നിങ്ങൾ ഒരു വഴിയി​ലൂ​ടെ നടക്കു​ക​യാ​ണെന്നു ചിന്തി​ക്കുക. സൂര്യൻ അസ്‌ത​മി​ച്ചി​രി​ക്കു​ന്നു. സന്ധ്യ മയങ്ങി​യിട്ട് നേരം ഏറെയാ​യി. വഴിയി​ലെ​ങ്ങും ഇരുട്ടാണ്‌. എന്നാൽ നിങ്ങൾക്ക് പേടി തോന്നു​ന്നില്ല. കാരണം, നിങ്ങളു​ടെ കൈയിൽ നല്ല വെളി​ച്ച​മുള്ള ഒരു ടോർച്ചുണ്ട്. അതിന്‍റെ ശക്തമായ വെളി​ച്ച​ത്തിൽ തൊട്ടു​മു​മ്പി​ലു​ള്ളത്‌ നിങ്ങൾക്കു വ്യക്തമാ​യി കാണാം. കുറെ ദൂരേ​ക്കുള്ള വഴി കാണാ​നും അതു നിങ്ങളെ സഹായി​ക്കു​ന്നു.

ഒരർഥ​ത്തിൽ ബൈബി​ളും ഒരു ടോർച്ചു​പോ​ലെ​യാണ്‌. മുൻലേ​ഖ​ന​ങ്ങ​ളിൽ നമ്മൾ കണ്ടതു​പോ​ലെ നമ്മുടെ തൊട്ടു​മു​മ്പി​ലുള്ള പ്രശ്‌നങ്ങൾ അഥവാ ഈ അനിശ്ചി​ത​ലോ​ക​ത്തിൽ നമുക്കു ദിവസ​വു​മു​ണ്ടാ​കുന്ന പ്രശ്‌നങ്ങൾ നേരി​ടാൻ ദൈവ​വ​ചനം നമ്മളെ സഹായി​ക്കു​ന്നു. എന്നാൽ ഇതിലും ഏറെ കാര്യങ്ങൾ ബൈബി​ളി​നു പറയാ​നുണ്ട്. ഭാവി​യെ​ക്കു​റിച്ച് തെളി​മ​യു​ള്ളൊ​രു വീക്ഷണം ബൈബിൾ നൽകുന്നു. നിലനിൽക്കുന്ന സന്തോ​ഷ​വും സംതൃ​പ്‌തി​യും തരുന്ന പാത കണ്ടെത്താ​നും അതിലൂ​ടെ ചരിക്കാ​നും ബൈബിൾ സഹായി​ക്കു​ന്നു. (സങ്കീർത്തനം 119:105) അത്‌ എങ്ങനെ​യാണ്‌?

ഭാവി​യി​ലേ​ക്കു പ്രതീ​ക്ഷ​യോ​ടെ നോക്കാൻ ബൈബിൾ നമ്മളെ പ്രാ​യോ​ഗി​ക​മാ​യി സഹായി​ക്കുന്ന രണ്ടു വിധങ്ങൾ നമുക്ക് ഇപ്പോൾ നോക്കാം: 1. ജീവി​ത​ത്തി​ന്‍റെ ലക്ഷ്യം കണ്ടെത്താൻ ബൈബിൾ നമ്മളെ സഹായി​ക്കു​ന്നു, 2. സ്രഷ്ടാ​വു​മാ​യി നിലനിൽക്കുന്ന ഒരു സുഹൃ​ദ്‌ബന്ധം എങ്ങനെ വളർത്തി​യെ​ടു​ക്കാ​മെന്ന് അത്‌ പഠിപ്പി​ക്കു​ന്നു.

നമ്മുടെ പ്രശ്‌നങ്ങൾ കൈകാ​ര്യം ചെയ്യാൻ സഹായി​ക്കുന്ന ആശ്രയ​യോ​ഗ്യ​മായ ഉപദേ​ശങ്ങൾ ബൈബി​ളി​നു തരാനുണ്ട്. എന്നാൽ പ്രശ്‌നങ്ങൾ സ്വയം പരിഹ​രി​ക്കാൻ സഹായി​ക്കുന്ന പുസ്‌ത​ക​ങ്ങ​ളെ​ക്കാൾ മെച്ചമായ ഒന്നാണ്‌ ബൈബിൾ. നമ്മുടെ പ്രശ്‌നങ്ങൾ എങ്ങനെ പരിഹരിക്കാം എന്നു മാത്രമല്ല അതു പറയു​ന്നത്‌. കാര്യങ്ങൾ കുറച്ചു​കൂ​ടെ വിശാ​ല​മാ​യി കാണാൻ അതു സഹായി​ക്കു​ന്നു. ഒരു വലിയ ചിത്ര​ത്തി​ന്‍റെ ചെറിയ ഒരു ഭാഗം മാത്ര​മാണ്‌ നമ്മളും നമ്മുടെ പ്രശ്‌ന​ങ്ങ​ളും എന്ന കാര്യം മനസ്സി​ലാ​ക്കാൻ ബൈബിൾ നമ്മളെ പ്രോ​ത്സാ​ഹി​പ്പി​ക്കു​ന്നു. ഇതു മനസ്സി​ലാ​ക്കി​യാൽ മാത്രമേ നമ്മുടെ ജീവി​ത​ത്തിന്‌ ശരിക്കു​മുള്ള അർഥം കൈവരൂ.

