ക്വൈ ട്‌സ്‌ ഒന്നു പരീക്ഷി​ച്ചു​നോ​ക്കൂ!

തായ്‌വാനിലെ ഉണരുക! ലേഖകൻ

ആകുഞ്ഞു​മു​ഖത്തെ സന്തോഷം കണ്ടാൽത്തന്നെ അറിയാം, അവൾ എത്ര ആസ്വദി​ച്ചാണ്‌ ആഹാരം കഴിക്കു​ന്നത്‌ എന്ന്‌. അവളുടെ ഇടത്തെ കൈയിൽ ഒരു കോപ്പ​യുണ്ട്‌. ചോറും പച്ചക്കറി​ക​ളും മീനും​കൊണ്ട്‌ അതു വക്കുവരെ നിറച്ചി​രി​ക്കു​ന്നു. വലത്തെ കൈയിൽ കട്ടികു​റഞ്ഞ, ഒരു ജോഡി മുള​ങ്കോ​ലു​ക​ളും അവൾ പിടി​ച്ചി​ട്ടുണ്ട്‌. തന്റെ കുഞ്ഞു​വി​ര​ലു​കൾ കൊണ്ട്‌ അവ വിദഗ്‌ധ​മാ​യി ചലിപ്പിച്ച്‌ തനിക്കി​ഷ്ട​പ്പെട്ട കഷണങ്ങൾ തന്നെ തിര​ഞ്ഞെ​ടുത്ത്‌ അതൊ​ട്ടും മുഖത്തു പറ്റിക്കാ​തെ കഴിക്കു​ക​യാണ്‌ അവൾ. ഇടയ്‌ക്കി​ട​യ്‌ക്ക്‌ അവൾ കോപ്പ ചുണ്ടോ​ടു ചേർത്തു​പി​ടി​ക്കു​ന്നുണ്ട്‌. എന്നിട്ട്‌, കോലു​കൾ വേഗത്തിൽ ചലിപ്പിച്ച്‌ ചോറ്‌ ഒട്ടും നിലത്തു വീഴ്‌ത്താ​തെ വായി​ലേ​ക്കി​ടു​ന്നു. ഇതെല്ലാം കണ്ടാൽ തോന്നും, അത്‌ ഉപയോ​ഗിച്ച്‌ ആഹാരം കഴിക്കു​ന്നത്‌ വളരെ എളുപ്പ​വും സ്വാഭാ​വി​ക​വും സൗകര്യ​പ്ര​ദ​വു​മാ​ണെന്ന്‌.

ആ കൊച്ചു​പെൺകു​ട്ടി​യു​ടെ കൈയി​ലി​രി​ക്കു​ന്നത്‌ എന്താ​ണെ​ന്ന​റി​യാ​മോ? അവയാണു പ്രസി​ദ്ധ​മായ ചോപ്പ്‌സ്റ്റി​ക്കു​കൾ അഥവാ ദന്ത-ദാരു നിർമി​ത​മായ കോലു​കൾ. ചൈനീസ്‌ ഭാഷയിൽ അവയെ ക്വൈ ട്‌സ്‌ എന്നാണു പറയുക. അതിന്റെ അർഥം “വേഗമു​ള്ളവ” എന്നും. എന്താ​ണെ​ങ്കി​ലും, തെക്കു​കി​ഴക്കൻ ഏഷ്യയിൽ അവയി​ല്ലാത്ത വീടുകൾ കാണി​ല്ലെ​ന്നു​തന്നെ പറയാം. ഒരുപക്ഷേ, ഒരു ചൈനീസ്‌ റെസ്റ്ററ​ന്റിൽ നിന്നു ഭക്ഷണം കഴിച്ച സമയത്ത്‌ നിങ്ങളും അവയൊ​ന്നു പരീക്ഷി​ച്ചു നോക്കി​യി​രി​ക്കാൻ സാധ്യ​ത​യുണ്ട്‌. എന്നാൽ, ചോപ്പ്‌സ്റ്റി​ക്കു​കൾ എന്ന ആശയം ഉടലെ​ടു​ത്തത്‌ എവി​ടെ​യാ​ണെന്നു നിങ്ങൾക്ക​റി​യാ​മോ? അവ ഏറ്റവും ആദ്യം ഉപയോ​ഗി​ച്ചത്‌ എവി​ടെ​യെ​ന്നും എങ്ങനെ​യെ​ന്നും ഉള്ളതിനെ കുറി​ച്ചോ? അവ എങ്ങനെ ശരിയായ വിധത്തിൽ ഉപയോ​ഗി​ക്കാ​മെന്ന്‌ അറിയാൻ നിങ്ങൾക്കു താത്‌പ​ര്യ​മു​ണ്ടോ?

