മറ്റുള്ള​വർക്ക്‌ ഇഷ്ടപ്പെട്ട നല്ലൊരു സമ്മാനം ഏതാ​ണെന്ന്‌ തീരു​മാ​നി​ക്കുക എളുപ്പ​മുള്ള പണിയല്ല. കാരണം, സമ്മാനം സ്വീക​രി​ക്കുന്ന വ്യക്തി​യാണ്‌ യഥാർഥ​ത്തിൽ അതിന്റെ മൂല്യം നിശ്ചയി​ക്കു​ന്നത്‌. ഒരു വ്യക്തിക്ക്‌ ഏറ്റവും നല്ലതായി തോന്നു​ന്നത്‌ മറ്റൊരു വ്യക്തിക്ക്‌ അങ്ങനെ ആയിരി​ക്ക​ണ​മെ​ന്നില്ല.

ഉദാഹ​ര​ണ​ത്തിന്‌, കൗമാ​ര​പ്രാ​യ​ത്തി​ലുള്ള കുട്ടികൾ ആധുനിക ഇലക്‌​ട്രോ​ണിക്‌ ഉപകര​ണങ്ങൾ ഒരു നല്ല സമ്മാന​മാ​യി കാണുന്നു. അതേസ​മയം, ഒരു മുതിർന്ന വ്യക്തി കുടും​ബ​ത്തിൽനിന്ന്‌ പാരമ്പ​ര്യ​മാ​യി ലഭിക്കുന്ന പൈതൃ​ക​സ്വ​ത്തി​നെ അമൂല്യ​സ​മ്മാ​ന​മാ​യി കണക്കാ​ക്കു​ന്നു. ചില സംസ്‌കാ​ര​ങ്ങ​ളിൽ, ചെറു​പ്പ​ക്കാ​രും പ്രായ​മാ​യ​വ​രും മികച്ച സമ്മാന​മാ​യി കണക്കാ​ക്കു​ന്നത്‌ പണത്തെ​യാണ്‌. അതാകു​മ്പോൾ അവരവർ ആഗ്രഹി​ക്കുന്ന കാര്യങ്ങൾ വാങ്ങി​ക്കാ​നാ​കും.

കാര്യം അൽപ്പം ബുദ്ധി​മു​ട്ടാ​ണെ​ങ്കി​ലും തങ്ങൾക്കു വേണ്ട​പ്പെ​ട്ട​വർക്ക്‌ നല്ല ഒരു സമ്മാനം കൊടു​ക്ക​ണ​മെന്ന്‌ ആഗ്രഹ​മു​ള്ള​വ​രാണ്‌ പലരും. നന്നായി ചിന്തിച്ച്‌ തങ്ങളുടെ പ്രിയ​പ്പെട്ട വ്യക്തിക്ക്‌ അനു​യോ​ജ്യ​മായ സമ്മാനം ഏതാ​ണെന്ന്‌ തിരഞ്ഞു​ക​ണ്ടു​പി​ടി​ക്കാൻ അവർ താത്‌പ​ര്യ​പ്പെ​ടു​ന്നു. എല്ലായ്‌പോ​ഴും അതത്ര എളുപ്പ​മ​ല്ലെ​ങ്കി​ലും ചില കാര്യങ്ങൾ മനസ്സിൽ പിടി​ക്കു​ന്നത്‌ ഉചിത​മായ സമ്മാനം തിര​ഞ്ഞെ​ടു​ക്കാൻ നിങ്ങളെ സഹായി​ക്കും. സമ്മാനം സ്വീക​രി​ക്കുന്ന വ്യക്തിക്ക്‌ സംതൃ​പ്‌തി നൽകുന്ന സമ്മാനം​തന്നെ കൊടു​ക്കാൻ നിങ്ങൾക്ക്‌ എങ്ങനെ കഴിയും? അതിനുള്ള നാലു വഴികൾ നോക്കാം.

