വായനക്കാരിൽനിന്നുള്ള ചോദ്യങ്ങൾ
ജനനനിയന്ത്രണമാർഗമായി ഗർഭാശയത്തിൽ നിക്ഷേപിക്കുന്ന ഉപകരണങ്ങൾ (ഐയുഡി) ക്രിസ്ത്യാനികൾക്ക് ഉപയോഗിക്കാമോ?
ഈ വിഷയവുമായി ബന്ധപ്പെട്ട വസ്തുതകളും ബൈബിൾതത്ത്വങ്ങളും ക്രിസ്തീയദമ്പതികൾ വിലയിരുത്തണം. എന്നിട്ട് ദൈവമുമ്പാകെ ഒരു നല്ല മനസ്സാക്ഷി നിലനിറുത്താൻ കഴിയുന്ന വിധത്തിൽ ഒരു തീരുമാനമെടുക്കണം.
ആദ്യം ആദാമിനും ഹവ്വയ്ക്കും, പിന്നീടു നോഹയ്ക്കും കുടുംബത്തിനും യഹോവ ഇങ്ങനെ ഒരു കല്പന കൊടുത്തു: ‘നിങ്ങൾ സന്താനസമൃദ്ധിയുള്ളവരായി പെരുകുക.’ (ഉൽപ. 1:28; 9:1) ക്രിസ്ത്യാനികൾക്ക് ഈ കല്പന ബാധകമാണെന്നു ബൈബിൾ പറയുന്നില്ല. കുടുംബാസൂത്രണത്തിന്റെ ഭാഗമായോ തത്കാലം കുട്ടികൾ വേണ്ടെന്നുവെക്കുന്നതുകൊണ്ടോ ഏതെങ്കിലും തരത്തിലുള്ള ജനനനിയന്ത്രണമാർഗങ്ങൾ സ്വീകരിക്കണോ എന്നത് ഓരോ ദമ്പതികളുടെയും തീരുമാനമാണ്. ഏതെല്ലാം വസ്തുതകളാണ് അവർ കണക്കിലെടുക്കേണ്ടത്?
ക്രിസ്ത്യാനികൾ ജനനനിയന്ത്രണമാർഗങ്ങൾ ഉപയോഗിക്കാൻ തീരുമാനിക്കുന്നതിനു മുമ്പ് ബൈബിൾതത്ത്വങ്ങളുടെ അടിസ്ഥാനത്തിൽ കാര്യങ്ങൾ വിലയിരുത്തണം. ഗർഭച്ഛിദ്രത്തെ ഒരു ജനനനിയന്ത്രണമാർഗമായി ക്രിസ്ത്യാനികൾ കാണുന്നില്ല. ജീവനോട് ആദരവുള്ളവരായിരിക്കാനാണു ബൈബിൾ പറയുന്നത്, അതിന് എതിരാണു ഗർഭച്ഛിദ്രം. മറ്റൊരു മനുഷ്യനായി പിറക്കേണ്ട ഒരു അജാതശിശുവിന്റെ ജീവൻ നശിപ്പിക്കുന്ന വിധത്തിൽ ക്രിസ്ത്യാനികൾ ഒന്നും ചെയ്യില്ല. (പുറ. 20:13; 21:22, 23; സങ്കീ. 139:16; യിരെ. 1:5) അങ്ങനെയെങ്കിൽ, ഐയുഡി ഉപയോഗിക്കുന്നതു ശരിയാണോ?