“വേഗമു​ള്ളവ”

ഏകദേശം 20 മുതൽ 25 വരെ സെന്റി​മീ​റ്റർ നീളം വരുന്ന വണ്ണംകു​റഞ്ഞ കോലു​ക​ളാ​ണു ചോപ്പ്‌സ്റ്റി​ക്കു​കൾ. മിക്ക​പ്പോ​ഴും അവയ്‌ക്ക്‌ പകുതി​ഭാ​ഗം മുതൽ മേൽപ്പോ​ട്ടേക്കു ചതുരാ​കൃ​തി​യാ​ണു​ള്ളത്‌. അതു​കൊണ്ട്‌, അവ പിടി​ക്കാൻ എളുപ്പ​മാണ്‌ എന്നു മാത്രമല്ല മേശപ്പു​റത്തു വെച്ചാൽ ഉരുണ്ടു​പോ​കു​ക​യു​മില്ല. പകുതി​ക്കു താഴേ​ക്കുള്ള ഭാഗം മിക്ക​പ്പോ​ഴും ഉരുണ്ട​താ​യി​രി​ക്കും. ചൈനീസ്‌ ചോപ്പ്‌സ്റ്റി​ക്കു​കളെ അപേക്ഷിച്ച്‌ ജാപ്പനീസ്‌ ചോപ്പ്‌സ്റ്റി​ക്കു​കൾ പൊതു​വെ നീളം കുറഞ്ഞ​വ​യാണ്‌. തന്നെയു​മല്ല, ജാപ്പനീസ്‌ ചോപ്പ്‌സ്റ്റി​ക്കു​കൾക്ക്‌ കുറേ​ക്കൂ​ടെ കൂർത്ത അഗ്രമാണ്‌ ഉള്ളത്‌.

ഇന്ന്‌ ചോപ്പ്‌സ്റ്റി​ക്കു​കൾ വൻതോ​തിൽ ഉത്‌പാ​ദി​പ്പി​ക്ക​പ്പെ​ടു​ന്നു. ഒറ്റത്തവ​ണത്തെ ഉപയോ​ഗ​ത്തി​നു ശേഷം ഉപേക്ഷി​ക്കാ​വുന്ന തരം ചോപ്പ്‌സ്റ്റി​ക്കു​കൾ പായ്‌ക്കു ചെയ്‌ത രൂപത്തിൽ ഇന്നു പല റെസ്റ്ററ​ന്റു​ക​ളി​ലും ലഭ്യമാണ്‌. അവയുടെ മുകളറ്റം വേർപെ​ടു​ത്തി​യി​ട്ടി​ല്ലാ​യി​രി​ക്കും. ഉപയോ​ഗി​ക്കുന്ന ആളാണ്‌ അവ വേർപെ​ടു​ത്തി​യെ​ടു​ക്കേ​ണ്ടത്‌. ഒറ്റത്തവ​ണത്തെ ഉപയോ​ഗ​ത്തി​നു വേണ്ടി ആയതി​നാൽ, അത്തരം ചോപ്പ്‌സ്റ്റി​ക്കു​കൾ ഏതെങ്കി​ലും സാധാരണ തടി​കൊ​ണ്ടോ മുള​കൊ​ണ്ടോ ഉണ്ടാക്കി​യവ ആയിരി​ക്കും. വീടു​ക​ളി​ലും വലിയ ഹോട്ട​ലു​ക​ളി​ലു​മൊ​ക്കെ, കാണാൻ നല്ല ഭംഗി​യുള്ള ചോപ്പ്‌സ്റ്റി​ക്കു​ക​ളാണ്‌ പൊതു​വെ ഉപയോ​ഗി​ക്കു​ന്നത്‌. പോളീഷ്‌ ചെയ്‌ത മുള, വാർണീഷ്‌ ചെയ്‌ത തടി, പ്ലാസ്റ്റിക്‌, സ്റ്റെയിൻലെസ്‌ സ്റ്റീൽ എന്തിന്‌, ചില​പ്പോൾ വെള്ളി, ആനക്കൊമ്പ്‌ എന്നിവ ഉപയോ​ഗി​ച്ചു പോലും ചോപ്പ്‌സ്റ്റി​ക്കു​കൾ ഉണ്ടാക്കാ​റുണ്ട്‌. മോടി​കൂ​ട്ടു​ന്ന​തിന്‌ ചിലവ​യിൽ കവിത ആലേഖനം ചെയ്യു​ക​യോ ചിത്രങ്ങൾ വരയ്‌ക്കു​ക​യോ ചെയ്യാ​റുണ്ട്‌.