സ്വീക​രി​ക്കു​ന്ന​യാ​ളു​ടെ ആഗ്രഹങ്ങൾ. ഉത്തര അയർലൻഡി​ലെ ബെൽഫാ​സ്റ്റി​ലുള്ള ഒരാൾക്ക്‌ പത്തോ പതി​നൊ​ന്നോ വയസ്സു​ള്ള​പ്പോൾ ഒരു റേസിംഗ്‌ സൈക്കിൾ സമ്മാന​മാ​യി ലഭിച്ചു. തനിക്കു ലഭിച്ച​തിൽ വെച്ച്‌ ഏറ്റവും നല്ല സമ്മാനം അതായി​രു​ന്നെന്ന്‌ അദ്ദേഹം പറഞ്ഞു. കാരണം അങ്ങനെ​യൊ​രു സമ്മാനം അദ്ദേഹം ശരിക്കും ആഗ്രഹി​ച്ചി​രു​ന്നു. ഒരു സമ്മാനം പ്രിയ​പ്പെ​ടു​മോ ഇല്ലയോ എന്നത്‌ ഒരു വ്യക്തി​യു​ടെ ആഗ്രഹ​വു​മാ​യി ബന്ധപ്പെ​ട്ട​താണ്‌. അതാണ്‌ ആ അഭി​പ്രാ​യ​ത്തിൽനിന്ന്‌ നമുക്ക്‌ മനസ്സി​ലാ​ക്കാ​നാ​കു​ന്നത്‌. അതു​കൊണ്ട്‌ സമ്മാനം കൊടു​ക്കാൻ ആഗ്രഹി​ക്കുന്ന വ്യക്തി​യെ​ക്കു​റിച്ച്‌ നന്നായി ചിന്തി​ക്കുക. അദ്ദേഹം ഏറെ മൂല്യ​വ​ത്താ​യി കാണു​ന്നത്‌ എന്താ​ണെന്ന്‌ തിരി​ച്ച​റി​യാൻ ശ്രമി​ക്കുക. കാരണം അതായി​രി​ക്കും മിക്ക​പ്പോ​ഴും അദ്ദേഹ​ത്തി​ന്റെ ആഗ്രഹ​ങ്ങളെ സ്വാധീ​നി​ക്കു​ന്നത്‌. ഉദാഹ​ര​ണ​ത്തിന്‌, കുടും​ബ​ത്തോ​ടൊ​പ്പം സമയം ചെലവ​ഴി​ക്കു​ന്ന​തി​നെ മുത്തശ്ശീ​മു​ത്ത​ശ്ശ​ന്മാർ വളരെ മൂല്യ​വ​ത്താ​യി കാണുന്നു. കുട്ടി​ക​ളെ​യും പേരക്കു​ട്ടി​ക​ളെ​യും കാണണ​മെന്ന ആഗ്രഹ​മാ​യി​രി​ക്കും മിക്ക​പ്പോ​ഴും അവർക്ക്‌ ഉണ്ടായി​രി​ക്കുക. അങ്ങനെ​യാ​കു​മ്പോൾ കുടും​ബം ഒത്തൊ​രു​മിച്ച്‌ അവധി​ക്കാ​ലം ചെലവി​ടു​ന്ന​താ​യി​രി​ക്കും മറ്റ്‌ ഏതൊരു സമ്മാന​ത്തെ​ക്കാ​ളും അവർ പ്രിയ​പ്പെ​ടാൻ സാധ്യത.

ഒരു വ്യക്തി​യു​ടെ ആഗ്രഹങ്ങൾ എന്താ​ണെന്ന്‌ അറിയാ​നുള്ള ഒരു എളുപ്പ​വഴി നല്ലൊരു ശ്രോ​താ​വാ​യി​രി​ക്കുക എന്നതാണ്‌. ബൈബിൾ നമ്മളെ ഇങ്ങനെ പ്രോ​ത്സാ​ഹി​പ്പി​ക്കു​ന്നു: “കേൾക്കാൻ തിടു​ക്ക​മു​ള്ള​വ​രാ​യി​രി​ക്കണം; എന്നാൽ സംസാ​രി​ക്കാൻ തിടുക്കം കൂട്ടരുത്‌.” (യാക്കോബ്‌ 1:19) നിങ്ങളു​ടെ സുഹൃ​ത്തു​ക്ക​ളോ​ടും ബന്ധുക്ക​ളോ​ടും ഒക്കെ ദിവസ​വും സംസാ​രി​ക്കു​മ്പോൾ അവരുടെ ഇഷ്ടാനി​ഷ്ടങ്ങൾ എന്തൊ​ക്കെ​യാ​ണെന്ന്‌ മനസ്സി​ലാ​ക്കാൻ  സഹായി​ക്കുന്ന സൂചനകൾ എന്തെങ്കി​ലും കിട്ടു​ന്നു​ണ്ടോ എന്നതിനു പ്രത്യേ​കം ശ്രദ്ധ കൊടു​ക്കുക. അപ്പോൾ അവർക്ക്‌ ഇഷ്ടപ്പെ​ടുന്ന ഒരു നല്ല സമ്മാനം നൽകാൻ നിങ്ങൾക്ക്‌ കഴി​ഞ്ഞേ​ക്കും.