ഉദാഹ​ര​ണ​ത്തിന്‌, ഈ ബൈബിൾത​ത്ത്വ​ത്തെ​ക്കു​റിച്ച് ഒന്നു ചിന്തി​ക്കുക: “വാങ്ങു​ന്ന​തി​നെ​ക്കാൾ സന്തോഷം കൊടു​ക്കു​ന്ന​തി​ലാണ്‌.” (പ്രവൃ​ത്തി​കൾ 20:35) സാമ്പത്തി​ക​മാ​യി ബുദ്ധി​മുട്ട് അനുഭ​വിച്ച ഒരാളെ സഹായി​ച്ചത്‌ നിങ്ങൾ ഓർക്കു​ന്നു​ണ്ടോ? ഒരു സുഹൃത്ത്‌ തന്‍റെ ഉള്ളിലുള്ള വിഷമങ്ങൾ പറഞ്ഞ​പ്പോൾ നിങ്ങൾ ശ്രദ്ധ​യോ​ടെ കേട്ടി​രു​ന്നി​ട്ടി​ല്ലേ? ഇനി, നിങ്ങൾ ചെയ്‌ത ഒരു സഹായം മറ്റൊ​രാൾക്ക് അന്നേ ദിവസം വളരെ പ്രയോ​ജ​ന​പ്പെട്ടു എന്നു കരുതുക. അപ്പോൾ നിങ്ങൾക്കു സംതൃ​പ്‌തി തോന്നി​യി​ല്ലേ?

 തിരിച്ച് ഒന്നും പ്രതീ​ക്ഷി​ക്കാ​തെ മറ്റുള്ള​വർക്ക് എന്തെങ്കി​ലും കൊടു​ക്കു​മ്പോ​ഴാണ്‌ നമുക്കു വലിയ സന്തോഷം തോന്നുക. “ഒന്നും പ്രതീ​ക്ഷി​ക്കാ​തെ നമ്മൾ കൊടു​ത്താൽ കൊടു​ക്കു​ന്ന​തി​നെ​ക്കാൾ കൂടുതൽ നമുക്ക് കിട്ടാ​നാ​ണു സാധ്യത” എന്നാണ്‌ ഒരു എഴുത്തു​കാ​രൻ പറഞ്ഞത്‌. അത്‌ സത്യമാണ്‌, ഒന്നും പ്രതീ​ക്ഷി​ക്കാ​തെ നമ്മൾ കൊടു​ത്താൽ നമുക്ക് സ്രഷ്ടാ​വിൽനിന്ന് ഉറപ്പാ​യും പ്രതി​ഫലം ലഭിക്കും. അപ്പോ​ഴാണ്‌ നമുക്ക് ആ വലിയ ചിത്ര​ത്തി​ന്‍റെ ചെറിയ ഭാഗമാ​കാൻ കഴിയു​ന്നത്‌. വാസ്‌ത​വ​ത്തിൽ നമ്മൾ സ്രഷ്ടാ​വി​നോ​ടൊ​പ്പം ചേർന്ന് പ്രവർത്തി​ക്കു​ക​യാണ്‌. അത്തരം ദയാ​പ്ര​വൃ​ത്തി​കളെ ദൈവ​ത്തി​നു കൊടു​ക്കുന്ന ഒരു കടമാ​യി​ട്ടാണ്‌ ദൈവം കാണു​ന്നത്‌. (സുഭാ​ഷി​തങ്ങൾ 19:17) മറ്റുള്ള​വർക്കു​വേണ്ടി നമ്മൾ പ്രവർത്തി​ക്കു​ന്നത്‌ വളരെ മൂല്യ​വ​ത്താ​യി ദൈവം കാണുന്നു. അതിനു പ്രതി​ഫ​ല​മാ​യി ദൈവം വലിയ ഒരു സമ്മാനം നമുക്കു തരുന്നു. പറുദീ​സാ​ഭൂ​മി​യി​ലെ നിത്യ​ജീ​വൻ! ഭാവി​യെ​ക്കു​റി​ച്ചുള്ള എത്ര ശോഭ​ന​മായ പ്രത്യാശ!​—സങ്കീർത്തനം 37:29; ലൂക്കോസ്‌ 14:12-14. *

