അപ്പോ​സ്‌ത​ല​നായ പൗലോസ്‌ സഹമൂ​പ്പ​നായ തിമൊ​ഥെ​യൊ​സിന്‌ ഇങ്ങനെ എഴുതി: “ഒട്ടും മുൻവി​ധി​യോ പക്ഷപാ​ത​മോ കൂടാതെ ഈ നിർദേ​ശങ്ങൾ അനുസ​രി​ക്ക​ണ​മെന്നു ദൈവ​ത്തെ​യും ക്രിസ്‌തു​യേ​ശു​വി​നെ​യും തിര​ഞ്ഞെ​ടു​ക്ക​പ്പെട്ട ദൂതന്മാ​രെ​യും സാക്ഷി​യാ​ക്കി ഞാൻ നിന്നോ​ടു കല്‌പി​ക്കു​ക​യാണ്‌.”—1 തിമൊ. 5:21.

ഈ കൂട്ടം ആരെ അർഥമാ​ക്കു​ന്നില്ല എന്ന്‌ ആദ്യം നോക്കാം. ഈ ദൂതന്മാർ 1,44,000 പേരല്ല എന്നതു വ്യക്തമാണ്‌. കാരണം പൗലോസ്‌ തിമൊ​ഥെ​യൊ​സിന്‌ ഇത്‌ എഴുതുന്ന സമയത്ത്‌ അഭിഷി​ക്തർ സ്വർഗ​ത്തി​ലേക്കു പുനരു​ത്ഥാ​ന​പ്പെ​ടാൻ തുടങ്ങി​യി​ട്ടി​ല്ലാ​യി​രു​ന്നു. അതായത്‌ അപ്പോ​സ്‌ത​ല​ന്മാ​രും മറ്റ്‌ അഭിഷി​ക്ത​രും അപ്പോ​ഴും ആത്മവ്യ​ക്തി​ക​ളാ​യി​ട്ടി​ല്ലാ​യി​രു​ന്നു. അതു​കൊണ്ട്‌ ‘തിര​ഞ്ഞെ​ടു​ക്ക​പ്പെട്ട ദൂതന്മാർ’ അവരല്ല.—1 കൊരി. 15:50-54; 1 തെസ്സ. 4:13-17; 1 യോഹ. 3:2.

അതു​പോ​ലെ, ‘തിര​ഞ്ഞെ​ടു​ക്ക​പ്പെട്ട ദൂതന്മാർ’ പ്രളയ​ത്തി​ന്റെ സമയത്ത്‌ അനുസ​ര​ണ​ക്കേടു കാണിച്ച ദൂതന്മാ​രു​മല്ല. ആ ദൂതന്മാർ സാത്താന്റെ പക്ഷം ചേരു​ക​യും ഭൂതങ്ങ​ളാ​യി​ത്തീ​രു​ക​യും ചെയ്‌തു. അങ്ങനെ അവർ യേശു​വി​ന്റെ എതിരാ​ളി​ക​ളാ​യി മാറി. (ഉൽപ. 6:2; ലൂക്കോ. 8:30, 31; 2 പത്രോ. 2:4) ഭാവി​യിൽ അവരെ 1,000 വർഷ​ത്തേക്ക്‌ അഗാധ​ത്തിൽ എറിയു​ക​യും പിശാ​ചി​നോ​ടൊ​പ്പം നശിപ്പി​ക്കു​ക​യും ചെയ്യും.—യൂദ 6; വെളി. 20:1-3, 10.

പൗലോസ്‌ പറഞ്ഞ ‘തിര​ഞ്ഞെ​ടു​ക്ക​പ്പെട്ട ദൂതന്മാർ’ ആ വാക്യ​ത്തിൽ കാണുന്ന “ദൈവ​ത്തെ​യും ക്രിസ്‌തു​യേ​ശു​വി​നെ​യും” പിന്തു​ണ​യ്‌ക്കുന്ന സ്വർഗ​ത്തി​ലെ ദൂതന്മാ​രാണ്‌.

