ഷോവാ​ക്കിം ബരാൻഡ്‌ നൽകിയ “അമൂല്യ സമ്മാനം”

ചെക്ക്‌ റിപ്പബ്ലി​ക്കി​ലെ ഉണരുക! ലേഖകൻ

“ചെക്ക്‌ രാഷ്‌ട്ര​ത്തി​നു നൽക​പ്പെ​ട്ടി​ട്ടുള്ള ഏറ്റവും വലിയ ബഹുമതി, ഒരു അമൂല്യ സമ്മാനം!” 19-ാം നൂറ്റാ​ണ്ടി​ലെ പ്രസിദ്ധ പുരാ​ജീ​വി​ശാ​സ്‌ത്ര​ജ്ഞ​നാ​യി​രുന്ന ഷോവാ​ക്കിം ബരാൻഡിൽ നിന്ന്‌ ചെക്ക്‌ ദേശീയ മ്യൂസി​യ​ത്തി​നു ലഭിച്ച സ്വത്തിനെ ഒരു പത്ര​പ്ര​വർത്തകൻ വിശേ​ഷി​പ്പി​ച്ചത്‌ ഇങ്ങനെ​യാ​യി​രു​ന്നു. വളരെ പ്രധാ​ന​പ്പെട്ട ഫോസി​ലു​ക​ള​ട​ങ്ങിയ 1,200-ലധികം തടി​പ്പെ​ട്ടി​കൾ ആയിരു​ന്നു ചെക്ക്‌ ജനതയ്‌ക്കു ബരാൻഡ്‌ നൽകിയ “അമൂല്യ സമ്മാനം.” പതിറ്റാ​ണ്ടു​ക​ളി​ലെ അശ്രാന്ത പരി​ശ്ര​മ​ത്തി​ലൂ​ടെ​യാണ്‌ അദ്ദേഹം അവ ശേഖരി​ക്കു​ക​യും പഠനവി​ധേ​യ​മാ​ക്കു​ക​യും തരംതി​രി​ക്കു​ക​യും ചെയ്‌തത്‌. പഴയ കുറെ ഫോസി​ലു​ക​ളു​ടെ ശേഖരം കണ്ടാൽ നിങ്ങൾ സന്തോ​ഷം​കൊ​ണ്ടു തുള്ളി​ച്ചാ​ടു​ക​യൊ​ന്നു​മി​ല്ലാ​യിരി​ക്കാം. എന്നാൽ, പുരാ​ജീ​വി​ശാ​സ്‌ത്ര​ജ്ഞർക്ക്‌ ബരാൻഡി​ന്റെ ഈ സമ്മാനം ഒരു നിധി​യെ​ക്കാൾ ഏറെ വില​പ്പെ​ട്ട​താണ്‌!