ചോപ്പ്‌സ്റ്റി​ക്കു​കൾ ഉപയോ​ഗി​ക്കേണ്ട വിധം

കഷ്ടിച്ച്‌ രണ്ടുവ​യസ്സു മാത്ര​മുള്ള ഒരു കുട്ടി സാധാ​ര​ണ​യി​ലും കൂടുതൽ വലിപ്പ​മു​ണ്ടെന്ന്‌ തോന്നി​ക്കുന്ന ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ ആഹാരം കഴിക്കുന്ന കാഴ്‌ച ചൈന​യും ജപ്പാനും പോലുള്ള പൗരസ്‌ത്യ നാടുകൾ സന്ദർശി​ക്കാ​നെ​ത്തുന്ന പലരി​ലും കൗതുകം ഉണർത്താ​റുണ്ട്‌. നിമി​ഷ​നേരം കൊണ്ട്‌ അവൻ പാത്ര​ത്തി​ലു​ള്ള​തെ​ല്ലാം ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ അകത്താ​ക്കു​ന്നു. അതു കണ്ടാൽ തോന്നും അവ ഉപയോ​ഗി​ക്കാൻ ഒരു പ്രയാ​സ​വു​മില്ല എന്ന്‌.

എന്താ, ചോപ്പ്‌സ്റ്റി​ക്കു​കൾ ഒന്ന്‌ ഉപയോ​ഗി​ച്ചു നോക്കു​ന്നോ? ആദ്യ​മൊ​ക്കെ, നിങ്ങൾക്കവ ഇഷ്ടാനു​സ​രണം ചലിപ്പി​ക്കാൻ കഴി​ഞ്ഞെന്നു വരില്ല. എന്നാൽ, അൽപ്പം പരിശീ​ലനം കൊണ്ട്‌ ഇതു സാധി​ക്കാ​വു​ന്ന​തേ​യു​ള്ളൂ. മാത്രമല്ല, പിന്നെ അവ നിങ്ങളു​ടെ കൈയു​ടെ ഒരു ഭാഗം​പോ​ലെ​തന്നെ ആയിത്തീ​രു​ക​യും ചെയ്യും.

ചോപ്പ്‌സ്റ്റി​ക്കു​കൾ രണ്ടും ഒരു കൈയിൽത്തന്നെ—സാധാ​ര​ണ​ഗ​തി​യിൽ വലത്തു കൈയിൽ—ആണു പിടി​ക്കേ​ണ്ടത്‌. (15-ാം പേജിലെ ചിത്രങ്ങൾ കാണുക.) ആദ്യം,  നിങ്ങളു​ടെ കൈ കുമ്പിൾ പോ​ലെ​യാ​ക്കുക. തള്ളവിരൽ ബാക്കി​യുള്ള വിരലു​ക​ളിൽ നിന്ന്‌ അകത്തി​യാ​ണു പിടി​ക്കേ​ണ്ടത്‌. ഒരു ചോപ്പ്‌സ്റ്റിക്ക്‌ മോതി​ര​വി​ര​ലി​ന്റെ തുമ്പത്തും ചൂണ്ടു​വി​ര​ലി​ന്റെ താഴ്‌ഭാ​ഗ​ത്തും തൊടു​ന്ന​രീ​തി​യിൽ തള്ളവി​ര​ലി​ന്റെ ഇടയിൽ വെക്കുക. രണ്ടാമത്തെ ചോപ്പ്‌സ്റ്റിക്ക്‌ ആദ്യ​ത്തേ​തി​നോ​ടു സമാന്ത​ര​മാ​യി വരത്തക്ക​വി​ധം തള്ളവി​ര​ലും ചൂണ്ടു​വി​ര​ലും നടുവി​ര​ലും ഉപയോ​ഗിച്ച്‌ അതു പിടി​ക്കുക, ഒരു പെൻസിൽ പിടി​ക്കു​ന്നതു പോലെ തന്നെ. മേശപ്പു​റത്ത്‌ മെല്ലെ​യൊ​ന്നു തട്ടി ചോപ്പ്‌സ്റ്റി​ക്കു​ക​ളു​ടെ അറ്റം ഒരേ നിരപ്പി​ലാ​ക്കുക. ഇനി, താഴത്തെ ചോപ്പ്‌സ്റ്റിക്ക്‌ അനക്കാതെ പിടി​ച്ചിട്ട്‌, ചൂണ്ടു​വി​ര​ലും നടുവി​ര​ലും ഒരുമിച്ച്‌ താഴേ​ക്കും മുകളി​ലേ​ക്കും ചലിപ്പി​ച്ചു​കൊണ്ട്‌ മുകളി​ലത്തെ ചോപ്പ്‌സ്റ്റിക്ക്‌ മാത്രം അനക്കുക. ചോപ്പ്‌സ്റ്റി​ക്കു​ക​ളു​ടെ അറ്റം രണ്ടും അനായാ​സം അടുപ്പി​ച്ചു കൊണ്ടു​വ​രാൻ കഴിയു​ന്നതു വരെ പരിശീ​ലി​ക്കുക. ഒരു ചൈനീസ്‌ ഭക്ഷണത്തി​ലെ സ്വാദൂ​റുന്ന വിഭവ​ങ്ങ​ളിൽ ഏതും എടുത്തു കഴിക്കാൻ നിങ്ങൾ ഇപ്പോൾ തയ്യാറാ​യി​ക്ക​ഴി​ഞ്ഞി​രി​ക്കു​ന്നു. ഒരു മണി ചോറ്‌ മുതൽ ഒരു കാടമുട്ട വരെ! ചൈനീസ്‌ ഭക്ഷണവും ചോപ്പ്‌സ്റ്റി​ക്കു​ക​ളും ശരിക്കും യോജി​ച്ചു​പോ​കും. കാരണ​മെ​ന്തെ​ന്നോ? സാധാ​ര​ണ​ഗ​തി​യിൽ, വായിൽക്കൊ​ള്ളാ​വു​ന്നത്ര വലിപ്പ​മുള്ള കഷണങ്ങ​ളാ​യി​ട്ടാണ്‌ അവർ ആഹാര​സാ​ധ​നങ്ങൾ മുറി​ക്കുക.