സ്വീക​രി​ക്കു​ന്ന​യാ​ളു​ടെ ആവശ്യങ്ങൾ. ഒരു സമ്മാനം, അത്‌ അത്ര വിലപി​ടി​പ്പു​ള്ള​ത​ല്ലെ​ങ്കിൽപ്പോ​ലും ഒരു വ്യക്തി​യു​ടെ ഒരു പ്രത്യേക ആവശ്യം നിറ​വേ​റ്റു​ന്നെ​ങ്കിൽ അദ്ദേഹം അതിനെ വളരെ മൂല്യ​വ​ത്താ​യി വീക്ഷി​ച്ചേ​ക്കാം. മറ്റൊ​രാ​ളു​ടെ ആവശ്യങ്ങൾ എന്തൊ​ക്കെ​യാ​ണെന്ന്‌ എങ്ങനെ അറിയാൻ കഴിയും?

ആ വ്യക്തി​യോ​ടു​തന്നെ അദ്ദേഹ​ത്തി​ന്റെ ആവശ്യ​ങ്ങ​ളോ ആഗ്രഹ​ങ്ങ​ളോ ചോദിച്ച്‌ മനസ്സി​ലാ​ക്കു​ന്ന​താണ്‌ അതിനുള്ള എളുപ്പ​വഴി എന്നു തോന്നി​യേ​ക്കാം. പക്ഷേ ഇങ്ങനെ ചെയ്യു​ന്നത്‌ സമ്മാനം കൊടു​ക്കുന്ന പലരു​ടെ​യും സന്തോഷം കളയുന്നു. കാരണം സമ്മാനം സ്വീക​രി​ക്കുന്ന ആളിനെ അവർക്ക്‌ ഏറ്റവും ഇഷ്ടപ്പെ​ടുന്ന സമ്മാനം കൊടുത്ത്‌ അമ്പരപ്പി​ക്കാ​നാണ്‌ മിക്ക​പ്പോ​ഴും അവർ ആഗ്രഹി​ക്കു​ന്നത്‌. ഇതു മാത്രമല്ല, ചില ആളുകൾ അവരുടെ ഇഷ്ടാനി​ഷ്ട​ങ്ങ​ളെ​ക്കു​റിച്ച്‌ പറയാൻ മടിയി​ല്ലാ​ത്ത​വ​രാ​ണെ​ങ്കി​ലും അവരുടെ ആവശ്യങ്ങൾ എന്താ​ണെന്ന്‌ ചോദി​ച്ചാൽ അവർ മൗനം പാലി​ച്ചേ​ക്കാം.

അതു​കൊണ്ട്‌ നല്ലൊരു നിരീ​ക്ഷ​ക​നാ​യി​രി​ക്കുക. വ്യക്തി​യു​ടെ സാഹച​ര്യ​ങ്ങളെ പ്രത്യേ​കം കണക്കി​ലെ​ടു​ക്കുക. നിങ്ങൾ സമ്മാനം കൊടു​ക്കു​ന്ന​യാൾ ചെറു​പ്പ​മാ​ണോ പ്രായ​മു​ള്ള​യാ​ളാ​ണോ വിവാഹം കഴിക്കാ​ത്ത​യാ​ളാ​ണോ വിവാഹം കഴിഞ്ഞ​യാ​ളാ​ണോ വിവാ​ഹ​മോ​ചനം നേടിയ ആളാണോ, വിധവ​യോ വിഭാ​ര്യ​നോ ആണോ, ജോലി​യു​ണ്ടോ അതോ വിരമി​ച്ചോ? നിങ്ങളു​ടെ മനസ്സി​ലുള്ള വ്യക്തി​യു​ടെ ആവശ്യം എന്തായി​രി​ക്കും എന്നു സമയ​മെ​ടുത്ത്‌ ചിന്തി​ക്കുക.