ഫോസിൽ അവശി​ഷ്ടങ്ങൾ ഉപയോ​ഗിച്ച്‌ പ്രാചീ​ന​കാ​ല​ങ്ങ​ളി​ലെ ജീവജാ​ല​ങ്ങളെ കുറിച്ചു പഠനം നടത്തുന്ന ശാസ്‌ത്ര​ജ്ഞ​രാണ്‌ പുരാ​ജീ​വി​ശാ​സ്‌ത്രജ്ഞർ. താരത​മ്യേന അടുത്ത​കാ​ലത്തു മാത്ര​മാണ്‌ പുരാ​ജീ​വി​ശാ​സ്‌ത്രം ഒരു ശാസ്‌ത്ര​ശാ​ഖ​യാ​യി വളർന്നത്‌. മധ്യകാ​ല​ഘ​ട്ട​ങ്ങ​ളിൽ, “പ്രകൃ​തി​യു​ടെ വികൃ​തി​കൾ”, വ്യാളി​ക​ളു​ടെ അവശി​ഷ്ടങ്ങൾ എന്നൊക്കെ പറഞ്ഞ്‌ ആളുകൾ ഫോസി​ലു​കൾ വളരെ നിസ്സാ​ര​മാ​യി തള്ളിക്ക​ള​ഞ്ഞി​രു​ന്നു. എന്നാൽ, 18-ാം നൂറ്റാണ്ട്‌ ആയതോ​ടെ കഥ മാറി. സമൂഹ​ത്തി​ന്റെ ഉയർന്ന തട്ടുക​ളി​ലു​ള്ളവർ ഫോസി​ലു​കൾ ശേഖരി​ക്കു​ന്ന​തിൽ താത്‌പ​ര്യം കാണി​ക്കാൻ തുടങ്ങി. കൂടാതെ, ഒട്ടനവധി രാജ്യ​ങ്ങ​ളി​ലെ ശാസ്‌ത്രജ്ഞർ അവയെ​ക്കു​റി​ച്ചു പഠനം നടത്താൻ തയ്യാറാ​യി മുന്നോ​ട്ടു വരിക​യും ചെയ്‌തു. അവരിൽ ഒരാളാ​യി​രു​ന്നു ഷോവാ​ക്കിം ബരാൻഡ്‌. ബരാൻഡി​നെ കുറിച്ച്‌ ലഭ്യമായ വിവരങ്ങൾ എന്തൊ​ക്കെ​യാണ്‌? പുരാ​ജീ​വി​ശാ​സ്‌ത്ര​ത്തിന്‌ അദ്ദേഹം നൽകിയ സംഭാവന എന്തായി​രു​ന്നു? ചാൾസ്‌ ഡാർവി​ന്റെ സമകാ​ലീ​ന​നാ​യി​രുന്ന ബരാൻഡിന്‌ പരിണാ​മ​സി​ദ്ധാ​ന്തത്തെ കുറിച്ച്‌ എന്തു കാഴ്‌ച​പ്പാ​ടാണ്‌ ഉണ്ടായി​രു​ന്നത്‌?

ബരാൻഡ്‌ തൊഴിൽരം​ഗം മാറുന്നു

ദക്ഷിണ ഫ്രാൻസി​ലെ ഒരു കൊച്ചു പട്ടണമായ സോഗിൽ, 1799-ലാണ്‌ ഷോവാ​ക്കിം ബരാൻഡ്‌ ജനിച്ചത്‌. പാരീ​സിൽ  വെച്ച്‌ അദ്ദേഹം എൻജി​നീ​യ​റിങ്‌ പഠിച്ചു. റോഡു​ക​ളു​ടെ​യും പാലങ്ങ​ളു​ടെ​യും നിർമാ​ണം എന്ന വിഭാ​ഗ​ത്തി​ലാ​യി​രു​ന്നു അദ്ദേഹം പ്രത്യേക പ്രാവീ​ണ്യം നേടി​യത്‌. എൻജി​നീ​യ​റി​ങ്ങി​നൊ​പ്പം, അദ്ദേഹം പ്രകൃതി ശാസ്‌ത്ര​വും പഠിക്കു​ക​യു​ണ്ടാ​യി. ആ മേഖല​യി​ലും അദ്ദേഹ​ത്തി​നു ശോഭി​ക്കാൻ കഴിയു​മെന്ന്‌ അധികം താമസി​യാ​തെ തന്നെ വ്യക്തമാ​യി​ത്തീർന്നു. ബിരു​ദാ​ന​ന്തരം ബരാൻഡ്‌ ഒരു എൻജി​നീ​യ​റാ​യി ജോലി തുടങ്ങി. എന്നാൽ, അദ്ദേഹ​ത്തി​ന്റെ കഴിവു​കൾ ഫ്രഞ്ച്‌ രാജകു​ടും​ബ​ത്തി​ന്റെ ശ്രദ്ധയിൽ പെട്ട​പ്പോൾ, അവർ അദ്ദേഹത്തെ ചാൾസ്‌ പത്താമൻ രാജാ​വി​ന്റെ പേരക്കി​ടാ​വി​ന്റെ ഗുരു​നാ​ഥ​നാ​യി നിയമി​ച്ചു. അദ്ദേഹം പഠിപ്പി​ക്കേ​ണ്ടി​യി​രു​ന്ന​താ​കട്ടെ, പ്രകൃതി ശാസ്‌ത്ര​വും. 1830-ൽ ഫ്രാൻസിൽ നടന്ന ഒരു വിപ്ലവത്തെ തുടർന്ന്‌ രാജകു​ടും​ബാം​ഗങ്ങൾ നാടു​ക​ട​ത്ത​പ്പെട്ടു. കാല​ക്ര​മ​ത്തിൽ അവർ ബൊഹീ​മി​യ​യി​ലേക്കു പോയി. ബരാൻഡും അവിടെ അവരോ​ടൊ​പ്പം ചേർന്നു. ബൊഹീ​മി​യ​യു​ടെ തലസ്ഥാ​ന​മായ പ്രാഗിൽ വെച്ചാണ്‌ ബരാൻഡ്‌ വീണ്ടും എൻജി​നീ​യ​റി​ങ്ങി​ലേക്കു തിരി​ഞ്ഞത്‌.