എന്നാൽ കോഴി​യെ​യോ താറാ​വി​നെ​യോ ഒക്കെ മുഴു​വ​നോ​ടെ പൊരിച്ച്‌ നിങ്ങളു​ടെ മുന്നിൽ കൊണ്ടു​വന്നു വെക്കു​ക​യാ​ണെ​ങ്കി​ലോ? സാധാ​ര​ണ​ഗ​തി​യിൽ, വായിൽക്കൊ​ള്ളാ​വു​ന്നത്ര വലിപ്പ​ത്തിൽ കഷണങ്ങൾ അനായാ​സം വിടു​വി​ച്ചെ​ടു​ക്കാൻ പാകത്തി​നുള്ള വേവ്‌ ഇറച്ചി​ക്കു​ണ്ടാ​യി​രി​ക്കും. മീൻ കഴിക്കാൻ ഏറ്റവും പറ്റിയ​താണ്‌ ചോപ്പ്‌സ്റ്റി​ക്കു​കൾ. മിക്ക​പ്പോ​ഴും ഒരു മുഴു മീനാ​യി​രി​ക്കും പാത്ര​ത്തി​ലെ​ത്തുക എന്നതു​തന്നെ കാരണം. കത്തിയും മുള്ളും ഉപയോ​ഗി​ച്ചു മീനിന്റെ മുള്ളു മാറ്റു​ന്ന​തി​നെ​ക്കാൾ എത്ര എളുപ്പ​മാ​ണെ​ന്നോ ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ അങ്ങനെ ചെയ്യാൻ.

ഇനി, ചോറു കഴിക്കു​മ്പോ​ഴാ​ണെ​ങ്കി​ലോ? വീട്ടി​ലോ മറ്റോ ആണെങ്കിൽ ഇടതു​കൈ കൊണ്ട്‌ കോപ്പ ചുണ്ടോട്‌ അടുപ്പി​ച്ചു​പി​ടിച്ച്‌, ചോപ്പ്‌സ്റ്റി​ക്കു​കൾകൊണ്ട്‌ ചോറ്‌ കോരി​ക്കോ​രി വായി​ലേ​ക്കി​ടാ​വു​ന്ന​താണ്‌. ഔപചാ​രിക വേളക​ളിൽ പക്ഷേ, കൈയി​ലി​രി​ക്കുന്ന കോപ്പ​യിൽ നിന്ന്‌ ചോപ്പ്‌സ്റ്റി​ക്കു​കൾകൊണ്ട്‌ ചോറ്‌ അൽപ്പാൽപ്പ​മാ​യി എടുത്തു കഴിക്കു​ന്ന​താണ്‌ മര്യാദ.

