷണസാ​ധ​നങ്ങൾ സഹോ​ദ​രങ്ങൾ അവർക്ക്‌ എത്തിച്ചു​കൊ​ടു​ത്തു. രണ്ട്‌ ആഴ്‌ച​യിൽ അധികം കഴിക്കാ​നുള്ള സാധനങ്ങൾ അതിലു​ണ്ടാ​യി​രു​ന്നു. താൻ മകളോ​ടു പറഞ്ഞ കാര്യം ശ്രദ്ധി​ച്ചു​കൊണ്ട്‌ യഹോവ ഇത്ര അടുത്തു​ണ്ടാ​യി​രു​ന്ന​ല്ലോ എന്ന്‌ ഓർത്ത്‌ അതിശ​യി​ച്ചു​പോ​യ​താ​യി സഹോ​ദരി പറഞ്ഞു. ശരിക്കും നമ്മൾ യഹോ​വ​യിൽ ആശ്രയി​ച്ചാൽ ഇത്തരത്തി​ലുള്ള അപ്രതീ​ക്ഷി​ത​മായ പ്രശ്‌നങ്ങൾ യഹോ​വ​യോ​ടു കൂടുതൽ അടുക്കാൻ നമ്മളെ സഹായി​ക്കും.—1 പത്രോ. 5:6, 7.

19. എന്ത്‌ ഉപദ്ര​വ​മാണ്‌ അലക്‌സി യെർഷോവ്‌ സഹോ​ദരൻ സഹിച്ചത്‌?

¹⁹ ഈ അടുത്ത​കാ​ലത്ത്‌ നമ്മുടെ സഹോ​ദ​ര​ങ്ങ​ളിൽ പലർക്കും പ്രതീ​ക്ഷി​ക്കാത്ത രീതി​യിൽ ഉപദ്ര​വങ്ങൾ സഹി​ക്കേ​ണ്ടി​വ​ന്നി​ട്ടുണ്ട്‌. ഉദാഹ​ര​ണ​ത്തിന്‌ റഷ്യയിൽ താമസി​ക്കുന്ന അലക്‌സി യെർഷോവ്‌ സഹോ​ദ​രന്റെ കാര്യ​മെ​ടു​ക്കാം. 1994-ലാണ്‌ അദ്ദേഹം സ്‌നാ​ന​പ്പെ​ട്ടത്‌. ആ സമയത്ത്‌ യഹോ​വ​യു​ടെ ജനത്തിന്‌ അവിടെ കുറ​ച്ചൊ​ക്കെ സ്വാത​ന്ത്ര്യ​മു​ണ്ടാ​യി​രു​ന്നു. പക്ഷേ കുറച്ച്‌ വർഷങ്ങൾ കഴിഞ്ഞ​പ്പോൾ റഷ്യയി​ലെ സാഹച​ര്യ​ങ്ങൾ മാറി. 2020-ൽ അധികാ​രി​കൾ യെർഷോവ്‌ സഹോ​ദ​രന്റെ വീട്ടിൽ അതി​ക്ര​മി​ച്ചു​ക​ടന്ന്‌ പരി​ശോ​ധന നടത്തി, അദ്ദേഹ​ത്തി​ന്റെ പല സാധന​ങ്ങ​ളും പിടി​ച്ചെ​ടു​ത്തു. കുറച്ച്‌ മാസങ്ങൾക്കു​ശേഷം അധികാ​രി​കൾ അദ്ദേഹ​ത്തിന്‌ എതിരെ ക്രിമി​നൽ കുറ്റത്തി​നു കേസെ​ടു​ത്തു. ചില വീഡി​യോ​ക​ളു​ടെ അടിസ്ഥാ​ന​ത്തി​ലാ​യി​രു​ന്നു അത്‌. ഏറ്റവും വേദനി​പ്പി​ക്കുന്ന കാര്യം അവ കൊടു​ത്തത്‌ ഒരു വർഷത്തി​ലേ​റെ​യാ​യി ബൈബിൾ പഠിക്കാൻ ആഗ്രഹ​മു​ണ്ടെന്ന മട്ടിൽ കൂടെ​ക്കൂ​ടിയ ഒരാളാ​യി​രു​ന്നു എന്നതാണ്‌. എത്ര വലി​യൊ​രു ചതി!