കുതി​ര​കൾ വലിക്കുന്ന തരം തീവണ്ടി​ക്കുള്ള പാത നിർമി​ക്കു​ന്ന​തി​നു വേണ്ടി പ്രാഗി​നു ചുറ്റു​മുള്ള പ്രദേ​ശത്ത്‌ നിർദേ​ശി​ക്ക​പ്പെട്ട സ്ഥലം സർവേ ചെയ്യാൻ റോഡു​ക​ളു​ടെ​യും പാലങ്ങ​ളു​ടെ​യും നിർമാ​ണ​ത്തിൽ വൈദ​ഗ്‌ധ്യം നേടിയ ഒരു വ്യക്തി​യെന്ന നിലയിൽ ബരാൻഡി​നെ ചുമത​ല​പ്പെ​ടു​ത്തി. ജോലി​യിൽ ഏർപ്പെ​ട്ടി​രി​ക്കെ ആ പ്രദേ​ശത്തു ധാരാളം ഫോസി​ലു​കൾ ഉള്ള കാര്യം അദ്ദേഹ​ത്തി​ന്റെ ശ്രദ്ധയിൽ പെട്ടു. അടുത്തു പരി​ശോ​ധി​ച്ച​പ്പോൾ, ബൊഹീ​മി​യ​യി​ലെ ഫോസിൽപാ​ളി​ക​ളും ബ്രിട്ട​നി​ലെ ഫോസിൽപാ​ളി​ക​ളും തമ്മിലുള്ള സമാന​തകൾ കണ്ട്‌ അദ്ദേഹം അതിശ​യി​ച്ചു​പോ​യി. അദ്ദേഹ​ത്തി​ലെ പ്രകൃതി ശാസ്‌ത്രജ്ഞൻ വീണ്ടു​മു​ണർന്നു. എൻജി​നീ​യ​റിങ്‌ രംഗം എന്നെ​ന്നേ​ക്കു​മാ​യി ഉപേക്ഷിച്ച അദ്ദേഹം പിന്നത്തെ 44 വർഷം പുരാ​ജീ​വി​ശാ​സ്‌ത്ര​വും ഭൂവി​ജ്ഞാ​നീ​യ​വും പഠിക്കു​ന്ന​തി​നാ​യി ഉഴിഞ്ഞു​വെച്ചു.