ചൈനീസ്‌ ഭക്ഷണത്തി​ലെ ഒഴിച്ചു​കൂ​ടാ​നാ​കാത്ത ഇനമായ സൂപ്പ്‌ കഴിക്കു​മ്പോ​ഴോ? സാധാ​ര​ണ​ഗ​തി​യിൽ, സൂപ്പ്‌ എടുക്കു​ന്ന​തിന്‌ ഒരു പോർസെ​ലേൻ തവി വെച്ചി​ട്ടു​ണ്ടാ​യി​രി​ക്കും. എന്നാൽ സൂപ്പിൽ പച്ചക്കറി, ഇറച്ചി, മീൻ എന്നിവ​യു​ടെ കഷണങ്ങ​ളോ നൂഡിൽസോ ഒക്കെ ഉണ്ടെങ്കിൽ വലതു​കൈ​യിൽ പിടി​ച്ചി​രി​ക്കുന്ന ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ അവ എടുക്കുക. അതു വായി​ലേക്കു കൊണ്ടു​പോ​കു​മ്പോൾ സൂപ്പു ദേഹത്തു വീഴാ​തി​രി​ക്കു​ന്ന​തിന്‌ ഇടതു കൈ​കൊ​ണ്ടു തവിയും പിടി​ക്കുക.

പെരു​മാ​റ്റ​മ​ര്യാ​ദ​ക​ളും ചോപ്പ്‌സ്റ്റി​ക്കു​ക​ളും

ഒരു ചൈനീസ്‌ വീട്ടിൽ ഭക്ഷണത്തി​നാ​യി നിങ്ങളെ ക്ഷണിക്കു​ക​യാ​ണെ​ങ്കിൽ, അവരുടെ ഊണു​മേ​ശ​യി​ലെ പെരു​മാ​റ്റ​രീ​തി​കൾ അഥവാ മര്യാ​ദകൾ അറിഞ്ഞി​രി​ക്കു​ന്നതു നല്ലതാണ്‌. ആദ്യം​തന്നെ അവർ വിഭവ​ങ്ങ​ളെ​ല്ലാം കൊണ്ടു​വന്ന്‌ മേശയു​ടെ മധ്യഭാ​ഗത്തു നിരത്തി​വെ​ക്കും. തുടർന്ന്‌, ആതി​ഥേ​യ​നോ ഗൃഹനാ​ഥ​നോ തന്റെ ചോപ്പ്‌സ്റ്റി​ക്കു​കൾ കൈയി​ലെ​ടു​ത്തിട്ട്‌ ആഹാരം കഴിച്ചു​തു​ട​ങ്ങാൻ എല്ലാവ​രെ​യും നോക്കി ആംഗ്യം കാട്ടും. അപ്പോ​ഴാ​യി​രി​ക്കും അതിഥി​കൾ  തങ്ങളുടെ ചോപ്പ്‌സ്റ്റി​ക്കു​കൾ കൈയി​ലെ​ടുത്ത്‌ ആഹാരം കഴിച്ചു തുടങ്ങു​ന്നത്‌.

പാശ്ചാത്യ രീതി​യി​ലുള്ള ചില ഭക്ഷണ​വേ​ള​ക​ളിൽ നിന്നു വ്യത്യ​സ്‌ത​മാ​യി, ഇവിടെ മേശയ്‌ക്കു ചുറ്റും ഇരിക്കു​ന്ന​വർക്കു വിഭവങ്ങൾ കൈമാ​റുന്ന രീതി​യില്ല. അതിനു​പ​കരം, നിരത്തി​വെ​ച്ചി​രി​ക്കു​ന്നി​ടത്തു നിന്നു​തന്നെ എല്ലാവ​രും എടുത്തു​ക​ഴി​ക്കു​ക​യാ​ണു ചെയ്യാറ്‌. കുടുംബ ഭക്ഷണ​വേ​ള​ക​ളിൽ, ഓരോ​രു​ത്ത​രും സ്വന്തം ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ എല്ലാവർക്കും​കൂ​ടെ എടുക്കാൻ പൊതു​വാ​യി വെച്ചി​രി​ക്കുന്ന പാത്ര​ങ്ങ​ളിൽ നിന്നു കഷണങ്ങൾ എടുത്തു നേരെ വായി​ലേ​ക്കി​ടു​ക​യാ​ണു പതിവ്‌. എന്നാൽ, ഭക്ഷണം ചവയ്‌ക്കു​മ്പോൾ ശബ്ദമു​ണ്ടാ​ക്കു​ന്ന​തോ ചോപ്പ്‌സ്റ്റി​ക്കു​ക​ളു​ടെ അറ്റം നക്കുന്ന​തോ പാത്ര​ത്തിൽ നിങ്ങൾക്കി​ഷ്ട​പ്പെട്ട കഷണം തിരയു​ന്ന​തോ ഒക്കെ മോശ​മായ പെരു​മാ​റ്റ​രീ​തി​ക​ളാ​യി​ട്ടാണ്‌ കണക്കാ​ക്ക​പ്പെ​ടു​ന്നത്‌. ചോപ്പ്‌സ്റ്റി​ക്കു​ക​ളു​ടെ അറ്റം കടിക്ക​രു​തെന്നു പൗരസ്‌ത്യ ദേശങ്ങ​ളി​ലെ അമ്മമാർ കുഞ്ഞു​ങ്ങളെ പഠിപ്പി​ക്കാ​റുണ്ട്‌. അത്‌ ശുചിത്വ സംബന്ധ​മായ കാരണ​ങ്ങ​ളാൽ മാത്രമല്ല, ചോപ്പ്‌സ്റ്റി​ക്കു​ക​ളു​ടെ ഭംഗി നഷ്ടപ്പെ​ടും എന്നതി​നാ​ലും ആണ്‌.