നിങ്ങൾ സമ്മാനം കൊടു​ക്കാൻ ആഗ്രഹി​ക്കുന്ന വ്യക്തി​യു​ടെ ആവശ്യ​ങ്ങ​ളെ​ക്കു​റി​ച്ചുള്ള ഉൾക്കാഴ്‌ച നേടു​ന്ന​തിന്‌ ഇതു​പോ​ലുള്ള സാഹച​ര്യ​ങ്ങ​ളിൽ ആയിരുന്ന മറ്റുള്ള​വ​രോ​ടു കാര്യങ്ങൾ ചോദിച്ച്‌ മനസ്സി​ലാ​ക്കുക. മറ്റുള്ള​വർക്ക്‌ പ്രത്യ​ക്ഷ​ത്തിൽ നന്നായി അറിയാൻ കഴിയാത്ത ചില പ്രത്യേക ആവശ്യ​ങ്ങ​ളെ​ക്കു​റിച്ച്‌ പറഞ്ഞു​ത​രാൻ അവർക്ക്‌ കഴി​ഞ്ഞേ​ക്കും. അവരുടെ നിർദേ​ശങ്ങൾ കേൾക്കു​ന്നത്‌, മറ്റാരും ചിന്തി​ച്ചി​ട്ടു​പോ​ലു​മി​ല്ലാത്ത ചില സമ്മാനങ്ങൾ കൊടു​ക്കാൻ നിങ്ങളെ സഹായി​ക്കും.

കൊടു​ക്കേണ്ട സമയം. ബൈബിൾ പറയുന്നു: “തക്കസമ​യത്ത്‌ പറയുന്ന വാക്ക്‌ എത്ര നല്ലത്‌!” (സുഭാ​ഷി​തങ്ങൾ 15:23) പറയേണ്ട കാര്യം പറയേണ്ട സമയത്ത്‌ പറയേ​ണ്ട​തി​ന്റെ പ്രാധാ​ന്യം ഈ പ്രസ്‌താ​വന പ്രദീ​പ്‌ത​മാ​ക്കു​ന്നു. നമ്മുടെ പ്രവൃ​ത്തി​യു​ടെ കാര്യ​ത്തി​ലും ഇത്‌ സത്യമാണ്‌. തക്കസമ​യത്ത്‌ പറയുന്ന വാക്ക്‌ കേൾക്കുന്ന വ്യക്തിക്ക്‌ പ്രോ​ത്സാ​ഹനം പകരു​ന്ന​തു​പോ​ലെ കൃത്യ​മായ സമയത്ത്‌ അല്ലെങ്കിൽ ഉചിത​മായ അവസര​ത്തിൽ കൊടു​ക്കുന്ന സമ്മാനം അത്‌ സ്വീക​രി​ക്കുന്ന വ്യക്തി​യു​ടെ സന്തോഷം വർധി​പ്പി​ക്കു​ന്നു.

സുഹൃ​ത്തി​ന്റെ കല്യാണം വരുന്നു. ഒരു ചെറു​പ്പ​ക്കാ​രൻ സ്‌കൂൾ പഠനം പൂർത്തി​യാ​ക്കാൻ പോകു​ന്നു. നവദമ്പ​തി​കൾ ഒരു കുഞ്ഞിനു വേണ്ടി കാത്തി​രി​ക്കു​ന്നു. സമ്മാനം കൊടു​ക്കാൻ പറ്റിയ ചില അവസര​ങ്ങ​ളാണ്‌ ഇതെല്ലാം. അടുത്ത വർഷം നടക്കാൻ പോകുന്ന ഇതു​പോ​ലുള്ള ചില പ്രത്യേക അവസര​ങ്ങ​ളു​ടെ ഒരു പട്ടിക തയ്യാറാ​ക്കി​വെ​ക്കു​ന്നത്‌ പ്രാ​യോ​ഗി​ക​മാ​ണെന്ന്‌ പലരും കണ്ടെത്തി​യി​രി​ക്കു​ന്നു. അങ്ങനെ ഓരോ അവസര​ത്തി​നും ഇണങ്ങുന്ന നല്ല സമ്മാനങ്ങൾ കൊടു​ക്കാൻ അവർക്ക്‌ മുന്നമേ ആസൂ​ത്രണം ചെയ്യാ​നാ​കു​ന്നു. a