1979 മെയ് 15 ലക്കം വീക്ഷാഗോപുരത്തിന്റെ (ഇംഗ്ലീഷ്) 30, 31 പേജുകളിൽ ഈ വിഷയത്തെക്കുറിച്ച് ഒരു ലേഖനമുണ്ടായിരുന്നു. ഗർഭധാരണം തടയുന്നതിനു പ്ലാസ്റ്റിക്കുകൊണ്ടുള്ള ഐയുഡി-കളാണ് അക്കാലത്ത് ഉപയോഗിച്ചിരുന്നത്. അവ ഗർഭപാത്രത്തിൽ നിക്ഷേപിച്ചിരുന്നു. ഐയുഡി-കൾ എങ്ങനെയാണു പ്രവർത്തിക്കുന്നതെന്നു കൃത്യമായി അറിയില്ലെന്ന് ആ ലേഖനം പ്രസ്താവിച്ചു. ബീജവും അണ്ഡവും കൂടിച്ചേർന്ന് ബീജസങ്കലനം നടക്കുന്നതിനെ ഐയുഡി-കൾ തടയുന്നെന്നായിരുന്നു അക്കാലത്തെ ചില വിദഗ്ധരുടെ അഭിപ്രായം. ബീജസങ്കലനം നടക്കുന്നില്ലാത്തതുകൊണ്ട് ജീവൻ ഉരുവാകുന്നുമില്ല.
എന്നാൽ, ഐയുഡി ഉള്ളപ്പോഴും ബീജസങ്കലനം നടന്നതായി തെളിവുകളുണ്ട്. ബീജസങ്കലനം നടന്ന ഒരു അണ്ഡം (സിക്താണ്ഡം) ഒന്നുകിൽ അണ്ഡവാഹിനിക്കുഴലിൽ വളർന്നേക്കാം. (ഗർഭാശയത്തിനു വെളിയിലെ ഗർഭധാരണം എന്നാണ് ഇതിനു പറയുന്നത്.) അല്ലെങ്കിൽ അതു ഗർഭപാത്രത്തിലേക്കു സഞ്ചരിച്ചേക്കാം. ഗർഭപാത്രത്തിൽ എത്തുന്ന സിക്താണ്ഡം ഗർഭപാത്രത്തിന്റെ ഭിത്തിയിൽ പറ്റിപ്പിടിക്കുന്നതിനെ ഐയുഡി തടയുന്നു. അങ്ങനെ ആ സിക്താണ്ഡം നശിക്കുന്നു. അതു ഗർഭച്ഛിദ്രത്തിനു തുല്യമാണ്. ഇങ്ങനെ പറഞ്ഞുകൊണ്ടാണ് ആ ലേഖനം അവസാനിച്ചത്: “ഐയുഡി ഉപയോഗിക്കുന്നതിനെക്കുറിച്ച് ചിന്തിക്കുന്ന ആത്മാർഥതയുള്ള ഒരു ക്രിസ്ത്യാനി അക്കാര്യം ജീവനു ബൈബിൾ കല്പിക്കുന്ന മൂല്യത്തിന്റെ വെളിച്ചത്തിൽ തൂക്കിനോക്കേണ്ടതാണ്.”—1979-ൽ ആ ലേഖനം പ്രസിദ്ധീകരിച്ചതിനു ശേഷം ഇക്കാര്യത്തിൽ ശാസ്ത്രീയമോ വൈദ്യശാസ്ത്രപരമോ ആയ എന്തെങ്കിലും പുരോഗതി ഉണ്ടായിട്ടുണ്ടോ?
രണ്ടു പുതിയ തരം ഐയുഡി-കൾ ഇപ്പോൾ നിലവിലുണ്ട്. അതിൽ ഒന്നിന്റെ പ്രധാനഘടകം ചെമ്പാണ്. 1988 ആയപ്പോഴേക്കും അത് അമേരിക്കൻ ഐക്യനാടുകളിൽ വ്യാപകമായി ഉപയോഗിച്ചുതുടങ്ങിയിരുന്നു. കൂടാതെ, ഒരുതരം ഹോർമോൺ ഉത്പാദിപ്പിക്കുന്ന ഐയുഡി-യും 2001-ൽ വിപണിയിൽ വന്നു. ഈ രണ്ടു തരം ഐയുഡി-കളുടെയും പ്രവർത്തനത്തെക്കുറിച്ച് നമുക്ക് എന്ത് അറിയാം?