അതിഥി​ക​ളോ​ടുള്ള പരിഗണന നിമിത്തം ചില​പ്പോ​ഴെ​ല്ലാം വിളമ്പാ​നുള്ള തവിക​ളോ കൂടുതൽ ചോപ്പ്‌സ്റ്റി​ക്കു​ക​ളോ നൽകാ​റുണ്ട്‌. മേശയു​ടെ നടുവിൽ വെച്ചി​രി​ക്കുന്ന പാത്ര​ങ്ങ​ളിൽ നിന്ന്‌ മറ്റൊരു പാത്ര​ത്തി​ലേ​ക്കോ നിങ്ങളു​ടെ കോപ്പ​യി​ലേ​ക്കോ കഷണങ്ങൾ എടുക്കു​ന്ന​തി​നു വേണ്ടി​യാണ്‌ അവ ഉപയോ​ഗി​ക്കു​ന്നത്‌. എന്നാലും, ഒരു നല്ല കഷണം എടുത്തു നിങ്ങളു​ടെ പാത്ര​ത്തി​ലേ​ക്കി​ടാൻ ആതി​ഥേയൻ തന്റെ സ്വന്തം ചോപ്പ്‌സ്റ്റി​ക്കു​കൾ ആണ്‌ ഉപയോ​ഗി​ക്കു​ന്നത്‌ എങ്കിൽ പരിഭ​വി​ക്കേ​ണ്ട​തില്ല. ഒന്നുമ​ല്ലെ​ങ്കി​ലും, തന്റെ ബഹുമാ​ന്യ​നായ അതിഥിക്ക്‌ ഏറ്റവും നല്ലതു കിട്ടി​യെന്ന്‌ ഉറപ്പാ​ക്കേ​ണ്ടത്‌ അദ്ദേഹ​ത്തി​ന്റെ കടമയാ​ണ​ല്ലോ!

കത്തിയു​ടെ​യും മുള്ളി​ന്റെ​യും കാര്യ​ത്തി​ലെ​ന്ന​പോ​ലെ​തന്നെ, ചോപ്പ്‌സ്റ്റി​ക്കു​കൾ മറ്റുള്ള​വ​രു​ടെ നേർക്കു ചൂണ്ടു​ന്ന​തും അവ കൈയിൽ വെച്ചു​കൊണ്ട്‌ മറ്റെ​ന്തെ​ങ്കി​ലും എടുക്കു​ന്ന​തും മോശ​മാ​യി​ട്ടാ​ണു കണക്കാ​ക്കു​ന്നത്‌. അതു​കൊണ്ട്‌, നാപ്‌കി​നോ ചായക്ക​പ്പോ, വിളമ്പാൻ ഉപയോ​ഗി​ക്കുന്ന തവിയോ ഒക്കെ എടു​ക്കേ​ണ്ട​തു​ണ്ടെ​ങ്കിൽ, ആദ്യം ചോപ്പ്‌സ്റ്റി​ക്കു​കൾ താഴെ വെക്കുക. ഇതിനു​വേണ്ടി മിക്ക​പ്പോ​ഴും ആകർഷ​ക​മായ ചെറിയ ചോപ്പ്‌സ്റ്റിക്ക്‌ സ്റ്റാൻഡു​കൾ വെച്ചി​ട്ടു​ണ്ടാ​കും.