ഫോസി​ലു​കൾ ധാരാ​ള​മാ​യി ഉണ്ടായി​രുന്ന മധ്യ ബൊഹീ​മി​യ​യു​ടെ ഉൾപ്ര​ദേ​ശ​മാ​യി​രു​ന്നു ബരാൻഡി​ന്റെ ക്ലാസ്സ്‌മു​റി. വൈവി​ധ്യ​വും അപൂർവ​ഭം​ഗി​യും മുറ്റി​നിന്ന കണ്ടുപി​ടി​ത്ത​ങ്ങ​ളാൽ ധന്യമാ​യി​രു​ന്നു അദ്ദേഹ​ത്തി​ന്റെ ഓരോ ദിനങ്ങ​ളും. 1846 ആയപ്പോ​ഴേ​ക്കും, തന്റെ ഗവേഷ​ണ​ത്തി​ന്റെ പ്രാരംഭ ഫലങ്ങൾ പ്രസി​ദ്ധീ​ക​രി​ക്കാ​നുള്ള നിലയി​ലാ​യി​ക്ക​ഴി​ഞ്ഞി​രു​ന്നു അദ്ദേഹം. അതിൽ അദ്ദേഹം പുതിയ ട്രൈ​ലോ​ബൈറ്റ്‌ സ്‌പീ​ഷീ​സു​കളെ—ഇവ ഒരിക്കൽ കടലിന്റെ അടിത്ത​ട്ടിൽ കഴിഞ്ഞി​രുന്ന ജീവി​ക​ളാണ്‌—കുറിച്ച്‌ വിശദീ​ക​രി​ക്കു​ക​യും അവയെ തരംതി​രി​ക്കു​ക​യും ചെയ്‌തു.

ബരാൻഡ്‌ തന്റെ ഫോസിൽ ശേഖര​ണ​വും അവയെ​ക്കു​റി​ച്ചുള്ള പഠനവും തുടർന്നു. 1852-ൽ അദ്ദേഹം, സിലൂ​രി​യൻ സിസ്റ്റം ഓഫ്‌ സെൻട്രൽ ബൊഹീ​മിയ എന്ന ഏകവി​ഷയക പ്രബന്ധ​ത്തി​ന്റെ അഥവാ മോ​ണോ​ഗ്രാ​ഫി​ന്റെ ഒന്നാം വാല്യം പ്രസി​ദ്ധീ​ക​രി​ക്കു​ക​യു​ണ്ടാ​യി. a ട്രൈ​ലോ​ബൈ​റ്റു​കളെ കുറി​ച്ചുള്ള വിശദാം​ശങ്ങൾ ആയിരു​ന്നു അതിൽ. തുടർന്ന്‌, കവചജീ​വി​കൾ, കോൻഡ്രി​ക്‌ഥിസ്‌, സിഫാ​ലോ​പോ​ഡു​കൾ, ലാമെ​ല്ലി​ബ്രാൻക്‌സു​കൾ എന്നിവ​യെ​യും ഫോസി​ലു​ക​ളാ​യി മാറിയ മറ്റു ജന്തുക്ക​ളെ​യും കുറി​ച്ചുള്ള വാല്യ​ങ്ങ​ളും അദ്ദേഹം പുറത്തി​റക്കി. 3,500-ലധികം സ്‌പീ​ഷീ​സു​കളെ കുറിച്ചു വിശദ​മാ​യി പ്രതി​പാ​ദി​ക്കുന്ന 22 വാല്യ​ങ്ങ​ളാണ്‌ അദ്ദേഹം തന്റെ ജീവി​ത​കാ​ലത്തു പ്രസി​ദ്ധീ​ക​രി​ച്ചത്‌. അത്‌ പുരാ​ജീ​വി​ശാ​സ്‌ത്ര​ത്തി​ന്റെ ചരി​ത്ര​ത്തിൽ തയ്യാറാ​ക്ക​പ്പെ​ട്ടി​ട്ടു​ള്ള​തിൽ വെച്ച്‌ ഏറ്റവും വലിയ മോ​ണോ​ഗ്രാ​ഫു​ക​ളിൽ ഒന്നാണ്‌.