വിശ്വ​സ്‌ത​രാ​യ ആയിര​മാ​യി​രം ദൂതന്മാ​രുണ്ട്‌. (എബ്രാ. 12:22, 23) അവർക്ക്‌ എല്ലാവർക്കും ഒരേ നിയമ​ന​മാണ്‌ ഉള്ളതെന്നു നമ്മൾ ചിന്തി​ക്കേ​ണ്ട​തില്ല. (വെളി. 14:17, 18) ഒരിക്കൽ 1,85,000 വരുന്ന അസീറി​യൻ സൈന്യ​ത്തെ കൊല്ലാ​നാ​യി ഒരു ദൂത​നെ​യാ​ണു ദൈവം നിയമി​ച്ചത്‌. (2 രാജാ. 19:35) അതു​പോ​ലെ ചില ദൂതന്മാർക്ക്‌, ‘ആളുകളെ പാപത്തിൽ വീഴി​ക്കുന്ന എല്ലാത്തി​നെ​യും നിയമ​ലം​ഘ​ക​രെ​യും യേശു​വി​ന്റെ രാജ്യ​ത്തു​നിന്ന്‌ ശേഖരി​ക്കാൻ’ നിയമനം ലഭിച്ചി​ട്ടു​ണ്ടാ​കും. (മത്താ. 13:39-41) മറ്റു ചിലർക്ക്‌ ‘തിര​ഞ്ഞെ​ടു​ത്തി​രി​ക്കു​ന്ന​വരെ സ്വർഗ​ത്തി​ലേക്കു കൂട്ടി​ച്ചേർക്കാൻ’ നിയമനം കിട്ടി​യി​ട്ടു​ണ്ടാ​കും. (മത്താ. 24:31) ഇനി ‘പോകുന്ന വഴിക​ളി​ലെ​ല്ലാം നമ്മളെ കാക്കു​ന്ന​തി​നും’ ദൈവം ചില ദൂതന്മാ​രോ​ടു കല്‌പി​ച്ചി​ട്ടുണ്ട്‌.—സങ്കീ. 91:11; മത്താ. 18:10; മത്തായി 4:11 താരത​മ്യം ചെയ്യുക; ലൂക്കോ. 22:43.

1 തിമൊ​ഥെ​യൊസ്‌ 5:21-ൽ കാണുന്ന ‘തിര​ഞ്ഞെ​ടു​ക്ക​പ്പെട്ട ദൂതന്മാർ’ സഭകളു​മാ​യി ബന്ധപ്പെട്ട ചില കാര്യ​ങ്ങ​ളിൽ സഹായി​ക്കാൻ നിയമനം ലഭിച്ച​വ​രാ​യി​രി​ക്കാം. ഈ അധ്യാ​യ​ത്തിൽ, മൂപ്പന്മാർ സഭയിലെ ഉത്തരവാ​ദി​ത്വ​ങ്ങൾ എങ്ങനെ കൈകാ​ര്യം ചെയ്യണ​മെ​ന്നും സഭയി​ലു​ള്ളവർ മൂപ്പന്മാ​രെ ആദരി​ക്ക​ണ​മെ​ന്നും പൗലോസ്‌ പറയു​ക​യാ​യി​രു​ന്നു. മൂപ്പന്മാർ തങ്ങളുടെ ഉത്തരവാ​ദി​ത്വ​ങ്ങൾ “ഒട്ടും മുൻവി​ധി​യോ പക്ഷപാ​ത​മോ കൂടാതെ” വേണമാ​യി​രു​ന്നു ചെയ്യാൻ. അതു​പോ​ലെ അവർ ഒരു കാര്യ​ത്തെ​ക്കു​റിച്ച്‌ നന്നായി ചിന്തി​ക്കാ​തെ ഒരു തീരു​മാ​ന​മെ​ടു​ക്കാ​നും പാടി​ല്ലാ​യി​രു​ന്നു. ഈ ഉപദേശം അവർ ഗൗരവ​മാ​യെ​ടു​ക്ക​ണ​മാ​യി​രു​ന്നു. കാരണം അവർ സഹോ​ദ​ര​ങ്ങളെ സേവി​ക്കു​ന്നത്‌ “ദൈവ​ത്തെ​യും ക്രിസ്‌തു​യേ​ശു​വി​നെ​യും തിര​ഞ്ഞെ​ടു​ക്ക​പ്പെട്ട ദൂതന്മാ​രെ​യും സാക്ഷി​യാ​ക്കി” ആണ്‌. അതെ, ദൂതന്മാ​രെ സഭയു​മാ​യി ബന്ധപ്പെട്ട നിയമ​ന​ങ്ങൾക്ക്‌, അതായത്‌ ദൈവ​ജ​നത്തെ സംരക്ഷി​ക്കാ​നും പ്രസം​ഗ​പ്ര​വർത്ത​ന​ത്തി​നു മേൽനോ​ട്ടം വഹിക്കാ​നും തങ്ങൾ നിരീ​ക്ഷിച്ച കാര്യങ്ങൾ യഹോ​വയെ അറിയി​ക്കാ​നും മറ്റും നിയമി​ച്ചി​ട്ടു​ണ്ടെന്നു വ്യക്തമാണ്‌.—മത്താ. 18:10; വെളി. 14:6.