സമ്മാനം കൊടു​ക്കു​ന്ന​തി​നാ​യി ഏതെങ്കി​ലും പ്രത്യേക അവസര​ങ്ങൾക്കാ​യി നോക്കി​യി​രി​ക്കേ​ണ്ട​തില്ല. കൊടു​ക്കു​ന്ന​തി​ന്റെ സന്തോഷം എപ്പോൾ വേണ​മെ​ങ്കി​ലും നമുക്ക്‌ ആസ്വദി​ക്കാ​വു​ന്ന​താണ്‌. എന്നാൽ മനസ്സിൽ പിടി​ക്കേണ്ട ചില കാര്യ​ങ്ങ​ളുണ്ട്‌. ഉദാഹ​ര​ണ​ത്തിന്‌, ഒരു ചെറു​പ്പ​ക്കാ​രൻ കാരണ​മൊ​ന്നും കൂടാതെ ഒരു സമ്മാനം ചെറു​പ്പ​ക്കാ​രി​യായ ഒരു പെൺകു​ട്ടിക്ക്‌ കൊടു​ത്താൽ ആ ചെറു​പ്പ​ക്കാ​രന്‌ തന്നോട്‌ എന്തോ പ്രത്യേക താത്‌പ​ര്യം ഉണ്ടെന്ന്‌ ആ പെൺകു​ട്ടി ചിന്തി​ച്ചേ​ക്കാം. അങ്ങനെ​യൊ​രു ഉദ്ദേശ്യം ഇല്ലാതി​രി​ക്കെ അത്തരത്തി​ലുള്ള ഒരു സമ്മാനം കൊടു​ത്താൽ അത്‌ കൂടുതൽ തെറ്റി​ദ്ധാ​ര​ണ​കൾക്കും പ്രശ്‌ന​ങ്ങൾക്കും വഴി വെച്ചേ​ക്കാം. ഇത്‌ ഈ വിഷയ​ത്തി​ന്റെ മറ്റൊരു വശം ചിന്തി​ക്കേ​ണ്ട​തി​ന്റെ പ്രാധാ​ന്യ​ത്തിന്‌ അടിവ​ര​യി​ടു​ന്നു​—കൊടു​ക്കുന്ന വ്യക്തി​യു​ടെ ആന്തരം.

കൊടു​ക്കു​ന്ന​വ​രു​ടെ ആന്തരം. മുകളി​ലെ ഉദാഹ​ര​ണ​ത്തി​ലേ​തു​പോ​ലെ സമ്മാനം സ്വീക​രിച്ച ആൾ അത്‌ തന്ന ആളുടെ ആന്തരത്തെ ചോദ്യം ചെയ്യാൻ സാധ്യ​ത​യു​ണ്ടോ എന്നു ചിന്തി​ക്കു​ന്നത്‌ നല്ലതാണ്‌. അതേസ​മയം സമ്മാനം കൊടു​ക്കുന്ന വ്യക്തി തന്റെ ആന്തരം എന്താ​ണെന്നു നന്നായി പരി​ശോ​ധി​ക്കു​ക​യും വേണം. നല്ല ഉദ്ദേശ്യ​ത്തോ​ടെ​യാണ്‌ തങ്ങൾ സമ്മാനങ്ങൾ കൊടു​ക്കു​ന്നത്‌ എന്നു ചിന്തി​ക്കാ​നാണ്‌ മിക്ക ആളുക​ളും താത്‌പ​ര്യ​പ്പെ​ടു​ന്നത്‌. എങ്കിലും ചിലർ ഒരു വർഷത്തി​ലെ ഏതെങ്കി​ലും ഒരു പ്രത്യേക സമയത്ത്‌ സമ്മാനങ്ങൾ കൊടു​ക്കാൻ തീരു​മാ​നി​ക്കു​ന്നത്‌ അവർ അതിനു നിർബ​ന്ധി​ത​രാ​കു​ന്ന​തു​കൊ​ണ്ടാണ്‌. വേറെ ചിലരാ​കട്ടെ സമ്മാനം കൊടു​ത്ത​തി​ന്റെ പേരിൽ തങ്ങൾക്കു പ്രത്യേക പരിഗണന ലഭിക്ക​ണ​മെ​ന്നോ ഇതു​പോ​ലൊ​രു സമ്മാനം തിരിച്ച്‌ ലഭിക്ക​ണ​മെ​ന്നോ ഉള്ള ആഗ്രഹം​കൊ​ണ്ടാണ്‌ അങ്ങനെ ചെയ്യു​ന്നത്‌.