കൃത്യ​ത​യും ചിട്ടയും

ബരാൻഡി​ന്റെ രീതികൾ മറ്റു ഗവേഷ​ക​രിൽ നിന്നും അദ്ദേഹത്തെ വ്യത്യ​സ്‌ത​നാ​ക്കി. പ്രകൃതി ശാസ്‌ത്ര​ജ്ഞ​നാ​യി​രി​ക്കെ, ഒരു എഞ്ചിനീ​യ​റു​ടെ കൃത്യത പുലർത്താ​നും അദ്ദേഹം ശ്രദ്ധിച്ചു. ഒരു രൂപര​ച​യി​താവ്‌ എന്ന നിലയിൽ, കണക്കു​കൂ​ട്ട​ലു​ക​ളി​ലോ താൻ വരച്ച ചിത്ര​ങ്ങ​ളി​ലോ  അൽപ്പ​മെ​ങ്കി​ലും പിഴവു​പ​റ്റു​ന്നത്‌ അദ്ദേഹ​ത്തിന്‌ ആലോ​ചി​ക്കാൻ കൂടി കഴിയു​മാ​യി​രു​ന്നില്ല. ഒരു പുരാ​ജീ​വി​ശാ​സ്‌ത്ര​ജ്ഞ​നെന്ന നിലയിൽ, താൻ വരച്ച ചിത്ര​ങ്ങ​ളു​ടെ സൂക്ഷ്‌മ വിശദാം​ശ​ങ്ങ​ളിൽ പോലും അങ്ങേയറ്റം കൃത്യത പുലർത്താൻ രാപകൽ വിശ്ര​മ​മെ​ന്ത​ന്ന​റി​യാ​തെ അദ്ദേഹം കഠിന​മാ​യി യത്‌നി​ച്ചു. മോ​ണോ​ഗ്രാ​ഫിൽ ഉൾപ്പെ​ടു​ത്തി​യി​രുന്ന ചിത്രങ്ങൾ എല്ലാം ഒരു വിദഗ്‌ധ കലാകാ​രൻ വരച്ചതാ​യി​രു​ന്നെ​ങ്കി​ലും, അതിൽ തൃപ്‌തി​യാ​കാ​തെ പല ചിത്ര​ങ്ങ​ളി​ലും അദ്ദേഹം തന്റേതായ മിനു​ക്കു​പ​ണി​കൾ നടത്തി.

ചിത്ര​ങ്ങ​ളു​ടെ കാര്യ​ത്തിൽ മാത്ര​മാ​യി​രു​ന്നില്ല കൃത്യത വേണ​മെന്നു ബരാൻഡ്‌ നിഷ്‌കർഷി​ച്ചത്‌. ആ മോ​ണോ​ഗ്രാ​ഫി​ന്റെ വാല്യങ്ങൾ ഓരോ​ന്നും ടൈപ്പ്‌സെറ്റ്‌ ചെയ്‌തു കിട്ടു​മ്പോൾ, അദ്ദേഹം​തന്നെ അതു മുഴു​വ​നും പരി​ശോ​ധി​ക്കു​മാ​യി​രു​ന്നു. ഏതെങ്കി​ലും ഭാഗം തൃപ്‌തി​ക​ര​മ​ല്ലെന്നു തോന്നി​യാൽ, അത്രയും ഭാഗം വീണ്ടും ടൈപ്പ്‌സെറ്റ്‌ ചെയ്യു​ന്ന​തിന്‌ അദ്ദേഹം മടക്കി അയയ്‌ക്കു​മാ​യി​രു​ന്നു. തന്റെ ഓരോ രചനയും പരമാ​വധി കൃത്യ​ത​യു​ള്ള​താ​ക്കി തീർക്കുക എന്നതാ​യി​രു​ന്നു അദ്ദേഹ​ത്തി​ന്റെ ലക്ഷ്യം. അതിൽ അദ്ദേഹം അസൂയാ​വ​ഹ​മായ വിജയം കൈവ​രി​ക്കു​ക​യും ചെയ്‌തു. ഏകദേശം 150 വർഷത്തി​നു ശേഷം ഇന്നും, ഗവേഷകർ സിലൂ​രി​യൻ സിസ്റ്റം ഒരു പരാമർശ ഗ്രന്ഥമാ​യി ഉപയോ​ഗി​ക്കു​ന്നു.