കഴിച്ചു​ക​ഴി​യു​മ്പോൾ ചോപ്പ്‌സ്റ്റി​ക്കു​കൾ അലക്ഷ്യ​മാ​യി ഇട്ടിട്ടു​പോ​കാ​തെ അവ രണ്ടും വൃത്തി​യാ​യി ചേർത്തു​വെ​ക്കുക. എന്നിട്ട്‌, മറ്റുള്ളവർ കഴിച്ചു​തീ​രു​ന്നതു വരെ കാത്തി​രി​ക്കുക. എല്ലാവ​രും കഴിച്ചു​ക​ഴി​യു​ന്ന​തി​നു മുമ്പ്‌ എഴു​ന്നേറ്റു പോകു​ന്നത്‌ ഒരു നല്ല രീതിയല്ല. ആതി​ഥേ​യ​നോ ഗൃഹനാ​ഥ​നോ എഴു​ന്നേറ്റു കഴിഞ്ഞിട്ട്‌ മറ്റുള്ള​വ​രോ​ടും ‘പോകാം’ എന്നു പറയു​മ്പോ​ഴാണ്‌ ഭക്ഷണവേള അവസാ​നി​ക്കു​ന്നത്‌.

ചോപ്പ്‌സ്റ്റി​ക്കു​കൾ ഉപയോ​ഗി​ക്കേണ്ട വിധം മനസ്സി​ലായ സ്ഥിതിക്ക്‌, ഇനി ചെയ്യേ​ണ്ടത്‌ ഇത്രമാ​ത്രം. കുറച്ചു ചോപ്പ്‌സ്റ്റി​ക്കു​കൾ സംഘടി​പ്പിച്ച്‌ അവ ഉപയോ​ഗി​ക്കുന്ന വിധം പരിശീ​ലി​ച്ചു നോക്കുക. അടുത്ത തവണ ആരെങ്കി​ലും നിങ്ങളെ ഒരു ചൈനീസ്‌ റെസ്റ്ററ​ന്റി​ലേ​ക്കോ ചൈനീസ്‌ ഭക്ഷണം കഴിക്കു​ന്ന​തിന്‌ അവരുടെ വീട്ടി​ലേ​ക്കോ ക്ഷണിക്കു​ന്നെ​ങ്കിൽ, ക്വൈ ട്‌സ്‌ എന്തു​കൊ​ണ്ടൊ​ന്നു പരീക്ഷി​ച്ചു നോക്കി​ക്കൂ​ടാ? ചില​പ്പോൾ അത്‌ ആഹാരം​തന്നെ കൂടുതൽ രുചി​ക​ര​മാ​ക്കി​യേ​ക്കാം!

[14-ാം പേജിലെ ചതുരം/ചിത്രം]

അൽപ്പം ചോപ്പ്‌സ്റ്റിക്ക്‌ പുരാണം

ചോപ്പ്‌സ്റ്റിക്കുകൾ ആദ്യ​മൊ​ക്കെ ആഹാരം കഴിക്കു​ന്ന​തി​നു വേണ്ടിയല്ല, പാചകം ചെയ്യു​ന്ന​തി​നു വേണ്ടി​യാണ്‌ ഉപയോ​ഗി​ച്ചി​രു​ന്നത്‌ എന്നാണ്‌ ചില ചൈനീസ്‌ പണ്ഡിത​ന്മാ​രു​ടെ അഭി​പ്രാ​യം. ചെറു​ക​ഷ​ണ​ങ്ങ​ളാ​ക്കി ഇലയിൽ പൊതി​ഞ്ഞു​വെ​ക്കുന്ന വേവി​ക്കാത്ത ആഹാര​സാ​ധ​ന​ങ്ങ​ളി​ലേക്ക്‌ ചൂടാ​ക്കിയ ചെറിയ ഉരുളൻ കല്ലുകൾ എടുത്തു​വെ​ക്കു​ന്ന​തിന്‌ ഈ കോലു​കൾ ഉപയോ​ഗി​ച്ചി​രു​ന്നു. അങ്ങനെ ഒട്ടും പൊള്ള​ലേൽക്കാ​തെ​തന്നെ പാചക​ക്കാ​രന്‌ ആഹാരം പാചകം ചെയ്യാൻ കഴിയു​മാ​യി​രു​ന്നു! എന്നാൽ പിന്നീ​ടുള്ള നാളു​ക​ളിൽ, പാചകം ചെയ്യുന്ന കലത്തിൽ നിന്ന്‌ കഷണങ്ങൾ എടുക്കു​ന്ന​തി​നാ​യി​രു​ന്നു ചോപ്പ്‌സ്റ്റി​ക്കു​കൾ ഉപയോ​ഗി​ച്ചി​രു​ന്നത്‌.