എല്ലാറ്റി​നും ഉപരി​യാ​യി, സത്യ​ദൈ​വ​മായ യഹോ​വയെ ആരാധി​ച്ചു​കൊണ്ട് നമ്മുടെ ജീവി​ത​ത്തി​ന്‍റെ യഥാർഥ ഉദ്ദേശ്യം കണ്ടെത്താൻ കഴിയു​മെന്നു ബൈബിൾ നമ്മളെ പഠിപ്പി​ക്കു​ന്നു. ദൈവ​ത്തിന്‌ അർഹമായ സ്‌തു​തി​യും ആദരവും അനുസ​ര​ണ​വും കൊടു​ക്കാൻ ദൈവ​വ​ചനം നമ്മളോ​ടു പറയുന്നു. (സഭാ​പ്ര​സം​ഗകൻ 12:13; വെളി​പാട്‌ 4:11) അങ്ങനെ ചെയ്യു​മ്പോൾ ജീവി​ത​ത്തിൽ വളരെ വലിയ ഒരു കാര്യം നമ്മൾ ചെയ്യു​ക​യാണ്‌​—സ്രഷ്ടാ​വി​ന്‍റെ ഹൃദയത്തെ സന്തോ​ഷി​പ്പി​ക്കു​ന്നു! ദൈവം ഇങ്ങനെ പറഞ്ഞി​രി​ക്കു​ന്നു: “നീ ജ്ഞാനി​യാ​യി എന്‍റെ ഹൃദയത്തെ സന്തോ​ഷി​പ്പി​ക്കുക.” (സുഭാ​ഷി​തങ്ങൾ 27:11) നമുക്കു​വേണ്ടി കരുതു​ന്ന​വ​നാണ്‌ നമ്മുടെ സ്വർഗീ​യ​പി​താവ്‌. തന്‍റെ നിർദേ​ശങ്ങൾ അനുസ​രി​ക്കാ​നും അങ്ങനെ നമ്മൾ നന്മ അനുഭ​വി​ക്കാ​നും ദൈവം ആഗ്രഹി​ക്കു​ന്നു. (യശയ്യ 48:17, 18) അതു​കൊണ്ട് ബൈബി​ളിൽ പറഞ്ഞി​രി​ക്കുന്ന തത്ത്വങ്ങൾക്കു ചേർച്ച​യിൽ നമ്മൾ ജ്ഞാനപൂർവം തീരു​മാ​ന​ങ്ങ​ളെ​ടു​ക്കു​ക​യും നടപ്പി​ലാ​ക്കു​ക​യും ചെയ്യു​മ്പോൾ സ്‌നേ​ഹ​വാ​നായ നമ്മുടെ സ്വർഗീ​യ​പി​താ​വി​ന്‍റെ ഹൃദയം സന്തോ​ഷി​ക്കും. ഈ പ്രപഞ്ച​ത്തി​ന്‍റെ പരമാ​ധി​കാ​രി​യെ ആരാധി​ച്ചു​കൊണ്ട് ആ ഹൃദയ​ത്തി​നു സന്തോഷം വരുത്തുന്ന വിധത്തിൽ ജീവി​ക്കു​ന്ന​തി​നെ​ക്കാൾ മികച്ച​താ​യി മറ്റ്‌ എന്ത് ലക്ഷ്യമാണ്‌ നമുക്കു വെക്കാ​നാ​കുക?