പരിണാ​മത്തെ കുറി​ച്ചെന്ത്‌?

1859-ൽ ചാൾസ്‌ ഡാർവി​ന്റെ വർഗോ​ത്‌പത്തി പുറത്തി​റ​ങ്ങി​യ​പ്പോൾ, ഒട്ടേറെ ശാസ്‌ത്രജ്ഞർ പരിണാ​മ​സി​ദ്ധാ​ന്ത​ത്തി​ന്റെ കൊടി​ക്കീ​ഴിൽ അണിനി​രന്നു. എന്നാൽ, ബരാൻഡ്‌ അക്കൂട്ട​ത്തിൽ ഉണ്ടായി​രു​ന്നില്ല. തുടക്കം മുതലേ അദ്ദേഹം അതു തള്ളിക്ക​ള​യു​ക​യാ​ണു​ണ്ടാ​യത്‌. ഫോസി​ലു​ക​ളു​ടെ പഠനത്തിൽ നിന്ന്‌ പരിണാ​മ​സി​ദ്ധാ​ന്തം ശരിയാ​ണെന്നു തെളി​യി​ക്കുന്ന യാതൊ​ന്നും അദ്ദേഹ​ത്തി​നു ലഭിച്ചില്ല എന്നതു തന്നെ കാരണം. തന്റെ ഗവേഷണ ലക്ഷ്യം ‘യാഥാർഥ്യം കണ്ടുപി​ടി​ക്ക​ലാ​ണെ​ന്നും അല്ലാതെ ക്ഷണിക​മായ സിദ്ധാ​ന്ത​ങ്ങൾക്കു രൂപം​കൊ​ടു​ക്ക​ല​ല്ലെ​ന്നും’ ബരാൻഡ്‌ പറഞ്ഞു. (ചെരി​ച്ചെ​ഴു​തി​യി​രി​ക്കു​ന്നതു ഞങ്ങൾ.) സിലൂ​രി​യൻ സിസ്റ്റത്തി​ന്റെ ഓരോ വാല്യ​ത്തി​ന്റെ​യും ശീർഷ​ക​പ്പേ​ജിൽ, ബരാൻഡ്‌ ഈ ആദർശ​വാ​ക്യം രേഖ​പ്പെ​ടു​ത്തു​ക​യു​ണ്ടാ​യി: “സെ സ്‌കാ ഷേ വൂ” (ഇതാണ്‌ ഞാൻ കണ്ടത്‌).

