ഞങ്ങളുടെ വായനക്കാരിൽനിന്ന്
ഞങ്ങളുടെ വായനക്കാരിൽനിന്ന്
അനാരോഗ്യകരമായ ജീവിതശൈലികൾ കഴിഞ്ഞ ഏതാനും മാസങ്ങളായി എന്റെ ആരോഗ്യനില തീരെ മോശമാണ്. അതുകൊണ്ട് ജീവിതശൈലിയിൽ മാറ്റം വരുത്തിക്കൊണ്ട് ആരോഗ്യം മെച്ചപ്പെടുത്താം എന്ന കാര്യം മനസ്സിലാക്കിയപ്പോൾ വളരെ ആശ്വാസം തോന്നി. “നിങ്ങളുടെ ജീവിതശൈലി നിങ്ങളെ കൊല്ലുന്നുവോ?” (ജൂലൈ 8, 1999) എന്ന ലേഖന പരമ്പര വായിച്ചപ്പോൾ ചില ആഹാരസാധനങ്ങൾ അധികം കഴിക്കാതിരിക്കുകയും ധാരാളം പഴങ്ങളും പച്ചക്കറികളും ഉൾക്കൊള്ളിച്ചുകൊണ്ടുള്ള കൂടുതൽ സമീകൃതമായ ഒരു ഭക്ഷണക്രമം ഉണ്ടായിരിക്കുകയും ചെയ്യേണ്ടതിന്റെ ആവശ്യം എനിക്കു ബോധ്യമായി.
ഇ. പി. എം., ബ്രസീൽ
വൈകിയുള്ള പ്രതികരണം “നിരവധി വർഷങ്ങൾക്കു ശേഷം പൊട്ടിമുളച്ച വിത്ത്” (ജൂലൈ 8, 1999) എന്ന ലേഖനം എനിക്കു വളരെയധികം പ്രോത്സാഹനം നൽകി. ഞാൻ മുഴുസമയ ശുശ്രൂഷ തുടങ്ങിയിട്ട് ഇപ്പോൾ മൂന്നു വർഷമായി. ആഗ്രഹിക്കുന്ന തരത്തിലുള്ള ഫലങ്ങൾ കിട്ടാതെ വരുമ്പോൾ എനിക്കു നിരാശ തോന്നുകയും സേവനത്തിൽ തുടരുന്നതിനുള്ള എന്റെ നിശ്ചയദാർഢ്യം നഷ്ടമാകുകയും ചെയ്യുന്നു. എന്നാൽ, എന്നാലാകുന്നതു ചെയ്തതിനു ശേഷം ബാക്കി കാര്യങ്ങൾ യഹോവയുടെ കരങ്ങളിൽ അർപ്പിക്കാൻ ഈ ലേഖനം പ്രോത്സാഹനമേകി.
ടി. എൻ., ജപ്പാൻ
പരിഹാസം 1999 ജൂൺ 22 ലക്കം ഉണരുക!യിലെ “യുവജനങ്ങൾ ചോദിക്കുന്നു . . . പരിഹാസത്തെ എനിക്ക് എങ്ങനെ നേരിടാൻ കഴിയും?” എന്ന ലേഖനം എനിക്കു വളരെ ഇഷ്ടമായി. നേഴ്സറിയിൽ പോകാൻ തുടങ്ങിയ കാലം മുതൽ സഹപാഠികൾ എന്റെ വിശ്വാസത്തെ സംബന്ധിച്ച് എന്നോടു ചോദിക്കുമായിരുന്നു. ചിലപ്പോൾ അവരുടെ ചോദ്യങ്ങൾ മുറിപ്പെടുത്തുന്ന തരത്തിലുള്ളവ ആയിരിക്കും. ഞാൻ ക്ഷമയുടെ നെല്ലിപ്പലക കണ്ടിട്ടുള്ള അവസരങ്ങൾ പോലും ഉണ്ടായിട്ടുണ്ട്. ഇവയെല്ലാം വിശ്വാസത്തിന്റെ പരിശോധനകളാണെന്ന് ഞാൻ ഇപ്പോൾ മനസ്സിലാക്കുന്നു. എങ്കിലും സ്കൂളിൽ വെച്ച് നല്ല സാക്ഷ്യം നൽകാനുള്ള അവസരങ്ങളും എനിക്കു ലഭിച്ചിട്ടുണ്ട്.
എൽ. സി., ഐക്യനാടുകൾ
മതപരമായ വിശേഷദിവസാഘോഷങ്ങളിലും ദേശഭക്തിപരമായ ചടങ്ങുകളിലും പങ്കെടുക്കാൻ വിസമ്മതിച്ചതിനാൽ ഞാൻ പലപ്പോഴും പരിഹാസപാത്രമായിട്ടുണ്ട്. സത്യസന്ധനായിരിക്കുകയും ബൈബിളിന്റെ ധാർമിക നിലവാരങ്ങൾ ഉയർത്തിപ്പിടിക്കുകയും ചെയ്തതു നിമിത്തം എനിക്കു വളരെയധികം ബുദ്ധിമുട്ടുകൾ അനുഭവിക്കേണ്ടി വന്നിരിക്കുന്നു. എങ്കിലും, സൂക്ഷ്മ പരിജ്ഞാനം സമ്പാദിക്കുന്നത് പ്രതിവാദം നടത്തുന്നതിനും എന്റെ വിശ്വാസങ്ങളെ സംബന്ധിച്ച് ലജ്ജിക്കാതെ തുറന്നു സംസാരിക്കുന്നതിനും എന്നെ സഹായിച്ചിട്ടുണ്ട്.