നമ്മുടെ സ്രഷ്ടാ​വു​മാ​യി ഒരു സുഹൃ​ദ്‌ബ​ന്ധ​ത്തിന്‌ എങ്ങനെ തുടക്ക​മി​ടാം എന്നും ബൈബിൾ പഠിപ്പി​ക്കു​ന്നു: “ദൈവ​ത്തോട്‌ അടുത്ത്‌ ചെല്ലുക; അപ്പോൾ ദൈവം നിങ്ങ​ളോട്‌ അടുത്ത്‌ വരും.” (യാക്കോബ്‌ 4:8) സർവശ​ക്ത​നായ സ്രഷ്ടാ​വി​ന്‍റെ സുഹൃ​ത്തു​ക്ക​ളാ​കാൻ കഴിയു​മോ എന്നു ചില​പ്പോൾ നമുക്ക് സംശയം തോന്നി​യേ​ക്കാം. എന്നാൽ ബൈബിൾ ഉറപ്പു നൽകുന്നു: “തന്നെ മനുഷ്യർ അന്വേ​ഷി​ക്കാ​നും തപ്പിത്തി​രഞ്ഞ് കണ്ടെത്താ​നും ദൈവം ആഗ്രഹി​ക്കു​ന്നു. വാസ്‌ത​വ​ത്തിൽ, ദൈവം നമ്മിൽ ആരിൽനി​ന്നും അകന്നി​രി​ക്കു​ന്നില്ല.” (പ്രവൃ​ത്തി​കൾ 17:27) ദൈവ​ത്തി​ന്‍റെ ഒരു സുഹൃ​ത്താ​യി​ത്തീ​രുക എന്ന ബൈബി​ളി​ന്‍റെ ഉപദേശം ഭാവി ഭദ്രമാ​ക്കാ​നുള്ള ഒരു പ്രാ​യോ​ഗി​ക​നിർദേ​ശ​മാണ്‌. അത്‌ എങ്ങനെ​യാണ്‌?

മരണം എന്ന കൊടിയ ശത്രു​വി​ന്‍റെ കൈയിൽനിന്ന് നമുക്ക് ആർക്കും സ്വയം രക്ഷപ്പെ​ടാൻ കഴിയി​ല്ലെന്ന് ഓർക്കുക. (1 കൊരി​ന്ത്യർ 15:26) എന്നാൽ, ദൈവം നിത്യ​മാ​യി ജീവി​ക്കു​ന്നു. ദൈവ​ത്തി​നു മരണമില്ല. അതു​കൊണ്ട്, തന്‍റെ സുഹൃ​ത്തു​ക്ക​ളും നിത്യ​മാ​യി ജീവി​ക്കാൻ ദൈവം ആഗ്രഹി​ക്കു​ന്നു. തന്നെ അന്വേ​ഷി​ക്കുന്ന മനുഷ്യർ “എന്നു​മെ​ന്നേ​ക്കും ജീവിതം ആസ്വദി​ക്കട്ടെ” എന്നു വളരെ ലളിത​മാ​യി, മനോ​ഹ​ര​മായ വാക്കു​ക​ളിൽ ദൈവം ബൈബി​ളിൽ രേഖ​പ്പെ​ടു​ത്തി​യി​രി​ക്കു​ന്നു.​—സങ്കീർത്തനം 22:26.

ദൈവ​വു​മാ​യി നിത്യ​ത​യി​ലെ​ന്നും നിലനിൽക്കുന്ന ഒരു സുഹൃ​ദ്‌ബന്ധം വളർത്തി​യെ​ടു​ക്കാൻ നിങ്ങൾക്ക് എങ്ങനെ കഴിയും? ദൈവ​ത്തി​ന്‍റെ വചനമായ ബൈബിൾ തുടർച്ച​യാ​യി പഠിക്കു​ന്ന​തി​ലൂ​ടെ. (യോഹ​ന്നാൻ 17:3; 2 തിമൊ​ഥെ​യൊസ്‌ 3:16) തിരു​വെ​ഴു​ത്തു​കൾ മനസ്സി​ലാ​ക്കാൻ ദൈവ​ത്തി​ന്‍റെ സഹായം തേടുക. ജ്ഞാനത്തി​നു​വേണ്ടി ‘ദൈവ​ത്തോ​ടു ചോദി​ച്ചു​കൊ​ണ്ടി​രി​ക്കു​ന്നെ​ങ്കിൽ’ ദൈവം നമുക്ക് അത്‌ തരും എന്നു ബൈബിൾ ഉറപ്പു തരുന്നു. * (യാക്കോബ്‌ 1:5) അവസാ​ന​മാ​യി, പഠിക്കുന്ന കാര്യങ്ങൾ അനുസ​രി​ക്കാൻ പരി​ശ്ര​മി​ക്കുക. ദൈവ​വ​ച​നത്തെ ഇപ്പോ​ഴും നിത്യ​ത​യിൽ ഉടനീ​ള​വും “(നിങ്ങളു​ടെ) കാലിന്‌ ഒരു ദീപവും” “(നിങ്ങളു​ടെ) വഴികൾക്ക് ഒരു വെളി​ച്ച​വും” ആക്കുക.​—സങ്കീർത്തനം 119:105.