ചെമ്പ്: നേരത്തേ പറഞ്ഞതുപോലെ, ബീജം ഗർഭപാത്രത്തിലൂടെ സഞ്ചരിച്ച് അണ്ഡത്തിന്റെ അടുത്ത് എത്തുന്നതിനെ ഐയുഡി-കൾ തടയുന്നു. ചെമ്പ് പ്രധാനഘടകമായ ഐയുഡി-കളിലെ ചെമ്പ് ബീജത്തിനു ഹാനികരമാണ്. അങ്ങനെ അത് ഒരു ബീജനാശിനിയായി പ്രവർത്തിക്കുന്നു. * കൂടാതെ, ചെമ്പ് അടങ്ങിയ ഐയുഡി-കൾ ഗർഭാശയഭിത്തിയിലും മാറ്റങ്ങൾ വരുത്തുന്നെന്നാണു പറയപ്പെടുന്നത്.
ഹോർമോൺ: ജനനനിയന്ത്രണഗുളികകളിൽ കാണുന്നതിനു സമാനമായ ഹോർമോൺ അടങ്ങിയ പലതരം ഐയുഡി-കളുണ്ട്. ഇതു പഴയ ഐയുഡി-കൾ പോലെതന്നെ പ്രവർത്തിക്കും. കൂടാതെ, ഇവയ്ക്കു മറ്റു ചില സവിശേഷതകളുമുണ്ട്. ഗർഭാശയത്തിൽ ഹോർമോൺ ഉത്പാദിപ്പിക്കുന്ന ഈ ഐയുഡി-കൾ ചില സ്ത്രീകളിൽ അണ്ഡോത്പാദനം തടസ്സപ്പെടുത്തുന്നു, അങ്ങനെ വരുമ്പോൾ ബീജസങ്കലനം നടക്കില്ല. എന്നാൽ ഈ ഹോർമോൺ ഇതു മാത്രമല്ല ചെയ്യുന്നത്. അതു ഗർഭാശയഭിത്തിയുടെ കട്ടി കുറയ്ക്കുകയും ചെയ്യുന്നു. * കൂടാതെ, ഇതു ഗർഭാശയമുഖത്ത് രൂപംകൊള്ളുന്ന കട്ടിയുള്ള ശ്ലേഷ്മത്തിന്റെ സാന്ദ്രത വർധിപ്പിക്കുന്നു. അങ്ങനെ യോനീനാളത്തിലൂടെ ഗർഭപാത്രത്തിലേക്കു ബീജം സഞ്ചരിക്കുന്നതിന് ആ ശ്ലേഷ്മം ഒരു തടയായി നിൽക്കുന്നു.
നമ്മൾ മനസ്സിലാക്കിയതുപോലെ വിപണിയിൽ പുതിയതായി വന്ന രണ്ട് ഐയുഡി-കളും ഗർഭാശയഭിത്തിയിൽ മാറ്റങ്ങൾ ഉണ്ടാക്കുന്നതായി കരുതപ്പെടുന്നു. ഇനി അഥവാ, അണ്ഡം ഉത്പാദിപ്പിക്കപ്പെടുകയും ബീജസങ്കലനം നടക്കുകയും ചെയ്യുന്നെങ്കിലോ? അതു ഗർഭാശയത്തിൽ പ്രവേശിച്ചേക്കാം. പക്ഷേ, കട്ടി കുറഞ്ഞ ഗർഭാശയഭിത്തിയിൽ പറ്റിപ്പിടിക്കാൻ അതിനു സാധിക്കില്ല. അങ്ങനെ ഗർഭധാരണത്തിന്റെ തുടക്കത്തിൽത്തന്നെ സിക്താണ്ഡം നശിക്കാൻ ഇടയാകും. ഇത്തരം സാഹചര്യങ്ങൾ വളരെ വിരളമായേ സംഭവിക്കാറുള്ളൂ എന്നാണ് കരുതപ്പെടുന്നത്, ഗർഭനിരോധനഗുളികകളുടെ കാര്യത്തിലെന്നപോലെതന്നെ.
