സ്നേഹനിധിയായ സ്രഷ്ടാവ് നമുക്കുവേണ്ടി കരുതുന്നു
1. സൂര്യനെ ഉദിപ്പിക്കുന്നു
സൂര്യൻ ഇല്ലാത്ത ഭൂമിയിലെ ഒരു ജീവിതത്തെക്കുറിച്ച് നിങ്ങൾക്കു ചിന്തിക്കാനാകുമോ? സൂര്യന്റെ ഊർജം ഉപയോഗപ്പെടുത്തിയാണു മരങ്ങളിൽ ഇലകളും പൂക്കളും പഴങ്ങളും കായ്കളും വിത്തുകളും ഉണ്ടാകുന്നത്. മാത്രമല്ല മണ്ണിൽനിന്ന് ജലം വേരുകളിലൂടെ ഇലകളിൽ എത്താനും ഒടുവിൽ ഇലകളിൽ ബാഷ്പീകരണം നടക്കാനും ഈ ഊർജം സഹായിക്കുന്നു.
2. മഴ പെയ്യിക്കുന്നു
മഴ ദൈവത്തിൽനിന്നുള്ള ഒരു അമൂല്യസമ്മാനമാണ്. നമുക്ക് ആവശ്യമായ ഭക്ഷണം ഉത്പാദിപ്പിക്കാൻ മഴ സഹായിക്കുന്നു. ദൈവം ആകാശത്തുനിന്ന് മഴയും പലപല കാലങ്ങളും വേണ്ടത്ര ആഹാരവും കൂടാതെ ഹൃദയം നിറയെ സന്തോഷവും നമുക്കു തരുന്നു.
3. ഭക്ഷണവും വസ്ത്രവും തരുന്നു
ഇന്നു പല കുടുംബനാഥന്മാരും സ്വന്തം കുടുംബത്തിനുവേണ്ടി ഭക്ഷണവും വസ്ത്രവും കരുതാൻ നെട്ടോട്ടമോടുകയാണ്. ദൈവവചനം പറയുന്നതു ശ്രദ്ധിക്കൂ: “ആകാശത്തിലെ പക്ഷികളെ അടുത്ത് നിരീക്ഷിക്കുക. അവ വിതയ്ക്കുന്നില്ല, കൊയ്യുന്നില്ല, സംഭരണശാലകളിൽ കൂട്ടിവെക്കുന്നുമില്ല. എന്നിട്ടും നിങ്ങളുടെ സ്വർഗീയപിതാവ് അവയെ പോറ്റുന്നു. അവയെക്കാൾ വിലപ്പെട്ടവരല്ലേ നിങ്ങൾ?”—മത്തായി 6:25, 26.
‘പറമ്പിലെ ലില്ലിച്ചെടികളെ നോക്കി പഠിക്കൂ. അവ എങ്ങനെയാണു വളരുന്നത്? എന്നാൽ ഒരു കാര്യം ഞാൻ പറയാം: ശലോമോൻ (രാജാവ്) പ്രതാപത്തിലിരുന്നപ്പോൾപ്പോലും അവയിലൊന്നിനോളം അണിഞ്ഞൊരുങ്ങിയിട്ടില്ല. ദൈവം ഇവയെ ഇങ്ങനെ അണിയിച്ചൊരുക്കുന്നെങ്കിൽ നിങ്ങളെ എത്രയധികം!’—മത്തായി 6:28-30.
നമുക്കു ഭക്ഷണവും വസ്ത്രവും തരാൻ ദൈവത്തിനു കഴിയുമെങ്കിൽ ജീവിതത്തിലെ മറ്റ് ആവശ്യങ്ങൾ നടത്തിത്തരാനും ദൈവത്തിനു കഴിയും. ദൈവത്തിന്റെ ഇഷ്ടം ചെയ്യാൻ നമ്മൾ ശ്രമിച്ചാൽ ജോലി കണ്ടെത്താനുള്ള ശ്രമത്തെയോ നമ്മുടെ കൃഷിയെയോ ദൈവം അനുഗ്രഹിക്കും. അതിലൂടെ നമുക്ക് ആവശ്യമായതെല്ലാം ലഭിക്കും.—മത്തായി 6:32, 33.
സൂര്യൻ, മഴ, പക്ഷികൾ, പൂക്കൾ എന്നിവയെക്കുറിച്ച് ഒന്നു ചിന്തിച്ചുനോക്കൂ. ദൈവത്തെ സ്നേഹിക്കാൻ നമുക്കു നിരവധി കാരണങ്ങളില്ലേ? അടുത്ത ലേഖനത്തിൽ, സ്രഷ്ടാവ് മനുഷ്യരോട് എങ്ങനെയാണ് ആശയവിനിമയം നടത്തിയതെന്നു ചർച്ച ചെയ്യും.