പല ജന്തുക്ക​ളു​ടെ​യും ശരീരങ്ങൾ വികാ​സ​ത്തി​ന്റെ വ്യത്യസ്‌ത ദശകളിൽ ആണെന്ന കാര്യം ബരാൻഡ്‌ ശ്രദ്ധി​ക്കുക തന്നെ ചെയ്‌തു. എന്നിരു​ന്നാ​ലും, അവയെ​ല്ലാം ഒരേ വർഗത്തിൽപ്പെട്ട, എന്നാൽ വളർച്ച​യു​ടെ വ്യത്യസ്‌ത ഘട്ടങ്ങളിൽ ആയിരു​ന്നവ ആണെന്ന്‌ അദ്ദേഹം ശരിയാ​യി​ത്തന്നെ നിഗമനം ചെയ്‌തു. ഒരു വർഗത്തിൽപ്പെട്ടവ മറ്റൊരു വർഗമാ​യി പരിണ​മി​ക്കു​ന്ന​തി​ന്റെ യാതൊ​രു തെളി​വും അദ്ദേഹം കണ്ടില്ല. ബരാൻഡി​ന്റെ ആദർശ​ങ്ങളെ സംക്ഷേ​പി​ച്ചു​കൊണ്ട്‌ എ പെട്രി​ഫൈഡ്‌ വേൾഡ്‌ എന്ന പുസ്‌തകം ഇങ്ങനെ പറയുന്നു: “ബരാൻഡി​ന്റെ രചനകൾ മുഴുവൻ . . . വസ്‌തു​ത​കളെ അടിസ്ഥാ​ന​പ്പെ​ടു​ത്തി​യു​ള്ള​വ​യാണ്‌. അവയുടെ ഏറ്റവും മികച്ച സവി​ശേ​ഷ​ത​യും അതാണ്‌. ഗവേഷ​ണ​ത്തി​ന്റെ ആ പ്രാരം​ഭ​ഘ​ട്ട​ത്തിൽ ഊഹാ​പോ​ഹ​ങ്ങൾക്കും സങ്കൽപ്പ​ങ്ങൾക്കും ഉറച്ച അടിത്ത​റ​യി​ല്ലാ​ത്ത​തരം സിദ്ധാ​ന്ത​ങ്ങൾക്കു​മൊ​ന്നും സ്ഥാനമു​ണ്ടാ​യി​രു​ന്നില്ല.”

ഒരു സാധാ​ര​ണ​ക്കാ​രൻ നൽകിയ “അമൂല്യ സമ്മാനം”

ബരാൻഡ്‌ നേടിയ വൻവി​ജയം അദ്ദേഹത്തെ ഒട്ടും അഹങ്കാ​രി​യാ​ക്കി​യില്ല. മാത്രമല്ല, ഒരു തരത്തി​ലുള്ള വഞ്ചനയ്‌ക്കും അദ്ദേഹം കൂട്ടു​നി​ന്നു​മില്ല. യൂറോ​പ്പി​ലെ ബുദ്ധി​ജീ​വി​ക​ളു​മാ​യി അടുത്ത ബന്ധമു​ണ്ടാ​യി​രുന്ന അദ്ദേഹ​ത്തിന്‌ പല ഭാഷകൾ കൈകാ​ര്യം ചെയ്യാൻ സാധി​ക്കു​മാ​യി​രു​ന്നു. ഇതൊ​ക്കെ​യാ​യി​രു​ന്നി​ട്ടും, തികച്ചും ഒരു സാധാ​ര​ണ​ക്കാ​രനെ പോലെ തന്നെയാ​യി​രു​ന്നു അദ്ദേഹ​ത്തി​ന്റെ പെരു​മാ​റ്റം. സാധാരണ ജനങ്ങ​ളോട്‌ അടുത്ത്‌ ഇടപഴ​കു​ന്ന​തിന്‌ അദ്ദേഹം ചെക്ക്‌ ഭാഷ പഠിച്ചു. ഇതുവഴി കല്ലുമ​ട​ക​ളി​ലെ പണിക്കാ​രോ​ടു സംസാ​രി​ക്കാ​നും അങ്ങനെ അവരുടെ സഹായ​ത്താൽ തന്റെ ശേഖര​ത്തി​ലേക്കു പുതിയ ഫോസി​ലു​കൾ കൂട്ടി​ച്ചേർക്കാ​നും അദ്ദേഹ​ത്തി​നു കഴിഞ്ഞു.