സമ്മാനം കൊടു​ക്കു​ന്നത്‌ നല്ല ആന്തര​ത്തോ​ടെ​യാ​ണെന്ന്‌ ഉറപ്പു​വ​രു​ത്താൻ നിങ്ങൾക്ക്‌ എന്തു ചെയ്യാൻ കഴിയും? ബൈബിൾ പറയുന്നു: “ചെയ്യു​ന്ന​തെ​ല്ലാം സ്‌നേ​ഹ​ത്തോ​ടെ ചെയ്യുക.” (1 കൊരി​ന്ത്യർ 16:14) യഥാർഥ സ്‌നേ​ഹ​വും, സമ്മാനം സ്വീക​രി​ക്കുന്ന വ്യക്തി​യോ​ടുള്ള താത്‌പ​ര്യ​വും ആണ്‌ ഒരു സമ്മാനം കൊടു​ക്കാൻ നിങ്ങളെ പ്രേരി​പ്പി​ക്കു​ന്ന​തെ​ങ്കിൽ അവർ അത്‌ സന്തോ​ഷ​ത്തോ​ടെ സ്വീക​രി​ക്കും. കൂടാതെ, ഉദാര​മ​ന​സ്സോ​ടെ കൊടു​ക്കു​ന്ന​തി​ന്റെ സന്തോഷം നിങ്ങൾക്ക്‌ അനുഭ​വി​ച്ച​റി​യാ​നും കഴിയും. മാത്രമല്ല നിങ്ങൾ ഹൃദയ​ത്തിൽനിന്ന്‌ കൊടു​ക്കു​മ്പോൾ അത്‌ നമ്മുടെ സ്വർഗീയ പിതാ​വി​നെ​യും  സന്തോ​ഷി​പ്പി​ക്കും. അപ്പോ​സ്‌ത​ല​നായ പൗലോസ്‌ ഒരിക്കൽ പറഞ്ഞു: “സന്തോ​ഷ​ത്തോ​ടെ കൊടു​ക്കു​ന്ന​വ​രെ​യാ​ണു ദൈവം സ്‌നേ​ഹി​ക്കു​ന്നത്‌.” പുരാതന കൊരി​ന്തി​ലുള്ള ക്രിസ്‌ത്യാ​നി​കൾ യഹൂദ്യ​യി​ലെ ക്രിസ്‌ത്യാ​നി​കളെ സഹായി​ക്കു​ന്ന​തി​നു​വേണ്ടി ഉദാര​മ​ന​സ്‌ക​ത​യോ​ടും സന്തോ​ഷ​ത്തോ​ടും കൂടി ദുരി​താ​ശ്വാ​സ പ്രവർത്ത​ന​ങ്ങ​ളിൽ ഏർപ്പെട്ടു. അവരെ അഭിന​ന്ദി​ച്ചു​കൊ​ണ്ടാണ്‌ അപ്പോ​സ്‌ത​ല​നായ പൗലോസ്‌ അങ്ങനെ പറഞ്ഞത്‌.​—2 കൊരി​ന്ത്യർ 9:7.

നമ്മൾ ഇതുവരെ ചിന്തിച്ച വിവര​ങ്ങൾക്ക്‌ അനുസ​രിച്ച്‌ പ്രവർത്തി​ക്കു​ന്നെ​ങ്കിൽ മറ്റുള്ള​വരെ സന്തോ​ഷി​പ്പി​ക്കുന്ന സമ്മാനങ്ങൾ കൊടു​ക്കാൻ നമുക്കു കഴിയും. ഇവയും മറ്റു കാര്യ​ങ്ങ​ളും മനുഷ്യ​വർഗ​ത്തി​നു വേണ്ടി​യുള്ള ഏറ്റവും വലിയ സമ്മാനം നൽകാ​നുള്ള ദൈവ​ത്തി​ന്റെ ക്രമീ​ക​ര​ണ​ത്തിൽ പങ്കു വഹിച്ചി​ട്ടുണ്ട്‌. ആ വലിയ സമ്മാനം എന്താ​ണെന്നു മനസ്സി​ലാ​ക്കാൻ അടുത്ത ലേഖനം വായി​ക്കാൻ ഞങ്ങൾ നിങ്ങളെ ക്ഷണിക്കു​ന്നു.