‘ലോകത്തിന്റെ മുഖച്ഛായ മാറും’
‘ലോകത്തിന്റെ മുഖച്ഛായ മാറും’
കഴിഞ്ഞ ആഗസ്റ്റിൽ മോസ്കോയിൽ യഹോവയുടെ സാക്ഷികളുടെ ഒരു കൺവെൻഷൻ റദ്ദാക്കുന്നതിനായി നടന്ന ശ്രമങ്ങൾ വലിയ ശ്രദ്ധ പിടിച്ചുപറ്റി. (കൂടുതൽ വിവരങ്ങൾക്ക് 27, 28 പേജുകൾ കാണുക.) 1999 ആഗസ്റ്റ് 21-ലെ ദ മോസ്കോ ടൈംസിൽ എൻഡ്ര്യേ സൊളോടൊവ് ജൂനിയർ ഇപ്രകാരം റിപ്പോർട്ടു ചെയ്തു: “യഹോവയുടെ സാക്ഷികളുടെ പൊതുയോഗം നടത്തുന്നതിന് സ്പോർട്സ് കോംപ്ലക്സിന്റെ ഭാരവാഹികൾ എതിരായിരുന്നില്ല എന്ന് അതിന്റെ ഡെപ്യൂട്ടി ഡയറക്ടറായ വ്ളഡ്യമ്യീർ കൊസർയെവ് പറഞ്ഞു. [യോഗം റദ്ദാക്കിക്കൊണ്ടുള്ള] ആ ഉത്തരവിന്റെ യഥാർഥ ഉറവിടത്തെ കുറിച്ചു തനിക്ക് ഒന്നും അറിയില്ലെന്ന് അദ്ദേഹം പറഞ്ഞു.
ഒരാഴ്ചയ്ക്കു ശേഷം ദ മോസ്കോ ടൈംസിൽ പ്രസിദ്ധീകരിച്ച ഒരു കത്തിൽ ഒരു വായനക്കാരൻ “തികച്ചും നിഷ്പക്ഷമായ” ആ ലേഖനം പ്രസിദ്ധീകരിച്ചതിനു പത്രത്തെ അനുമോദിച്ചു. അത് “ആളുകൾ വായിച്ചിരിക്കേണ്ട ഒരു ലേഖനം തന്നെയായിരുന്നു” എന്നും ആ കത്തിൽ അദ്ദേഹം അഭിപ്രായപ്പെടുകയുണ്ടായി. അദ്ദേഹം പറഞ്ഞു: “തങ്ങളുടെ വാർഷിക കൺവെൻഷനായി ഒരുങ്ങവെ യഹോവയുടെ സാക്ഷികൾക്കു നേരിടേണ്ടി വന്ന ബുദ്ധിമുട്ടുകളെ കുറിച്ചുള്ള വിവരണം നൽകുക വഴി, [അവരുടെ നേർക്കുണ്ടായ] അനീതി നിറഞ്ഞ പെരുമാറ്റത്തെ നിങ്ങൾ [വെളിച്ചത്തു കൊണ്ടുവന്നു].”
അദ്ദേഹം തുടർന്നു: യഹോവയുടെ സാക്ഷികൾ “ലോകമെങ്ങും (ഇപ്പോൾ റഷ്യയിലും) നന്നായി അറിയപ്പെടുന്നവരാണ് . . . ദയയും സൗമ്യതയുമുള്ള, എല്ലാവരോടും നന്നായി ഇടപെടുന്ന, സത്സ്വഭാവികളായ ആളുകളായിട്ടാണ് അവർ അറിയപ്പെടുന്നത്. അവർ ഒരിക്കലും മറ്റുള്ളവരുടെ മേൽ സമ്മർദം ചെലുത്തുന്നില്ല. മറ്റു മതവിശ്വാസികളുമായി, അവർ ഓർത്തഡോക്സ് ക്രിസ്ത്യാനികളോ മുസ്ലീങ്ങളോ ബുദ്ധമതക്കാരോ ആയാലും ശരി, സമാധാനത്തിൽ പോകാൻ അവർ ശ്രമിക്കുന്നു. അവരുടെ ഇടയിൽ കൈക്കൂലി വാങ്ങുന്നവരോ മദ്യപാനികളോ മയക്കുമരുന്ന് ഉപയോഗിക്കുന്നവരോ ഇല്ല; കാരണം വളരെ ലളിതമാണ്: തങ്ങൾ പറയുകയും പ്രവർത്തിക്കുകയും ചെയ്യുന്നതിലെല്ലാം തങ്ങളെ വഴിനയിക്കാൻ അവർ തങ്ങളുടെ ബൈബിളധിഷ്ഠിത വിശ്വാസങ്ങളെ അനുവദിക്കുന്നു. ലോകത്തിലെ ജനങ്ങളെല്ലാം യഹോവയുടെ സാക്ഷികളെ പോലെ ബൈബിളനുസരിച്ചു ജീവിക്കാൻ ഒന്നു ശ്രമിക്കുകയെങ്കിലും ചെയ്താൽ മതി ക്രൂരമായ ഈ ലോകത്തിന്റെ മുഖച്ഛായതന്നെ പാടെ മാറിക്കിട്ടും.”
യഹോവയുടെ സാക്ഷികളെ കുറിച്ച് അന്വേഷിക്കുകയും അവരുമായി നേരിട്ട് ഇടപെടുകയും ചെയ്തിട്ടുള്ള അധികാരികൾ മുകളിൽ നൽകിയിരിക്കുന്ന വിവരണത്തോടു യോജിക്കുന്നു. ഉദാഹരണത്തിന്, അത്തരം അധികാരികളാണ് റഷ്യയിലെ സെന്റ് പീറ്റേഴ്സ്ബർഗിലെ മനോഹരമായ പുതിയ രാജ്യഹാൾ പണിയുന്നതിനുള്ള അനുമതി നൽകിയത്. കഴിഞ്ഞ സെപ്റ്റംബർ 18-നു നടന്ന അതിന്റെ സന്തോഷകരമായ സമർപ്പണവേളയിൽ 2,257 പേർ കൂടിവന്നു. കൂടാതെ മറ്റൊരു 2,228 പേർ സെന്റ് പീറ്റേഴ്സ്ബർഗിലെ രാജ്യഹാളുകളിലും അടുത്തുള്ള സൊൾന്യീച്നൊയിലെ യഹോവയുടെ സാക്ഷികളുടെ ബ്രാഞ്ച് ഓഫീസിലും ഇരുന്നുകൊണ്ട് പരിപാടി ശ്രദ്ധിച്ചു.