20. യെർഷോവ്‌ സഹോ​ദരൻ എങ്ങനെ​യാണ്‌ യഹോ​വ​യു​മാ​യുള്ള തന്റെ ബന്ധം ശക്തമാ​ക്കി​യത്‌?

²⁰ യെർഷോവ്‌ സഹോ​ദ​രന്‌ ഉണ്ടായ ഉപദ്ര​വങ്ങൾ അദ്ദേഹ​ത്തിന്‌ ഏതെങ്കി​ലും രീതി​യിൽ പ്രയോ​ജനം ചെയ്‌തോ? തീർച്ച​യാ​യും. യഹോ​വ​യു​മാ​യുള്ള അദ്ദേഹ​ത്തി​ന്റെ ബന്ധം കൂടുതൽ ശക്തമായി. സഹോ​ദരൻ പറയുന്നു: “ഞാനും ഭാര്യ​യും ഒരുമിച്ച്‌ മുമ്പ​ത്തെ​ക്കാൾ കൂടു​ത​ലാ​യി യഹോ​വ​യോ​ടു പ്രാർഥി​ക്കാ​റുണ്ട്‌. യഹോ​വ​യു​ടെ സഹായ​മി​ല്ലാ​തെ ഈ സാഹച​ര്യ​ത്തിൽ പിടി​ച്ചു​നിൽക്കാ​നാ​കി​ല്ലെന്ന്‌ എനിക്ക്‌ അറിയാം.” സഹോ​ദരൻ ഇങ്ങനെ​യും പറയുന്നു: “നിരാ​ശ​യ്‌ക്കെ​തി​രെ പോരാ​ടാൻ വ്യക്തി​പ​ര​മായ പഠനം എന്നെ സഹായി​ക്കു​ന്നുണ്ട്‌. മുമ്പ്‌ ജീവി​ച്ചി​രുന്ന വിശ്വ​സ്‌ത​ദാ​സ​രു​ടെ മാതൃ​ക​യെ​ക്കു​റിച്ച്‌ ഞാൻ ചിന്തി​ക്കും. പ്രശ്‌നങ്ങൾ ഉണ്ടാകു​മ്പോൾ ശാന്തരാ​യി​രുന്ന്‌ യഹോ​വ​യിൽ ആശ്രയി​ക്കേ​ണ്ട​തി​ന്റെ പ്രാധാ​ന്യം കാണി​ക്കുന്ന ധാരാളം വിവര​ണങ്ങൾ ബൈബി​ളി​ലു​ണ്ട​ല്ലോ.”

21. ഈ ലേഖന​ത്തിൽ നമ്മൾ എന്താണു പഠിച്ചത്‌?

²¹ ഈ ലേഖന​ത്തിൽ നമ്മൾ എന്താണു പഠിച്ചത്‌? ഈ ലോക​ത്തിൽ നമുക്ക്‌ അപ്രതീ​ക്ഷി​ത​മാ​യി പല പ്രശ്‌ന​ങ്ങ​ളും നേരി​ട്ടേ​ക്കാം. എങ്കിലും തന്നിൽ ആശ്രയി​ക്കു​ന്ന​വരെ സഹായി​ക്കാൻ യഹോവ എപ്പോ​ഴും കൂടെ​യു​ണ്ടാ​യി​രി​ക്കും. ആധാര​വാ​ക്യം പറയു​ന്ന​തു​പോ​ലെ “നീതി​മാന്‌ അനേകം ദുരി​തങ്ങൾ ഉണ്ടാകു​ന്നു; അതിൽനി​ന്നെ​ല്ലാം യഹോവ അവനെ രക്ഷിക്കു​ന്നു.” (സങ്കീ. 34:19) അതു​കൊണ്ട്‌ പ്രശ്‌ന​ങ്ങ​ളി​ലേക്കല്ല നമ്മളെ താങ്ങി​നി​റു​ത്തുന്ന യഹോ​വ​യു​ടെ ശക്തിയി​ലേക്കു നമുക്കു തുടർന്നും നോക്കാം. അപ്പോൾ അപ്പോ​സ്‌ത​ല​നായ പൗലോ​സി​നെ​പ്പോ​ലെ നമുക്കും പറയാ​നാ​കും: “എല്ലാം ചെയ്യാ​നുള്ള ശക്തി, എന്നെ ശക്തനാ​ക്കുന്ന ദൈവ​ത്തിൽനിന്ന്‌ എനിക്കു കിട്ടുന്നു.”—ഫിലി. 4:13.