സാധ്യതയനുസരിച്ച്‌, മുളയോ a പെട്ടെന്നു നശിച്ചു​പോ​കുന്ന തരം തടിയോ ഉപയോ​ഗി​ച്ചാണ്‌ ആദ്യകാ​ലത്തു ചോപ്പ്‌സ്റ്റി​ക്കു​കൾ ഉണ്ടാക്കി​യി​രു​ന്നത്‌. അവ ഏറ്റവു​മാ​ദ്യം ഉപയോ​ഗി​ച്ചി​രു​ന്നത്‌ എപ്പോ​ഴാ​യി​രു​ന്നു എന്നു തറപ്പിച്ചു പറയാ​നാ​കാ​ത്ത​തി​ന്റെ ഒരു കാരണ​വും അതുത​ന്നെ​യാണ്‌. ചൈന​യിൽ ചോപ്പ്‌സ്റ്റി​ക്കു​ക​ളു​ടെ ഉപയോ​ഗ​ത്തിന്‌ ഷാങ്‌ രാജവം​ശ​ത്തി​ന്റെ കാല​ത്തോ​ളം (പൊ.യു.മു. ഏകദേശം 16 മുതൽ 11 വരെ നൂറ്റാ​ണ്ടു​കൾ) പഴക്കമു​ണ്ടെ​ന്നാണ്‌ ചിലരു​ടെ വിശ്വാ​സം. കൺഫ്യൂ​ഷ്യസ്‌ ജീവി​ച്ചി​രുന്ന കാലഘ​ട്ട​ത്തിന്‌ (പൊ.യു.മു. 551 മുതൽ 479 വരെ) ശേഷം അധികം​താ​മ​സി​യാ​തെ എഴുത​പ്പെട്ട ഒരു ചരി​ത്ര​വി​വ​ര​ണ​ത്തിൽ സൂപ്പിൽ നിന്ന്‌ ആഹാരം ‘പെറു​ക്കി​യെ​ടു​ക്കു​ന്ന​തി​നെ’ കുറിച്ചു പറയു​ന്നുണ്ട്‌. ഏതെങ്കി​ലും തരത്തി​ലുള്ള ചോപ്പ്‌സ്റ്റി​ക്കു​കൾ അന്ന്‌ ഉപയോ​ഗ​ത്തിൽ ഉണ്ടായി​രു​ന്നി​രി​ക്കാം എന്നാണ്‌ അതു സൂചി​പ്പി​ക്കു​ന്നത്‌.

ഹാൻ രാജവം​ശം ഭരണം ആരംഭിച്ച കാലഘ​ട്ട​ത്തിൽ (പൊ.യു.മു. 206 മുതൽ പൊ.യു. 220 വരെ) ചോപ്പ്‌സ്റ്റി​ക്കു​കൾ ഉപയോ​ഗിച്ച്‌ ആഹാരം കഴിക്കു​ന്നത്‌ സർവസാ​ധാ​ര​ണ​മാ​യി തീർന്നി​രു​ന്നു. ആ കാലഘ​ട്ട​ത്തി​ലേ​തെന്നു നിർണ​യി​ക്ക​പ്പെട്ട, ഹ്വാൻ പ്രവി​ശ്യ​യി​ലെ ചാങ്‌ഷാ​യി​ലുള്ള ഒരു ശവകു​ടീ​ര​ത്തിൽ നിന്ന്‌ വാർണീഷ്‌ അടിച്ച ഒരു സെറ്റ്‌ പാത്രങ്ങൾ കുഴി​ച്ചെ​ടു​ക്കു​ക​യു​ണ്ടാ​യി. ആഹാരം കഴിക്കു​ന്ന​തിന്‌ ഉപയോ​ഗി​ച്ചി​രുന്ന ആ പാത്ര​ങ്ങ​ളു​ടെ കൂട്ടത്തിൽ ചോപ്പ്‌സ്റ്റി​ക്കു​ക​ളും ഉണ്ടായി​രു​ന്നു.

ജപ്പാൻകാരും കൊറി​യ​ക്കാ​രും വിയറ്റ്‌നാം​കാ​രും മറ്റു പൗരസ്‌ത്യ​ദേ​ശ​ക്കാ​രും ചോപ്പ്‌സ്റ്റി​ക്കു​കൾ ഉപയോ​ഗി​ക്കു​ന്നുണ്ട്‌. ചൈനീസ്‌ സംസ്‌കാ​ര​ത്തി​ന്റെ സ്വാധീ​ന​മാണ്‌ അതിന്റെ പ്രധാന കാരണം.

[അടിക്കു​റിപ്പ്‌]

[15-ാം പേജിലെ ചിത്രങ്ങൾ]

പരിശീലിക്കൂ, നിങ്ങൾക്കും അവ വഴങ്ങും