എച്ച്. സി., സാംബിയ
കൗമാരം പിന്നിട്ടിട്ട് ഇപ്പോൾ വർഷങ്ങൾ പലതായെങ്കിലും—എനിക്ക് 50-ലധികം വയസ്സുണ്ട്!—ഞാൻ ഈ ലേഖനം വളരെ വിലമതിച്ചു. ശുശ്രൂഷയിൽ നേരിടേണ്ടിവരുന്ന എതിർപ്പുകൾ നമ്മെ പിടിച്ചുലച്ചേക്കാവുന്ന സന്ദർഭങ്ങളുണ്ട്. ചിലപ്പോൾ അതേ രീതിയിൽ തിരിച്ചും പെരുമാറാൻ നമുക്കു തോന്നിയേക്കാം. അതുകൊണ്ട് “തമാശ രൂപത്തിൽ ആണെങ്കിൽ പോലും, ഉരുളയ്ക്ക് ഉപ്പേരി പോലെ മറുപടി കൊടുക്കാൻ ശ്രമിച്ചാൽ അത് എരിതീയിൽ എണ്ണയൊഴിക്കാനേ ഉപകരിക്കൂ. മാത്രമല്ല, അതു കൂടുതൽ പരിഹാസം ക്ഷണിച്ചു വരുത്തുക പോലും ചെയ്തേക്കാം” എന്ന ഓർമിപ്പിക്കൽ ഞാൻ വിലമതിച്ചു. തിരിച്ചടിക്കുകയാണെന്ന തോന്നൽ ഉളവാക്കാത്ത രീതിയിൽ പ്രതിവാദം നടത്താൻ ഞാൻ ശ്രമിക്കാറുണ്ട്. അങ്ങനെ ചെയ്യുന്നതിൽ തുടരേണ്ടതുണ്ടെന്ന് ഈ ഓർമിപ്പിക്കൽ എന്നെ ബോധ്യപ്പെടുത്തി.
എ. എഫ്., ഐക്യനാടുകൾ
കൂടുതൽ കാലം ജീവിക്കൽ “കൂടുതൽ കാലം കൂടുതൽ ആരോഗ്യത്തോടെ” (ജൂലൈ 22, 1999) എന്ന വിശിഷ്ട ലേഖനത്തിനുള്ള അഭിനന്ദനം അറിയിക്കാതിരിക്കാൻ വയ്യ. ഒടുവിൽ ശരാശരി ആയുർദൈർഘ്യവും ആയുർപ്രതീക്ഷയും തമ്മിലുള്ള വ്യത്യാസം എന്താണെന്നതിനെ കുറിച്ചു മനസ്സിലാവുന്ന തരത്തിലുള്ള ഒരു വിശദീകരണം എനിക്കു ലഭിച്ചിരിക്കുന്നു. കൂടാതെ, വാർധക്യ സഹജമായ പല പ്രശ്നങ്ങളെയും എങ്ങനെ തടുക്കാം എന്നതിനെ കുറിച്ചുള്ള നല്ല മാർഗനിർദേശങ്ങൾ, ആത്മാനുകമ്പയുമായി മല്ലിടുന്ന 88 വയസ്സുള്ള എന്റെ മുത്തച്ഛനെ സഹായിക്കാൻ എനിക്കു നയപൂർവം ഉപയോഗിക്കാൻ കഴിയും.
ടി. എൻ., ഐക്യനാടുകൾ
കേൾക്കുന്ന നായ് “എന്റെ നായ്, എന്റെ കാത്!” (ജൂലൈ 22, 1999) എന്ന ലേഖനത്തിനു നിങ്ങളോടു നന്ദി പറയാൻ ഞാൻ ആഗ്രഹിക്കുന്നു. കേൾവി സംബന്ധമായ പ്രശ്നങ്ങളുള്ളവർ അനുഭവിക്കുന്ന ബുദ്ധിമുട്ടുകൾ എത്ര വലുതാണ് എന്ന അറിവ് അവരോടു കൂടുതൽ സഹാനുഭൂതിയോടെ പെരുമാറാൻ എന്നെ സഹായിക്കുന്നു. കൂടാതെ എനിക്കു നായ്ക്കളെ വളരെ ഇഷ്ടമാണ്, അതുകൊണ്ട് അവ അനേകരെ സഹായിക്കുകയും പിന്തുണ പ്രദാനം ചെയ്യുകയും ചെയ്യുന്നു എന്നു വായിച്ചപ്പോൾ വളരെ സന്തോഷം തോന്നി.
എൽ. ബി., ഇറ്റലി
ഞാൻ ഫൈബ്രോമയാൾജിയ ഉള്ള ഒരു വ്യക്തിയാണ്. കൂടാതെ, എന്റെ നട്ടെല്ലിനും ക്ഷതമേൽക്കുകയുണ്ടായി. തന്മൂലം ചക്രക്കസേരയെ ആശ്രയിച്ചു കഴിയേണ്ട ഒരു അവസ്ഥ വന്നിരിക്കുന്നു. എന്റെ സഹായത്തിനായി ഒരു നായ് ഉണ്ട്. അവൾ എനിക്കു വേണ്ടി ചെയ്യുന്ന സേവനങ്ങൾക്ക് കയ്യും കണക്കുമില്ല. സാധനം വാങ്ങാൻ കടയിൽ പോകുമ്പോഴും വീടു വൃത്തിയാക്കുമ്പോഴും അവൾ എന്നെ സഹായിക്കുന്നു. എന്റെ സാഹിത്യങ്ങൾ ചുമന്നുകൊണ്ട് ക്രിസ്തീയ ശുശ്രൂഷയിൽ പോലും എന്റെ നായ് എനിക്കു തുണയാകുന്നു.
കെ. ഡബ്ല്യു., ഐക്യനാടുകൾ