അതുകൊണ്ട് ചെമ്പോ ഹോർമോണോ അടങ്ങിയ ഐയുഡി-കൾ ബീജസങ്കലനം നടക്കുന്നത് എപ്പോഴും തടയുമെന്ന് ആർക്കും ഉറപ്പിച്ചുപറയാനാകില്ല. എങ്കിലും, ഐയുഡി-കൾ വ്യത്യസ്തവിധങ്ങളിൽ പ്രവർത്തിക്കുന്നെന്നു നമ്മൾ കണ്ടു. ഐയുഡി-കൾ ഉപയോഗിച്ചാൽ ഗർഭിണിയാകാനുള്ള സാധ്യത വളരെ കുറവാണെന്ന് ഈ ശാസ്ത്രീയതെളിവുകൾ സൂചിപ്പിക്കുന്നു.
ഐയുഡി ഉപയോഗിക്കുന്നതിനെക്കുറിച്ച് ചിന്തിക്കുന്ന ക്രിസ്തീയദമ്പതികൾ, പ്രാദേശികമായി ലഭ്യമായിരിക്കുന്ന ഐയുഡി-കളെപ്പറ്റിയും അതിന്റെ ഗുണങ്ങളെയും ഭാര്യക്കുണ്ടായേക്കാവുന്ന ദോഷങ്ങളെയും കുറിച്ചും ഡോക്ടറോടു ചോദിക്കാൻ ആഗ്രഹിച്ചേക്കാം. എന്നാൽ ഡോക്ടറോ മറ്റാരെങ്കിലുമോ അവർക്കുവേണ്ടി ഒരു തീരുമാനമെടുക്കണമെന്നു പ്രതീക്ഷിക്കരുത്, അതിന് അനുവദിക്കുകയും അരുത്. (റോമ. 14:12; ഗലാ. 6:4, 5) അത് ഓരോ ദമ്പതികളുടെയും തീരുമാനമാണ്. അവർ ദൈവത്തെ പ്രസാദിപ്പിക്കുന്നതും ദൈവമുമ്പാകെ ശുദ്ധമായ ഒരു മനസ്സാക്ഷി കാത്തുസൂക്ഷിക്കാൻ സഹായിക്കുന്നതും ആയ ഒരു തീരുമാനമെടുക്കണം.—1 തിമൊഥെയൊസ് 1:18, 19-ഉം 2 തിമൊഥെയൊസ് 1:3-ഉം താരതമ്യം ചെയ്യുക.
^ ഖ. 4 ഇംഗ്ലണ്ടിന്റെ ദേശീയ ആരോഗ്യസമിതി പുറത്തിറക്കിയ ഒരു പുസ്തകം ഇങ്ങനെ റിപ്പോർട്ട് ചെയ്തു: “ചെമ്പിന്റെ അളവ് കൂടുതലുള്ള ഐയുഡി-കൾ 99 ശതമാനത്തിലധികം ഫലപ്രദമാണ്. അതായത്, അത്തരം ഐയുഡി ഉപയോഗിക്കുന്ന സ്ത്രീകളിൽ ഒരു ശതമാനത്തിൽ താഴെ മാത്രമേ ഒരു വർഷത്തിനുള്ളിൽ ഗർഭിണികളാകാറുള്ളൂ. ചെമ്പിന്റെ അളവ് കുറവുള്ള ഐയുഡി-കൾ അത്ര ഫലം ചെയ്യില്ല.”
^ ഖ. 5 ഹോർമോൺ അടങ്ങിയ ഐയുഡി-കൾ ഗർഭാശയഭിത്തിയുടെ കട്ടി കുറയ്ക്കുന്നതിനാൽ ആർത്തവരക്തസ്രാവം നിയന്ത്രിക്കുന്നതിനു വിവാഹിതരും അല്ലാത്തവരും ആയ സ്ത്രീകൾക്ക് ഡോക്ടർമാർ ഇതു നിർദേശിക്കാറുണ്ട്.