ബരാൻഡ്‌ ഒരു മതഭക്തൻ കൂടി​യാ​യി​രു​ന്നു. പ്രകൃ​തി​യിൽ താൻ കണ്ടെത്തിയ സംഗതി​കൾ ദൈവ​ത്തി​ലുള്ള അദ്ദേഹ​ത്തി​ന്റെ വിശ്വാ​സം ഊട്ടി​യു​റ​പ്പി​ച്ചു. “ആദ്യ സൃഷ്ടി​ക​ളു​ടെ സ്‌മാ​ര​ക​മു​ദ്രകൾ” എന്നാണ്‌ ഫോസി​ലു​കളെ അദ്ദേഹം വിളി​ച്ചത്‌. ഗവേഷണം മുന്നോ​ട്ടു കൊണ്ടു​പോ​കു​ന്ന​തി​നു തനിക്കു പ്രചോ​ദനം പകർന്നു​തന്ന വികാ​ര​ങ്ങളെ കുറി​ച്ചും അവതാ​രി​ക​യിൽ അദ്ദേഹം എഴുതു​ക​യു​ണ്ടാ​യി: “സ്രഷ്ടാ​വി​ന്റെ കരവേ​ല​ക​ളു​ടെ ഒരംശം കണ്ടെത്തു​ക​യോ അതി​നെ​ക്കു​റിച്ച്‌ ആഴമായി ചിന്തി​ക്കു​ക​യോ ചെയ്യുന്ന ഒരുവന്റെ ഉള്ളിൽ നിറയു​ക​യും അവനെ വശീക​രി​ക്കു​ക​യും ചെയ്യുന്ന അത്ഭുതാ​ദ​ര​വി​ന്റെ​യും സംതൃ​പ്‌തി​യു​ടെ​യും തിരി​ച്ച​റി​വി​ന്റേ​തു​മായ വികാ​രങ്ങൾ ആണത്‌.”

അത്യന്തം അമൂല്യ​മായ ശാസ്‌ത്ര വിവരങ്ങൾ ലോക​ത്തി​നു സമ്മാനിച്ച്‌ 1883-ൽ ഷോവാ​ക്കിം ബരാൻഡ്‌ അന്തരിച്ചു. തന്റെ ജോലി​യിൽ അദ്ദേഹം കാട്ടിയ കണിശ മനോ​ഭാ​വം ഇന്ന്‌ ലോക​മെ​മ്പാ​ടു​മുള്ള ശാസ്‌ത്രജ്ഞർ വളരെ​യേറെ വിലമ​തി​ക്കു​ന്നു. അദ്ദേഹ​ത്തി​ന്റെ ഗവേഷ​ണ​ങ്ങൾക്ക്‌ അടിസ്ഥാ​നം യാഥാർഥ്യ​ങ്ങ​ളും വസ്‌തു​ത​ക​ളും ആയിരു​ന്ന​തി​നാൽ, ശ്രദ്ധാ​പൂർവം രേഖ​പ്പെ​ടു​ത്തി​വെ​ച്ചി​ട്ടുള്ള ആ കണ്ടുപി​ടി​ത്തങ്ങൾ ഇന്നും ഗവേഷ​കർക്കു വഴികാ​ട്ടി​യാ​യി ഉതകുന്നു. ശാസ്‌ത്രീ​യ​മായ കാഴ്‌ച​പ്പാ​ടിൽ നിന്നു നോക്കി​യാൽ, ബരാൻഡി​ന്റെ സ്വത്തിനെ ഒരു “അമൂല്യ സമ്മാനം” എന്നു വിശേ​ഷി​പ്പി​ക്കു​ന്നത്‌ ഒട്ടും അതിശ​യോ​ക്തി​യല്ല.

[അടിക്കു​റിപ്പ്‌]

[12, 13 പേജു​ക​ളി​ലെ ചിത്രങ്ങൾ]

ബരാൻഡി​ന്റെ ട്രൈ​ലോ​ബൈറ്റ്‌ ചിത്രങ്ങൾ, 1852

[കടപ്പാട്‌]

രേഖാചിത്രങ്ങൾ: S laskavým svolením Národní knihovny v Praze

[12-ാം പേജിലെ ചിത്ര​ങ്ങൾക്ക്‌ കടപ്പാട്‌]

ഛായാചിത്രം: Z knihy Vývoj české přírodovědy, 1931